(صناديد الهلال) قصيدة جديدة للشاعر السر عثمان الطيب إستعداداً لملحمة الصفاقسي

صناديد الهلال
السر عثمان الطيب ــ إستعداداً لملحمة الصفاقسي

...

صَفَا ...!!! إنتباهـ ...!!!
صَفا ... !!! يا رجال !!!
صَفَا ... يا صناديد الهلال
العزُّو ، عــِزْ
النّصْرو ، جاهـ
في حبُّــو .. آهــ
في دربــو ، ما تاهـْـ مَنْ هواهـ
مافيش سواهـ ... الروح فداهـ
صَفا ولْنَقف ... صَفـَّا يهـِزْ
كتفاً كَـتـِــفْ ... صفَّـاً يـرز
ماب ننكسر
ماب نندحــر
ماب نتحقــر
ماب نندفــر
ماب ننقــدر
لا تاني يرمينا اليــَلـِزْ
***

صَفَا ...!!! إنتباهـ ...!!!
صَفا ... !!! يا رجال !!!
صَفَا ... يا صناديد الهلال
إنتفضوا ... يا شُمَّ الجباهــ
شِـدّو الضراع
فـِرّو الشــراع
دقـُّو الدفـــوف
رصُّو الصفوف
علّو الهِمم
فوق القمم
في كلِّ ســوح
سوموها روح
أفدوهو دم
خوضو النزال
لا تهابـــو نار
زيدوها فوق لَهَبَا اشتعال
جيبوهـــو تار
***
صَفَا ...!!! إنتباهـ ...!!!
صَفا ... !!! يا رجال !!!
صَفَا ... يا صناديد الهلال
في المقبرة
بالمفخــرة
بالمقـــدرة
بالفنجـــرة
خلّو الكفــر
ينضُم وتـر
حتف الصفاقسي مُـنـْـتـَظـَرْ
أسقوهو كاس الاندحار
أدُّونا طعــــــم الانتصار
الأهلي قبـَّـالو انهزم
مازيمبي في بلدو اندحر
ناساروا قبــَّالو انقهم
واستسلم التيحة ... انكسر
***

صَفَا ...!!! إنتباهـ ...!!!
صَفا ... !!! يا رجال !!!
صَفَا ... يا صناديد الهلال
في الدنيا مخلوق فـَدْ قمـر
ما ليهو تاني .. ولا شبيه
شوَّقنا بي حسنو الأســـر
خلاَّنا بالـــــــروح نفتديه
بي نورو ضوَّ الكون بهر
يتحدى أيِّ ضــــلام وتيه
الزينة ، والزين..الوجيه
أدَّانــــا كلَّ النشـــــتهــيه
الريدة والعشق النزيــــه
العَاطـْـفـَة والوعي النِّبيه
علَّمنا نعشـــــق وننتمي
نتباهَى بيهو .. ونحتمي
لما الكفوف تنزف دِمِي
نبض الهتافات في السَّمِي
صوت الحناجر ماب يبح
نحن الجبال الماب تزح
بدر البدور فالنا السمــح
***
صَفَا ...!!! إنتباهـ ...!!!
صَفا ... !!! يا رجال !!!
صَفَا ... يا صناديد الهلال
بين الغيوم من كلِّ فـــج
طل القمر وازداد وهــج
بي نورو نورت المهــج
الكون لبس ضوُّه ابتهج
فرزع كويمــات الهمـــج
فضّ المساخر والخمــج
قشَّ الدرب ،عدل العوج
***

صَفَا ...!!! إنتباهـ ...!!!
صَفا ... !!! يا رجال !!!
صَفَا ... يا صناديد الهلال
طابور .... صفا
يا جيــل معتق بالوفا
قدامو هيثم مصطفى
سيد البلد .. سيدا وكفى
شان خاطر الوطن الجميل
أبنوســــو والنيل والنخيل
كتَّاحتو ... نسّامـــو العليل
إنسانو .. بي صبرو النبيل
في الدنيا مافيش مستحيل
معروف هلالنا صعب صعب
قبال دا يا "شيخ العرب"
لملمنا كاسات الدهــــب
ومادمنا نحن موحِّــــــــدين
لامِّـين بعَضْنـَا ... موحَّدين
لاشكَّ ..... رب العالمين
يكتب لنا النصـــر المبين
ان شاالله رب العالمين
يكتب لنا النصر المبين

الاخ عوض عبدالله

لك من التحايا أنضرها و من الشكر أجزله

ونحن أيضآ نردد مع الأخ الشاعر السر عثمان الطيب و نقول

ان شاالله رب العالمين
يكتب لنا النصر المبين

و يأتى صناديد الهلال و هم يحملون الكأس معهم

الزول قريبي
سلام
شكراً على هذه الملحمة
وشكراً للسر عثمان الطيب

وشكراً لحميد القائل:
حتى القمر البابو قصاد بابي حبيتو لأنو هلالابي


أيه حكاية شعراء الشايقية مع الهلال؟؟

Quote: الزول قريبي سلام شكراً على هذه الملحمة وشكراً للسر عثمان الطيب وشكراً لحميد القائل: حتى القمر البابو قصاد بابي حبيتو لأنو هلالابي أيه حكاية شعراء الشايقية مع الهلال؟؟

...

زولنا عمر القرضابي

يا خوي مالك مستغرب في شعراء الشايقية مع الهلال

ده ما شيء طبيعي

انت دحين مش القائل :

يولد المولود على فطرة الهلال ، فأبواه يمرخانه أو يموردانه أو يخرطمناه

...

Quote: الاخ عوض عبدالله لك من التحايا أنضرها و من الشكر أجزله ونحن أيضآ نردد مع الأخ الشاعر السر عثمان الطيب و نقول ان شاالله رب العالمين يكتب لنا النصر المبين و يأتى صناديد الهلال و هم يحملون الكأس معهم

...

حباب أبو الحسن حيدر

ربما يملك اللاعبون ما يمكن أن يقدموه ...جهداً وغيرة وفناَ على أرض الملعب

وأيضاً يملك الشعراء ما يقدمونه شعراً وفناً

ولكننا لا نملك الا الدعاء معهم

ان شاالله رب العالمين

يكتب لنا النصر المبين

...

آخر الأنباء

أن القصيدة أخذت

وتم تسجيلها بصوت جميل لمذيعة مقتدرة مع دويتو صوت رجالي يردد

صفا ... انتباه

وستبث في (نفرة الهلال ) اليوم

وستردد كثيراً

يا ريت واحد من رشاشات الخرطوم يورينا الحاصل في النفرة

....

.
قبل شوية

في قناة النيل الأزرق

جابو صورة حياة من الأستاد

غايتو الناس ديل الا يكونو مجانين

الله يفرحهم

...

.