سمــــــــــــــــــــــــــــــــــــــــــــــــــــــــــح ؟! .. توجد ( حمى و.. وجع روح ) !!

رسالة أولى للوطن :

طارت عصافير الحُزن

ركّت على الوطن الجريح

بلد العذاب متى يستريح ؟!

مفصول ألم شقاهو ريح !

مات الوطن ؟!

ابنوا الضريح !!




ياسودان

يا وجع هسة

وأوجاع زمان

خليك عارف ياعذاب مليان حنان


أنا بحبك ... سمح ؟!!

رسالة لـ ( ميري وميانق)


نفس الحي الفيهو ربينا

لا بننساهو ولا بخلينا !!

بينا محبّة وعُشرة حنينة

وبينا الوجع الساكن فينا !

نشق التورتة بحد سكينة

خسارة بلدنا بنلعن .... !!





أوعي تنسي ياميري زي ما إتفقنا سمح ؟؟

رسالة إلى وزير ( الغلاء) في البلاد



العيش والطماطم واللحوم والزيت

بزيانوس حياتنا وعلبة الكبريت

ياحكومة الايجار الشهري حق البيت

بالغتي وخلاص (شعبك) حلف جنيت !!




يا حكومة الله بسألك مننا يوم القيامة .. سمح ؟!!

رسالة إلى كل نساء وطني الشامخات :



بتعجبني البسالة وفيكِ ماها غريبة

يابت الكرام المابتعرفي العيبة

يافخر النساء في الكون شبابها وشيبة !

أمات الرجال كاسيات شجاعة وهيبة !!




يُمّة السودانية أنا بريدك .. سمح؟!

رسالة إلى رئيس ( النفايات) في البلاد :


ياحليل( الكُوش) الكان زمان في الحِلة !!

ندفّق في الزبالة ومابنشيل هم عِلّة !!

لا فواتير عذاب لا نشوف حلول لي بلّة !!

زمن العيش رخيص وحليبنا بالبستلّة !!


و

والقروش البتشيلوها ياناس النفايات من زول مابطلع نفايات حرااااام سمح ؟