أخيراً ... نورد الدين ابنعوف إلى ألمانيا اليوم ...

الأخوات والأخوة الأفاضل ...

الأخ الزميل أنور كينج ...

كل عام والجميع بألف خير ...

بحمدالله وفضله .. تكللت مساعي الأخ الكابتن البحري نور الدين ابنعوف للسفر لألمانيا للعلاج .. بالنجاح .. وسوف يغادر دولة الإمارات بعد ظهر اليوم بإذن الله برفقة شقيقه ناجي ابنعوف إلى ألمانيا بعد أن تمَّ الترتيب والحجز له بالمستشفى بألمانيا ..

الشكر لكل الإخوة والأخوات من أعضاء وقراء منبر سودانيزاونلاين الذين ساهموا بأفكارهم .. وجهودهم .. وسعوا لتحقيق هذا الأمر .. فقد نجح البعض منهم فعلاً في توفير جزءٍ من المبلغ المطلوب من جهاتٍ خيرية ومن أفراد خيرين بدولة الإمارات ..

الشكر للقنصلية السودانية بدبي .. ولسعادة القنصل السوداني الذي سعى بنفسه لحل هذه المشكلة وتوفير جزء من الدعم المالي المطلوب لسفر الأخ نور الدين ..
الشكر للجالية السودانية بدبي وعلى رأسها السيد رئيس الجالية السودانية الأخ عيسى آدم ..

وقد حمَّلني الأخ نور الدين أمانة توصيل شكره وإمتنانه لكم جميعاً...

نتمنى للأخ نور الدين رحلة علاج موفقة .. كما نتمنى أن يعود إلينا سالماً معافى من كل شر ..

الأخوة بورداب ألمانيا .. ما نوصيكم على نور الدين ..

ونسأل الجميع الدعاء له بعاجل الشفاء ..

Quote: نتمنى للأخ نور الدين رحلة علاج موفقة .. كما نتمنى أن يعود إلينا سالماً معافى من كل شر ..

اللهم لك الحمدل ولك الشكر حمدا كثيرا طيبا مباركا مليء السموات والارض وما حولهما ..

اللهم اشفى نور الدين وارجعه الى اهله فى كامل عافيته يارب يا كريم ..

تصحبكم السلامة اخى نوري ونتمنى العوده مصحوبة بالشفاء التام وموفور الصحة ..



شكرا اخى عبدالله كسلا .. الرجل الشهم اخو الاخوان شيال التقيله ..

شكراً ليك كتير يا عفاف ..

نسأل الله أن يعيده إلينا وهو يتمتع بالصحة والعافية ..

الشكر لله أولاً .. ثم لكل من ساهم ولو بكلمة طيبة .. ودعاء لنور الدين ..

تسلمي يا هميمة ..

نسأل الله ان يشفه ويرده إلى أهله سالما معافى ...نور الدين مثال للشخصية السودانية الأبية ..بورداب ألمانيا لا تحتاجوا لوصية .
شكراً أخي عبدالله على هذه الأخبار المفرحة

الحمدالله .. الحمدالله .. الحمدالله

نسال الله ان يشفه ويمدها بالصحة والعافية وان يرد الى اهلها سالمن وبصحة جيدة يارب

شكرا لكل من ساهم فى سفر نورى الشكر لك اخ عبدالله كسلا على الاخبار الجميلة

تحياتى ..

جاى لاى مدينة؟

خت التلفون لو سمحت




عيد سعيد

ابراهيم يا فنان يا هميم ..

اولا البركة فيكم وفينا فى وفاة حبيبنا سمندلاوي ..

عارفاكم ما بتقصروا وإن شاءالله سوف يمدكم الاخ عبدالله كسلا بكل العناوين هناك ..

الأخ الدكتور إبراهيم عبد الحليم ..

كل سنة وإنت طيب ..

والبركة فيكم وفينا في فقدنا جميعاً .. الأخ المرحوم سمندلاوي ..

حقيقة نور الدين لم يترك لي رقم هاتف ..

ولكنه وعدني بالاتصال بي من ألمانيا وإعطائي رقم الهاتف ..

أما إسم المدينة والمستشفى .. فسأحاول الحصول عليها وتزويدكم بها في أسرع وقت ممكن ..

عموماً نفس المعلومات موجودة لدى زميلنا الدكتور Anwar King ...

أتمنى أن يقوم بوضعها هنا للإستفادة منها بواسطة بورداب ألمانيا ...

تحياتي

شكراً ليك يا خالد ..

والحمد لله تكللت المساعي بالنجاح ..

ونسأل الله لنور الدين أن يمن عليه بالصحة والعافية ..

كلكم ما قصرتوا يا خالد .. إن شاء الله في ميزان حسناتكم ..

شكراً ليك أخي الحلاوي ..

والله كلكم ما قصرتوا أبداً ..

إن شاء الله في ميزان حسناتكم يا رب ..

يلا يا بورداب ألمانيا .. ما محتاجين لوصية ..

الاخ عبد الله

كل عام وانت بالف خير

اللهم اشفى نور الدين وارجعه الى اهله فى كامل عافيته يارب يا كريم ..



--------------------

لقيت كم اتصال منك على شريحة اتصالات
انا حاليا موجود بالسودان ويمكن الاتصال على الرقم 0922222836

و هنا كانت ضربة البداية.....

لا حول ولا قوة إلا بالله، زميلنا نوري أبنعوف ( الأخطاء ...لطبية في مستشفى دبي)

ثــم هنــــــــا......

ناس الامارات ..من اجل نور الدين ابنعوف (احد ضحايا الاخطاء الطبية )

يا سـلاااام يا عبدالله ياخي غبتة و جبتة الأخبار البتفرح الجميع.....
أولاً الحمدلله حمداً كثيراً و الشكر له على توفيق الجميع إلى ما نحن فيه الآن......
كتر ألف خيرك وجزاك الله عنا خيراَ يا وش السعد....

الشكر لكل الإخوة والأخوات من أعضاء و قراء منبر سودانيزاونلاين الذين ساهموا بأفكارهم.... وجهودهم..... ووقتهــم.....
و لجعل هذا ممكناً.... أمنياتنا أن يتم الله نعمته و أن يسبغ على نوري نعمة الشفاء و يرجع إلى اهله سالماً و معافى.....

الشكر للقنصلية السودانية بدبي متمثلة في سعادة القنصل السوداني الأستاذ عصام متولي الذي سعى بنفسه لحل هذه المشكلة و لم يتوانى في
تقديم الدعم المالي و المعنوي لزيارة نور الدين في منزله والإطمئنان على صحته.....
الشكر للجالية السودانية بدبي وعلى رأسها السيد رئيس الجالية السودانية الأخ عيسى آدم....

الاخ عبدالله

انا موجود بالشمال الغربى جوار الحدود الهولندية

تلفونى 01771445834

بجوارى كذلك د. محمد جميل حوالى ٥٠ كيلومتر. د. جميل طبيب انف واذن وحنجرة هو الذى استضاف الشريف زين العابدين الهندى الله يرحمه

الاخ سيف مساعد فى الوسط

نصار رحل لبلجيكا على ما اعلم

غير كده الامارتيين عندهم قنصلية خاصة لعلاج مرضاهم موجودة بمدينة ميونخ جنوب المانيا. يعمل بها سودانيين انا بعرفهم.

يعنى حيمرق مننا وين ههه

اللذيذة فيزتوا ملتيبل Multiple

عاجل الشفاء

يا سلام عليك إنت يا هيثم يا خي ...

أنا كنت محتار أجيب اسم المستشفى من وين .. وعارف أني كنت نزلته في بوست سابق ..

والحمد لله إنت جبت البوست المقصود والفيهو اسم المستشفى .. وغالباً اسم المدينة كمان ...

الأخ الدكتور إبراهيم عبد الحليم ... هاك اسم المستشفى وموقعها على الإنترنت:

ده اسم المستشفى القام نورد الدين بالاتصال بيها في ألمانيا...

والمتوقع أن يتم فيها العلاج ...

مشفى هايدلبرغ الجامعي

Heidelberg University Hospital

http://www.heidelberg-university-hospital.com


ربنا يشفي نور الدين .. ويمتعكم جميعاً بالصحة والعافية ...

تحياتي للجميع ...

اوكى هيدلبيرغ بجوار فرانكفورت

دكتور إبراهيم .. لو سمحت ممكن تكتب لينا رقم تلفونك كامل مع الكنتري كود ..

(country code)

حاولت الاتصال .. لكن ما بيجمع معاي ...


شكراً ليك كتير ...

00491771445834


00491622409515

آسف لإزعاجك يا إبراهيم ..

رجعت لبروفايلك ولقيت الرقم كامل ..

شكرا ليك ..

الأخ الحبيب عبد الله كسلا...الأخوة والأخوات بورداب الإمارات، سعادة القنصل السوداني بدبي عصام متولي
و للجالية السودانية بدبي وعلى رأسها السيد رئيس الجالية السودانية الأخ عيسى آدم ..

قسماً بالله أن ما تفعلوه الآن خارق لكل شئ تعارف عليه الناس في كل العالم، سوى هذه الأرض الطيبة التي أنجبتنا، وطننا
الحبيب السودان...

لا أجد كلمات مناسبة تصف مدى شعوري بالفرح، والفخر والإمتنان...
كل يوم يستعيد الشخص منا ثقته بأن السودانيين والسودان بخير...

لكم المحبة والتقدير جميعاً...

ومن أياديكم الطيبة إلى يد الأخ الفاضل الدكتور محمد البخيت الباشا... الطبيب السوداني في نفس المستشفى في المانيا (وكلنا فخر بذلك)
التي يتجه لها الأخ نوري الآن
وقد عرض كل خدماته وتلفونه هو
تلفوناته وعناوينه:

الدكتور محمد البخيت الباشا
تلفون Heidelberg
Mobile:+4917665577887

لي عودة
أنور

هوي سلام


ده كلام شنو


تلفون ود عوج الدرب

الاسبوع ده شغال صباح يعني بعد الساعة 15 بكون

اوف

تلفوني 017670139707

الاخ عبد الله كسلا



اتصلت علي دكتور الباشا ولقيت التلفون مفلق ولكن اخد اشارة مني sms


تب ماعندك عوجة

ابشر بالخير

شكرى اخ انور كينغ على اهم رقم تليفون فى العالم

جرى الاتصال بالاخ محمد الباشا


الاخ سيف مساعد

يا اخوى المريض واخوه ديل شكلهم والله اعلم جايين على الاماراتية مطار فرانكفورت وبعدها باين توجههم بالقطار لهايدلبرج. المساعدة ستكون بتوجيههم الوجه الصحيحة للمستشفى فى هايدلبرج مباشرة

الاخ محمد الباشا سيكون بكرة غير موجود

خت ليهم رقم تلفونك اخ سيف


حسب معلوماتى من الاخ محمد الباشا ان اختيار هذا البروفيسور وهذه المستشفى اختيار صادف اهله تماما فهو من اعظم البروفيسورات فى هذا المجال

شكرا ابراهيم عبدالحليم


فعلا الدكتور الباشا رجل ذو همة وذو شعور حية


اتصلت به واخبرني بكل شئ وان شاء الله قبل مغادرته سوف يتصل بي


انا شغال حتي الساعة 1500

يعدها بصلهم كان الله ادي العافية

Quote: يعدها بصلهم كان الله ادي العافية

هيييييع

قوات العدل والمساواة ستخترق حصون مدينة هايدلبرج الجامعية هههه


سيف مساعد تسلم يا اخ عارفك ماك هين وتحياتى موصولة للاخ السر ميرغنى و عبد المجيد

نسأل الله أن يمن بالشفاء والصحة لأخينا نور الدين
وأن يجزيه كل خير عن صبره واحتسابه..

شكراً لكم جميعاً ..

شكراً لكل من ساهم في هذا العمل الخيري ولو حتى بالدعاء فقط ..

شكراً حبيبنا Anwar King .. فقد كنت المبادر بالدعوة لمساعدة صديقك وزميلك نور الدين ..

شكراً لكم أحبتنا بورداب ألمانيا..

الأخ الدكتور إبراهيم عبد الحليم ..

الأخ سيف مساعد (ود عوج الدرب) ..

الأخ نصَّار ... وكل بورداب ألمانيا ...

نور الدين الآن معكم .. وما أظنكم في حاجة لوصية ...

والشكر موصول للدكتور محمد الباشا الذي أبدى إستعداده لمتابعة حالة نور الدين خاصة وأنه يعمل في نفس المستشفى التي يتوجه إليها نور الدين ...

ونسأل الله أن يجعل كل ذلك في ميزان حسناتكم جميعاً ...

Quote: حسب معلوماتى من الاخ محمد الباشا ان اختيار هذا البروفيسور وهذه المستشفى اختيار صادف اهله تماما فهو من اعظم البروفيسورات فى هذا المجال

اللهم لك الحمد ولك الشكر لجلال وجهك وعظيم سلطانك ..

اللهم لك الحمد ولك الشكر حمدا طيبا مباركا مليئ السموات ومليئ الارض وما بينهما ..

نحمد الله كثيرا .. على كل هذا التفاعل وهذه الوقفه المعهودة منكم اخوتى واحبائي ..

جزاكم الله كل خير فيما تقومون به تجاه الاخ الكريم نوري .. والله الراجل يستاهل كل خير ..

نور الدين نعم الاخلاق ونعم الانسانية انسان راضي بحكم الله عليه .. عشان كده ختاكم فى طريقه ..

الحمدلله على وجودكم هناك .. واكيد ما بتقصروا فى حقو نهائي ..

شكرا ابو النسب د. إبراهيم عبدالحليم (( حلوه النسب دي ههههههه))
شكرا سيف مساعد يا رجل يا هميم ..
شكرا انور كينج لولاك ما كان كل هذا الفخر ..

لكم الود جميعا ..

ولي نور الدين كل الصحة والعافية وراحة البال ..

الله يفتحها عليك أخي عبد الله كسلا

لهذا الخبر المفرح ولمجهوداتك المقدرة

ولجميع من شارك بالمال او الجهد او الدعاء


وندعو الله في هذه الأيام المباركة

ان يعود الينا أخينا نور الدين سالما معافا

يالله اشفي نوري وارجعه سالم غانم واحفظ له شبابه وافرحه وافرح اهله وافرحنا..
جزاك عند ربي كل خير أخي الخيّر عبدالله كسلا ..
وربنا يجزيء القنصلية والسفير عصام متولي كل خير ..
وربنا يجزيء الأخ عيس ادم كل الخير ومعه افراد واعضاء النادي السوداني بدبي ..
ونشكر بورداب الامارات وعلى رأسهم الريس اسامة ادريس ..
ولاننسى الأخت نعمات حمود التي اول ما ابتدرت الموضوع بالذهاب للأخ نوري ..
ولاننسى من اخوات نسيبة عفاف بت الصادق ..
وقبل الكل الأخ أنور كنج نعم الصديق لنوري ونعم الوفاء ..

** الاخ عبداله كسلا..
** الاخوات والاخوان بورداب الإمارات..
** ســـلام..

## نتمنى من الله العلى القدير أن يكتب سلامة الاخ نورالدبن ابنعوف وان تُكلل عمليته بالنجاح ,,
## وياها المحريه فيكم ياأعضاء وطن من لاوطن له "سودانيزونلاين"..

(ودام الود بين الجميع)

ويييين الناس ديل نحن منتظرينهم من امبارح؟؟؟؟؟؟

جاين بياتوا خطوط والساعة كم وعلى اى مطار؟؟؟


الاخ د. محمد الباشا سافر الان الى ميونخ و برجع الاربعاء

الإخوة الأحبة الدكتور إبراهيم .. سيف مساعد .. وبقية بورداب ألمانيا ..

اتصلت قبل قليل بمنزل أسرة نور الدين في دبي .. وعرفت منهم إنه نور الدين وصل إلى المدينة التي بها المستشفى .. (هايدلبرج) .. ونازل في فندق هناك .. (متوقع معرفة اسم الفندق ورقم التلفون مساء اليوم أو صباح الغد) .. وإنه عنده مواعيد بكرة الصباح ما بين الساعة 9 - 10 صباحاً في العيادة الخارجية بالمستشفى .. (غالباً قسم الجراحة) .. واضح إنهم حيبدوا معاهو من البداية .. بفحوصات كاملة حتى بعد داك يدخلوه المستشفى ..

حأكتب ليكم رقم التلفون الخاص بنور الدين واسم الفندق هنا بمجرد معرفتهما ...

تحدثت قبل قليل مع الدكتور محمد الباشا .. وعرفت منو إنه حيرجع من ميونخ مساء الغد ..

شكراً ليكم كتير .. وياها المحرية فيكم ...

الاخ الحبيب عبدالله كسلا


كنت متابع مع الباشا حتي الساعة 11 صباحا اليوم ولم يجدهم

بعدها غادر الي ميونخ وسوف يصل بمشية الله بعد غدا الاربعاء


نسال الله له الشفاء العاجل

ياناس المانيا عارفاكم ما بتقصروا .. خلو بالكم من نور الدين ..

شكرا سيف مساعد للمجهود المقدر ..

شكرا دكتور إبراهيم يا ود الاصالة ..

بورداب الامارات ما قصرتوا ربنا يبارك ليكم فى ايامكم ...


نرسل تحياتنا للاخت نعمات ونتمنى لها التوفيق فى حياتها ..

Quote: يالله اشفي نوري وارجعه سالم غانم واحفظ له شبابه وافرحه وافرح اهله وافرحنا.. جزاك عند ربي كل خير أخي الخيّر عبدالله كسلا .. وربنا يجزيء القنصلية والسفير عصام متولي كل خير .. وربنا يجزيء الأخ عيس ادم كل الخير ومعه افراد واعضاء النادي السوداني بدبي .. ونشكر بورداب الامارات وعلى رأسهم الريس اسامة ادريس .. ولاننسى الأخت نعمات حمود التي اول ما ابتدرت الموضوع بالذهاب للأخ نوري .. ولاننسى من اخوات نسيبة عفاف بت الصادق .. وقبل الكل الأخ أنور كنج نعم الصديق لنوري ونعم الوفاء ..

ونشكر الله سبحانه وتعالى الذي خلق الداء والدواء ويسر من عباده من يعمل على خدمة الناس ...شكراً لله ثم لكل من اسهم بوقته وماله في مساعدة نوري ولله الحمد حمداً يوافي نعمه ويكافي مزيده.

الناس ديل وييييين

لماذا لم يتصلوا لا بى ولا بدكتور محمد الباشا

الاخ عبدالله
الاخوة و الاخوات المتداخلين
دا توفيق ما بعده توفيق و ان شاءالله تكون بشارة خير
بشفاء الاخ نورالدين شفاء لا يقادر سقما
جامعة هايدلبيرق هي الافضل على الاطلاق في مجال الطب
في المانيا و من الافضل عالميا
و كذا مستشفاها الجامعية
انا الان مقيم في بلجيكا كما ذكر العزيز ابراهيم
لكن عمل دكتور الباشا في نفس المستشفي شي
مطمئن و عبره يمكن تعريف نور الدين و شقيقه
بالسودانيين في هايدلبيرق و مانهايم المجاورة
لها
الهم اسفي عبدك نور الدين شفاءا تام
و اعده لاهله سالم ظافرا

وابن عمنا الدكتور محمد بابكر جميل مع نوري كل التفاصيل ...نسأل الله أن يعود دكتور محمد بخير ولوالده الرحمة والقبول إنا لله وإنا إليه راجعون

شكراً أخي الحبيب نصار على المرور .. وكل سنة وإنت طيب ..

نعم .. عرفنا من الدكتور إبراهيم بأنك إنتقلت إلى بلجيكا ..

ولكن .. والحمد لله .. الإخوة في ألمانيا ما قصروا .. والشعب السوداني ياهو الشعب السوداني في اي مكان .. دي تربيتنا .. وثقافتنا .. التكافل الاجتماعي .. والوقوف مع بعض عند الشدائد والإحن ..

ربنا يشفي نور الدين ويرجعو لأهله معافى يا رب ..

تحياتي أخي الدكتور إبراهيم ... أخي سيف مساعد .. أخي أنور كينغ ..

وعبركم للدكتور الباشا ... والدكتور وائل ..

أنا على اتصال مع أسرة نور الدين في دبي .. وعرفت منهم إنه نور الدين قضى معظم يوم الثلاثاء الماضي في المستشفى لإجراء فحوصات .. ورجع الفندق في المساء .. وحيكون منتظر النتائج .. وبعد داك حيدخلوه المستشفى .. وحتى الآن ما عرفت اسم الفندق .. وكمان نورالدين ما عمل ليو تلفون هناك حتى الآن عشان نقدر نتصل بيهو ..

عموماً يا إبراهيم انا اديتهم رقم تلفونك .. وتلفون الدكتور الباشا .. وسيف مساعد .. بس نور الدين حقيقة .. وبالرغم من ظروفه دي .. حساس شديد .. ودائما انا وهو في خلاف في الحتة دي .. لإنه دائما ما عايز يكلف الناس .. وما عايز يتعب الناس ويتلتلهم معاهو .. عشان كده انا خليت الكورة في ملعبه .. واديت التلفونات لأهله ووريتهم رغبتكم في تقديم المساعدة ليهو هناك .. وهم اكيد حيكونوا ادوه ارقام التلفونات دي .. وما علينا كلنا سوى الانتظار لحدي ما يتصل هو سواء بي انا هنا .. أو بيكم إنتو هناك ..

ويا سيدي كتر خيركم كتير إنت وسيف مساعد .. والدكتور محمد الباشا .. والدكتور وائل .. على الاهتمام المستمر .. والسؤال المتواصل .. وخلونا نكون على اتصال .. وإنتو كمان لو لقيتو طريقة برضو امشو شوفوه بعد ما يدخل المستشفى ويبقى محلو معروف .. وهو اكيد .. اكيد حيكون محتاج لوجودكم معاهو .. بس ما تتحسسوا من عدم اتصالو بيكم .. ولما تشوفوه يا إبراهيم حتعرفو ليه انا بقول ليكم كده .. حتلقو زول بطنو مفتوحة .. وفي نفس الوقت ما عايز يتعب الناس معاهو .. ده نور الدين .. إنسان مرهف وحساس اكتر من اللزوم .. ربنا يشفيهو ويعافيهو .. ويرجِّعو لأهله سالم غانم يا رب ...

الحبيب عبد الله كسلا...
نتابع معكم من على البعد...أرجو أن لا تقطعوا الاخبار وربنا يعجل بالشفاء إن شاء الله

مودتي وتقديري ومحبتي
أنور

الاخ عبدالله كسلا


الراجل ده قول ليهو ود عوج الدرب قال ليك لاتحرمنا من اجر الزيارة والدعاء

والله لو بقي في اخر الدنيا نصلو

Quote: ربنا يشفيهو ويعافيهو .. ويرجِّعو لأهله سالم غانم يا رب ...

نور الدين معذور لكن اخوهو ما يتصل ويطمنا عليهو يا عبدالله ...

Quote: نور الدين معذور لكن اخوهو ما يتصل ويطمنا عليهو يا عبدالله ...

** بت الصادق..
** عبدالله كسلا..
** مساءكما خير..
## فى إتصال بشقيقتهم أفادتنى بالآتى:-
** حالياً فى مرحلة الفحوصات ,, وجدوا أن آثار الجروح الداخليه عميقه والخيار هو:-
** أن يظل بقرب المستشفى للمُراجعه الى أن تبرأ هذه الجروح ومن ثم يمكن إجراء العمليه بعد ذلك على ضوء حالة الجروح وتقدير الطبيب المُعالج وربما يستغرق الامر مدة تتراوح بين الشهرين أو الثلاثة أشهر ..
(مع الامانى بعاجل الشفاء لنورالدين)
(ابو محمد فؤاد)

شكراً جزيلاً ليك حبيبنا المستشار عبد الكريم أحمد الأمين (الما كيكي) ...

دخلت وكنت أزمع تنوير الإخوة الزملاء بالمعلومات التي ذكرتها ...

الحمد لله نور الدين في أيدي أمينة الآن .. ويجد الرعاية التي يستحقها ... قد يستغرق الأمر شهرين أو ثلاثة أشهر .. ولكن النهاية بالتأكيد ستكون سعيدة بإذن الله .. وسيعود نور الدين إلى أهله وهو معافى تماماً إن شاء الله ...

شكراً لك أخي أنور على المتابعة والإهتمام .. وسنوافيكم بالمستجدات أولاً بأول ..

شكراً ليك يا سيف على كلماتك الجميلة .. وياها المحرية فيكم أهلي السودانيين في كل مكان وزمان ..

الشكر موصول للأخ الدكتور إبراهيم عبد الحليم .. والأخ الدكتور محمد الباشا .. والأخ الدكتور وائل ..

ولكل بورداب ألمانيا عبركم ..

نور الدين أمانة عندكم الآن .. وهو يحتاجكم ... وأكيد .. أكيد ما حتقصروا معاهو ...

تحياتي للجميع بدون فرز ...