اقترح مؤقتا تغيير اسم القصر الجمهوري الى "المقر العام للمتمردين السودانيين"

عمر البشير متمرد
سلفاكير متمرد
مناوي متمرد
محمد موسى متمرد
وبكره خليل برضو ممكن يكون عنده مكتب وهو متمرد

الحنك بتاع حكومة الامر الواقع وكان لازم نفاوض و و و ما بقسم معاي
والحنك بتاع ثورة وقضايا وكان و لابد برضو ما بقسم
الحق يعلو ولا يعلى عليه

بعضهم وصل بطريق قانوني (مناوي ومحمد موسى)
والبعض وصل بطريق دستوري (الحركة الشعبية)
والبعض بطريق انقلابي (الجبهة الاسلامية)

لكن قطعا ولا واحد فيهم وصل للقصر بصورة شــــرعــــيـــــة

الواحد لو قالو ليه دايرينك في القصر حقو يعمل حسابه شديييييد

يا عمك ديل اي واحد فيهم وصل لانه بجيد استعمال كل الاسلحة

كل خبرتهم في الدنيا هي كيف استعمال السلاح وتدمير الخصم باقل الخسائر الممكنة
واخيرا اقتسام "الغنائم"

المساكين الراحو في الرجلين وسط عتاة المتمردين ديل
ناس اولا وثانيا والصمت الرهيب من بني ديموقراط
الاحزاب التقليدية من اتحادي وامة وشيوعي

بقوا لافين سااااكت، المتمردين ما شغالين بيهم الشغلة

قاعدين بره القصر الجمهوري اقصد "المقر العام للمتمردين السودانيين"
زيييييينا واحد

وخيرا انهم فعلوا عندما توقفوا عند التجرية البسيطة في عالم التمرد المسلح
بقفل جبهة الشرق، اقول حسنا، حتى لنطمئن انه قد يكون لنا مستقبل مع حكومات
غير "متمردة"

نعم، على قدر تعاستهم الثلاثة "امة، شيوعي، اتحادي" لكن لمن يحلم بوطن متقدم
فليأنس لحكومات مدنية وعقول لا مكان للرصاص فيها لحسم القضايا.

لدي يقين بأن هؤلاء المتمردون لن يجلبوا اي خير للسودان

اذن لابد من البحث عن بديل لهم كلهم، سيقول قائل، لا، هم سودانيون
ولهم الحق في الحكم مثلهم كغيرهم، لا باس نوافق على مضض، اذن فلنتحدث
عن ايجاد نظام بديل، نظام لا يسمح للمتمردين للوصول الى كراسي القصر
عن طريق رفع السلاح.. ودا مطلب على ما اعتقد انه مطلب منطقي

فالمتمردون بالسلاح ما شأنهم باسعار الذهب في البورصة، وما علاقتهم
بالتغيير المناخي وثقب الاوزون والطاقة العضوية والتقدم التكنلوجي

العقل المدبر ان كان مليء بوساوس المكايدات السياسية والتصفيات الجسدية
لن يكون متاحا لمناقشة اهمية التعليم والصحة والناتج القومي وسعر صرف
العملة ورفاهية البني آدم.

فالشعوب عندهم تحسب بعدد طلقات الرصاص التي
يمكن ان يستعمولها لاسكاتهم.

المتمردون بطبعهم وتركيبة عقلهم محصورة في شيئين:
1- ان يبقوا اصابعهم على الزناد ALL THE TIME
2- ان يراقبوا اصابع الآخرين وهي على الزناد ALL THE TIME برضو.

من وين يلقوا ليكم زمن ليحدثوكم عن مستقبل السودان

لذلك تجدهم اكبر المتحدثين عن الخطط الخمسية والعشرية ومؤخرا موضه الربع قرنية
وهم آخر من تتوقع ان يعملوا بها

المتمردون قد يصلحون للحكم ولكن قطعا لا يصلحون للتنمية لانهم لا يفقهون قولها

صباحك فل يا بن عوف...

حقيقة والله ربما كان هذا القصر وموقعه الفريد سببا في بعض مصائبنا (:(:
اقترح تاجيره كشقق مفروشه ..وتخصيص منزل بالحاج يوسف او الكلاكله للريس وتوابعه ..ونشوف بعد داك هل مازالت القصة مغرية.

سلام اخي عمر

Quote: اقترح تاجيره كشقق مفروشه ..

ومنو القال ليك هسع هو ما مؤجر شقق مفروشة؟؟؟ هههههه
ما كل زول اقصد (متمرد) ادوه اوضتين وبرنده وصايل وجايل على مزاجو
لا في هارموني يا كافي البلاء لا في تنسيق وآخر واحد فيهم (مناوي) قال
اخير مساعد حلة من الحالة دي وسط عتاة المتمردين

تحياتي