Post: #1
Title: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: علوبه
Date: 11-29-2010, 04:03 PM
Parent: #0
(الطاهر) يعمل موظفاً بأحد بلدان الخليج ، قضى فى الإغتراب سنين عدداً قبل أن يعلن (كفيله) أفلاس الشركة ويقرر الإستغناء عن العاملين فيها بما فيهم (الطاهر) الذى قام بجمع مدخراته التى جمعها خلال هذه السنوات الطوال وحزم حقائبه عائداً إلى البلاد .
ما أن وصل (الطاهر) عائداً حتى تقاطرت صوب منزله جموع المهنئين بسلامة العودة ، ولأن (الطاهر) قد غاب عن السودان طويلا فقد كان جل همه هو كيفية إستثمار المبلغ الذى أحضره معه والذى يمثل بالنسبة له (تحويشة) العمر :
- هسه يا جماعة الزول لو عاوز يستثمر القريشات الجابا معاهو دى يستثمرا فى شنو ؟
فاصل ونفاصل ..................
|
Post: #2
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: النذير حجازي
Date: 11-29-2010, 04:23 PM
Parent: #1
Quote: - هسه يا جماعة الزول لو عاوز يستثمر القريشات الجابا معاهو دى يستثمرا فى شنو ؟
|
يشتري جهاز كشف الذهب بسعر 12 مليون
أو جهاز كشف ذهب + بوكس إذا كانت قروشو كويسة
أما إذا كانت تحويشته تعبانة يشتري بيها أمجاد
|
Post: #3
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: علوبه
Date: 11-29-2010, 05:09 PM
Parent: #2
افكارك ممكنة بس موضوعنا خطير بي لبن زي ماقال سيف الجامعة
|
Post: #4
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: عمر الفاروق عبد الله الشيخ
Date: 11-29-2010, 06:02 PM
Parent: #3
علوبة تحياتي
يعمل بيها مشروع حضاري
|
Post: #5
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: عبدالعزيز حسين عبدالرحيم
Date: 11-29-2010, 06:17 PM
Parent: #4
يشتري بيت ويأجرة لو قروشة كتار يشتري عمارة عديل ..... ويعيش على الإيجار
البيت ما بتجيه حاجة لا بياكل لا بيشرب وقيمته بتزيد مع الزمن وما مكلف غير ناس ضرائب العقارات وعوائد المحلية والباقي يخليه للمؤجر
|
Post: #6
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: محمد الأمين موسى
Date: 11-29-2010, 06:31 PM
Parent: #4
| Quote: - هسه يا جماعة الزول لو عاوز يستثمر القريشات الجابا معاهو دى يستثمرا فى شنو ؟ |
أول حاجة يا علوبة تورينا القروش دي كم وبالدولار سو سمحت، عشان نعرف ننظر بمزاج!
|
Post: #8
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: علوبه
Date: 11-29-2010, 08:20 PM
Parent: #6
يا محمد الامين القروش كتار شي بالضولار وشي بريال وشي ويور وشي ين كلكي راكب ملكي
جايك راجع
|
Post: #7
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: علوبه
Date: 11-29-2010, 08:16 PM
Parent: #4
يا عمر سلام وتحياتي للاسرتين
قلت لي حضاري ؟؟؟ حضاري البي حالي ماهو داري
|
Post: #9
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: علوبه
Date: 11-29-2010, 08:35 PM
قام الطاهر بطرح هذا السؤال على كل قادم جاء إليه يهنئه بسلامة العوده وقد تفاوتت وتباينت الردود فمنهم من اشار عليه بشراء حافلة ( روزا) 30 راكب ليقوم بتشغيلها (الكلاكلة السوق الشعبى ) غير أن البعض الآخر إنتقد هذه الفكرة واشار عليه بشراء عدد من (الركشات) بدلاً عن الحافلة معللاً ذلك بأن (إسبيرات) الركشات (رخيصة) وكذلك (تعمير مكناتا) لا يتطلب جهدا ومالا كثيرا
- والله عاوز نصيحتى يا الطاهر ؟ تبعد من الحديد ده !!
قالها له (سليمان الترزى) جاره فى الحى والذى جاء لزيارته مهنئا بسلامة العوده :
- وأعمل شنو يا أسطى سليمان يعنى عندك ليا مشاريع؟
- شوف يا أستاذ سيبك من المشاريع القالوها ليك دى ... الناس دى بقت ذى (القرود) تعمل أى حاجه يعملو ذيك ! تجيب ركشة (يجيبو ركشات) تفتح إتصالات (يفتحو إتصالات) تعمل كافتيريا (يعملو كافتيريات) !
- أها طيب الواحد يعمل شنو ؟
- والله عندى ليكا مشروع إبن ستين ###### !
- هسه يكون فى زول عملو
- لا لا والله ده مشروع الشيطان ذاتو ما فكر فيهو – مواصلاً- والله المشروع ده يخليك ملياردير فى أقل من شهر
|
Post: #10
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: علوبه
Date: 11-30-2010, 11:51 AM
Parent: #9
ويستمع (الطاهر) لجاره (سليمان الترزى) والذى يعرض عليه فكرته والتى تقول بان يقوم (الطاهر) بإستيراد عدد أربعين مليون (إبرة خياطة) على أن يقوم بعد إدخالها ببيعها وتوزيعها للبقالات والمحلات فى الأسواق !
- شوف يا معلم لو بعت الإبرة الواحده بس بى خمسميت جنيه البسيطه دى شوف ح يعملو كم ؟ بعدين هم ذاااتم ما بقروش هسه تلاقيهم فى الهند وإلا الصين الميه بى جنيه واحد !
- والله فكرة !
- وكمان فى حاجه تانى .. إنتا ما تدخلهم عديل عشان ناس الجمارك يجمركوهم ليكا بالشئ الفلانى
- طيب أعمل شنو يعنى
- يعنى ممكن تشترى ليكا كم (كمبروسور) بتاعين بنشر وتروح فاتح كل (كمبريسور) وحاشيهو (إبر) ولاحمو تانى وتديهو بوهيه !!
- لكن باقى ليكا (الإبر) دى بتتباع يا أسطى (سليمان)؟
- إنتا بس حكاية البيع دى سيبا ليا أنا
الطاهر يفكر :
قضى (الطاهر) ليله كله يفكر فى مشروع الأسطى (سليمان) من كافة الجوانب حاملا فى يده ورقة وقلم (لزوم التضريب) حتى لاحظن زوجته نعمات ذلك
- إنتا الليله الحاميك النوم شنو؟
- والله بس مشروع كده !
- مشروع شنو إنت (عصام) أخوى ده ما قال ليك عندو ليكا مشروع ختير
- والله مشروع الأسطى (سليمان) ده ده مشروع (خترى) ويقول لى مشروع أخوك عصام العاوز يقترحو ده إنتا شنو؟
- ومشروعو ده حافلة وإلا ركشة وإلا إتصالات
- إبر !
- شنو ؟ كمان عاوز تتاجر فى (الحقن) !
- حقن شنو يا وليه ؟ إبر البخيطو بيها دى
ما لبث (الطاهر) أن (صنقر) فوق السرير وأخذ يشرح لزوجته (نعمات) فكرة الأسطى (سليمان) والتى ما أن إستمعت لها حتى صاحت فى وجهه :
- عليك الله ده مشروع شنو؟ هو هسه منو القالو ليكا قاعد يخيط ليهو حاجه؟ ما كلو جاااهز والله تتابع ليا مشاريع (الترزيه) ديل واطاتك أصبحت - مواصلة فى تهكم – قال شنو أربعين مليون إبره !!
- طيب الحل شنو؟
- الحل تشوف المشروع القال عصام عاوز يقولو ليكا ده وأكيد ح يكون ناجح عشان عصام ده زول تفتيحه ولفا العالم ده كلو ما ذيك !
|
Post: #11
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: عبد اللطيف السيدح
Date: 11-30-2010, 12:00 PM
Parent: #10
هذا الكلام ملفوح من مقال ساخر سبيل
|
Post: #12
Title: Re: خطير ... خطير ... جدا لكل المغتربين الراجعين ؟؟؟ ما هو دا المشروع زاتو
Author: علوبه
Date: 11-30-2010, 12:33 PM
Parent: #11
للتوضيح في صدر هذا المقال كتبنا انه منقول والقصد الاضافه للجميع وليس النسخ والتحية للاخ جبرة
|
|