ونسة عصرية

نمه اولانيه

ريحة العويل
مسمرة فى صفحة كتاب الليل
طعم الهديل
زاد المسافر فى حشا الوجعة
ودريبو طويل
حزنك حجابك يا ولد
مطرك يبابك با بلد
حلمك مساسقة السواقى زمن
بين العطش الفى رجاك
ووجع النيل
بين اليباس التانى جاك
وزعل الفجة ساعة تنطفى
الغنوة وتموت
حزنك حجابك يا ولد
مطرك يبابك با بلد

مشهد القعدة

غيمات كسولة، تتكئ كل واحدة على كتف الأخرى، والشمس باسطة شعرها على وصيد الأفق الأوسط من براح السماء

مشهد ثانوى
أغنية مغبرة بفعل "كتاحة" تحبو لتخربش وجه الظهيرة، تسير فى صحبة بعض لعنات مجهولة المصدر، ربما الإسم ايضا

موسيقى مزركشة بطعم قهوة صبية، خجولة

قرنفل "يانى" فى صحبة نعناع "محمد كرم الله"

هسع خلاس باكر تروح وتسيبنى وحدى انا فى الودار
سايلة الدموع ابكى وانوح ما بفرز الليل أنا من نهار

النيمات تضمر فرحة لا تملك سوى أن تسيل على جنبات جذوع النهار الغبشاء، ربما محاولة غير مجدية لتشارك فى جوقة الخضرة والنغم

الحال من بعضه يا نسمات

نمه تانيه

ضحكك مشاباة التراب
تالا السحاب
صبرا جميل
مبلول مع سعف العنا
مشرور مع الحلم الرهاب
سفرا طويل
هد المسافات والغنا
ممدود كما الحلم البخيل
جوه الشرايين التجابد فى النفس
زى أمنيات أمى الزمان
ساعة تتاوق من شبابيك الغياب

مشهد القومه

من عمق السؤال تنبع الإجابة، ومن بين جيوب جلباب الإجابة تخرج العناوين فى هيئة طير بدون مواعيد مسبقة مع الجهات

أنا بس عايز أعرف

كيف قدر "مصطفى سعيد" يدس "عوليس" فى نوم النخلة الطرفانية ديك؟
وكيف قدر لملم احلامه الملخبتة ديك ودفن نصها جواه، والنص التانى اتبرع بيهو للناس الما بنومو بدرى ؟

"جان جينيه" زول خواف ساى سيبك منو، كان داير تشوف وتضوق طعم الناس الما خوافين، امسك بس فى ناس "بتهوفن" و "أبو صلاح" وركز على "الخليل" انجض زول فى الناس الما عاديين ديل، مشكلته بس استعجل المرقه وفات سريع

شفت "بت مجذوب" عامله زى الكسرة الخميرة الغالبن بتكون بايته، طوالى بتذكرنى فسحة الفطور فى المدرسة، ما عارف ليه

"دالى" ما مجنون، لكين بحاول بس يرسم الوقت وعقارب الساعة بتتحرك، وكلما يرسم حاجة العقارب بتتحرك، عشان كده قرر إنه لازم يوقف الزمن شويه

حاجة تزهج

سمعت أن "دانتى" وبعد أن بنى كوميدياه الإلهية، كان يمشى ذات صباح بارد قد خبأ جسده ووجله تحت رائحة الحبر لينعم بقليل من الدفء، فصادف فى طريقه حدادا يصنع حدوات الخيول، رأه يدفن المعدن فى قلب التنور الهادر بالجمر ثم يعود ليطيعه كيفما شاء، سأله دانتى قائلا، أمن الضرورى أن تغمس هذا الحديد فى قلب النار؟
لم يعبأ الحداد كثيرا بسؤاله، لكنه تمتم بصوت غطته صرخات المعدن وضربات المطرقة، لن يركض الحصان صوب الفردوس ما لم يشارك الجحيم فى صياغة خطواته

حينها أدرك دانتى أنه لا بد من النار كى تطفئ الحريق

أما بعد
وعلى قول صاحبنا المتشائم داك، قال ليهو

شايف النيل ده، إنتو قايلو شنو

مجرد دمعة سايلة على خد الواطا؟

يا الله




لاحولا لا حولا

انا مشيت وسرحت بعيد خالص مع مشاهدك العصرية دي يا إبو ذر
ولحدي ما وصلنا للزول المتشائم الفي نهاية القصة
ورجعنا معاهو للمربع الاول وإتشائمنا معاهو.



خليك قريب وتعال احكي طوالي يا صديقي.

عصرية ونضمى يا أحمد

وكم فنجان قهوة ظريفة

تتم الناقص من اللوحة

وساعة الدنيا تبقى عصرا هالك
والشمس تمرق الطِرح البرتقالية ديك
وتبدا تقسم فيها لى الشفق المجدع جنب باب الغروب

الساعة ديك الزول ممكن يبدا يغنى

وشوية نسمات رقيقة ونديانه تبقى كورس معاك

ونشيل الغنية كلنا

سرا ولا جهرا ما مشكلة

حتى صاحبنا المتشائم حيشيل معانا

ونواصل الغنا
لحدى ما يظهر الخيط الأزرق من الخيط الأخضر

كلام يجبُر كسر الشمش
ونضمي يمسِّد ضهر الوجعة
وليس بعديد عن ذات النمّة

خدار حرف الغُني النديان
وتاكل حيلو في جدول
مفارق للسموم والصّي
نضار فرح السني الرويان
وسايل نيلو زي أول
وسابق للنهار الحي

علي فكرة التهويمات الضيّعت مستقبل عمك سلفادور شكلها كده ح تتآمر عليك يا جنَي
الطريق إلي الجحيم معبّد بالنوايا الحسنة
وإنت يا عوج الدرب سراطك دربو مارق للجنة
هسة ده يقولوا عليه شنو ؟
سُواتك دي طيّرت النوم من ود عيني

لاحولا لاحولا

Quote: حلمك مساسقة السواقى زمن بين العطش الفى رجاك ووجع النيل بين اليباس التانى جاك وزعل الفجة ساعة تنطفى الغنوة وتموت

هسة ده يقولوا عليه شنو ؟؟؟

أبو ذر بابكر ... بالطريقة دي ح تخُش الجنّة ....

ياسين

والحبر المبين

صباحاتك سعادة ونور معطر

وكم حزنة ورود ملونه

ترى كم هى المسافة
بين أنين الورد
ومسمع آلهة المطر؟

ترى كم هى المسافة
بين هتاف الدرب
وإصغاء الرب؟

ده مقطع من "المزامير"

ترنيمة الأسسئلة والغياب

اجمل وقت فى اليوم

البكون قاعد فى النص

بين قرب مشية العصرية

ودخول المغربية

وغالبا دى بتكون اللحظات البتقعد فيها الملائكة
قريب من احواض برسيم السماء القريبة مننا

ويتونسو

وقت عجيب جدا ده يا حبيب نوره

حصل ضقت قهوة السماء ؟

والله يا حبيب نوره

عندى غنا سمح خلاس

لكين المشكلة أنا بعانى من أمية تقنية متقعة

ما بعرف اباصر تنزيل الأغنيات والذى منه

كنت حانزل ليك "فينوس" أبوداود

مع أنغام برعى العجيبة ديك

يلا

اتخيل انك قاعد تسمع فيها

والله يا حبها

مع كل "طلعة شمش" أول شى الزول "يتبن" روحو
ويتحسس المناطق البتكون لابده فيها

عشان يشوف انه لسه "فى" ولا "مافى"

وتتحمدل السلامة لى روحك ساعة تلقاها لسه فى

وتانى تبدا مشاوير الشهيق وحوليات الزفير

وبين النفس الداخل والتانى المارق

تتبنى عوالم كتيرة ومسيخة
تقوم حاجات وتتهدم حاجات

يلا

الزول يرمى ليهو مدماق مدماقين دوباى
ويقعد يصنقر فى ضل المنى

وربك كريم

انت يا ياسين قايل الأوكسجين البشغل دم الزول ده شنو

ما ياهو بخار الأغنيات والحجوات والصلوات القاعد نجابد فيها دى

ولا شنو

عارف يا حبيبها لسان الحال قاعد يقول فى شنو هسه ؟

الهلال الشغل الناس هلالو
الظلام حين شاف محيو انجلالو
ناضرة خدودو بالانوار يلالو
اراح انفسنا بريحانة خلالو
المحجب مااكرم خصالو
لي كاتل وليه صعبان وصالو
حسنو نامي ومافي انسان حصالو
خلف حجبو بق النور عصالو

بالضبط كده والله

يا ند يا سماحه

يا زول يا اخدر انت

ابوذر

السبت والمزاج بي لون الصيف...بس بقدر احلم..واتخيل صوتك وصورة النيل..
الا الكتابة..الان ...
بس يا صديقي ان شاء الله انت وحبيب نورة تركزوا في البوست شوية..اكان المنبر دا ياخدوا لونو وطهمو الحقيقي

تحياتي وجاييك ان شاء الله

عبد الله جعفر

مشهدمخستك خارج فصوص النص :

سلام كتير وشوق

-----------

رشة الحيشان تنعنش روح الكسل.

------------

سلام واشواق.

رجعت الخرطوم من حداشر 2009 وأهي ماشه....

كايس عنوان معتصم هنا, لو ممكن ترسلوا لي عاجل.

المطر
عندما أتكئُ علي ظلالِ الإمام الأعظم أبو داؤود في شبهِ غرفتي الفوضوية تماماً كعالمي
أنا و رفقةً ونحن علي شفا عناقٍ من أغنية
لا يساورني شك !
بأنه ما أجتمع قوم علي حب أبو داؤود إلا ودخلوا الجنة !!

يا سيدي أنا في حضرة الإمام الأعظم

أهديك اللحظة دي

تعرف يا ياسين

هذا الكائن البديع الإسمه أبوداود

هو عندى ثانى اثنين فى غار الطرب الجد جد

الأولانى "عبد الكريم عبد الله مختار" أو ذلك المدعو كرومة

والله العظيم الجمعة الفاتت

الزول المسلط الإسمه عوض بابكر، فك لينا كرومة، لا، وكان بغنى شنو

يا جوهر صدر المحافل

ودى الوحيدة الأنا كنت لابد ليها وكايس ليها من زمن
عندى معظم تسجيلات كرومة ما عدا جوهر صدر المحافل دى

دى حقت "متنبئ شعراء الحقيبة" صالح عبد السيد ابو صلاح
قدس الله روحه واقعده مع من يحب

وسيبنى فى هجرانى

اها ابو داود بجى مع كرومة عديل

الاتنين ربنا خلقهم زينة للكون

وجمل بيهم حياتنا وروحنا

عليك الله يا حبيب نورة يوم كده اقعد براك

وخلى الدنيا تكون عصرية برضو، وماشه على المغارب

واسمع اجراس المعبد

ويا ريت تكون بالعود بس

بين برعى وابوداود

انت قايل الجنة دى يعنى الا يودوك ليها

براك ممكن تمش

حبيبنا جورج

كيفك ياخ وكيف احوالك وايامك

الشوق جحافل والله

وكيف الخرتوم عندك ومعاك ؟

أنا جاى الأسبوع الجاى بإذن واحد أحد

وأكيد حأسعى عشان الاقيك واشوفك

نفسى اقالدك والله يا جورج

بالنسبة لى عنوان اخونا معتصم

حارسله ليك فى الماسنجر

خليك قريب من المنبر عشان تشوف الرسالة

عبد الله

وما اظنه زلال
يروينا غير زلالك

فيا صاحبى

حضورك إسمه الخريف

عارف الخريف ده يا عبد الله
طوالى بخلينى اتخيل انه بكون موسم الكرنفالات الفى السماء

وانه كل الحاجات الفوق بتكون فى ذروة وقمة وأوج النشوة

وربما تكون المطرة النازله دى

باقى الأتخاب الإدفقت من هناك

وفيها حياة للناس

اها بس دى جيتك والله

أنا ومعاى حبيب نوره
أكيد حنشرب ما يتيسر لينا من أنخاب

وانت خليك فى النص

كل زول بديك "جوغمه"

وتشرب بى كفوفنا
لما تتكفا

زى ما قال شيخنا العبادى