مبالغة !!!

Quote: المبالغة تكون يتأهل الهلال علي حساب الصفاقسي

بخاري سلام

خلاص خليك جاهز لمبالغة يوم الأحد !!

==
صحبك جنابو قنعان من الصفاقصي و فتح بوست (غير قابل للبلع) يلمح فيه بأن الصفاقصي حمام !!

مودتي و كل عام أنت و الأسرة الكريمة بألف خير

[B]مجيد يا حبيب

كامل الإعتزار علي الخطأ الوارد في المداخلة الاولي

والتانية يا مجيد (مهارات نهي)

الدويم دايما علي البال.



لك كل الود


دمت.

البروف المقابل فوووووووق

Quote: الأخ عبد المجيد بوست عبقري و مبالغة سأعود إليه بالتحليل فالأرقام لها معان و دلالات.

الشاعر النحرير و القانوني الضليع أستاذ أسعد العباسي , سلام

في إنتظار عودتك هنا محللا لمعاني و دلالات الأرقام !!

كما في إنتظار عودتك هناك عند أمنا الرؤوم(بوست الأبيض الثانوية)

مودتي وكل عام أنت و الأسرة الكريمة بألف خير

Quote: مجيد يا حبيب كامل الإعتزار علي الخطأ الوارد في المداخلة الاولي والتانية يا مجيد (مهارات نهي) الدويم دايما علي البال. لك كل الود دمت

مرتضانا شكرا" للعودة مجددا", أحب أن أطمئنك بأن المهارات بتتكسب تتدرجيا", شوية كدة وتلقي نفسك ماهر ,هههههههههه !!!!!!!!
الدويم وناس الدويم دايما علي بالنا كلنا ’ هي فركة كعب مني , لو لا البنطونوفوبيا حقتي لكنت كل يومين هنالك ....
وإنشاء الله بعد الكبري نعمل الدرب ساساق ..
مودتي

Quote: البنطونوفوبيا

مبالغة يا دكتور مجدي
البنطونوفوبيا دي أنحنا ناس الغرب معذورين فيها بعيدين من البحر عشان كده ممكن نصاب برهاب المياه( Hydrophobia). بالمناسبة حبيبنا عبداللطيف بكري عندو رهاب الطيران( Acrophobia) رغم إنو بيكون في الجو أكثر من وجودو في الرياض وسودانيزاونلاين

!! تصدق يا مجدي أنا زاتي إكتشفت إني معاكم في نفس القارب، وبعاني من من خوف كده ممكن تسميهو صوروفوبيا"أخاف من نظرتك لـيّـا ". والله ردت لي زولة قبل كده لدرجة الخوف من صورتها !.
يا حببيب ده رهاب بالكوم.
محبتي المعروفة

Quote: البنطونوفوبيا

دي قلبت فيها هوبا عديييييييييييييييييييييييييييل كدة

إسفيروفوبيا كيف؟؟

علي ذكر الهوبا إنشاء اللة اليلة النتيجة 3 هوبات/0




دمت

Quote: يا جنابو أمس كنت منتشياً بعودة الطوربيد وبالمستوي المقنع لمرابط

هلا بخاري .....

مرابط ماشاء الله سيطرة وتحكم وباصات بالسيركي من القدم للقدم .....

طمبل مستواه بقدر ما اسعدنا قطع شك لم يسعد الهلالاب مشجعين ولعيبة واولهم (المعز شربكة) ....


دكتور عبدالمجيد .... الاعصاب كيف ...

Quote: إسفيروفوبيا كيف؟؟

أها يادكتور مرتضى إسفيروفوبيا دي أنت قلبت فيها هوبا هوائية عديييييل!!.

كل سنة وأنت طيب.

Quote: تصدق يا مجدي أنا زاتي إكتشفت إني معاكم في نفس القارب، وبعاني من من خوف كده ممكن تسميهو صوروفوبيا"أخاف من نظرتك لـيّـا ". والله ردت لي زولة قبل كده لدرجة الخوف من صورتها !. يا حببيب ده رهاب بالكوم.

صوروفوبيا= الخوف من صورة المحبوب( اخاف من نظرتك ليًأ)

يا فاتح دي مبالغة المبالغة زاتها!

معزتي المعروفة

Quote: علي ذكر الهوبا إنشاء اللة اليلة النتيجة 3 هوبات/0

مرتضانا ... إن شاء الله الليلة يتحقق منانا !!!

Quote: B]صوروفوبيا= الخوف من صورة المحبوب( اخاف من نظرتك ليًأ) يا فاتح دي مبالغة المبالغة زاتها!

]
سلام
لصاحب البوست وضيفوفه
تحية المبالغة هي انك انت فكرت للحكاية دي كيف
كنت بحب بت الجيران لدرجة الخوف وقت اشوفها قلبي
يقرب ينط من صدري واقول ليك للان سريتها بتجهجني
الفوبيا مشكلة افيدونا

Quote: بنطونوفوبيا طيرانوفوبيا صوروفوبيا إسفيروفوبيا

يا شباب ده فعلا "رهاب بالكوم"!!

معزتي المعروفة

دكتور عبدالمجيد .... الاعصاب كيف ...

==
تصدق يا جنابو من من الستة المباريات المتبقية لسيد البلد ,أنا ما خائف إلا من مبارة مازيمبي في السيوبر !

الأخ البروف عبد المجيد كل سنة و أنت طيب،، سؤالي: هل باتت هنالك جدوى للمنتديات الإسفيرية السودانية إن كانت مشاركة أعضاءها في المواضيع الجادة في مثل هذا الضعف و قد أصبحت ميدانا للتسلية و ليس للإفادة و سترى في هذه الليلة كيف سيتكالب الأعضاء بأقوال فجة في بوستات ستفتح اليوم تباعا عن مباراة الهلال و الصفاقصي، الأمر يحتاج لدراسة عميقة.

أها يادكتور مرتضى إسفيروفوبيا دي أنت قلبت فيها هوبا هوائية عديييييل!!.


والله المبالغة هنا بس - الفاتح دا عرف المفردة ( هوبا هوائية ) من وين ؟

غايتو علا يكون كان عندو جكسوية في الرهد ابو دكنة ولما يزورها بيمشي يعوم في التردة

والله يا الفاتح بالجد مبالغة لانها مفردة لا يعرفها الا الساكنون جوار الانهار .

Quote: لصاحب البوست وضيفوفه تحية المبالغة هي انك انت فكرت للحكاية دي كيف كنت بحب بت الجيران لدرجة الخوف وقت اشوفها قلبي يقرب ينط من صدري واقول ليك للان سريتها بتجهجني الفوبيا مشكلة افيدونا

حبيبنا باسط ,نعم واضح للآن سيرتها بتجهجهك بدليل الكبكبة الواضحة باللون الأحمر , هههههههههههه

كمان ممكن نضيف حالتك دي لحالات الفوبيا بهذا البوست :

جيرانوفوبيا= الخوف من بنت الجيران !

مودتي وكل عام أنت و الأسرة بألف خير

Quote: والله المبالغة هنا بس - الفاتح دا عرف المفردة ( هوبا هوائية ) من وين ؟ غايتو علا يكون كان عندو جكسوية في الرهد ابو دكنة ولما يزورها بيمشي يعوم في التردة والله يا الفاتح بالجد مبالغة لانها مفردة لا يعرفها الا الساكنون جوار الانهار .

سلام يا شيقا
تصدق يا حبيب أنا إرتبطت في ذهتي اكتر بالرمال! .كنا بنجيب لستك عربية نختوا في نص الخور ونقوم نتدرب.على حس الانهار والموية، طبعا زي مار عارف عندنا في الابيض دي خريف مبالغة زي بوست مجدي ده!
أها حلتنا( القبة) بيمر بيها خورين. وكنا في البداية كده نخش نجلبغ في الخور ومرات كده نطلع في الكبري ونجي ناطين في الموية، وما كنا عارفين إنو نحنا بنتدرب على الـ Scuba diving!
بعد شوية لمن مهاراتنا إتشحذت، بقينا نمشي نعوم في ود ابصفية( بركة موسمية!).لكن النصيحة برضو ما كنا عارفين طبيعة العوم بتاعنا ده 50 متر فراشة ولا Backstroke! انا شخصيا بقول إنو اسلوبنا كان أقرب للـ Free style
يعني لو لقينا شوية رعاية وتدريب كان شاهدتنا في اولمبياد بكين، بس تقول شنو غير سوء حظ قصدنا عديل
قلت لي جكسوية وين؟ياخي الله يجيبها من أي بقعة في الدنيا دي بس " كيف القى سيد روحي؟".
--
كل سنة وأنت طيب يا الطيب الطيب.وربنا يحفظك من كل شر ويديم المحبة.

Quote: السبب الذي دعاني لفتح البوست هو تحفيز النقاش المعلوماتي عشان ناس الـ IT يجوا يوضحوا لينا المسألة دي ليهه بتحصل؟ خصوصا وأن نقاش تقنية المعلومات من المواضيع التي لا تثار في المنبر إلا لماما بعكس السياسة او الفن او الكورة...ألخ.

والله يا دكتور بدون فخر نحن اصحاب الاختصاص و قلنا ندلى بدلونا لكن و الله لقيت موضوع بت الجيران و الحضور ..بالله حدد ياتو نوع من الحضور لانو الحضور خشم بيوت و انت سيد العارفين
يااااخ كل سنة وانت طيب و ضيوفك الكرام كلهم طيبين و بجيك برواقة بس اضبح !!!!


الفاتح ميرغنى الرائع ....انت عارف الابيض دى لو لقيت ليها راعية بس كان بقت "دبي" السودان او "روما " فى العصر الجميل

بس قادر الله ( مقولة حضرية )

أعزائي الكرام , كل عام و أنتم بخير وعافية

أعاده الله علينا بالخير و اليمن والبركات

Quote: الأخ البروف عبد المجيد كل سنة و أنت طيب،، سؤالي: هل باتت هنالك جدوى للمنتديات الإسفيرية السودانية إن كانت مشاركة أعضاءها في المواضيع الجادة في مثل هذا الضعف و قد أصبحت ميدانا للتسلية و ليس للإفادة و سترى في هذه الليلة كيف سيتكالب الأعضاء بأقوال فجة في بوستات ستفتح اليوم تباعا عن مباراة الهلال و الصفاقصي، الأمر يحتاج لدراسة عميقة.

الشاعر الفطحل الأستاذ أسعد العباسي.

تحياتي و كل عام و أنت بخير

بالطبع أن الاسافير تتباين وتختلف .وده طبعا نتيجة حتمية لإختلاف إهتمامات وأذواق المشتركين. قد نتفق على وجود مواضيع إنصرافية ولكن

الصورة الإجمالية مشرقة.هناك من يعشق السياسة وهناك من يعشق الموسيقى وهناك من يعشق الفن او الرياضةبل وهناك من يعشق

الونسة.وبالتالي لا يمكن أن نضبط الجميع على ايقاع واحد وإلا لفقد التباين الجميل خاصيتة واصبحت الاسافير بمثل الفصل الدراسي وليس

صورة مصغرة للسودان المتباين الذي نحب.

فعلا الأمر يحتاج لدراسة عميقة كما ذكرت

==

في إنتظارك لتكشف لنا مسألة دلالات الارقام.

معزتي المعروفة

الأخ الدكتور المقابل تحياتي، قرأت بتمعن ردك و لا أستطيع كما قلت أن أحجر على الأعضاء ميولها و إهتماماتها المتباينة فهذا شأنهم فإن كان هناك من يهتم بالرياضة أو بالفن أو السياسة أو الأدب أو العلوم فهذا أمر عادي و لكني أرى أن مثل الإشتمال و العمومية في المنبر يجعله مزدحما للدرجة التي يصعب معها المتابعة فقد قال من قبل الأخ الصديق الفاتح يوسف جبرة أنك ما أن تضع بوستك تجده مشى الخور بعد قليل و أذكر أنني إقترحت على الأخ بكري أبوبكر أن يقسم المنتدى إلى عدة بوابات و لكنه رفض إقتراحي و قال لي أن ما يميز منتدى سودانيز أون لاين هو تباين إهتمامات الأعضاء و شبهه بالسوق الهندي تجد فيه الفيلسوف و الأديب و العالم جنبا إلى جنب مع العامل و الساحر و الرياضي غير أنني ما زلت عند رأييى بتقسيم المنتدى إلى عدة بوابات تفي بإهتمامات أعضائه المتباينة، و سأوضح في مداخلة لاحقة أو في بوست منفصل وجة نظري بتفصيل أشمل.

كل عام والجميع بخير ..

يا بروف .....
بدون تعليق ...




ثمانمائة مشاهد

البروف المقابل


سلام


يا اخي مش مبالغة كمان الفاتح يكتب الكلام دا كلوووووووو وما توروني ارد عليه هو قال:- معليش عندي مشكلة فنية في الاقتباس


تصدق يا حبيب أنا إرتبطت في ذهتي اكتر بالرمال! .كنا بنجيب لستك عربية نختوا في نص الخور ونقوم نتدرب.على حس الانهار والموية، طبعا زي مار عارف عندنا في الابيض دي خريف مبالغة زي بوست مجدي ده!
أها حلتنا( القبة) بيمر بيها خورين. وكنا في البداية كده نخش نجلبغ في الخور ومرات كده نطلع في الكبري ونجي ناطين في الموية، وما كنا عارفين إنو نحنا بنتدرب على الـ Scuba diving!
بعد شوية لمن مهاراتنا إتشحذت، بقينا نمشي نعوم في ود ابصفية( بركة موسمية!).لكن النصيحة برضو ما كنا عارفين طبيعة العوم بتاعنا ده 50 متر فراشة ولا Backstroke! انا شخصيا بقول إنو اسلوبنا كان أقرب للـ Free style
يعني لو لقينا شوية رعاية وتدريب كان شاهدتنا في اولمبياد بكين، بس تقول شنو غير سوء حظ قصدنا عديل
قلت لي جكسوية وين؟ياخي الله يجيبها من أي بقعة في الدنيا دي بس " كيف القى سيد روحي؟".
--
كل سنة وأنت طيب يا الطيب الطيب.وربنا يحفظك من كل شر ويديم المحبة.

Quote: يااااخ كل سنة وانت طيب و ضيوفك الكرام كلهم طيبين و بجيك برواقة بس اضبح !!!!

حبيبنا مازن منتظرين جيتك ولا لسة ما ضبحت !

مودتي

Quote: ثمانمائة مشاهد

الحبيب عثمان محمدين , كل عام و أنت بخير

Quote: يا اخي مش مبالغة كمان الفاتح يكتب الكلام دا كلوووووووو وما توروني ارد عليه

حبيبنا شيقا , صاحبك كلامو كلو سباحة و أنواع السباحة و أنحنا ناس رمال ساي بنخاف من سيرة البحر و العوم !

مودتي

كتبت د. مقابل الاتى :

Quote: الشاعر الفطحل الأستاذ أسعد العباسي.تحياتي و كل عام و أنت بخيربالطبع أن الاسافير تتباين وتختلف .وده طبعا نتيجة حتمية لإختلاف إهتمامات وأذواق المشتركين. قد نتفق على وجود مواضيع إنصرافية ولكن الصورة الإجمالية مشرقة.هناك من يعشق السياسة وهناك من يعشق الموسيقى وهناك من يعشق الفن او الرياضة بل وهناك من يعشق الونسة.وبالتالي لا يمكن أن نضبط الجميع على ايقاع واحد وإلا لفقد التباين الجميل خاصيتة واصبحت الاسافير بمثل الفصل الدراسي وليس صورة مصغرة للسودان المتباين الذي نحب.فعلا الأمر يحتاج لدراسة عميقة كما ذكرت

رد الاستاذ الرائع و الشاعر الفطحل :

Quote: الأخ الدكتور المقابل تحياتي، قرأت بتمعن ردك و لا أستطيع كما قلت أن أحجر على الأعضاء ميولها و إهتماماتها المتباينة فهذا شأنهم فإن كان هناك من يهتم بالرياضة أو بالفن أو السياسة أو الأدب أو العلوم فهذا أمر عادي و لكني أرى أن مثل الإشتمال و العمومية في المنبر يجعله مزدحما للدرجة التي يصعب معها المتابعة فقد قال من قبل الأخ الصديق الفاتح يوسف جبرة أنك ما أن تضع بوستك تجده مشى الخور بعد قليل و أذكر أنني إقترحت على الأخ بكري أبوبكر أن يقسم المنتدى إلى عدة بوابات و لكنه رفض إقتراحي و قال لي أن ما يميز منتدى سودانيز أون لاين هو تباين إهتمامات الأعضاء و شبهه بالسوق الهندي تجد فيه الفيلسوف و الأديب و العالم جنبا إلى جنب مع العامل و الساحر و الرياضي غير أنني ما زلت عند رأييى بتقسيم المنتدى إلى عدة بوابات تفي بإهتمامات أعضائه المتباينة، و سأوضح في مداخلة لاحقة أو في بوست منفصل وجة نظري بتفصيل أشمل.

عندما وقعت عينى على سودانيزاونلاين اول مرة اعجبت بكثير من الكتابات و المقالات بل حتى مايعرف بالونسة و كنت لا اضيع (بايت *) واحد ولكن اقول الان (و هى ليست عن خبرة ) ان سودانيزاونلاين كالجسد يسقم كثيرا و تنتابه الحمى و فيروسات الافكار الهدامة و خلافات الاطفال (هكذا اسميها ) و اجندة خفية ....كما يسمو هذا الجسد فوق قدراته فتتفتق قدرات و مهارات و عجائب لاشخاص نعرفهم فقط من كتاباتهم و لكن نكن لهم اسمى الاحترام و التبجيل ...هذا ليس فقط فى سودانيزاونلاين ولكن كل منتديات المليون ميل مربع .......

لذلك و بمنطقية بسيطة يا دكتور ان تختلى بالاسفير لوحدك (وهى خلوة شرعية ) هى التى جعلت منك واحدا فى فضاء اسفيرى لاشخاص عزفوا عن التواجد فى المعية من رخصت فكرهم و جاءوا ببضاعة مزجانة .....
هذا قبل ان اقول لك من ناحية IT يمكن و بكل اريحية ان تكون لوحدك فى فضاء اسفيرى و غيرك لاسباب كتيرة منها سرعة تبادل المعلومات بين اجهزتهم و ما يعرف ب ISP- Internet service provider , اول سرعة اجهزتهم

الشاعر الفطحل ..ان بوستكم العامر كدارنا الابيض الرائعة تحفة للناظرين اقصد القارئيين و هو جميل جمال فتان لذلك لم ارد ان ارد ولو بالاعجاب لتحفة لا اريد ان اشينها ولو بتوقيع الحضور

محبتى



* وحدة قياس
* قد تكون لوحدك فى الظاهر ولكن بعد عمل التحديث (#######) تجد الكثيرين

Quote: أذكر أنني إقترحت على الأخ بكري أبوبكر أن يقسم المنتدى إلى عدة بوابات و لكنه رفض إقتراحي و قال لي أن ما يميز منتدى سودانيز أون لاين هو تباين إهتمامات الأعضاء و شبهه بالسوق الهندي تجد فيه الفيلسوف و الأديب و العالم جنبا إلى جنب مع العامل و الساحر و الرياضي غير أنني ما زلت عند رأييى بتقسيم المنتدى إلى عدة بوابات تفي بإهتمامات أعضائه المتباينة، و سأوضح في مداخلة لاحقة أو في بوست منفصل وجة نظري بتفصيل أشمل.

استاذ اسعد انا شخصيا في الحتة دي بتفق تماما مع باشمهندس بكري أبوبكر. أنا بعتقد إنو سودانيزاونلاين ما إكتسبت هذا الصيت وخاصية الجذب إلا بسبب التباينات التي شبهها بكري بالسوق الهندي. ياخ التباين ده في كل حاجة مصدر جذب حتى في الالوان والكساءات المزركشة.لو قسمناها لادب وقانون وفلسفة وطب صدقني ممكن تكون زي المجتمع الصناعي ( Artificial)او المنمط.حتفقد بريقها وبالتالي رحيقها.

معزتي المعروفة
--

الأخ مازن عادل النور لك التحية الحكاية شنو يا جماعة إنت في ألمانيا و قريبك صديقنا العزيز طارق النور في أمريكا، أمرقولنا جاي. الحقيقة عاوز أتكلم معاك شوية لكن كورة هلال مريخ فضل ليها تسعين دقيقة و الرجفة حصلت و التركيز قل، الله يبعدنا من شر ناس راجي عبد العاطي..!

Quote: الله يبعدنا من شر ناس راجي عبد العاطي..!

يا أستاذ أسعد , توقعك صحيح . راجي عملها فينا

=
المبارة شكلها مطبوخة لإزالة التوتر و إعادة التوازن !!!

Quote: عندما وقعت عينى على سودانيزاونلاين اول مرة اعجبت بكثير من الكتابات و المقالات بل حتى مايعرف بالونسة و كنت لا اضيع (بايت *) واحد ولكن اقول الان (و هى ليست عن خبرة ) ان سودانيزاونلاين كالجسد يسقم كثيرا و تنتابه الحمى و فيروسات الافكار الهدامة و خلافات الاطفال (هكذا اسميها ) و اجندة خفية ....كما يسمو هذا الجسد فوق قدراته فتتفتق قدرات و مهارات و عجائب لاشخاص نعرفهم فقط من كتاباتهم و لكن نكن لهم اسمى الاحترام و التبجيل ...هذا ليس فقط فى سودانيزاونلاين ولكن كل منتديات المليون ميل مربع ....... لذلك و بمنطقية بسيطة يا دكتور ان تختلى بالاسفير لوحدك (وهى خلوة شرعية ) هى التى جعلت منك واحدا فى فضاء اسفيرى لاشخاص عزفوا عن التواجد فى المعية من رخصت فكرهم و جاءوا ببضاعة مزجانة ..... هذا قبل ان اقول لك من ناحية IT يمكن و بكل اريحية ان تكون لوحدك فى فضاء اسفيرى و غيرك لاسباب كتيرة منها سرعة تبادل المعلومات بين اجهزتهم و ما يعرف ب ISP- Internet service provider , اول سرعة اجهزتهم الشاعر الفطحل ..ان بوستكم العامر كدارنا الابيض الرائعة تحفة للناظرين اقصد القارئيين و هو جميل جمال فتان لذلك لم ارد ان ارد ولو بالاعجاب لتحفة لا اريد ان اشينها ولو بتوقيع الحضور محبتى * وحدة قياس * قد تكون لوحدك فى الظاهر ولكن بعد عمل التحديث (#######) تجد الكثيرين

حبيبنا مازن

كفيت ووفيت بحضورك.
تحليلك لجسد هذا المنبر الجميل صورة مدهشة وساحرة في آن، بصراحة أعجبني هذا التحليل الذي يؤكد حضور ذهنيتك الحضرية او فلنقل الكردفانية تسلم يا حبيب.

معزتي المعروفة

Quote: حبيبنا مازن كفيت ووفيت بحضورك. تحليلك لجسد هذا المنبر الجميل صورة مدهشة وساحرة في آن، بصراحة أعجبني هذا التحليل الذي يؤكد حضور. ذهنيتك .الحضرية او فلنقل .الكردفانية تسلم يا حبيب. معزتي المعروفة

والله يا دكتور مشكور على الاطراء الجميل بس (عِلا ) باقى صور العيد ما شفناها الا صحن الشيوية داك ....

مباااااااالغة

مودتى الحضرية .....

Quote: عندما وقعت عينى على سودانيزاونلاين اول مرة اعجبت بكثير من الكتابات و المقالات بل حتى مايعرف بالونسة و كنت لا اضيع (بايت *) واحد ولكن اقول الان (و هى ليست عن خبرة ) ان سودانيزاونلاين كالجسد يسقم كثيرا و تنتابه الحمى و فيروسات الافكار الهدامة و خلافات الاطفال (هكذا اسميها ) و اجندة خفية ....كما يسمو هذا الجسد فوق قدراته فتتفتق قدرات و مهارات و عجائب لاشخاص نعرفهم فقط من كتاباتهم و لكن نكن لهم اسمى الاحترام و التبجيل ...هذا ليس فقط فى سودانيزاونلاين ولكن كل منتديات المليون ميل مربع .......

تصدق يا دكتور مجدي من ما حبيبنا مازن كتب المداخلة أعلاه، فكرت في المقتبس البديع ده وقلت ارد ليهو بس رجيتك تجي.
وبصراحة عجبني شديد تشخيصه لجسد المنبر وعجبني أكتر حتة " سمو هذا الجسد فوق قدراته...." يعني جسد Resilient!.
ياخي مازن ده ذهنيته أشد إتقادا من جمر شية الحضور!!

محبتي

Quote: والله يا دكتور مشكور على الاطراء الجميل بس (عِلا ) باقى صور العيد ما شفناها الا صحن الشيوية داك .... مباااااااالغة مودتى الحضرية .....

حبيبنا مازن المبالغة الجد جد هي صور العيد .. إنشاء الله سوف أنزلها ليكم في بوست الحضور!

معزتي

Quote: ياخي مازن ده ذهنيته أشد إتقادا من جمر شية الحضور!!

حبيبنا الفاتح ياخ ده تشبيه لا يقل طعامة عن شية الحضور زاتها. فعلا حبيبنا مازن فات الكبار والقدرو!!.

معزتي المعروفة لكما.

Quote: يا اخي مش مبالغة كمان الفاتح يكتب الكلام دا كلوووووووو وما توروني ارد عليه هو قال:- معليش عندي مشكلة فنية في الاقتباس تصدق يا حبيب أنا إرتبطت في ذهتي اكتر بالرمال! .كنا بنجيب لستك عربية نختوا في نص الخور ونقوم نتدرب.على حس الانهار والموية، طبعا زي مار عارف عندنا في الابيض دي خريف مبالغة زي بوست مجدي ده! أها حلتنا( القبة) بيمر بيها خورين. وكنا في البداية كده نخش نجلبغ في الخور ومرات كده نطلع في الكبري ونجي ناطين في الموية، وما كنا عارفين إنو نحنا بنتدرب على الـ Scuba diving! بعد شوية لمن مهاراتنا إتشحذت، بقينا نمشي نعوم في ود ابصفية( بركة موسمية!).لكن النصيحة برضو ما كنا عارفين طبيعة العوم بتاعنا ده 50 متر فراشة ولا Backstroke! انا شخصيا بقول إنو اسلوبنا كان أقرب للـ Free style يعني لو لقينا شوية رعاية وتدريب كان شاهدتنا في اولمبياد بكين، بس تقول شنو غير سوء حظ قصدنا عديل قلت لي جكسوية وين؟ياخي الله يجيبها من أي بقعة في الدنيا دي بس " كيف القى سيد روحي؟". -- كل سنة وأنت طيب يا الطيب الطيب.وربنا يحفظك من كل شر ويديم المحبة.

يوروك كيفن يا شيقا وأنت طلعت صفوي نخبوي؟!
بعدين يوروك يقولوا ليك شنو؟ إنو الفاتح كان بسبح Backstroke في البحيرة الموسمية


محبتي

بعدين يوروك يقولوا ليك شنو؟ إنو الفاتح كان بسبح Backstroke في البحيرة الموسمية


والله جنس حنكشة بالله هي الهوبا اسمها باك استروك؟

معذرة يا بروف إن إبتعدت قليلا عن هذا البوست الرائع لإنشغالي ببوستات أخرى و مشاغل عديدة و كما توقعت هنا قبل مباراة هلال مريخ الأخيرة بأن راجي عبد العاطي ربما فعلها فينا و بالفعل كما ذكرت أنت أن راجي عبد العاطي فعلها فينا و لكن هل تدري لماذا؟ لأن راجي عبد العاطي كانت عينو على الكاس..!

الأخ البروف عبد المجيد لك التحية لا يخالجني شك أن لديك حس الباحث لذا أود أن أعود بك إلى روح هذا البوست ببعض الأسئلة أولها كم عدد أعضاء هذا المنبر تحديدا أو تقريبا؟ هل تقوم منذ وضعك لهذا البوست الفريد بعملية إحصاء يومية لأعداد المتداخلين و الزوار؟ إجابتك على هذين السؤالين يحدد مسار مداخلتي القادمة و التي ربما تكون غاضبة و تحمل العديد من المقترحات لإعادة الألق لهذا المنبر. مع مودتي.

Quote: لا يخالجني شك أن لديك حس الباحث لذا أود أن أعود بك إلى روح هذا البوست ببعض الأسئلة أولها كم عدد أعضاء هذا المنبر تحديدا أو تقريبا؟ هل تقوم منذ وضعك لهذا البوست الفريد بعملية إحصاء يومية لأعداد المتداخلين و الزوار؟ إجابتك على هذين السؤالين يحدد مسار مداخلتي القادمة و التي ربما تكون غاضبة و تحمل العديد من المقترحات لإعادة الألق لهذا المنبر. مع مودتي.

الأخ الأستاذ أسعد
جمعة خير و بركة
نسبة لقائمة الحضور فمن الصعب إجراء دراسة عليها و ذلك لأنها يتم تحدثيها كل دقيقتين .
=
أري إنك تلمح إلي إن هنالك عزوف من الأعضاء للكتابة في المنبر, إليس هذا ما تلمح به ؟
بالنسبه لي ومن خلال مراجعتي الدورية لإرشيف المكتبات ,إكتشفت بأن هنالك أعضاء كثيرون لديهم مكتبات .توقفوا عن الكتابة الآن . مما لفت إنتباهي !!

Quote: مبالغة يا دكتور مجدي البنطونوفوبيا دي أنحنا ناس الغرب معذورين فيها بعيدين من البحر عشان كده ممكن نصاب برهاب المياه( Hydrophobia). بالمناسبة حبيبنا عبداللطيف بكري عندو رهاب الطيران( Acrophobia) رغم إنو بيكون في الجو أكثر من وجودو في الرياض وسودانيزاونلاين

ياتوحا ، مشتاقون والله ، وكل عام وأنت بألف خير،،

أولا شكرا على الملاحظة العجيبة دي ، وأنا قاعد أقول للناس : قمة الشجاعة أن تركب الطائرة وأنت ترتعد من الخوف!!! ههههه،،

ثانياً : الرهاب ولى إلى غير رجعة بعد أن شهدنا رهاب من نوع آخر طريق الابيض الخرطوم ايام العيد: لا حول ولا قوة الا بالله العلي العظيم: جنس هبالة ، وكضاب أي معارض يجي يقول الشوارع والانقا> ، (حرف الدال ابونقطة ضاع مني)،،
والله الشارع رهيب عديل لكن السواقين هم السبب الرئيسي في الكوراث،،

ثالثا " البروف مجيد المرة دي عرفنا جايين بمحطة (ربك) قفل العيادة وسافر الابيض
وصلنا الأبيض جانا طشاش طشاش،،
قلنا نوصله في ربك في طريق العودة : لقين ليك صف العيانيين حدو كوستي؟؟ معقولة بس ؟؟

حقنا تحولو لينا رصيد يابروف،،

بعداك ممكن ندخل في الجو العام للبوست،،

سلام وتحايا للجميع ، وعيد سعيد،، وفاتك عيد كارب حبيبنا الفاتح ، خلي مجدي يحكي ليك،،

Quote: ياتوحا ، مشتاقون والله ، وكل عام وأنت بألف خير،، أولا شكرا على الملاحظة العجيبة دي ، وأنا قاعد أقول للناس : قمة الشجاعة أن تركب الطائرة وأنت ترتعد من الخوف!!! ههههه،، ثانياً : الرهاب ولى إلى غير رجعة بعد أن شهدنا رهاب من نوع آخر طريق الابيض الخرطوم ايام العيد: لا حول ولا قوة الا بالله العلي العظيم: جنس هبالة ، وكضاب أي معارض يجي يقول الشوارع والانقا> ، (حرف الدال ابونقطة ضاع مني)،، والله الشارع رهيب عديل لكن السواقين هم السبب الرئيسي في الكوراث،، ثالثا " البروف مجيد المرة دي عرفنا جايين بمحطة (ربك) قفل العيادة وسافر الابيض وصلنا الأبيض جانا طشاش طشاش،، قلنا نوصله في ربك في طريق العودة : لقين ليك صف العيانيين حدو كوستي؟؟ معقولة بس ؟؟ حقنا تحولو لينا رصيد يابروف،، بعداك ممكن ندخل في الجو العام للبوست،، سلام وتحايا للجميع ، وعيد سعيد،، وفاتك عيد كارب حبيبنا الفاتح ، خلي مجدي يحكي ليك،،

سلام حبيبنا تيفا ووالله شوق بلا حدود. وحزين إني ما قدرت اوفي بوعد النوار!.
وطبعا مجدي لمن ضرب لي ما ضرب حبا في المكالمة بقدر ما عاوز يقول لي شوف الوجهاوالمدرا المعانا هنا في الابيض وضاربين الشيات يعني مسألة بتاعت حندكة وكده!
اقول ليك حاجة مجدي ده أحسن ترمي طوبتو زي ما انا اليومين دي قاعد افكر ارمي طوبتو( لووول).
تصدق يا تيفا ناس البيت برضو مفكرين يرموا طوبتو. قالوا كم مرة كده بضرب تلفون بيقول جاي يتغدى ويقوموا يجهزوا الغدا الما خمج عشان الدكتور جاي، يقوم يجي تاني يوم يقول ليهم كان عندي عملية قيصرية Critical على حد تعبيره.تصدق كانوا عاوزين يرموا طوبتو لكن قلت ليهم مجدي ده ما عندو " الأناالمزيفة" عشان كدة سامحوووووووووه.بس إن شاءالله وصل ليك رسالتي.
كل سنة وأنت والأسرة بألف خير.
--
مسافر بكرة دقة سريعة كده وبجي يوم الإثنين، بيناتنا كول.

محبتي المعروفة

Quote: ثانياً : الرهاب ولى إلى غير رجعة بعد أن شهدنا رهاب من نوع آخر طريق الابيض الخرطوم ايام العيد: لا حول ولا قوة الا بالله العلي العظيم: جنس هبالة ، وكضاب أي معارض يجي يقول الشوارع والانقا> ، (حرف الدال ابونقطة ضاع مني)،، والله الشارع رهيب عديل لكن السواقين هم السبب الرئيسي في الكوراث،،

سلام يا أبو خالد . يعني نقول الطيرانوفوبيا إتحول إلي زلطوفوبيا ؟
=
فعلا" السواقين متهورين , لكن بعد تركيب الرادار دا عملوا حسابهم شوية !
يا ريت يرجعو لينا القطار و يريحونا( لأنه ما أظن في زول عنده قطاروفوبيا )
مودتي

Quote: الحضور الان بالمنتدى العام لسودانيز أون لاين دوت كوم 801 شخص » (1 )عضو و (800) زائرا »عبدالمجيد المقابل

كان تقفل الباب بى جوة عشان تمقلب كل العضوية,
والريس زااااتو.
وين بتاعين السيكيوريتى, تلقاهم مشوا يشربوا شاى
عند "حليوة".

مبالغة فعلاً يا مجيد

Quote: وحزين إني ما قدرت اوفي بوعد النوار!.

حبيبنا الفاتح , عدم وفاءك بالوعد أدخلي في حرج عظيم , لأنه حسب وعدك لي فإنني قد عممت الخبر الجميل بمقدمكم الكريم,لكن البركة في أخونا عبد الطيف بكري ,أوعد فأوفي ( و إستمتع بشواءات سوف تكلفه الكثير من حبوب القاوت)..
مودتي لكما

د. مجيد سلام كتير،

منذ مدة قدم أحد مراقبي المنبر screen print للحضور وكان ضمن تلك (الكبشره)
العجيبه إسم عضوين مكرر يعني على سبيل المثال كالآتي:
عبدالمجيد المقابل
عبدالمجيد المقابل
أحمد القرشي
أحمد القرشي
وبين الإسمين أسماء أعضاء آخرين أونلاين،
بالطبع لا يهتم الناس بجزئية الحضور وإن فعلوا لرأيت العجائب.
يعني ممكن تجد بين الحضور مايكل جاكسون



خارج المبالغات:
أحمد القرشي بيفتش عليك.

Quote: الحضور الان بالمنتدى العام لسودانيز أون لاين دوت كوم 801 شخص » (1 )عضو و (800) زائرا »عبدالمجيد المقابل

كنت تقلبا طوالي يا دكتور وتدخل بكري بيت النمل ...
او كنت تدي الـ (800) جنسية (باسوورد) وتنفصل وتعمل دولة براك


دمت يا دكتور ويا بخت التمنمية بمستضيفهم ...

Quote: كان تقفل الباب بى جوة عشان تمقلب كل العضوية, والريس زااااتو. وين بتاعين السيكيوريتى, تلقاهم مشوا يشربوا شاى عند "حليوة". مبالغة فعلاً يا مجيد

سلام يا عبد الله
قلتا لي أقفل الباب من جوة ؟ !! .. ياخي أنا الخلعة كاتلاني , وجسمي برد و حيلي مات , قلتا إحتمال يكون في إضراب غير معلن من الأعضاء, أنا الوحيد الكسرتا الإضراب, و طوالي فكرت في كمية البوستات الح تفتح ضدي,, خائن خائن يامجيد ,, عميل عميل يا مجيد , فشلتا الإضراب يا مجيد , و سرحتا كتير و ما حلاني من السرحة دي إلا بعد ما عملت رفرش و لقيت ليك الجماعة قاعدين ,, الحمد لله

تسلم أخي عبد الله و سعيد بمرورك الأنيق

Quote: عبدالمجيد المقابل عبدالمجيد المقابل أحمد القرشي أحمد القرشي

مولانا محمد المرتضي , سلام و محبة
لو كان لقيت الإسماء مكررة كان ظنيت إنو جاني طشاش من مصاغرة الإسكرين , طوالي كنت عملتا ساين اوت,عشان أريح عيوني,
لكن المشكلة يا مولانا لقيت نفسي ( واقف براك و الهم عصف !)

=
خارج المبالغات
صحبك د.قرشي قضي معنا وقت طيب و شرح لنا بيان بالعمل طريقة أكل السمك العمانية !!
وحملناه وصايا لكم و للمتبندر شيقا.
مودتي

Quote: وحملناه وصايا لكم و للمتبندر شيقا.

في انتظارها

اكيد حتكون نبق ولا لوب وغضيم يا ناس الهامش

تفتكر اكون حاري لي منكم عطور باريسية يا ناس الضهاري؟

في رصده الدقيق و متابعته الجيدة أورد دكتور المقابل في مداخلة سابقة أنه لاحظ أن الكثير من أصحاب المكتبات توقفوا عن الكتابة في المنبر و هذه في حد ذاتها "مبالغة" و هو أمر يقود لمسألة العضوية الخاملة في ظل وجود عدد مقدر من الطلبات لحيازة عضوية المنبر أليس الإحلال هو أحد الحلول لأصحاب الطلبات المكدسة؟.

مبالغه أنو البوست ده فات على من أصلو يا مجيد لكن فى جنس الحال الانا فيها دى
فول قدوره زاتو يفوتنى.

أرجع لما ذكره أخونا الأديب أسعد العباسى فى منحاه للحديث عن التناول الجاد واندفاع البعض أو (البعض الناشط)
لتناول المواضيع الأقل أهميه (لا أقول هامشيه) عشان ما أجيب الهوا لروحى وأنا ماعندى زمن للملاجاجا. أتفق معاك تماما يا أسعد
حيث تطرح مواضيع فى غاية الاهميه للكل وليست لأهل الاختصاص فقط وهى تهم كل مناحى حياتنا ولكن يأتى التناول أو المشاركه
الباهته من حيث العدد والنوع الذى لايسمن ولايغنى من جوع.

أنا أسلم بأن الكل حر فى تناول ما يروق له أو مايعتقد ويراه مثريا للحوار من ناصيته ولخيار الكل منا كل الاحترام, ولكن تناولنا
للمشكل يأتى فى حيز التناول النقدى للحاله نفسها دون شخصنة الامور. فى اعتقادى المتواضع أن هذا المنبر يشكل
مدرسه خاصه تضم مفكرين وعلماء وايضا يضم العام والبسيط وما بينهما تتفاوت الدرجات صعودا وهبوطا ولكنه رافدا هاما للحوار الفكرى على
الساحه السودانيه خاصه بعد تغير لغة ووسائل الخطاب الاعلامى الذى كان محصورا على قله لم تكن قاعدتها وجعبتها الثقافيه
عريضه بما يكفى لسد رمق احتياجات الوطن الفكريه. لكن مثل هذه المنابر سحبت البساط من تحت أقدام جيل الكنكشه وأتاحت الفرصه للكل
الجيد والمتوسط وغيرهم وهذا فى حد ذاته مكسب لساحة الحوار ولكن اذا اردنا لذلك الحوار ان يأتى بثمره أكثر فائده, فتناول ظاهرة
عزوف الاغلبيه تناول الامور الجاده هى نقطه يجب تناولها. شكرا ليك يا مجيد وشكرا لاستاذنا الجليل اسعد العباسى

Quote: او كنت تدي الـ (800) جنسية (باسوورد) وتنفصل وتعمل دولة براك.

الانيق ود الجمري
ياخ يا ريتني لو اقدر، ودي على وزن كلام فنانك المفضل! تصدق يا امير كلمة إنفصال دي بقت كلمة شديدة الوطأة على النفس ولو على مستوى البورد!
عشان كده اهلنا بيقولوا العرجاء لمراحها : لو غبتوا بغيب معاكم ولو جيتوا بجي معاكم.

أكيد معزتي

Quote: في انتظارها اكيد حتكون نبق ولا لوب وغضيم يا ناس الهامش تفتكر اكون حاري لي منكم عطور باريسية يا ناس الضهاري؟

حبيبنا شيقا جاتنا برقية عاجلة من المهجر إنو السلع النادرة دي ترجع بأسرع فرصة ومن هنا وماشي ما تطلع من مناطق الصفوة أي سلعة نادرة إلا بعد إجتماع خاص لصفوة الداخل والخارج إحتجاجا على كلمة الضهاري التي قام بتسريبها موقع ويكيليكس(وجه ضاحك).
أكيد معزتي

مجيد و جميع الاصحاب سلامات
يبدو ان بعدنا عن سودانيز ابعدنا عن الكتير من الجمال
بوست لامي.................
خصوصا صديقنا مرتضي عبد الجليل الطولنا منه

تحباتي

Quote: في رصده الدقيق و متابعته الجيدة أورد دكتور المقابل في مداخلة سابقة أنه لاحظ أن الكثير من أصحاب المكتبات توقفوا عن الكتابة في المنبر و هذه في حد ذاتها "مبالغة" و هو أمر يقود لمسألة العضوية الخاملة في ظل وجود عدد مقدر من الطلبات لحيازة عضوية المنبر أليس الإحلال هو أحد الحلول لأصحاب الطلبات المكدسة؟.

القانوني الضليع أسعد
دخلت المكتبة في سودانيزاونلاين ووجدت كتابات قمة في الروعة وجدت قصائد من عيون الشعر للأستاذة المبدعة أسماء الجنيد وقد كانت تكتب في السابق بإسم ( سوما)وجدت ايضا كتابات للاديب محسن خالد والزميل دكين والزميل كيكي وهم لا زالوا مواصلين العطاء.بإختصار وجدت كتابات لبعض الزملاء الذين توقفوا، وكان سؤالي من منطلق العشم في مواصلة العطاء. ولكن ليس بالضروري أن يقودنا هذ بشكل تلقائي إلى الإحلال.لانو الإحلال هنا بيدي المنبر ما يشبه البعد التجاري او الكتابة بالكرباج( يا تكتب يا نفصلك) وما أظن الباشمهندس بكري ممكن يعمل حاجة زي دي.لانو في طرق كتيرة لتشجيع الناس على الكتابة .
أكيد معزتي

انت حي يا بروف؟

المسنوح باعني اتخيل - حرم كان بتصل فيني كل يوم ما عارف حصل شنو؟ - اسبوعان ما اتصل فيني

دي شكوى ليك عديل عشان تهنظبو لي سجم الرماد

Quote: انت حي يا بروف؟ المسنوح باعني اتخيل - حرم كان بتصل فيني كل يوم ما عارف حصل شنو؟ - اسبوعان ما اتصل فيني دي شكوى ليك عديل عشان تهنظبو لي سجم الرماد

واحاة ربي الليلة إتصلت عليك وتلفونك مقفول.
ياخي أنت لو دللوك في مزاد كريستي مافي زول يقدر يتمن فيك، لا حولا!

مشتاق ليك عديل كده أنت وصاحبي باسط والمسنوح خضر حسين( المعارض المعروف، لووول)

واحاة ربي الليلة إتصلت عليك وتلفونك مقفول.
ياخي أنت لو دللوك في مزاد كريستي مافي زول يقدر يتمن فيك، لا حولا!

مشتاق ليك عديل كده أنت وصاحبي باسط والمسنوح خضر حسين( المعارض المعروف، لووول)



الفيك اتعرفت بتكون شايل بندقيتك ! وقانص في بطانة طوكيو

Quote: مبالغه أنو البوست ده فات على من أصلو يا مجيد لكن فى جنس الحال الانا فيها دى فول قدوره زاتو يفوتنى.

المبالغة الجد جد يا سيف إنك غادرت الولايات المتحدة قبل ثلاثة شهور متوجها" نحو السودان , لكنك لم تصل للآن !!!
الجميع لا زال يترقب مقدمك الميمون ..

Quote: الفيك اتعرفت بتكون شايل بندقيتك ! وقانص في بطانة طوكيو

لكن يا شيقا ما بالغت عاوز تلحقني الزينين؟
ياخي الاسلحة النارية الضبطتها الشرطة خلال العام ده في اليابان كلها ما إتجاوزت 13 بندقية و5مسدسات!
ياخي دي بلد امان شديد.تصدق يا حبيبنا الناس ديل ما بتهاونو في مسألة السلاح الناري دي نوهائي، لدرجة أي رئيس يزور البلد دي الحرس بتاعو بيسلم سلاحو في المطار.والله يا شيقا السنة الفاتت في واحد ضرب ليهو حمامة كسر رجلها، عينو ما شافت إلا النور: 7,000 دولار غرامة وشهر Community service من صباح الرحمن!
حكيت القصة دي لواحد صاحبي قال لي الزول اصلوا ضرب " حمام الأيكي "؟

قلت لي بندقية وقانص؟ غايتو الفيك انت إتعرفت لووووول


محبتي

Quote: Quote: الحضور الان بالمنتدى العام لسودانيز أون لاين دوت كوم 801 شخص » (1 )عضو و (800) زائرا »عبدالمجيد المقابل

الحضور الان (.)عضو و(800) زائر




ياخ حتي العضو رقم310 مافي

مبالغة غريبة

تحياتي يا صديق

Quote: مجيد و جميع الاصحاب سلامات يبدو ان بعدنا عن سودانيز ابعدنا عن الكتير من الجمال بوست لامي................. خصوصا صديقنا مرتضي عبد الجليل الطولنا منه تحباتي

الحبيب د. والي الدين الفكي
وينك يا خي ؟ طبعا" غيابك تزامن مع إنضمامي للمنبر , قلتا مازحا" لمرتضي , صاحبك والي الدين حرد لينا المنبر !!
سعيد بعودتك والبركة في هذا البوست الجابك ... و ما تكتر الغيبة..
معزتي

Quote: مجيد و جميع الاصحاب سلامات يبدو ان بعدنا عن سودانيز ابعدنا عن الكتير من الجمال بوست لامي................. خصوصا صديقنا مرتضي عبد الجليل الطولنا منه تحباتي

ولي يا فردة مشتاقين والله

ياخي يوم صحيت بدري وبقلب كدة في قنوات السودان لقيتك في قناة الشروق آخر كرفتات و كدة

ليك وحشة ياخ.

مجيد شوف مبالغتي الجبتها ليك دي!!!

تحياتي ومودتي يا شباب

ود المقابل

سلام

Quote: لكن يا شيقا ما بالغت عاوز تلحقني الزينين؟ ياخي الاسلحة النارية الضبطتها الشرطة خلال العام ده في اليابان كلها ما إتجاوزت 13 بندقية و5مسدسات! ياخي دي بلد امان شديد.تصدق يا حبيبنا الناس ديل ما بتهاونو في مسألة السلاح الناري دي نوهائي، لدرجة أي رئيس يزور البلد دي الحرس بتاعو بيسلم سلاحو في المطار.والله يا شيقا السنة الفاتت في واحد ضرب ليهو حمامة كسر رجلها، عينو ما شافت إلا النور: 7,000 دولار غرامة وشهر Community service من صباح الرحمن! حكيت القصة دي لواحد صاحبي قال لي الزول اصلوا ضرب " حمام الأيكي "؟ قلت لي بندقية وقانص؟ غايتو الفيك انت إتعرفت لووووول

زولك اول مرة يكون شايت برة الشبكة لكن انا فاهمو كويس هو ناقش لكن قصدو ايهام الاخرين بقصة حمامة مكة دي .

هاك القنبور دا يا مسنوح .

بالله كسر رجل حمامة حمامة يسووا ليهو كدا؟


ههههههههههههههههههها يعني أكتر من دية الادامي في السودان

Quote: الحضور الان (.)عضو و(800) زائر

والله يا مرتضانا لو ما كنت مكبشرها ما كنا صدقناك.. مبالغتك فاتت مبالغتي !

Quote: هو ناقش لكن قصدو ايهام الاخرين بقصة حمامة مكة دي .

حبيبنا شيقا , صحابك دا ما تعصر عليهو شديد , عمل غمران ,خلاص خليهو ...

العزيز عبد المجيد تحياتي داير أوريك مبالغة تانية وضعت بوست منذ أكثر من شهرين بعنوان " الصحافة السودانية..جرد حساب" و تم ترشيحه كأفضل بوست وفيه أتناول مجريات و حال الصحافة السودانية و قبل أسبوع و ضعت بوست بإسم "الجنس الثالث" أتناول فيه الشعر الهابط و الهلامي فتصور أن قراء بوست الصحافة تجاوز الألف بنحو المائة بينما تجاوز بوست الجنس الثالث الألفي قارئ في أسبوع..أها يا دكتور دي ما مبالغة..؟!

Quote: العزيز عبد المجيد تحياتي داير أوريك مبالغة تانية وضعت بوست منذ أكثر من شهرين بعنوان " الصحافة السودانية..جرد حساب" و تم ترشيحه كأفضل بوست وفيه أتناول مجريات و حال الصحافة السودانية و قبل أسبوع و ضعت بوست بإسم "الجنس الثالث" أتناول فيه الشعر الهابط و الهلامي فتصور أن قراء بوست الصحافة تجاوز الألف بنحو المائة بينما تجاوز بوست الجنس الثالث الألفي قارئ في أسبوع..أها يا دكتور دي ما مبالغة..؟!

عزيزنا اسعد
تحياتي ومعذرة على الرد المتأخر ففي القلب شيء من الحزن.
الكلام ده بيعيدنا لمسألة الذائقة والإهتمامات المتباينة للأعضاء الإتكلمنا عنها من قبل.ممكن واحد بحب يسمع اغاني الحقيبة فيما نجد آخر يحب سماع الغناء الحديث، ثانيا : ممكن تفتح بوست عن تهديد طبقة الاوزون للمناخ ويكون عدد القراء 10 مثلا وتفتح بوست عن التنويم المغناطيسي ويكون عددالقراء 100، وما ننسى كمان أنو موضوع الصحافة في فهمي موضوع تخصصي بينما موضوع الجنس الثالث موضوع تقييم شعري يخضع لذائقة الافراد!
أكيد معزتي