طــواقى الخــوف ,,, جديد القدال ,, شئ عجيب ,,,

Quote: سلام يا كمال هذه الجديدة لك ولكل السودان والسودانيين الصابرين والطواقي مقاسات فكل رأس يلبس منها مقاسه ومن لم يجد فهنالك من الطواقي (اليونيفيرسال) ما سوف تناسبه لك مودتي الدائمة قدال

رساله مفرحه وصلتنى بالأمس فى الإيميل من الأخ العزيز الشاعر محمد طه القدال
ومعها قصيده جديده له قرأتها فأقشعر بدنى وحزنت على وطنى السودان الذى وصف
حاله القدال فى القصيده حتى تخيلت أنه يتحدث عن الصومال أو أفغانستان أو أى
من الأوطان التى ذهبت إلى زوال ,, ولكنه للأسف كان يعنى السـودان .
أشرككم معى فى قراءة القصيده والتى كنت قد أنزلتها بالأمس فى بوست إلا أن الأخ
بكرى لم يستصحبه فى الأرشفه الجديده ,, لذلك الآن أعيد فتح بوست جديد فالقصيده
تستحق أن يقرأها كل سودانى .

Quote: طواقي الخوف محمد طه القدال 9ديسمبر 2010م ما خايف المطر يتحاشى الضهاري الراجية قولة خيرا ولا خايف المطر يمشي على الصحاري تلمو في بشكيرا ولا خايف العشم يتناسى العشامى ونيما ياكل نيرا ولا خايف النفس تتذكر نفسها وتنسى يوم حِدّيرا خوفي على البلد الطيب جناها وقمنا في خُديرا شاحدك يا كريم لا تحصل خراب لا أرجى يوم ودّيرا *** وانا ما بجيب سيرة الجنوب. عيال بتسرح للمدارس .. والفطور نجماً بعيد. بنوت بتجري على الخطاطيب الخطاطيف البتجرح .. والعريس نجماً بعيد. الدكاكين التملا تفضي، السماسرة يسمسروا، والبسفو الطين .. يسفوا، والبحتّوا الراب .. يحتّوا، والبناطلين ليها سستم، والقوانين ليها سستم، البنوك الفيها بستم .. من سويسرا ولي ماليزيا بالسفارات والعمارات والخبارات .. . انا كنت متغطي .. ومتدفي، العمة ملوية، والشال على كتفي. سودان وكان ما كان سودان علي كيفك السكة ساعة إيد والأرض مروية والناس حنان وظراف والراح يجيك .. للحول والخدمة مظبوطة مظبوطة مدنية والدنيا حرية الماشي درب الكار يغور والتاب من التمباك يتوب..! انا مابجيب سيرة الجنوب. الغبّوا عرفوهو والعرفو سوّوهو والسووا بلقوهو .. ...... أصبحت زي الزول قادل بوسط السوق سروالو نصلوهو لو العِرق مسروق أو قلبي نشلوهو طعم الكضب مسلوق ماسخ تضوقوهو لو فمي ما مطلوق أو كمي غسلوهو ياني البسوي القوق قولي البتابوهو ماعندكم دمي ما عندهم دمي من دمي لا لا لا ماقدروا فصلوهو. وانا ما بجيب سيرة الجنوب؟ قول استقلْ .. انا في صفوف الزوق واقف مع الواقفين مزنوق بهنِّيهو ويهنوهو أواستقال .. ودا أول الأحزان أو قالوا باعوهو ودا ياهو قطِّيع القلوب أنا ما بجيب سيرة الجنوب، فالسيرة كمين ألف عام لوني المحرق مندوكور وشكلي شكلين شكل منقة وشكل تور دمي المشتت من قبايل نوح وحام شعري المقرقد زي حصايا اتشتت فوق الدروب كتفي المهدل بالعيوب وانا ما بجيب سيرة الجنوب أصل البقت من ساس وسايس أو يسوس ياها البقت خلونا من حرب البسوس الفاضلة تكفير الذنوب الفاضلة لمليم البشاتن والمعاطن والخبوب الباقي مايخموكا تاني على الدفافير والكناتر والحروب الباقي تعظيم التماسك في الخطوب لا نافع الشَّدة العلوق ولا نافع المبقوص يحوق لا بنفعك عَرَق الزنوج ولابرقعك لبن العروب إلا الوقوف ألفاً ضكر واحد براك في الشيمة تلفحك الهبوب الغيمة تديك للسفاسف والعواصف والمطر برطع مع الأفعال وادخل على التاريخ يغلب أجاويدك من قرقريب عوسك اخرِج من التاريخ شيخك وعربيدك لا نافعك التكفير ولانافعك التوبيخ فامشيه وحيدك وامرق على التاريخ تلقاه في السهلات مستني كمسيدك لا بيظلم التاريخ ولا يرحم التاريخ إياه عوس ايدك. والأرض موقوت القنابل في الحدود والأرض منهبة الثعالب والطحالب والجيوش باليوناميد واليوناميس والفُرقة بينات القبايل والشتايم في المنصات والشراكة الفي المكايد والخناجرفي الحناجر والمنابر .. آه من تلك المنابر، إنداية كرتلة وبنابر والجرايد داقة طارات المدايد الصَدَق في الناس كذوب الساسة نِيّام العسل بين انتباهة وغفلتين بين السلاطين والحبوش والشلاتين والقرايب فين حلايب؟ واللي بنى الأرض كان في الفرض سوداني عيني عليها اتمزعت حتة في قلبي وحتة ف غصتي .. تاني آدي اسرائيل في النيل بكِّيني ولعبطني والنيل أدنداني إحنا حبايب في الطيّبة والآه؟ آ. غنيلي ورقصني ؟ طيب. بسِّ سمعني آه الآه في وداني. *** أنقد السُقا وما بينصلح وكَّايو وانكشح اللبن ما بينفعِن بكَّايو بعدن بى الدروب مابقصِّرِن تكَّايو والشاكي النقاص ناقص قمح شكَّايو *** وانا لا بجيب سيرة الجنوب ولا أكلوني إذا ما أكلو التور الأبيض .. (الأرض في الجزيرة) وبدر الله فوق سماهو يا ساسا يابساحوتة مكوار حبس مياهو عطشت قبايل ابقوتة؟ البودة في خلاهو والأرضة في بيوتا؟ الزول رِبَت كلاهو سمينة بي مقوتا يا تمت المعاهو أو خلصت الحدوتة وانا لا بجيب سيرة الجنوب ولا أكلوني إذا ما أكلو التور الأبيض .. *** يدر الله يابسلوكة سلوكة الجزيرة كل يوم فينا بتنتش سكك الحديد بي كم؟ بي كم بيت المفتش؟ والبيع بيعة عدوكا بعت الأرض بترابا؟؟ باكر تبيع أبوكا وان مُتْ من تُخمة باكر ناس الشرق يبكوكا وناس الغرب يبكوكا ناس الشمال يبكوكا وناس الجنوب يبكوكا. وانا لا بجيب سيرة الجنوب ولا أكلوني إذا ما أكلو التور الأبيض .. *** حمدتكم بالجاية والجاية فوق الجاية وعسكري الجباية قلبو الحجر اللداية *** بشرتكم بالسادة والسادة بعد السادة وجرادة فوق جرادة من دوكة لام كدلدة *** حمدتكم بالواقعة والصاقعة جنب الصاقعة مقدودة مالها راقعة والدمعة صابة وناقعة *** بشرتكم بالتوية والصبنة لي الدامبوية في الحلة دي ام كدوية ما تقعدوا شدرة موية *** والأرض لا حليوة ولاها دي الجزيرة الأرض أمات الحنين لو نقط الضحوي البريق، في الحين تبتق شهوتِن. تحبل كما الأمات وتشرق بالوحم لو تسعة الميلاد بتمرق بالسنين، أو دي الشوارع بالبنات متحينة، ترسل تراتيل الخروج في يوم وتقطع سرتِن. الأرض تعريف الهديل هدل الحمام بشري وشوق السلام انسان بالحيل بيعرف أنَّتِن والأرض شافت إلا خافت من عيون الليل تناجي حبيب غريب في الليل وتفرز غنوتِنْ. زي بذرة في جوف الأرض أو ضحكة عند طرف القلب بتغني لو جات في العيون والضحكة لاقت مرقتِن الأرض منصوص الضمان حضن أمك الدافي وأمين ريحة حبيب جاياني من شمة حبيبتي وكرفتِن لو جاتا في يوم الهموم، في الحين تزغرد فرحتِن. أو حرقصت فوقها السموم، باكر تهبهب نسمتِن. والأرض ما بتعرف تنوم ترتاح وغابت جمتِن بس تدِّي مدين للعديم بالمدة تحفظ ذمتِن *** هن مارقات خلاهِن ما مارقات بَراهِن لي بصاص حِداهِن إو قصاص بِراهِن هن مارقات تراهِن تريانات تراهِن الخوف ما حَماهِن من شوفة حِماهِن طمانات جناهِن بي لبنا معاهِن يوم الشينة جَاهِن.. مرقن ليهو جَاهِن بالعز المبطَّر والزوق الشَفاهِن لا حايدات مداهِن لا قايدات عماهِن وما كشحن بلاهِن فوق زولاً أباهِن لو الضيم رماهِن هِنْ ياهِنْ وما هِنْ. *** وانا لا بجيب سيرة الجنوب لاني زول بالمرة خايف إلا شايف إلا شايف إلا شايف *** أنا شايف المطر يتحاشى الضهاري الراجية قولة خيرا وانا شايف المطر يمشي على الصحاري تلمو في بشكيرا وانا شايف العشم يتناسى العشامى ونيما ياكل نيرا وانا شايف النفس تتذكر نفسها وتنسى يوم حديرا وانا شايف البلد الطيب جناها وقمنا في شدِّيرا ... ... شاحدك يا كريم لا تحصل خراب لا أرجى يوم وديرا.

" مداخلة في بوست الأمس" طـــــــــــــــــواقـــــــى الخـــــــــــــــــــــ...دال ,,, شئ عجيب ,,,
سلامات يا أخي كمال... القدال ينعي السودان!! ..القدال يرثي وطنا تقطعت أوصاله و تفتت ترابه
ولم يبقي سوي البوم ينعق علي قمة دولته واللصوص ينهبون ثروته والبشير يوقع في صكوك تصفيته .... فمتي ينهض شعبه وينتزع زمام أمره متي>? !!.
شوف اللوحة الجميلةدي:_

Quote: انا كنت متغطي .. ومتدفي، العمة ملوية، والشال على كتفي. سودان وكان ما كان سودان علي كيفك السكة ساعة إيد والأرض مروية والناس حنان وظراف والراح يجيك .. للحول والخدمة مظبوطة مظبوطة مدنية والدنيا حرية الماشي درب الكار يغور والتاب من التمباك يتوب..!

..........
وشوف الصورة الكئيبة دي:- ............

Quote: أصبحت زي الزول قادل بوسط السوق سروالو نصلوهو لو العِرق مسروق أو قلبي نشلوهوطعم الكضب مسلوق ماسخ تضوقوهو لو فمي ما مطلوق أو كمي غسلوهو ياني البسوي القوق قولي البتابوهو ماعندكم دمي ما عندهم دمي من دمي لا لا لا ماقدروا فصلوهو. وانا ما بجيب سيرة الجنوب؟ قول استقلْ .. انا في صفوف الزوق واقف مع الواقفين مزنوق بهنِّيهو ويهنوهو أواستقال .. ودا أول الأحزان أو قالوا باعوهو ودا ياهو قطِّيع القلوب أنا ما بجيب سيرة الجنوب، .............

انها يا كمال زفرة حرى من شاعر ينظر بعينى زرقاء اليمامة ، انها آهة موجوع ومفجوع وملتاع

هذا الرجاء :

Quote: شاحدك يا كريم لا تحصل خراب لا أرجى يوم وديرا

لعله يمر بأذنى من يمسكون بتلابيبنا ولكنهم يصمون آذانهم ويسمعون فحيحهم ورجع صداهم ، قال فولتير ( ان من يقول لك لابد من أن تؤمن بما أؤمن به والا لعنك الله لا يلبث أن يقول لك لابد من تؤمن بما أؤمن به والا قتلتك )

وانت ترى يا عزيزى كمال كيف أن رأس الدولة ورمز سلطتها أوعدنا من القضارف بالثبور وعظائم الامور( سوف نجلد ونقطع ) وكيف ازرى بالسلطة القضائية التى من المفترض انها تحمل ميزان العدالة عندما كونت لجنة تحقيق فى الشريط وهو رأس السلطة استبق اللجنة ورأيها وقال ( تحقيق فى شنو )

شاعرنا محمد طه القدال بما يحمل من نفس وروح شفيفة يحترق من مآلات الغد التى تلوح بوادره فيطلق آهته ورجاءه ودعاءه

وسدالآن رأسك
فوق التراب المقدس
واركع طويلا لدى حافة النهر
ثمة من سكنت روحه شجر النيل
او دخلت فى الدجى الابنوسى
او خبأت ذاتها فى نقوش التضاريس
ثمة من لامست شفتاه القرابين قبلك
مملكة الزرقة الوثنية
قبلك
عاصمة اللحظات البطيئة
قبلك

مع تحياتى وتقديرى