Post: #1
Title: شواكيش.
Author: ismeil abbas
Date: 11-27-2010, 04:48 PM
صاحبى على ابودليبة زول جميل تحس بصدقه فى الحديث ومعاها حبة تعتعة تزيده جمالآ فوق ذلك الجمال.
نحن من جيل الستينات وذلك الزمن الجميل..وموضة كلمة شاكوش أخذت رواج كبير...الزول ده مالو يقولو ليك مشوكش.تسكت وتحن لحالو.
على صاحبنا كان مضرب مثل فى كمية الشواكيش الكان بياخده حتى صرنا نحن عليهو وبقى لينا مرجع لحل مشاكلنا العاطفية..ويعرف ليك العلاقة دى إتجاه وين وماشة كيف ومستقبله شنو.الزول بقى خبرة..
كم مرة إتشوكش عن طريق الخطابات بالرغم من إنو زول كتاب.
بقينا لما يفتح ليهو جواب نكون جنبو ونلاحظ تعابير وجهو لما يصل النهاية نشوف الخشم بوز...نقول ليهو البركة فيك.
عندو بت خالو منجضنه بيها نجاض شديد وورانا صورته..بصراحة مافيها كلام.قلنا ليهو يا على إنت متأكد من مشاعرة تجاهك..قال لينا زى ما متأكد من صدق علاقتكم دى معاى..نصحناهو بأن يتعجل ويشوف الخبر.
والله كنا ننتظر الرد ده بفارق الصبر زى فحص ألأيدز...ويوم جاء جات معاهو الطامة الكبري الرد التقليدى إنت زى اخوى...عرفنا الموضوع مافيهو محاولة..
من طرايفه الجميلة قال لينا المرة دى لاخطاب ولا مرسال انا براى ماشى لآهلى وأقابل أهلهم طوالى...
عندو واحدة من بنات أهله فى الفتيحاب..إتشيك وإتريح وطلع والمواصلات كانت زحمة شديد.المهم وصل لقى ليك أهل البت معظمهم موجودين إتكيف وحمد الله قال دى فرصة العمر بشوته واحدة أقول العندى ويباركوا لى وافرح.
المهم مشى لأبو البت وقال ليهو يا عمى مادام الناس دى متلمة دى فرصة كويسة انا بصراحة جيت ناوى القرب.وعايز فلانة.الراجل صنقع ودنقر قال ليهو ياولدى شفت قزايز الببسى المجدعات ديلك والله هسه قبليك قلنا لجماعة قولة خير لكن حرم لوكان جيت قبلهم بنص ساعة ماكنت أديتهم مافى أحسن منك.
على صاحبى جانا وشو ينعل قفاهو وقال ياجماعة لو كان ركبت تاكسى كان وصلت قبل الناس ديل إنعل أبو المواصلات وأبو الزحمة
إقترحنا لعلى ان يكتب لنا كتاب...كيف تستطيع ان تحمى نفسك من الشواكيش وتتجنب التلطيش.
|
Post: #2
Title: Re: شواكيش.
Author: عبدالفتاح أبوشيمة
Date: 11-27-2010, 06:34 PM
Parent: #1
الله يضحّك سنّك
يا إسماعين
وبي ضحّاكات كمان
أها قصّرنا معاك
أنا لو من صاحبك دا
كنت سحلت طوالي
في نقابة العازفين
هههههه شكراً بوست جميل
|
Post: #3
Title: Re: شواكيش.
Author: خالد المحرب
Date: 11-27-2010, 06:41 PM
Parent: #2
Quote: على صاحبى جانا وشو ينعل قفاهو وقال ياجماعة لو كان ركبت تاكسى كان وصلت قبل الناس ديل إنعل أبو المواصلات وأبو الزحمة
إقترحنا لعلى ان يكتب لنا كتاب...كيف تستطيع ان تحمى نفسك من الشواكيش وتتجنب التلطيش.
:33 م) |
الكلام كن قبل الموبايلات ياسمعه الزول كان مسج قال لى بت خالو انا جاى فى الطريق
ماكان ركب التونسيه لكن ما حريف
وحظو جارى الجوكرين ومعرج
سمعه سفرتا الجماعه وبقيت تتلفت يا حليلك حالك تحنن والله
|
Post: #5
Title: Re: شواكيش.
Author: khaleel
Date: 11-27-2010, 06:44 PM
Parent: #3
سلامات ابو السباع
طبعا في مرات في شاكوش بجي من ابو البت
ودا بكون سام جدا
قالو الراجل مشي البت من ابوها
جابو ليهو الشاي الراجل فرك يديهو
وقال ليهو والله يا حاج عايزين
نعمل معاك (مخلط )
الاب قال ليهو
اشرب شاييك يا خنيتة وشيل اهلك
|
Post: #4
Title: Re: شواكيش.
Author: ناصر النعمان البدوي
Date: 11-27-2010, 06:44 PM
Parent: #2
مادة خفيفة وظريفة
تشكر يا شيخ اسماعيل
|
Post: #6
Title: Re: شواكيش.
Author: ismeil abbas
Date: 11-27-2010, 06:45 PM
Parent: #2
أخى عبدالفتاح السلام عليكم وشكرآ على مرورك الجميل...عمرك ما بتقصر وزول واجب...
على صاحبنا كان زول نكتة ,بدل ما يحزن من الشواكيش جاتو مناعة بقى يضحك مع كل شاكوش...
|
Post: #7
Title: Re: شواكيش.
Author: ismeil abbas
Date: 11-27-2010, 07:01 PM
Parent: #6
شيخ العرب خالد المحرب.
الجوالات ساعدت على حل كثير من القضايا بسرعة...وأيضا بتجيك عن طريق شواكيش تقنية سريعة زى الصاروخ..عشان كده بقى كلو شىء على سريع...
يا خالد حمالتك على البيت ما بندخل بدون العيال..وست البيت أم أحمد....ربنا يحفظهم فى حلهم وترحالهم ويجمعنا على خير ياكريم.
تقديرى.
|
Post: #8
Title: Re: شواكيش.
Author: ismeil abbas
Date: 11-27-2010, 07:03 PM
Parent: #6
أخى خليل الهلالابى الجميل..لك التحية..
Quote: طبعا في مرات في شاكوش بجي من ابو البت
ودا بكون سام جدا
|
بينى وبينك سم ابو القدح كعب خلاص..اللهم لاتشوكشنا ولا تعولقنا...
|
Post: #9
Title: Re: شواكيش.
Author: ismeil abbas
Date: 11-27-2010, 07:05 PM
Parent: #8
ناصر النعمان ....شكرآ يا جميل......كيف العائلة؟؟
|
Post: #10
Title: Re: شواكيش.
Author: ismeil abbas
Date: 11-28-2010, 08:56 AM
Parent: #9
الميت ميت مافى شاكوش كتل ليهو زول...............من أمثال على أبودليبة.......
والعندو زكريات شاكوش من الزمن الماضى فليحكى أصلو الدنيا أخرة كوم تراب.
|
Post: #11
Title: Re: شواكيش.
Author: محمد عكاشة
Date: 11-28-2010, 10:32 AM
Parent: #10
ياعمك
الشاكوش ماكتل ليهو زول لكن بخليك بين الميته والحياة,,
أسال مجرب
عيدك مبارك
|
Post: #12
Title: Re: شواكيش.
Author: ismeil abbas
Date: 11-28-2010, 10:39 AM
Parent: #11
محمد عكاشة يا راقى........
ما عشان كده عايزين تجارب ألأخرين للأستفادة...ومال على أبودليبة صاحبى ده جابه كيف؟؟؟ما تجارب وبعدها جات الخبرة.
عيدكم سعيد وتحياتى للأولاد.تقديرى...
|
Post: #13
Title: Re: شواكيش.
Author: حسبو عكاشة
Date: 11-28-2010, 12:13 PM
Parent: #12
ازيك يا عمو يا جميل
صاحبنا في الجامعة كان متعود علي الشواكيش لحدي ما بقي مشهور بانو راسو اتورم و مافي مساحة لشاكوش جديد
اها بقينا بنشاغلو بانو بقي لمن يطرح لي بت جديدة, البت بتعاين في راسو و ما بتلقي فرقة, بتقول ليه ... افتح يدك افتح يدك و طاااااااااخ تسلمو شاكوش في يدو :)
مشتاقين ياخ
|
Post: #14
Title: Re: شواكيش.
Author: ismeil abbas
Date: 11-28-2010, 05:43 PM
Parent: #13
يا حسبو ياجميل............بسأل عليك.
Quote: افتح يدك افتح يدك و طاااااااااخ تسلمو شاكوش في يدو :)
|
ده نوع خطير البسلموهو ختمو فى يدو.....................تسلم
|
Post: #15
Title: Re: شواكيش.
Author: ismeil abbas
Date: 11-30-2010, 05:03 PM
Parent: #14
على تمتم وسب ولعن كل معانى الحب....قلنا ليهو إستغفر الله..قسمتك موجودة ما تقلق......نواصل.
|
Post: #16
Title: Re: شواكيش.
Author: الطيب شيقوق
Date: 11-30-2010, 05:14 PM
Parent: #15
ابو السباع
كيف تستطيع ان تحمى نفسك من الشواكيش وتتجنب التلطيش.
يا اخي دا المفروض يكون عنوان البوست الحلو دا
سلامي
|
Post: #17
Title: Re: شواكيش.
Author: الوليد الرشيد وراق
Date: 11-30-2010, 05:26 PM
Parent: #15
Quote: ازيك يا عمو يا جميل
صاحبنا في الجامعة كان متعود علي الشواكيش لحدي ما بقي مشهور بانو راسو اتورم و مافي مساحة لشاكوش جديد
اها بقينا بنشاغلو بانو بقي لمن يطرح لي بت جديدة, البت بتعاين في راسو و ما بتلقي فرقة, بتقول ليه ... افتح يدك افتح يدك و طاااااااااخ تسلمو شاكوش في يدو :) |
موجه لعناية السيد مورتا أحمد عبد القادر
|
Post: #18
Title: Re: شواكيش.
Author: معاوية المدير
Date: 11-30-2010, 05:42 PM
Parent: #17
إسماعين يا عزنا، هاك دي من
الزمن الجميل:
الشريط ((الشاكوش))
في الليلة ديك القصة ذاتها بقت عليك
يا عبدو وأدوك الشريط
يوم قولنا ليك أنضم معاها وكلّما
أبيت تسمع كلامنا وبقيت لميض
وقلته أحسن أكون تقيل أنا ما جميل
وبقيت تقيل لامن سقوك موية الغسيل
وجيت تنطط زي زمان وتباري بقعور الشجر
كايس كراسي الخيزران ..
وقعدته يا زينة الرجال.. كهربجي قال
رفعوا الستار والبت تجي ومرات تقيف
ومعاها يا زول ولداً حريف
والوقفة كانت وقفة ولف
صاحبنا بالاحساس عرف
سألته والناس كلّموك
ووقعته في شارع الزلط
تبكي وتجعّر والعيون اتورّمت
ويد القميص ضهر القميص كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت دايرين ننوم
يا أخوانّا لأ أنا عايز أموت أقع البحر
يا عبدو عيب
الدنيا حر .. والموية بتسخّن عليك
ثلاثة ساعات زولنا يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
في علاقة بين يوم السبت وعين الحسود؟!
ومقارنات بين الجهل والجمال!!
وسوء الإختيار
قال شينة قال ...!
قال شينة قولنا كلام صحيح
وخطيبها زاتو ولد قبيح
بس ياخي قوم الواطة صبحت دايرين ننوم
قام تاني جاب سيرة البحر
وقام تاني جاب سيرة البحر...
شوقنا للناس الطيبين معينه
ابداً لا ينضب...
|
Post: #19
Title: Re: شواكيش.
Author: ismeil abbas
Date: 11-30-2010, 05:52 PM
Parent: #18
الطيب الجميل...
Quote: كيف تستطيع ان تحمى نفسك من الشواكيش وتتجنب التلطيش.
|
والله جانى نفس ألأحساس...شكرآ لتوارد الخواطر يا انيق.
|
Post: #20
Title: Re: شواكيش.
Author: الطيب شيقوق
Date: 11-30-2010, 06:04 PM
Parent: #19
والله جانى نفس ألأحساس...شكرآ لتوارد الخواطر يا انيق.
تسلم برضو كدا ماشي يا ارباب
|
Post: #21
Title: Re: شواكيش.
Author: ismeil abbas
Date: 12-01-2010, 04:40 PM
Parent: #20
الوليد الرشيد الزول أبو فكرآ سديد...لك التحية.
Quote: موجه لعناية السيد مورتا أحمد عبد القادر
|
هذه الشخصية يحكى عنها انها ظريفة مثلك.....لك تحياتى.
|
Post: #22
Title: Re: شواكيش.
Author: ismeil abbas
Date: 12-01-2010, 04:48 PM
Parent: #21
أخى معاوية المدير................لك التحية وكل عام وانتم بخير...
Quote: إسماعين يا عزنا، هاك دي من
الزمن الجميل:
|
والله إنت أجمل تسلم يا غالى ...........
شكرآ على الشعر الحلمنتيشى...........عبده عامل تقيل لمان سقوهو موية الغسيل.....(خشم سجمو)..
|
Post: #23
Title: Re: شواكيش.
Author: ismeil abbas
Date: 12-01-2010, 05:58 PM
Parent: #22
خالد سعيد ألأرباب الذى نفتقده كثيرآ فى المنبر ,إتصل بى وهو متابع لهذا البوست وحكى لى قصة واحد إتشوكش بطريقته الجميلة.قال:
عندهم واحد صاحبهم ماشى يخطب.من البداية هم حاسين بخطر الشاكوش بل أحيانآ ساطور..لآن الفرق ألأجتماعى بين الطرفين شاسع..المهم صاحبنا وأمه وأخته إتوكلوا ومشوا وبعد اللقاء سألوهو أصحابوا أها النتيجة إن شاء الله خير..قال ليهم:والله خير الحكاية نص نص يعنى فى جزء موافق وجزء ما موافق..قالو ليهو الموافق منو والما موافق منو.قال ليهم: أنا وأمى وأختى موافقين وأمها وهى وبقية أسرتهم ما موافقين...
مت من الضحك....تقديرى......ياما فى الدنيا دى من مشوكشين.
|
Post: #24
Title: Re: شواكيش.
Author: ismeil abbas
Date: 12-02-2010, 11:42 AM
Parent: #23
| Quote: تسلم برضو كدا ماشي يا ارباب |
وتسلم ياعمدة والله يديك العافية يارب.
|
Post: #25
Title: Re: شواكيش.
Author: ismeil abbas
Date: 12-28-2010, 04:38 PM
Parent: #24
مرحبأ بكم من جديد.....
|
Post: #26
Title: Re: شواكيش.
Author: Abdlaziz Eisa
Date: 12-28-2010, 07:02 PM
Parent: #25
العزيز/ اسماعيل
سلام
ذكرتنا بالماضي الجميل..
وعندنا ناس ياما حفظوا وغنوا كل ما غناه الراحل/ هاشم ميرغني..
يا حليل ذلك الزمن الجميل..
تحياتي
|
Post: #27
Title: Re: شواكيش.
Author: ismeil abbas
Date: 12-29-2010, 10:08 AM
Parent: #26
ياسلام يا اخى عبدالعزيز..رغم العذاب ورغم الضنى..أديتنا حاجة مفرحة...
Quote: ذكرتنا بالماضي الجميل..
وعندنا ناس ياما حفظوا وغنوا كل ما غناه الراحل/ هاشم ميرغني..
يا حليل ذلك الزمن الجميل..
|
يا أخى المرحوم هاشم ميرغنى قبل ما يبدأ الغناء الناس بتبكى والناس كانت بتجهز المناديل قبل كل حاجة.......والعجب زيدان فى الليلة ديك.........جنس تجعر ونهيف..
لكن أبشرك أخوك ما إتشوكش كتير كلها جات سلاخية...الحمدالله
شكرآ لآثراء البوست بجميل إبداعاتك...تقديرى وأحترامى..
|
|