حـكـايـة قِـرِنـتِـيّـة كـرِيّـمـة ...

إعـادة نـشـر...

قالوا:... الله يكفينا شر قلنا، وقالوا...
في كريمة ظهرت قرنتية. محّنت الناس مِحنة شديدة. كمّلت الجروف، وسدرت
لافوق كمّلت المزروع في الحيضان، وكان في جرايد نخل مهدلات أكلتن. قش
الواطة لحستو. البروس عدمتو نفااخة النار. التقاعدمتهاأسم الحبة،
الفي بطن المطآمير برضو لحقتو.
الناس حاولوا المستحيل للقبض عليها أو قتلها، لكن كلّ المحآولآت بآءت
بالفشل. أعيان البلد عقدوا إجتماع طارئ وقرروا إرسال برقية لشـرطة
أتـبـرا...

وصلت البرقية، وردّت عليها شرطة أتبرا بإرسال إثنين شاويشية لكريمة.
نُحآف زي المساويك. قُدآم من زمن الأردية والعِمم. كل وآحد دآرع في
كتفو بُندقية أبوعشرة، كان علقها في كتفو اليمين يميّل معاها يمين،
وكان علقها في كتفو الشمال يميّل معاها شمال. يآآآآالله شايلين روحهم
وقالِيّن البنادق...

وصلوا كريمة مواعيد الفطور. ناس البلد كلهم مرقوا لإستقبالهم
فوق المشرع. ركبوهم فوق الحمير وزفوهم علي المضيفة.
حليل المضيفة. ( المضيفة عبارة عن غرفة كبيرة, تبني في مكان
منعزل غير بعيد من المنازل، وغالباً يبنيها ناس البلد عن طريق
النفير. وهي مأوى لكل عابر سبيل. يتفقدها ناس البلد في مواعيد
الطعام عسي أن يكون لجأ إليها عابر سبيل)...

بعد فاصلوهم، وأخدوا خبارهم، الفطور وصل. الجاي بملاح دمعة
بقُرآصة، والقُرآصتو مملحة بملاح ورق، والجاي بعمود، ووأحد بصحن
كبير مغطي بكبديق، ووأحد كسرتو بايته مملحها بلسان طير، وشي مُلآح سبروق.
فوقهم ناس البلد من كل صوب وحدب، بأصناف متعددة من الطعام. إنكسروا
أكلوا تماااام، ومصمصوا أصابعينهم. بعد دآك وصل الشاى. كل وآحد الجماعة
شرب تسعي. حقبوا بنادقهم، وبقو مندلين علي البحر...

الوقت منتصف النهار، والسخآنة تقلي الحبة. النسوان قامن
علي(التكلة) شدّن الحِلل فوق النار. الحِلل يجقجقن، والبلد
صآآآنة، وصوت الفنان الكاشف منبعث من راديو قديم حجارته قديمة
يحاول بصعوبة أن يوصل صوت الكاشف للسآمعين وهو يردد (حبيبي آه
وقلبي تآه يوم الزيارة). الصاجات مولعة، والقراريص مردومة في
الطُبآقة. القرية صآآآنة، والدخآخين منبعثة من التكلة ورواكيب
العوآسة. قطع هذا الصمت صوت حُمار بدأ يهنِق أزعج قمريتين في
رأس التمرة، طارن وركّن فوق شُدرة سُنُط، قوقن لفترة بسيطة، وسكتن
لِيعود الهدوء يعم المكان، وبدأ صوت المذياع يظهر من جديد. ضعيّف،
متقطع، والنعام آدم يردد(يقولوا لي يا مسكين عليك ظلم الحسن
وحسين، يا دآب قل نوم العين).
الجماعة مصنقرين فوق البحر والقرنتية ما منها خبر...

الوقت منتصف النهار، والسخآنة تقلي الحبة. النسوان قامن
علي(التكلة) شدّن الحِلل فوق النار. الحِلل يجقجقن، والبلد
صآآآنة، وصوت الفنان الكاشف منبعث من راديو قديم حجارته قديمة
يحاول بصعوبة أن يوصل صوت الكاشف للسآمعين وهو يردد (حبيبي آه
وقلبي تآه يوم الزيارة). الصاجات مولعة، والقراريص مردومة في
الطُبآقة. القرية صآآآنة، والدخآخين منبعثة من التكلة ورواكيب
العوآسة. قطع هذا الصمت صوت حُمار بدأ يهنِق أزعج قمريتين في
رأس التمرة، طارن وركّن فوق شُدرة سُنُط، قوقن لفترة بسيطة، وسكتن
لِيعود الهدوء يعم المكان، وبدأ صوت المذياع يظهر من جديد. ضعيّف،
متقطع، والنعام آدم يردد(يقولوا لي يا مسكين عليك ظلم الحسن
وحسين، يا دآب قل نوم العين).
الجماعة مصنقرين فوق البحر والقرنتية ما منها خبر...

حان موعد الغداء.
نادوهم للمضيفة، وناس البلد يعجبوك. ردموا قرآريص، ومِلحآت
تكفي يأجوج ومأجوج. الجماعة دفسوا تمآآآم، وشربوا الشاي. تآني
كل واحد تسعى، وقاموا علي البحر.
الجو أصبح معتدل نوعا ما. لحظات العصاري جميلة. النيل هادئ،
وساكن لايُعكّر صفوه إلآ مركب حوآتة تعبث بمجاديفها خالقة فوضي
في وسط السكون الممتد يين الضفاف.
الجماعة حاقبين بنادقهم وقاعدين. البيناولهن سيجارة،
البيناولهن سفة، واحد يديهم تمرآت. ترمس كبكبيق... الخ
وكت الواطة بقت المغيرب نادوهم للشاى. شاي المغرب طبعاً
شئ أساسي في البلد، وبلبن طبيعي. البرآريد، والكبابي، وقُداحة
اللقيمآت ما تديك الدرب، وكل زول يحلف عليهن لآزم يضوقوا
شاهيهو، وزلابيتو، وهم طبعاً أسكت كِب.
ضربوا تمآآآم إندفسوا، وبقو مندلين علي البحر...

بدأت حالة الرباط من جديد تحت ضوء القمر، الذي أطلّ في تلك
الساعة من خلف النخيل جاعلاً جزء من ظلالها ممتد علي الرمال البيضاء،
والجزء الآخر منعكس علي صفحة النهر. القمر متسلل للأمام، والظلآل
متراجعة للخلف، والقرنتية لم تظهر بعد، حتي تناقصت الظلآل وإختفت،
وأصبح القمر بلونه الفضي منعكس علي صفحة النهر.
حان موعد العشاء...
الجماعة حقبوا بنادقهم وبقوا سادرين. كمية غير عادية من الفطير
باللبن، والقُرآصة بالسمن والسكر، وقُرآصة التمر كانت في إنتظارهم.
ضربوا تمآآآم، وكل وآحد كتحلوا كورية لبن، ورقدوا ناموا...

الصباح عيونهم فتحن فوق براريد الشاي وقُدآحة الزلآبية. لهطو تمآآآم
ما قصّروا تب، وبقوا مندلين علي البحر.
ثلاثة أيام بالتمام والكمال وهم علي هذه الحالة، والقرنتية كأنها
ما وجدت ولا خُلقت...

يوم في ساعة الغداء. البروش مفروشة، وعليها كمية من صواني الأكل
لاتجد كميتها في أجعص دكان عِدّة في البلد، والجماعة عرقانين، وشغالين
لهِط نضيييف.
وآحد من ظرفاء البلد علّق قائلاً: والله يا جماعة، الأكل الأكلوهو
الجماعة ديل، القرنتية زآآآتها من ربنا خلقا ما أكلتو...

حبيبنا ود المدير ,,كل سنة وانت طيب.

حباب قرنتية كريمة الحبيبة

وان شاء الله نشوف عبد الله بزقة.

تحياتنا للمغداد.

Quote: حبيبنا ود المدير ,,كل سنة وانت طيب. حباب قرنتية كريمة الحبيبة وان شاء الله نشوف عبد الله بزقة. تحياتنا للمغداد.

وإنت طيّب يا نديدي،
عبد الله بزقة في الإرشيف،
والود بتاع برشلونة ماخد الموضوع
جد، جد، ولو عملها اكيد كلنا حا يضربنا
الهمبريب...

معاوية ود المدير
السلام عليكم ورحمة الله

ياخ والله كتر خيرك على الحكي الجميل ..بالله كتّر منو وما تحرمنا

Quote: وآحد من ظرفاء البلد علّق قائلاً: والله يا جماعة، الأكل الأكلوهو الجماعة ديل، القرنتية زآآآتها من ربنا خلقا ما أكلتو...

ههههههههههههه

مبالغة ..!!


شكرا يا ود المدير ..

تعرف يا معاويه فى بلدنا قالوا أكلت جروف الدشيناب وقت قبضوها لمو فيها
كالوت وشبكوها هرى اللوبه- ياخ بقرة الله تاكل الجزيره كلها تقولى قرنتيه
ياخ دى ما ياجوج وماجوج ذاتو وصفاتو.




منصور

Quote: معاوية ود المدير السلام عليكم ورحمة الله ياخ والله كتر خيرك على الحكي الجميل ..بالله كتّر منو وما تحرمنا

البدري، حيث لا بدر غيره في أُفُق السماء، كما يقول دكتورنا، واديبنا الصوفي العابد الزآهد،
امين محمد سليمان سلمه الله، وإياكَ من كل بلاء.
عليكم السلآم ورحمة الله.
وإنت كمان كتّر خيرك علي المرور، وما تحرمنا من طلآتك.
عميق شكري...

Quote: ههههههههههههه مبالغة ..!! شكرا يا ود المدير ..

شكراً يا ناذر ود الخليفة علي الطلّة،
والضحكة المجلجلة.


اوّا مرّة زول يشكروهو علي ضحكة.
هههههههههههه... إلخ

Quote: تعرف يا معاويه فى بلدنا قالوا أكلت جروف الدشيناب وقت قبضوها لمو فيها كالوت وشبكوها هرى اللوبه- ياخ بقرة الله تاكل الجزيره كلها تقولى قرنتيه ياخ دى ما ياجوج وماجوج ذاتو وصفاتو.

المنصور، ثابت عندك.
والله يا منصور، اكان ماني خايف من وِلآد أهلك الحايمين
في البورد ديل، اكان طلّعت لك زبدة عدييييل من حكاويك
البتحكيها لي عن الدشيناب، وناس الشيخ الطيّب. بس خلّهم
يدوني الآمان.

يا اخوي مسعول من الخير. وين شيخ إمام الطيّب؟؟؟