Post: #1
Title: يا هِنَـــــاي إعتذار شنو ؟
Author: عمران حسن صالح
Date: 12-05-2010, 10:54 AM
يُقال ( والعُهدة ليست على شخصي ) بأن إمام مسجد ما ، كان كثير الصراخ حول ضرورة ربط الأحزمة حول البطون وبأن " الكِسرة " و" أم شعيفة " وكل أنـواع " اللواييق " كافية لتربية الجسد بأن ( يتقوَى ) للعبادة ، وما الأكل والشرب إلا لتقوية الجسد من أجل فِعل العبادة ، وأن أطايب الدنيا ليس للمؤمن القوي الزاهد العابد ، وبأن سيد الخلق كان زاده الأسودين . !!
لسوء حظ ذلكـ الإمام أن وجده أحد المصلين ، من يفعلون الصلاة باعتبارها صلة العبد بربه ، وجده داخل عفراء مول وهو يتبضَع بما لذ وطاب ، أوفالتين وكاتشب وتوابع لا يعرف لها إسماً ، ويدفــع ( كاشاً ) يكفي لبناء زاوية صغيرة لأداء الصلاة في قرية ما فما كان منه إلا وأن نظر للإمام قائلاً ( لا صلاة خلفكـ بعد اليوم يا إمام السوء ) .
نظر إليه الإمام وكأنه يهم بالإعتذار .
خرج صاحبنا وهو يترنم بأغنية بعد إيه ، لم ينظر خلفه إلا أنه أحسَ بأن الإمام (السابق) يبحث عن ورقة توت من ضمن بضاعته التي دفع ثمنها ( كاشاً) ليغطي بها كل ما يظهر أمام خلق الله .
.
.
.
.
يتبـــع !!
|
Post: #2
Title: Re: يا هِنَـــــاي إعتذار شنو ؟
Author: امير عوض الجمري
Date: 12-05-2010, 11:01 AM
Parent: #1
اعتـــــــــــــــــــــذر يا عمران للشلاقة !!
|
Post: #3
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 11:04 AM
Parent: #1
ويقال أيضاً أن الصديق أخذ من صديقه " شيلة " زواجه بغرض توصيلها إلى أهله ومقابلة خطيبة صديقه للتعارف ، وشرح الحال والمآل عن الغربة ،
وصلته الأخبار بعد أشهر بأن " الشيلة " لم تصل وبأن صديقه قد تزوج خطيبته !!
حزن أولاً ، ثم فرح بأن نجاه الله من ورطة الزواج ممن لا تستحق عواطفه وسنين غربته .
مرت السنين وقابل صديق " الغفلة " الذي حاول جاهداً أن يبرر فعلته مغلفة بسلوفان رخيص من الإعتذار !!
نظر حوله مستغرباً أي عبارات يمكنها أن تكفي هذا " السافل " لكي يصلني إحساس إعتذاره ؟؟
إعتذر لنفسه عن إستخدام الكلمة ، تمتم ( لنفسه ) بمببرات تسمح له بإستخدام العبارة لأن المقام كذلكـ .
كأني أحس بأنه قد قال له وبعامية أهلي الطيبين ( يا هنـــــــاي إعتذار شنو ؟؟ ) .
|
Post: #4
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 11:13 AM
Parent: #3
الأمريكي " أو الغربي إجمالاً " حياته يمكن أن تعرفها من الأفلام ، أو ربما جزء كبير منها .
لم أستغرب ثقافة الإعتذار المنتشرة بينهم وفي كل شي
حتى الإعتذار عن الخيانة الزوجية مقبولة لدى الأكثرية وبمبررات ( الخائن ، أو المغدور بالخيانة )
لم أستغرب ذلكـ لأن حياتهم لها شكل مُحدد وقناعات مشتولة فيهم منذ الصغر
وقواعد تربية وحياة مختلفة .
العار ( بمعناه الواسع ) يقتل الشخص في مجتمعنا البسيط ، غادراً ( وأحياناً حتى المغدور )
طريقة التربية
وثقافة العيب
والمجتمع المُراقِب
أشياء كانت تمنع العيب
أقول :
كانت !!
|
Post: #5
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 11:18 AM
Parent: #4
الإعتذار ثقافة جميلة ومحببة ، ويمكنها أن تمسح الأخطاء لدى من يعرفون ( أصل ) أشيائكـ وتصرفاتكـ
ولكن !!
هل هي كافية بحيث أنَ ( لسانكـ ) يظل طويلاً وتستمر ( في التنظير ) عن :
الحلال والحرام
والممكن والمستحيل
وكثير من الأشياء ( حتى وإن كانت بسيطة ) ولكنها تحيط بنا
ألن تحس بأن مصداقيتكـ صارت إلى صفر كبير
وأن الإنزواء ( من شلتك) أو أصحابكـ لفترة بسيطة على الأقل ، أفضل ؟؟
لكـ
ولمن لا زالو على قناعة بأنكـ أفضل مما أنت عليه ؟؟؟
|
Post: #6
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 12:27 PM
Parent: #5
أمير الحبيب
شلاقة وين وكيف ومنو السواها يا صديق ؟؟
بالعكس ضحكت والله يا أمير وكنت جاييكـ بى مزاج خاصةَ في الشليق المشى عفراء ده
بس كتلت لى الدُش في يدي 
|
Post: #7
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 12:38 PM
Parent: #5
حوش بكري بقى يحب التكرار
|
Post: #8
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 03:33 PM
Parent: #7
| Quote: يا هِنَـــــاي إعتذار شنو ؟ |
حقوق النسخ والنقل والإقتباس مُتاحة ، مع الإشارة للمصدر 
|
Post: #9
Title: Re: يا هِنَـــــاي إعتذار شنو ؟
Author: خالد عبد الله محمود
Date: 12-05-2010, 03:49 PM
Parent: #8
والله يا عمران لو بعرف أكتب زي الكلام السمح ده تاني نوع الوغد الإسمو عمر الفاروق ده سلام الله ما بديهو ليهو !! 
|
Post: #10
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 04:28 PM
Parent: #9
| Quote: الوغد الإسمو عمر الفاروق |
لكن كان لقيتو رايق بتغير رايكـ ، بس إجمالاً حكاية تسلم على الفاروق ده أنا زاتي عندي فيها راي
ياخي بيبراكـ لامن تآمن
شكراً لمروركـ خالد رغم انكـ زغت من إبداء وجهة نظركـ !
الإعتذار مقبول في كل الأحوال يا عمكـ ؟؟
|
Post: #11
Title: Re: يا هِنَـــــاي إعتذار شنو ؟
Author: أيمن دياب
Date: 12-05-2010, 05:10 PM
Parent: #10
| Quote: ياخي بيبراكـ لامن تآمن |
ألذ (بري) في الدنيا حق عمر الفاروق.. ياخي زول مكمل (اللذاذة) ذاتا.. ومثقف وبفهم في الكورة والفن والسياسة...
|
Post: #12
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 05:41 PM
Parent: #11
يا أيمن يا دياب
صاحبي ده ما قاعد أقدر أشكرو شديد كده
.
.
.
.
في تشتيت للكورة موووووووووبالغة 
|
Post: #13
Title: Re: يا هِنَـــــاي إعتذار شنو ؟
Author: haroon diyab
Date: 12-05-2010, 06:01 PM
Parent: #12
عمران ياصاحب
مساء الخير
واولا :
اعتذر عن تاخير الرد
عارف انا زول بكتب لي جملة زي دي
بيزداد احترامي ليهو....لانو اصلا
مامجبور يرد علي والعلاقة في النهاية
اسفيرية .
لكن....
انظر الي ثقافة الاعتذار تجدها ترفع
من مستوي النقاش والحوارات وهذا مانفتقده عندنا .
بس ياخوي اخوانا الخواجات ديل مرات....مرات كده
بتحس بيهم عورا ولا هبل ماعارف.....!!!!
الواحد يلم في الولية في حالة خيانة بااااائنة
او العكس ( عشان مايجونا الجندر ....!!!!) وبكل
بساطة (I AM SO SORRY HUNY ) والموضوع ينتهي ....!!!!!
لا ممكن كمان يعزمه اوتعزمه عشاء وعاااااااااااااادي
تجي تقول لي اعتذار
حقيقة.......
ياهناي اعتذار شنو...؟
انا اسف لاني اطلت الحديث
|
Post: #18
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 06:59 PM
Parent: #13
| Quote: اعتذر عن تاخير الرد |
هاروننا
يا ريت كل الحاجات التي قد تبدو صغيرة يكون ملازمة الإعتذار فهو سولفان راقي جداً
وهي بمثابة الهدية المعنوية المُقدَرة .
بس في حاجات تانية يا هارون (قد تبدو صغيرة) لكن الإعتذار فيها لا يفيد الشخص في جزء معين من حاجاتو
لا يعني أني رفضته كبني آدم ويتواصل تعاملي (الإنساني معه) .
صعبة دي
| Quote: انا اسف لاني اطلت الحديث |
آآآآي لاحظت الحاجة دي loooooooooooooool
|
Post: #14
Title: Re: يا هِنَـــــاي إعتذار شنو ؟
Author: أيمن دياب
Date: 12-05-2010, 06:06 PM
Parent: #12
بلاش تشتيت الكورة يا أبو محمد.. وخليني أعبر عن الجواي في مكان تاني وزمان جاي تجاه ود الفاروق..
طبعاً مسألة الاعتذار دي في حد ذاتا قاسية شديد.. ومرات الواحد مكابرة بس ما يقدر يعتذر.. لأنو بعض الناس تعتبر الاعتذار منقصة، وتراجع مذل، وهزيمة للذات.. نحنا ما متعودين على الاعتذار وثقافتنا حتى لو كنت غلطان برضو ما تعتذر.. لأنو الاعتذار ده بكون زي (الانكسار).. و(الانكسار) ده ما حبابو لبعض الشخصيات.. والله بعرف ناس حماقة ساي وعزة نفس ما تعتذر، حتى لو الواحد غلطان..
وبعدين يا أبو محمد في أخطاء كده ما ينفع معاها الاعتذار بتاتاً.. لأنو مرات الكلمة بتكون أمضى من السيف في الجرح والإيلام.. لا السنوات قادرة على المداواة، ولا الاعتذار يفيد في التطبيب..
|
Post: #15
Title: Re: يا هِنَـــــاي إعتذار شنو ؟
Author: ابو جهينة
Date: 12-05-2010, 06:26 PM
Parent: #14
تمام يا أبو محمد العمران
قصة الإمام و الصديق الغدار و الخطيبة غير الوفية
القصتين ديل بالذات تجعل الواحد يقيف طويلا في الأخلاقيات و متى إنحرفت و عند أي منعطف
دمتم
|
Post: #20
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 07:41 PM
Parent: #15
| Quote: تمام يا أبو محمد العمران |
وتمام مروركـ يا ريس
|
Post: #16
Title: Re: يا هِنَـــــاي إعتذار شنو ؟
Author: امير عوض الجمري
Date: 12-05-2010, 06:29 PM
Parent: #14
بداية سنة 80 عندنا جارنا كان عنده هيلمان 60 تاكسي
ماشي بيها في الزلط وفجأة قرر يكب بنزين (لاحظ فجأة مع هيلمان 60)
يقووم يعضضضي لسانو ويلف الدركسون .. والهيلمان كانت تحتاج لعض اللسان
في حالتين .. الاولى عشان تلف الدركسون والتانية عشان تدوس الفرامل ...
اها زولنا عضة لسانو ولفة الدركسون ولسوء الحظ كانت واقفة كورولا موديل 79 (الكلام دا سنة 80 خاتي بالك!؟)
قام راح مواصل في عض اللسان ودايس الفرامل .. لكن الظاهر انه الفرامل اعتقدت انو عضة اللسان لازالت من اجل
لفة الدركسون (فأبت تقبض) وراح كروووورو صادم الكورولا وسط اندهاش سيد الكورولا وهجمتو وغضبو .. ينزل صاحبنا
ويقول ليهو : معليش ياااخ .... الراجل معليش بتاع شنو ؟!!! (اعذار شنو!!!)
قال ليهو خلاص حا نصلحا ليك ... سيد الكرولا عاين لي عربيتو وعاين للهيلمان (المتشفية) وعاين لي صاحبنا الكان
لابس جلابية بيجية في الزمن داك (سمنية) وكمها فيهو زيت ماكينة آثار التفتيش الصباحي للعربية (موية وزيت)...
وكمان سفنجة ابو دبوس ديك البيكون سيرها مقطوع يصلحوها بي دبوس كدا ...
واكيد تساءل كيف الفزول البصلح السفنجة وسايق الهيلمان دا وجلابيتو اللو ختوا ليها بطارية تدوّر عديييل ، حا يقدر يصلح العربية
عاين ليهو وقال ليهو : عليك الله قوم لف كدا وللا كدا بلا معليش بلا تصلحا وحاسب بتاع الطرمبة ومشى وسط انين كرولته وابتسامة هيلمان
صاحبنا (الحااااسدة) ....
|
Post: #17
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 06:43 PM
Parent: #16
Quote: والهيلمان كانت تحتاج لعض اللسان
في حالتين .. الاولى عشان تلف الدركسون والتانية عشان تدوس الفرامل ...
اها زولنا عضة لسانو ولفة الدركسون ولسوء الحظ كانت واقفة كورولا موديل 79 (الكلام دا سنة 80 خاتي بالك!؟)
قام راح مواصل في عض اللسان ودايس الفرامل .. لكن الظاهر انه الفرامل اعتقدت انو عضة اللسان لازالت من اجل
لفة الدركسون (فأبت تقبض) وراح كروووورو صادم الكورولا |
موباااااااالغة يا جمري
لا حولاااااااااااااا
ياخي انا فطيت ليكـ الحلوين الفوق ديل وفقعتها ضحكة
برضو كمان المغزى جميل يا أمير
وغالباً نحن ( حتى ولو زعلانين شديد ) إلا أن الإعتذار في حالة الزول الفوق ده ياهو حقنا
لأنو بخص المادة والمال الزايل
عشان كده تلقانا بنقبل الإعتذار ولو كنا مجتهمين وزعلانين .
والأهم من كده يا أمير
هنا الجميل لا يُنسى وزولنا بتاع الهيلمان ده لو قابل بتاع الكورولا في موقف آخر لأراه أنه لم ينسى ز
.
.
مخرج :
هذا ما كان من أمر الزمن القديم
|
Post: #19
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 07:09 PM
Parent: #14
| Quote: وبعدين يا أبو محمد في أخطاء كده ما ينفع معاها الاعتذار بتاتاً.. |
بتاتاً بس ؟؟
مجرد الذكرى بتوتركـ يا أيمن
|
Post: #21
Title: Re: يا هِنَـــــاي إعتذار شنو ؟
Author: رانيه محمد الشيخ
Date: 12-05-2010, 08:34 PM
Parent: #19
ممكن اكون ماشيه وفجئه انسان مارى بجانبى بدون ما يقصد واقعنى واتجرحت
واندهش من السوء العمله وبدى يعتذر ويساعدنى على الوقوف لإسعافى
اكيد اعتذاره مقبول وبنفس طيبه
لكن لو ماشيه وجيه زول اثق فيه ودفرنى قدام عربيه هرستنى وتم مشيه ولقانى بعد ما الزمن طال ولاى غرض فى نفسه جيه يعتذر اخير يبله ويشرب مويته
برغم ماعارفه الموضوع هنا عن الاعتذار فعليا ولا يوجد مقصد تانى وانا دخلت غلط
تحياتى للجميع
|
Post: #22
Title: Re: يا هِنَـــــاي إعتذار شنو ؟
Author: عمران حسن صالح
Date: 12-05-2010, 08:44 PM
Parent: #21
| Quote: برغم ماعارفه الموضوع هنا عن الاعتذار فعليا ولا يوجد مقصد تانى وانا دخلت غلط |
الغلط ما نتعظ يا رانية
الغلط نعاين في الغلط ونكون عارفنو ورافعين ليهو راية الإصلاح ونجي نقع فيهو
والغلط الأكبر بعد داكـ نجي نقول آسفين سوينا الغلط الكنا بنعلم الناس ما يسوهو وقمنا سويناهو
الغلط يا رانية نعرفو غلط ونواصل فيهو .
الإعتذار هو الموضوع فعلاً يا رانية
لكن هل كل غلط يمكن نمسحو بالإعتذار ؟؟
|
Post: #23
Title: Re: يا هِنَـــــاي إعتذار شنو ؟
Author: رانيه محمد الشيخ
Date: 12-05-2010, 08:52 PM
Parent: #22
برغم ان فى الدين دايما بيحفزونا للتسامح والعفو
لكن صراحتا مرات ما بقدر عليه من شدة المى وطعنت الغدر الفيه
وبقول هل ربنا حيحاسبنى لو ما قادره اسامح
المشكله اننا بشر
واكيد ممكن نكون اخطئنا فى غيرنا بقصد ولا بدون قصد
مش حنتمنى منهم يسامحونا زى ما حيتمنوا منا نسامحهم
معادله صعبه
ومحتاج الانسان ينظر لحياته لو فعلا ما محتاج زول يعفى له يبقى يستمر فى عدم عفوه لغير
|
Post: #24
Title: Re: يا هِنَـــــاي إعتذار شنو ؟
Author: عمران حسن صالح
Date: 12-06-2010, 08:24 AM
Parent: #23
يا هِنــــــــــــــااااااااااااي إعتذار شنو ؟؟
|
Post: #25
Title: Re: يا هِنَـــــاي إعتذار شنو ؟
Author: امير عوض الجمري
Date: 12-06-2010, 09:27 AM
Parent: #24
| Quote: هنا الجميل لا يُنسى وزولنا بتاع الهيلمان ده لو قابل بتاع الكورولا في موقف آخر لأراه أنه لم ينسى |
يقابلو وين يا عمران !!!
الا في كشك الفواكه بتاع الاطرش الجنبو بنشر ....(وطبعا عرفت كل واحد فيهم حا يكون واقف وين)
بتاع البنشر قال لصاحبنا بتاع الهيلمان : ياخي دا ارقعو ليك وين يا معلّم دا ما فيه حتة تترقع
ذاتو ياخ .. صاحبنا زعل قال ليهو : ها جنا ها بطل فلسفة كمان جاتنا فلقصة بتاعين اللساتك صلح اللستك دا خلينا النمش قبل ما اطقك في رويسك دا بي مفتاح العجل دا .
بتاع اللساتك قال ليهو : (معليش) يا فردة ياخي انت زعلتا وللا شنو !!! مابنهظر معاك ياخ ...
( دي طبعا من الخيال) حسب موقع اللقاء بين الكورولا اخر موديل والهيلمان المخرفة ) .. لكن الاولى والله جد جد
|
Post: #26
Title: Re: يا هِنَـــــاي إعتذار شنو ؟
Author: عمران حسن صالح
Date: 12-06-2010, 10:10 PM
Parent: #25
| Quote: ( دي طبعا من الخيال) |
عملت قوقيليشن سريع وما لقيته
روح برااااااءة يا عمكـ :)
|
|