Post: #1
Title: بســافِر مِنكـ ... وليكـ
Author: محمد الجيلى
Date: 12-16-2010, 08:27 PM
Parent: #0
بســـافِر:
مِنكـ ... وليكـ
وبسوق خطواتي عليكـ تِرحال
بتسرِّب جوة مسامكـ مي
وبتسارق فيكـ سُقيا وتحنان
بســافِر فيكـ حرف وإيقاع
وبطوّع قافية وأراقص الليل
أفتّش فيكـ! ليكـ الكلمات
أهديكـ شِعر مليان آيات
بســافِر مِنكـ ... وليكـ
وأرسم عُمركـ نجمة سعد
تضوي شوارع سفري إليكـ
وتســافِر بي سنين ضوئية
تطوّفني العالم والأفلاكـ
وأرجع ليكـ ...
|
Post: #2
Title: Re: بســافِر مِنكـ ... وليكـ
Author: محمد الجيلى
Date: 12-16-2010, 08:46 PM
Parent: #1
بعاتب فيكـ!
بعاتب بُعدكـ عني سنين
ما الشوق حرّاق زي لهب النار
سافرتي هنـآكـ شِلتي الأفراح
بيناتنا بلود تتلوها بلود
لا شوفة تدغدغ للإحساس
لا نفحة عطر تحي الأزهار
لا رِفقة معاي في وعر الدرب
لا يد بتهدهد للألآم
سافرتي هنآكـ وقطعتي الحِس
وليلي بلاكـ أنين وسهر
ماتعودي خلاص من سفر الهجر
خليني أعود أفرح بالدُر
أنا ملّيت من وجعي البي
من وجع البُعد:
الديمة متاور
ساب فيّ أثر
|
Post: #3
Title: Re: بســافِر مِنكـ ... وليكـ
Author: محمد الجيلى
Date: 12-16-2010, 09:32 PM
Parent: #2
يا بنية كفـاكـ من سفر الهجر
عيديلي الكان نسيني عُمر
صبري خلاص زاد وإتدفق
وقليبي تعب من ضوق المُر
الجفن محارب ذاكـ الجفن
ماراضي يعانق حتي الفجر
والروح تشتحتف لي شوفتكـ
ماإعتادت منكـ هذا الفر
جرفيّ الفرهد بيكـ ذات اليوم
ترابو نِشف من نار الحر
مُحتاج سُقياكـ مُحتاجكـ مي
شأن يرجع ليكـ أخضر مُثمر
ســافرتي هِنــاكـ!
يا بينة كفاكـ ماتعودي خلاص
عيديلي عُمر صُبيني مطر
شأن أرجع:
أســافر مِنكـ ... وليكـ
|
Post: #4
Title: Re: بســافِر مِنكـ ... وليكـ
Author: محمد الجيلى
Date: 12-17-2010, 07:21 AM
Parent: #3
بســافِر مِنكـ ... وليكـ
سفر المُحتاج لظِلال رمشيكـ
شأن أرجع تاني وزي أول!
نايم مُطمن في جفنيكـ
لا نار في الصي تشوي الأقدام
لا سِكة بتبعد من عينيكـ
ســافرتي هنـاكـ يا سِت القلب
وشلتي معاكـ كُل الألحان
سرقتي حروفي الكُلها ليكـ
فارقتي المرسم والألوان
لا دُعاش في الفجر يحي المُشتاق
لا لمسة يد توهب تِحنان
سافرتي هناكـ! وأنا مُستني
ماتعودي كفاكـ زيلي الأوهان ...
|
Post: #5
Title: Re: بســافِر مِنكـ ... وليكـ
Author: SHIBKA
Date: 12-17-2010, 08:30 AM
Parent: #4
حـــــضور
|
Post: #6
Title: Re: بســافِر مِنكـ ... وليكـ
Author: محمد الجيلى
Date: 12-17-2010, 09:15 PM
Parent: #5
مشكورة شِبكة على الحِضور
إمتناني
|
Post: #7
Title: Re: بســافِر مِنكـ ... وليكـ
Author: محمد الجيلى
Date: 12-17-2010, 09:26 PM
Parent: #6
سفرِكـ يا بنية عليّ جد طــآل
خلاني حزين من دون أختار
سفرِكـ يا حبيبة عليّ قاسي
والبرد شديد عايزلو دثار
وأنا بين نارين ضايع مجبور!
نار الشوق الليها فحيح:
وجليد الوحدة الزي النار
سافرتي هِناكـ وأنا بين الموج!
ضايع متخبط في التيار
الموج بلاطم فيني ألم
والحيل إنهدّ على البحّار
لا لي أعود وأرجع للبر
لا لي أواصل في المشوار
وحيد حيران في نُص الخلق
بمشي ومتخبط زي مُنهار
والشوق وسـواس:
ولي زي إبليس!
في كل وقت طنطان ثرثار
وريني هواكـ شِن أعمل فيو!
ضيّعني معاو
ودرنـي ودار
خلاني بسأل في الخُلقان
لا بفرز ليلي من الإعصار
ماتعودي إليّ:
وكفاكـ يا هوووووووي
الفِجّة خلاص ستّفها غبار
|
Post: #8
Title: Re: بســافِر مِنكـ ... وليكـ
Author: عفاف أبو حريرة
Date: 12-17-2010, 10:31 PM
Parent: #7
بعاتب فيكـ!
بعاتب بُعدكـ عني سنين
ما الشوق حرّاق زي لهب النار
سافرتي هنـآكـ شِلتي الأفراح
بيناتنا بلود تتلوها بلود
لا شوفة تدغدغ للإحساس
لا نفحة عطر تحي الأزهار
لا رِفقة معاي في وعر الدرب
لا يد بتهدهد للألآم
جميل
|
Post: #9
Title: Re: بســافِر مِنكـ ... وليكـ
Author: محمد الجيلى
Date: 12-18-2010, 06:29 AM
شُكراً أُستاذة عفاف على المرور والتعبير
تقديري
|
Post: #10
Title: Re: بســافِر مِنكـ ... وليكـ
Author: محمد الجيلى
Date: 12-19-2010, 05:01 PM
Parent: #9
وما كُنت أدري بأن البوح قاتلي!
أيُقتل بوّاح بسِرِ الذي يهوى؟
{الشيخ عبدالله الشيخ محمد يونس}
|
|