والقال ليهو منو فاروق ما عندو قبيلة ؟ !!!

فى بوست العزيز النصرى امين
البشير يختو قرض مع فاروق أبوعيسى (فيديو نيالا)
كتب العزيز الامين موسى بشارة
ســـلام .. شكرا لجلب الفيديو
والله لي ساعتين قلبت الدنيا فوق تحت بفتش في الخطاب التحفة دا
البشير قال : فاروق ابو عيسى ما عندو قبيلة وحزب الأمة والحزب الاتحادي وراهم قبائل
وبعدها قال قوموا الى رقصكم يرحمكم الله
كل يوم يتكشف تكريس الانقاذ عبر قادتها للقبيلية والعنصرية في السودان
فسخوا نسيجنا الاجتماعي عبر هذه النعرات البغيضه
وهنا يتبين أنها جزء أصيل من سياستهم ومنهجاً يتبعونه ويسيرون على هـداه
الانظمة والحكومات الى زوال مهما طال بها الأمد وتبقى الضغائن والقبلية والعنصرية
يتوارثها الاجيال جيلا بعد جيل ... ولك الله يا شعبي


وجاء صاحبى اساسى وما قصر ملانا ظلام
قال
التحية للرئيس السوداني الفريق عمر حسن احمد البشير , فالحقيقة انتم الذين تهطرقون وتضحكون علي خيباتكم و تبدون نواجزكم علها تصرف النظر عن سؤاتكم , عمر البشير البتقولوا بهطرق دا رئيس لاكثر من عشرون عام للسودان وهي مدة في الحكم لم تتأتي لرئيس سوداني من قبله , فمن الفاشل الذي يهطرق انتم ام هو ؟
كونه يا النصري يذكر فاروق ابو عيسى فدا لانه فاروق ابو عيسى صاحب المنصب الرفيع في قيادة التجمع المعارض طوال العشرين سنة الفيها عمر البشير رئيس فما شايف غضاضة في ذكره لفاروق ابو عيسي , كونه الاخرين يمررون رسائلهم لمن يريدون دون ذكر اسماء فلانهم يخشون شيئا اذن من القوة ان تذكر من تريد ولا تخشى شيئا وهو ما فعله البشير في هذا الخطاب
شريعة شريعة يا بشير
واي واحد عنده مشاكل في دينه او مع ربه يحلها لينا بعيد من السودان

انا اتداخلت بى رد على معاوية المدير
هببشنا فيهو هويتنا شوية وحكاية القبيلة دى
شكلو راس السوط وصلنا
كتبت انا :::

Quote: الغريبة يا النصري في الزول دا، إنو شايف نفسو
بتاع شريعة، ودين،


لكن يا المدير اظرف حاجة انو بقول الدين بتاعنا
الدين بتاعنا الدين بتاعنا فكفانا شر القتال ...

بعدين يا ساسنا وياراسنا مقارنتك بتاعة العشرين سنة
ما موفقه فاروق ببنى فى مجده طوبة طوبة طوال 80 عاما
شنو مقارنتها بزول اغتصب سلطة بالقوة ؟؟ وحرسها بالسلاح
وبالبطش ؟ دا ذى لما بطل من ابطال القوة يلمو فيهو افراد
مسلحين ويقولوا لى ما قلت بطل !! شفت المنظر بتاع تايسون
لما قبضتوا الشرطة ؟ تانى مافى منطق عضلات ..
يعنى هسه انت داير تقول للفلسطينين قوموا كدا ما عندكم كلام
ولا منطق لانو الاسرائيليين ديل رجال وقاعدين من سنة 48 فى ارضكم ؟؟
وانت بتهطرقوا ساى وبتطقعوا بالحجار ذى المجانيين ؟؟؟
بتقارن بى زول بعمل سييف لى قروشو المن عرق جبينو وحام واتغرب
فى شبابو عشان يلمها بى زول تلب حيطة وسرق قروش وثروة
وبفشر على الاول ؟
فاروق ابو عيسى اتفقنا او اختلفنا معاه راجل عصامى
بنى نفسه وعمل اسمو بى جهده وفكره ذيو وذى كتيرين
ممكن يكونوا بحملوا
الفكر الاسلامى حتى ..








ــــــــــــــــ
ومنو القال ليهو فاروق ما عندو قبيله ؟؟
قبيلة المهاجرين دى القبيلة التى حملت لواء العلم فى السودان
وهم اصحاب الثروة والسلطة اينما وجدوا حتى الان امكن يكونوا
شوية بس هم ذى اليهود نافذين ومؤثرين ومسيطرين لوووووب
قول لى بس اتلفت جمبك وعدهم شوف كم واحد حولك منهم ؟
تقول لى قبايل !! كدا اسمحوا لى نفت كلام القبايل دا فى بوست
منفصل عشان ما نحرف البوست

اولا خلونا نثبت حقايق
يا قول الرئيس ثوابت ::
مش الناس الحمر بس اصولهم من بره السودان
الكثيير من قبائل السودان من البلاك اصولهم من برا السودان
فالسودان دوله فى شكل قاره (كان زمان طبعا) عندها سيعمية جار
وكل دول الجوار دى فى تشابك واختلاط تام مع قبايل السودان








ـــــــــــــ
بالله اولا ححدوا لينا معنى القوة شنو فى القبيلة
عشان نجيييكم نحن بالاعذار .

+ولا تنابذوا ب........

بالله رئيس جمهورية يعير وينبذ بالقبيلة

يبدو ان المرة القادمة حايقول كلمات

شوارعية

والمؤسف ده كلو باسم الشريعة

لماذا لا يجرب يجرب ويختبر فاروق القضاء ويفنح بلاغ

وهو المحامى الضليع وقد خبرته المخاكم فى قضابا

اكثر تعقيدا

فليبادر الاخ فاروق وليذهب للقضاء وليضعهم امام ضميرهم

Quote: فاروق ببنى فى مجده طوبة طوبة طوال 80 عاما

Quote: فاروق ابو عيسى اتفقنا او اختلفنا معاه راجل عصامى بنى نفسه وعمل اسمو بى جهده وفكره

اهااا

أصابت (إمراه) وأخطأ (عمر)

ياخ الكلام ذاتو لازم يكون فيه دبلوماسية
حزب مهندسينو ومفكرينو
ناس غازى صلاح الدين
وعبد الرحيم حمدى
اجدددددددددددع ناس ..
قبائل تهز وترز
ولا دى سياسة الحمره الاباها المهدى ؟

يا رؤوف جميل غايتو دى محنة كبيرة
خلاص .. اريتها كان بقت على التنابذ
دى بس اسمها البتجى من السما تحملها الواطة ..





ــــــــــــــ
شنو معيار التفرقه؟ بالقدم ؟؟ يعنى الناس الاقدم هم
الاحسن ؟ الما اختلطوا ولا الخليط هم الاحسن ؟ ولا بالتاثير ؟
الاكثر تاثيرا هم الاحسن ؟

دينا لا تسقطي في فخ التصنيفات

و تجاري تخلف الإنقاذ

فاروق سوداني و كفى!

(.........) في القبايل..

و (.........) في عنصرية البشير.

الأخت/ دينا خالد

ده السبب اللي جاب خراب البلد دي

ونهاية السودان كمان

الناس ديل العياذ بالله منهم


تحياتي

يا فاضلابى معاذ الله من الوقوع فى هذا الفخ
القبايل موجوده فى السودان
وهى مصدر فخر واعزاز لكل ناسها
القبيلة فى حد ذاتها ما عيب
لكن العيب ان يصنف المواطن على اساس قبيلته
وان تقوم حقوق المواطنة على اساس الفبيلة
واان تصبح القبيلة محل تنابز وتحقير
مصدر ضعف او قوة ..
لكن هل صحيح انو فى زول فى السودان دا
ما عندو قبيلة ...
نعنى وجود قبيلتك البتنتمى ليها ذاتها بعيد
من انو تكون كويسة ولا بطاله ضعيفة ولا قوية
وبعيد من ترتيب اى حقوق على انتماءك ليها
تمام يا فاضلابى ؟؟









ــــــــــــــــــ
خلينا نحددها مع الفرضية البنى عليها
الباطل نفسها .. وبعدين نشوف

ملاسى انت ما بنيت بيت لسه شكلك !!
مستغرب فى الطوب ؟ ولا فى ال 70 يا مجرررم !












ــــــــــــ
اها كمان دى بقت ليك غلطات
املائية برضو .. لووووب

Quote: ملاسى انت ما بنيت بيت لسه شكلك !! مستغرب فى الطوب ؟ ولا فى ال 70 يا مجرررم !

ملسى بني بيته وكمان بسطوحه التي لو غنى فيها الفنان "الجهلول" ترباس لما عشمه وصعد اليه ... تأملي!

بس ما تقولي لي ايجار

الطلامى الدامس اساسى
ما تقتبس كلامى .. اكتب براك










ـــــــــــــــ
مالك ؟ ما بتعرف تكتب ؟
ما نضاااام ومالينا ضلام

مؤسف ان تكون القبلية هي اساس للمواطنة

من قال ان فاروق ابو عيسى ليس له قبيلة
فاروق ينتمي الى قبيلة الجعافرة على حد علمي واعرف بعض اهله ومعارفه ممن ينتسبون الى هذه القبيلة

وبذات المعيار المقلوب.. جميل ان يكون فاروق قيادي في تجمع فيه احزاب عندها قبائل على حد قول البشير.

هسه يادينا لو عايزين نصنف قبيلتك من واقع الصوره الخاتاها
فى بروفايلك دى حنقول إنتى من قبيلة هوليوود, وينوالعيب هنا ؟
ياربى أين موقعكم الجغرافى فى المليون ميل مربع الذى كان ؟

Quote: القبيلة فى حد ذاتها ما عيب لكن العيب ان يصنف المواطن على اساس قبيلته

يستاهل فاروق أبوعيسى ,, هو البخليهو يبارى الجداد شنو ؟

هسه فى ى ى ى البورد دا
كان جينا لى حصر قبيلة ابو عيسى دى
قولوا انا واحد
حسين ملاسى اتنين
كمال سالم ثلاته
قيل ثم من قالوا اساسى ...








ــــــــــــــــ
قال من برى قال !!
هسه برى دى قبيلة ليك ؟

امير فتحى !!
مرا فى عينك ,,

الأخت دينا خالد

ســـلام وجمعة مباركة
الســودان دولة متخلفه تنتشــر فيها الأمية بكثرة
ولذلك تفكير الناس فيها لا يكاد يخرج عن التفكير في مثل هذه الهطرقات
فلا تتعجبي إن جاءت تلك الكلمات من أعلى رأس الهــرم
خلال العهود السابقة يا دينا لعبت القبلية دوراً مهما في الحياة العامة والحياة السياسية
فلو عايز تتوظف تلجأ لخالك أو عمك او اقرباءك من الدرجة الأولى لكي تنال منصبا او وظيفة
برغم ذلك لم تكن القبلية ظاهرة كما هي في نظام الانقاذ الآن
هناك قوتان يلجأ اليها كل ســوداني حينما تضيق به الســبل
أولها الحزب او التنظيم الذي ينتمي إليه وثانيها هو القبيلة ولو ملاحظة معظم اعضاء البرلمان جاءوا على أسس قبيلة
وليس على أسس فكرية أو عقائدية ولذلك أي زول فيهم مشى اترشح عند أهلو
قوة القبيلة أكبر نفوذا من نفـــوذ الحزب او الفكرة او الايدلوجية ولذلك سيطرت وهذا ما دعى البشير
ليقول أن فاروق ابو عيسى ليس له قبيلة وفي مكان آخـــر قالوا عليه قرد طلح
هذا لا يقــدح في فاروق أبو عيسى او ينقص من قدره وانما يزيده فخرا أنه وصل لما وصل إليه دون الحاجة الى قبيلة
لو لم نتخلى عن القبلية والدعــوة لها وترويجها أطــرح هذا التســاؤل:

لماذا لا نقسم السودان هذا على أسس قبلية ونرتاح من المشاكل دي
كثيراً ما كنت أســأل نفسي هذا الســؤال .. لماذا وقت اصلا مشكلتنا قبلية بحته ليه ما نقسم السودان
ونتحاصص المناصب والثروة على هذا الاساس ونفضها ســـيرة ووجع قلب
ما اصاب النسيج الاجتماعي في زمن الانقاذ من تأصيل للقبلية والعنصرية ستمتد آثاره لأجيال قادمة
وستنتج عنه احقاد يتوارثها الاجيال أعني ما أقــول تماماً مهما كنت تمتلك من الشهادات فلا سبيل لك
للوصول الى بعض المناصب في بعض الوزارات ما لم تكن من القبيلة الفلانية او العلانية
واما الخطاب المترجل لسيادة الرئيس فلا أملك إلا أن أقــول "قرموني" أو عجبي كما تقول الأحباش

ابقى طيبة

عملتوا لينا شنو فى النكتة بتاعتنا الفوق دى ؟

رؤوف جميل دا الليلة محموم ولا شنو ؟
يقاضى منو يا زول ؟ قول بسم الله !!












ـــــــــــــــ
والله القاضى يقدم استقالتو برااااهو
ويتكل على الله ويشتغل فى السوق ..
قول كلام غير دا

عبد العزيز عيسى
كلامك صاح مليون المية
بس كونها تجى من الرئيس ذاتو
دى واسعة شوية ..
الرئيس بتكلم عن حقوق مواطنة
مبنية على قبلتك !! تصدق ؟
زمان قالوا واحد من الساسة المعروفين الانتماء
كتب ايام الجاهلية سنة 69 وكان وقتها وزيرا للخارجية
بلادى لم تعد ارضا لاسمر
ارض فاروق وموريس وبعشر
لوووووووووووب







ــــــــــــ
فاروق فى القصيدة اعلاه هو ابوعيسى
موريس ما عرفتو
بعشر الطبيب النفسانى يا( قول المصريين) المعروف ..

كلام ذىىىى الدهب يا البشاري

اختي العزيزة منال
كل سنة وانتي طيبة

Quote: موريس ما عرفتو

موريس سدرة القبطي كتن ويرا للصحة ايام ((الجاهلية))

دينا ازيك
قبيلة الجعافرة قبيلة عربية اصيلة تمتد من اليمن حيث اصول القبيلة الى السعودية وتحديداً جنوبها مروراً الى مصر ثم السودان وحتى العراق التي وصل ابنها ابراهيم الجعفري الى رئاسة الوزراء.
غايتو بختكم مشاكلكم اتحلت واموركم ظابطة والمواصلاااااااات فاضية بس باقي ليكم تصنيف الفيفا حق القبايل وكما قال المثل الفاضي يعمل قاضي والمثل التاني البلقى الهواء بضري عيشو.
يا سيد جنوب وانفصل ودارفور على نفس الطريق وبعدها الشرق وبعدها الشمال ونحن ناس النص ديل ان قعدت لنا غايتو للوكت داك النجهز القطران وزيت السمسم من هسي.

زمراوى الولى
ايواااا انا الاسم دا سامعه بى
عندو اولاد دكاترة لسه
من الاقباط السودانيين صاح ؟

لكن ما عرفت القائل بتاع بيت الشعر ؟؟
يا انا وصفتو ليك قررب يقول باع .. لووووب


محمد عمر الفكى
اهااااا شفت الكلام بتاع عربية اصيلة دا البجيب
ليك الهوا من القبائل الدخلت السودان من العرب
كدا الكلام بكون مظبوط ..
قلت لى كلام قبايل دا تانى نفتش لى ما نلقى ؟
ناس دينق مشوا خلاص
وناس هبانى ماشين
غايتو اطول صف ح يكون بتاع بشاشا
ح ينتظر لما راسو يسخن عشان ينفصل بى دولة كوش
لوووووب يا بشاشا لانو القصة دى بتقع من الجنوب
وانت ماشى ..







ــــــــــــــــ
شكلو التقل قدام ..

قبيلة الأستاذ فاروق أبوعيسي تتكون من :

1- جماهير أكتوبر 1964 والتي كان فاروقا أحد مهندسيها ... وقائدا لليلة متاريسها.
2- جماهير الكادحين والمهمشين ... الذين يدعو أبوعيسي لانصافها وتطبيق مبدأ العدالة لتنال حقوقها.
3- الجماهير التي يناضل أبوعيسي لتنال حقوقها الانسانية ... وفي سبيل ذلك نال قسطه من المتاعب والمعتقلات.
4- الجماهير التي يدعو لها الأستاذ لتسود قيم العدالة الاجتماعية والاشتراكية والحرية.
5- جماهير القانونيين الذين حملوه علي الأعناق ليتبوأ الأمانة العامة لتنظيم المحامين العرب لثلاثة دورات متتالية.
6- جماهير قوى الاستنارة والديمقراطية.
7- ................................................. الخ



تحياتي لك أستاذة دينا .... ولجميع ضيوفك.

لووووووووووووووووووب يا كمال سالم
هو الجداد قاعد فى الواطة لكن ؟؟













ـــــــــــــــــــــــــــ
غايتو ابقوا افزعونا يا ناس بره

يا قباشل فاروق اتحدوا
رؤوف جميل
سودانى عجوز
عاصم فقيرى
وتانى منو تانى منوووو ؟









ـــــــــــــــ
داليا حافففففففففففظ ..
وعزاز شامى غايتو على ذمة الشعر

"الرئيس" عمر البشير لما هاجم "الرئيس" فاروق ابوعيسى كان يقارن بين "رئيس" و"رئيس".
عمر البشير رئيس الجمهورية.
فاروق ابوعيسى رئيس قوى الاجماع الوطني التي تضم كل الاحزاب السياسية ما عدا المؤتمر الوطني الحاكم والذي يرأسه عمر البشير.

شوفي المقارنة دي من ناحية عددية.
فاروق ابوعيسى يرأس تجمع احزاب الامة القومي والاتحادي الديمقراطي والشيوعي وغيرها.
كم عدد مؤيدي قوى الاجماع الوطني؟

عمر البشير يرأس المؤتمر الوطني والجمهورية المغتصبة.
كم عدد مؤيدي المؤتمر الوطني في ظروف طبيعية ونزيهة وحرة؟

عمر البشير زعل من وصف فاروق ابوعيسى لالفاظ عمر البشير بالسوقية.
عمر البشير قال العايز يسقط النظام اسهل له ان يلحس كوعه. بمعنى استحالة اسقاط النظام.
تقدري تلحسي كوعك؟

إذن هذا تحدي بين عمر البشير وفاروق ابو عيسى.
فاروق مع قوى الاجماع الوطني مع اسقاط النظام.
عمر البشير والمؤتمر الوطني مع لحس الكوع.

والكورة الآن في ملعب الشعب الشمالي.
فريق الاسقاط ضد فريق لحس الكوع.

الحكم منو يا ربي؟ ما مرشي؟ الكورة ما فيها خج؟

نحن نؤيد اللعب النزيه. fair play

شغلك نضيف يا عادل عثمان









ــــــــــــــــ
انت قبيلتك من وين ؟؟
لوووووووووب عليك

Quote: موريس ما عرفتو

اها موريس سدرة دا برضو زي مرة سعد زغلول
ما عرفتيهو ليــــــــــــه
مفروض تعرفيهو
مرفودة خمسة يوم و تجيبي معاك ولي امرك و انتي راجعة

لكن
الغريبة التلاتة كانو هنايين الوكت داك

امجد اليسار ياخ
ومرت زغلول اعرفها لييه ؟؟
نسيبتى ولا قاطعة لى الماهيه؟
اقول ليك كلام وما تضحك فينى
انا سعد زغلول ذاااتو قوقلتو








ـــــــــــــــــــ
هنايين كيف يعنى ؟
اشرح درءا للتاويلات
اصلو الناس هنا اواااليييين وكيلك الله !

عاطف مكاوى عداك العيب
ديل كللللهم ما باكلو عيش
قبيلتئذ











ــــــــــــــ
كلهم ممكن ينكروك حطب
الفبيلة هى المهم والناس جميع ما مهم

قبيلتي من وين؟
انا ديناوي. نسبة لدينا خالد.
كل سنة وانتي طيبة وذكية وجميلة.
هديتي والعام الجديد يكاد يولد من مخاض 12 شهر

دينا خالد
سلام
Are you reinventing yourself again or what
أنت مش نفس الزول الكتب بوست عنوانو بيجزم بعدم صلاحية أمهاتنا
وأخواتنا للزواج بسبب إنتمائهن لمجموعة عرقية محددة؟؟
ومش لما أتزنقت إدعيت الأنتماء لنفس المجموعة العرقية ؟؟؟

طيب الفرق شنو؟؟؟

أهلنا البسطاء مامهم يتنبزو بسب أصلهم.. و أمثال فاروق أبو عيسى لا؟

شكرا.. فهذا دليل آخر على نسبية الأخلاق عند بعض مثقفى ما يسمى باليسار السودانى وإنفصامهم؟؟

مبروك بمناسبة السنة الجديدة:
فهم جديد وقبيلة جديدة.!!!

بس للذكرى فقط..:حق رد الأعتبار لا يسقط..

العرس جعليه ناسب وما عرس .


?????????????

تحياتى
وكل سنة والجميع بخير
سيف مصطفى
٣١ ديسمبر

عفيت منك يالبشير

قبيلتي وقبيلتك مامهم

نفيلتي ونفيلتك المهم وتبارك شيخ الدين

خذو الحكمه من هذه (الحرمه) ونصف دينكم الخالد من الحميراء

امير فتحى !!
والله ذكرتنا الحميراء
هسه ياربى يكون ابو عيسى منهم ؟

عادل عثمان
هدية بتشبه كل حاجاتك الجميلة
افرحتنا .. وكل سنة وانت طيب


سيف !!!
بالله انت قايل نفسك زنقتنى ؟؟
انا اتحاشيت مجاراتك عشان ما نمرق
من روح البوست اياهو فى وقتو داك
باعتبارك كنت عارض خارج الزفة ..
وقلت ح تفهمها براك .. لكن شايفه جابت
ليها ادعيتى واتهمتى واتزنقتى وكدا
لسه برضو ح اخليك لما تفهم براك ..
وشكرا لباقى الكلام
والبوست الظريف

عثمان كرار
انت شمتان فينا ؟؟

طيب القوى السياسية التى دعاها البشير
لتشكيل حكومة عريضة رئيس تجمعها هو فاروق
فما العمل ..









ــــــــــــــــــ
ح يشتروا لى قبيلة .. ؟؟

دعاها في ذات رقصة ساي كدا
زي اي دعوة في مطعم ايطالي ما تلزمو باي التزامات اخرى
ممكن ارقص معاك الرقصة دي يا معارضة ؟

وطيعا يا امجد المعارضة القلب مييت
قالوا لى
جدا ..









ــــــــــــــــ
اصلوا ما دايرين يخلوا يشيل شيلتو
فى ناس كدا مصرررين يشيلوها معاه ..
الغريبة بى قبايلهم ..!!

المعارضة مش قلبها ميت يا دينا
القصة انو الجلابة ديل
دمهم بيحن

القصة صعبة ياخ

يا امجد رقصتئذ كل زول يشوف زولو
الدم دا الا يلقطوا لقييط













ــــــــــــــــــــــ
وما شفتوا اححمد اخوى يااا جلابة
توبو توب حرير ياااا الجلابة
اخدر طوييل يااا جلابة ..
امجد سودانيز يااا جلابة ..

Quote: يا قباشل فاروق اتحدوا رؤوف جميل سودانى عجوز عاصم فقيرى وتانى منو تانى منوووو ؟

والله إحنا مع الطيور الما بتعرف ليها قبيلة ولا في إيدها سياط عنج

Quote: داليا حافففففففففففظ ..

يعني كان سألوني أنت من وين عااادي أقول من مقابر فاروق ؟



ــــــــــــــــــ


قبر الله القبلية ..

الاخت داليا حافظ

Quote: ومنو القال ليهو فاروق ما عندو قبيله ؟؟ قبيلة المهاجرين دى القبيلة التى حملت لواء العلم فى السودان وهم اصحاب الثروة والسلطة اينما وجدوا حتى الان امكن يكونوا شوية بس هم ذى اليهود نافذين ومؤثرين ومسيطرين لوووووب قول لى بس اتلفت جمبك وعدهم شوف كم واحد حولك منهم ؟

بعيد عن السياسة ...بس ممكن اعرف منك شئ عن قبيلة المهاجرين ...عشان اهتمام اخر غير الموضوع اعلاه ؟؟

ياااا عاصم فقيرى !
اقتباس :: والله إحنا مع الطيور الما بتعرف ليها قبيلة ولا في إيدها سياط عنج

بسسسسسسسسس خزلتك احنا دى ..
فضل ليك شووية وتنصهر وتبقا جزء من القبايل دى ..
واااصل كفاحك وخليك حريص فى النظق








ــــــــــــــ
قوية لكن يا عاصم .. ودا المهم بلا قبايل
بلا وهمات ..

داليا حافظ
بسسسسسسس وصلتى الملك فاروق سخسيا ؟؟
جيتى محل الهملة ذاااتو
اى مقابر فى السودان بكون مدفون فيها شيخ ولا ولى ..
شرفى ،، حمد النيل ، البكرى ، انتو بكرى دا منو ؟
الا فاروق دى بدفنو فيها الجماعة ..
الملك فاروق ذاتو ما مدفون فيها ..








ــــــــــــــــ
لكن رايك شنو فى الموقع !!

صديق مدثر ..
اقتباس :: بعيد عن السياسة ...بس ممكن اعرف منك شئ عن قبيلة
المهاجرين ...عشان اهتمام اخر غير الموضوع اعلاه ؟؟ )

يعنى يا صديق اى شخص جذورو من برا السودان ينسب الى قبيلة
المهاجرين .. شفت القبيلة دى ضخمة كيف ؟؟
اراهن على انها ستكون اكبر من قبايل السودان مجتمعه .. !!








ــــــــــــــ
ادفع لينا فى البحث دا ياخ
كلو كتبنا ليك ..

اووووعو تجبرونا على الانفصال
لانو نحن لو قلنا كدا انفصلنا
مثلث حمدى ذاتو ح يتلحس

اعملوا حسابكم وما تستفزونا !!! سمح؟










ــــــــــــــــــــ
شغلوا لينا الدبكة دى خلونا
ال نصوقر يا قول ود الباوقة ..
بالعدم جيب يا طارق مرغنى الود بوب مارلى
انت يا طارق مش برضو من قبيلتنا .. لووووب
خليك عامل مدسى ورا الافريكان ديل ..

Quote: بسسسسسسسسس خزلتك احنا دى ..

يا دينا، صباحك قشطة (إشطة)

بالمناسبة (إحنا) دي عشان إنتي تفهميها يعني مخصوص كان ممكن أكتبها (نحنا) لكن قلن أسهل عليك اللهجة شوية

وسلام مربع

هههههههههههههههههها يا فقيرى
برضو حريف يا بن النييل
اجددددع ناس ..









ــــــــــــــــــــ
اسكككت صوقر فى الدبكا دي
صوقر ما براكا كلنا معاكا ..
والحق الصوقير هناك فى الجزء الجنوبى
وهم يضربون الارض Survivaaal Survival
سيرفايفل سفايفااااا سرفايفااااال

عارف يا دينا البشير ده انا كل يوم بتكيف ليه اكتر ( الكلام ده خارج نطاق القبليات وسودانية فاروق )

ياخ ده زول حقار خلاس


امبارح حضرت مقابلته في الجزيرة .. مع انها ما كان فيها اي دبلوماسية او سياسة ولا عندها علاقة بالرئاسة

لكن اصدق القول كيفني جدا ... ياخ ده زول واضح مع روحو بصورة غريبة خلاص ... اي سوال رد عليه تووووووووووووووشك
بكونوا الخواجات وبتاعين المعارضة بحللوا فيه لي هسع

الزول ده قنعاااااااااااااااااان

وقال للناس كلها
انا بسوي وبقول كده والدايرن تعملوا اعملوا


اكتر حاجة اتكيفت وكت هرش المزيعة في موضوع الفتاة المجلوده
البت من الخلعة لونها بقى ابيض زيادة
والله عيونها بقوا في نص راسا


والله انا بحب الناس العجاباهم روحهم صراحة لي الله

ومشختين لي اي زول

لكن يا وليد ياخ الكلام دا ما كويس منك
(الوش دا بتجيبو كيف بالتعب الزمان داك كلو ؟)
ياخ ابوصلعة دا اخير منو الرئيس !!! لووووب
الكلام دا ما كويس منك يا وليد ياخ !










ـــــــــــــــــــــــــــ
ولا منو ...

ولله يا دينا
كلام وليد صاح ، الزول دا قنعان لدرجة انو قرارو بقا واضح ذاتو
to go all the way down
و البيعمل فيهو دا ياها ذاتها حركات نيران
موسيقى و نيران

لكن للامانة البت المذيعة عصرت عليهو شديد

هو فى الحقيقة قال
On and on my enemies
لوووووب امجد








ــــــــــــــــــ
غايتو انا ما بعرف بتشوفوا
الحاجات دى كيف !!

صباح الفل

بالمناسبة رأفت ميلاد فاتح ليهو بوست بهناك بيسأل عن صلاح قوش


غايتو بعد إذنك قدمت ليهو دعوة يجي بهنا ويعلق لينا عن ما أصاب قبيلة المهاجرين على قولك

فرأفت ميلاد سوداني أصيل


حضرتني قصيدة لنجم المصري كانت تقدم كمقدمة لمسلسل من إخراج أسامة أنور عكاشة

بالقصيدة بيت يقول: (خواجة يني إغريقي بس مصراوي جني)

شفتي الناس ديل في شمال الوادي بطوعوا اللغة كيف عشان تخلق التعايش

ويقال أن الخواجة يني كان يحمي المتظاهرين ضد الإنجليز من الطلبة وهو كان تاجر في إسكندرية (زيزينيا) وذلك بإيواءهم في بيته حيث لا يشك الإنجليز في وجودهم في بيته

فكان إغريقي ولكنه كان مناضلاً مصرياً


أها الثقافة الزي دي عندنا مافي ولا شنو !!؟؟

فوتك بعافية

عاصم فقيري

العزيزه لينا

يا اخيتي العنصرية والقبلية من اكبر مشاكل الدول المتخلفه

ولو لم تنتهي ما تقدمنا قيد انمله

زمان لما نعمل مشكله مع واحد طوالي يقول ليك بالله شوف الحلبي دا

يعني معايره باللون

هسع السودان كلو عايز يتفسخ ويبقي ابيض

شي كريمات وشي حبوب

ما قلتو نوبه ....!!!

هاكم المقال دا من الراي العام عدد الخميس 13 يناير 2011

Quote: د. محمد ابراهيم الشوش علامات استفهام القبلية والجهوية وبئس الحل ! بيني والأخ راشد عبد الرحيم ود قديم لا يفسده اختلاف. وقد ربطت بيننا مؤخراً مفاهيم مشتركة ظلت تقترب حتى أوشكت أن تصدر عن عقليتين يكتبان بقلم واحد ويصدران عن رأي واحد. وفي عدد (الرأي العام) الأخير وعبر مقاله الرائع أسلوباً والناصع بياناً كما عهدناه، بحثت عنه فلم أجده، وفتشت عنه عبثاً في ثنايا الأسطر والحروف والكلمات فلم أعثر له على أثر. الصحيفة هي نفس الصحيفة، والكاتب هو نفس الكاتب والمقالة في مكانها المعهود تتصدر منتصف الصفحة الأخيرة ولكن المسافة بين فكرينا تتسع. تأملت العنوان جيداً «حكومة مواكبة لا قومية». الأستاذ راشد هنا يدعو إلى حكومة مواكبة ويرفض فكرة الحكومة القومية. وفي الجانب الأخير من معادلته نتفق تماماً، فالذي تطلبه المعارضة التي فشلت في الوصول إلى الحكم عسكرياً وتعاملاً مع الأجنبي وتذللاً للحركة الشعبية منحها جرأة على ممارسة أكبر خدعة في التاريخ، ثم دخولاً في الانتخابات ثم تشكيكاً فيها وانسحاباً منها بأمل سقوط البناء كله والآن تمرداً لا تملك له قدرة ولا استعداداً. وتريد الآن أن تحمل المؤتمر الوطني لحل حكومته ليستبدلها بحكومة قومية لا سلطان له عليها ولا يعرف أحد كيف يتم تكوينها. وليس في مطلبها فكر موحد ولا استراتيجية غير حنينها لسلطة لم تحسن المحافظة عليها، وتراخت قبضتها حتى كان رئيسها هو الوحيد في السودان كله الذي لم يكن يعرف أن هناك إنقلاباً وشيكاً لا يختلف الناس إلا في وجهته وميقاته. ولقد قرأت وشاهدت وتابعت فلم أسمع عن معارضة تطلب من حكومة في بداية فترتها التنازل وتكوين حكومة قومية هكذا من أجل عيون المعارضة، وإنما تتنازل الحكومات لعدم حصولها على الأغلبية أو بسبب فقدان الثقة في البرلمان أو نتيجة إنقلاب عسكري ناجح أو انتفاضة شعبية تطيح بها. وما سمعنا بحكومة سقطت لأن معارضاً توعد باسقاط النظام وهو لا يملك لذلك سبيلاً أو يهدد بإعتزال السياسة. فالأستاذ راشد حين يرفض فكرة القومية فإنما يقرر حقيقة واقعة، أما حكاية حكومة مواكبة، فلم افهمها لا من العنوان ولا من السياق. وعلينا أن نقبل تفسير الكاتب الذي يذكرنا بأن الإنفصال سيفضي إلى شواغر في مواقع السلطة. وهو يرى أن يستفاد من هذه الشواغر في إرضاء كافة العنصريات والقبائل والجهويات المختلفة (وذلك مستحيل). وهنا نختلف أشد ما يكون الاختلاف. أولاً ليس هنالك ولا ينبغي أن يكون هناك أي شواغر في إطار سياسة التقشف التي أعلنتها الحكومة والتي سقط العبء الأكبر منها على الشعب المنهك أصلاً، بل تشمل الخطة تخفيض عدد الدستوريين ومرتباتهم وامتيازاتهم ويعني ذلك الحاجة إلى مزيد من التخفيض. وإنما يكون هنالك شواغر إذا وجد حد معين يمليه الدستور أو القانون أو الحاجة والناس يتحدثون عن فائض يزيد عن الحاجة في بلد انتقلت فيه كثير من الأعباء إلى الحكومات الولائية. ويزيد من شقة الخلاف أن الأخ راشد يريد أن تملأ هذه الشواغر بأفراد تزكيهم للوظيفة انتماءاتهم القبلية والجهوية. واختيار الوزراء وفق انتمائهم القبلي والجهوي يعني عملياً نهاية الدولة وسيادتها، إذا يصبح كل مسئول خاضعاً لسلطة الجهة التي اختارته أو اختير لإرضائها ولا يخضع لسلطان البرلمان أو رئيس الدولة، وقد رأينا كيف أن وزراء الحركة الشعبية كانوا يمارسون سياسة مستقلة عن الحكومة ورأس الدولة. وعندما يفيق الناس من هول الصدمة سيدركون أن المشكلة الكبرى التي خلقتها اتفاقية السلام ليس تقرير المصير الذي أدى إلى الانفصال وإنما وضع سابقة خطيرة لإختيار الوزراء على أسس جهوية جغرافية. واختيار الوزراء الجدد من قوى خارج نطاق الحكومة كما يقترح الاستاذ راشد يؤدي إلى حكومة متعددة الولاءات أي لحم رأس بلا رأس.

شكرا يا عاصم لرفدنا بالمقال

بجيهو هسه ..

Quote: زمان لما نعمل مشكله مع واحد طوالي يقول ليك بالله شوف الحلبي دا يعني معايره باللون هسع السودان كلو عايز يتفسخ ويبقي ابيض شي كريمات وشي حبوب

لوووووووب يا طارق
واستلمو منكم الاسامى ذاتها طارق وائل سمير
لؤى هانى جميل سامى وليد سمانى لووووب وكدا

واحد صاحبنا مرة مشى لإحدى القنصليات يجدد جواز سفره

سأله ضابط التصاديق:جنسك شنو ؟

فرد عليه: الجواز دا مكتوب فيهو شنو ؟

قال الضابط: أنا قصدي قبيلتك شنو ؟

فرد صاحبنا (كان مركب مكنة دينا): جنس قبيلة واحدة ما عندي، أها بتسوي لي شنو؟ وهل من حقك عشان تصدق تجديد الجواز أن أكون من قبيلة بعينها؟


________________________-

شايفين جنس المحن دي !!