سياسة سودانية في محل حلاقة - بكندا

كل عام والجميع بخير اللهم ارحم موتانا وموتى المسلمين وأجعل مستقبلنا افضل من ماضينا وأجعل بني الإنسان مكرما اينما كان
اللهم آمين.
قصة واقعية حدثت في كندا وهي عبارة عن نقاش في السياسة على الطريقة السودانية

مسرح الأحداث: محل حلاقة يملكه كندي من اصول سودانية
داخل المحل - الحلاق صاحب المحل و معاه واحدة خواجية يبدو الخواجية جات تنجٌد للحلاق كراسي قديمة وجنبهم طفل عمره تقريبا بين 4 و5 سنة ولد الحلاق.
الحلاق و الخواجية مشغولين بالنتجيد جاء داخل المحل زبون سوداني
الزبون: السلام عليكم
الحلاق: وعليكم السلام كيف حالك؟ إتفضل اديني بس دقيقة
الزبون طلع الكوت الكان لابسه وعلقه على الشماعة وقعد على كرسي الحلاقة قدام المراية منتظر الحلاق
الحلاق بعد خمس دقايق تقريبا جاء وبدا يجهز في مكنة الحلاقة وباقي الأدوات .
الحلاق: كل سنة وانت طيب كيف العيد معاك؟
الزبون: والله تصدق انا نسيت الأيام دي ايام عيد وانت طيب وإنشاء الله ربنا يحقق الأماني ويخلي ليك اولادك شفت البلد دي كيف!
الحلاق: البلد دي ما بتديك اي احساس بالعيد, دايرها كيف الحلاقة؟.
الزبون: واحد في واحد ونص.
الحلاق وهو بيحلق للزبون: ضربت السودان يوم العيد لقيتهم معيدين وضاربين الشيات والمرارات ومبسوطين.
الزبون: العيد ليه طعم خاص في السودان وبالأخص عيد الضحية.
الحلاق: اي والله ... الإنتخابات اخبارها شنو؟
الزبون: أنتخابات شنو؟
الحلاق: قصدي ...... سموها شنو دي!
الزبون: الإستفتا
الحلاق: ايوه الإستفتا. قايمة في وقتها ولا في تأجيل؟
الزبون: لا ما أظن في تأجيل, قايمة في وقتها الناس ديل ملوا الإنتظار.
الحلاق: سمعت انه الإنفصاليين اغلبية في الجنوب!!
الزبون: الإنفصاليين ما أغلبية .... الجنوبيين كلهم دايريين الإنفصال.
الحلاق: كيف الكلام دا؟؟
الزبون: الجنوبيين في الأوضاع الشايفنها دي لو ما صوتوا للإنفصال يكونوا أغبياء.
الخواجية في الوقت دا إنتهت من تنجيد مسند و رفعته بيدها فوق وسالت الحلاق من رايه (بالإنجليزي طبعا)
الحلاق: جيد جدا. واستمرت الخواجية في باقي شغلها.
ونواصل ........

نواصل .....
الحلاق: بالعكس الجنوبيين كان إنفصلوا يكونوا أغبياء ويكونوا اغبى ناس على وجه الأرض!!!
الزبون: الجنوبيين بعد الإنفصال في أسوأ الظروف يكونوا أحسن من حالهم في الوحدة مع حكومة الشمال الحالية.
الحلاق: الجنوبيين شافوا البترول وقايلين البترول دا حينفعهم لكن بدون الشمال ما بساو حاجة.
الزبون: الجنوبيين بدوا التمرد عشان يطالبوا بحقوقهم فبل ما يكون في بترول في السودان.
الحلاق: منو القال ليك البترول دا طلع زمن النميري سنة 76 ما بتذكر؟ البترول دا طلعه النميري
الزبون: ما فيش اي بترول طلع زمن النميري والناس ديل ما اتمردوا على الحكومة عشان البترول
الحلاق: جون قرنق ومجلسه كانوا عارفين كويس انه في بترول في الجنوب
الزبون: طيب الجنوبييين ديل اتمردوا من سنة 56 على الحكومة في الخرطوم!
الحلاق: ما البريطانيين ايوه البريطانيين كانوا عارفيين اي حاجة من زمن الإستعمار ووروا الجنوبيين عشان كدا كانوا عارفيين في بترول
الزبون: البريطانيين ديل ادوا السودان إستقلاله بدون مشاكل لو كانوا عارفيين في بترول ودايريين الجنوبين ينفصلوا ما كان يفصلوه وهم لو دايريين كانوا خلوا السودان عشرة دول.
الحلاق: مش الجنوبيين ديل! خليهم بنفصلوا والله ينضربوا جنس ضرب.
الزبون: البيضربهم منو؟
الحلاق: الأمريكان!!!! والله الأمريكان حيضربوهم ما يخلوا فيهم زول
الزبون: الأمريكان يضربوهم ليه؟ مصلحتهم شنو؟
الحلاق: مصالح ما الحروب دي كلها مصالح وهم دايرين الثروات الموجودة في الجنوب وما دايرين الناس
الزبون: والله دي أحلامك وامنياتك انت بس لكن ما عندها اي علاقة بالواقع.
الحلاق: أحلام شنو وامنيات شنو. إنت كمان ما تخلي الموضوع شخصي.
الزبون: شخصي شنوا كلامي ما فيه اي حاجة شخصية.
الحلاق: يا زول انت ما عارف حاجة انا عايش في كندا دي اكتر من عشرة سنة انا عارف الأمريكان ديل كويس.
الزبون: لو عشت جوة البيت الأبيض عمر ابو الهول انت معرفتك صفر.
الحلاق: انت الما بتعرف حاجة.
الزبون: والله كان دي معرفتك انت ما بتعرف حاجة والجنوبيين ديل طلعوا ازكى من الشماليين وكلها سنة بالكتير وحنشوف مين البيضحك أكتر.
الحلاق بإنفعال شديد: مش العبيد ديل والله خليهم ينفصلوا والله يضربوهم ضرب غرائب الإبل والفضلوا حيجوا الشمال!
المسالة جاطت والأصوات ارتفعت وبقى كل واحد يتكلم , ودي كلها الزبون مسلم راسه للحلاق والحلاق مستمر في حلاقته .

الزبون: يازول ما تقول عبيد انت قايل نفسك شنو.
الحلاق: يا زول انت غبي ولا شنو؟
الزبون: يا زول أحترم نفسك وما نقول لي غبي! انت ليه تقول عبيد انت ولا ابوك ولا جدك الكان مستعبدهم؟
الحلاق: والله الأمريكان ما حيخلوهم وانت قايل زمن النميري الكان بيمد السودان بالسلاح و بيضرب المتمردين منو ما الأمريكان
الزبون: انت تقول عبيد للناس ديل ليه؟ انت قايل نفسك ابيض ما انت برضك اسود, لا شكلك ولا ملامحك ولا لونك بيقول احسن من الجنوبيين عشان تقول ليهم عبيد!! ولو انت ما كنت عايش في كندا كنت حتقول شنو؟؟؟؟
الحلاق: يا زول انت غبي ولا شنو انا ...
في اللحظات دي الخواجية وقفت وعاينت للموقف دا شوية وقالت: يا جماعة انتو الإتنين تتكلموا في نفس الوقت تفهموا بعض كيف؟؟؟(بالإنجليزي طبعا)
مافي زول إشتغل بيها وهي قبلت تكمل شغلها.
ونواصل ....

يا محمد فعلا سياسة على السكين وأظن محلات الحلاقة المناقشات السياسية فيها بتكون حادة.. ولكن المهم استفدنا كثير
مما دار في هذا النقاش حول الانفصال أو عدم الانفصال,, وكمان استفدنا كيفية تفادي الانجرار وراء الاستفزازات
السياسية .ز
والله يديك العافية والصحة

أميرة

Quote: مما دار في هذا النقاش حول الانفصال أو عدم الانفصال,, وكمان استفدنا كيفية تفادي الانجرار وراء الاستفزازات السياسية .ز والله يديك العافية والصحةمما دار في هذا النقاش حول الانفصال أو عدم الانفصال,, وكمان استفدنا كيفية تفادي الانجرار وراء الاستفزازات السياسية .ز والله يديك العافية والصحة

كل سنة وانت بخير
مرات نحن السودانيين المناقشة السياسة عندنا مخلوطة بحماقات و سخافات و فروسية كاذبة
نفتكر اننا لازم ننتصر فيها بكل الوسائل المباحة وغير المباحة خاصة لما النقاش يحتدم وفي اللحظة دي في كتيريين بيظهروا على حقيقتهم وبيطلعوا حاجات كتيرة جواهم ومؤمنيين بيها و ما دايرنها تظهر .
شكرا على التعليق والله يديك العافية

تراجي
كل سنة وانت والأولاد بالف خير
الزول دا عايش في كندا وعنده معلومات ما صحيحة لكن في النهاية دي وجهة نظروا ودا فهمه الواحد بيحترمها لكن المشكلة انه بدون اي مبرر يصف الناس بالعبيد وكمان دايرهم ما ينفصلوا !!!
عشان يتسلى بيهم الظاهر هو و أمثاله.

محمد علي
سلام و كل عام و إنت بخير


هاها

عارف حلاقكم ده ه زي حلاق الجامعة زمان يتكلم في السياسة حسب مقدرتو وفهمو !!


منتظرين تواصل في القصة !!

أتوقع إنو الحلاق يزعل و يزعمط ليك الزبون ده

أو
الزبون يحرد و يقوم و ما يكمل الحلاقة و يرفض يدفع ليهو ربع دولار.



طبعا عقلية هذا الحلاق موجودة فعلا و للأسف.
و فعلا هذا السؤال قوي جدا :التمرد في الجنوب قبل الإستقلال فما هو علاقته مع البترول !!


تحياتي

Quote: عارف حلاقكم ده ه زي حلاق الجامعة زمان يتكلم في السياسة حسب مقدرتو وفهمو !! منتظرين تواصل في القصة !! أتوقع إنو الحلاق يزعل و يزعمط ليك الزبون ده أو الزبون يحرد و يقوم و ما يكمل الحلاقة و يرفض يدفع ليهو ربع دولار. طبعا عقلية هذا الحلاق موجودة فعلا و للأسف. و فعلا هذا السؤال قوي جدا :التمرد في الجنوب قبل الإستقلال فما هو علاقته مع البترول !!

ههههههههههههها
:)


عمار
كل سنة وانت بالف خير
إنت عارف معظم الحلاقيين بيناقشوا مع الزباين مواضيع سياسية إقتضادية إجتماعية وفي أغلب الحالات بيجاملوا الزبون وبيكونوا على موجته
لآنه الموضوع عنده بحكم الخبرة ونسة ويشغل الزبون لحد ما يخلص.
الله يديك العافية

Quote: الزبون: والله كان دي معرفتك انت ما بتعرف حاجة والجنوبيين ديل طلعوا ازكى من الشماليين وكلها سنة بالكتير وحنشوف مين البيضحك أكتر. الحلاق بإنفعال شديد: مش العبيد ديل والله خليهم ينفصلوا والله يضربوهم ضرب غرائب الإبل والفضلوا حيجوا الشمال! المسالة جاطت والأصوات ارتفعت وبقى كل واحد يتكلم , ودي كلها الزبون مسلم راسه للحلاق والحلاق مستمر في حلاقته . الزبون: يازول ما تقول عبيد انت قايل نفسك شنو. الحلاق: يا زول انت غبي ولا شنو؟ الزبون: يا زول أحترم نفسك وما نقول لي غبي! انت ليه تقول عبيد انت ولا ابوك ولا جدك الكان مستعبدهم؟ الحلاق: والله الأمريكان ما حيخلوهم وانت قايل زمن النميري الكان بيمد السودان بالسلاح و بيضرب المتمردين منو ما الأمريكان الزبون: انت تقول عبيد للناس ديل ليه؟ انت قايل نفسك ابيض ما انت برضك اسود, لا شكلك ولا ملامحك ولا لونك بيقول احسن من الجنوبيين عشان تقول ليهم عبيد!! ولو انت ما كنت عايش في كندا كنت حتقول شنو؟؟؟؟ الحلاق: يا زول انت غبي ولا شنو انا ... في اللحظات دي الخواجية وقفت وعاينت للموقف دا شوية وقالت: يا جماعة انتو الإتنين تتكلموا في نفس الوقت تفهموا بعض كيف؟؟؟(بالإنجليزي طبعا) مافي زول إشتغل بيها وهي قبلت تكمل شغلها. ونواصل ....

كل سنة و أنت طيب يا أبو السناير.
فالجماعة ما زالوا مسخنين، فما عارف لو ما كانوا في بلد الجليد، أكيد حيطاعنوا و ربنا يستر

فتحايانا لناس كندا

الفاضل
كل سنة وانت بخير
بالرغم من البرد الأيام دي في كندا
السودانيين مسخنيين في كل بقاع الدنيا عشان الإستفتاء الجاي
يديك العافية

نواصل ..........................
الفقرة الأخيرة

الزبون: يا زول أحترم نفسك انا كلمتك ما تقول لي غبي. أنت إنسان عايش في كندا لكن تفكيرك تفكير إنسان في عصور الإنحطاط
الحلاق: يا زول انا ما قلت عبيد ما تقولني كلام انا ما قلته انا لوني اسود منك كيف اقول عبيد
الزبون: كمان داير تكضب انت قبل شوية ما قلت العبيد ديل خليهم بس بنفصلوا؟؟؟؟
الحلاق: انا أصحابي كلهم دينكا كيف اقول ليهم عبيد؟
الزبون: الظاهر انت من النوع ذو الوجهين تلاقيهم تضحك معاهم ومن وراهم تقول ليهم عبيد خلصنا بالله خلينا النمش.
الحلاق: يا زول انت متخلف ولا شنو؟ انا زول جامعي ما ممكن اقول عبيد انا قصدي الأمريكان بيقولوا العبيد ديل لما ينفصلوا نضربهم
الزبون: دا ما الكلام القلته قبل شوية والكلمة دي ما ممكن يقولها زول عايش في كندا.
الزبون دفع للحلاق ولبس كوته وهو طالع, الحلاق لحقه عند الباب وقال ليه : إنت ما تفهم كلامي غلط ياخي انا ما ممكن اقول عبيد وانا عارف الكلمة دي هنا في كندا فيها على الأقل سنتين سجن.
الحلاق ما قال للزبون نعيما كالعادة ولا الزبون عاين بعد الحلاقة في المراية عشان يراجع الحلاقة ومشى للباب وهو يطنطن
الزبون وهو يفتح الباب: يا زول انت ما أحسن من اي زول في الدنيا دي المهم ما تقول عبيد للناس وخليك في حلاقتك أحسن.
والباب إتقفل و الزبون مشى.