Post: #1 Title: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي السمر Author: علاء الدين صالح Date: 12-03-2010, 04:31 PM Parent: #0
أسأل نفسَك كلمات الشاعِر الهرَم: محمد علي أبو قطاطي ألحان الأستاذ: أحمد زاهِر غناء الفنان: زكي عبد الكريم
اسأل نفسك بينك وبينها عن إخلاصنا ليه تتجاهل شـوقنا البينّا إنتا نسيت أيّام ما كُنا نعيش الحُب فى عهدو الأول ياما كتير وكتير فكّرنا وكنا بنحلم بالمستقبل لكن فجأة بديت تتنكَّر وعن ريدتنا بقيت ما بتسأل قلبك رغم الطيبة الفيهو انا بستغرب كيف اتبدَّل
فاكر الكلمة القلتها ليّا واِنتا فى لحظة هنية سعيدة إتعاهدنا على الحِنيّة نقضى عمُرنا محبة شديدة ما قُلتا بريدك زي عينيّا وانا صدّقتا كلام الريدة عارفو قلبك وافي ومخلِص واِنَّك تقسى دي حاجة بعيدة
راجع نفسك ما تكون جاير وخلّي حياتنا تعود لهناها ماتحطّم بى ايدك نفسي والآمال القلبي بناهـــا مهما قسيت انا برضي بحبَّك وساعة عطفك بستنّاها ومهما يزيد ألمي وحرماني برضِي سعادتك بتمنّاها
واحدة من الأغاني القريبة شديد جداً لقلبي.. أنا شخصيّاً بحب أسمعها من زكي عبد الكريم شخصيّاً.. لكن قُلتا ما عندي مانِع حتّى لو ضيّعني ساكن.. هي ريماز ساكنة وين؟ هل اللخبطة بين القرار والجواب في الحِتّة بتاعت (والآمال القلبي بناها) تحديداً عملَت ربكة في أداء ريماز للأُغنية؟.. يا ريت الواحد يسمع راي العباقِرة الموسيقيين أمثال أُستاذ موصلي، والآخرين من ذوي الإهتمامات الموسيقية.. ويا ريت اسمع راي الجميع من ذوّاقة الفن عموماً
تم التعديل لإضافة إسم الأستاذ/ أحمد زاهر (صاحب لحن الأُغنية)
Post: #2 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-03-2010, 04:41 PM
أول مرّة أعرِف إنّو في مُغنّي واعِد إسمو حمدي السمر.. وأوّل مرّة أستمِع ليهو في الأُغنية دي.. لكن أداءو هنا أطربني أكتر من ريماز..
اها الناس رايا شنو؟ لو غلطان ورّوني وقولوا لَيْ (راجِع نفسك ما تكون جاير)
Post: #3 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-03-2010, 05:22 PM Parent: #2
يا دكتور جمال الباقر أنا كُنتا وعدتَك إنّي أغنّي ليك الغُنية دي بالعود في حفلة عِرسَك.. اها رايك شنو أجيب ليك حمدي دا وأطلع منّها انا من باب وفديناه بكبشٍ عظيم.. الضمان امان يا اخوي.. انا مُمكِن أجيك مُهوّي وأتَقِّل في عشا الفنّانين وما أقدر أطلع المسرح زاتو
Post: #4 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-03-2010, 05:35 PM Parent: #3
يا رِماز القرار هو عملية خفض لحِدة الصوت أو الإهتزاز الصوتي بدرجة الضِعف.. والجواب هو العكس تماماً، يعني عملية مُضاعفة نبرات الصوت.. النشاز بيجي لو درجات القرار أو الجواب دي زادت أو قلَّت دي الحاجة الأولى
الحاجة التانية شاعر الُأُغنية قال (أسال نفسك بينك وبينا عن إخلاصنا).. ما قال عن إخلاصي..
Post: #5 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-03-2010, 06:38 PM Parent: #4
Quote: الحاجة التانية شاعر الُأُغنية قال (أسال نفسك بينك وبينا عن إخلاصنا).. ما قال عن إخلاصي..
وإيماناً منّي بمبدأ النقد والنقد الذاتي.. أنا قبل 25 سنة (إضطرّيت) أغيِّر كلمة واحدة من كلمات مطلع الأُغنية دي لمّا غنّيتها في إحدى مُدن جنوب الهند.. غيَّرتها كدة من نفسي.. إنتا نسيت أيّام ما (بقينا) بدلاً عن أيّام ما كُنّا.. بس التغيير كان لدواعي أمنيّة.. فمالَم تكون هناك دواعي أمنية تستدعي التغيير فحقّو الواحد ما يغيّر
الحمد لله الهنود ما عندهُم قانون نظام عام وإلّا لكانت تُهمة التغنّي بألفاظ خادشة للحياء العام تُطاردني حتّى الآن
Post: #6 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: Dr. Moiz Bakhiet Date: 12-03-2010, 07:36 PM Parent: #5
بس ملاحظاتك سليمة في كلمة إخلاصي وفي حتة الآمال القلبي بناها بالذات الآمال
بس والله لم تقلل من احساس الطرب عندي ولولا انتباهك بسبب محبتك وترديدك للأغنية لما لاحظت كمستمع عادي للربكة بين القرار والجواب ..
التحية لك يا علاء ولريماز وهي تمتعنا بدهشة الأداء الجميل
Post: #7 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-04-2010, 09:54 AM Parent: #6
Quote: تحياتي يا علاء يا زول يا فنان
وحقيقي ريماز فنانة حقيقية ويمتاز أداؤها بالوقار والرزانة والهدوء لامن فرفور اتمحن بس ملاحظاتك سليمة في كلمة إخلاصي وفي حتة الآمال القلبي بناها بالذات الآمال
بس والله لم تقلل من احساس الطرب عندي ولولا انتباهك بسبب محبتك وترديدك للأغنية لما لاحظت كمستمع عادي للربكة بين القرار والجواب ..
التحية لك يا علاء ولريماز وهي تمتعنا بدهشة الأداء الجميل
البروف الأديب الفات الكُبار والقدرو/ دكتور مُعِز تحيّاتي وتقديري لك أيُّها الإنسان الرائع
أسعدني المرور في البوست أي سعادة وكلماتك دُرَر في حق ريماز وشهادة حاشاها المرض بندور غُناها ريادة هو الزول النصيح ما بدخِلوهو عيادة؟
تعرِف يا بروف، البِت غُناها ربابة من بدَت الغُنا والناس تكوس البابا هادية وراسية في زمن الغُنا الكترابة كان دة هو ما كلامي في خشمي التُرابة
عميق احترامي لك يا بروفَّنا الغالي وللمُبدِعة ريماز ميرغني
Post: #8 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: نور الدين عثمان Date: 12-04-2010, 10:09 AM Parent: #7
تحياتنا اولا يادكتور .. انا حسب سمعى لى السمر ده حاول يقلد زكى عبد الكريم بدرجة كبيرة فى الاغنية دى وانت بتحب سماعها من زكى عشان كده جات حسب هواك وعن رماز صراحة هى فنانة وصوتها جميل واداءها رايع بس تحتاج شوية تجويد .
Post: #9 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: khaleel Date: 12-04-2010, 11:07 AM Parent: #8
هلاء علاء الدين
والمصباح السحري
ياخي جيبا لينا بصوت زكي عبدالكريم
سمح الغناء من خشم سيدو
Post: #14 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-04-2010, 06:12 PM Parent: #9
Quote: هلاء علاء الدين
والمصباح السحري
ياخي جيبا لينا بصوت زكي عبدالكريم
سمح الغناء من خشم سيدو
الأخ الفاضِل/ خليل تحياتي يا حبيب
دي الأُغنية بصوت الفنان زكي عبد الكريم، ومعذرة لأنّو الأغنية غير مُكتملة وبدايتها من الكوبليه التاني.. الحاجة التانية الجماعة البيشيلو معاهو ديل لو أنا كُنتا الألفة والله كُنتا كتبتهم كُلَّهُم في لِستة المُهرجلين
عميق احترامي
Post: #11 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-04-2010, 11:28 AM Parent: #8
Quote: انا حسب سمعى لى السمر ده حاول يقلد زكى عبد الكريم بدرجة كبيرة فى الاغنية دى وانت بتحب سماعها من زكى عشان كده جات حسب هواك وعن رماز صراحة هى فنانة وصوتها جميل واداءها رايع بس تحتاج شوية تجويد .
الأخ الفاضِل/ نور الدين لك التحية والتقدير
كلامك لو ما فِعلاً أصاب كبد الحقيقة فلقد أصاب فشفاشها.. وبحب أضيف إنّي لم أحاول من خلال هذا البوست الإنتقاص من قدر الفنانة ريماز لأنّي من المُعجبين جداً بأدائها وبصوتها.. وبحضورها الكاريزمي وبطلعتها الأنيقة البهية.. ريماز ما حتقدر تجوِّد أدائها لو ما نحنا وجَّهنا ليها مُلاحظاتنا.. أنا بتذكَّر في حفل لنجوم الغد في بورتسودان، لاحظتا خروج ريماز من الزمن أثناء أدائها.. فحاولت الإتصال بصديقي ناجي تاج السر عشان يوصِّل ليها ملاحظتي.. ريماز فنانة في بداية مشوارها الفني وتحتاج للمزيد من التجارب والإرشادات والملاحظات.. والحمد لله هي ليست بمغرورة وأعلم أنها تُرحِّب بمثل هذه المُلاحظات
شُكري وعميق احترامي
Post: #10 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: وليد عبد اللطيف Date: 12-04-2010, 11:12 AM Parent: #6
يابروف المعز ... سلامات اهو دا اسمو التضليل في الاتجاه السلوكي في نفس اللاتجاه تحاول تكره انسان معاك في شخص . صاحبي علاء الدين دا حاقد على قول صاحبنا فرفور بت صوتها زي النسمه ( صورة وصوت ) علاء الدين صالح ياخي دي ابسط واروع اغنية خفيفة وممكن انا بصوتي الكعب دا اغنيها وممكن يغنوها في المارشات العسكرية وتكون من ضمن جلالات العساكر لو مثل اغنية (غضبك جميل زي بسمتك ) معليش ودي من الاغاني الصعبة التي سابقا كان يمتحن عليها الفنانين لايجازة اصواتهم . سمعتها مليون مره رماز مالها عيبها لي ياخي سمعت كلامك دا وانت زول فنان قربت تلحقني البروف المعز
يابروف الف مبروك تاني وربنا يوفقك دائما .
----------------------- الاستاذ علاء الدين اغنياتك عجبت فرفور لكن قلت ليه كتبتها انا اسكت ساكت واعمل نايم
Post: #12 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: جمال الباقر Date: 12-04-2010, 12:15 PM Parent: #10
من الذي يكتب باسم علاء صالح ؟؟؟؟ !!!!!!
Post: #13 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: وليد عبد اللطيف Date: 12-04-2010, 01:07 PM Parent: #12
Quote: من الذي يكتب باسم علاء صالح ؟؟؟؟ !!!!!!
واحد حاقد يادكتور
Post: #15 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: khaleel Date: 12-04-2010, 08:21 PM Parent: #13
Post: #18 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-04-2010, 10:42 PM Parent: #15
Quote: مائة مساء يا علاء
كدي شوف التسجيل دا
واشرب وقارن
لكن هو شراب نُصاح؟ ياخ أنا قرّبتا أعصِر القِزازة
تسلَم يا راجِل يا ذوق
Post: #17 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-04-2010, 10:37 PM Parent: #12
Quote: من الذي يكتب باسم علاء صالح ؟؟؟؟ !!!!!!
ياهو دة جِنس الكلام الواحد كان خايف مِنّو زااااتو يا دكتور ياخ دي شغَلتي الأساسية.. يعني مينلي أنا زول بتاع مِزّيكا ونقد فنّي الشغلة بتاعت الأشباح دي مُجرَّد هواية هوااااااااية زي واحد من الشيّالين بتاعين ترباس كان شغّال عسكري في المباحث كاتب في يافطة بيتو: فنّان شعبي وبوليس سِرّي
Post: #16 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-04-2010, 10:12 PM Parent: #10
صديقي اللدود وليد الذي حرق لنا حلّة الكوارِع لك تحيّاتي وأشواقي
Quote: صاحبي علاء الدين دا حاقد على قول صاحبنا فرفور بت صوتها زي النسمه ( صورة وصوت )
أنا برضو الحاقد؟ وإنتا وصاحبك عبد الدائم لمن جيتو ناطّين لأُستاذ موصلي والراجل كتَّر خيرو فاتح بوست ترحيب للأمّورة نُهى عجاج وقُلتو ليهو: النصيحة ليك يا الله.. نُهى دي لا بتطرِبنا لا الله قال وصوتا عادي فضحتوني ياخ.. ما عِرِفتا أودّي وشّي وين من نُهى ومُعجبيها تركتهُم على المحجّة البيضاء يتساءلون: علاء فنّان ولا يُلام.. ولكن ماذا عن صحابته الكِرام؟ وفي الليلة ديك قرَّبتا أتبرّا منَّكُم ياخ
Quote: علاء الدين صالح ياخي دي ابسط واروع اغنية خفيفة وممكن انا بصوتي الكعب دا اغنيها وممكن يغنوها في المارشات العسكرية وتكون من ضمن جلالات العساكر لو مثل اغنية (غضبك جميل زي بسمتك ) معليش ودي من الاغاني الصعبة التي سابقا كان يمتحن عليها الفنانين لايجازة اصواتهم . سمعتها مليون مره رماز مالها عيبها لي ياخي سمعت كلامك دا وانت زول فنان قربت تلحقني البروف المعز
نعيبُ ريمازنا والعيبُ فينا وما لريمازنا عيبٌ سوانا اها لقيتني كيف كدة باللاي؟
Quote: الاستاذ علاء الدين اغنياتك عجبت فرفور لكن قلت ليه كتبتها انا اسكت ساكت واعمل نايم
لازِم اعمل نايم يا وليد.. ما دام إنتا شايل النُسخة الأصلية والوحيدة وخليتني على الحديدة.. يعني حتّى لو إشتكيتَك للقضاء إنتا حتمرُق منّها لعدم كفاية الأدِلّة.. غايتو إنتا وفرفور شكيتكُم على الله
Post: #19 Title: Re: يا ريماز ميرغني صدِّقيني في الغُنية دي تحديداً ما حأجاملِك، لكن مُمكن أجامِل الواعِد حمدي ا Author: علاء الدين صالح Date: 12-04-2010, 11:08 PM Parent: #16
يعني يا السر قدور لو كُنتا إستقطعتا من زمنك وخلّيت عِصام دة كمَّل الغُنية دي ربَّنا كان حيحاسِبكُم إنتا والمُخرِج؟؟
يا سلام يا سلام يا سلام.. الله عليك يا عصام محمد نور يا أخي
عصام دة ماشاء الله بتخيَّل لَيْ لمَّن يرتشِف كُبّاية الشاي بيبذل مجهود أكتر من الجُهد البيبذلو وهو بيغنّي ياخ
