سـهرة أبو عركــي أجمل عيديه من تلفزيون السودان !!!

في خطوه غير متوقعه وغير مسبوقه من تلفزيون السودان,
أبو عركي ينثر الفرح والحب في أجمل عيديه للشعب السوداني,
يحلق بنا عاليا ويغنّي بأجمل وأنقي صوت لم تغيره السنين,
صوت قوي وحضور مدهش وسهره ولا في الأحلام,,

حقيقي سهره مدهشه تدمع لها الأعين من الفرح ,,,

غنّي ,,

فرح ناعم,
بخاف,
عن حبيبتي بقول لكم,
ياقلب,,

تاني شنو؟

العزيزة أمانينا
كل سنة وانت طيبة، ويعود عليك العيد وانت في أنعّم حال!
___
التحايا الشديدة..

ياسرنا,,
حمد الله علي السلامه,
وعيدكم سعيد انت والمدام وكل أمنياتكم محققه انشاء الله,



ماحضرت حفلة عركي يا ياسر؟
طيب نص عمرك ضاع,
كانت فرح مجاني معبأ بأناقه تم توزيعه علي الحضور وعلينا المشاهدين عبر الشاشه,
سعاده غير متوقعه من تلفزيون السودان العودّنا علي أحادية الفكر والتوجه,

ياربّي يكونو ناويين لينا علي شنو الناس ديل يا ياسر؟ لووووووووول




---
كان نفسنا نودعك لكن دايما تأتي الرياح بشنو كده ما عارفه ههههههه

أبوعركي مثال للفنان الملتزم لفنه المتكامل,
ابتداءا من الفل سوت مرورا بالكلمات البديعه البتلمس المواطن البسيط,
الي اللحن الجميل والصوت القوي,

شكرا للفنان أبو عركي علي الفرح الذي أصبح معدوما في بلادنا,
زرعته فينا بعودتك عبر تلفزيون السودان,
ذكرتنا بالتلفزيون زمان,
وذكّرتنا بتسجيلاتك القديمه الياما حفظناها قبل أن يخطو الشيب ويداهم وجهك الوقور ومهموم دائما,

وبالجد كنت واحشنا جدا في الشاشه يا فنان :)

عيدنا يا اماني
عديناهو شغالين، كالعادة..
___
تخيلي عندي، لحمة قاعدة في التلاجة ليها إسبوعين تقريباً، كبيت ليك عليها بصلة وتوم وبهارات، وبامية صغارة، وفركتها، حقيقة ما فركتها، النار تكفلت بذلك، ومشيت البقالة جبت لي كيس أنجيرا.. وأكلت منها وسوف أترك الباقي لبكرة، لو ما جاني واحد زي رايح ليهو عيد.. والحمد لله الذي لايحمد على "اللغاويس" غيره.

وسهرنا الليل وكملناه


ويظل أبوعركي هو أبوعركي فن أصيل وطرب جميل ودهشة لا تنتهي

له التحية بقدر ما أفرح ليالينا






--------------------------------

أماني كل سنة وإنت طيبة

فارس كل سنه وانت بصحه وسعاده,,

تصدق تلفزيون السودان حخليني أنوم قريرة العين بعد الفرح الغير مسبوق ده ؟!!!
من الفرح فتحت بوست وأنا لي مده ما عندي نفس للبورد وكتابة البوستات !!

جميل انك كنت حاضر الحلقه ونالك من الفرح جانب :)


وانشاء الله دايما :)

اتصفحت البورد ولقيت عدد من البوستات المبتهجه بعودة الحبيب المنتظر :)


يبدو انه توقيت عودة عركي له صله بالنفق المظلم البتمر بيهو البلاد,
عركي في أحدي أغنياته وقف عند كلمة الوحده وانفعل معاها,

كم هي جميله عودتك لاحياء روح الشعب المهزوم ومقتول كمد يافنان,

بنشكر طلتك البهيه ,,

اماني
تحياتي وعيدك سعيد
المهم أنشالله وجعك الابدي أنتهي
والله عند ذائقة راقية
تحياتي لبقي الجندريات خصوصا بت اليمني

كل سنة وإنتي طيبة يا كمندان

.

الحبيب الفنان الجميل هشام كمال

Quote: .

شكراً على الإسهاب..

كلامك معبر جداً والله..

تصدق في عداد المداخلات المشاركات ؟؟


عليك الله خلي البخل بتاعك دا هشام ياخي..

الأخوان هشام كمال وممحمود مصطفي,,
كل سنه وانتو طيبين ,,

Quote: فرح ناعم, بخاف, عن حبيبتي بقول لكم, ياقلب,,

الاخت امانى لك التحية
هل تصدقى فاتتنى ! شفت الدعاية بالله لمن تعاد ارفعوا البوست تانى كلمونا

ندي صالح مرحب بيك,,

Quote: الاخت امانى لك التحية هل تصدقى فاتتنى ! شفت الدعاية بالله لمن تعاد ارفعوا البوست تانى كلمونا

شوفي متعة حضور السهره كامله علي الشاشه لاتضاهيها متعه,
انشاء الله يعيدوها تاني,
لكن عموما التسجيلات نزلت وماليه اليوتيوب,
وفي العديد من البوستات المشابهه,

Enjoy :)

الأخت أماني عيد مبارك عليك وكل أهل الحوش
حقيقي هي أجمل عيدية للشعب السوداني، ذلك
المبدع ، الهرم الشامخ ، الخلوق ، المتواضع
لدرجة تخجل ، عمانا الفرح الحقيقي في دار
الإتحاد بأم درمان عندما علم الجميع تلبية أستاذنا
لرغبة جمهوره ومحبيه بعد غياب دام لسنوات مضت
كالعادة كان متألقاكبدر ليلة تمه ،،

شكرا أستاذي أبوعركي على هذه العيدية الجميلة

التي ستظل عنوان بهيج لكثير من الأقلام والقوافي
وتبقى شعلة نور في زحمة الزمن الخرافي
هلّ عيد السعد بيك و بيك محى ويا عوافي


عام سعيد ومبارك للجميع

سلامات اخت اماني

وكل سنة وانت طيبة

استمتعنا حتى الثمالة في تلك الأمسية الجميلة بما قدمه أبوعركي

والشكر الجزيل للشاعر الرقيق عبد الوهاب هلاوي وللمخرج شكر الله

خلف الله اللذان قادا المفاوضات مع أبو عركي ليعانق معجبيه

بعد غياب طويل عن الشاشة .

الأخت أماني سلام و كل سنة و إنتي طيبة و ربنا إحقق الأماني


أبوعركي فنان مخلص لي فنه و مخلص لي معجبيه

مش عيدية دي كانت عيد كاااااااامل


تحياتي

امانى الامين لك التحايا وكل سنة وانت بخير وتعم الافراح بعودة الفنان الرائع الى جمهوره

الأخ الصديق حامد,,
كل سنه وأمنياتك محققه ودعائك مستجاب انشاء الله,,

Quote: و تعم الافراح بعودة الفنان الرائع الى جمهوره

الاخت اماني كل عام وانتم بخير


فرح ناعم

Quote: تخيلي عندي، لحمة قاعدة في التلاجة ليها إسبوعين تقريباً، كبيت ليك عليها بصلة وتوم وبهارات، وبامية صغارة، وفركتها، حقيقة ما فركتها، النار تكفلت بذلك، ومشيت البقالة جبت لي كيس أنجيرا.. وأكلت منها وسوف أترك الباقي لبكرة، لو ما جاني واحد زي رايح ليهو عيد.. والحمد لله الذي لايحمد على "اللغاويس" غيره.

ياسرنا معليش علي الرد المتأخر, بس الغيّبني من البورد أمبارح برنامج الضحيه والذبائح وصينية الفطور واعدادها .. اكسترا .. اكسترا ..
طبعا لايخفي عليك انه اجازتنا العيد ده طوييييييله وبرامج التلفزيون ممتعه جدا

عيد الضحيه من الحاجات النادره البتذكرنا بضرورة القيام بواجب الحمد والشكرعلي وجودنا داخل السودان,
فسبحان الذي لايشكر علي التواجد داخل السودان سواه

....





أبو عركى وجه شكر كتير و كرر شكره لكل الناس الطيبوا خاطرو
و ألحوا عليه بالعودة للمسرح القومى والإطلالة من خلال الشاشة الأولى
و حقيقة عودة أبو عركى كانت هى العيد بذات نفسو ، و يقينى أن
فنان بقامة أبو عركى يسمو بفنه فوق كل الترهات من أجل الوطن.

لشدما أكبرته عندما قال بأنه نتاج لكل السودانيين و أنه مجرد ولد
لبت المنا و البخيت و إحتفى بنا جميعا بأكثر مما إحتفينا به .

عودا حميدا فناننا و موسيقارنا الكبير أبوعركى البخيت فما أحوجنا
لفنك الجميل و نحن نخطو داخل النفق .



شكرن كتير Amany Elamin
على هذه المساحة





....

Quote: اماني تحياتي وعيدك سعيد المهم أنشالله وجعك الابدي أنتهي والله عند ذائقة راقية تحياتي لبقي الجندريات خصوصا بت اليمني

شكرا للتحيه والمعايده,
وكدي موضوع البوست خليناهو,
انت يازهير البقول ليك بوستك بتاع (عايز أتجوز) داك مُضحك وقاطعو من راسك, تلصّق ليهو (وجع أبدي)؟


يا (زوال) ؟

Quote: كل سنة وإنتي طيبة يا كمندان

أشرف الحلبي صديقنا الذي يكره الأغاني الهابطه,
عيدك سعيد وأمنياتك محققه انشاء الله,

فرق حبيب الشعب عركي من (فناني الرقشات) بتوع (أولاد قلبا) و (مهند ونور) وأمثالهم, فرق الثريا من الثري !!

هو الفن ده مش كان رساله وأمانه زمان؟


مالو بقي مصدر رزق وشهره لكل من هب ودب؟

ماليهو حق أبو عركي يسيب الساحه الفنيه يسرح فيها أمثال هؤلاء ويمرحوا !!

العاجبني بصراحه من المسرح اللي أقيمت فيهو الحفله,
انه أثبت انه رغم مضي عشرون عاما علي ظهور عركي علي التلفزيون,
الا انه الشباب حافظين أغانيه وعايشنها بأحاسيسهم كمان,

ومازال في الخاطر والوجدان,,

أبو الحسين كل سنه وانت طيب,,

Quote: أبوعركي فنان مخلص لي فنه و مخلص لي معجبيه مش عيدية دي كانت عيد كاااااااامل

صدقت,, هو عيد كامل لاينقصه شئ,,

البحراوي الأصيل طارق ميرغني,,
وانت بألف خير و نوّرت البوست,,

شكرا علي الفيديوهات, نحمد الله علي نعمة التوثيق لهذا الجمال,

وشكر خاص علي أغنية فرح ناعم تحديدا,
لأنها أخذت لبّي تماما في الحفل, وبهرتني كلماتها وألحانها وأدائها,,


مشكور,,

الأخ عماد أحمد ,,
هلا بيك وكل ينه وانت بصحه وسعاده,,

Quote: والشكر الجزيل للشاعر الرقيق عبد الوهاب هلاوي وللمخرج شكر الله خلف الله اللذان قادا المفاوضات مع أبو عركي ليعانق معجبيه بعد غياب طويل عن الشاشة .

لهم الشكر أجزله حتي يستغيثوا,
أسعدوا الملايين من أبناء الشعب في أحلي عيديه في أمسيه غير مسبوقه,


وشكرا ليك علي الصور البتورينا مراحل الفنان عركي الفنيه والعمريه (يا ملك التوثيق),


تسلم :)

الفنان ياسر تمتام,

مشكور علي مشاركتنا الفرحه وعلي كل كلمه جميله كتبتها في حق الفنان أبو عركي,
وهو أهل للثناء والاحتفاء بفنه,,

Quote: الأخت أماني عيد مبارك عليك وكل أهل الحوش حقيقي هي أجمل عيدية للشعب السوداني، ذلك المبدع ، الهرم الشامخ ، الخلوق ، المتواضع لدرجة تخجل ، عمانا الفرح الحقيقي في دار الإتحاد بأم درمان عندما علم الجميع تلبية أستاذنا لرغبة جمهوره ومحبيه بعد غياب دام لسنوات مضت كالعادة كان متألقا كبدر ليلة تمه ،، شكرا أستاذي أبوعركي على هذه العيدية الجميلة التي ستظل عنوان بهيج لكثير من الأقلام والقوافي وتبقى شعلة نور في زحمة الزمن الخرافي هلّ عيد السعد بيك و بيك محى ويا عوافي

شكرا لأبو عركي, وشكرا ليك علي مشاركتنا الاحتفاء به,
كل سنه وانت طيب , وكل أيامك أعياد انشاء الله,

كل عام وانتم بخير

بدون شك ابوعركى وجودة فى التلفزيون مع بقية زملائة المبدين من الامور الهامة, لانة يمتلك

خامة صوتية وطريقة مميزة للاداء.

مودتى .

مالينا في الطيب نصيب لكن عزاءنا في youtube الله يقطع الغربه وسنينا .




الاخت أماني كل سنه وانت بالف خير والتحيه عبرك للعملاق أبوعركي وربنا يديه طوله العمر لكي يبدع أكثر وأكثر.