معقولة ؟!! .. الحاجة طلعت تفتيحة !!

أهديكم بمناسبة العيد هذه القصة الطريفة لأحد شباب اليومين ديل والتي
وصلتني عبر الإيميل. كل عام والجميع بألف خير وربنا يحقق أمانيكم جميعها ..

الحاجة طلعت تفتيحة

مدخل أول

فى أيام شبابنا الباكر ظهرت فى العامية السودانية بعض الألفاظ التى لم نكن نعرف مصدرها
لكننا كمراهقين فى ذلك الزمان الغابر كنا نستخدمها مع بعضنا البعض كلغة شبابية جديدة
وهى عبارة عن كلمات متجانسة أذكر منها:
(السنقة فى الرنقة) و(القزازة فى البزازة) و(والعملية فى النملية) .

وعلى الرغم من أن هذه العبارات عبارات خاوية لا تشير أو ترمز إلى شئ معين إلا أن الوالد
عليه رحمة الله قد (قبضنى) ذات يوم أردد إحدى هذه العبارات فكاد أن يصاب (بجلطة دماغية)
وبعد ان أرغى وازبد قال لى:

- شوف يا ولد ده بيت محترم لو عاوز تتكلم جنس الكلام ده فتش ليكا بيت تانى.

مناسبة هذه المقدمة هو أن جارتى قد حكت لى وهى شبه منهارة أنها لاحظت أن إبنيها
المراهقين يتحدثان بلغة غريبة عليها لم تفهم منها شيئاً، قلت لها إن الأمر بسيط
فما عليك إلا التوجه للمكتبة القريبة من المنزل وشراء كتاب
(القاموس الرائع فى الزمن الضائع) الذى قام بكتابته (واحد من شباب اليومين ديل).


قامت جارتنا بالذهاب إلى المكتبة وشراء القاموس وبعد أن قامت بتصفحه أصابها
الهلع لما قرأته من مفردات ومصطلحات يستخدمها شباب اليوم.




_______________________________________

مدخل ثاني

فى مساء ذلك اليوم سمعت إبنها الأكبر يخاطب شقيقه :

- ايه رأيك نقوم ندقس الجلكين ونديهو (مكنة) نقول ليهو معانا واحد زميلنا
أبوهو إتلحس عشان يعمل لينا (زيدان أبراهيم) للضحاكات نقوم نظبط بيها (عشة الفلاتية)

ما أن إستمعت جارتنا إلى ما قاله إبنها مخاطباً شقيقه حتى قامت بتصفح (القاموس)
بسرعة فى محاولة لفك الرموز لتجد أن الترجمة هي:

- أيه رأيك نقوم ندقس (نغش) الجلكين (الراجل الكبير يقصد والده)
ونديهو مكنة (كضبة) نقول ليهو واحد زميلنا أبوه إتلحس (مات)
عشان يعمل لينا زيدان أبرهيم (زيادة) للضحاكات (القروش)
نقوم نظبط بيها عشه الفلاتية (العشاء).

بعد خروج إبنيها عشان يعملو (عشة الفلاتية) بعد ان مشت (المكنة)
فى (الجلكين) جلست جارتنا ممسكة بالقاموس وقد ألت على نفسها
أن تقوم بحفظه (صم) حتى تستطيع أن تتعرف على ما يقوله إبنيها من كلمات
وعبارات وتراكيب بعد أن أضحت هذه اللغة هى لغة التخاطب بينهما فى كثير من الأحوال.

فى اليوم التالى بينما كانت جارتنا وإبنيها يجلسون يتناولون الشاى بالمنزل بعد
عودتهما من الجامعة سأل الأخ الأصغر شقيقه:

- عملتا شنو مع (الحنان) القاعد (تحنك) معاهو اليوم كلو فى الكافتيريا ده؟

- تعرف اليوم كلو أقعد (أحنك) ليك فيها لكن هى عاملة ليا (عبدالعظيم حركة)
بس أنا مرات بعمل ليها (الفاتح النقر) ومرات كده بعمل ليها (عمر إحساس)
وكم مرة كده عملت ليها (شرحبيل أحمد) لكن أنا ح أقوم أعمل ليك (جوزيف لاقو)
واقوم أمشى أعمل ليك (محمود الخطيب) للبقاقة دى قالو أبوها (مقندل) وماسك كهرباء شديده.

- طيب أفرض قال ليك إنتا لسه وعمل ليك (الجزيرة أبا) ؟

- ما مشكلة بعمل للموضوع (كمال ترباس) طوالى ..

- طيب وكان ورطك وقال ليك عمل ليكم (إيهاب توفيق) ؟

- خلاس أقول ليهو نعمل (عقد الجلاد) بعد ما نتخرج ..

- طيب أفرض قال ليك تعمل (عرس الزين) طوااالى

- ما (بدق ليهو جرس) طوااالى

- وكان أصر على (عرس الزين)؟

- بسيطة بعمل ليهو (الفتيحاب)


معانى المفردات:

- الحنان = الحبيبة
- أحنك = أقنع
- عبدالعظيم حركة = عاملة حركات
- الفاتح النقر = بيفتح ليها كناية على عدم الإهتمام
- عمر إحساس = يعمل فيها حساس
- شرحبيل أحمد = الشرا وعدم الحضور للمواعيد
- جوزيف لاقو = مجازفة
- محمود الخطيب = الخطوبة
- مقندل وماسك كهرباء شديده = مرتاح وعندو قروش كتيره
- الجزيرة أبا = رفض
- كمال ترباس= يقفل على الموضوع
- إيهاب توفيق = الموافقة
- عقد الجلاد = عقد القران
- عرس الزين = الزواج
- دق جرس = للرفض بشدة
- الفتيحاب = يفتح ليهو

مدخل ثالث

وسط دهشة إبنيها ما أن إستمعت جارتنا لذلك الحوار حتى هبت واقفة
بعد أن تحزمت بثوبها وهى تصيح:

هووووي يا أولاد إنتو قايلينى (فارة) وما (ناقشة) العبارة ..
إنتو ما عارفينى خلاس بقيت (تفتيحة) وشايلا (مفاتيحا) ..

هوووي يا أولاد أقيفوا بعيد (وجرو شخيط) وأوعكم تقيفو فى الظلط
وتتكلمو غلط، أبوها شنو (المقندل) وماسك كهرباء .. نحن زااااتو هينين
ولا لينين ؟ .. نحمد الله الغدا ضأن والتحلية برتكان والعشا حمام والتحلية شمّام ..
وتربية بيت وفرش موكيت. ولدونا فى الإمتداد و حبّينا فى البلاط .. قال شنو يمشى
يعمل عقد الجلاد !!.. إنتا لسه بصرفوا عليك يا الما عارف أيدك من كرعيك ..
يودوكم للقراية تحنكو (الجكساية) .. (وهى تجر فيهم نور طويل) ....
- سجم و كمان عدم فهم ؟!!

- (الأولاد فى صوت واحد):
معقوله؟ الحاجة طلعت تفتيحة !


كسرة :
أيها الأباء .. إيتها الأمهات ..
عليكم بإقتناء القاموس الرائع فى الزمن الضائع
حتى لا تكونوا (فارات) و(يدقسوكم) الأولاد!


إنتهى

الرندووووووووووووووك يا هدير...!!


تحياتي

يافارة يا اصلي الجلكين الشفت دقس بلع الشرتيت وشتت وعمل نائم دحين انبرم يارطة ماهو خليهو يجدع لينا ###### نمبرم بيهو ولا فيفتية ولا إن شاء الله حمراء اصلو عمك عامل فيها تقيل





أها رايك فيها شنو ؟؟؟؟
قوية موش

الاخ العريس حيدر

تحياتى و تبريكاتى مرة اخرى و بيت مال و عيال

سبق ان قدمت لك التهانى و لكن لا بأس لان الملائكة لا زالت حولك

سوف اعود للتعليق على مادة البوست

الجنيه اسمو ك لب
العشرة جنيه ورقة
والخمسة جنيه حمره
والعشرين = .........
والخمسين فيفتية

غايتو ناس الركشات ديل عندهم جناسة محن اتقول صامولتم محلوجة ولا عندهم بخرة

الأعزاء
عبدالعزيز عيسى
المكاشفي الخضر الطاهر
الطيب رحمه قريمان !!

شرفتونا والله والبيت بيتكم يخوانا
وفي إنتظار طلتكم مرة أخرى
كل عام وأنتم بخير !

الطيب رحمة

Quote: الاخ العريس حيدر تحياتى و تبريكاتى مرة اخرى و بيت مال و عيال سبق ان قدمت لك التهانى و لكن لا بأس لان الملائكة لا زالت حولك سوف اعود للتعليق على مادة البوست

كاتبة البوست Hadeer Alzain و ليس حيدر الزين


هدير شوفي ليك حل لي موضوع اللخبطة مع حيدر الزين

و الحاجة فعلاً طلعت تفتيحة

تحياتي

هدير سلام عليكم

Quote: - شرحبيل أحمد = الشرا وعدم الحضور للمواعيد - جوزيف لاقو = مجازفة

التعريفين ديل غلط
و كلام الحاجة ردحي أكتر منو راندوك

Quote: فى أيام شبابنا الباكر ظهرت فى العامية السودانية بعض الألفاظ التى لم نكن نعرف مصدرها لكننا كمراهقين فى ذلك الزمان الغابر كنا نستخدمها مع بعضنا البعض كلغة شبابية جديدة وهى عبارة عن كلمات متجانسة أذكر منها: (السنقة فى الرنقة) و(القزازة فى البزازة) و(والعملية فى النملية) .

هدير
سلامات

طبعاً العبارات هذه
ظهرت فـي حلقات مسلسل ( شنبو فـي الـمصيدة )
للرّاحل فؤاد الـمهندس وشويكار

تـحاياي