|
جد الجد - جميعنا خلف هلال السودان
|
بالرغم من صعوبة هضم وقوفنا مساندين للهلال هذه الايام في هذه الظروف التهاترية واستفحال امر المناكفات الحادة بين النديين التقليديين المريخ والهلال , الا انه وفي هذه المرحلة الحاسمة من البطولة يتوجب علينا الوقوف مساندين لهلال السودان متجاوزين الكثير من مرارات التهاتر التي كانت تحدث طيلة الفترة الماضية , الهلال قدم هذا الموسم اداء متميزا وارتفاع ملحوظ في مستواه يجعله الفريق الاقوى حتي الان في هذه البطولة , من حق الهلال الظفر بهذه البطولة ومن حقنا عليهم كمريخاب مساندتهم لتحقيق ذلك الحلم الذي استعصي عليهم تحقيقه لعقود مضت ليس من اجلهم فقط ولكن من اجل فريق المريخ لتتوافر الندية المطلوبة بين الفريقين , انفراد المريخ وحيدا طيلة السنوات السابقة بتحقيق الكاسات والبطولات الخارجية ليس في مصلحة تقدم الكرة السودانية لذا ندعم ونساند الهلال من اجل تحقيق حلمه الامر الذي يساهم في تحقيق بعض الندية بين الفريقين للنهوض بالكرة السودانية . بالرغم من تعثر المريخ خلال هذا الموسم الا انه يظل الفريق السوداني الوحيد الذي قام بتحقيق بعض احلام الكرة السودانية الامر الذي يسبب عرجا ملحوظا تسير عليه الكرة السودانية
ـــــــــ مع تحيات اساسي الكُج مساندتنا للهلال في هذه المباراة لا تعصمنا الشماتة في - حال هزيمة الهلال من الصفاقسي- لذا توجبت الاشارة
|
|
|
|
|
|
|
|
Re: جد الجد - جميعنا خلف هلال السودان (Re: اساسي)
|
Quote: مع تحيات اساسي الكُج |
عليك الله يا اساسي شجع الصفاقصي براحتك و ( وطنيتك محفوظة ) وما حننسي ليك وقفتك معانا وانت بتشجع الصفاقصي
اما لو اتغلبنا ( وما اظن دا يحصل ) اشمت زي ما عايز
بس المهم انك ما تشجعنا
خالص الود
قال كج قال نحنا ناقصين ياخي
| |
|
|
|
|
|
|
Re: جد الجد - جميعنا خلف هلال السودان (Re: امير مصطفى احمد)
|
بالرغم من ان الهلال سيلعب هذه المباراة و - قلبه مقطوع - الا ان فتية الهلال قادرين علي تحقيق المعجزات والخروج باقل الخسائر
الكباشي جميعا الهلال كلنا بكري ابو بكر
يا امير حافظ لي علي المراقة دي كويس الظروف ما معروفة
بيناوي كان ليك
| |
|
|
|
|
|
|
Re: جد الجد - جميعنا خلف هلال السودان (Re: اساسي)
|
أنا شخصياً كهلالابي بشكرك ودا مفروض يحصل من دون كج
السودان كبير بكل مافيه وبكل من فيه والهلال كبير السودان يحتاج لفوز الهلال هناك في تونس اكثر منه في الخرطوم لأن الوانسة مسحوا بنا الأرض على لسان طارق دياب في قناة الجزيرة الرياضية
يجب أن يعلم كل من هو سوداني اننا نريد الفوز للسودان لأنو لمن الهلال يتغلب هنا في السعودية ما بقولو ليك انت هلالابي ولا مريخابي بل سوف يعمموا علينا هذه المصيبة ويقولوا ليك والله السودانيين....
تشجيع المريخاب للهلالاب والعكس مهم في البطولات الخارجية
اللهم انصر الهلال على الصفاقسي التونسي في مباراة اليوم
الصادق
| |
|
|
|
|
|
|
Re: جد الجد - جميعنا خلف هلال السودان (Re: الصادق صديق سلمان)
|
والله يا الصادق مداخلتك دي خلت عيوني تقرب ترقرق , حسيت ليك بروحي وطني لمن بالغت في الامر
اخوانا المريخاب وقوفنا مع الهلال اليوم من اجل السودان اولا واخيرا
مع حفظ حقوقكم لما يحدث عقب المباراة
ــــــ ما يحدث عقب اي مباراة لا دخل له بالوطنية , يصبح الامر وقتها مسائل داخلية معلقة يجب البت فيها في حينها
| |
|
|
|
|
|
|
Re: جد الجد - جميعنا خلف هلال السودان (Re: اساسي)
|
انا شخصياً الكورة عندي على مستوى الاندية مامربوطة بالمواطنة نوهائي .. بشجع اللعبة الحلوة فقط ...وشايف الصفاقسي لعبهم حلو لذلك اشجعهم ...اذا حسيت لاقدر الله في يوم من الايام ان الهلال يستحق تشجيعي فلن ابخل بذلك ...والى ان يستحق اتمنى للصفاقسي رحلة سياحية ممتعة داخل ملعبهم ...
امشوا بلا وطنية بلا بطيخ معاكم ...
انا عارفك غواصة في السياسة لكن ماتوقعتك بتغوص في مجالات تانية ..
ــــــــــــــــ ودالقاضي ..
| |
|
|
|
|
|
|
Re: جد الجد - جميعنا خلف هلال السودان (Re: محمد عبد الماجد الصايم)
|
اساسي يا ربي يا سيدي ببركة بيتك الحرام هذا ولاننا ناس مساكين وقاعدين في صمة خشمنا وتجينا الهجمة نسالك الا تشمت بنا الاعداء والا تعطيهم ان شاء الله هزيمة 2 صفر ونعيش اسبوعين وشايلين هم انهم يعوضوها في الزريبة ويكرهونا بيها المنبر والمنابر المجاورة وان تلج شباكهم ما لايقل عن اربعة اهداف صفرية(مصفرجة للضمان) زي صفرهم الكبير داك وان ترجع العرجاء لمراحها وكانك يا ابوزيد لا غزيت لا شفت الغزو.
| |
|
|
|
|
|
|
Re: جد الجد - جميعنا خلف هلال السودان (Re: محمد عمر الفكي)
|
بوست روعة ياخونا
أنت يا بعد ما شفت حلاقة الرأس الأمس دي للاتحاد الليبي جيت طالع ببوستك دا
عارفك عملت بالمثــل البقـول
لو أخوك حلقـوا لي بل رأســـك
لكن لقيت شفت ومقــرم بطريقـة
اقول ليك انا ذاتي اليوم معاك بشجع الهليــل
هزيمـة الإتحاد الليبي دي ريحتني في .... زي ما بقول واحد من الرشاشات
وهسع انا لازبس تي شرت blue من الصباح في تشجيع اكثر من كدا
والله الليله جنس كااااااااااااااااااااااااااااااااكات وغااااااااااااااااااااااااغات
تبكوا بس يالمريخاب
ابومصطفى
| |
|
|
|
|
|
|
Re: جد الجد - جميعنا خلف هلال السودان (Re: محمد عمر الفكي)
|
Quote: يا ربي يا سيدي ببركة بيتك الحرام هذا ولاننا ناس مساكين وقاعدين في صمة خشمنا وتجينا الهجمة نسالك الا تشمت بنا الاعداء والا تعطيهم ان شاء الله هزيمة 2 صفر ونعيش اسبوعين وشايلين هم انهم يعوضوها في الزريبة ويكرهونا بيها المنبر والمنابر المجاورة وان تلج شباكهم ما لايقل عن اربعة اهداف صفرية(مصفرجة للضمان) زي صفرهم الكبير داك وان ترجع العرجاء لمراحها وكانك يا ابوزيد لا غزيت لا شفت الغزو. |
قدرما بحثت في نفسي عن موقع استنكر به كلامك او اختلف معك فيه لم اجد !
| |
|
|
|
|
|
|
Re: جد الجد - جميعنا خلف هلال السودان (Re: عبد اللطيف السيدح)
|
أساسي عليك الله الليلة أختانا ... وشجعنا (أو كجنا) لي قدام .. بس الليله خلينا خليك زي أخوانك ودالقاضي (الاكل الفطائر وحلم بينا ) وسفيان نابري .. دي الروح النحنا دايرنها فيكم .. حقد حتى النخاع أما حركة تكجونا دي فما ظريفة خاااااااااااالص منكم
| |
|
|
|
|
|
|
Re: جد الجد - جميعنا خلف هلال السودان (Re: عبد اللطيف السيدح)
|
اساسى و الله بينى و بينك اليوم قلبنا بكل الصدق مع الهلال فى هذه المعركة القوية و بينى و بينك الجماعة ديل المرة دى فيهم ( رقشة شوية ) و يمكن يعملوها و بالرغم من انهم لا يشجعون الزعيم لو كان لاعباً فى مثل هذه المواقف ، الا اننا لسنا هم
لكن وحياتك و رغم وطنيتنا الصادقة ، الا اننا لن نتركهم فى حالهم حال حدث غير ما نتمنى لهم و المرّاقة جاهزة فقد افتيتنا يا بن عثيمين المريخ فى جواز الشماتة عقب انتهاء المباراة بالفتوى ادناه :
Quote: مساندتنا للهلال في هذه المباراة لا تعصمنا الشماتة في - حال هزيمة الهلال من الصفاقسي- لذا توجبت الاشارة |
تعرف يا سى لقيتك حريف فى الهارت .... و بتزوغ بالدو بس سؤال: ياربى بت ( الاسود) أم سبعة دى البيأكلها منو ؟؟؟
| |
|
|
|
|
|
|
Re: جد الجد - جميعنا خلف هلال السودان (Re: KOSTA)
|
احس بكراهية ( إسفيرية ) تجاه فايز ود القاضي والعربي الساكن جنب الحرم داكـ : محمد عمر الفكي دلوني على طريقة ( إسفيرية ) تفش غبينتي فوقم
معاهم أمير الجمري كان جاء حايم بي جاي باقي ناس قريعتي راحت ديل عوسو عواستكم بلى يخمكم
| |
|
|
|
|
|
|
Re: جد الجد - جميعنا خلف هلال السودان (Re: فايزودالقاضي)
|
ياشباب نشكر كوستا,,,انه رجل صادق,,,
لكن اساسى دا الفيه معروفة من زمااااااااااان بشجع من اجل الكج,,,لكن هذه المرة شوف غيرها
بس بطمئن الاهلة,,,,
اليوم المباراة 2/1 لصالح الصفاقسى
وس,ف نجذهم فى المقبرة
| |
|
|
|
|
|
|
Re: جد الجد - جميعنا خلف هلال السودان (Re: abuguta)
|
Quote: احس بكراهية ( إسفيرية ) تجاه فايز ود القاضي والعربي الساكن جنب الحرم داكـ : محمد عمر الفكي دلوني على طريقة ( إسفيرية ) تفش غبينتي فوقم
معاهم أمير الجمري كان جاء حايم بي جاي باقي ناس قريعتي راحت ديل عوسو عواستكم بلى يخمكم |
كراهيتنا دي ان شاء الله تلقى "الفلنكة تحتها" ما بحلك مهزوم مهزوم وبالاربعة ان شاء الله
ان شاء الله بقيت كويس
| |
|
|
|
|
|
|
Re: جد الجد - جميعنا خلف هلال السودان (Re: فدياس نجم الدين)
|
Quote: وان تلج شباكهم ما لايقل عن اربعة اهداف صفرية(مصفرجة للضمان) |
بالله هي الاربعة صفر صفاقسي دي حامياكم النوم!
ربنا ستر أمس!
ثانكس أساسي فور يور سوبورتينغ ، نو ماتر ذا هيدن اجندا
__________ المنبر بلون الاسود ، غلبتني ايكونات الضحكـ
| |
|
|
|
|
|
|
|