ألمــانيا يا روجينا ...! إلي حسن الجزولي والي روجينا في غربة الأوطان ...!

فـ نــكتب نــقول شنو بس يا حسن ؟


حثني صديقي الأستاذ حسن الجزولي للكتابة عن استقلال السودان كان ذلك قبل شهر ونيف من يومنا الموعود هذا وأنا خارج من مكتبه تناقشت وصديقي (محمد محمود) في كثير صور تستحق أن تخرج للناس ، الآف حكايات ترقد باطمئنان في صدور رجال ونساء هذا البلد الطيب . قلت لــ(محمد) لن أكتب عن الاستقلال في عيدنا القادم سأحاول الكتابة عن شئ آخر لا علاقة له بالاستقلال ، جال في خاطري في تلك الأمسية صور ومشاهد شتي حتى صور المستعمر أتتني في غفلة من زمان الرخو هذا فخرجت بالآتي نصه :

(1)

كان (غردون) جالساً في كرسيه الوثير ماسكاً غليونه الذهبي بيسراه أما يمناه فكانت مشغولة دوماً (بحاجات اليمين) و بتحريك جنده الذين انتشروا في بطون السودان انتشار النار في الهشيم ، يسمع الرجل عن المهدي وحصار الدراويش للخرطوم فـ(يشوف الكلام ده رهاب رهاب) حالماً باستغاثاته التي أرسلها لخواجات البلد التي لا تغيب عنها الشمس . لكنها الخرطوم يا زول (ياغردون) لا تفاوض ولا تتراجع ولا تعرف غير وجه الحق مطلباً .
والخرطوم يومها تحمل في جلابيب الدراويش صوراً شتي لنضالات شتي لرجال ونساء قهروا المستحيل في سبيل نيل حريتهم (حريتهم ليس إلا) كانت الخرطوم عبارة عن أشواق ممتدة وأحلام ما أنزل الرب بها من سلطان (وغردون) ماسكاً غليونه الذهبي بيسراه ويمناه تحرك الجنود كقطع شطرنج لا تمل الهزيمة .
والمهدي يقف هناك بحلبابه الفضفاض وعمامته المميزة يضحك في حال (غردون) منتشياً برائحة التراب التي فداها دراويشه الصالحين ، يتذكر (المهدي) في وقفته تلك حال (البلد) وحي ما أوحاه فحمل رسالته عن طيب خاطر ليخرج للناس من جزيرة في شمال البلاد شاهراً الحق قبل السيف ليقول كلمته التي رددها الناس كثيراً خلف (الأتبراوي) أنا سوداني وسوداني وسوداني أنا .... تلك الأغنية التي سار بها الركبان حتي صارت أقرب لوجدان شعبنا من نشيده الوطني المألوف .


(2)


قرأت مرةً وأنا في سني حياتي الطلابية كلاماً هزني من الوريد إلي الوريد وحملني من النيل إلي النخيل بل لا أبالغ لو قلت انه حملني بوعي لا يضاهي من فقر شعبي المدقع لعلياء الرفاهية التي حلم بها (آدم سميث) و(كارل ماركس) و (فلاديمير التش لينين) كان كلاماً بسيطاً ومعبراً أبلغ الظن أن قائله هو الشاعر الوطني أيوب مصطفي قال فيما قال (ريتا حينما ينفذ الفقراء إلي جوهر المسألة سأحدثك عن أشياء أخري) وهي حسب وعينا الوطني كثيرة للغاية فمن أين ينفذ فقراء السودان إلي جوهر المسألة يا هداك الله ؟ أمن الجوع ؟ أم من مكب النفايات والقاذورات ؟ أم من الضرائب والجبايات ؟ أم من حركات ناس البوليس ؟ أم من الفلل الرئاسية ؟ أم من أراضيهم التي ذهبت بدأً بالفشقة وليس انتهاءاً بـ حلايب ؟ أم بقضايا السدود ؟ أم من أسعار السكر والدقيق والبصل والزيت ؟ أم من خلال الاستفتاء الذي علي الأبواب ؟ أم من مآسي أهل دارفور ؟ كثيرةٌ هي مداخل فقراء السودانين يا صاحبي وموجعة للحد الذي لا تعلم (يجوك فيهو من وين ولا من وين ؟) تماماً كحال (غردوننا) ذاك .
تجيدون نقل كلاب الشطرنج لكنكم لا تعلمون البتة منو (الربحان من الخسران منو السلم صغاروا الغول) أو كما كان يتغني صاحب المواقف (أبوعركي ) في نهارات قصر الشباب الصبية . فوين المفر يوم داك ؟

(3)


ألمانيا يــا (روجينا) :

توحدت بقدرة الإرادة والنضال الدؤوب أسقطوا يا صديقتي جدار برلين بعد طول عناء و(بشاتن) ومشاكل ليعود (للألمانيين والألمانيات) (ألمانيتهم) التي حلمو بها . خمس وأربعون عاماً والشعب الألماني (يفتش) في سكك الرجعة الي أن كان يومهم الموعود في (أكتوبر) والعام تسعين ! فتأملي يا صديقة ؟
(روجينا) إمرأة من عموم أهل السودان ، لا أذكر بالضبط متي وأين إلتقينا ، المهم أننا إلتقينا كلقاء الآلاف من بني وطني ، لم تكن روجينا علي الإطلاق يا (الطيب مصطفي) حزاماً ناسفاً كما (إنتباهتك) ولم تكن من همها علي الاطلاق من يحكم السودان ؟ قدرما كانت تحمل منذ سنوات عرفتي بها هم (اللبن والرغيف والكسرة) والكرامة والسترة .
أتتنا في صباح جنائزي من صباحات (ديسمبر) لوداعنا قالت (روجينا) إنها ذاهبة للجنوب قالت إنها ستذهب (وبس) لكنها لم تحدد إي مدينةٍ ستقطن ؟ قالت بالعربية الفصحاء :
(سلاماً سلاماً) توادعنا ... إنتحبنا ... كل علي طريقته ونحن في عجلةٍ من أمر يومنا الذي بدأ بالوداع ! عجيبةٌ هي أيام السودانيين ! فكل أيام الله تبدأ بإستقبال شمس الله الاك يا سودان !

روجينا :

لا أدري أي أرض تقطنين الآن ؟ ولا عارف أي مشوار يكلفني لقاء وجهك ؟ ولا أدري يا صديقة لأي جنسية ينتمي كلانا الآن ؟ فقط أعرف أن وجه شعبي واحد لا يخون ولن . أعرف تمام العرفة أن كلينا لم يختار قدر ما إختار (العوارض) فبلغي عني أهل الجنوب السلام والتحية . وسنلتقي يا زولة (طال الزمن يا زول ولا الزمن قصر) أو كما قال حميد .

(4)


حندكنابك زمناً طيب
زمناً كلو حلال في حلال
لا في غلاط
في محمد ومريم
لا في صراع
في كنيسة ومسجد
كلنا واحد
مما قمنا
همنا واحد وما بفرقنا
للسودان الوطن الواحد شوقنا
نقرأ كتابنا
كان إنجيل
توراة
قرآن
كلنا واحد
والـ بفرزنا
يا يوم ويلو
يا يوم ليلو

ربما في زمن أجود زمنٍ أجمل سيكتب التاريخ ياحسن حاصل ما حصل للقوم السودانيين
فبلغ روحك التحايا أما روجينا فيقيني أننا سنلتقي في دروب أجمل .

مؤسف أن نكون شهود هذا الحاصل !

غاب هذا العام أيضاً أهازيج وطبول اخواننا الجنوبيين إحتفالاً بألكريسماس
والخرطوم تعاين بس وتكثر من قراءة الصحف والتقاط التصريحات العرجاء

أحاول إرفاق بعض الصور الحزينة عن خرطوم اليومين ديل
غفرالله للكونكشن

Quote: لم تكن روجينا علي الإطلاق يا (الطيب مصطفي) حزاماً ناسفاً كما (إنتباهتك) ولم تكن من همها علي الاطلاق من يحكم السودان ؟ قدرما كانت تحمل منذ سنوات عرفتي بها هم (اللبن والرغيف والكسرة) والكرامة والسترة . أتتنا في صباح جنائزي من صباحات (ديسمبر) لوداعنا قالت (روجينا) إنها ذاهبة للجنوب قالت إنها ستذهب (وبس) لكنها لم تحدد إي مدينةٍ ستقطن ؟ قالت بالعربية الفصحاء : (سلاماً سلاماً) توادعنا ... إنتحبنا ... كل علي طريقته ونحن في عجلةٍ من أمر يومنا الذي بدأ بالوداع ! عجيبةٌ هي أيام السودانيين ! فكل أيام الله تبدأ بإستقبال شمس الله الاك يا سودان !

روجينا مشت ياخدر ...؟
راحت ولم تترك لنا سوي تلك الزكريات الجميلة
اسفي ياحبيب انني ما ودعتها
اسفي ياخدر زكريات ناس صنعت دكة لينا منو زمن
وما عارفو لسه في القاهرة وللا وصل بلاد العم سام
صفوت مدروش في القشورية
وهسة روجينا مشت
ليه يازمن ليه
بكينا ومانفع
نسوي شنو ...؟



خالص الود

زمن ياياسر
زمن ابن كــلب والله

Quote: (سلاماً سلاماً) توادعنا ... إنتحبنا ... كل علي طريقته ونحن في عجلةٍ من أمر يومنا الذي بدأ بالوداع ! عجيبةٌ هي أيام السودانيين ! فكل أيام الله تبدأ بإستقبال شمس الله الاك يا سودان !

شن الراى يا ابو السره....

ازيك يازول..ياخ عندنا مطر مخيف

آيا خضر

Quote: أتتنا في صباح جنائزي من صباحات (ديسمبر) لوداعنا قالت (روجينا) إنها ذاهبة للجنوب قالت إنها ستذهب (وبس) لكنها لم تحدد إي مدينةٍ ستقطن ؟ قالت بالعربية الفصحاء : (سلاماً سلاماً) توادعنا ... إنتحبنا ... كل علي طريقته ونحن في عجلةٍ من أمر يومنا الذي بدأ بالوداع ! عجيبةٌ هي أيام السودانيين !

كان لازم تكتب الكلام دا

ألمني شديييد والله

انت وهي مغلوبون على أمركم

الله في

معليس ياحمد وحياتك قدر ما حاولت أكتمها ماقدرت ياحمد
الله غالب

حار بينا الدليل يا معاوية ، تاه فينا الوطن ياصديقي

هنيئاً للطيب مصطفي سودانه العروبي
وهنيئاً للهزائم

ولاعزاء

Quote: تاه فينا الوطن ياصديقي

اكتب يا خضر
كتاباتك هي سلوانا الوحيد في هذا الزمن الكالح

Quote: مؤسف أن نكون شهود هذا الحاصل !

اظننا مساهمين فى الحاصل

ياريت لو كنا شهود بس يا خضر

مساهمين كيف يا أميرة هو كان في ايدنا شنو مثلاً وماعملناهو
نحن أمة مغلوبة ستة صفر يا أميرة

ـــ
كل سنة وانتي والناس بخير

هاتفتنا روجينا هذا المساء
قالت انها بخير
اعتذرت بأدب جم عن تأخيرها حاصرناها بقلقنا
قالت أنها بخير غير أن (الشوق غلالالالالالالالاب)

ـــــ
لاحول ولاقوة الا بالله

ياحسبو
اتصلت عليك حوالي 3.18 صباح اليوم
مالك مابترد
عامل فيها نايم يعني
وهل دي ظروف ينومو فيها

Quote: غاب هذا العام أيضاً أهازيج وطبول اخواننا الجنوبيين إحتفالاً بألكريسماس والخرطوم تعاين بس وتكثر من قراءة الصحف والتقاط التصريحات العرجاء

يـــــــــــــــــــــاه يا خضر....!!
مؤلم هذا جداً.



__
كيفنك يا صاحب..!!

Quote: هنيئاً للطيب مصطفي سودانه العروبي وهنيئاً للهزائم

Quote: لا أدري أي أرض تقطنين الآن ؟ ولا عارف أي مشوار يكلفني لقاء وجهك ؟ ولا أدري يا صديقة لأي جنسية ينتمي كلانا الآن ؟ فقط أعرف أن وجه شعبي واحد لا يخون ولن . أعرف تمام العرفة أن كلينا لم يختار قدر ما إختار (العوارض) فبلغي عني أهل الجنوب السلام والتحية . وسنلتقي يا زولة (طال الزمن يا زول ولا الزمن قصر) أو كما قال حميد .

لا إله الله يا خدركة
بالطريقة دي قد تلتقيها يوم القيامة...هذه البلدة أهلها لم يسمعوا بالدعاء الذي يقول يا جامع يا رقيب...هم أن يدعوا الهم شتت شملهم



_
ثم إني مقفل موبايلي ومروس وحدي والاحزان
كلم الشباب...أمير الكافر وليد،نبيل،عمرو...ياخي من طرف كلم الاصحاب
قول ليهم الزول ده راسه في في غرفته...بلا عقد الجلاد بلا بلابل بلا نادي الطمبور
ما داير مع زول...دي سنة انفصال وغرق وما دايرا ليها غني وهوزيز

خضر حسين
لك ولروجينا السلام
وعلي وطني السلام
كم هن أيام موجعات إنسانيتنا تعمل فيها مخالب الساسة المرابين شمالا وجنوبا
وكل قلب في وطني مفجوع بوداع
كم هو صعب هذا المسار
كم تتالم الارواح شمالا وجنوب......

وامدرمان تنوني حبيبي وين وودادي آه
والباقي كله مقابلات.......

Quote: (ريتا حينما ينفذ الفقراء إلي جوهر المسألة سأحدثك عن أشياء أخري)

نعم يا صديق فهم نفذوا من مداخل شتي وكل قد خرج من نفس المدخل
وما دري أن التيه قد أعمي البصائر
إن ما يجري يفوق قدراتنا كشعب
يحتفل بالنهر
و يدير صراعاته بالنية البيضاء
وما دري أن وراء الاكمة ما وراءها

وأنهم دوما يهزموننا هكذا......

الأعزاء الأصدقاء
هواري
معاوية
قمر

كل سنة وانتم كما تحلمون
ماعارف قدر ما أحاول أكتب بلقي مافي كلام يتقال
الليلة رأس السنة وغداً عيد اسقلالنا الوطني
وتسعة ايام تانية استقلال جنوبنا الحبيب



والله الواحد حاسي كدة انو يوم القيامة قربت يا اصحاب

Quote: ياحسبو اتصلت عليك حوالي 3.18 صباح اليوم مالك مابترد عامل فيها نايم يعني وهل دي ظروف ينومو فيها

لقيت تلفونك الصباح
قرف و زهج و نفسيات تحت الصفر
صاحبك مورتا لسه متفائل, حتي مشي يروس في بورتسودان
و انا كان بالغته بصل الخور و اجي راجع


قاعد بتأمل في الصورة دي(من بوست مجاور) و بردد في كلام عاطف خيري ...نهبــوها و اتقسمو الحدود

ده تمام الحاصل ياحسبو
مارجعت لسع من الخور

Quote: فقط أعرف أن وجه شعبي واحد لا يخون ولن .

والله ياخضر ياصاحب
دخلت هنا مرات وقريت
إتكبت تحت البطانية
أول يومين مارحت شغل
الراس معجون زي الزول المصاب
بالملاريا ..
رغم إنني مقتنع تماما بأن هذه النتيجة
أكثر عدلا لهم في الحياة
وخصما لنا في الوجدان ..
ساورني أمل واحد بالمائة ..
بأنهم سيصوتوا للوحدة ..ليجلدوننا بالنبل
وليحسسوننا بجلد الذات ..
ثم إنتحبت بكيت ..تحت الغطاء

وحياتك يامنعم لي كم يوم بقول أجي ارد ليك يغلبني الكلام عديل
هو زاتو الممكن يتقال شنو هسي ؟ غير انو نردد كلنا وراء جعفر السقيد
وهو بغني (واحلامنا زي سرب الطيور ممكن يفرقن الحجر)
ياها احلامنا ياصاحب
ياها ياعبدالمنعم ياودابراهيم الحاج


كلو بقي زي بعضو
ولا مغيث

روجينا يا بشر ؟

Quote: كم هن أيام موجعات إنسانيتنا تعمل فيها مخالب الساسة المرابين شمالا وجنوبا وكل قلب في وطني مفجوع بوداع كم هو صعب هذا المسار كم تتالم الارواح شمالا وجنوب

يا الصادق
ازيك ياخ

وحياتك الواحد ماعارف يقول شنو زاتو غير انك عبرت عني بالضبط
في المقتبس أعلاه . وحدهم البسطاء من يتألمون الآن يا صديقي

Quote: وامدرمان تنوني حبيبي وين وودادي آه والباقي كله مقابلات.......

تخيل يا صديقي في الوقت الذي توثق فيه القنوات الفضائية
والأجهزة المسموعة لهذا الحدث نجد تلفزيون السودان ولا شغال
بالخبر الشغلة أما قناة النيل الازرق فخليهو ساي .


يبقي ياصادق رهاننا علي هذا الشعب ليس الا
مودتي واحترامي المعلوم

يا موسي

ازيك ياخ
البلد قطت يا مواطن
الدبارة كيف ياصاحب

هواري ياصاحب
بلد منكوبة ياصديقي



منكوبة ومنهوبة ومستباحة استباحة الذين أوتو الكتاب

قبل قليل وبعد محاولات خلوها ساكت تحدثت وروجينا
انا من اقصي شمال السودان
وروجينا من اقصي جنوب السودان
من حديثها ايقنت ان الشوق واحد والحال هنالك تمام التمام
روجينا تبلغ الجيران تحاياها
جميعهم تقول سلاماً سلاماً

نحبك يازولة

ـــــــ
غير انني استغرب لهذا الزمن الذي تنتزع فيه اشواق الناس وأحلامهم انتزاعاً
روجينا ستعود شاء الطيب مصطفي أم لا