Post: #1 Title: ماعندك تسعه مليار .. نحن عارفين ! Author: Amany Elamin Date: 12-19-2010, 06:42 AM
ولا يهمك .. واثقين منك ..
تسعه مليار؟ وبالدولار كمان؟ لا لا لا .. الناس ديل كذّابين وملفقين وعايزين يشوهو سمعتك أكيد .. نحن واثقين إنو ما عندك تسعه مليار, تسعه مليار بي وين؟
تسعه مليار من وين؟
Post: #2 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 06:45 AM Parent: #1
إنت لو عندك تسعه مليار بتخلّي البت سلمي؟ اَاَاَاَي البت الساكنه في الحله الجنبنا؟ البت القالو كل يومين بوكسي النظام العام قابضها وناس قدو قدو جالدنها, معقول كان تخليها تصل للوصلت ليهو ده وإنت في جيبك أقصد في بنوك بريطانيا عندك تسعه مليار؟ أصلو البت يوم كانت عايزه تدفع رسوم الجامعه, كلها متين ألف, البت قالو شاطره وبتقرأ في جامعه الحكومه, سألت أبوها نهرها قال ما عنده, أبوها عامل في ورشة العربات مسكين ومابيقدر يقرّي الأولاد, قالت ليهو الليله اَخر يوم لدفع الرسوم, نهرها وسمّع الحله كلّها, سبّ ليها ولأمها وللزمن وللسودان ! ومشي تكّل مع الشُلّه, حشش وسطل وإتناول كل ما من شأنه إذهاب العقل ببضع جنيهات متسخه خبأها من أم العيال لزوم المزاج, ده كله عشان ما يتذكر سلمي والأولاد وعيشة الأولاد ورسوم الأولاد والتسعه مليار !! تصدق جاتهم كشه في صمة خشمهم وإتجلدو زي الما حاصل حاجه؟
أهو الشريعه في حتات زي دي بتشتغل, تسطل تسكر تتجلد, لا شيشه لا تمباك, لا تسعه مليار !! دولار!!
أها البت ليها تلاته سنين كل سنه تحاول تدفع الرسوم وتمتحن زي باقي الدفعه, أبوها يعجز, ولا تدفع لاتمتحن, لا تأكل لا تلبس, لمن بارت ليها بنات وروها تجيب حق الإمتحان كيف ومن وين, وصرفت علي أبوها السطلنجي وأخوانها الصغار وأمها الصابره,
وإنت عندك تسعه مليار !! دولار !! ما ممكن !! قلت ليك الناس ديل كذّابين وما بيعرفوك ..
Post: #3 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 06:52 AM Parent: #2
قلت ليهم ماعندك تسعه مليار, يعني معقول يكون عندك تسعه مليار !! دولار !!
كان أقلّها لو عندك القروش دي حاجه سكينه جارتنا ماكان ماتت, صاح؟ الحاجه من قالو ليها عندك سرطان وعايزه عمليه ودواء شئ كيماوي وشئ إشعاعي, وهي شايله ورقها حق الكشف والعمليه ولافّه بيهو, خلت كفتيرة الشاي الكانت جايبه ليها عيشة اولادها وبقت من بص لي بص تفتش في حق العلاج, ما خلّت ديوان زكاه ولا خلّت مؤسسه خيريه ولا رجل بر وإحسان إلّا ووقفت قدامهم, حق الدواء, حق العمليه, حق السفر, حق العلاج, هي قادره علي حق الأكل والشراب لما تباري ليها جلسات علاج ودواء وكمان عمليه؟ هي قادره علي ركوب المواصلات لمن تركب الطياره؟ غايتو بي جاي بي جاي لمّت ليها فِرِد مليون !!!!!!! يادوب كفّا حق العزاء والصيوان وشاي البِكاء لمن ماتت !! والكفن البقا بقروش وبيعلنو عنه باليافطات السمحه في شوارع الخرطوم,
هسي إنت سكينه وناس سكينه الحيلهم إتهدا في مستشفي السرطان, كان عندك تسعه مليار ما بتصرف عليهم كلهم وتعالجهم, ماك جعلي كمان؟ حرّم تعالجهم من السرطان والملاريا ومن حراق الروح زاتو!
قلت ليهم ما عندك تسعه مليار !! دولار !!
Post: #10 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 07:12 AM Parent: #3
لو عندك تسعه مليار أولاد جيراننا كانو هسي من أوائل الشهاده أنا عارفه !!
اليوم داك أولاد جيراننا العمرهم مافات الطاشر سنه, لقيتهم في السوق, شغّالين عتّاله !! الأولاد كانو الصباح بيشيلو شنطتهم وفطور المدرسه ويمشوا يقيفو في الطابور ! أمّهم مرقتهم من المدرسه من أبوهم مات -الله يرحمه- عشان ما قادره علي مصاريفهم, من فطور المدرسه وطابور الصباح والجزمه والشراب, بقوا حياتهم مع السليسيون وكلام الراندوق وبضع قروش معدنيه لاتدفع حق الإيجار ولا تمنع من الديون !! ونسوا كتاب المدرسه .. أخدوها من قاصرها وملوا راسهم بالمفيد !! البلد راجيه منهم شنو وهم مالاقين ياكلوا؟ وهم راجين شنو من بلد حكومتها ما قادره تقرّي وتعالج وتأكل شعبها !!
بعد ده يقول عليك عندك تسعه !! مليار !! دولار !!
كـــــــــضب الســــــــــــواد !!
--- تنويه: الشخصيات أعلاه لا تمت بصله سوي بخيال كاتبها !! بله موسي عدّل مداخلتك الاولي لو سمحت !
Post: #4 Title: Re: ماعندك تسعه مليار .. نحن عارفين ! Author: Balla Musa Date: 12-19-2010, 06:55 AM Parent: #2
يا أمانى سلام
هل إنتهت مرحلة فضح البنت وبدأت مرحلة فضح أسرتها؟
ياخى كلامك دا زى كلام الطيب مصطفى و عايز منك شوية انتباهة!
Post: #5 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 07:02 AM Parent: #4
بله موسي !!
البت منو؟
القال ليك منو أنا بتكلم عن فتاة الفيديو أصلا !!!!!!! والقال ليك منو أنا عندي معلومات عنّها !!!!!!
شئ عجيب !!!
Post: #7 Title: Re: ماعندك تسعه مليار .. نحن عارفين ! Author: سامي صلاح محمد Date: 12-19-2010, 07:07 AM Parent: #5
بت الأمين سلامات
بردتي بطني و ختيتي في قلبي اليقين
لأني عارفك بتجيبي اللكيدة
بعدين عليك الله كلمة فتاة الفيديو دي ما تستخدميها بتجيب لي حراق الروح القلتيهو فوق دا
دي كلمة زرعوها الجماعة ديل عشان يقللوا من كمية التعاطف باستخدام كلمة زي دي
إنت عارفة انو الخلفية الذهنية مرسوم فيها الكلمة دي مع فتاة الإعلانات و فتاة الما عارف شنو
و لمن واحد كدا استخدم كلمة الجانية أنا كنت مصر أستخدم كلمة الضحية (ضحية إنتهاك حقوق إنسان) لأنو البوينت مش إنها عملت شنو البوينت هو اتعمل معاها شنو
تسلمي لي يا بت أمي
Post: #27 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 11:03 AM Parent: #7
سامي صلاح,,
Quote: بردتي بطني و ختيتي في قلبي اليقين لأني عارفك بتجيبي اللكيدة
لا إتطمن أبوي, زولنا ده ما عنده مايبهتوهو ساكت,
ياقول حبوبتي الله يرحمها الله يكفينا شر البهيته ..
Post: #9 Title: Re: ماعندك تسعه مليار .. نحن عارفين ! Author: Mohd Ibrahim Date: 12-19-2010, 07:12 AM Parent: #5
اماني لمست واقع حياتي ويومي بسرد جميل ومبسط....فعلا معظم المشاكل والجرائم تبدأ من الفقدان لابسط الحاجات ومقومات الحياة الاساسية....واصلي نحن سامعين حروفك
Post: #28 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 11:17 AM Parent: #9
القال ليك منو أنا بتكلم عن فتاة الفيديو أصلا !!!!!!! والقال ليك منو أنا عندي معلومات عنّها !!!!!!
شئ عجيب !!!
دكتور بله : معليش ياريت ادوك قرشك اظن اماني بتتكلم عن واحدة من بنات تراجي
دكتور بله والشاعره اماني حزمة اعياد سعيده
Post: #6 Title: Re: ماعندك تسعه مليار .. نحن عارفين ! Author: Balla Musa Date: 12-19-2010, 07:04 AM Parent: #4
أو تنويه أن هذه بنت أخرى وقدو قدو آخر!
ماحبيت أقتبس المداخلة عشان أديك فرصة تعدليها.
Post: #8 Title: Re: ماعندك تسعه مليار .. نحن عارفين ! Author: Balla Musa Date: 12-19-2010, 07:08 AM Parent: #6
Quote: البت منو؟
القال ليك منو أنا بتكلم عن فتاة الفيديو أصلا !!!!!!! والقال ليك منو أنا عندي معلومات عنّها !!!!!!
شئ عجيب !!!
يا أمانى البعرفو من متابعتى للموضوع أن البنت الحرف الأول من إسمها س.. وجلدا قدو قدو.
مافى أى حاجة عجيبة فى كلامى!
Post: #11 Title: Re: ماعندك تسعه مليار .. نحن عارفين ! Author: حمور زيادة Date: 12-19-2010, 07:19 AM Parent: #8
بوست ممتاز و يحمل السخرية مع الحزن الأصيل. واصلي يا أماني.
ــــــــــــــــ دكتور بلة أظنك المره دي خانتك القراية للأسف .. لم أجد أي اشارة لفتاة الفيديو في البوست الا في مداخلتك .. واضح ان امني تتحدث عن فساد الدولة و فقر الشعب بكل أشكاله. هذه صور قلمية واضحة الخييل و لا أظن ان هناك جارات بهذه الاسماء عند اماني. عليك النبي ما تخرب للبنيه مزاجا خليها تكتب بمزاج. الرسول فيك كان تكاجرا.
Post: #14 Title: Re: ماعندك تسعه مليار .. نحن عارفين ! Author: Balla Musa Date: 12-19-2010, 07:24 AM Parent: #11
Quote: عليك النبي ما تخرب للبنيه مزاجا خليها تكتب بمزاج.
غايتو ياحمور رغم أنك محكوم عليك بخدش الحياء العام..ههههههه وتحوير اللغة النوبية.. لكن سمعا وطاعة ولو قلت المداخلتين نسحبم مافى مشكلة.
Post: #12 Title: Re: ماعندك تسعه مليار .. نحن عارفين ! Author: احمد محمد بشير Date: 12-19-2010, 07:23 AM Parent: #8
بلة موسي يا مثبط الهمم!! خلي اماني دي تواصل, وبعد داك تعال أستفسر وانتقد!!
Post: #13 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 07:23 AM Parent: #8
يا بله موسي ! تصدق ما عندي فكره إنه البت أول حرف في إسمها (س) !!!!!!!
وقدو قدو أصبح رمز للجلاد أوهكذا يتم إقتباسه !!
بعتذر لأي تطابق ما عندي عنه فكره أصلا ! أنا البيخليني أصحي الصباح متذكره الحرف الأول من إسم البت شنو؟
ثبّت أكتر من مره إنه البت بتاعة الفيديو دي -معليش ياسامي- هي منو وللا عملت شنو ما بغير شئ في القضيه, البت ضحيه لجلاد جاهل وقانون شريعة الحكومه النصه: (إذا سرق الضعيف) !!
بعدين ما ممكن أنا قاعده أثبّت في الكلام ده في بوستات ناس ميّاده وغيرها وإنت جايي تقولو لي هنا !!!!!!
وكمان مشبّهني بالطيب مصطفي؟
Post: #15 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 07:28 AM Parent: #13
حمّور عرفت كيف؟ مزاجي إتخرب خربة عدوك :( خصوصا إني بكتب من الرأس للكراس وما بعمل درافت ..
شكرا ياصاحب,
راجعه بعد شويه يمكن المزاج يتعدل وأواصل,,,
Post: #17 Title: Re: ماعندك تسعه مليار .. نحن عارفين ! Author: ahmed haneen Date: 12-19-2010, 07:31 AM Parent: #15
Post: #19 Title: Re: ماعندك تسعه مليار .. نحن عارفين ! Author: حمور زيادة Date: 12-19-2010, 07:38 AM Parent: #16
محاولات بلة موسى الواضحة لاغتيال شخصيتي معلوم تماما اسبابها و محركيها .. و اتصالاته بالمدعو أمين محمد سليمان لم تكن خافية عليّ.
ـــــــــــ انت يا بلة تضرب لأمين يقول ليك أنا في القاهرة ما تفكر ساي تقول ليو سلم على حمور ؟ ياخي عيب .. ده بياكل عندي.
Post: #20 Title: Re: ماعندك تسعه مليار .. نحن عارفين ! Author: Balla Musa Date: 12-19-2010, 07:42 AM Parent: #19
Quote: انت يا بلة تضرب لأمين يقول ليك أنا في القاهرة ما تفكر ساي تقول ليو سلم على حمور ؟ ياخي عيب .. ده بياكل عندي.
محاولات حمور لحرف البوست لاتخفى على أحد..
ياخى معليش لكن تصدق أنا زاتى اتخلعت لما لقيت الزول برد من القاهرة.. وطبعا الوقت مزعج وانا جنى وجن اتصل على زول فى وقت مزعج.
Post: #30 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 11:22 AM Parent: #20
د. بله حصل خير,,
أخوانا أحمد محمد بشير أحمد حنين ,,
تسلمو علي التشجيع,, وعلي المتابعه ,,
Post: #21 Title: Re: ماعندك تسعه مليار .. نحن عارفين ! Author: Ashraf el-Halabi Date: 12-19-2010, 07:46 AM Parent: #16
يا أماني الكتابة دي بتشبه ثنائية أحمد رجب ومصطفى حسين أيام فلاح كفر الهنادوة والواد ابن أبو سليم أبو لسان زالف هيييه، أيام!! ويجعله عامر
Post: #22 Title: Re: ماعندك تسعه مليار .. نحن عارفين ! Author: عمران حسن صالح Date: 12-19-2010, 08:48 AM Parent: #21
الكتابة الساخرة وذكية هي رسالة كل الناس انتي كتبتيها بطريقة تفكيرهم البرئ والساذج هي الأسئلة التي تدور ، باعتبار رمز الشهامة المعروف عندنا بعيداً عن ساس يسوس ودي فكرة التعرية الجميلة الموجودة بين الحروف ودي رسالة بتقول يا اخوانا خلونا من حرَم وبطيخ ، ده يا هو الحاصل
شكراً أماني
Post: #23 Title: Re: ماعندك تسعه مليار .. نحن عارفين ! Author: أحمد ابن عوف Date: 12-19-2010, 09:32 AM Parent: #22
شكرا يا اماني على هذه الكتابة واصلي
Post: #24 Title: Re: ماعندك تسعه مليار .. نحن عارفين ! Author: Amany Elamin Date: 12-19-2010, 10:31 AM Parent: #23
أها يا أهلنا الراجل ده ما تندرعوا فوقو ساكت, قلنا ليكم ما عنده قروش !!
شايفه الجماعه في بوست بهناك قاعدين يقسمو فيها متين وخمسين .. متين وخمسين دولار !!!!!!!! وعثمان رغيم بهناك حسب لينا عيلتو كلها وبقوا في القروش كم ويتقسموها كيف !!
سجمي !! الراجل كان عنده تسعه مليار!! دولار !! ماكان صلّح الظلط !!!!! اَاَاَاَي الظلط الفي الحله هناك في الجزيره .. ما الظلط ده ليهو 20 سنه فيهو حفره قدر ثقب الاورزون؟ وما الحفره دي ما خلّت لها زولاً ماشي ولا غاشي الّا لزمتو الجابره ولحقتو الزينين؟ يوم 15 شعبان القريب ده حاج أحمد كان صايم وفجأتن كدي جا واقع كاضم, ناس البيت جرو بو المستشفي في الخرطوم يطلّع في الروح, أها ناس الحله كلللللللهم لبسو عممهم وجلاليبهم والنسوان إتلفحن بالتياب ولحقوهم, قالوا الراجل كان أدّي الروح يحضروهو, وكان كتبولو عمليه يقيفوا مع ناس البيت في محنتهم وياَزروهم .. أها راجعين بالليل بعد إتطمنّو علي حاج أحمد البص إتقلب بيهم بسبب الحفره وإتحرق, وقت الحادث حصل ناس الحله فتّشو لعربية إسعاف تنقلهم أقرب مستشفي ما لقوا !!! ولا لقوا أقرب مستشفي زاتها !!!! غايتو النسوان فرزوهم بدهبهم, كل زول عرف امه وللا مرته!!!! الرجال دفنوهم ساكت باللسته زول فرزوهو ما في !!!
أها قالوا الراجل البهتوهو بالتسعه مليار فوق ده جاء رفع فيهم الفاتحه, والنصيحه لي الله كان متأثثثثثثر, وقال لو ما العين بصيره والإيد قصيره كان بني ليهم ديك يالمستشفي في بطن الحله, وكان وقف ليهم عربيتين إسعاف في باب المستشفي, وكان ردم الحفره وصلّح الظلط !!!
ناس الحله قالوا لو عارفينك ما بتقصر تب !! إلّا القروش خايناتنك! ونحن زاتو عارفين الحفره دي مسكونه ! بالليل الشياطين بيمرقو يعتّرو للبني اّدمين ! بس كان قدرت جيب لنا شيخاُ كارب للشياطين ديل وتكون ماقصرت ! أها عمكم رسّل ليهم الشيخ ,, الشيخ قال ليهم البلد دي شياطينها طلعت إجازه ومشت تصيّف في هونولولو صلحو ظلتكم ساي!!
نسيت أقول ليكم حاج أحمد بقي طيّب الّا ما فاضي من المعزا في ناس البص ..
أها بعد ده كلللللللو تقولو الراجل عنده تسسسسعه مليار !! دولار !!
يا أمانينا الصديقة الرئيس ماعندو قروش، "الناطلح" الرسمي بإسم الدولة كمال عبيد قال: الرئيس يستعين بإخوته لقضاء كثير من الحوائج الخاصة، فتأملي! معقولة يكون عندو تسعة مليار ويشحد أخوانو؟ ممكن يغشنا نحن المساكين، كما غشنا أول مرة- أذهب أنت للقصر وأنا للسجن-، ولكن لا يمكن أن يخدع إخوته.. __ من المحزن حقاً يا أماني، كل القصص الخيالية التي تناولتيها، هي قصص حقيقية لها أبطالها في الواقع، وأينما سرح خيالك وذهب قلمك، ستكون هنالك مطابقة لقصة حقيقة لشخص حقيقي مسؤول عنه عمر، لأنه ليس فقط تركه بدون علاج وتعليم، لأنه سرق أو ترك الذين سرقوا حق التعليم وحق الصحة من هذا المحتاج..
Post: #25 Title: Re: ماعندك تسعه مليار .. نحن عارفين ! Author: مريم بنت الحسين Date: 12-19-2010, 10:31 AM Parent: #23
رائعة يا أماني... شكرا
Post: #26 Title: Re: ماعندك تسعه مليار .. نحن عارفين ! Author: lana mahdi Date: 12-19-2010, 10:56 AM Parent: #25
يا أماني ما عندو مسيكين ما عندو ظالمين الراجل ظلم الحسن والحسين!!!!!!!!!!!!! بوستيك روووووعة وذكي بالجد عجبني محبتي وتقديري لنا
Post: #29 Title: Re: ماعندك تسعه مليار .. نحن عارفين ! Author: سارة علي Date: 12-19-2010, 11:18 AM Parent: #26
اماني... أحييك علي المسجات الفي الصميم... أدناه جزء من خطاب الرئيس بمناسبة العيد الرابع والثلاثين لاعياد الاستقلال بهل ليهو كمية من الوعود ما طبيعية ... حكمة الله نفذ عكسها تماماً ____________ إن الثورة سترفع في عامنا هذا شعار القدوة الحسنة عفة في اليد واللسان . . وسلامة في الصدر . . وعدلاً ومساواة بين الناس في الحق والواجب ولنا في رسول الله صلي الله عليه وسلم المثل الأعلى . . (لقد كان لكم في رسول الله أسوة حسنة لمن كان يرجو الله واليوم الآخر وذكر الله كثيراً) كما أنني أدعو المسؤولين في كل مواقع المسئولية ، وكل الأقاليم إلى أن يكونوا القدوة الحسنة التي تتبع . . وأن يعملوا على غرس قيم الفضيلة في المواطنين واستقامة سلوكهم والتزامهم جانب الحق والعدل . . وتطبيقاً لتلك المعاني ، فسيشهد احتفالنا هذا بدء نفاذ قانون الثراء الحرام ، وسأبدأ بنفسي وأخوتي في مجلس الثورة والوزراء التوقيع على إقرارات الذمة عقب هذا الاحتفال ، وسنلزم به كل قيادي . . وسنتابع بحزم كل مظاهـر الثراء الحرام المشبوه حتى نوفر مناخاً سياسياً واجتماعياً طيبا ، ومعافى من كل أدران الفساد ، ومظاهر الانحراف . . ولقد شهد الجميع جدية الثورة وصرامتها في إنفاذ التشريعات والقوانين التي تصدرها . . وقد استبان الصبح ، فلا مكان بعد اليوم في مواقع المسؤولية لمرتش أو فاسد أو محابي مهما طالت قامته . . أو علت به رتبته .
_______________ علقي انتي .....
Post: #33 Title: Re: ماعندك تسعه مليار .. نحن عارفين ! Author: عبدالكريم أحمد الامين Date: 12-19-2010, 11:40 AM Parent: #29
** بت الامين "امانى".. ** مساءك خير.. ## نكأتى جراح الغلابه الذين تم تضليلهم بإسم الدين.. ** ومن أتى الى السلطه فقيراً صار ثرياً يتحدث بالملايين وقيل فى رواية أُخرى بالمليارات وصارت لهم عِزب وحارات .. ## ويظل الفقراء والمساكين تلهب سياط الفلاء ظهورهم ومن لم يجلده الغلاء والعناء والمرض والفاقه والعوز سوف يُجلد بقانون العذاب العام.. ## مشكوره بت الامين على هذا الإبداع الساخر .. (ودام الود بين الجميع) (ابو محمد فؤاد)
Post: #47 Title: Re: ماعندك تسعه مليار .. نحن عارفين ! Author: Amany Elamin Date: 12-21-2010, 07:23 AM Parent: #33
سعادة المستشار (أبو محمد فؤاد),,
Quote: ويظل الفقراء والمساكين تلهب سياط الفلاء ظهورهم ومن لم يجلده الغلاء والعناء والمرض والفاقه والعوز سوف يُجلد بقانون العذاب العام..
ولما الناس تحتج وتطالب بتحقيق عادل في قضيه واضحه, يقول ليهم: التحقيق في شنو؟ !!!!
معذره علي تأخير الرد, وشاكره قراءتك وتعقيبك,,
Post: #48 Title: Re: ماعندك تسعه مليار .. نحن عارفين ! Author: Amany Elamin Date: 12-21-2010, 07:27 AM Parent: #47
Quote: وتطبيقاً لتلك المعاني ، فسيشهد احتفالنا هذا بدء نفاذ قانون الثراء الحرام ، وسأبدأ بنفسي وأخوتي في مجلس الثورة والوزراء التوقيع على إقرارات الذمة عقب هذا الاحتفال ، وسنلزم به كل قيادي . .
أها شفتو؟ هو من ما قال الكلام ده نحن إرتحنا وما شغّالين بكلام الحاسدين, يجوا العدو والحاقدين المغرضين يكذّبو ويبهتوهو, الراجل ما عنده يا أخوانا .. ما عندووو والجماعه المعاهو ديل واقف ليهم في حلقهم وما مخليهم أصلو يشيلو حاجه من المال العام., لي بيوتهم وأرصدتهم متابعها بنفسه وحاميهم يدخلو عليهم قرش ولا تعريفه من مال الشعب, الناس ديل عندهم كشه عديييل, ومباغتات ومداهمات, وتحقيق وشيل حس في البرلمان, والعايز يقلعو كرسيهو ويرموهو في السجن, ما يسمع الكلام الفوق ده وعينه تزوغ علي قروش الغلابه, السجن .. السجن .. كمان زولنا بيلعب؟ وللا بيقول كلمه ما يعملها؟
شكرا يا سروره علي دعم البوست ورفده بالأدله,
تسلمي,,
Post: #31 Title: Re: ماعندك تسعه مليار .. نحن عارفين ! Author: كمال ادريس Date: 12-19-2010, 11:23 AM Parent: #26
قضية الفتاة يجب ألا تموت
واصلي يا أماني
Post: #32 Title: Re: ماعندك تسعه مليار .. نحن عارفين ! Author: Hassan Senada Date: 12-19-2010, 11:31 AM Parent: #31
شكرا الاستاذة امانى واصلى
Post: #34 Title: Re: ماعندك تسعه مليار .. نحن عارفين ! Author: ياسر بيناوي Date: 12-19-2010, 11:46 AM Parent: #32
Quote: من المحزن حقاً يا أماني، كل القصص الخيالية التي تناولتيها، هي قصص حقيقية لها أبطالها في الواقع، وأينما سرح خيالك وذهب قلمك، ستكون هنالك مطابقة لقصة حقيقة لشخص حقيقي مسؤول عنه عمر، لأنه ليس فقط تركه بدون علاج وتعليم، لأنه سرق أو ترك الذين سرقوا حق التعليم وحق الصحة من هذا المحتاج..
دون شك ياصديق, وفي الـ من الفظاعته لا يخطر علي قلب بشر, بلدنا دي الوجع فيها بالكوم, والحزن كيمان,,
الله يدينا خيرها,, ويصبرنا,,
الحبيبات مريم بت الحسين ولنا مهدي, شاكره جدا لمتابعتكم وتشجيعكم للمواصله, وممتنه جدا لقراءتكم لما أكتب, تسلمو يا حبيبات :)
Quote: هي الأسئلة التي تدور ، باعتبار رمز الشهامة المعروف عندنا بعيداً عن ساس يسوس ودي فكرة التعرية الجميلة الموجودة بين الحروف ودي رسالة بتقول يا اخوانا خلونا من حرَم وبطيخ ، ده يا هو الحاصل
يعني ياعمران الزول في طريقه للعمل بيغمض عيونو عشان ما يشوف البؤس العلي الطرقات, هموم يحملها الماره, وهموم أقعدت البعض علي الرصيف,
يا أشرف ياحلبي,, شكرا علي التشبيه مع الناس الكتّابين ديل,, كفر الهنادوه عديل كده ! :)
--- ولو إنه الناس ديل مصريين وإنت عارف موضوع الحساسيه
Post: #38 Title: Re: ماعندك تسعه مليار .. نحن عارفين ! Author: عمر عشاري Date: 12-19-2010, 12:30 PM Parent: #36
Quote: من المحزن حقاً يا أماني، كل القصص الخيالية التي تناولتيها، هي قصص حقيقية لها أبطالها في الواقع، وأينما سرح خيالك وذهب قلمك، ستكون هنالك مطابقة لقصة حقيقة لشخص حقيقي مسؤول عنه عمر، لأنه ليس فقط تركه بدون علاج وتعليم، لأنه سرق أو ترك الذين سرقوا حق التعليم وحق الصحة من هذا المحتاج
