Post: #1
Title: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: اساسي
Date: 11-13-2010, 08:48 AM
الاجابة المعهودة والتلقائية والتي ثبت انها خاطئة علي السوال اعلاه : ان الزوج هو الذي يدفع المال والزوجة هي كمستهلكة لا يهمها دفع المال
الامر تم طرحه علي مائدة حوارنا (المنزلي) امس مساء واطرحه للمزيد من الحوارات والاراء
سالتني زوجتي , انت بتكره تمشي السوق ليه , وحتي اذا مشيت داير تتخارج سريع ومرات بتكون نيرفز بالرغم من انه بعد خمس سنوات زواج لم يظهر لي انك (جلدة)؟ (حتي دي ما دايرة تصرح بيها زي الناس وتقول انه اساسي دفيع ومخلية خط رجعة للاكفار) , المناسبة انها ذهبت السوق مع صديقاتها وقالت ان الذهاب الي السوق مع الزوج مختلفا تماما عنه مع الصديقات , واضافت انها شعرت براحتها في التسوق واخذت وقتها الكامل للشراء والاختيار .
اجبتها , طبعا بعد ان عدلت من نظارتي المتوهمة وبحلقت عاليا وكاني افكر عميقا وفي غالب الامر ان نظرتي كانت بلها الا انه جزء من ديكور الجدية في شخصيتنا السودانية النمطية , اول حاجة داير اثبتها ليك ان الدراسة اثبتت ان الرجل يكره السوق عموما لان طبيعة الرجل تميل غالبا الى التركيز في شئ واحد بينما السوق اصوات عالية والوان مختلفة وجوطة شديدة تجعل التركيز صعبا بينما تجد المراة نفسها في مثل هذا الجو الصاخب والدليل علي ذلك ان الرجل من الصعب عليه ان يفعل شيئين في وقت واحد بينما المراة يمكن ان تتحدث في التلفون وهي تطبخ في حلتها وتمسك بطفلها وترضعه وكم حاجة في نفس الوقت بكل سهولة ويسر بينما يعجز الرجل عن ذلك ( واحببت ان لتفلسف قليلا واعطي كلامي طابعا دينيا كحال الحكومة ومشروعها الحضاري ) قلت لها ان الله قال :(ما جعل الله لرجل من قلبين فى جوفه) ولم يقل لمراة او حتي لم يجمعهما في الاية وانما خص الرجل فقط بالامر ودا دليل علي انه ما بيقدر يعمل حاجتين يا يركز يا يشتري (طبعا اخدت بلنتي سريع في فلفستي دي حينما قالت : بطل فلسفة انت عارف انه الاية قالت كدا لانه المراة بتحمل مرات قلبين في جوفها اي قلبهاا وقلب جنينها) بلعت البلنتي واسترسلت علي العموم ممكن اديك الموضوع دا ببساطة اكتر : السوق بالنسبة للنسوان زي الكورة او السياسة والاخبار بالنسبة للرجال , وسالتها سؤالي المفحم الذي اسره في نفسي كمراقة اخيرة ( هل بتقدري كل يوم والتاني اقول ليك ارح الاستاد الرياضي نحضر كورة واطلب منك تستمتعي بيها مثلما افعل ؟ مثلما تطلبين مني الاستمتاع بالتسوق ؟ او هل ممكن تصبري علي فرضي حضور البرامج السياسة والاخبارية و الوثائقية وان تستمتعي بها مثلي دون ان اتوقع منك تبرم ؟( كلهن بتكرهن عمي وانا مدمن ) وكان تشبيهي هذا فاصلا حينما بدات بوادر اقتناع .
اها الحنك دا سنين يا اخوانا ولا موضوع السوق دا كيف وجهة النظر فيه
|
Post: #2
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: المكاشفي الخضر الطاهر
Date: 11-13-2010, 08:54 AM
Parent: #1
الحبيب أساسي
كل عام وانتم بخير
وعيدكم مبارك
المشكلة السوق كلو بقى نسوان محل ما تقبل نسوان
اها نحن البودينا شنو ؟؟
ما دام الشغلة كلها نسوان خلاص كلها اتبقى نسوان
|
Post: #7
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: اساسي
Date: 11-13-2010, 09:00 AM
Parent: #2
Quote: الحبيب أساسي
كل عام وانتم بخير
وعيدكم مبارك
المشكلة السوق كلو بقى نسوان محل ما تقبل نسوان
اها نحن البودينا شنو ؟؟
ما دام الشغلة كلها نسوان خلاص كلها اتبقى نسوان |
اها دي مشكلة تانية والله كمان , تمشي السوق يطالبوك بغض البصر مع المعرض النسائي المتحرك امامك , ويفترضوا فيك انك زيك وزي سيدنا يوسف
ما تمشي السوق يدقوا ليك جرس
|
Post: #3
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: الامين موسى البشاري
Date: 11-13-2010, 08:54 AM
Parent: #1
| Quote: ان الزوج هو الذي يدفع المال والزوجة هي كمستهلكة لا يهمها دفع المال |
الواحد يتعصر بهناااااك يجي يتفشى فينا هنا 
احيييييييييييي انا عفيت منها اساسية 
..
..
__
اساسي ازيك نعلو جيبك ما اتعوق كتير بس؟
|
Post: #8
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: اساسي
Date: 11-13-2010, 09:07 AM
Parent: #3
Quote: الواحد يتعصر بهناااااك يجي يتفشى فينا هنا
احيييييييييييي انا عفيت منها اساسية
..
..
اساسي ازيك نعلو جيبك ما اتعوق كتير بس؟ |
تصدق اخوك شغال بنظام جيد وفعال , اتفقنا انا وهي علي راتب مقطوع من راتبي الشهري يخصها وحدها وللامانة الادبية ان المبلغ لا يغري ويسهل تقديمه شهريا الا انه وبعد عدة اشهر يصبح مبلغا يسيل ليهو لعاب اخوك ويخترع افكار للظفر به الا ان السوق لا يرحم , تعرف الحكاية دي مريحانا جدا وما بتحس بالتعويقة ابدا ومرات لمن تحصل زنقة بيكون عندك بكب ما بطال ومن ناحية يريحك من جيب حقت السوق شفت كيف . عشان كدا اخوك ما بتعوق الا في الحاجات الاستراتيجية , من عفش وادوات كهربائي وانت طالع
|
Post: #4
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: ABUHUSSEIN
Date: 11-13-2010, 08:55 AM
Parent: #1
صباح الخير
|
Post: #5
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: khaleel
Date: 11-13-2010, 08:58 AM
Parent: #4
اساسي يا حبيبو
عيدك مبارك
طولة بال النسوان في السوق تسل الروح والوسواس في الشراء يطلع الزيت
عشان تشتري حاجة واحدة تقيف فيها اربعة ساعات تشيل وترجع ترجع وتشيل
الذي يفقع المرارة بعد ان تشتري وترجع البيت
يقول ليك الحاجات ما حلوة عايزين نرجعا
مبالغة
|
Post: #12
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: اساسي
Date: 11-13-2010, 09:14 AM
Parent: #5
Quote: اساسي يا حبيبو
عيدك مبارك
طولة بال النسوان في السوق تسل الروح والوسواس في الشراء يطلع الزيت
عشان تشتري حاجة واحدة تقيف فيها اربعة ساعات تشيل وترجع ترجع وتشيل
الذي يفقع المرارة بعد ان تشتري وترجع البيت
يقول ليك الحاجات ما حلوة عايزين نرجعا
مبالغة |
تعرف يا خليل سالتها امس كيف كانت استراتيجية الشراء حقتكم امس ؟
قالت لي دخلنا محل العدة واشترينا حاجات ومشينا محل الملايات واشترت بعضنا ملاياتت وتاني مشينا محل الستاير ( وهنا احي الاخ الصديق يازول وتاني رجعنا محل العدة اشترينا حااجات ومشينا محل المللايات رجعنا ملايات وجبنا وااحداات تانيات ورجعنا بعدها محل العدة ومنها مشينا محل الملابس اشتري بعضنا لاطفاله وبعدها رجعناا محل العدة تاني ومنها غشينا محل الستاير ...الخ
قلت ليها وبتسأليني ليه بتكره السوق ؟ فتبسمت
|
Post: #6
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: ABUHUSSEIN
Date: 11-13-2010, 08:59 AM
Parent: #4
Quote: الواحد يتعصر بهناااااك يجي يتفشى فينا هنا
احيييييييييييي انا عفيت منها اساسية |
الأمين الدور جاييك ياخوي
ماهي أصلها كدا قالو الفي البر عوام
|
Post: #10
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: abas
Date: 11-13-2010, 09:11 AM
Parent: #6
اساسي اتسيك في قبول يا رجاله
عصرت العدو هي لكن
|
Post: #13
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: اساسي
Date: 11-13-2010, 09:17 AM
Parent: #10
Quote: اساسي اتسيك في قبول يا رجاله
عصرت العدو هي لكن |
ياخي قبوله يا عباس؟؟
قبول منو ,! دي تسمية جاياك جاهزة ومحكوم عليك تلعبها , المشكلة ما بتقدر تلعب لي دكها !! ما بتدك كلو كلو ومراقات مافي
|
Post: #17
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: abas
Date: 11-13-2010, 09:36 AM
Parent: #13
شتت الكونشينه
وامرق روحك
يعني مسيك مسيك
ووووووووووووووب عليك من سيك القبول
اسال ود البشري بقت ليه عقده لي اسي دي
|
Post: #14
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: الامين موسى البشاري
Date: 11-13-2010, 09:18 AM
Parent: #6
Quote: الأمين الدور جاييك ياخوي
ماهي أصلها كدا قالو الفي البر عوام |
ابو حسين
كامل تضامننا معكم يـــاااااخ
عاااالم بطاااااالة وحااااااقدة بششششكل
لغاية الوقت داك يحلها الله
مع إنو علي خروف ضحية في العيد دا
|
Post: #15
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: حمد عبد الغفار عمر
Date: 11-13-2010, 09:26 AM
Parent: #6
اساسي
سلام
خلاص جاء العيد والجرسة بدت؟ المرة دي اتنين خروف وهدايا
انا غايتو بكره مشي السوق دا لأنو النسوان في فترة التسوق بتتخلى تماما
من مسئوليتها تجاه الأطفال وتفكهم فيك
وطبعا عارف الأطفال في السوق يمسك دا ويفك دا
وانت تكون شغال يا ولد لا يا بت اقعدي ساي تعال العربية ما تصدمك
وفي هذا الاثناء هي بتكون بتمارس في هواية التملك المفضلة ليها
وما شغالة بيك وتشيل وتردم.
لكن برضو الله يخليهن
الدنيا من غيرهن عدم
والفرح من غير نغم
والسعادة تكون وهم
والحلوة من غير طعم
وكل سنة وأنت طيب
|
Post: #19
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: البشير دفع الله
Date: 11-13-2010, 09:40 AM
Parent: #6
تعرف يا أساسي أكتر حاجة مكيفاني في جده شنو ؟
الليموزينات الراقده زي الرز دي , ياخي أنا جيت منقول من أرياف الليموزين الا تشوفوا في المطار
أول ما أم العيال تنوي على السوق بس أزحزحها من آخر الأسبوع عشان ما تخرب مزاجي وأقنعها بأنو آخر
الأسبوع السوق زحمه وكدا , ويستحسن نص الأسبوع , يجي نص الأسبوع أقوم أضرب ليها تلفون من المكتب
أقوليها أخدي ليموزين وأمشي قدامي عشان تاخدي راحتك وأنا أخلص شغلي وأحصلك بهناك
( وطبعا ما بكون في نية أصلا أني ألحقها بهناك ) , تخلص السوق وتضرب انها منتظراني وبكل بساطه
عشان ما تتأخري لأنو عندي شغل طارئ ومستعجل أخدي ليموزين وأرجعي البيت .
على فكرة
الحنك دا خدمني فترة طويلة وبعد داك أنكشف طبعا .
لكن كيفتني بحكاية وضع مخصص شهري ثابت للسوق ( نجرب الفكرة دي طوالي )
تعويقة العيد دا صعبة خلاص , مش كفاية عويقة الخروف السنة دي
كل عام وانتم بخير وعيدك مبارك
|
Post: #9
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: اساسي
Date: 11-13-2010, 09:10 AM
Parent: #4
ابو الحسين صباح النور
اهديك يا اخانا في في الوجع رائعة عقد الجلاد
حجة امنة اتصبري
عارف الوجع في الجوف شديد
|
Post: #11
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: ABUHUSSEIN
Date: 11-13-2010, 09:13 AM
Parent: #9
| Quote: عارف الوجع في الجوف شديد |
يا أبو محمد هو في الجوف بس ؟؟؟
ياخي في الضهر و الكرعين بالإضافة لي الجوف و عرعر كمان
|
Post: #16
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: اساسي
Date: 11-13-2010, 09:29 AM
Parent: #11
| Quote: ياخي في الضهر و الكرعين بالإضافة لي الجوف و عرعر كمان |
ههاهاهاهاهااي
يعني داير تقول : بسبب بريدة اتعوقت في الظهران و وسكاكا والالم ينبع من حفر الباطن وخلاك حائل صوتك زي عنيزة
|
Post: #18
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: يازولyazoalيازول
Date: 11-13-2010, 09:39 AM
Parent: #11
الجميل أساسى
وأنا كمان أحييك ، وأبارك ليك العيد
ياخى الرجال زاتهم عندهم إستراتيجيات رهيبة لمثل هذه المسائل مثلاً أمبارح قمت بتوصيلهم لسوق الحراج (25 كيلو) وهم (زوجتى وزوجتك وزوجة الماحى وزوجة مامون وزوجة محمد صالح وبعض أطفال) ولم أنزل من السيارة وكنت مستمتعاً بالشرائط وبالوحدة مع نفسى وفى نفس الوقت مستمتع بالمناظر من حولى ونقلتهم من سوق لسوق رغم الزحمة الرهيبة ، ثم أتت الإسترتيجية الهامة وهى أنى تركتهم فى سوق العدة وعدت أدراجى لتكملة برامجى الخاصة ، ووقتها كان الأخ الماحى قد (أكمل برامجه الخاصة) وجاء إليهم فى الحراج ليعيد كل قرد إلى شجرته
وبذلك تهون الأسواق وتنجح إستراتيجيات الرجال ذوى البأس الشديد وينتصرون على ذوى الكيد العظيم
قال تعالى (إنهم يكيدون كيدا ، وأكيد كيدا)
وشكرا
أخوك هشام
ملحوظة أرجو تصحيح الآية التى أوردتها (ما جعل الله لرجل من قلبين فى جوفه)
|
Post: #20
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: ABUHUSSEIN
Date: 11-13-2010, 09:45 AM
Parent: #18
الأمين
| Quote: مع إنو علي خروف ضحية في العيد دا |
و بتضحك كمان ؟؟؟؟
كان خروف الضحية بضحك.... إبقى حاتموت من الضحك
|
Post: #22
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: محمد مصطفي مجذوب
Date: 11-13-2010, 10:04 AM
Parent: #20
يا اساسي
سلام
كلام الناس القالوهو فوق كلو في محلو
إلا عمك ما بدور يمشي السوق عشان (ما يشيلوهو القفه)
حمارة عين جعليين ساكت
|
Post: #21
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: احمد التجانى احمد
Date: 11-13-2010, 10:03 AM
Parent: #18
طيب !!
انت مشيت وين فى الوقت دة؟؟
بعدين الناس ديل احيانا مباراتهم فى الاسواق بتكون ليها فوائد كالتأمل مثلا
ودحض نظريات السلوك البشرى ويتضح ليك كل ما تفوه به علماء النفس
البشرية مجرد اى كلام , مثلا تطلعو من البيت متفقين على زيارة اماكن معينة
لشراء اشياء محددة بميزانية محدودة والحاجات مفروض تكون وفق متطلباتنا
نحن ولكن البيحصل بنمشى السوق بنزور اماكن ليست فى الحسبان وبنشترى
اشياء لسنا فى حوجة لها باضعاف الميزانية المتفق عليها وفى النهاية تجد ان
المشتروات كانت بتوصية من احداهن
|
Post: #23
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: Mustafa Mahmoud
Date: 11-13-2010, 10:17 AM
Parent: #21
كل عام و انت و العائلة بخير
|
Post: #24
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: الفاتح شلبي
Date: 11-13-2010, 10:53 AM
Parent: #21
أساسي واله إنك أساسي فى المنبر دهـ
| Quote: السوق بالنسبة للنسوان زي الكورة او السياسة والاخبار بالنسبة للرجال |
ياخي الله جابك لينا هنا ... حسع انا مستعجل أمشي البيت وأدخل الكلام المقتبس دهـ فى جملة مفيدة ... مشوار السوق شكلة جاهزة بالنسبة لي ... والسبب فى ان بعلولاتنا يبالغن فى الاختيار ... نحن لمن اخترناهن ما أخذنا زمن قدر دهـ
وهاكم دي:
مرة شبكتني ليك أوديها سوق الحراج ... ما قصرت معاها لان الموقع بعيد ... وبمجرد ما وقفنا السيارة ونزلنا لقينا ليك شكلة مدورة ... بين سوري ومصري ... السورى قال للمصري ... إنتبه إنت ما بتعرف بتتكلم مع مين ... المصري رد عليه ... حتكون مين يعني؟ ... واحد جايي سوق الحراج !!! ... الكلام دهـ موش أحرج السوري وبس ... دهـ أحرج كل الناس اللى حوالينه مافى 30 ثانية الناس دي شتات ... قبل كلامك المقتبس دهـ انا كنت بذكرها باليوم دهـ (رغم انه حنك بيش) لكن من اليوم فصاعداً ... الكورة بس
|
Post: #25
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: عواطف ادريس اسماعيل
Date: 11-13-2010, 12:15 PM
Parent: #24
أساسي
سلامات
حبنا للسوق دة شي أساسي ومزاج لا يناقش
معزتثي
|
Post: #26
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: الفاتح شلبي
Date: 11-13-2010, 01:03 PM
Parent: #25
| Quote: حبنا للسوق دة شي أساسي ومزاج لا يناقش |
الاخت عواطف كدي قولي لينا سبب وااااحد يخليكم تحبوا السوق
نعرف السبب بس قبل لا تقولين لا يناقش
|
Post: #27
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: أسامة البلال
Date: 11-13-2010, 01:47 PM
Parent: #26
أساسي بطل جرسة وبحبح الريالات خلي الحكومة تتبوبر قدام صاحباتاالدنيا قبايل عيد...
الإيدو في النار مازي الإيدو في الموية.. الزوجات الما شغالات هم أكتر هواية للأسواق أولا لكثرة الفراغ وعدم الشغلة وثانيا والمهم ما بعرفن قيمة القروش والتعب والشقاء في الحصول عليها عشان كدا بستسهلن صرفها عكس المرة العاملة
أخيرا كل عام والجميع بألف خير
والجاتك في مالك سامحتك
|
Post: #28
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: هشام حسن
Date: 11-13-2010, 07:31 PM
Parent: #27
أساسي وضيوفه كل عام وأنتو بخير
|
Post: #30
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: عواطف ادريس اسماعيل
Date: 11-14-2010, 06:35 AM
Parent: #26
عارف يا الفاتح بنحب السوق ليه؟
عشان إحنا بنشتري وإنتو اللي بتدفعوا ها..ها..ها
|
Post: #33
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: الفاتح شلبي
Date: 11-14-2010, 10:05 AM
Parent: #30
Quote: عارف يا الفاتح بنحب السوق ليه؟
عشان إحنا بنشتري وإنتو اللي بتدفعوا ها..ها..ها |
يا عواطف ما تذكرينا الدفع خاصة اليومين ديل
لكن انا إكتشفت سر كبير فى مسألة السوق !!! الرجال اللى ما بيمشوا السوق ديل عرضة لى سمسرة من بعلولاتهم لأني إكتشفت أنه بعلولتي بتخنصر من فلوس السوق وبتكون مقرشة بعد انتهاء فترة التسوق ... إحتجيت وقلت ليها دي سمسرة ... قالت لي دهـ ثمن إنك ما بتمشي معاي للسوق (وش متجرس)
اها يا أساسي نحن البعاليل المتضررين من تسوق بعلولاتنا عايزينك تعمل لينا مخرج مدروس من الورطة دي ...
نمشي السوق ما نمشيش ؟
|
Post: #29
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: Ammir Mohamed
Date: 11-13-2010, 08:32 PM
Parent: #1
| Quote: لت لها ان الله قال :(ما جعل الله لرجل من قلبين فى جوفه) ولم يقل لمراة او حتي لم يجمعهما في الاية وانما خص الرجل فقط بالامر ودا دليل علي انه ما بيقدر يعمل حاجتين يا يركز يا يشتري (طبعا اخدت بلنتي سريع في فلفستي دي حينما قالت : بطل فلسفة انت عارف انه الاية قالت كدا لانه المراة بتحمل مرات قلبين في جوفها اي قلبهاا وقلب جنينها) |
هاهاهاها يا أساسي تعرف أنا متبع نفس البرنامج بتاعك ده أول الشهر تسلم وتعمل نايم والحاجة الكويسة هنا في الإمارات إنو الحريم بسوقو أول ما جات طوالي بعد شهرين كان عندها رخصة قيادة ... لوفي مشورا السوق تركب تمشي تاخد راحتها وإذا عايزة ترجع بسرعة ترسل الولد معاها تقول ليها مسكين الولد قاعد بين أربعة حيطان خليه يمشي يشم هوى شوية .. بعد كدة انت تشوف ليك شغلة ... المشكلة إنو بعد فترة الحنك بتاعهم بتغير تجي تقول ليك الرجال كلهم مع حريمهم في السوق وآخر انبساط ويشترو حاجتهم في أمان الله ويرجعو .. ما يشيل فيك الحنك ده
أما بالنسبة للعين الزائقة دي ما تتعب نفسك كتير معاهم ألبس ليك نظارة شمس بالنهار بالليل في كل الأوقات منها لو حبيت تزوق عينك شوية تزوقها ومنهاهي ما تقدر تعرف انت شايت على وين!! ههه
The Advantage of marriage: always being with that person
Disadvantage of marriage: always being with that person!l
تحياتي وكل عام وأنت والأسرة بخير
أمير
|
Post: #31
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: عبدالعزيز حسين عبدالرحيم
Date: 11-14-2010, 07:14 AM
Parent: #29
المحترم أساسي
عيد سعيد
بوست مفيد
برضه كمان تسوق العزابة جميل جداً للشمشرة والمسخرة البتتخلله والحرية
------------------
(عندي واحد صاحبي عازب قديمومطول كل مانقول ليه عرس يقول شوف ديل أشتري لي حرامي بي قروشي) مرة مرقنا تسوق عزاب لاقينا أسرة في مول فخم المرة ماشاء الله رايقة وغريرة وتحس بيها في قمة سعادته وهي بتلقط وتعزل ومتدرعة كامل دهبها وزينتها وراها الراجل في جلابية مكرفسة وطاقية معوجه مقدودة جاري العربية ومتعلقين فيه شافعين واحد ببكي الظاهر متشبك وهو بتحاجج مع التاني عاوز ليه حاجة صاحبي قال عاين دا أشترى حرامي كبير وهسع كمان عندو نشالين
سبحان الله نفس الزول دا اتزوج طرد مرته جات الضهر العصر لقوه ماشي وراها في السوق
|
Post: #32
Title: Re: لماذا يكره الازواج الذهاب الي السوق بعكس الزوجات اللائي يحبن السوق ذي عيونن؟
Author: داليا حافظ
Date: 11-14-2010, 08:23 AM
Parent: #31
سلام يا أساسي ..
كره الازواج للتسوق بشكل عام ليهو علاقة بنفاد الصبر من عدم وجود خطة واضحة في برنامج التسوق ده، والقصة دي كلها في خانة (غالبا)، وبالجد لو الزوج عارف أنو ماشين يشتروا حاجات بعينها وفي النص الزوجة طلعت مليون حاجات وألزمتو بالدفع ـ يعني ما كانت مشاركة ـ ليهو حق إكره السوق ..
غايتو انا من شواذ القاعدة المابحبن السوق ـ غريبة موش ـ وزوجي لو عايز تكهربو قول ليهو يلا السوق حتى لو لي حاجات بتخصوا أها هسة نحن بقينا محتارين البشتري لينا منو ؟
|
|