سندوتشاتكـ ومطوتكـ في جيبكـ (^

Post: #1
Title: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 08:25 AM

أولن شكرا لأي زول بدون فرز .. ناس الخرطوم وحشتوني وناس الرياض نورتوني .. شكرا جزيلا اخجلتم تواضعنا (^_^)

والبورض رغم كل شيء ... وحشني بررضو (^_^)

Post: #2
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 08:35 AM
Parent: #1

ونجيضه البوست , اكتر حاجه بيحبها زميل البورض,
وبيكون ممتن طول اليوم للحاجه دي .. وسعيد جدا وهو شايلها في (الكيس الاصفر) ومارق من البيت !
اعتقد انو بيكاوي الناس في الشارع عدييل وهو ماشي )^_^(

سندوتشات الصباح (^_^) .. فتأمل !!

Post: #3
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 08:46 AM
Parent: #2

قومه الصباح بدري .. ومعاها حدره كويسه كدا ,
في استفهام قوي عما سيكون محتوى السندوتشات ,
وما انسى اخت التفاحه ولا اي فاكهه في الكيس الاصفر ..

ولو ما سمع صوت خشخشه الكيس في المطبخ ,
عادي جدا يستفهم : سندوتشاتكـ في كيسكـ .. مطوتكـ في جيبكـ (^_^)

Post: #4
Title: Re: سندوتشاتكـ ومطوتكـ في جيبكـ (^_^)
Author: نجلاء سيد أحمد
Date: 12-22-2010, 08:46 AM
Parent: #2

Quote: والبورض رغم كل شيء ... وحشني بررضو (^_^)

دى قوية

عود حميد دلوش وانت وحشتينا كمان

Post: #5
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 08:57 AM
Parent: #4

Quote: عود حميد دلوش وانت وحشتينا كمان
العجـب رجـب (^_^) تحياتي لبخاري والاولاد (^_^) خاصه صحبتي الرقااااصه ياخ (^_^)

بالله يا اخوانا ساعدونا بالاقتراحات ,
مافي زول يجي خاشي البوست يدو فاضيه ,
يعني وصفه سندوتش اختراعيه كدا لانقاذ حيره اختكم في الله دلووش ,
لانو الفي راسي كملت ,, وزميل بورضيكم دا ما بيرضى ياكل نفس الندوتش يومين متتاليين ,
فااا شنو .. ساعدونا بالرسبيس , علما بان البلد دي اكتر من الاكل والشراب مافيها .. يعني الماتريلس متووفره (^_^)

ولا زراكم الله في سندوتش لديكم .. (^_^)

مرفق : مطوه سبعه ملم

Post: #10
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 09:09 AM
Parent: #5

أخر تقليعات زميل البورض ذات صبـاح شتائي (^_^)

اعملي لي سندوتش مارتيديلا وديك رومي وختي فيهو جبنه وزيتون وخس ومكدوس وكبي لي شطه هريسه فيهو !!
فتأمل عزيز حيدر الزين القارىء في السندوتش اعلاه !
دا اجيب ليهو عيشه من ووين ؟؟
والفو بي ياتوو طريقه ؟؟
مافي زول يقول لي ما اتعشى ! اتعشى ونص وخمسه يحمد الله سيدوو .. وغالبا بيكون العشا من الساعه 2 نص الليل وانت طالع !
طبعا عملتا (التجاهل .. التجاهل) لي كلامو .. وعملتاسندووتشات مارتديلا بس اكييد ما بالطريقه دي (^_^)

انا بس محتاااره .. كان حايكلو كيـف ..؟؟

Post: #6
Title: Re: سندوتشاتكـ ومطوتكـ في جيبكـ (^_^)
Author: صلاح أبودية
Date: 12-22-2010, 08:57 AM
Parent: #4

داليا
كل سنة وإنت طيبة
والتحيات الطيبات لزميل البورد !
Quote: وسعيد جدا وهو شايلها في (الكيس الاصفر) ومارق من البيت !

أبقى عشرة على الكيس وياريت تغيرى لونو من الأصفر للأزرق
صاحبى ده ما خالى بالو للون !!
والكلام كلو على اللون !
تحياتى لكما وتمنياتى لكما بحياة سعيدة
وطولو بالكم !

Post: #7
Title: Re: سندوتشاتكـ ومطوتكـ في جيبكـ (^_^)
Author: omer osman
Date: 12-22-2010, 09:04 AM
Parent: #6

Quote: سندوتشاتكـ في كيسكـ .. مطوتكـ في جيبكـ (^_^)

طالما القصة فيها مطوة .........

مفروض بدل الكيس تختي ليهو السندوتشات في شنطة جراية ومعاها زمزمية ولبس خمسة بتاع القوات الخاصة

سيادتو صلاح ابودية ممكن يرسل ليك المهمات دي ......

Post: #12
Title: Re: سندوتشاتكـ ومطوتكـ في جيبكـ (^_^)
Author: osman abdala
Date: 12-22-2010, 09:14 AM
Parent: #7

Quote: وما انسى اخت التفاحه ولا اي فاكهه في الكيس الاصفر

سلام يا دكتورة وربنا يهنيكم

و ماشة معاك بسبوسة يا تمبس اهو فواكه Hassan موجوده في البيت

Post: #40
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:08 PM
Parent: #12

Quote: و ماشة معاك بسبوسة يا تمبس اهو فواكه Hassan موجوده في البيت

كووول الفواكـه يا اسـامه .. بي سلطاتها وبابا غنوجهـا (^_^)

شكرا لتمنياتكـ الجميله (^_^)

Post: #15
Title: Re: سندوتشاتكـ ومطوتكـ في جيبكـ (^_^)
Author: بله محمد الفاضل
Date: 12-22-2010, 09:24 AM
Parent: #7

هي بتين
كدي أديها سنتين تلاتة
بعدين أنشوفك بتسِل مطوتك
بطل جلكسات يا اخي

خُتي ليهو قُنبلة في الكيس
لو كتر النقة

أقعد عاقل

الوصفات والذي منو
إلا نحولك على أم العيال
عشان الأمور تظبط معاك عشرة على عشرة
ويمشي صاحبنا مدلدل يدينو
زينا كدا

ولا نقوم نساعدك نلقط ليهو صور سندوتشات هنا

جوعتونا يا اخي

Post: #41
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:11 PM
Parent: #15

Quote: خُتي ليهو قُنبلة في الكيس
والله فكـرره ..!!
تصدق ما فكـرتا في الحاجه دي نوهائـي !
خساره بكره الويك اند .. كدي النحاوول من يوم السبت .. نشووف بيحصل شنـوو ..

بس انت حدد لي نوع القنبـله .. عشان الواحد ما يجيب حاجه ساي ..

يا زميل البورض انا طبعا بسمع نصايح اصدغائـكـ .. مووش ديل اصدغائـكـ بررضـوو ؟؟ (^_^)

Post: #71
Title: Re: سندوتشاتكـ ومطوتكـ في جيبكـ (^_^)
Author: بله محمد الفاضل
Date: 12-22-2010, 04:45 PM
Parent: #41

زواغة كيف

داليا
من مطبخك وما بتجلي

ـــــــ
نصير المرأة
أو قل
المغلوب على أمره والمنبرش مبكراً

Post: #39
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:05 PM
Parent: #7

Quote: جراية
شنـوو ..؟؟

Quote: زمزمية
وبخــاري ما ياكل عيش معانا يعني ولا شنـوو ..؟؟

Quote: ولبس خمسة بتاع القوات الخاصة
يلا دا بالذات بيشيلو من الدراي كلين لمن يكون مسافر بعثه تدريب امنيه في الخارج برفقه جستابو حميـده (^_^)

تاق لي فيصل نووبـي كـاااااكـ

Post: #11
Title: Re: سندوتشاتكـ ومطوتكـ في جيبكـ (^_^)
Author: على محمد على بشير
Date: 12-22-2010, 09:11 AM
Parent: #6

اولا مشتاغون
وتانيا والله ما عارفك شرفتى الرياض لو ما سندوتشات زميل البورض
تحياتى لك وله وعليكى الله قولى ليهو رجعوا لينا جنسيتنا حقت اليوغندى الماسوره

والا اقول ليك ..
الملاحظه الاخيره دى خليها امى عشان ما ترجعى تكونى رئيسة بورداب الخرطوم من تانى

Post: #42
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:14 PM
Parent: #11

Quote: وعليكى الله قولى ليهو رجعوا لينا جنسيتنا حقت اليوغندى الماسوره
اهلن بيكـ صديغ للبرنامج ومعاكـ زميل البورض شخشيا
هداااكـ ليهو قاعد ..

شكرا لترحبيكـ .. وما بين الطيبين لووم (^_^)

لحدي اسسي زول قال لي وصفه بتاعت سندوتش وواحد مافي ..!
الواحد شكلو حا يبدا يعيد التفكير في البورط دا (^_^)

Post: #13
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 09:17 AM
Parent: #6

Quote: وياريت تغيرى لونو من الأصفر للأزرق
وويـن يا .. كان ليكون (^_^)
الفكره كوولها في اللون دا ,
جاب لي زي تلاته ولا اربعه (لنش باق) .. اخرتا دا بسس .. وقفلتا على كدا,
وكل ما يجي خاشي البيت اسألو .. جبتا الكيس الاصفر معـاكـ ..؟؟
لو ما جابو راجع , بخت ليهو في كيس احمــر .. علما بأن اكتر شي متوفر في الرياض بعد مستوصفات الاسنان .. هي الاكيأس (^_^)

مشتاقين والله .. واتوقع في الايام الجايه بوست لزميل البورض بعنوان .. الكيس الاصفر .. موش حاتقدر تغمض عينيك (^_^)

Post: #16
Title: Re: سندوتشاتكـ ومطوتكـ في جيبكـ (^_^)
Author: ابو جهينة
Date: 12-22-2010, 09:25 AM
Parent: #6

داليا
سلام

نصيحة : أمشي سوبرماركت بندة العزيزية و أشتري الأتي :

صندوق كليجة *
صندوق معمول *
صندوق أوريو *
صندوق شابورة بُر *

و الآن إليك خطة أبلة إبتهاج في إفطار الأزواج :

أولا لا تجعلي زوجك يأخذ أي كيس معاه ( لأنو حيتعود على صوت الكيس و يطرطق أضانو لما تدخلي المطبخ )
من بالليل ختي ليهو الشاي في الكباية ديك البتحفظ الحاجة ساخنة ( تيرمس صغير )

* الكليجة : عبارة عن خبائز نجدية و الحبة الواحدة بحجم صحن صغير ( حبتين ينفخو تمبس و تجعله يصبر لغاية الغدا )
* المعمول : عبارة عن كيك محشي تمر ( خمسة حبات بتخليه يقيف سلك )
* أوريو : بسكويت معطون شوكولاتة سوداء ( 3 حبات و يدعو ليك )
* شابورة بر : تديهو 3 حبات لو لاحظتِ إن كرشتو كبرت شوية. ( ممكن زيادة الجرعة لو بناطلينو ضاقت عليهو ).

الحاجات دي ما بتحتاج لأي كيس ، لفيها ليهو في ورق ألمونيوم ، و ختيها في شنطة اللابتوب. و كل يوم تديهو صنف مختلف.

تخريمة : المطوة ممنوعة في مدخل حي السفارات ، لذا ختي ليهو بصطونة في ضهرية العربية.
تخريمة أخرى : مافي داعي تقومي الصباح .. الحاجات دي كلها ممكن تجهزيها من بالليل .. و الصباح يشيل شنطة اللابتوب و يفرتق. عوديهو على الطريقة دي عشان لما تنزلي الشغل حتعرفي إنها طريقة فتاكة.
حاولي بقدر الإمكان تمبس ما يقرا البوست دة.

Post: #44
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:20 PM
Parent: #16

Quote: صندوق كليجة *
صندوق معمول *
صندوق أوريو *
صندوق شابورة بُر

الكليجه بيحبها .. لكن بعد الاكل ومعاها كبايه قهـووه ..
المعمـول ياهو الكليجه ياريس ما تفظحنا عند الاجانب .. بس على الطريقه الما قصمانيه ..
الاوريو دا ما بيحبو ولا بيطيق شكلـو .. قال شنو قال : بيحس بيهو لساتكـ عربيه (^_^) .. بعدين بابنا ضلفه واحده .. صعب نبقيهو ضلفتين (^_^)
شابوره اوكي .. بس (بـر) دي بالغتا فيها .. احسن منها الشـاي الاخضـر عديييل (^_^) (تاق لي ود البشرى)

ياريس لو سمحتا ما تعمل لينا خلل .. موضوع السندوتشات دا لو هو زاتوو خلاهو انا ما بخليهو ..
يعني انا اقـووم من الصباح اعمل شنـو ..؟؟
اديهو الشاي واقعد اتفـرج فيهو بيربط في الكرفتـه ..؟؟

Post: #8
Title: Re: سندوتشاتكـ ومطوتكـ في جيبكـ (^_^)
Author: يوسف السماني يوسف
Date: 12-22-2010, 09:06 AM
Parent: #4

دااليا
سلام
انا اقول الجماعة ديل مختفين لية تاريك شغالة حشي سدوتشات .

تحياتي

Post: #46
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:21 PM
Parent: #8

Quote: انا اقول الجماعة ديل مختفين لية تاريك شغالة حشي سدوتشات
والله يا ابو رامي متوفرين وبكثره كمـان ,
بس بورداب الرياض شكلكم بتخافو من البـرد .. ولا ما عارفه مالكون (^_^)

غايتـوو لو بتطلع من غير سندوتشات تكوون بالغتا (^_^)

Post: #51
Title: Re: سندوتشاتكـ ومطوتكـ في جيبكـ (^_^)
Author: يوسف السماني يوسف
Date: 12-22-2010, 12:39 PM
Parent: #46

Quote: والله يا ابو رامي متوفرين وبكثره كمـان ,
بس بورداب الرياض شكلكم بتخافو من البـرد .. ولا ما عارفه مالكون (^_^)

البرد مشكلة والمدارس مشكلتين ياداليا
بعدين ياخي صاحبي ما متعود علي الحبسة دا افرج عنه شوية .

Quote: غايتـوو لو بتطلع من غير سندوتشات تكوون بالغتا (^_^)

خليها في سرك لان ماوزعين نس###### ونقول ضهرنا انكشف زي صاحبنا .
بالله عليك ياداليا كتري لصاحبنا من سندوتشات النقانق والناقت .

Post: #9
Title: Re: سندوتشاتكـ ومطوتكـ في جيبكـ (^_^)
Author: الخير محمد عوض
Date: 12-22-2010, 09:06 AM
Parent: #4

مرحب بعودة رفيقة درب صديق الطفولة

مرحب دلوش وربنا يجمعكم دايما في محبة وود وسلام وامان

اما فيما يتعلق بامر السندوتشات فانه يترك لنا باب السؤال

مشرعا. اين الحلل والملحات والكمونيات والتي لا يستقيم وضعها

في سندوتشات..... فيا ايها العلاء ان سيدتكم دلوش هذى مدانة الا ان

تثبت فعلا ينافي عمل السندوتشات ( حلل, ملحات. كمونيات وما الى ذلك)

حيث انا ضيوف بتاعين مكاباسات ربما نقدم علي زيارتكما في اي وقت فقط

وددنا التاكد علي ما ستؤول اليه بطوننا شبعا حين الزيارة هههههههههههه

اقول قولي هذا وانصرف وانتي يا دلوش بعد المديدة الحارة دي اتصرفي مع

عمنا دا

ودي

Post: #14
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-22-2010, 09:22 AM
Parent: #9

Post: #17
Title: Re: سندوتشاتكـ ومطوتكـ في جيبكـ (^_^)
Author: الخير محمد عوض
Date: 12-22-2010, 09:27 AM
Parent: #14

والله يا جماعة احتمال انا اكون غلطان

دلوش بتكون قاصدة الفطور بالسندوتشات دي

علاء مش نحن صحبان هههههههههههههه

Post: #18
Title: Re: سندوتشاتكـ ومطوتكـ في جيبكـ (^_^)
Author: ابو جهينة
Date: 12-22-2010, 09:30 AM
Parent: #14

تمبس
رجاءا ما تقرا مداخلتي أعلاه .. أعمل نفسك ما شفتها

Post: #19
Title: Re: سندوتشاتكـ ومطوتكـ في جيبكـ (^_^)
Author: ياسر بيناوي
Date: 12-22-2010, 09:32 AM
Parent: #14

Quote: لو ما جابو راجع , بخت ليهو في كيس احمــر .. علما بأن اكتر شي متوفر في الرياض بعد مستوصفات الاسنان

لا كان كدي خلاس
الاصفر اخف قدرن

دلوش التي هي سابنتا
والله مشتاغون

خالص الود

Post: #20
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-22-2010, 09:42 AM
Parent: #19

Quote: حاولي بقدر الإمكان تمبس ما يقرا البوست دة.

..

طبعا دي النجيضة يا ريس ..
انا ما ح ارد خالص في البوست دا .. يعني مثلا زي الخير محمد عوض دا جاي لي حوار .. مثلا ..؟
الخير زول كويس ..
لكن اتوقع ..
ثم اتوقع مرة أخرى .. إني ح اترشه رش شديد جدا في البوست دا ..

ممكن عادي جدا يجي واحد يقولي يا تمبس مارتديلا ..
يا .. تمبس طحنية ..
غايتو الحمد لله على ما اراد ..
لكن ح اعمل بي اجتهاد شديد .. إنو بكري ابوبكر .. يسرع لينا موضوع الأرشفة دا ..

أول مرة الواحد يحس إنو يدخل البورد وضهرو مكشوف

Post: #21
Title: Re: سندوتشاتكـ ومطوتكـ في جيبكـ (^_^)
Author: عفاف الصادق بابكر
Date: 12-22-2010, 09:50 AM
Parent: #20

Quote: أول مرة الواحد يحس إنو يدخل البورد وضهرو مكشوف

هههههههه غايتو دي عجبتنى عجب ..

يا دلوش لو بتعملى سندوتش واحد بس تكونى ياااالغى شديد ..

يا زوله الشوق بحر .. وبركة بي عودتك ومعك سندوشتات على قول مزونه ..

Post: #22
Title: Re: سندوتشاتكـ ومطوتكـ في جيبكـ (^_^)
Author: طارق ميرغني
Date: 12-22-2010, 09:58 AM
Parent: #21

اختنا داليا

جربي ساندوتش ديك الرومي بتاع كودو وادينا رايك ...!!!

الساندوتش من عندهم اما المطوه من الزبون

-------

متلومين معاكم والله طبعا فوزيه في السودان من الشهر الماضي لمرض والدهاهاشم السعيد

والشايقي فتح ليهو بوست ما شفتك لا انتي لا صاحبي تامبا

اتلومتوا معاها والله

_________________________

شفتي كيف عشان اضاري اللوم....!!!

Post: #24
Title: Re: سندوتشاتكـ ومطوتكـ في جيبكـ (^_^)
Author: doma
Date: 12-22-2010, 10:07 AM
Parent: #22

يا بتي تعالي انت زميل البورض ماشي المكتب ؟؟!!!
ولا الروضه ؟؟؟!!
سندوتشتات شنو واكياس شنو كمان؟؟!!!

Post: #58
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:52 PM
Parent: #24

Quote: يا بتي تعالي انت زميل البورض ماشي المكتب ؟؟!!!
ولا الروضه ؟؟؟!!
سندوتشتات شنو واكياس شنو كمان؟؟!!!
يرضيكي يا ماما دومـا ابنك علاء ياكل تيك اوي ؟؟
يعني طيب انا فايدتي شنـوو ؟
والله انا زااتي ما برضى ياخ .. بس ما تكلميهو .. انا عامله فيها ما شغاله بالموضوع (^_^)
عشان بكره كمان ما يجي يقول لي ختي لي الغدا في سـاخن بـارد (^_^)

ووحشتينا يا ست الكل

Post: #57
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:50 PM
Parent: #21

Quote: يا دلوش لو بتعملى سندوتش واحد بس تكونى ياااالغى شديد ..
سندوتش وواحد ووين ياخ ,
انت يا عفاف بتبالغي ولا شنـوو ؟
من شرووط سنوتشات الصباح ان لا تقل عن تلاته .. ولا تزيد عن تلاته ..
بالعربي كدا .. اربعه .. (^_^)

قال واحد قال !

مشتاقين يا بت يا نيل (^_^)

Post: #23
Title: Re: سندوتشاتكـ ومطوتكـ في جيبكـ (^_^)
Author: HAIDER ALZAIN
Date: 12-22-2010, 10:00 AM
Parent: #20

الدكتورة مرحب بعودتك ..
حمد لله سلامة النت

Quote: اعملي لي سندوتش مارتيديلا وديك رومي وختي فيهو جبنه وزيتون وخس ومكدوس وكبي لي شطه هريسه فيهو !!

غايتو شئ في الرطانة الفوق دي فهمتو وشئ ما فهمتو لكن اكيد الخس بعرفوا

ثم تمبس بالله بيعرف الحاجات دي كوللها وكمان بمكدوسها .. صحي يا قول بشاشا دا مستلب جدن جدن وتاني ما بيرجع لحركات القلوبيــة وقبيض الحراويل ديك ..

غايتو الله يعينك واعتقد انه اقتراح جنابو عمر عثمان هو الاسلم في الحالة دي طالما جابت مطاوي ..

Quote: أول مرة الواحد يحس إنو يدخل البورد وضهرو مكشوف

يازول انتا تاني الا تعمل ليك شمسية ...

Post: #25
Title: فرمان حكومي
Author: بله محمد الفاضل
Date: 12-22-2010, 10:09 AM
Parent: #23

نصرة لأختنا داليا ولكل النساء
إليكِ هذا الفرمان الصادر منذ وقت طويل
من حكومتنا المبجلة
وقد تم نشره سابقاً هنا بالبورض
والتنفيذ ساري إلى ما شاء الله
والله غالب

حظر تجول..!!

بهذا فقد صدر في الساعة الواحدة صباحاً من يوم الثلاثاء 16/4/1429هـ الموافق 22/4/2008م عنا نحن السيدة ملكة (مملكة زواجست – الفاضل) رئيسة مجلس الوزراء وزيرة الدفاع والطيران و الزحف و الإسكان والمالية والتفتيش والداخلية والخارجية، القرارات التالية (وتطبق ابتداءً من تاريخه وحينه):
1- ليس لديكم حق التصرف في أي ساعة خارج أوقات الدوام الرسمي إضافة إلى مدة زمنية قوامها نصف ساعة –زحفاً- عبر المسافة المقدرة والفاصلة بين المنزل والمكتب ذهاباً وإياباً.
2- يمنع منعاً باتاً ممارسة أي نشاط بصري إلى أي أنثى وإن كانت على غلاف أو داخل جريدة أو مجلة وبخاصة الفاتنات منهن، وتبعاً لذلك فقد قررنا عدم السماح لكم بالإطلاع إلا على ما لا يحمل صوراً، وفي ذات الشأن فإنه يسمح لكم فقط الاستماع إلى إذاعات القرآن الكريم المختلفة ومشاهدة القنوات الدينية (قنوات التلاوة، الرقية الشرعية،...الخ) ولا يسمح مشاهدة القنوات التي أتاحت للإناث مدح الرسول الكريم (هارموني، ساهور).
3- أيضاً يمنع منعاً باتاً الاتصال على النِساءِ سواء كُن صديقات أو أخوات أو حبيبات أو أمهات أو خالات أو عمات أو خلافه، كما ولا يسمح أيضاً الاتصال على أرقام الرد الآلي بأصوات نسائية، وننوه بأنه لدينا بمكتبكم أجهزة تنصت ورصد لاتصالاتكم غير الخاصة بالعمل، ويسمح لكم فقط بالمشاركة في الأتراح والأفراح وبكلمات محددة مسبقاً في: (مبروك) و (أحسن الله عزاءكم).
4- يمنع منعاً باتاً الدخول إلى الإنترنت وارتياد مقاهيه بحجة وإدعاء كتابة الشعر أو غيره.
5- ممنوع اصطحاب الأصدقاء (إلا في حدود سرية) وما درجت على تسميته بالصديقات (وهن مرفوضات عند جلالتنا أصلاً جملة وتفصيلا) إلى أي جلسة سمر وود وصفاء نتيحها لكم (أردتم أو أبيتم) بمعيتنا.
6- لكم الحق فقط بالخروج يوم الخميس في الفترة المسائية إلى أي مكان كان للترويح عن أنفسكم تأسياً بقول الرسول الكريم صلى الله عليه وسلم (روحوا عن النفوس ساعة بعد ساعة فإن النفوس إذ كلت عميت) شريطة اصطحابنا والأطفال لكم وإلا فلا غليظة، ولا يسمح بأي حال من الأحوال الخروج بمفردكم من المنزل خلال عطلة نهاية الأسبوع.
7- القيام بالأعباء المنزلية الموكلة إليكم من طبخ وغسل وكنس وخلافه.
8- الاستقالة وفوراً من جماعة (بورداب جدة) وغيرها من الجماعات التي تنتمي إليها وذلك فيما يتعلق بالاشتراك في أي أنشطة خارج النطاق الأسري والاكتفاء فقط بالتحسر على أيام جميلة (عزابية) موعودة، ويطبق قرار رقم (3) في هذا الخصوص ويمكن المساهمة فقط بالرأي و المال في أي أمرٍ يتعلق بهذه الجماعات في حال الأنشطة (العزابية).
9- يمنع الزوغان أثناء ساعات العمل الرسمية وقد كلفنا في هذا الشأن شركة (رصد الأزواج) بمتابعتكم وإبلاغنا فوراً بأي تحركات لكم خارج المكتب لاتخاذ اللازم.
10- أي كشط أو تعديل يلحق بهذه الوثيقة من جلالتنا يعد نافذاً بينما لا يسمح لكم سوى بإلقاء نظرة والتقيد بكافة ما جاء فيها من بنود ظاهرة وخفية.
11- التنويه إلى أن العمل بالبنود السرية للوقت والكم والكيفية لا زال سارياً ويطبق بذات المهنية.
12- يضاف إلى ما تقدم أعلاه أي بند ينصب في مصلحة مملكة زواجست.
13- تعمم هذه الوثيقة وحبذا لو تطبق نصرة للنساء كل بمملكتها وحسب ضرورتها ومقتضاها.
هذا وعاشت مملكتي بكنفي شامخة أبية...

صدر تحت توقيعي في ساعته وتاريخه
ملكة مملكة زواجست- الفاضل
نسخة جداريه بقصري الملكي/نسخة بمكتبه بـ (وزارة التنفيذ)/نسخة للمراسم الملكية/نسخة للجنة الرقابة والتفتيش/نسخة لسودانيز أون لاين

Post: #26
Title: Re: سندوتشاتكـ ومطوتكـ في جيبكـ (^_^)
Author: محمد حيدر المشرف
Date: 12-22-2010, 10:11 AM
Parent: #23

Quote: ما بيرضى ياكل نفس الندوتش يومين متتاليين

اييييييه !!..
كلنا كنا ذاك الرجل !..

..
ازيك يا داليا

Post: #55
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:46 PM
Parent: #26

Quote: اييييييه !!..
كلنا كنا ذاك الرجل
أها شفتوو .. عشان ما تقولو بتبلى سـاااي ..
طيب ممكن نعمل تبادل خبرات انا والمدام ؟
يعني بتعمل شنو في التلاتين يووم ديل؟
الله يجيب رمضان ساااي غايتوو (^_^)

محمد حيدر ليك وحشه والله (^_^)

Post: #27
Title: السلام عليكم ورحمة الله
Author: البدري عبد الله
Date: 12-22-2010, 10:17 AM
Parent: #23

.

Post: #29
Title: Re: السلام عليكم ورحمة الله
Author: مزمل خيرى
Date: 12-22-2010, 10:25 AM
Parent: #27

حمدلله بالسلامة ياداليا وتحياتنا كتير لزميل البورض بالله ...

Post: #54
Title: Re: السلام عليكم ورحمة الله
Author: داليا الكباشى
Date: 12-22-2010, 12:43 PM
Parent: #29

مزمل ابو جـوان .. تسلم من كل شر .. وتحياتي لي زميله البورد وكل من يسأل عنا (^_^)

Post: #30
Title: Re: السلام عليكم ورحمة الله
Author: عبدالكريم الامين احمد
Date: 12-22-2010, 10:32 AM
Parent: #27

Quote: اعملي لي سندوتش مارتيديلا وديك رومي وختي فيهو جبنه وزيتون وخس ومكدوس وكبي لي شطه هريسه فيهو !!

اااااااااجي
علي قولة خالتي النعمة

زميل البورض ده بقي بيضرب شندوتشات موتريلا او اي كان اسمها وراشيها كمان بديك رومي ومكدوس
وبهناك شابكني قدو قدو واقاشي ومتور نفسي ولاعب بي شطرنج ومخليني غرقان في التمني...
ايش دعوي يا زميل البورض
واجمع بهناك يا زول وبلاش موتريلا وبلاش مكدوس معاك

-----
ويا دلوش بالله وروينا ما هو (المكدوس)
حسع زميل البورض ده نسالو يقول ليك حاجة عاملة كده زي الاقاشي لووووووول

Post: #33
Title: Re: السلام عليكم ورحمة الله
Author: tmbis
Date: 12-22-2010, 10:55 AM
Parent: #30

Quote: زميل البورض ده بقي بيضرب شندوتشات موتريلا او اي كان اسمها وراشيها كمان بديك رومي ومكدوس
وبهناك شابكني قدو قدو واقاشي ومتور نفسي ولاعب بي شطرنج ومخليني غرقان في التمني...
ايش دعوي يا زميل البورض

نعم ..
إنها تاني تداعيات هذا البوست ..
قبل شوية اتصل علي زميل بورد من بورداب الرياض .. يعني صاحبنا شديد جدا .. وكان معانا في البيت قبل كم يوم .. وضربنا مع بعض مديدة دخـن ..
تخيل يا كيكي قالي شنو ..؟
كان بتكلم معاي كويس ..
بعداك قالي .. طيب اها مع السلامة يا بتاع المارتديلا ..

شفتي يا عفاف الصادق .. ويا حيدر الزين مش قلت ليكم الواحد حاسي بي ضهرو مكشوف ..؟
يا كيكي ..
إنت ما تعصر على الحتة دي شديد وخليك من الحركات بتاعت المهمشين دي .. عندكم اقاشي .. بقابله مارتديلا مباشرة ..
عندكم قدوقدو .. في بيتزا .. وسبق واعلنت ليك في بوستينك داك .. إني ما زول مهمش انا لكن كنت في فترة ما .. قاعد اعمل بحث في حاجاتكم العجيبة البتاكلوها دي .. من قدوقدو وأم جنقر وكجيج .. واثر الصحة العامة في تشكيل عقلية الفرد في المجتمع

ملحوظة:
واحد يصحي بكري يشيل البوست دا .. يا بضرب ليكم عن الطعام

Post: #28
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-22-2010, 10:20 AM
Parent: #23

ياجماعة دقيقة ..
الزولة دي ما عندها نت في البيت .. ولسه ما ركبنا التلفون .. اضف لذلك ما ممكن تكتب بوست أو ترد عن طريق الجوال ..
والحاجة المهمة إنو .. شلت معاي اللابتوب .. وفي لابتوبين في البيت ما شغالات .. فيهم مشكلة وقاعدات في المخزن على يدك اليمين بعدما تدخل المطبخ
طيب .. السؤال الذي يطرح نفسو الزولة دي جابت الاتصال من وين ..؟
خليك من الاتصال .. جابت كمبيوتر من ووين ..؟

غايتو مبدئيا كدا قاعده تمشي البقالة براه وتجيب الحاجات .. لكن كمان ما ممكن تكون مشت محل الانترنت الجمبنا
والليلة من دون الأيام .. وأنا طالع قفلت باب العمارة واكتشفت إنو نسخة المفتاح التانية حقته في جيب الجاكيت حقي
وماف شباك عشان تطلع بيهو من الشقة ..
مبدئيا تاني .. كدا
الزولة دي مهكـــرة ..

من الذي يكتب بحساب الزميلة داليا كباشي ..

Post: #31
Title: Re: سندوتشاتكـ ومطوتكـ في جيبكـ (^_^)
Author: عفاف الصادق بابكر
Date: 12-22-2010, 10:48 AM
Parent: #28

Quote: من الذي يكتب بحساب الزميلة داليا كباشي ..

الليلة ووووووووووووووووب على قول بت الشيخ ...

Post: #36
Title: Re: سندوتشاتكـ ومطوتكـ في جيبكـ (^_^)
Author: بله محمد الفاضل
Date: 12-22-2010, 11:46 AM
Parent: #31

يعني صدقتي يا عفاف

دي مكنة منو ساهي
أو هو البكتب في الكلام دا

Post: #32
Title: Re: سندوتشاتكـ ومطوتكـ في جيبكـ (^_^)
Author: احمد الأمين على إدريس
Date: 12-22-2010, 10:51 AM
Parent: #23

والله يادكتورة
اكيد منورة الرياض والبورض وزميلو

فيما يخص الساندوتشات انصحك بعدم الاستماع
لاى ارشادات من ود الصايم وناس بيتم
ديل شكلهم بعملوا عمود 4 عيون عديل كدا...

اما المطوة فشكلك بتديهو مكونات الساندوتش فلتى كدا
وهو يشيل ويقطع ويحشى ..وربما لمأرب اخر

Post: #34
Title: Re: سندوتشاتكـ ومطوتكـ في جيبكـ (^_^)
Author: جمال محمود
Date: 12-22-2010, 11:32 AM
Parent: #32

كو كو كو كو كو

يا ناس البيت السلام عليكم

نحنا جيرانكم بى هناك

سكنا قريب جنمبكم

نتمنى التواصل

تحياتى

Post: #37
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 11:51 AM
Parent: #34

Quote: من الذي يكتب بحساب الزميلة داليا كباشي ..

على قولت الزول بتاع فيلم امبارح (نايـص طـراي) كـاااااكـ

ما عندنا نت في البيت فعلن , ولا يوجد لدينا اتصال (نمتلكه) من حر (مالنا) وكدي ,
لكن العسكريه تصرف .. ومن طوول جا بالغنايـم .. ويا بخت من وفق راسين في الحلال (^_^)

ومن هذا المنطلق اول شي اعتذر لى عمو طارق ميرغني وحرمه المصونه عن اننا والله ما شفنا البوست المعني ,
والف الف حمدلله بسلامتها يارب .. واكيد اكيد مافي لووم .. الحاله واحده .. تجونا .. نجيكم .. كلو واحد .. اهم شي حمدلله بسلامتها يارب ..

نعتذر للانقطاع عن موضوع البوصط الاساسي نظرن لاني كنتا بسووي في الغدا (الما سنتدوتشات طبعن) (^_^)
ونعوود لمواصلت برامجنا .. ويازميل البورض احتمال كبير الفلبيني الجمبنا دا يدق ليك الباب اخر الشهر ويقول ليك (أي نيـد سفنتي ريال فوور نت)

Post: #43
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-22-2010, 12:17 PM
Parent: #37

Quote: احتمال كبير الفلبيني الجمبنا دا يدق ليك الباب اخر الشهر ويقول ليك (أي نيـد سفنتي ريال فوور نت)

طيب واللابتوب الأحمر اللي في البنطلون جا منيييييييييين ..؟

Post: #50
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:38 PM
Parent: #34

Quote: يا ناس البيت السلام عليكم

نحنا جيرانكم بى هناك

سكنا قريب جنمبكم

نتمنى التواصل

تحياتى
حبابكون والله .. تشرفو اي مكان اي زمـان .. بعد الساعه 6 مسساء بنعمل مديده دخن بالحليب .. ويستمر التقديم لحدي
الساعه 12 بالليل .. بعد كدا بنقلب شووربه لسان عصفوره وفطيره دجـاج .. فاااا حبابكون شديد .. تحياتي ..

Post: #35
Title: Re: سندوتشاتكـ ومطوتكـ في جيبكـ (^_^)
Author: محمد البشرى الخضر
Date: 12-22-2010, 11:41 AM
Parent: #32

كاااااااكـ زي الكااااااااكـ

حمدالله ع السلامة يادكتورة
ياخي لكن بالغتي يعني بوست زي دا ما تكتبيه إلا و الوااحد خلاص اجازته على وشك تخلص
شكرا يا دكتورة أو للذي يكتب بحسابك

تمبس مارتدلا لو سمحت استفسار ياخ
حتوت عندو لنش بوكس اسبايدر مان اسي حردانو وقال عايز بتاع (بن تن) , فتشتو ما لقيته ماعارف وين بتلقي ؟

__
()+

Post: #38
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-22-2010, 12:02 PM
Parent: #35

Quote: تمبس مارتدلا لو سمحت استفسار ياخ

والله انا خايف ارد ليك اجي اللقى بكري وقفك .. ما تقول كمان الارشفة قربت وبكري يكون يادوبك فضى من المشغوليات ..

غايتو الحمد لله ود الصايم أمبارح كان متعشي معاي Chicken Pie .. لو لما ذلك .. الواحد كان شاف ليهو مكان غير الرياض دي ..

Post: #75
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-25-2010, 07:51 AM
Parent: #35

ود البشرى بقيت صعب خلاس !

التجاهل !

Post: #53
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:43 PM
Parent: #32

Quote: من ود الصايم وناس بيتم
ديل شكلهم بعملوا عمود 4 عيون عديل كدا...
القال ليك الكلام دا لا يعـدو ان يكون الا مضـلل وفنجري بـؤ لا اكثـر (^_^)
ود الصايم دا نبقـه ما بيدوها ليهـوو الصبـاح .. (^_^)

Quote: اما المطوة فشكلك بتديهو مكونات الساندوتش فلتى كدا
وهو يشيل ويقطع ويحشى
الحركه دي جربيتها قبل كدا ,,
فما كان منهو الا ان جاني راجع بالمكونات زي ماهي .. وقال لي : تاني حركـه زي دي ما تسـويها (^_^)
لكن مساله لمأرب أخـر دي كويسه .. (^_^)

Post: #45
Title: Re: سندوتشاتكـ ومطوتكـ في جيبكـ (^_^)
Author: يوسف السماني يوسف
Date: 12-22-2010, 12:21 PM
Parent: #20

Quote: ثم اتوقع مرة أخرى .. إني ح اترشه رش شديد جدا في البوست دا

تمبس اتخارج واعمل نفسك مشغول .

Quote: غايتو الحمد لله على ما اراد ..

الجاتك في فطورك سامحتك .

Quote: أول مرة الواحد يحس إنو يدخل البورد وضهرو مكشوف

عشان تعرف اهمية الحارس كان لسع ماعرست كان ضهرك مؤمن .

Post: #47
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-22-2010, 12:26 PM
Parent: #45

Quote: عشان تعرف اهمية الحارس كان لسع ماعرست كان ضهرك مؤمن .

والله يا يوسف شكلك كدا ح يتعمل ليك .. قانون دستوري زي بتاع بلـه الفاضل دا .. الشغل تاني زاتو ما تمشي

يازول إنت ما بتخاف واللا شنــو ..؟

Post: #49
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:36 PM
Parent: #47

Quote: والله يا يوسف شكلك كدا ح يتعمل ليك .. قانون دستوري زي بتاع بلـه الفاضل دا .. الشغل تاني زاتو ما تمشي

يازول إنت ما بتخاف واللا شنــو ..؟
زوول ما بيشيل معاهو سندوتشات الشغل .. تتوقـع منـوو شنوو مسلن ..؟؟
نفض نفض يا عم الحاج (^_^)

Post: #74
Title: Re: سندوتشاتكـ ومطوتكـ في جيبكـ (^_^)
Author: بله محمد الفاضل
Date: 12-22-2010, 05:18 PM
Parent: #47

شكلك يا تمبس ما مركز
الفرمان دا عام يا مان
عام
ما علي بس
بعد شوية عينك ما تشوف إلا الكرهبة
وما في ليك فكة
أصبر بس

كمان يا ولد أنا أخير منك والله
ضهري مضارى
كان ختينا ناس فلان

ــــ
واحد خواف

Post: #56
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:48 PM
Parent: #19

ياسر بيناووي .. تسلم يارب واشاوقك مثلها اضعاف .. تحياتي لكل من يسأل عنـا ..

Post: #48
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-22-2010, 12:26 PM
Parent: #9

Quote: . اين الحلل والملحات والكمونيات والتي لا يستقيم وضعها في سندوتشات
والله لو زميل البورض قال ما بنعمل ليهو المذكورات اعلاه يكوون بالغ .. واحتمال كبير نحرمو من غدا الليله .. خاصه انو غدا الليله مفاجأه (^_^)

لكن مساله نختها في سندوتش دي فااا عليك الله تعال ورينا بيسووها كيف وحق التزكره ماشي جاي علي انا ..
عشان ما تقول اي شي ..
ياخ صاحبكم اول امس قال داير سندوتش كاليمـاري !!
دا اعملو سندوتش كيـف ..؟؟

المحرش ما بيكاتل (^_^)

Post: #52
Title: Re: سندوتشاتكـ ومطوتكـ في جيبكـ (^_^)
Author: الخير محمد عوض
Date: 12-22-2010, 12:41 PM
Parent: #48

كلام دومة الفوووووووووووووق دا كيفني هالس هالس

هههههههههههههههههههههههههههههههههههههههههههه

Post: #59
Title: Re: سندوتشاتكـ ومطوتكـ في جيبكـ (^_^)
Author: osman abdala
Date: 12-22-2010, 12:52 PM
Parent: #52

عثمان يا دكتورة

وصورة لوليد الشفت لانو طوالي شابكني يا اسامة

Post: #60
Title: Re: سندوتشاتكـ ومطوتكـ في جيبكـ (^_^)
Author: MOHAMMED ELSHEIKH
Date: 12-22-2010, 12:56 PM
Parent: #48

السلام عليكم
والله العظيم الكيس الأصفر انا قايلو بتاع التمباك وبقوم الراجل دا يشيلو من الفريزر بتاع التلاجة

اما

Quote: وبهناك شابكني قدو قدو واقاشي ومتور نفسي ولاعب بي شطرنج ومخليني غرقان في التمني

فقد ######ت شعرة جلدي

Post: #61
Title: Re: سندوتشاتكـ ومطوتكـ في جيبكـ (^_^)
Author: yasir Abdelgadir
Date: 12-22-2010, 01:01 PM
Parent: #48

حمدا لله علي السلامة ياداليا....

أقول ليك حاجة: أكبر دليل علي إنو الزميل دا مبسوط...إنو أنا أول مرة أشوف أنيابو ...ولا أقول ليك أضراسو الخلفية ذاتها ظهرت

غايتو أنا شاهد علي الكيك

كل الاماني بحياة زوجية سعيدة

تحياتي

Post: #62
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-22-2010, 01:31 PM
Parent: #61

يا كيكي ..
الحمد لله لقيت لي مراقــة .. فيما يتعلق بي موضوع المارتديلا دا ..

طبعا في الصورة أعلاهـا .. زميل البورد .. فيصل عباس اشاد بي موضوع (الكلوبس)* وذلك ابان زيارته الأخيرة للمملكة ومنزلنا العامر بوجودكم ..
يظهر في الصورة العزيز .. محمد مدني من بورداب الرياض ..
وطبعا يا ريس أبو جهينة .. كدا معاي في نفس الهوا سوا .. ما ينطبق علي في البوست دا ينطبق عليك دبل .. خاصة وإنك ريس عموم بورداب الرياض ..
هذا بالاضافة لي حضور د. محمد الحســن ..
وسيكون هناك بوست منفصل .. لهذه المناسبة ..

يادكتور ياســر .. غايتو لو عارفك بتمارس التخصصية الاستشارية بتاعت الاضراس دي .. كان صورتك مع الكيك اصلها بايظة بايظة بعد كدا ..

....
*
طبعا الكلوبس دا يا كيكي يا مهمش .. ما تجي تسالني منو .. لانو عادي ممكن اقوليك اي حاجة كدا واطلع بيك الجووو

Post: #63
Title: Re: سندوتشاتكـ ومطوتكـ في جيبكـ (^_^)
Author: nazar hussien
Date: 12-22-2010, 02:00 PM
Parent: #61

Quote: وزميل بورضيكم دا ما بيرضى ياكل نفس السندوتش يومين متتاليين

ومارتديلا وجبنة وديك رومي...وسامبادوريا وريال مدريد...وكيس اصفر..

يا انت برجوازي مركب قلوبية هامش...
يا نحن كمان مظلومين...لامن مسحوقين

كدي يا داليا عليك الله المرة الجاية احشي ليه
سندوتش مديدة بي حرجل...
والمرة البعدا اديه قراصة بي زيت وسكر في الكيس زاتو..

والمره البعدا قولي ليه الدقيق كمل...

النشوفوا بيأتي لحوار
ام
التجاهل
التجاهل

Post: #64
Title: Re: سندوتشاتكـ ومطوتكـ في جيبكـ (^_^)
Author: وليد عبد اللطيف
Date: 12-22-2010, 02:18 PM
Parent: #63

يادكتوره الزول دا
شوفي ليهو كبسولات حمية
وخليهو يرجع للتمارين دا افضل حل .

Post: #65
Title: Re: سندوتشاتكـ ومطوتكـ في جيبكـ (^_^)
Author: ولياب
Date: 12-22-2010, 02:28 PM
Parent: #64

أهلاً يا داليا ،،، نورتي

Quote: اعملي لي سندوتش مارتيديلا وديك رومي وختي فيهو جبنه وزيتون وخس

كتا داير اقترح نفس التركيبة مارتديلا ديك رومي أو مدخن مع الزيتون ،،،، يلا سبقتونا

بس الزميل بعد شوية حيشيل الكيس الأسود وحيقبل يمين وشمال يا ربي (البرميل) ودوه وين

تسعدوا إن شاء الله .

Post: #67
Title: Re: سندوتشاتكـ ومطوتكـ في جيبكـ (^_^)
Author: كمال سالم
Date: 12-22-2010, 03:01 PM
Parent: #65

Quote: Quote: اعملي لي سندوتش مارتيديلا وديك رومي وختي فيهو جبنه وزيتون وخس ومكدوس وكبي لي شطه هريسه فيهو !!

هسه دى ما مـــــززززه عديل ,,
ياربى الكونياك فى المكتب !

داليا وتمبس مشتاقين والله ,, إنشاء الله ربنا يفرحكم دائما ,,
تحياتى ,, وأبقوا عشره ,,

Post: #66
Title: Re: سندوتشاتكـ ومطوتكـ في جيبكـ (^_^)
Author: احمد التجانى احمد
Date: 12-22-2010, 02:46 PM
Parent: #64

Quote: واقعد اتفـرج فيهو بيربط في الكرفتـه

غايتو متلتلين معاكم الكرفتات والمرتديلات

سلام يادكتورة
ويا بتاع المرتديلا والديك الرومى والمكدوس

Post: #68
Title: Re: سندوتشاتكـ ومطوتكـ في جيبكـ (^_^)
Author: محمد عبد الماجد الصايم
Date: 12-22-2010, 04:27 PM
Parent: #66

Quote: غايتو الحمد لله ود الصايم أمبارح كان متعشي معاي Chicken Pie

سجمنا .. هو داكـ كان عشاكم أولو وآخرو!!

Post: #69
Title: Re: سندوتشاتكـ ومطوتكـ في جيبكـ (^_^)
Author: ياسر بيناوي
Date: 12-22-2010, 04:37 PM
Parent: #68

Quote: سجمنا .. هو داكـ كان عشاكم أولو وآخرو!!

ضيف شيال حال خلاس

لكن غلتانين انتو البتعزمو نوع دا

خالص الود

Post: #70
Title: Re: سندوتشاتكـ ومطوتكـ في جيبكـ (^_^)
Author: محمد عبد الماجد الصايم
Date: 12-22-2010, 04:44 PM
Parent: #69

عزومة شنو يا بيناوي ياخ!
حقي قلعتو رجالة عدييييل!

Post: #72
Title: Re: سندوتشاتكـ ومطوتكـ في جيبكـ (^_^)
Author: ياسر بيناوي
Date: 12-22-2010, 04:52 PM
Parent: #70

Quote: عزومة شنو يا بيناوي ياخ!
حقي قلعتو رجالة عدييييل!

وبي دا كلو جايي تشيل حالم بي اسافير الله الواسعة
والله حقو نصدر ليك عدد تلاتة كباسير نمرة
شان تااااامن

خالص الود

Post: #80
Title: Re: سندوتشاتكـ ومطوتكـ في جيبكـ (^_^)
Author: داليا الكباشى
Date: 12-25-2010, 10:33 AM
Parent: #70

Quote: حقي قلعتو رجالة عدييييل!
قوول والله !
ياخ زميل البورض قررب يبووس رجلك عشان تقعد ... أكره نفسك ياخ !
موش كفايه قاعد لحدي تلاته صباحا ! قدر ما اتشهقتا وعملتا نعسانه بررضو ما داير تتخارج !

عالم لصقه بي شكل !

تاق لي محمد البشرى الخضر

Post: #73
Title: Re: سندوتشاتكـ ومطوتكـ في جيبكـ (^_^)
Author: haroon diyab
Date: 12-22-2010, 04:57 PM
Parent: #69

يازميل البورض

ويازميلة البورض

ادام الله عليكم السعادة

لانكم تستحقون

يادكتورة.....

شكرا علي كل الحفاوة

وربنا يقدرنا علي رد جمايلك

وياتامبا

مانوصي حريص

تحيات الاسرة

ومودتي

Post: #76
Title: Re: سندوتشاتكـ ومطوتكـ في جيبكـ (^_^)
Author: السيد المسلمي
Date: 12-25-2010, 08:27 AM
Parent: #73

قوم لفوا بلا سندويتشات بلا مطوة معاكم ..
عالم تغيب سنة وتجي كأنو مافي أي حاجة حاصلة !

Post: #77
Title: Re: سندوتشاتكـ ومطوتكـ في جيبكـ (^_^)
Author: haroon diyab
Date: 12-25-2010, 08:57 AM
Parent: #76

السيد

اشواق ياجميل

لكن ....

اعتقد برحيل زميلة البورض

فقدنا الكثير نحن بورضاب الخرتوم.....!!!!

باللهي حسع سلم لي علي الطيب وشمو

مشتاقيييييييييييييين

Post: #78
Title: Re: سندوتشاتكـ ومطوتكـ في جيبكـ (^_^)
Author: طارق أحمد عثمان
Date: 12-25-2010, 09:40 AM
Parent: #77

سلام يا دكتورة داليا وعودا حميدا

Quote: سندوتشاتكـ ومطوتكـ في جيبكـ

ده فطور ولا زاد المجاهد يا دكتورة

غايتو بعد ده لو بتتغدى يا تمبس تكون بالغت ..

Post: #79
Title: Re: سندوتشاتكـ ومطوتكـ في جيبكـ (^_^)
Author: Ashraf el-Halabi
Date: 12-25-2010, 10:11 AM
Parent: #78

Quote: الله يجيب رمضان ساااي غايتوو
شوف بالله: لتنقذ نفسها تورط غيرها!!

حد يصحي طيفور يا ناس!!

إن شاء الله في رمضان يحشِّيك الآبري شخصياً

Post: #81
Title: Re: سندوتشاتكـ ومطوتكـ في جيبكـ (^_^)
Author: عبد اللطيف بكري أحمد
Date: 12-25-2010, 11:35 AM
Parent: #79

الغلط الوحيد الوقعنا فوقو : ما وزنا زميل البورض قبل حقبة المارتديلا أو حتى مجرد صورة!!
=

منورة الشاشة بعد أن نورتي الرياض،،

متضامن مع طارق ميرغني في خجلته، مع أنو فوزية يادوبا سافرت!!

Post: #83
Title: Re: سندوتشاتكـ ومطوتكـ في جيبكـ (^_^)
Author: ساميه حامد
Date: 12-25-2010, 12:05 PM
Parent: #79

الاخت دلوش تحيات كتيرات ولوم شديد

لكن انتي براك شفتي الحاصل يعني بخصوص الساندوتشات وكده انتي بتعملي واحد انا بعمل اربعة( طبعا ليو هو والولاد عشان ما تقولوا بياكل اربعة )

والله عشان اكون صادقة خمسة لانو زميل البروض بياكل اتنين

يعني قومة الصباح عندي من الساعة تلاتة صباحا عشان اقدر اخلص الطلبات

Quote: اعملي لي سندوتش مارتيديلا وديك رومي وختي فيهو جبنه وزيتون وخس ومكدوس وكبي لي شطه هريسه فيهو !!

والله ده الا تعملي لي العيشعة توسعة خادم الحرمين الشريفين عشان تشيل الحاجات دي كلها مع بعض

ــــــــــــــــــــــــــــــــ
حاولي تفطمي سريع من العادة دي لانو انا زيك بديت وقلت حرااااااام إمشي من غير فطور وكدا

واهو إدبست لي خمستاشر سنة وما عارفة اتخارج كيف

Post: #82
Title: Re: سندوتشاتكـ ومطوتكـ في جيبكـ (^_^)
Author: السيد المسلمي
Date: 12-25-2010, 11:55 AM
Parent: #77

الجميل دوماً هارون أبودياب
أ
Quote: اعتقد برحيل زميلة البورض

فقدنا الكثير نحن بورضاب الخرتوم.....!!!!
فقدنا شنو ياخ ؟
زميلة البورد دي كانت كالشعلة .. وبعدها الخرتوم ضلمت عديييل .

ــ
تقبل تحيات شمو

Post: #84
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-25-2010, 12:27 PM
Parent: #82

Quote: والله عشان اكون صادقة خمسة لانو زميل البروض بياكل اتنين

والله يا سامية اشكرك على المعلومة دي ..
كدا الواحد يضمن إنو فك الضغط العليهو حصل .. الواحد من أول البوست دا حاسي بي إنو بقى winrar.exe عديل كدا
الحمد لله غايتو .. تاني لو ناس حيدر الزين أو محمد البشرى أو أي كان اسمهم البروجو لي فكرة المارتديلا دي .. لو في اي واحد فيهم ضغط علي .. مفترض يعملو بارتيشن عديل كدا .. لانو معاي ابو حسين عديل كدا ..

يا سامية ..
أنا على ثقة تامة إنك ما بتحشي ليهو ساندوتشات فول .. لانو الفول فوقو بروتين .. والبروتين بينوم الزول في المكتب

يا ابو حسين .. اتاريك ضارب ساندوتشات الباسطرمة وعامل فيها نايم .. ؟؟ خمسطاشر سنة .. وأنا المسكين ضاغطني في الشهر ونصف الشهر دا ..؟

Post: #85
Title: Re: سندوتشاتكـ ومطوتكـ في جيبكـ (^_^)
Author: محمد عبد الماجد الصايم
Date: 12-25-2010, 12:46 PM
Parent: #84

Quote: والله ده الا تعملي لي العيشة توسعة خادم الحرمين
الشريفين عشان تشيل الحاجات دي كلها مع بعض

Post: #86
Title: Re: سندوتشاتكـ ومطوتكـ في جيبكـ (^_^)
Author: احمد التجانى احمد
Date: 12-25-2010, 02:50 PM
Parent: #85

سيم سيم ود الصايم
مبالغة يا ام حسين
ابو حسين ما بوديكم الصب واى

Post: #87
Title: Re: سندوتشاتكـ ومطوتكـ في جيبكـ (^_^)
Author: طارق ميرغني
Date: 12-25-2010, 03:06 PM
Parent: #86

Quote: متضامن مع طارق ميرغني في خجلته، مع أنو فوزية يادوبا سافرت!!

لأ والله يا عبد اللطيف يا بتاع المشاكل

انا عندي شهود وداع " علي وزن شهود اثبات"

وكووووولهم يثق بهم:

1- خالد المحرب
2- الشايقي
2- اسعد الريفي
4- صلاح هاشم السعيد عضو البورد واخ فوزيه

فوزيه سافرت في شهر نوفمبر 2010 م بس يوم كم ده بعد ما تامن علي كلامي

Post: #88
Title: Re: سندوتشاتكـ ومطوتكـ في جيبكـ (^_^)
Author: ناصر احمد الامين
Date: 12-25-2010, 03:47 PM
Parent: #87

بوست بطعم المارتديلا

تعرف يا تمبسه المشكلة ما سودانيز اون لاين ...... ديل بشاغلوك بالكلام بس

اسه انت عندك عين ترجع بيهاالحله تاني يا مان

بوست لذيذ ياخي
الله يديكم العافية و يخليكم لي بعض (دلويه و تمبسوية) طوووول العمر

Post: #89
Title: Re: سندوتشاتكـ ومطوتكـ في جيبكـ (^_^)
Author: اسماء الجنيد
Date: 12-25-2010, 03:57 PM
Parent: #88

دلوووووووووش ازيك يا حبيبة والله ليك وحشة ياخ
اها كلامي مشى وجاك ؟؟ اتذكرتيه ولا لا ؟؟
يلا بعد السعودية دي فكري اتخارجي علينا بي حسب الخطة الخماسية لوول
خطة خماسية دي يعني بعد خمسة شهور
انا طبعا جااااااااادة الدور عليك
ربنا يسعدكم والله
والشوق ليك محنة والله

Post: #90
Title: Re: سندوتشاتكـ ومطوتكـ في جيبكـ (^_^)
Author: محمد البشرى الخضر
Date: 12-25-2010, 05:05 PM
Parent: #89

أبوحسين!!!
لا حولا

أها تاني منو كمان البياخد معاه ساندوتشات مارتدلا يا ناس السعودية بنين ؟

Post: #91
Title: Re: سندوتشاتكـ ومطوتكـ في جيبكـ (^_^)
Author: ismeil abbas
Date: 12-25-2010, 06:33 PM
Parent: #90

داليا..ألأخت..كيفنك نعلك طيبة.

Quote: بس انت حدد لي نوع القنبـله .. عشان الواحد ما يجيب حاجه ساي ..

القنبلة تكون زمنية..تضبطيها مع مواعيد اكل الساندوتش وفى خشمو..ماتنسى..تقومى تضبطيها متأخر لحدى ما يرجع البيت وتنسى ....وبعدين لو ضرب قال ليك راجع أتعذرى بأى سبب عشان الفرقعة وكده.

وين الناس؟؟؟؟؟

Post: #92
Title: Re: سندوتشاتكـ ومطوتكـ في جيبكـ (^_^)
Author: ناصر احمد الامين
Date: 12-25-2010, 08:50 PM
Parent: #90

Quote: يا ناس السعودية بنين ؟

ود البشري قصدو يقول

التعوسية بنين

خطأ مطبعي .. و اللا ما كدا ؟؟

Post: #93
Title: Re: سندوتشاتكـ ومطوتكـ في جيبكـ (^_^)
Author: نجاة محمد بابكر
Date: 12-25-2010, 10:21 PM
Parent: #92

يادلوش انتى ماتأكليهو فى البيت لزوم السندوتشات الجايبة الكلام شنو

بعدين مطوة لى ماعندكم سكاكين

هوى انا برة حسع بكرى اقول دا بوست اسلحة بيضاء

وربنا اديك الهنا انتى والمعاك

Post: #94
Title: Re: سندوتشاتكـ ومطوتكـ في جيبكـ (^_^)
Author: ABUHUSSEIN
Date: 12-26-2010, 09:31 PM
Parent: #93

Quote: يا سامية ..
أنا على ثقة تامة إنك ما بتحشي ليهو ساندوتشات فول .. لانو الفول فوقو بروتين .. والبروتين بينوم الزول في المكتب

عارف يا تمبس البداية بتكون زي بدايتك دي تطلب و يتم التنفيذ..........

لي قدام بقى....... تشيل البعملوه ليك .... لو عجبك عجبك و لو ما عجبك إتصـــرف.........

علشان كدا يا صاحب عيش أيامك و إتمنى زي ما عايز........ ما دايم إلا وجه الله...........

.

Post: #95
Title: Re: سندوتشاتكـ ومطوتكـ في جيبكـ (^_^)
Author: Maawya Hussein
Date: 12-26-2010, 09:49 PM
Parent: #94

Quote: أها تاني منو كمان البياخد معاه ساندوتشات مارتدلا يا ناس السعودية بنين ؟

حسب وثائق ويكليكس ود الصائم زول عاموووود ساااكت

_____

Post: #96
Title: Re: سندوتشاتكـ ومطوتكـ في جيبكـ (^_^)
Author: ساميه حامد
Date: 12-26-2010, 09:55 PM
Parent: #94

Quote: مبالغة يا ام حسين
ابو حسين ما بوديكم الصب واى

يا احمد يا اخوي الشئ ده بصرفوا وين يعميني فيو

عاد يا ابو حسين إتلومت تاني ياك الماشي المدرسة هي قصدي الشغل بدون الكيس

Post: #97
Title: Re: سندوتشاتكـ ومطوتكـ في جيبكـ (^_^)
Author: ناصر احمد الامين
Date: 12-26-2010, 10:04 PM
Parent: #96

يا ابوحسين ياخي اتصلح معانا بعدين البوست دا كلو مارتديلا و حنية ياخي .... مالك علينا ؟.؟

Post: #98
Title: Re: سندوتشاتكـ ومطوتكـ في جيبكـ (^_^)
Author: إدريس محمد إبراهيم
Date: 12-27-2010, 08:48 AM
Parent: #97

د. داليا والعزيز تامبا أسعد الله ايامكما وألف حمداً للسلامة مرة ثانية ....
عارفين يا جماعه تامبا ده من حقو يا جماعه يطلب ما يشتهيهو ياخي الراجل دهزمن عاش عزابي ما شويه ... ومعتمد علي Take Away ,h وحلل القطر قام ....وبالمناسبه أصحابو المقربين جداً ناس يوسف (أبو وجيده) صديقي العزيز جداً الغائب عن المنبر بيقولوا الزوول ده أحسن واحد يضبط ليك صواني السمك بالفرن حاجه كده لمن تعرف حاجه زاتو .. آمل أن تستفيد د. داليا من هذه الخبرات التراكميه ... وصدقيني ما حتندمي ...

أنا يا جماعه عادة أقوم الصباح بعد صلاة الفجر أصحي معاذ الصغير وأمو .. يللا يقوموا يجهزوا لينا الفطور مع كباية الشاي الساده
(أصلاً شاي اللبن ده مخاصمو التقول بعاتي بس..)
وكباية الحليب لمعاذ ... وبعد المراجعه الصباحية أصطجب الولد للمدرسة ومنها للمكتب طوالي ... طبعاً البرنامج ده ما بطال معاي .. لكن أيام الخميس طبعاً المدارس في إجازه ..
ويقوموا يفطوني ليك عدييل كده .. عادي يا عمك ... بمر على بوفيه الاسكندرسه جماعه مصريين كده جمب الدفاع المدني في شارع الوشم يا تامبا بيعملوا سندوتشات عينه .. اشتري السندونتش واطبقوا معاي للمكتب ... المصري ابن الذين لاحظ إني لا أحضر إلا أيام الخميس .. مره سألني ليك ياأستاذ إنت ليه ما بتعدي علينا بقية الأيام وما بتشرفنا إلا يوم الخميس ... (قربت أقول ليهو بكون صايم الأيام ديك ) .. لكن اتصرفت وقلت لا أبداً بس لأن الخميس الشوارع فاضيه بعدي عليكم عادي ... وكذلك الحال أيام الإجازات الطويله للمدارس ....

دحين يا دكتوره أتمنى من الله بما إنك ما شاء الله تمتلكين خبرات طبيه واسعة أن يتم التحاقك قريباً بأحد المستشفيات الكبيرة .. مستشفى الملك فيصل التخصصي مثلاً أو الحمادي .. أو حتى م. دله .. وعادي أيام كده تكوني ماسكه في النوبات الليليه .. يالله عربية المستشفى توصلك قدام الشقه مع وقت خروح زميل البوض ده ... عشان عادي يتصرف ويفتش ناس بوفيه الاسكندريه ديلاك ...
كمان عارفو زول تفتيحه .. يقوم يقول ليك يا دكتوره .. شوفي بالله كده ما معانا .. من بالليل تجهز لي سندوشات المارتديلا وملحقاتها ديك البيعرفها براه ... في التلاجه ... وما تنسي المطوه والكيس الأصفر ...

يارب يحقق لكم كل الأماني التي تحلمون بها ويجعل أيامكم سعادة سرمدية ... وأفراح لا تعرف لها الأحزان سبيلاً ....

خالص تحياتي وتقديري ؛؛؛؛

Post: #99
Title: Re: سندوتشاتكـ ومطوتكـ في جيبكـ (^_^)
Author: tmbis
Date: 12-27-2010, 09:05 AM
Parent: #98

..
الحمد لله .. الاتصال العند زميلة البورد ليهو فترة مقطوع .. الحمد لله
واعتقد القطعة دي .. ما بترجع إلا بعد الارشفة .. لانو بي صراحة كدا .. كلمته الفلبيني العندو الاتصال قلتو ليهو في مستخدم قاعد يدخل الشبكة بتاعتك دي وعامل لي قلق ..
واعتقد إنو ما بترجع إلا بعد الارشفة ..
لذلك بكري يجتهد معانا ويارشف بي سرعة .. عشان البوست دا يغطس
في هذه الاثناء .. حقو تشوفو موضوع .. (عمود) ود الصايم .. وبيرقر أبو حسين وساندوتشات الكبدة الاسكندرانية بتاعت إدريس ..

غايتو الحمد لله .. لكن دا بوست خاذووووق .. خاذوق كبير جدا .. أخذق بوست مما عملو البورد دا

Post: #100
Title: Re: سندوتشاتكـ ومطوتكـ في جيبكـ (^_^)
Author: عبد اللطيف السيدح
Date: 12-27-2010, 09:28 AM
Parent: #98

Quote: داليا وتمبس مشتاقين والله ,, إنشاء الله ربنا يفرحكم دائما ,,
تحياتى ,, وأبقوا عشره