بترول فى ولاية جنوب دارفور صار الحلم حقيقة يا حلاوة !! ... ( صور )

يمهل ولا يهمل .. صنف جيد وبكميات هائلة الله يكفينا شر الوافدين !!


..

والى جنوب دارفور الدكتور/ عبدالحميد موسى كاشا حفظه الله
باين عليه وجه خير شئ كهرباء وشئ بترول وخلى ساكت والجاى احلى
قيام مصفاة لتكريره فى مدينة نيالا مطلب شعبى وواجب وطنى!!


..

الله يطرح البركة ويحفظه من شر الحاقدين بعد دا إن شاء الله وبحوله سوف يشيد طريق الغرب وحنشوف المستثمرين ومشترك نيالا سوف يبدا السفر يا ما أنت كريم يا الله وأن آخر دعوانا الحمدلله رب العالمين



..

شاب نشأ فى كنف أسرة قيادية لأكبر قبيلة فى دارفور
بيت الناظر محمود ( ابو الخير) محل اللمة والناس بتنجما
بياكل وبقش فى طرفه تنبأ له الكثيرون بمستقبل واعد ومشرف



..

بعد ضخه فى طرمباتا حنركب الشى ذاتا الموتور يابانى والبترول مجانى طال عمرك
بس مسكه درب أم درمان والعن والديه ( هوى ) والخرطوم محل الطيارة بتقوم والناس بتحوم
فى القزاز!! ( صنع خصيصا لولاية جنوب دارفور )



تخريمة:
أول مرة أكتشف إنو البنات
ديل عندهن الحاسة السادسة قال شنو
قال ( وليد دارفور بمشى معاك الليلة )





..

كلكم راع وكلكم مسؤول عن رعيته .. هى الرحمة دى بتجى كيف ؟! هى ليست
سلعة تباع وتشترى فى السوق ولكن تسرى وتجرى فى الانسان مجرى الدم فى العروق
من تواضع لله رفعة ومن كان منكم على ضلالة فليمتد له الرحمن مدا ... بالله عليكم
أنظروا إلى تلك الابتسامة لأم الرضيع صادقة ونابعة من القلب .. لله درك يا رجل



..

الله اكبر الله اكبر
هلباوى ولضمى
فعلا من تواضع لله رفعه
بس فى سؤال؟

من اين تدفق هذا البترول بهذه الكميات جريت السبحه ولا شنو الحكاية ؟
اللهم زد وبارك ( اللهم لا تمتحنا ولا تبلينا يارب ) واجعله بترول خير وبركه

والى جنوب دارفور الدكتور/ عبدالحميد موسى كاشا حفظه الله
باين عليه وجه خير شئ كهرباء وشئ بترول وخلى ساكت والجاى احلى
قيام مصفاة لتكريره فى مدينة نيالا مطلب شعبى وواجب وطنى!!

هلباوي ولضمي
كيفينك عساك بخير

دحين انا بسالك سؤال عن المصفاة وين نودي مصفاة الجيلى دي ؟

خليتك بعافية ولنا لقاء

الله اكبر الله اكبر
هلبلب كيفينك عساك بخير

والله دا اسعد خبر بختكم الله اداكم بعد عناء وضنا
بس ما تنسى اخوك أنا اول الوافدين باذن الله طبعا ( العوده الطوعيه)
ماشاء الله عينى بارده فعلا يمهل ولا يهمل

هلباوي بالجد كلامك دا صاح؟

يا ربي تحفظ السودان من الكوارث

الأخ الكريم / الطيب شيقوق تحياتى يا غالى
بشر ولا تنفر تفألوا خيرا والمشاكل إن شاء الله
حولينا وما علينا وإن شاء الله محمد معانا ما تغشانا


بعد دا شغلنا لحسان آيس كريم وأكل شكولاتة ساكت .. هاك القطعة دى



..

الزعيم/ آدم الهلباوي

تحياتي

البترول موجود بدارفور ومعروف من زمان ولكن وزارة البترول دست الأخبار لشئ في نفس الجاز.

لكن الله يمهل ولا يهمل فقد بات الأمر ملزما بتصحيح الأخبار.

أبوجابرة بدارفور ولا كردفان ولا الجنوب؟؟؟

واليورانيوم والنحاس والمعادن النفيسة بحفرة النحاس وما حولها بكردفان ولا دارفور؟؟؟؟

Quote: بعد ضخة فى طرمباتا حنركب الشى ذاتا الموتور يابانى والبترول مجانى طال عمرك مسكة طريق أم درمان والعن والديه ( هوى ) والخرطوم محل الطيارة بتقوم والناس بتحوم

والله ضحكتني غصباً عني ... بالله كتر لينا من نوع الكلام دهـ

اها نحن جيرانكم هيتة بالهيتة بالشمال ما تدونا حق الجيرة بيرين تلاتة ؟

الأخ الهلباوي


سلام


1- اتفاقية السلام وحق تقرير المصير.
2- الإستفتاء يتم في مواعيده.
3-التقسيم العادل للثروة( 90% للمنتج).
4- قوات دولية في الحدود الفاصلة.
5- مشاورات لإنشاء خط تصدير عبر تشاد- الكاميرون..
6- اقامة علاقات مع اسرائيل ليست على حساب العرب.
7-.....





تحياتي

يا آدم اخوى بتنطونا معاكم من بترولكم ده ولا بتقولو توش لى
جلابة , عشان نحن كمان نحدد موقفنا ونشوف حنديكم حقنة ولا ما نديكم .

Quote: تخريمة: أول مرة أكتشف إنو البنات ديل عندهن الحاسة السادسة قال شنو قال ( وليد دارفور بمشى معاك الليلة )

هلباوى يا ولضمى والله ماشه معاكم حلاوة
عل بس نحن ما ناساك وجلاسك يا ابو سبحة !!

الأخ الكريم ود الكوارته / فيصل عبدالله تحياتى يا غالى

Quote: الله اكبر الله اكبر هلباوى ولضمى فعلا من تواضع لله رفعه بس فى سؤال؟ من اين تدفق هذا البترول بهذه الكميات جريت السبحه ولا شنو الحكاية ؟ اللهم زد وبارك ( اللهم لا تمتحنا ولا تبلينا يارب ) واجعله بترول خير وبركه

تدفقه بهذه الكميات الهائلة طبعا نتيجة لتفاعل مخلفات ثروتنا الحيوانية من قديم الزمان التى
نفقت نسبة لتجاهل حكومات المركز التى لم تقم بواجبها فى تحسين أوضاع هؤلاء البدو الرحل فقط فقط تكتفى بان تأخذ المواشى وتصدرها للخارج وتجلس تتفاخر وتقدر ثروتنا الحيوانية كذا والسودان سلة غذاء العالم
ولا يهتمون فى هؤلاء المجاهدين البسطاء والقط الأسود السمين يستمتع بخراجها .. يموت البدو فى الاحراش جوعى ولحم الضأن تأكله ..........أكمل من فضلك .


يعنى شوف زى دا مثالا هذا المكافح الصبور الشقى يقوم من الصباح الباكر ليسقى ويروى كل هذه الانعام فهى تعتبر جزء من مسؤولياته وبرغم هذا العناء وهذا التعب يموت فى الفقر المدقع بينما يهنأ بجهده كسالا آخرون الواحد يجيك يتلمض خشم أحمر من لحسان الآيس كريم يتبجح ويتفاخر بأن العائد من الثروة بالعملات الحرة كذا وأن السودان له كم هائل من الثروة المعدنية بينما المنتج يعيش فى فقر مدقع ولا اهتمام من الدولة به .. قسمة ضيزى !!

Quote: الله اكبر الله اكبر هلبلب كيفينك عساك بخير والله دا اسعد خبر بختكم الله اداكم بعد عناء وضنا بس ما تنسى اخوك أنا اول الوافدين باذن الله طبعا ( العوده الطوعيه) ماشاء الله عينى بارده فعلا يمهل ولا يهمل

معقولة بس يا ود الكوارتة دى تجى إذاى دى يا خى إنت مواطن ومن الدرجة الأولى
الف الف مرحب بك بس ركز معاى هالمرة الوضع مختلف لانو زمان أهلنا الكوارتة وغيرهم
كانوا كثر معنا هنا فى جنوب دارفور وبمجرد مجئ الانقاذ لموا الغلة وقالوا يا ( فكيك )
مشوا عمروا بيها أماكن أخرى وكان العشم فيهم أن ينموا بها العاصمة نيالا سبب كل هالخير
وكان آخرهم طبعاالباشمهندس عطاالمنان ولكن لا تثريب عليكم بس الضوابط هالمرة ( غير )!! طال عمرك
لكن ما تشيل هم إذا كانت هناك ( شخشخة ) حتكون تحت كفالتى هو نت هين وله هين

Quote: هلباوى يا ولضمى والله ماشه معاكم حلاوة عل بس نحن ما ناساك وجلاسك يا ابو سبحة !!

هذا من فضل ربى وأما بنعمة ربك فحدث وآخر دعوانا الحمد لله رب العالمين
يا ود الكوارته وا شريرنا دى كمان دايرالا كلام دحين يا جنا أوعك تقول لى حنتغابا
فيك العرفة وله كيفن عاد .. إطمئن يا جنا نحن ما بتهون علينا العشرة نحن أهلك والبلد
بلدك وياالف مرحب بك فى وطنك التانى !!




..

ما شاء الله تبارك الله
والله يحسن ويبارك ويزيد

والله كلامك الفوق ده الله يحققه اليوم قبل بكرة ، علشان نرتاح من تذاكر الطيران الباهظة
هل تصدق التذكرة (الخرطوم نيالا الخرطوم ) ب750000جنيه في ظل هذا التهميش لكن إن شاء
الله بكرة غير

الاخ/ ادم الهلباوي
مساء الخير،،،
تشكر على الاخبار الجميلة.
بس البترول حنا ابوجابرا و لا بكان اخر؟

الأبيض أزين عبه بنزين بس وأمسك طريق أم الدرمان والعن والديه دا طبعا الشارع حيكون ثلاثة تراكات
رايح وثلاثة جاى بلا قطر بلا زحمة ( هوى ) يا ما أنت كريم يا رب ... والله جنس ( ..... ) واحد!!




..

عليك أمان الله تخين جنس تخنة !!



..

يا ساتر .. مالك يا باشمهندس عايز تعمل لينا ملاوزة
تقصد يعنى ( أينما تذهبى يأتينى خراجك ) دا كان زمان
لا إطمئن وصدقنى المرة دى ولا ( ملعقة ) لا يا باشمهندس
يقولون : إذا ما كفى أهل البيت يحرم على الجيران !!
ما كفاية الشفتو منك والله أكتر من ببكى ؟!



..

الاخ الحميم / هلباوي
شكراً علي البوست وهذا يدل علي وطنيتك الزايدة
واقول ليك الخير كثير بس شيل الصبر والكورة وطاه
لكن في حاجه واحده يجب التنبيه اليه اعمل حسبابك من كثره شكير
ناس الوطني ديل ( انجر طرف يا اخوي )
يا اخوي نحنا باقي لينا بس نلعن الشيطان الدخل وسط ابناء دارفور دا
وبعدين تعال شوف دارفور حيكون شنو ( ولا في الاحلام)
والي الامام نحن شهرنا حلا ولكن كلامنا لسها
ودعوة الي جميع ابناء دارفور يداً واحد من اجل دارفور جديد

باين علينا حنتبع سياسة ( الأرض المعمورة ) !!
بمعنى طال ما إنت سودانى يحق لك التمتع بكل شئ
داخل الولاية وتتملك ايضا تبنى عمارة تعمل تجارة
أو تشيد جزارة أو تستورد سايرة إنت حر ولك كامل الحرية
لكن بس ما ( تجمعة وتحصده هنا تتركه هنا ) يعنى تيتى
تيتى يا معانا يا ترجعى زى ما جيتى !! حكاية الهبروا
ملوا كم وقفوا ترتروا وكم جكوا جروا دى ما معانا فى الرصة
آآآه والله .. البدايته شرط نهايتو نور


..



..

Quote: يمهل ولا يهمل .. صنف جيد وبكميات هائلة الله يكفينا شر الوافدين !!

الهلباوي
عشان كدة شايفك أمس في البطحاء تشتري قي غتره وعقال؟؟؟

أهه الكفالة كيف؟؟؟
بس بالله فيزة راعي دي ما بتنفع معاي،،،، كويس


الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

الأخ الكريم الكوارتى /فيصل عبدالله تحياتى يا غالى

Quote: والى جنوب دارفور الدكتور/ عبدالحميد موسى كاشا حفظه الله باين عليه وجه خير شئ كهرباء وشئ بترول وخلى ساكت والجاى احلى قيام مصفاة لتكريره فى مدينة نيالا مطلب شعبى وواجب وطنى!!

Quote: هلباوي ولضمي كيفينك عساك بخير دحين انا بسالك سؤال عن المصفاة وين نودي مصفاة الجيلى دي ؟ خليتك بعافية ولنا لقاء

جرى ايه يا أخوى مش خلاص الجماعة ديل بنوا السد وبقى جد
وبقولوا الرد الرد السد يا حبيبى الماء اليوم أغلى من البترول
( وجعلنا من الماء كل شئ ) وقالوا مستفبلا الصراع يكون على الماء



خليها تبقى مصفاة لتحلية المياه





..

لماذا وردت فى عنوان البوست عبارة ( صار الحلم حقيقة ) ؟!
نسبة لهذا المقال والذى نشر فى العام 2007 بسودانيزاونلاين
وفى جريدة الخرطوم وقتها ( منقول ) :


مصفاة لتكرير البترول في شارف لاستيعاب أبناء المهمشين ؟!

آدم الهلباوى

Aug 14, 2007, 08:13

سودانيزاونلاين.كوم Sudaneseonline.com

Quote: بسم الله الرحمن الرحيم إذا كان لا بد مما ليس له بد ينبغي إقامة أو تشييد مصفاة لتكرير البترول في شارف بجنوب دارفور لاستيعاب أبناء المهمشين أسوة برصيفتها مصفاة الخرطوم ، وذلك لأن معظم البترول يستخرج من تلك المناطق المهمشة وما جاورها ، وحيث أن مصفاة الخرطوم سعتها الوظيفية 500 مهندس وفني ولا توجد نسبة _% مستوظف من أبناء الأماكن المهمشة المنتجة له ، حتى لا تكون لدينا ( كادونا ) أخرى تنتج البترول والأنابيب تمر عبر ديارها وأبناؤها لا يجدون من عائداته إلا ( اللظى ) أو تلك القطرات التي يجمعونها مما يتسرب منه فيحرقون كل عام مرة أو مرتين بفعل ما يتفجر من تلك الأنابيب فيكتوون بناريين نار الحرمان ونار الجوع والمرض والاشتعال وشقاوة الحال . كم وددت أن يكون لمناطق الإنتاج نصيب مما ينتج من أراضيها قبل المركز لا بل كل أرض المليون ميل وان لا يكون ذلك حبرا على ورق ! ذلك لأن أهل الأرض والإنتاج أولى بالمعروف من غيرهم ، علما بان ما يريدونه فقط تنمية مناطقهم المهمشة بالخدمات الضرورية من تعليم وعلاج وكهرباء وفرص عمل . وما هي إلا مطالب مشروعة تمثل الدافع الذي جعل من المهمشين في اروشا من حملة السلاح يلجأون إلى حمل السلاح مكرهين ليلفتوا أنظار أصحاب القرار ودعاة حقوق الإنسان ، حيث أنها مطالب عادلة يدركها كل عاقل من أبسط رعاع الشارع السوداني فما بال دعاة الإستراتيجيات والخطط الخمسية والعشرية والربع قرنية لا يتعاملون معها بموضوعية ويتقاضون عن مثل هذه البديهيات ؟ هذا إذا علمنا أن الولايات الأخرى التي تمر عبرها خطوط البترول يكون لها نصيب منه ، ولا ندرى هل لأنها داخل مثلث ( حمدي ) المزعوم أم أنها مرضي عنها ؟ نتساءل أحلال على بلابله الدوح وحرام على الطير من كل جنس ( والله حكاية .. حزموني ولزموني وشيلوا لي حرابي وياليتني كان بداوس ) إذن هنا يكمن السؤال ؟! ولو نظرنا من ناحية اقتصادية إلى منطقة دارفور المهمشة الآن نجدها تشهد زخما من المنظمات وقوات الهجين القادمة وما تخدمها من شركات تفوق ال 24 شركة بالإضافة إلى متطلبات الدول المجاورة مثل تشاد وافريقيا الوسطى فيكون هذا السؤال : اما كان من الأجدى لنا اقتصاديا أن نصدر بترولنا لتلك الدول بدلا من أن نجلبه عبر خطوط طويلة بالتناكر والفناطيز في رحلة عودة من بورتسودان أشبه ما تكون بالتراجيديا الملهاة على طريقة شحنت نملة أخذت حبة خرجت نملة ؟ فضلا عن وجود مصفاة في الإقليم سيكون لها مردود إيجابي واقتصادي هائل من خلال تقليل تكلفة ترحيله وبالتالي سعر البيع للمستهلك في تلك المناطق المهمشة ، إذ أننا نجد في الوقت الحاضر سعر جالون البنزين في نيالا مثلا ثلاث أضعاف سعره في الخرطوم بسبب الترحيل وتكاليف الشحن ، إذن لماذا لا نستفيد من تجارب الغير كالسعودية مثلا ينتج البترول في مناطق معينة ولكن سعر اللتر في كل المملكة واحد تعلمون لماذا لأن الشركة الوطنية المنتجة تتحمل تبعات الشحن والنقل ، بخاصة وان جميع تلك الشركات يملكها كبار منسوبي المؤتمر ( الوطني ) . والمدهش حقا أن هذا الأطراف المهمشة المنتجة برغم الضيم والغبن استقطعت منها أجزاء دون مبرر كافي منطقي وموضوعي مثل منطقة ( أبو جابرة ) التي أضيفت إلى جنوب كردفان ثم من بعد ذلك إلى غرب كردفان وأيضا منطقة ( كرب التوم ) في الجزء الشمالي لولاية شمال دارفور وأضيفت إلى الولاية الشمالية دون وجه حق ، وبرغم أن رئيس الجمهورية اصدر قرارا بأن ترجع تلك الحدود كما كانت عليه من قبل العام 1956 حسب مقررات ابوجا وقد كلفت لجنة لذلك ، إلا أنه لازال الوضع كما هو عليه ونحن نعجب لهذه السلحفائيه في الممارسة والتلكؤ في الخطى ، لكن قطع شك ما ضاع حق وراءه مطالب . حيث تكمن المفارقة في أن يؤخذ البترول من مناطق الإنتاج ليصنع عند اليعسوب ليهنأ به بينما يموت النمل مما جمع والنحل من سم الرحيق ، إذن الحل لتجاوز هذا التمايز وهذه الفروقات في الأسعار يجب على هذه الشركات المنتجة أن تتحمل تكاليف الشحن والترحيل في هذا المشروع الوطني الهام .

الحاسة الساتة آهو الواحد بقى زى ( ود الباز ) يتوقع
قال شنو قال ( هنالك بحيرة من الماء العذب ) تنوم عليها دارفور
قال ( ماء ) قال !! يمكن يكون شافها طشاش طشاش ...





..

وله الهامورى .. الجقادا تشد بيها الضراع والماغنوم فى الطبلون وأبو ساروتا وأبو دوال
تحت المقعد و ( الكج والحجاب ) فى الجيب وجاهزين من كله للانطلاق اللهم إلا كان حادث
داك قضاء وقدر ( هوى ) وأم درمان فى القزاز والآيس كريم والشكلاتة فى البرادة تانى شنو



..

يا صاحب السمو الهلباوي لك التحايا و الاشواق .

اتقدم لسموكم الكريم بطلبي هذا آملا منكم التكرم

بالايعاز لمن يلزم بمنحناعدد 100 فيزا بمهن مختلفة

و ذلك لحوجتنا الماسة لها لدفن المشروع الحضاري

الذي وجدناه مختباً في مصفاة الجيلي ...........

و دمتم

مخلصكم

المهمش

[

وله الهامورى .. الجقادا تشد بيها الضراع والماغنوم فى الطبلون وأبو ساروتا وأبو دوال
تحت المقعد و ( الكج والحجاب ) فى الجيب وجاهزين من كله للانطلاق اللهم إلا كان حادث
داك قضاء وقدر ( هوى ) وأم درمان فى القزاز والآيس كريم والشكلاتة فى البرادة تانى شنو

هلباوي ولضمى
عساك طيب
ولضمى انا بدور لى واحد متل دا عشان اتوجه لدارفور عدل عن طريق امدر
الشىء التانى الفيز اهم حاجه فيها راعى
وبعدين ما دايرين عقالات فى واحد قال شايفك فى البطحاء تشتري فى غترة وعقال اوعى
نحنا دايرين عمة الجنجاويد ( الكمدول ) على ما اعتقد ولا شنو
دحين زى ما قلت لك اوعى تنسى اخوك الكوارتى

وموية الجيلى والله برضه فكرة مالو عشان ما نخسر ونخسر الحكومة مش كده ؟


الكوارتى / فيصل

الأخ الكريم الأستاذ / الفاتح شلبى تحياتى يا غالى

حياك الله ويا الف مرحب بك البلد بلدك والناس أهلك

Quote: اها نحن جيرانكم هيتة بالهيتة بالشمال ما تدونا حق الجيرة بيرين تلاتة ؟

قصة بير بيرين دى تتنافى مع دستور الولاية الجديد وخاصة
فى البند السابع طال ما إنت سودانى يحق لك التمتع والتملك
فى والتشيد بكامل الحرية فى الولاية حتى ممكن نزوج لك لكن بس
حكاية ( تلم وتنحاش ) أو تأكل و ( تصبنج ) دى ما معانا.



..

..

أما بنعمة ربك فحدث ... وإن شكرتم لأزيدنكم .








الحمد لله وحده نصر عبده ... جاء الحق وزهق الباطل إن الباطل كان زهوقا.




..

الأخ الكريم الدكتور / الصادق يحى تحياتى يا غالى
حمدا لله بالسلام حللت أهلا ونزلت سهلا حياك الله

Quote: الاخ/ ادم الهلباوي مساء الخير،،، تشكر على الاخبار الجميلة. بس البترول حنا ابوجابرا و لا بكان اخر؟

هاي يا زول الأماكن كلها نازة من أم دافوق مرورا بالرهيد
وعدالفرسان القوز دنقو والكلكة والفردوس وعديلة وشارف
وللماعارف إنت ماسمعت ( عادل الباز) قال شنو درفور تنوم على
بركة من ماء طبعا السن وطولة العمر لها أحكامها ما ظبط العدسة
وطشش فيها حقيقة كلها بترول ويورانيوم وبلاتنيوم ودهب وخلى ساكت !!
الحمد لله رب العالمين نحن ما زى بعض الناس البجينا كلو مرحب بيهو..


..

اعمل حسابك يا أخ هلباوي


اكتشافات البترول دي أصبحت (طبعاً من بين عدة أسباب أخرى ) تشجع الاقاليم على (الإنفصال)

نعمل لينا تاني ملتقى في .... بيروت ....


أحمد الشايقي

الأخ الكريم ود الكوارته / فيصل عبدالله تحياتى ياغالى
دايما بتجبرنى أرد عليك قبل الآخرين برغم أن هنالك
إخوة كرام منتظرين لكن معليش يصبروا شويه جييكم ..

Quote: وموية الجيلى والله برضه فكرة مالو عشان ما نخسر ونخسر الحكومة مش كده ؟ الكوارتى / فيصل

البعجبنى فيك غنك رجل وطنى وغيور وقلبك على كل أهلك فى السودان العظيم
بعد دا كله موضوعى وعقلانى وتتقبل الشئ المنطقى المعقول المقبول
عارف يا فيصل مشكلة السودان إنو كل المصانع وكل الشركات مكدسة فى محل
واحد وطبعا ( الخرطوم وما جاورها ) بغرض ان يستفيد مواطن هذه المواقع
من كل الفوائد توظيف على إستثمار على كل وما يهم إنو الاخرين يستفيدوا
ولكن يستفاد منهم وإذا أردت ان تجسد سودانيتك وحقوق المواطنة تجى وتلقاها
هنا سياسة هيمنة وتسلط وكنكشة ومسكة مخلبية ؟! وهذا ما لم يضمن فى الخطط
الاستراتيجية خاصة الخطة الربع قرنية ؟! مفروض تقوم المصانع والمصف ة والمسالخ
فى محل الانتاج الا توافقنى الرأى ؟! اشكرك يا صديقى حكمت فعدلت فأنصفت ولا عدمناك


..

الأخ الكريم / عبدالعزيز عيسى تحياتى يا غالى


الأخ الهلباوي

سلام

1- اتفاقية السلام وحق تقرير المصير.
2- الإستفتاء يتم في مواعيده.
3-التقسيم العادل للثروة( 90% للمنتج).
4- قوات دولية في الحدود الفاصلة.
5- مشاورات لإنشاء خط تصدير عبر تشاد- الكاميرون..
6- اقامة علاقات مع اسرائيل ليست على حساب العرب.



مع إحترامى لوجهة نظرك لكن إلا إننى أختلف معك كثيرا
ببساطة جدودنا لا زالت دماؤهم تخضرب جبال كررى وأم دبيكرات
وامتزجت دماؤهم بذلك الثرى بصراحة نحن لا نهدر دماؤنا هدرا
نحن ناس وحدة لكن وحدة مشروطة بالمساواة فى الحقوق والواجبات
وإذا كان ذلك لا قدر الله فعاصمتنا سوف تكون ( أم درمان ) ولا بديل
عنها أشكرك


..

Quote: فعاصمتنا سوف تكون ( أم درمان ) ولا بديل

سلام
و لماذا ام درمان ؟؟؟؟

الأخ الكريم / مدثر صديق تحياتى ياغالى

Quote: سلام و لماذا ام درمان ؟؟؟؟

وعليكم السلام ورحمة الله تعالى وبركاته
لأنهاهي العاصمة الوطنية الم أقل لكم نحن
ناس وحدة علاوة على أن بها متحف الخليفة
عبدالله التعايشى وقبة الامام المهدى ....


..

**

..

الاخ ادم سلام
تاني يا حبيب

Quote: لأنهاهي العاصمة الوطنية

كده انا معاك مائة مائة ....

أخى الكريم تحياتى يا غالى

Quote: الاخ ادم سلام تاني يا حبيب Quote: لأنهاهي العاصمة الوطنية كده انا معاك مائة مائة ....

أشكرك يا محترم ولا عدمناك ..

..

أما بنعمة ربك فحدث


..

الوحدة والمحبة والتآخى من أجل السلام والاستقرار مطلب شعبى !!
وطن واحد شعب واحد ...



..

Quote: ..يا اخوي نحنا باقي لينا بس نلعن الشيطان الدخل وسط ابناء دارفور دا وبعدين تعال شوف دارفور حيكون شنو ( ولا في الاحلام

يا أخوي هرون والله فعلا إبليس لوشاف أفعال الناس العملوا لينا
الفتنة في دارفور يقول : ( لا حولّ ولا قوة إلا بالله )

يقال أن ابليس قرر مغادرة السودان بلا عودة ، أبالسة الإنس الذين
دائما يقنطر ليهم إبليس وهم يشوتوا قعدوا يحنسوا في إبليس ما يسافر
إبليس قال دي بلدعجيبة يجيني الواحد يقول عايز يغنى أقول ليه: اسرق
من هنا وأنهب من هنا وأنصب على هذا وخذ مال هذا إذا أصبح غني يعمل ليه
لوحة كبيرة ويكتب فيها ( هذا من فضل ربي)
قايتو لوربنا كفانا شرهم امورنا بتظبط

( لا تعليق ) !!



..

وجنس الأعراس الجماعية المخصصة لناس معينين وجهات معينة إن شاء الله نزوج لشباب ولايات الاقليم الثلاثة فى يوم واحد ( بلاش حندكة ) !!

..

**

..

Daily Iam watching your progress any comments or suggestions show us


..

**


..

هلباوي كل سنة وأنت طيب

والسنة الجاية راكب الهمر

يا خوي شئ كسير تلج وشئ رمي طعمية


ول أبا أتا شايت ييين

الحبيب / الصادق المهل تحياتى يا غالى

Quote: هلباوي كل سنة وأنت طيب والسنة الجاية راكب الهمر

عيد سعيد وعمرا مديد وكل عام وأنتم بخير
ما بعيد على الله يفعل ما يشاء بغير حساب

Quote: يا خوي شئ كسير تلج وشئ رمي طعمية ول أبا أتا شايت ييين

إنت أول مرة تشوف البوست دا وله شنو جاى واقع بتقلك كدا
الناس ما فتشتنا من زمان ولقونا بنحط الكورة واطة وبندسها
عشان نشطب راس الخصم وزى ما تقول كدا ( السهل الممتنع )
من الصعوبة بما كان مجاراته عشان كدا دايما الصورة ضبابية
و(الشوت ) مقلوز وعشان تستدركها أو تدرك كنهها يلزمك تدريب
تقيل وسويدى ضاغط مع متابعة لصيقة !!
وحيث أن دائما العبرة فى النهاية خليك متابع وركز معانا شوية
ولا عدمناك

..

من الصنف الممتاز!!

..