بمناسبة ملحمة اليوم - جابت ليها لاب توبات كمان يا ضلنا !!

مقال للصحفي الهلالي الجسور خالد عز الدين...... الله يكتر من أمثالك!!!


جابت ليها لاب توبات كمان يا ضلنا !!




غضب عنيف من الإخوة الأعزاء في إعلام المريخ.. ألفاظ غير محترمة وهجوم شرس على خالد عزالدين والهلال لمجرد السؤال.. من أين جاء اسم المريخ ؟


سؤال منطقي ليس به أي إساءة للمريخ، بل ربما كانت الإجابة لصالح المريخ إذا كانت منطقية.






قلنا إن اسم المريخ (مشاتر) في تلك الفترة وإن الكوكب الأحمر كوكب لم يبح حتى الآن بأسراره لذلك فإن تسمية المريخ من شابة في مقتبل العمر في ذلك الوقت تحتاج لشرح أكثر !!






كانت الإجابة بإساءات متكررة لشخصي وللهلال الكيان. ليظل السؤال قائماً.. من أين جاء اسم المريخ؟!






سألنا عن اسم المريخ فردوا بالسؤال عن اسم الهلال وهذه ليست إجابة.. وهو نفس أسلوب أهل المريخ الغريب عندما نتحدث عن إنجازات الهلال الحالية فتكون الإجابة المريخ أحرز كاس مانديلا!! تتحدث عن آخر بطولة لكأس السودان يقولو ليك المريخ جاب كاس مانديلا!! تكتب عن بطولة الدوري الممتاز الحالية وكيف تصدرها الهلال بعد تقدم المريخ عليه بست نقاط يقولوا ليك المريخ أحرز كأس مانديلا.. تقول الهلال يستعد لمباراة الصفاقسي.. يزعلوا ويقولوا ليك المريخ أحرز كأس مانديلا!






والله مانديلا ذاتو ما قال اسمو قدركم!!






وبعد ده كلو تلقاهم جارين ورانا جري الضل الساكي سيدو!






وضلنا دي ما قلناها نحن قالوها اليوغنديين.






والفرق بين الهلال وبقية أندية الدوري الممتاز زي الفارق بين ريال مدريد وبقية أندية الدوري الإسباني!






دي برضها ما قلناها نحن.. قالها محسن سيد مدرب نادي الاتحاد مدني!






يعني محسن سيد قال ليكم إنو الهلال براهو كوم وبقية أندية الدوري الممتاز كوم تاني.. أخير نحن قلنا ليكم يا ضلنا.. ده ضل ذاتها استكترها فيكم..






شد حيلك يا محسن.. بكرة حيردوا عليك ويقولوا ليك المريخ شال كاس مانديلا الاتحاد شال شنو؟؟






على العموم أصبح واضحاً أنو المقارنة بين الهلال والمريخ أصبحت غير موجودة.. وأنو (فرمالة) جمال الوالي حتكون زي (فرمالة) كأس مانديلا..






نقول طه علي البشير بستعد للانتخابات بعد توسعه في العمل التجاري حيقولوا لينا جمال الوالي برضو بستعد!!






نقول شيخ العرب حيرجع تاني رئيس للهلال بعد انتهاء فترة التعيين يقولوا ليك جمال ذااااتو قال راجع!!






نقول الكاردينال عمل تنظيم وشغال تسجيل عضوية يقولوا ليك ومالو جمال الوالي ما منظم!!






بحبو يحاكونا في أي شئ وهم ما قدرنا.. والغريبة بقولوا ليك هم أكبر مننا!!






طيب سألناكم المريخ اتولد سنة كم ؟ عشان نعرف أكبر مننا ولا أصغر.. قالوا 1907 و1908 و1927 وكمية من التواريخ غريبة.. طيب سموهو المريخ سنة كم والأهلي سنة كم والمسالمة سنة كم والمختلط سنة كم وفكتوريا سنة كم؟!!






النجمة ذاتها بقت شعار للمريخ سنة كم.. وهل النجمة كانت فكرة للسيدة سيدة عبد السيد المسيح ولا فكرة زول تاني؟؟!






واللونين الأصفر والأحمر ديل من يوم سمو المريخ ولا اللون الأحمر كان خاص بالأهلي والأصفر بفكتوريا!!






ما علينا.. نحن عايزين نقول ليكم أنو قصة تقليدنا دي صعبة.. لأنو نحن في الأصل ثابتين وفي الحياة متغيرين.. وإنتو ناس في الأصل ما ثابتين وفي الحياة عندكم فرمالتين!!






كاس مانديلا وجمال الوالي..






شوفو الفرق واضح في استقالة جمال الوالي وصلاح إدريس.. الهلال ماشي لي قدام وصلاح مستقيل.. استقرار في كل شئ.. اللاعبين والإدارة والهلال متصدر دوري ممتاز وكأس الكونفدرالية.. ويمشي يوسف أحمد يوسف يجي ولا بنشتغل بيهو ما بجي غيرو.. والمريخ بره الكونفدرالية والمشاكل كتيرة وناس أحمد محمد أحمد يكتبوا كل يوم ارجع لينا يا والينا!!






هسة نحن عندنا زول جديد (لنج) قام بي نمرة أربعة أول حاجة قال حكاية جوائز مليون وثلاثة مليون وخمسة ألف دولار دي موضة وانتهت.. الزول ده طوالي بادئ بي عربية.. لكن قبل كده قال لاعبين الهلال عشان ما يزهجوا ويستعدوا لمباراة الذهاب أمام الصفاقسي بهدوء قام جاب لأي لاعب (لاب توب) دي صعبة ما بتقدروا على تقليدها.. عشان لو عايزين تجيبوا لاب توب لأي لاعب تغيير لغة ساكت عايزين ليكم سنتين.. شئ بالفرنسي وشئ بالإنجليزي وشئ بالألماني وشئ بالعربي.. ما المريخ عامل زي الأمم المتحدة!!






وكمال دحية ده الا يجيبوا ليهو لاب توب بتكلم!!






زولنا الجديد ده اسمو (خالد) ما خالد عزالدين انتو كمان ما بتبقوا ثقيلين..






خالد منو يا خالد ؟






اسمو خالد (لاب توب)






مشكلتو ما جاب اللاب توب وسكت.. لا جاب مع اللاب توب اشتراك في الانترنت مع (سوداني كونكت)






اسألوني ليييه سوداني ما زين ؟






سألتوني..






بجاوبكم بكرة.






بس انتو ما تزعلو ..






قولوا هضربة زول لاعب مع الصفاقسي بكرة!!

أها يا ضلنا
إن شاء الله تكون اتكيفت