Post: #1
Title: معلـيش يا جـنابو...!!
Author: مُحَمَّدٍ عِوَضٌ احْمَدُ
Date: 11-01-2010, 09:01 AM
كل مرة بقينا نسمع العبارة دى فى نوص الزلط عند ابسط احتكاك او ملاسنة نجد احدهم يخرج من عربته منتفخا..وفاتحا بابه الامامى
مطالبا سائق مثله آخر بالركوب..بكل عنجهية..
-لازم تمشى معاى..عشان اوريكـ قلة الادب
بصوت مخنوق من القبقبة
- انتا عاوزنى انا..؟
- بمشى معاكـ!
اصحاب الجودية..و السابله الطيبين..
- لا ياجنابو بالله مافى داعى..صلى على الحبيب ياخى
- الف على الحبيب..بس انتو براكم شفتو الزول ده عصرنى فى الشارع كيف؟
-ايوه ياخى شفناهو بس انتا كبير
- خلاص والله بس عشانكم انتو خليتو
|
Post: #2
Title: Re: معلـيش يا جـنابو...!!
Author: مُحَمَّدٍ عِوَضٌ احْمَدُ
Date: 11-01-2010, 09:08 AM
Parent: #1
طبعا الشئ البحيرك انو الناس دى عرفت الزول ده جنابو كيف؟
فى السودان يعتبر الكثير من النظاميين مطالبة البعض لهم بابراز هوياتهم استفزاز
لـ حضراتهم..وفى الغالب من يرضى باخراج البطاقة المقدسة..اياها..سوف يقوم
بلطمك بها على وجهكـ بكل بجاحة..ويا دنيا مافيكـ الا انا..والله ذاتو مافى..
فى نظر سعادتو..
جد الواحد بتمنى انو آل جنابو يكونو قدوة طيبة لى جنودهم الصغار..وما يستغلو
حصانتهم فى اهانة البشر..لا يعقل ان يقوم الشرطى او رجل الامن بقتل روح القانون
قبل المواطن..البسيط..
|
Post: #3
Title: Re: معلـيش يا جـنابو...!!
Author: مُحَمَّدٍ عِوَضٌ احْمَدُ
Date: 11-01-2010, 09:12 AM
Parent: #2
يلا فى بلدنا دى يا تعيش على الحيط وتلولح ضنبكـ زى ال ك ل ب..
او تكون صبور زى الحمار..على الاهانات الممكن تلقاها..فوق رقبتكـ من اى منفوش ومنفوخ
من بعض رجال الشرطة..
|
Post: #4
Title: Re: معلـيش يا جـنابو...!!
Author: مُحَمَّدٍ عِوَضٌ احْمَدُ
Date: 11-01-2010, 09:16 AM
Parent: #3
هسه يجى واحد يقول ليكـ
دى حالات معزولة وفردية
اظبط جملتين لتدراك الاخطاء وللدفاع عن الباطل فى السودان
معزولة وفردية
توف على الكلمتين ديل
|
Post: #5
Title: Re: معلـيش يا جـنابو...!!
Author: مُحَمَّدٍ عِوَضٌ احْمَدُ
Date: 12-09-2010, 09:56 PM
Parent: #4
البوست بتاريخ 01-11-2010,
نرفعو ونعيدو..تانى..
عشان الناس تعرف انو ح يجى يوم..اسواء
لو لم يتم تدراك تجاوزات بعض رجال الشرطة من جنود وضباط
|
Post: #6
Title: Re: معلـيش يا جـنابو...!!
Author: محمد الجيلى
Date: 12-09-2010, 10:22 PM
Parent: #5
الأخ محمد سلامات
فعلاً دا الشيء الحاصل من {بعض} الشُرطيين في البلد المغلوب على أمره
قبل كم سنة كان عندنا قريبنا مريض وراقد في مستشفي {فضيل} وكنت في زيارة ليو
لاحظت إنو في شاب ركن العربية قريب مدخل المستشفى وجاب كرسي مُتحركـ عايز يدخل بيو
زوجتو المستشفى {كانت مشلولة إن شاءالله تكون شفيت} فأثناء ماهو بساعد فيها عشان ينزلا
جاء بوكس تابع للشرطة ملان عساكر وراكب بي قدام ضابط وبقوا بجوطوا فيو إنو يزح عربيتو
من الشارع {مع إنو الشارع واسع وبمررهم} المسكين بقى بترجى فيهم إنو زوجتو مريضة ودقيقتين بس
ينزلا ويزح العربية!
جاء نازل عسكري فاير وعايز يضاربو وحاول يمد يدو يقفل باب العربية بالقوة
قام صاحبنا ثبت يدو وقال ليو أمشي نادي الضابط المعاكـ بي نهرة لما العكسري بقى يرجف ويتمتم
الضابط جاء مكرفس وشو من هناكـ والعيون محمرة صاحبنا القبيل بحنس فيها براحة طلّع جزلانو
نشوف ليكـ الضابط بتاع البوكس بقى يتمتم ويتراجف ويعتذر
الموقف الظريف إنو من الخوفة رجعوا لي آخر شارع الحوادث خلف
الشاب المهذب عاين لينا وقال : هسي لو كنت مواطن عادي كان بشتنوني ....
الله لي بلدنا الضائعة دي
|
Post: #7
Title: Re: معلـيش يا جـنابو...!!
Author: مُحَمَّدٍ عِوَضٌ احْمَدُ
Date: 12-10-2010, 09:46 PM
Parent: #6
| Quote: الله لي بلدنا الضائعة دي |
شكرا محمد الجيلى..
وياريت يتذكر بعض الضباط الصغار الفرحانين..انو فى جنرالات كبار قبلهم
خدموا فى الشرطة ولم يتركوا ورائهم سوى سيرة طيبة..لم يرفعو ايديهم
لضرب مواطن..ولم يشهدهم احدهم يفترون على خلق الله..
|
|