Post: #1 Title: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 07:59 PM Parent: #0
قررنا نحن البدري عبد الله المرشد الاعلى لقبيلة الزهجانين وامم المدبرسين ان يكون هذا الخيط بمثابة منبر لكل من يأنس في نفسه بلوغ مرحلة (القفلة) او (القرفة) او ما شابه من مشاعر احباط .. فهلموا الينا يرحمكم الله ايها الرهط المدبرس ..
حجر الدسمس كان احد معالم كلية الاداب بجامعة الخرطوم ..كان معروفا لدى جميع طلاب الكلية والجامعة ولا ابالغ ان قلت ان البعض كان يجهل اسم العميد بينما يعرف حجر الدسمس حق المعرفة ..كان حجر الدسمس ملازا لكل المدبرسين والزهجانين ..وكان الحجر منبرا لخطب الخستكة والفقع واللا موضوع ... نقلا عن كتاب اصول وتاريخ الدبرسة للعلامة ابن عبد الله الزهجان
Post: #2 Title: Re: حجر الدسمس ملتقى قبيلة البورداب الزهجانين والمدبرسين Author: خضر حسين خليل Date: 11-09-2010, 08:04 PM Parent: #1
السلام عليكم ورحمة الله وبركاته
Post: #5 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:11 PM Parent: #2
Quote: السلام عليكم ورحمة الله وبركاته
وعليكم السلام ورحمة الله اخانا خضر ..وارجو ان تكون احوالكم مع رجال الضرائب ومناديب المحلية على ما يرام ..فقد نما الى علمنا ان هنالك مخططا جهنميا لوأد كل المواهب بذلكم السوق الواقع جنوب ملتقى النيلين ..كما نرجو ان تمدونا بكافة المعلومات التي تساعدنا في التصدي وصد كل من تسول له نفسه النيل من مكتسبات شعبنا الابي
Post: #3 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:05 PM Parent: #1
نرجو ان ننوه الى ترحيبنا الحار بكل من لم يأتي لحوار
Post: #4 Title: Re: حجر الدسمس ملتقى قبيلة البورداب الزهجانين والمدبرسين Author: خضر حسين خليل Date: 11-09-2010, 08:10 PM Parent: #3
alsalaam alikom wramat allah wbraktoo
ma atito lgensan hewaar
Post: #6 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:17 PM Parent: #4
عاجل
وردنا الان الخبر التالي ..
تمت ادانة المدعو مرتضى احمد عبد القادر والشهير ب (مورتا) او (لابورتا) بتهمة حيازة زجاجة مشروب ..الجدير بالذكر ان المحكمة المعنية بقضية مورتا كانت قد تأجلت عدة مرات وذلك لعدم ورود تقرير المعامل الجنائية عن نوعية المشروب واسرار تركيبته العجيبة والتي من خواصها عدم وجود اي روائح مميزة او طعم يمكن تصنيفه ضمن المشروبات المتداولة بقاع المدينة وان كان مشروب مورتا له نفس خصائص مشاريب قاع المدينة المشار اليها انفا
Post: #7 Title: Re: حجر الدسمس ملتقى قبيلة البورداب الزهجانين والمدبرسين Author: باسط المكي Date: 11-09-2010, 08:20 PM Parent: #6
سلام يازول الزهج حبيبنا
Post: #11 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:30 PM Parent: #7
باسط ود المكي سلامات يا زول يا رايق بالرغم من انو المدعو خضر صاحبك ..عموما مرحب بيك زهجان اصيل ومأصّل
Post: #8 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:23 PM Parent: #6
تم ضبط الناشطة والعضو المؤسس لمنظمة وووبات بلا حدود اميرة الشيخ وهي تمتشق حسامها وتخوض معركة ضروس مع احد عتاة المرجفين ولم تردنا حتى اللحظة حجم الخسائر الناجمة عن تلك المعركة ..يشار الى ان الناشطة كان قد تم ايقافها لمدة قاربت الشهرين من انشطتها القتالية لاسباب غير معلومة
Post: #10 Title: Re: حجر الدسمس ملتقى قبيلة البورداب الزهجانين والمدبرسين Author: اشرف السر Date: 11-09-2010, 08:28 PM Parent: #3
سلام
ثم كلام
لقد بلغ السيل الذبي وجاوز الحزام الطبيين في سودانيز اونلاين وحان موعد حجر الدسمس
للقرفانين من مستويات الحوار في بعض البوستات وانفلات مستويات النضال الكلامي حتى تظن ان القصر محاصر اجد ان هذا البوست هو واحة لهم
شكرا لهذا البوست
قرفة بن قرافي
Post: #12 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:33 PM Parent: #10
اخونا اشرف الشهير بي قرفة بن قرافي مرحب بيك ما غريب الدار ..اهلا بيك سيف قرف بتار
Post: #13 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:39 PM Parent: #12
Post: #14 Title: Re: حجر الدسمس ملتقى قبيلة البورداب الزهجانين والمدبرسين Author: مرتضى احمد عبد القادر Date: 11-09-2010, 08:48 PM Parent: #12
كامل التضامن مع البدري وخضر واميره وكل قبيلة المدبرسين والزهاجانين
مورتا المبتهج
Post: #15 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 08:51 PM Parent: #14
Quote:
مورتا المبتهج
يا غتيت ابيت تكلمنا بي سر التركيبة العجيبة ديك ..هسي الواحد كان شغال بي مزاج ويغني هذه الذبابة
Post: #16 Title: Re: حجر الدسمس ملتقى قبيلة البورداب الزهجانين والمدبرسين Author: حسبو عكاشة Date: 11-09-2010, 08:53 PM Parent: #10
اخيرا بت الشيخ فكت حظرك يا البدري ؟ عقبال مورتا و عمر التوم
Post: #17 Title: Re: حجر الدسمس ملتقى قبيلة البورداب الزهجانين والمدبرسين Author: اساسي Date: 11-09-2010, 09:00 PM Parent: #16
وانا اقرأ هذا البوست من دون مبررات وجدتني اتذكر تلك الاهزوجة الصبيانة الشهيرة والتي تنتهي بالحاوي البرقاوي والاخري التي تنتهي بالديك في الدربكة قتبادر الي ذهني السؤال التاريخي العظيم : الصين فيها حصين؟!
ـ
Post: #19 Title: Re: حجر الدسمس ملتقى قبيلة البورداب الزهجانين والمدبرسين Author: خضر حسين خليل Date: 11-09-2010, 09:03 PM Parent: #17
اليومين دي فيها يا اساسي الصين فيها حصين
Post: #21 Title: Re: حجر الدسمس ملتقى قبيلة البورداب الزهجانين والمدبرسين Author: اساسي Date: 11-09-2010, 09:06 PM Parent: #19
طيب ومصر !!
Post: #20 Title: Re: حجر الدسمس ملتقى قبيلة البورداب الزهجانين والمدبرسين Author: ABUHUSSEIN Date: 11-09-2010, 09:05 PM Parent: #17
السـلام عليكم و رحمة الله و بركاته
Post: #23 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 09:10 PM Parent: #20
وعليكم السلام ورحمة الله يا ابا حسين
. . .
انا لله وانا اليه راجعون
Post: #22 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 09:06 PM Parent: #17
Quote: قتبادر الي ذهني السؤال التاريخي العظيم : الصين فيها حصين؟!
Post: #18 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 09:02 PM Parent: #16
حسبو عكاشة سلامات ايها المتحصل ببصات الوالي ولاعب (snake) الذي لا يشق له غبار ومشتاقين والله
Quote: اخيرا بت الشيخ فكت حظرك يا البدري
بت الشيخ يا حسبو نسأل الله السلامة قالوا بقت شزوفرنك وعندها اكتئاب حاد وكان ما مصدقني هسي امشي شوفها بهناك متشبكة ليها في واحد اسمو المكاشفي كل ذنبه ان ناشد وزير التربية مساعدته في عمل خير ..تصدق زولك ساب ليها المكان واتخارج ولولا الاجاويد بت الشيخ كانت لحقتو امات طه
Post: #24 Title: Re: حجر الدسمس ملتقى قبيلة البورداب الزهجانين والمدبرسين Author: حسبو عكاشة Date: 11-09-2010, 09:12 PM Parent: #18
Quote: تصدق زولك ساب ليها المكان واتخارج ولولا الاجاويد بت الشيخ كانت لحقتو امات طه
والله بت الشيخ امرها عجيب هسه الزول المسكين داك قال يقفلو الاحفاد طفشتو, طيب لو سمعت بهيثمك شاعر المرادمات في غنيتو الحايمة الايام دي تقول شنو ؟ هيثم قال انو بنات الاحفاد بتصنعو في التعامل و الكلام :) فطفق يهجوهم ...
انحنا كاشفين اموركم و مراعــــين شعوركم **** و بابا زعلان يا رندا و قال امشي ايرلندا والابو حالتو تعبانة غالبو سقف البرنده
---- في انتظار بت الشيخ للرد علي هيثم في انتظار المرادمة
Post: #25 Title: Re: حجر الدسمس ملتقى قبيلة البورداب الزهجانين والمدبرسين Author: اشرف السر Date: 11-09-2010, 09:13 PM Parent: #18
لكل الزهاجة والمدبرسين
اهدي موقع بيضيبيديا
وهو اللاموسوعة لكل الزهاجة من حال الوطن العربي والعالم
Post: #27 Title: Re: حجر الدسمس ملتقى قبيلة البورداب الزهجانين والمدبرسين Author: Amira Elsheikh Date: 11-09-2010, 09:22 PM Parent: #25
ياحسبو بت الشيخ ذات نفسها محظورة ...قال فكت حظر البدرى ... يعنى اسى عايز تفتنى مع هيثم ياحسبو؟؟ ياخ بدل توقف هيثم فى محلو زى ما وقفت ليك قبل كدا خضر حسين دا .. تجينى بسماحة الوصف؟؟؟ امشى رد على هيثم وتعال بعدين نتفاهم
Post: #28 Title: Re: حجر الدسمس ملتقى قبيلة البورداب الزهجانين والمدبرسين Author: الصادق يحيى عبدالله Date: 11-09-2010, 09:24 PM Parent: #25
هلا الحبوب كيف زول في بلجيكا و يتذكر حجز الزهج و الدبرسة؟ حجز الدسمس قد تم خنقه بمساطب اسمنتية و لم يعد صالح للجلوس بالطريقة القديمة. تحياتي عبرك للاخ/ عباس
Post: #36 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 09:52 PM Parent: #28
اوووو الصادق يحي سلامات يا رفيق الصبا والله زمن لكن!!!
Quote: حجز الدسمس قد تم خنقه بمساطب اسمنتية و لم يعد صالح للجلوس بالطريقة القديمة.
لا نملك الا ان نقول كما قال المغني ..يا زمان الآهة حدك
Post: #26 Title: Re: حجر الدسمس ملتقى قبيلة البورداب الزهجانين والمدبرسين Author: محمد البشرى الخضر Date: 11-09-2010, 09:18 PM Parent: #18
Quote: طيب ومصر !!
أفتكر فيها عَصِر
هذا والله اعلم
_____________
بدري سلام وكدا
Post: #29 Title: Re: حجر الدسمس ملتقى قبيلة البورداب الزهجانين والمدبرسين Author: خضر حسين خليل Date: 11-09-2010, 09:33 PM Parent: #26
نرجوا صادقين أن يقوم الأخ حسبو بإرفاق القصيدة بتاعت (ايرلندا ورندا والبرندا) صوتياً حتي يتثني لأميرة والبدري ورفاق المهجر متابعة الحراك الثقافي الدائر بالخور (ياحسبو)
ـــــــــــــ الخور: ماعندو اي علاقة بي خور بكري لكنه خور(ن) عميق
Post: #32 Title: Re: حجر الدسمس ملتقى قبيلة البورداب الزهجانين والمدبرسين Author: حسبو عكاشة Date: 11-09-2010, 09:42 PM Parent: #29
Quote: امشى رد على هيثم وتعال بعدين نتفاهم
لا نجوت إن نجا يا بت الشيخ :)
Quote: نرجوا صادقين أن يقوم الأخ حسبو بإرفاق القصيدة بتاعت (ايرلندا ورندا والبرندا) صوتياً حتي يتثني لأميرة والبدري ورفاق المهجر متابعة الحراك الثقافي الدائر بالخور (ياحسبو)
يا خضر... هيثم انتهي نهاية جد من ناس رندا, الصباح بمشي اشيل منو النص كامل و اجي ارشو ليكم و بعد داك نشوف خارطة الطريق خبره شنو
Post: #30 Title: Re: حجر الدسمس ملتقى قبيلة البورداب الزهجانين والمدبرسين Author: عبدالكريم الامين احمد Date: 11-09-2010, 09:33 PM Parent: #26
يا البدري حجر الدسمس ده بدون تمباك قعادو حيكون مشكلة فياريت تعمل لينا الية بتاعة تمباك اسفيري حتي يحلو القرفصاء
Post: #38 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 10:00 PM Parent: #30
سلامات يا كيكي ابو البنية
Quote: يا البدري حجر الدسمس ده بدون تمباك قعادو حيكون مشكلة فياريت تعمل لينا الية بتاعة تمباك اسفيري حتي يحلو القرفصاء
تعرف يا كيكي اخوك انتبه لي نقطة جوهرية للغاية وتصدق انا كنت بصدد كتابة بحث عن الية ارتباط التمباك بالدبرسة ..يسألني الله كان زمان صاحبك القرود ساكن معانا في كردفان اياماتو الاكسترنال ومعاهو مجموعة من المثقفاتية.. ياخ الزمن داك ناس وطنية بحري كان بقفلوا من الساعة تلاتة ظهرا بسبب نفاذ الكميات المعروضة لديهم من ود عماري الجيد ..ومنذ ذاك الحين وانا بصدد كتابه البحث المشار اليه بعاليه
Post: #31 Title: Re: حجر الدسمس ملتقى قبيلة البورداب الزهجانين والمدبرسين Author: البحيراوي Date: 11-09-2010, 09:36 PM Parent: #26
الأعزاء البدري والصديق الصادق يحي
تحياتي ايها الدبايب والقشوش . بالله هو حجر الدسمس خلوه لينا الجماعة من تفكر تشرك ليك لي برلومة بالجلوس مستاءاً في الحجر ينط ليك واحد من القوي السياسية قال عايز يعمل ركن نقاش . وطوالي تضاير علي ضهر التور ونسبة لطول المساحة فإن شركك با محالة غير قابض يا البدري .
* بالمناسبة وصل يا الصادق يحي بطرفنا علي إسماعيل نقارة واش لأدء فريضة الحج وقال لي بأن تلك الحجة من حر مالة وسألته من الماسورة فضل وقال لي دا بقي وزير عديييييييل
بحيراوي
Post: #40 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 10:07 PM Parent: #31
يا سلام يا سلام ياخ البحيراوي ذات نفسه وكمان الصادق يحي ..ياخ الموضوع بقى ناقص ابو شكيمة وحبذا لو جاء عبد الصمد وبقية الدبايب يكون عيدنا قبل الناس ..
Quote: تحياتي ايها الدبايب والقشوش . بالله هو حجر الدسمس خلوه لينا الجماعة من تفكر تشرك ليك لي برلومة بالجلوس مستاءاً في الحجر ينط ليك واحد من القوي السياسية
ياخ من اشهر اركان المدبرسين بذلكم الحجر ..المخاطبة التي دعا لها حبيبنا جمال البروف وهو في قمة دبرسته بعد ان رفضت المرحومة د.زكية عوض ساتي عميدة الكلية طلبه بتأجيل احد امتحاناته وهو ذات زنقة بت ستين ###### ..وجاء خارجا من مكتب العميد وخاطب جماهير الطلاب من فوق حجر الدسمس بخطبته الشهيرة والتي ابتدرها ب( ايها الناس لا خير في قوم ولوا امرهم امرأة )
Post: #33 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 09:42 PM Parent: #26
ود البشرى السلام عليكم ورحمة الله
Quote: أفتكر فيها عَصِر
هذا والله اعلم
يا معلم
وفوق كل ذو علم عليم ..
Post: #34 Title: Re: حجر الدسمس ملتقى قبيلة البورداب الزهجانين والمدبرسين Author: esam gabralla Date: 11-09-2010, 09:50 PM Parent: #33
اثبتت البحوث و الدراسات الحديثة ان الزهج و الدبرسه و القرف من أمراض التخمة الحياتية و البحبوحة. انتهى الخبر. شفت ليك زول مفلس و مقطع و تعبان بيقول انو زهجان أو قرفان أو مدبرس؟ اولاد و بنات جامعة الخرطوم حينها كانو ارستقراطيه عديييل كده مقارنة بالليلة عشان كده كانو قادرين يدبرسو. لكن الدسمسه حاره ياخى , بتستحق يقرفو ليها و يعملو ليها حجر كمان. بالمناسبة زولكم المشوطن و كتاب قصة قصيرة الاسمو الخزين وين بلدو؟ موهوب ..... و مشتاقين ياخى
Post: #42 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 10:14 PM Parent: #34
عزيزنا ورفيقنا في البلاد الباردة ود جبر الله سلامات يا زول يا جميل
Quote: اثبتت البحوث و الدراسات الحديثة ان الزهج و الدبرسه و القرف من أمراض التخمة الحياتية و البحبوحة. انتهى الخبر. شفت ليك زول مفلس و مقطع و تعبان بيقول انو زهجان أو قرفان أو مدبرس؟ اولاد و بنات جامعة الخرطوم حينها كانو ارستقراطيه عديييل كده مقارنة بالليلة عشان كده كانو قادرين يدبرسو. لكن الدسمسه حاره ياخى , بتستحق يقرفو ليها و يعملو ليها حجر كمان. و مشتاقين ياخى
اولا ..لا والف لا لتسييس قضايا الزهج والدبرسة والزج بها في معتركات ساس يسوس .. ثانيا ياخ ما تخلي عندك زوق واخسر ليك حق تذكرة وسيب الجلدنة و تجي تعيد معانا ياخ ..
Quote: بالمناسبة زولكم المشوطن و كتاب قصة قصيرة الاسمو الخزين وين بلدو؟
ياخ الخزين قابع بوادي غير ذي ثمر ..المدعو يعمل حاليا بجامعة النيلين في معية استاذنا خضر عبد الكريم
Post: #35 Title: Re: حجر الدسمس ملتقى قبيلة البورداب الزهجانين والمدبرسين Author: حواء سليمان ابراهيم Date: 11-09-2010, 09:51 PM Parent: #33
السلام على من اتبع الهدى
بوست موفق باذن الله
Post: #43 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 10:19 PM Parent: #35
حواء يا بنت سليمان وعليك السلام ورحمة ومرحبا بك وباسهامات الجندريات الفاعلة ..اقلو تحلينا من فرمالة بت الشيخ
الرجاء من محترفي لعبة الوست شرح مصطلح فرمالة للاخت حواء حيث انني زهجان وما عندي اخلاق للشرح والذي منو
Post: #37 Title: Re: حجر الدسمس ملتقى قبيلة البورداب الزهجانين والمدبرسين Author: خضر حسين خليل Date: 11-09-2010, 09:55 PM Parent: #33
. . . كان زهجتكم ما فكت...أبقوا أدونا طلة... . . . . مودتي... ودحطب الله
Post: #44 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-09-2010, 10:20 PM Parent: #41
ود حطب الله سلامات يا امير وحمدا لله على السلامة ياخ
Post: #45 Title: Re: حجر الدسمس ملتقى قبيلة البورداب الزهجانين والمدبرسين Author: أسامة الفضل Date: 11-09-2010, 10:22 PM Parent: #41
Quote: أفتكر فيها عَصِر
ماذا يحدث لود البشرى ؟
البدرى
السلام عليكم
شفت بوست تاني قريب من ده مما دعاني للضحك ملء شدقي .
ممكن أهدي : أهدى لحن الحلقة و الحلقات الجاية للعريس الذي اتصلت عليه و لم برد فتركت له رسالة صوتية و لم يرد . بس .
Post: #58 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-10-2010, 11:46 PM Parent: #45
اخونا ود الفضل المدعو اسامة سلامات بلا حدود
Quote: ممكن أهدي : أهدى لحن الحلقة و الحلقات الجاية للعريس الذي اتصلت عليه و لم برد فتركت له رسالة صوتية و لم يرد . بس .
يا اسامة ياخ في زول يتصل علي عريس ويستغرب انه ما رد ليهو !!! اكيد المدام تكون بتتونس مع اهلها او صاحباتها بتلفون العريس ..وبالتالي ..السيد العريس ما رد على رسالتك الصوتية لانو السيدة حرمه اطال الله عمرها كمّلت الرصيد ..وبالتالي اخانا العريس ما قدر يرجع ليك لانو تلفونو بقى مستقبل وبس ..وحتى هذه الى حين ..
Post: #46 Title: Re: حجر الدسمس ملتقى قبيلة البورداب الزهجانين والمدبرسين Author: البحيراوي Date: 11-09-2010, 10:28 PM Parent: #41
الدبيب البدري
تحياتي - يا أخي عصام دا قاصد يسالك من سالي قام جاب طاري الخزين وإلا لماذا لا يسأل من نادوس والشجاع جمال السمين . يا هشام أبو شكيمة الآن يغض في نوم عميق . بس لو جبت طاري الكيس والله ينط ليك حتى لو ما عندو باصويرد أما عبد الصمد بالله الشنيدي كايس لية ما لامي فيه وأحمد لندن يتحاوم في بلاد الحرمين من جامعة لي جامعة بس أعلن عن عرس لزميل بالله تلقاه جنبك علي طول . بس عباس محمد بخيت قول ليه أظهر وعليك الأمان
بحيراوي
Post: #47 Title: Re: حجر الدسمس ملتقى قبيلة البورداب الزهجانين والمدبرسين Author: محمد عبدالرحمن محمد Date: 11-09-2010, 11:14 PM Parent: #46
البدري، شاحد الله يفرحك ويبهجك بي قدر ما [جَمَّانا] بوستك دا!
Post: #48 Title: Re: حجر الدسمس ملتقى قبيلة البورداب الزهجانين والمدبرسين Author: ندى عثمان حسن Date: 11-10-2010, 05:20 AM Parent: #47
دة بوست اليوم والايام التالية , لحدووت العيد
عادة الزول الزهجان مابسلم , ولو سلمو عليو برد بـ صرة وش
تتطايبو وتتسالمو وتقولو زهجانين؟
إيه دة؟!
Post: #49 Title: Re: حجر الدسمس ملتقى قبيلة البورداب الزهجانين والمدبرسين Author: ندى عثمان حسن Date: 11-10-2010, 05:25 AM Parent: #48
صحيت الصباح , وانا مبسوطة انو انا داكة الدوام الليلة , بمزاج جبت حبيبة قلبى كباية الشاى ومعاها شابورة الرشاقة –فى رحلة رشاقة أن شاءالله ح تنتهى فى القبر ولاعزاء لأى أى زول أوفر ويت- خلال الحدث البهيج بتاع شراب الشاى دة , رصيت لى زى تلتمية مهمة منها ترتيب دولابى الـ كل ماافتح ابوابو تقع هدومى فى الارض وتتوسل , أشيل الريموت دة مرة فى حياتى براااى " بابا مابديك أىىىىىىىىىى فرصة معاهو لما يرجع وعليك التأقلم مع الشروق-الجزيرة-السودان وبالعكس ولو غيّر بجيب ليك الجزيرة الرياضية , فى غياب بابا , نشاهد براعم ونرقص مع زيد والعلوم زى العجب , وتتبسم مع أحمد وهيا ولا على مزاجك إذا ربنا رحمك, من بابا والشباب ديل , تجيك ماما تفتح ليك ساهور ولو بااااالغت النيل الأزرق, قلت بس خلاص الليلة يوم ندى "على وزن الليلة يوم الرجال" وبعد ماانتهى من الإستمتاع بالريموت , أقوم اعمل لى برنامج تجميلى , لكن تأتى الرياح بسفن الخُدرة على صمة خشمك سمعت صوت أمى وهى بتنادى : ياندى لو مشيتى جبتى لينا "خُدرة" فركناها والله يكون كويس , طوالى حسيت أنو أحلامى الفوق دى ح تنهار على الرغم من بساطتها فكرت بسرعة فى حلول, أتذكرت أنو الأخت الكبرى برة بيتها , أتصلت عليا بسرعة وبكل لطف الدنيا على غير العادة " بالله يارشا مرى جيبى لينا معاك خُدرة " طوالى ردت : أيوا والله أحمد ذاتو قال عايز "خُدرة" وأحمد دة ياكرام يبلغ من العمر 4 سنوات وشوية مولود فى البلد دى , شاف السودان وهو عمرو سنتين , لكن يعشق اللغاويس بكل اشكالها (خُدرة مفروكة, بامية مفروكة, ملاح تقلية وقراصة" ومُصر أنو يشيل معاهو ملاح تقلية وقراصة المدرسة , فتأملوا (بتاعت ملاسى ديك) بعد زمن سمعت تلفونى يرن , لقيت الأخت الكبرى على الطرف التانى :ة ياندى مافى خُدرة فى كارفور ودة ماموسمها "طبعا دى حسب إفادات المغربى مسئول الخُضار فى كارفور – طبعاً رشا وقفت حوالى العشرة دقايق عشان تفهم بقول ليا فى شنو و فى نهاية الأمر وصلت لأنو مافى ودة ماموسمها " دة طبعا بعد تخريجات من رشا لكلام المغربى. أمشى اى مكان تانى ! أمشى وين ياجماعة وكارفور دة لبن الطير فيو- بدأت إقتراحات ماما, أمشى المدينة , لو مالقيتى أمشى جاينت , ولا أقول ليك أمشى التخفيضات راسك عديييييل , أجيب الراس العديل من وين بس؟! أتوكلت وبديت رحلة البحث عن العزيزة , دخلت حوالى 4 سوبرماركتات "والله ماعرفت أجمعا ليكم كيف" وكنت أرجع خاسئة حسيرة , كل الموظفين والكاشيرات يردوا على بالنفى , والظريف فيهم يقول لى دة ما موسم "ملووكية" لكن ياشباب البقنع الأم منو؟! ونحن جايين من بلد "الملوكية" دى ممكن اى زول يزرعا فى بيتو, ممكن تجيبا من أى جزُر فى طرف الحِلة . دخلت سوبر ماركت , مشيت جهة الخُضار , شفتا ليك ربطة خُدرة وحيييدة , والله فرحت فرح كأنى شفت الملاك, أشتريتها وجرى على الكاشير كأنو ح يجى زول يقلعا منى , لما دخلت البيت , وبفرح مديتا لأمى , قالت لى : هيا ياندى لكن دى صحن مابتسوويهو؟! أها ياأخوانا؟ الحل؟ قالت لى : من الأول قلت ليك أمشى التخفيضات, آآآخ , فكرت فى زحمة الشارع لكن مابيدى شىء, صليت العصر ومرقت , حاولت فى الطريق أطلع من موود "الخُدرة" دة شغلت مايكل بلوتون وسمعت miss you now –ضحت براااى وقلت مايكل دة برضو بتكون امو رسلتو ومالقى المرسال – دخلت التخفيضات , مكان الخُدرة خاااااااااالى, جمبها خُضار يشبهها شديد, ناديت الهندى : رفيق هادا ملوكية؟ لالا ماما هادا بربكان, ملوكية مافى؟ فى فى ماما, وقال لى تعالى معاى, ساقنى ليك مستودع الخضار , مجموعة من الهنود يقطعو ويرصو ويعبو , من تحت تربيزة كبيييرة مرق شوال , طلع لى منو ربطة كبيرة خُدرة , جرى على الكاشير عشان أصل البيت بسرعة , وانا جمب الكاشير لاقتنى زولة صاحبتنا ممكن عادى نسميها أم الكلام, سالتنى وحكيت ليا انا جيت لى شنو, وبرضو لاهماها شىء حكت لى عن كل شىء الجو, الأسعار, السودان, الدوامات وانا أتململ وأعاين لربطة الخدرة , فكتنى بعد ما قرربت أبكى . وصلت البيت قريب العشا, وفرحانة أنى ح اضرب خُدرة بكسرة زى العجب, ماما أحبطتنى أيما إحباط , حسة مافى سكة فرك ياندى الدنيا ليلت , بكرة أن شاءالله.
---------------- كُتبت حين زهجة ,
Post: #50 Title: Re: حجر الدسمس ملتقى قبيلة البورداب الزهجانين والمدبرسين Author: عبدالكريم الامين احمد Date: 11-10-2010, 06:11 AM Parent: #49
Quote: ساكن معانا في كردفان اياماتو الاكسترنال ومعاهو مجموعة من المثقفاتية..
هلا يا البدري ولوووول ياخي اها المثقافيتة المعا ابو القوق ديل انا كنت واحد منهم ويا حليلي ياخي لمن كنت مثقفاتي زمان قبل ما اتحول الي مثقفاتي كراكير نوعي... وياخ البوست ده شكلو غاب وجاب وشايف سيرة ابو شكيمة وياريت ايضا تبرونا بسيرة سر الختم ويا سسسسلام ياخي علي سر الختم ارقص طالب مر علي كلية غردون التذكرياية ويكاد ان يتفوق علي (سيف بتاع العلوم)
وسنتابع بكل دبرسة وتمباك عالي التمطير
Post: #51 Title: Re: حجر الدسمس ملتقى قبيلة البورداب الزهجانين والمدبرسين Author: علاء الدين صالح Date: 11-10-2010, 06:30 AM Parent: #49
البدري تحيَّاتي لكَ مُزجاة بكُل قرَف الدُنيا أحجِز لَيْ عِندَكُم بكان بى جريدة، بس أخلَص من بوستيني أبو سبعة أرواح داك وبجيك ناطّي ما بحتاج تزكية.. فأنا القائِل: فعلام تمسحُ قرفتي وعلام تُفسِدُ زهجتي وأنا أُفتِّشُ عن مكانٍ كَيْ أُخبِّيءَ فيه بعض الدبرسات
Quote: منها ترتيب دولابى الـ كل ماافتح ابوابو تقع هدومى فى الارض وتتوسل
أعرِف هذه النوعية من الدواليب جيِّداً.. فالداخل إليه مفقود والخارِج منه مولود
Quote: كُتبت حين زهجة
ندى ليست مُجرَّد كاتِبة.. ياخ إنتي فنّانة من الطُراز الرائع.. فلكِ التحية ياخ
Post: #52 Title: Re: حجر الدسمس ملتقى قبيلة البورداب الزهجانين والمدبرسين Author: عوض عبدالله طه Date: 11-10-2010, 06:47 AM Parent: #51
..
تعديل انصرافي لعنوان البوست
حجر الدسمس ، ملتقى البورداب ، الزهجان والمدبرس
.... انتو البورد ده ... مالو ما عندو اجازة
والله زهجنا من الجري ورا البوستات
....
Post: #74 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 12-04-2010, 11:43 AM Parent: #52
عوض عبد الله طه السلام عليكم ورحمة الله
Quote: انتو البورد ده ... مالو ما عندو اجازة
والله زهجنا من الجري ورا البوستات
والله يا عوض يا اخوي . .. واحدة من اسباب الزهج والقرف ..كمية البوستات وتكاثرها اللا نهائي بصورة خلت الواحد زي المجنون ..ينط من حتة لي حتة وما عارف يرسى في ياتو محل ..!! انا لله وان اليه راجعون ياخ ..
Post: #53 Title: Re: حجر الدسمس ملتقى قبيلة البورداب الزهجانين والمدبرسين Author: Amany Elamin Date: 11-10-2010, 08:01 AM Parent: #49
أولاً: السلام عليكم ورحمة الله وبركاته,,
ثانياً: كُـــــــر .. وقبُلكـــــــــــــم و قُبَالكـــــــــــــم
ثالثاً: نهنئ أنفسنا بعودة الحبيبه أميره الشيخ, حمد الله علي السلامه, واتوَحشناك بالزّاف ياصديقه ..
رابعا: أصالةً عن نفسي و نيابةًََََ عن حزب البهجه برعاية مورتا المبتهج .. نهديكم الأغنيه:
Post: #54 Title: Re: حجر الدسمس ملتقى قبيلة البورداب الزهجانين والمدبرسين Author: Amira Elsheikh Date: 11-10-2010, 08:38 PM Parent: #53
تسلمى يا امانى يازعيمة الجندريات الجدد .. والله انا زاتى توحشتكم خالس خالس والغريبة مرقتنى من البورد وجعة وجابتنى وجعة ..
بس الله فى
Post: #55 Title: Re: حجر الدسمس ملتقى قبيلة البورداب الزهجانين والمدبرسين Author: أمين محمد سليمان Date: 11-10-2010, 09:26 PM Parent: #54
السلام عليكم ورحمة الله وبركاته
---------
Post: #57 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-10-2010, 11:40 PM Parent: #48
ندى بت عثمان سلامات وحباب الجندريات وعلى وجه الخصوص من كن مدبرسات او ما شابه
Quote: تتطايبو وتتسالمو وتقولو زهجانين؟
ده اسمو الزهج الحضاري اخيتنا ندى
Post: #56 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-10-2010, 11:36 PM Parent: #47
محمد عبد الرحمن السلام عليكم ورحمة الله
Quote: شاحد الله يفرحك ويبهجك بي قدر ما [جَمَّانا] بوستك دا!
الله يجمك دنيا واخرة يا محمد ..وينجيك من شر الزهج والدبرسة وما يليهما من اعراض
Post: #59 Title: Re: حجر الدسمس ملتقى قبيلة البورداب الزهجانين والمدبرسين Author: الصادق يحيى عبدالله Date: 11-11-2010, 01:05 AM Parent: #56
Quote: الأعزاء البدري والصديق الصادق يحي
تحياتي ايها الدبايب والقشوش . بالله هو حجر الدسمس خلوه لينا الجماعة من تفكر تشرك ليك لي برلومة بالجلوس مستاءاً في الحجر ينط ليك واحد من القوي السياسية قال عايز يعمل ركن نقاش . وطوالي تضاير علي ضهر التور ونسبة لطول المساحة فإن شركك با محالة غير قابض يا البدري .
* بالمناسبة وصل يا الصادق يحي بطرفنا علي إسماعيل نقارة واش لأدء فريضة الحج وقال لي بأن تلك الحجة من حر مالة وسألته من الماسورة فضل وقال لي دا بقي وزير عديييييييل
بحيراوي
الاعزاء/ الحبوب و البحيراوي شكرا على التعليق و المعلومة، فعلا مرة شفت فضل في اجتماع مجلس الزراء في الصف الوراني، و اكيد قرب من الصف الاول. مرحبا بالاخ/ نقارة و نسال الله القبول. بمناسة الحديث عن الاداب، افيدكم علما بان عددا كبيرا من شباب الاداب (20 او اكتر) بقيادة الاخ/ قرينات قد غزوا الجامعات السعودية موزعين بين تبوك و حفر الباطن و الدمام و الجبيل.الاخ البحيراوي ارجو ارسال رقم الاخ نقارة في اس ام اس او في الخاص.
Post: #60 Title: Re: حجر الدسمس ملتقى قبيلة البورداب الزهجانين والمدبرسين Author: اشرف السر Date: 11-11-2010, 01:59 AM Parent: #56
من شدة ما زهجان.. غالبني اكتب اي حاجة حد يجدع الكيس كيكي: تمطيرك دا ما انتهى؟
Post: #61 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-23-2010, 09:18 AM Parent: #60
اشرف السر السلام عليكم ورحمة الله
Quote: من شدة ما زهجان.. غالبني اكتب اي حاجة
شرحو!!
Post: #62 Title: Re: حجر الدسمس ملتقى قبيلة البورداب الزهجانين والمدبرسين Author: مرتضى احمد عبد القادر Date: 11-23-2010, 09:41 AM Parent: #61
البدري كل سنة وانت طيب والقابلة على امانيك وإنشاء الله تكون مبسووووووووط وتفارق حجر الدسمس
Post: #63 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-23-2010, 09:57 AM Parent: #62
مورتا يا غتيت السلام عليكم ورحمة الله
Quote: البدري كل سنة وانت طيب والقابلة على امانيك وإنشاء الله تكون مبسووووووووط وتفارق حجر الدسمس
وانت طيب ياخ ....والله يا مورتا دي زهجة اخير منها زهجة اخوانا المريخاب السنة دي ..ياخ استعنا بمحترفين ما نفع ..غيرنا المدرب برضو ما نفع ..والله ما فضل لينا الا نغير الحكومة
Post: #64 Title: Re: حجر الدسمس ملتقى قبيلة البورداب الزهجانين والمدبرسين Author: مرتضى احمد عبد القادر Date: 11-23-2010, 11:27 AM Parent: #63
Quote: وانت طيب ياخ ....والله يا مورتا دي زهجة اخير منها زهجة اخوانا المريخاب السنة دي ..ياخ استعنا بمحترفين ما نفع ..غيرنا المدرب برضو ما نفع ..والله ما فضل لينا الا نغير الحكومة
صورة ل: أم عبد الله
شيل شيلتك .. التعديل ساي كدا
Post: #65 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-23-2010, 01:47 PM Parent: #64
Quote: صورة ل: أم عبد الله
مورتا يا خبيث اياك والصيد في الماء العكر ياخ انا قاصد الحكومة حقتنا كلنا ..انت وانا وحسبو وقيقا وبت الشيخ ونوتة وهباني ومصطفى محمود وابصلعة وتراجي واساسي وتمبس وزميلته في البورد والناشط خضر وعلاء نحل وود البشرى وووووووو...الخ .. . . . . . . .عالم تخاف ما تختشيش على راي اخوانا البلح
ياخ انا قلت زهجانين ما قلت زعلانين ..فرق كبير يارياض ياخ ...ياخ بطلوا حركات التحريش وتأليب الراي العام من امثال ناس رفعت والله جابو على شخصنا الضعيف ...ولا حول ولا قوة الا بالله ...
Post: #69 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-23-2010, 11:04 PM Parent: #68
Quote: ....والله يا مورتا دي زهجة اخير منها زهجة اخوانا المريخاب السنة دي
حتى زهجة المريخاب فكّت ...فتأمل
Post: #70 Title: Re: حجر الدسمس ملتقى قبيلة البورداب الزهجانين والمدبرسين Author: Kabar Date: 11-24-2010, 04:37 AM Parent: #69
البدري..و تميييع الصــــــــــرأأأأأأأأأأأأع..
على بالحلال ركنو ده كن غنى فيهو عثمان ( اماني ام شعر..)..ما جايب حقو..!!!
كتيبة دبيب ، عنهم: طارق سيد احمد.. احمد لندن.. خالد عبد الله ( الأصلي.. مش بتاع التزوير).. ابوبكر كبر (ياخي اربعة عيال..صاحبك قرب يشوطن عدييل..بستفة صاح )..!!
و تحياتنا توصل الى: نادوس.. احمد عبد الهادي ( بتاع القضارف).. السر الخزين و هناية.. و هناية.. و تاني هناية..
و الله يقطع طاري السواهو ادب خانة..!!!
البدري ازيك ياخي..!!
كبر
Post: #71 Title: Re: حجر الدسمس ملتقى قبيلة البورداب الزهجانين والمدبرسين Author: عبدالكريم الامين احمد Date: 11-24-2010, 07:03 AM Parent: #70
Quote: على بالحلال ركنو ده كن غنى فيهو عثمان ( اماني ام شعر..)..ما جايب حقو..!!!
لووووووووووووول I like علي طريقة الفيس بووك الشهيرة تتناوشني لواعج الذكري الحنينة يا كبر بان اشيد بوست كراكوبة وفاء لعثمان ده وعمر اومو وميرغني وبابكر ورجلا عالي الصمت والهدوء كان ياتي من نواحي بحري ويجول طرقات الجامعة وهو حاملا كباية شاي ونزجي التحيات والاشواق الكثيفة لهناية وهناية وهناية الاخري ايضا
وسنتابع
Post: #73 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-29-2010, 09:37 AM Parent: #71
هلا يا كيكي وتحياتنا النواضر
Quote: تتناوشني لواعج الذكري الحنينة يا كبر بان اشيد بوست كراكوبة وفاء لعثمان ده وعمر اومو وميرغني وبابكرورجلا عالي الصمت والهدوء كان ياتي من نواحي بحري ويجول طرقات الجامعة وهو حاملا كباية شاي
تعرف يا كيكي الشباب ديل كانوا من اركان ورموز تلك البقعة الحبيبة .. لا ادري اين هم الآن ..وماذا فعل بهم الزمان .. وياخي بالجد محتاجين لي زول يكتب عنهم ويفكك الظروف المتعلقة بي وجودهم وحضورهم الطاغي في جخانين ومدارات ام نخيل ..
Post: #72 Title: Re: حجر الدسمس ملتقى قبيلة البورداب الزهجانين والمدبرسين Author: البدري عبد الله Date: 11-24-2010, 02:44 PM Parent: #70
Quote: البدري ازيك ياخي..!!
يا سلام يا سلام ..كبر ذات نفسه !! ياخ والله زمن ..
