Post: #1
Title: إيـد الـيـقـين بـتـحـوُق.
Author: فاروق أبوحوه
Date: 11-25-2010, 00:55 AM
قجّيت شرك شوفِك
غتيتو حِن من فوق
حاحيت طيور خوفِك
ختيتو حُسنِك روق
حتّيت خريف جوفِك
لقّيتو عِب الشوق
دودرت جيتك عيد
مطر الغنا المدفوق
يا غاليه ناري تقيد
جوه الحشا المحروق
يوماتي ماشه تزيد
خلتني زي حنقوق
مُرواد عيونك ريد
وجع الكي المطبوق
سايقاني ديمه بعيد
عايقاني للطايوق
فِكِّي الشقاه القيد
حلق الهوي المخنوق
ضافر المحنّه وَرِيد
دافر حنين النوق
فوق مركبك عربيد
حبل الشقا المطلوق
قولي لي كيف بنعيد
طعم الغنا المسروق
وأيه ينفع التغريد
طفل الحياة المريوق؟
ما دام بلودِك بيد
شِن فايدة الماروق؟
لميت شرك شوفي
وجرف اللُقا المعزوق
دشر القديم جوفي
ريداً صِبِح خازوق
قطَّعتو معزوفي
وتر الهوي المدفوق
قنعان دفَر طوفي
بحر الرحيل مدلوق
كسّرت شادوفي
مِدرِي المني الممحوق
طمّنت خوف جوفي
وإيد اليقين بتحوُق.
الكُرباب/ديسمبر 2008م
|
|