أوصف ليك حالتي ؟؟ أوصفها ليك كيفن عاد..

تعرفي .. يمين بالله اول مرة اعرف مكانتك جواي قدر ده ..
لا حولااا !!
والله أتاريك ماكنة جنس مكن .. ياخ إنتي كنتي مالياني عديل كده
اقول ليك .. أصلا انا كنت لابسك بودي
بردان .. أول مرة أحس بالبرد جواي .. زمان عرفنا الحمى الداخلية .. يعني الزول يكون مسخن من جوة بس
لكن شكرا لإمتاعي بارتعاش رئتي بردا ..
الهواء زيف يا زولة .. الهواء ينخز في الحشا زي الما لابس لي جسم

والله فاقدك !!
دايما عزالة .. باعترافك إنتي .. مش مرة قلتي لي إنتي عزالة عشان عزلتيني أنا ..
هسي برضك والله عرفتي تختاري يوم ستيف شنطتك .. ياخ الدنيا صبحانة عيد !!
وانا الصباح مرق علي ما زي كل يوم .. الشمس مسلوخة بي مبضع نطاس ..
النور حزاز يخش ويمرق فيني من غير تحية .. حاسي بي نفسي بقيت شفاف ..
زيفة الهواء ونور الشمس خلوني ماشي في الشارع واتلفت شان ما أكون ماشي في الصقيعة ساكت ..
تعالي يا زولة .. الباب لسة مفتوح .. والدنيا ليل وحاجاتك زي ماهي .. لا اتفحت طاقة بي وراك .. ولا قدرت على المرقة أنا ..
تعالي نقطع فيافي الخوف الملت سكتنا .. تعالي نمسح يوم طويل وغبي ..
تتذكري زمااان
ذات مساء وبلكونة وشاي قلتي لي ما عارفة .. لكن بحس أي زول طويل غبي ..
هسي اليوم داك ما كان طوييييل ليه شلتي منو صفة الغباء ..
أقول ليك ..
انا ذاتي كسرت ليك ابو سلسفيل اليوم داك ..
بشتنتو لمن هو ذاتو فهم حاجة وحلف زي حليفة أخونا علاء صالح أقسم بالذي خلقني ........ إلخ تاني ما برجع ..
كيفك عليك الله ..
وحشتيني شديد والله .. والبيت زاتو اتوحشك .. لسة البن قاعد فوق التنكة راجي السكر .. سكر يدك .. ينزل نقطة نقطة ..
ولسة انا على وعدي .. ما ها أشرب شاي بالسكر ولا قهوة بسكر ..
لكن .. يا انا ..
قريفة القهوة حارة ما بقدر عليها .. الراس مشموط والكتف اتعسم .
اطلع من غرفة وأدخل تانية ..
بس قبل ما اخش بغمض زي الداير أتفاجئ ..
بعد ما ادخل جوة شديد وانا بقول يارب يارب يارب شان أفتح عيني وألقاك هناك واقفة زي كل مرة رجعت فيها البيت ..
هسي عايزاني أصدق .. إنتي ما موجودة في البيت؟؟
ياخ انا المافي .. البيت زاتو مافي ..
بس خليك إنتي في حتتك يا أصلب أرض وقفت عليها


عليك الله كان قريتي الكلام ده أعملي لي رنة بس
وعدي لغاية تلاتة وعايني بي البلكونة ها تلقيني واقف تحت قدام بيتك بين الشجرة وباب البيت ..


وكل سنة وإنتي طيبة .. يا الأيامك كلها عيد

سالت الله لا تعمل مس كول لا رنة ولا تقرا البوست دا زاتو , وتخليك تحت الشجرة تتصلب لمن تعرف حاجة , تقضي طيور الشجرة تلك حاجاتها وانت تتقبل ذلك متصلبا جامدا يهز دواخلك البرد القلت عليهو فوق داك وتمسح ما يسليل علي وجهك من حاجات تلك الطيور النزقة التي توزن حاجاتها عليك ولسانها يردد انت واللين وتعود الي البيت بعد وقفة طويلة وتجده مثلما تركته لا صوت فيه سوى نعيق بوم كيبوردك الاخرش الذييطقطق بلا هدى وبامل لا يمكن ادراكه


بمناسبة العيد دا كل سنة وانت طيب والعفو لله ورسوله

وإنت طيب يا أساسي ياخ .. وإنت طيب


any how شكرا لرفع البوست

فلك السلام عزيزتي .. ومنك السلام
.
.
.
ولك الجلوس على مداخل دهشتي ومخارج رعشتي ولك القيام

Quote: ذات مساء وبلكونة وشاي قلتي لي ما عارفة .. لكن بحس أي زول طويل غبي ..

الدنيا عيد يا صاحب فباللاي ما تنبز لو سمحت ياااااخ
اكتب يا صاحب فما احوجك للكتابة والجلوس وحيدا
تتأمل وتعد النجوم نجمه نجمه
لا بد من خطوات التنظيم لتنظيم الصفوف
فقد كان يوما عزائي الكيبورد وتمنيت قيام القيامة
ولكن مع الاسف قامت قيامة الغافلين عن الدنيا
اكتب ثم اكتب وقل لها
اذا حسيتي انو رجليك وجعوك!!!!!
يكون دا من كترت ما انتي بتمشي وتجي على بالي
لوووووووووول
لكن هي منو يا حبيب؟

كن بخير

Quote: لكن هي منو يا حبيب؟

ربما تكون حمامة سلام ركَة على غصني يوم أن أرسلت على الأثير كل أوتاري..
أخخخخ يا صاحب .. أبت الأنغام أن ترن ,, ولكن يبقى في القلب مساحة لاتكائة عابري الليل الأثير

^^^^^^^^^^^^^^^^^^^^^^^^^^
كل عام وإنت بخير يا صاحب

سلامات يا صاحب وكل عيد وانت وهي طيبين ومتلمين

Quote: لسة البن قاعد فوق التنكة راجي السكر ..

عجبتني الحتة دي شديد لمن اتقريفتا ومشيت عملتا لي فنجان من النوع ابو كديس داك

يديك العافية

كيفك يا بكري .. كيفك وكيف العيد وإياك ..
كل سنة وإنت بألف خير يا صديقي وربنا يديك الفي مرادك

يا سيدي القهوة تنفعك .. لكن انا قهوتي البدق ليها الدوا منو؟؟

الأجاويد كملو من البلد دي وللا شنو ؟؟
.
.
.
أطالب الأخ بكري بإضافة المزيد من الوجوه الحزينة

أعملي رنة يا السمحة قومي استعجلي ..


وتعالي لي مساءات بنكهة البن الما بتفوت ..


تعالي وما تمسخي أيامك براك ..كللللو تحت بند الحب محلول ..




ـــــــــــــــــ

محمدعمر ده زول كويس ياخ

محمد عمر ..
سلامات وكل عام وهن بخير, واعنيهن جميعا ومفردهن حنان, تلك التى جواك
وبعدين كل عام وانت ذاتك بخير وبتكتب ذات الرجاءات ب مس كول واحد..
وهذا الكلام الجميل عن البن وباب بيتم

يا حيدرنا المشرف ..
ينعاد عليك العيد بالخير والبركة ..
هنّ .. سر أسرار الوجود .. بل هن الوجود في أزهى تجلياته
أما هي .. فهي من أطاحت بأشرعتي على مرافئها .. وأنستني معها أن للحياة وجه آخر
لم أدركه إلا بعد خراب مالطة .. وبعد ان نعق البوم على أسوار المدينة ..

أحترم الأنثى .. بل أضعها في مصاف المقدسات .. فهي من ساعدتني كثيرا لأفهم الحياة
حتى صرت أخلط بينهم الإثنين ..
برجاء مراجعة هذا البوست لتحكمنا أنثى .. إذن

داليـــا .. وينك يا زولة
كل سنة وإنت طيبة ياخ .. قربت أفتح بوست أسأل منك ..
..
عليك الله شفتي الزولة دي سغيلة كيف ..
...............
كلميها بالله .. أقول ليك .. أديها نهرة عديل كدة
إييييييييييه ..
عليك الله راجعي البوست ده
كل جينات عشق امدرمان ورثتها وحيدا من جدَي..
_____________
وينك .. يا ذات الحجاب؟؟

محمد .. وما طالبني حليفة .. ضربت ليك كتير في تلفونك ودايماً بيتعذر الوصول ليك ..

أما كلامك ..
فياخي إن شاء الله ترجع ، آت ليست عشان إنت ترجع للقهوة الخاصمتها دي ..


أما شوقنا ..
فإن شاءالله يصلك ...

هلا بكاهن المنبر .. وكبير أساقفة الفيس بوك ..
كل سنة وإنت طيب يا صديقي العزيز .. راجع الخاص عشان الرقم ..
وعليك الله بالمرة رسلو ليها إحتمال نستو
أحيييييييي أنا من القهوة ..
يمين أشرب منها لمن الضغط يرتفع وسعر البن ذاتو يزيد
بس اليجي زول يعملها ......

Quote: وكبير أساقفة الفيس بوك ..

بس دي خذلتك فيها ...لوووووووووووووووولز

Quote: بس دي خذلتك فيها ...لوووووووووووووووولز

هاهاهاي .. ما خذلتني يا حبيب .. بالعكس إجابتك كانت شافية ووافية

وتحياتي ليك مرة تانية

محمد عمر
تحياتي
وكل سنة وانت طيب


وربنا يحقق الاماني

بعدين انت وكت عندك عربي قدر دا الوداك السودان الجديد شنو؟

يا هلا بعمر صديق في رحاب هذا البوست المتهالك
أعاد الله علينا وعليكم العيد بالخير واليمن والبركات
..
قيل في المثل البورندي .. المعاناة بتخليك تصرف عربي كتير
هذا المثل ذو جذور ضاربة في القدم .. ولكن استخدمه البورنديين
بعد مجازر الهوتو والتوتسي ..

__________
السؤال موجه للسيد صاحب الموقع الذي أبت نفسه إلا أن نكتوي بنيران المنابر الأخرى


تحياتي يا صديقي