Post: #1
Title: إذا وقعت الثانية
Author: طلحة عبدالله
Date: 11-23-2010, 08:03 AM
Parent: #0
يتبع ....
|
Post: #2
Title: Re: إذا وقعت الثانية
Author: سيف بخيت موسي
Date: 11-23-2010, 08:08 AM
Parent: #1
فعلى كروجر السلام
تحياتي طلحة
|
Post: #3
Title: Re: إذا وقعت الثانية
Author: وليد محمد المبارك
Date: 11-23-2010, 08:10 AM
Parent: #2
عارف يا طلحة دي ما مباراة ر تدريب ولا تخطيط
دي كورة رجالة
الرجال الليلة بغلبوا كان في الهلال ولا في المريخ
في مباريات خارج حساب المنطق ولا تخضع لقياس
دي واحده منهن
|
Post: #4
Title: Re: إذا وقعت الثانية
Author: طلحة عبدالله
Date: 11-23-2010, 08:19 AM
Parent: #3
هلا يا وليد Quote: الرجال الليلة بغلبوا كان في الهلال ولا في المريخ
|
حليل زمن رجال المريخ لما يدخلوا الميدان كانوا يخوفوا
جماهيرهم وجماهير الفريق التاني ...
والويل والثبور وعظائم الأمور لأي فريق يتجرأ ويجيب فيهو الهدف الأول
هييييييييييي خربانة أم بنايا قش يا وليد ياخ
|
Post: #6
Title: Re: إذا وقعت الثانية
Author: عمر عبد الله فضل المولى
Date: 11-23-2010, 08:22 AM
Parent: #4
اللهم ان تهلك هذه العصابة فلن تقوم لمريخنا العظيم قائمة قريبا اللهم انصرنا عليهم اللهم انت تعلم ضعفنا وقلة حيلتنا فانصر اللهم المريخ المؤسسة
|
Post: #5
Title: Re: إذا وقعت الثانية
Author: طلحة عبدالله
Date: 11-23-2010, 08:21 AM
Parent: #2
سلاما تيا أبو السيوف وعلى طابور طويل آخر من لاعبين واداريين واعلاميين
|
Post: #7
Title: Re: إذا وقعت الثانية
Author: عبدالله كع
Date: 11-23-2010, 08:28 AM
Parent: #5
سلام يا طلحه ..
اظنها تعادل 0 /0 -
والنصر سوف ياتي طائعا لنا من الضربات الترجيح
وكل سنه وانت بالف خير يا عزيزي
|
Post: #8
Title: Re: إذا وقعت الثانية
Author: abas
Date: 11-23-2010, 08:28 AM
Parent: #5
طلحه يا حبيب
الليله الردم
وطبق البوخه
ربنا يحقق امانينا يا رب
والاربعه جايه جايه
|
Post: #9
Title: Re: إذا وقعت الثانية
Author: وليد عبد اللطيف
Date: 11-23-2010, 08:32 AM
Parent: #5
الاستاذ طلحة والكابتن وليد وسيف ( كل سنه وانت طيبين )Quote: عارف يا طلحة دي ما مباراة ر تدريب ولا تخطيط
دي كورة رجالة
|
المباراه الاولى لم اعرف ماذا اريد ومن اشجع
في لحظة تمنيت هزيمة الهلال للمريخ لكي يقنع المريخ ان فريقه مهلل وضعيف
ولا يقوى لملاقاة فريق رابطة .
ولحظة تمنيت هزيمة المريخ للهلال لانه محتاج للكثير حتى يتعلم ثقافة حصد الكؤوس الخارجية
ولكن من غير عواطف اذا لاحظنا لكل خطوط الهلال والمريخ
اذا لعب الهلال شهر متواصل ضد المريخ سوف يمسح بكرامته الارض
ونرجع نقول برضو ماعندنا معيار ثابت
عادي ممكن المريخ يطقش الهلال .
والمريخ ينسى انه اضعف من فريق بالروابط
هكذا هو حال المستديرة عندنا
|
Post: #10
Title: Re: إذا وقعت الثانية
Author: طلحة عبدالله
Date: 11-23-2010, 09:06 AM
Parent: #9
Quote: اللهم ان تهلك هذه العصابة فلن تقوم لمريخنا العظيم قائمة قريبا اللهم انصرنا عليهم اللهم انت تعلم ضعفنا وقلة حيلتنا فانصر اللهم المريخ المؤسسة
|
مع مريخ الزمن دا يا عمر ما ليك إلا ان تستغفر
ربك وتستعين بالصبر والصلاة ..
اللهم أهدي ناس المريخ( لاعبين ، ادارة ، اعلام) واجعلهم يبطلون
الخارم بارم القاعدين يعملوا فيهو دا .. 
|
Post: #11
Title: Re: إذا وقعت الثانية
Author: الصادق صديق سلمان
Date: 11-23-2010, 09:09 AM
Parent: #10
شهراً ما عندكم فيهو نفقة يا طلحة ما تعدوا ايامو
|
Post: #12
Title: Re: إذا وقعت الثانية
Author: طلحة عبدالله
Date: 11-23-2010, 09:28 AM
Parent: #11
تحياتي يا عبدالله كع
Quote:
اظنها تعادل 0 /0 -
|
يا ريت ياخ ..
|
Post: #13
Title: Re: إذا وقعت الثانية
Author: مرتضى احمد عبد القادر
Date: 11-23-2010, 09:34 AM
Parent: #12
هي حتما واقعه، ثانية حاسمه، شافية كافية.
| Quote: اللهم ان تهلك هذه العصابة فلن تقوم لمريخنا العظيم قائمة قريبا اللهم انصرنا عليهم اللهم انت تعلم ضعفنا وقلة حيلتنا فانصر اللهم المريخ المؤسسة |
Quote: Quote: اظنها تعادل 0 /0 -
|
يا ريت ياخ .. |
حالتكم تحنن ياناس المريخ المؤسسة
|
Post: #14
Title: Re: إذا وقعت الثانية
Author: طلحة عبدالله
Date: 11-23-2010, 09:52 AM
Parent: #13
دا شنو يا عباس ياخ
قاعدين نعمل في حلة كوارع نحن
إرتقي بهلاليتك شوية ياخ .
|
Post: #15
Title: Re: إذا وقعت الثانية
Author: البدري عبد الله
Date: 11-23-2010, 09:53 AM
Parent: #13
طلحة
السلام عليكم ورحمة الله
اولا كامل تضامني معك وبقية قبيلة بنو الاحمر..
ثانيا وكما قال آخرون ..موضوع كور هلال مريخ دي ما عندها اي قواعد ثابتة ولا متحركة ..ولا يمكن التكهن بنتيجتها ابدا ..وهي عموما لا تعبر عن المستوى الفني او البدني للفريقين ..ياخ قبل كدة الزول الكهربتو زايدة الاسمو ايفياني غلب المريخ !!!!
ثالثا والله انا استغرب قصة الناس الاعصابهم بايظة ووصلوا لدرجة الدعاء الوارد بعاليه في خيطكم الكريم ؟!! ياخ حليل زمن هلال مريخ البتبوظ الاعصاب وغالبا ما تنتهي بي قون واحد وفي الاعم يكون نشلة كمان .. الزمن ده راح يا طلحة يا اخوي وبالنسبة لي شخصيا ..هلال مريخ بقت زي هلال موردة او هلال امل ...الخ ...
.
.
.
.
ياخ ان شاء الله المريخ يغلب الليلة عشان ناس اخونا عمر ومن شابه ينجموا شوية
|
Post: #16
Title: Re: إذا وقعت الثانية
Author: امير عوض الجمري
Date: 11-23-2010, 10:03 AM
Parent: #15
Quote: حليل زمن رجال المريخ لما يدخلوا الميدان كانوا يخوفوا
جماهيرهم وجماهير الفريق التاني ...
والويل والثبور وعظائم الأمور لأي فريق يتجرأ ويجيب فيهو الهدف الأول
هييييييييييي خربانة أم بنايا قش يا وليد ياخ |
احييييي يا طلحة حليل زمن جمال ابوعنجة يرجع النادي يقلع الشراب يلقى ضفرو الكبير معلق في الشراب والدم سائل ..
حليل بدر الدين بخيت البطلع من المباراة وهدومة شايلات مونا تبني اوضة عديييييل ..
لكن وبرغم كل شيء بنحبك يا مريخ حب قدر عظمتك
ومريخنا فوووووووووووووووووووووووووووووووووق .
|
Post: #17
Title: Re: إذا وقعت الثانية
Author: طلحة عبدالله
Date: 11-23-2010, 10:06 AM
Parent: #16
كابتن وليد تحياتي وربنا يحفظ الوالدة من كل شر ياخ Quote: اذا لعب الهلال شهر متواصل ضد المريخ سوف يمسح بكرامته الارض
ونرجع نقول برضو ماعندنا معيار ثابت
عادي ممكن المريخ يطقش الهلال .
والمريخ ينسى انه اضعف من فريق بالروابط
هكذا هو حال المستديرة عندنا
|
بصراحة المريخ بلغ من السوء ما ليس بعده إلا الروابط
اتمني ان ينصلح حال الأحمر الواهج ويقيض له ما يعيد بريقه وهيبته
وجبروته.
|
Post: #21
Title: Re: إذا وقعت الثانية
Author: وليد عبد اللطيف
Date: 11-23-2010, 10:35 AM
Parent: #17
| Quote: كابتن وليد تحياتي وربنا يحفظ الوالدة من كل شر ياخ |
تسلم ياغالي
امير الجمري
Quote: احييييي يا طلحة حليل زمن جمال ابوعنجة يرجع النادي يقلع الشراب يلقى ضفرو الكبير معلق في الشراب والدم سائل ..
حليل بدر الدين بخيت البطلع من المباراة وهدومة شايلات مونا تبني اوضة عديييييل ..
|
هههههههههه
تصوير بليغ يا امير الناس
هل تصدق رغم شراسة جمال ابوعنجة إلا انه يملك قلب وديع وصافي
ولا يقل عنه بدر الدين بخيت (سوسيوه ) وداعه
زمن يا امير زمن
تخيل هذه الاسماء داخل الملعب
جمال ابوعنجة سامي عز الدين وبدر الدين بخيت ابراهومه المسعودية والمهندس عادل امين (ياسلام ياسلام فن في فن ) وبالمقابل
في الهلال حمد والديبة والعوني والرشيد المهدية وكرار ابوعلي
ياخي الناس ديل لما تكون معاهم جوه الملعب (انعل ابو الكمنجه زاتو )
احكي ليك يا امير
عندما صعدنا بنادي الرابطة امدرمان للدرجة الاولى في كرنفال الصعود
طلبوا النجوم الدوليين ان اشارك معهم بأعتبار في كل المناسبات مشاركا لهم
مع قناعتي التامه لازم اللاعب يخرج ماعنده وحاجته الخاصه في مثل هذه المباريات
وكما تعلم الفنون جنون كان لازم نعمل جنون انا وزميلي عادل امين
وفي تلك اللحظة يصيح المشجع الخزين بالمايكرفون ويقول نقش والله نقش
عملنا شنو للان ماعارف لان مع النجوم صراحة الوحد يعيش حالة تسلطن
مره تلاقي جنبك طارق احمد ادم مره الرشيد استرليني مره سكسك ومره هيثم السعودي وكاريكا
كنت اصغرهم ولكن اخدمها لهم ومحل ماعايزنها اقدمها لهم في طبق حتى يسحرون بها الجمهور
الان يا امير وبكل صراحة لا ارى غير العجب وهيثم مصطفى يلعبون كرة القدم
ما اجمل ذكريات كرة القدم واتمنى في هذه الشهر الكريم الترحم
على روح اللاعب الشيخ ادريس كباشي ووالي الدين
اللهم ارحمهم وتقبلهم قبولا حسنا
اللهم اعفو عنهم واغفر لهم
|
Post: #18
Title: Re: إذا وقعت الثانية
Author: علاء الدين حيموره
Date: 11-23-2010, 10:13 AM
Parent: #16
| Quote: حليل زمن رجال المريخ |
| Quote: حليل زمن جمال ابوعنجة |
| Quote: حليل بدر الدين بخيت |
يا حليلك يا امير الجمري حالتك بقت تحنن ...
الاخ طلحة اتمنى ان يقدم الفريقين مباراة تليق بالنهائي ...
|
Post: #27
Title: Re: إذا وقعت الثانية
Author: طلحة عبدالله
Date: 11-23-2010, 11:21 AM
Parent: #18
علاء الدين حيمورة Quote: اتمنى ان يقدم الفريقين مباراة تليق بالنهائي
|
وانا اتمني ولا اتوقع
|
Post: #20
Title: Re: إذا وقعت الثانية
Author: طلحة عبدالله
Date: 11-23-2010, 10:24 AM
Parent: #13
Quote: هي حتما واقعه، ثانية حاسمه، شافية كافية.
|
أيامكم يا مرتضي ..
الله يجازي الكان السبب
|
Post: #19
Title: Re: إذا وقعت الثانية
Author: طلحة عبدالله
Date: 11-23-2010, 10:21 AM
Parent: #11
Quote: شهراً ما عندكم فيهو نفقة يا طلحة ما تعدوا ايامو
|
ما عدينا والله ياالصادق اخوي
|
Post: #22
Title: Re: إذا وقعت الثانية
Author: طلحة عبدالله
Date: 11-23-2010, 10:37 AM
Parent: #19
هلا يا البدري Quote: الزمن ده راح يا طلحة يا اخوي وبالنسبة لي شخصيا ..هلال مريخ بقت زي هلال موردة او هلال امل ...الخ ...
ياخ ان شاء الله المريخ يغلب الليلة عشان ناس اخونا عمر ومن شابه ينجموا شوية
|
حتى ولو غلب المريخ فدا لا ينفي حقيقة انه يمر بأسوأ مرحلة في تاريخه
بسبب ضعف مجلس إدراته الذي رهن رأيه وأفكاره وقراره للمتكسبين والأرزقية
الذين إتخذوا من خراب المريخ جسرا يعبرون به إلى مصالحهم ومآربهم ..
لن ينصلح حال المريخ مالم يدار وفق منهجية قائمة على شفافية المحاسبة
والجزاء ،على ان يتحمل كل صاحب مهمة مسؤولية واجباته له أو عليه .
الفوضي الضاربة بإطنابها في المريخ هي التى أوردته موارد الضعف والهوان
وعلى المريخاب أن يعترفوا بهذه الحقيقة لأن الاعتراف بالخطأ خطوة اولي
في طريق الصواب .
|
Post: #23
Title: Re: إذا وقعت الثانية
Author: وليد عبد اللطيف
Date: 11-23-2010, 10:48 AM
Parent: #22
طلحة
Quote: حتى ولو غلب المريخ فدا لا ينفي حقيقة انه يمر بأسوأ مرحلة في تاريخه
بسبب ضعف مجلس إدراته الذي رهن رأيه وأفكاره وقراره للمتكسبين والأرزقية
الذين إتخذوا من خراب المريخ جسرا يعبرون به إلى مصالحهم ومآربهم ..
لن ينصلح حال المريخ مالم يدار وفق منهجية قائمة على شفافية المحاسبة
والجزاء ،على ان يتحمل كل صاحب مهمة مسؤولية واجباته له أو عليه .
الفوضي الضاربة بإطنابها في المريخ هي التى أوردته موارد الضعف والهوان
وعلى المريخاب أن يعترفوا بهذه الحقيقة لأن الاعتراف بالخطأ خطوة اولي
في طريق الصواب . |
ياسلام عليك ياطلحة انت راجل حكيم جدا وارى انك تحمل الكثير في منهجية او منشط كرة القدم
وامكن الرياضة عامه لان ماقلته يقع على كل المناشط
صراحة اندية هلال مريخ تنفتقر لاشخاص مثلك يحملون فهم كبير بقدر حجم هذه الانديه
حسب متابعتي لكتابكتك رغم مريخيتك الصارخة
|
Post: #24
Title: Re: إذا وقعت الثانية
Author: عمران حسن صالح
Date: 11-23-2010, 10:57 AM
Parent: #23
((((((( اللهم ان تهلك هذه العصابة فلن تقوم لمريخنا العظيم قائمة قريبا اللهم انصرنا عليهم اللهم انت تعلم ضعفنا وقلة حيلتنا فانصر اللهم المريخ المؤسسة ))))))))))))
____________
إهههههههههههههههههههههههههههههه هي هي هي هي
بهذا أعلن محبتي وتضامني الكامل مع أخي طلحة
|
Post: #25
Title: Re: إذا وقعت الثانية
Author: عمار يس النور
Date: 11-23-2010, 11:07 AM
Parent: #23
طلحة ياإخطبوط
ياخ إنت الوحيد الفضلت بعد رحيل صديقك بول وفشل التمساح داك
لو قلت "وقعت الثانية" كان ريحتنا عديل.
في المرة الفاتت عبرت عنها بصيغة مخاطبة لمزمل ابو القاسم
المرة دي مالك متردد
اللهم أستر
تحياتي لك و لضيوفك الكرام
|
Post: #26
Title: Re: إذا وقعت الثانية
Author: طلحة عبدالله
Date: 11-23-2010, 11:14 AM
Parent: #25
سلامات يا أمير Quote: لكن وبرغم كل شيء بنحبك يا مريخ حب قدر عظمتك
ومريخنا فوووووووووووووووووووووووووووووووووق .
|
نحب المريخ لذلك نطالب بتنحي كل أصحاب القرار
والمتنفذين من الذين يقودونه حاليا على ان يعاد ترتيب
الأوراق بعد أن توضع الاخطاء والسلبيات تحت مجهر البحث
والتقصى ، وبعدها يمكن أن نحلم بعالم مريخي سعيد كما كنا..
شريطة ولنجاح هذا الأمر أن يبتعد عن الفريق كل المتحلقين حوله
من المتحاذقين والمتذاكيين والمدعيين والذين لا علاقة لهم بمجلس
الإدارة على أن يحيط هذا الأخير نفسه بسياج من الهيبة والوقار
وقوة الشخصية التى تتناسب وإدارة نادي في حجم المريخ .
الكلام دا عايز صبر يا جمري .
|
Post: #28
Title: Re: إذا وقعت الثانية
Author: طلحة عبدالله
Date: 11-23-2010, 11:31 AM
Parent: #26
Quote: ياسلام عليك ياطلحة انت راجل حكيم جدا وارى انك تحمل الكثير في منهجية او منشط كرة القدم
وامكن الرياضة عامه لان ماقلته يقع على كل المناشط
صراحة اندية هلال مريخ تنفتقر لاشخاص مثلك يحملون فهم كبير بقدر حجم هذه الانديه
حسب متابعتي لكتابكتك رغم مريخيتك الصارخة
|
والله يا كابتن وليد شهادة ابروزا على صدري
لكن بس كلامي الفوق دا المفروض يكون معروف لكل مريخي حادب على
مصلحة الكيان خاصة أصحاب الرأي والقرار .
من مشاكل المريخ ان أصحاب القرار فيه يتعاملون مع قضايا النادي
بالعاطفة أكثر من تحكيم العقل ..
يمكن لمجلس الإدارة ان يخسر مليارات في صفقة محترف خاسرة حتى يستمتع
بردود فعل الجمهور وجرايد المشجعين التى تهتف له في اليوم التالي
ولا يخسر مليما واحدا في لاعب مغمور يرجى منه مستقبلا .
وقس على ذلك الكثير من تعاطيه الإداري .
|
Post: #29
Title: Re: إذا وقعت الثانية
Author: الطاهر ساتي
Date: 11-23-2010, 12:50 PM
Parent: #28
Quote: اللهم ان تهلك هذه العصابة فلن تقوم لمريخنا العظيم قائمة قريبا اللهم انصرنا عليهم
اللهم انت تعلم ضعفنا وقلة حيلتنا فانصر اللهم المريخ المؤسسة |
فعلا انهم ( عصابة )
اللهم اهلكهم بصواريخ بشة وقاذفات البرنس
|
Post: #30
Title: Re: إذا وقعت الثانية
Author: طلحة عبدالله
Date: 11-24-2010, 07:00 AM
كانت ستكون ليس لوقعتها رافعة
لكنها لم تقع ..
يتبع ....
|
Post: #31
Title: Re: إذا وقعت الثانية
Author: Al Sunda
Date: 11-24-2010, 07:47 AM
Parent: #30
Quote: كانت ستكون ليس لوقعتها رافعة
لكنها لم تقع .. |
الصحيح
ولذلك لم تقع
مبروك للمريخاب وهارد لك لينا
فليس كل ما يتمناه .......................
|
|