من المسؤول عن هذه الجريمة يا هويدا شرف الدين ؟

Post: #1
Title: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 06:49 AM

محمد و كمال كل منهما ينوي إغتيال سعيد - لكن لا محمد عارف كمال عايز يقتل سعيد ولا كمال عارف محمد عايز يقتل سعيد يعني لا يوجد اى ترتيب مشترك بين محمد وكمال لاغتيال سعيد -

اها يا اخوانا سعيد دا دائما بيمشي مزرعتو - والمزرعة ما فيها ماء عشان كدا سعيد دائما لما يمشي بشيل معاهو قارورة بتاعة موية وعادة لما يصل المزرعة بيضع القارورة تحت شجرة عشان ما تسخن . لا يوجد اي احتمال لمصدر ماء آخر.

اها يا اخوانا محمد قال يمشي يلحق سعيد في المزرعة ويختفي بالاشجار حبة حبة لحدي يجد القارورة ويقوم يكب فيها سم قاتل جدا ويجي راجع بدون سعيد يشوفو .

بالفعل محمد ذهب الى مزرعة سعيد وعرف انو سعيد بعيييييييييييييييد ما بشوفو فقام طوالي بصب السم في القارورة وبرااااااااااااااحة انسحب ورجع اهلو - لعلمكم اى جرعة من القارورة قاتلة .

اها كمال ما عارف محمد عمل شنو ولا عارف اى حاجة عن نية وقصد محمد - كمال صمم يمشي يلحق سعيد في مزرعتو ويعلم تماما لو سعيد دا فقد موية القارورة بتاعتو بموت طوالي يعني مافي اى احتمال اخر لحصول سعيد على ماء خلاف موية قارورتو دي .

اها كمال وصل مزرعة سعيد وعرف انو سعيد بعييييييييييييد ما بشوفو وطوالي قام دفق الموية كلها في الواطة عشان سعيد يجي عطشان وما يجد اى موية ويموت عطشا.

بالفعل كمال دفق موية القارورة كلها في الواطة واختفى براااااااااااااااحة راجع لاهله وبعد قليل سعيد المسكين جاء عطشان ولما رفع القارورة وجدها فااااااااااااااضية و سعيد ربنا يرحمو مات من العطش ,

يلا السؤال يا حلوين :

من المسؤول عن موت سعيد ؟

وين ناس القانون ؟

لكم منى اطيب الاماني

لإسهامات غير الاعضاء يمكن التواصل عبر البريد الالكتروني :

[email protected]

Post: #2
Title: Re: من المسؤول عن هذه الجريمة يا هويدا شرف الدين ؟
Author: omer osman
Date: 10-24-2010, 06:59 AM
Parent: #1

Quote: يلا السؤال يا حلوين :

من المسؤول عن موت سعيد ؟

وين ناس القانون ؟

علاقة السببية وما ادراك ما السببية ...... والجريمة الناقصة والجريمة التامة ... والشروع .... الخ

بحر واسع ونظريات مختلفة .....

نخلي ناس الما قانون يورونا رأيهم شنو ؟؟

سلام يالطيب علك طيب ........

Post: #3
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 07:02 AM
Parent: #2

الاخ عمر عثمان

Quote: علاقة السببية وما ادراك ما السببية ...... والجريمة الناقصة والجريمة التامة ... والشروع .... الخ

بحر واسع ونظريات مختلفة .....

لله درك وانت تضع مسارا جيدا لتناول هذا الموضوع

اطيب امنياتي

Post: #4
Title: Re: من المسؤول عن هذه الجريمة يا هويدا شرف الدين ؟
Author: Tabaldina
Date: 10-24-2010, 07:03 AM
Parent: #2

..
.
الواحد كان ممكن يجاوب ..
لكن لقى السؤال دا مخصص لهويدا شرف الدين ..

------------

فاكتفى بالاجابة فى سره وغادر

Post: #5
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 07:13 AM
Parent: #4

.
Quote: الواحد كان ممكن يجاوب ..
لكن لقى السؤال دا مخصص لهويدا شرف الدين

تعال يا عمو تبلدينا - السؤال للجميع وقد تم ايراد اسم هويدا عشان بس تجي تحرر البكاء على المرحوم

Post: #6
Title: Re: من المسؤول عن هذه الجريمة يا هويدا شرف الدين ؟
Author: نصر الدين عثمان
Date: 10-24-2010, 07:26 AM
Parent: #5

أستاذي ود شيقوق .. سلام،

محمد = براءة (( لأن فعله لم يتسبب في موت سعيد (جريمة خائبة))
كمال = القتل العمد (تسبب فعله في حدوث الوفاة للمجنى عليه (سعيد))

==========
إذا كان بالإمكان السماح لي بتوليد مسألة أخرى من المسألة التي تفضلت بطرحها بإجراء تعديل بسيط (باللون الأحمر) وذلك وفقاً لما يلي:
محمد و كمال كل منهما ينوي إغتيال سعيد - لكن لا محمد عارف كمال عايز يقتل سعيد ولا كمال عارف محمد عايز يقتل سعيد يعني لا يوجد اى ترتيب مشترك بين محمد وكمال لاغتيال سعيد -

اها يا اخوانا سعيد دا دائما بيمشي مزرعتو - والمزرعة ما فيها ماء عشان كدا سعيد دائما لما يمشي بشيل معاهو قارورة بتاعة موية وعادة لما يصل المزرعة بيضع القارورة تحت شجرة عشان ما تسخن . لا يوجد اي احتمال لمصدر ماء آخر.

اها يا اخوانا محمد قال يمشي يلحق سعيد في المزرعة ويختفي بالاشجار حبة حبة لحدي يجد القارورة ويقوم يكب فيها سم قاتل جدا ويجي راجع بدون سعيد يشوفو .

بالفعل محمد ذهب الى مزرعة سعيد وعرف انو سعيد بعيييييييييييييييد ما بشوفو فقام طوالي بصب السم في القارورة وبرااااااااااااااحة انسحب ورجع اهلو - لعلمكم اى جرعة من القارورة قاتلة .

اها كمال ما عارف محمد عمل شنو ولا عارف اى حاجة عن نية وقصد محمد - كمال صمم يمشي يلحق سعيد في مزرعتو ويعلم تماما لو سعيد دا فقد موية القارورة بتاعتو بموت طوالي يعني مافي اى احتمال اخر لحصول سعيد على ماء خلاف موية قارورتو دي .

اها كمال وصل مزرعة سعيد وعرف انو سعيد بعييييييييييييد ما بشوفو وطوالي قام شرب كم جرعة منها و دفق باقي الموية في الواطة عشان سعيد يجي عطشان وما يجد اى موية ويموت عطشا.

بالفعل كمال دفق موية القارورة كلها في الواطة وأثناء رجوعه لاهله مات في منتصف الطريق .وبعد قليل سعيد المسكين جاء عطشان ولما رفع القارورة وجدها فااااااااااااااضية و سعيد ربنا يرحمو مات من العطش ,

يلا السؤال يا حلوين :

من المسؤول عن موت سعيد ؟
من المسؤول عن موت كمال؟

وين ناس القانون ؟

لكم منى اطيب الاماني

Post: #7
Title: Re: من المسؤول عن هذه الجريمة يا هويدا شرف الدين ؟
Author: محمد عمر جبريل
Date: 10-24-2010, 07:32 AM
Parent: #6

نشاور أجاثا كريستي ونجيك راجعين

Post: #8
Title: Re: من المسؤول عن هذه الجريمة يا هويدا شرف الدين ؟
Author: omer osman
Date: 10-24-2010, 07:35 AM
Parent: #6

Quote: اها كمال وصل مزرعة سعيد وعرف انو سعيد بعييييييييييييد ما بشوفو وطوالي قام شرب كم جرعة منها و دفق باقي الموية في الواطة عشان سعيد يجي عطشان وما يجد اى موية ويموت عطشا.

بالفعل كمال دفق موية القارورة كلها في الواطة وأثناء رجوعه لاهله مات في منتصف الطريق .وبعد قليل سعيد المسكين جاء عطشان ولما رفع القارورة وجدها فااااااااااااااضية و سعيد ربنا يرحمو مات من العطش ,

يلا السؤال يا حلوين :

من المسؤول عن موت سعيد ؟
من المسؤول عن موت كمال؟

وين ناس القانون ؟

الركن المادي ... الركن المعنوي ...القصد الجنائي ... إزهاق روح أنسان حي ..... النتيجة .... علاقة السببية

Post: #9
Title: Re: من المسؤول عن هذه الجريمة يا هويدا شرف الدين ؟
Author: omer osman
Date: 10-24-2010, 07:38 AM
Parent: #8

* سؤال .... لغير أهل القانون

ماهي الجريمة التى يعاقب القانون عند الشروع فيها ولا يعاقب عند إكتمالها ؟

Post: #10
Title: Re: من المسؤول عن هذه الجريمة يا هويدا شرف الدين ؟
Author: فيصل محمد خليل
Date: 10-24-2010, 07:51 AM
Parent: #9

الانتحار يا عمر

__
تحياتي لخالد

Post: #11
Title: Re: من المسؤول عن هذه الجريمة يا هويدا شرف الدين ؟
Author: omer osman
Date: 10-24-2010, 08:00 AM
Parent: #10

Quote: الانتحار يا عمر

معلم والله يافيصل ......

Post: #13
Title: Re: من المسؤول عن هذه الجريمة يا هويدا شرف الدين ؟
Author: طارق أحمد عثمان
Date: 10-24-2010, 08:09 AM
Parent: #11

مزرعة سعيد دي مزرعة شنو
لا زرع ولا ضرع
يعني بتشرب من وين؟

شكلو المرحوم كان مزارع فاشل.

Post: #12
Title: Re: من المسؤول عن هذه الجريمة يا هويدا شرف الدين ؟
Author: talha alsayed
Date: 10-24-2010, 08:06 AM
Parent: #10

Quote:

من المسؤول عن موت سعيد ؟

لا احد مسئول عن موت سعيد

تسميم محمد للقاروره لم يقتل سعيد لانه لم يشرب منها

ودفق كمال للقاروره لم يقتل سعيد بل نجاه من الموت مسمومآ

ثم

لا يوجد اثبات الا باعترافهما او اعتراف احدهما

محاولة واحد ما قانونى

Post: #15
Title: Re: من المسؤول عن هذه الجريمة يا هويدا شرف الدين ؟
Author: محمد الامين احمد
Date: 10-24-2010, 08:27 AM
Parent: #12

تحية طيبة للجميع

غلـوطـيـة صحى صحى ، و ده برضو رآى لا قانونى لا شرعى، و ده بافتراض ان الجميع عرف تفاصيل القصة باعتراف الجناة

الاجابة على الاستاذ الطيب

محمد : تهمة الشروع فى القتل
كمال : تهمة القتل العمد
سعيد : الله يرحمو

====================================

الاجابة على الاستاذ نصر الدين

محمد : تهمة القتل غير العمد
كمال : تهمة القتل العمد
سعيد : الله يرحمو

Post: #22
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 09:21 AM
Parent: #8

اخي الاستاذ نصر الدين

Quote: اها كمال وصل مزرعة سعيد وعرف انو سعيد بعييييييييييييد ما بشوفو وطوالي قام شرب كم جرعة منها و دفق باقي الموية في الواطة عشان سعيد يجي عطشان وما يجد اى موية ويموت عطشا.

شكرا ليك وانت تأتينا بفرضية جديدة أكثر تعقيدا عما كانت عليه

Post: #14
Title: Re: من المسؤول عن هذه الجريمة يا هويدا شرف الدين ؟
Author: نصر الدين عثمان
Date: 10-24-2010, 08:26 AM
Parent: #6

Quote: محمد = براءة (( لأن فعله لم يتسبب في موت سعيد (جريمة خائبة))

عايز أعدل الجزئية الخاصة بوصف تلك الجريمة من (جريمة خائبة) إلى (جريمة مستحيلة)
محمد = براءة ((لأن فعله لم يتسبب في موت سعيد (جريمة مستحيلة))
براءة لأن الجريمة لا يمكن أن تتحقق ومن ثم فإنه لا شروع في جريمة لا يمكن أن تتحقق (مذهب موضوعي)
أو
محمد = شروع في القتل ((لأن فعله لم يتسبب في موت سعيد (جريمة مستحيلة))
شروع في القتل لأن الفاعل قد أظهر نيته وتصميمه الإجراميين في إرتكاب الجريمة ورغم عدم تحقق النتيجة
إلا أنه يجب معاقبة الجاني على خطورته الإجرامية بغض النظر عن استحالة تحقق النتيجة الإجرامية
لأنها تلك الاستحالة جاءت لأسباب خارجة عن إرادته (مذهب شخصي)

والله أعلم..

Post: #16
Title: Re: من المسؤول عن هذه الجريمة يا هويدا شرف الدين ؟
Author: omer osman
Date: 10-24-2010, 08:38 AM
Parent: #14

Quote: عايز أعدل الجزئية الخاصة بوصف تلك الجريمة من (جريمة خائبة) إلى (جريمة مستحيلة)

لكن يانصرالدين جريمة محمد فعلاً (خايبة) ولسيت (مستحيلة)

ليه : لانو الجريمة الخايبة أو الناقصة اكتملت فيها كل اركان الجريمة ولم تتحقق النتيجة لسبب خارج عن ارادة الجاني (جاء زول دفق الموية)

أما الجريمة المستحيلة فهي جريمة لم تتحقق فيها النتيجة رغم اكتمال اركان الجريمة لاستحالة حدوث النتيجة مثلاً

اذا قام محمد بوضع (دقيق قمح) في الموية ظنناً منه انه (مادة سامة) يستحيل هنا ان تتحقق النتيجة المرجوة وهي موت الشخص المقصود

والله اعلم ..........

Post: #17
Title: Re: من المسؤول عن هذه الجريمة يا هويدا شرف الدين ؟
Author: هويدا شرف الدين
Date: 10-24-2010, 08:40 AM
Parent: #14

المسنوح سلامات

حسب رأي الشخصي وأهتمامك شخصيا بأسمي أحب أن اوضح انه في هذه الحاله الإثنان يجب أن يلحقوهم أمات طه لأن الاثنان قاموا بأفعال تؤدي إلي الموت إذا هما متساويان وهما مسؤلان عن هذه الجريمة

Post: #18
Title: Re: من المسؤول عن هذه الجريمة يا هويدا شرف الدين ؟
Author: هويدا شرف الدين
Date: 10-24-2010, 08:44 AM
Parent: #17

تبلدينا بالله انا كنت قايله الحاله واحده

Post: #19
Title: Re: من المسؤول عن هذه الجريمة يا هويدا شرف الدين ؟
Author: osman righeem
Date: 10-24-2010, 08:51 AM
Parent: #17

Quote: ماهي الجريمة التى يعاقب القانون عند الشروع فيها ولا يعاقب عند إكتمالها ؟

غايتو علي ايام العدالة الناجزة كانو بيعاقبو علي الشروع في الزنا لكن ما سمعنا بإقامة حد

يا استاذنا الزول سعيد ده لو مات عطشان بيكون يومه تمه بس ما في جريمة

مزرعة dry irrigation

Post: #20
Title: Re: من المسؤول عن هذه الجريمة يا هويدا شرف الدين ؟
Author: omer osman
Date: 10-24-2010, 08:58 AM
Parent: #19

Quote: غايتو علي ايام العدالة الناجزة كانو بيعاقبو علي الشروع في الزنا لكن ما سمعنا بإقامة حد

مرة في كشة ايام الشغال في القسم الشرقي ..........

قبضنا زول في حالة شروع جوه أوضة ....... وشروع بالجد جد مش اى كلام ...

المهم لمن قبضناهو ....... كان همو حاجة واحدة بس

نرجع ليهو قروشو من البت الكانت معاهو ..

انت قايل ما رجعتها ليهو ..... قلت ليها ياخي الزول يبقن عليهو اتين ميته وخراب دياره ...

Post: #24
Title: Re: من المسؤول عن هذه الجريمة يا هويدا شرف الدين ؟
Author: أمين يحيى
Date: 10-24-2010, 09:35 AM
Parent: #20

تحياتي للجميع ...
محمد : كيف تمّ إتهامه ؟ إذا ثبت أنه تم توجيه إتهام له بوضع السم فيجب إدانته بجريمة الشروع في القتل .
كمال : تجوز إدانته بتهمة القتل العمد ما لم تثبت إدانة محمد بالجرم أعلاه .
_______________
ناس القانون بالله سامحونا على التنظير
بس يا ود شيقوق قصة "يتبع" و "الحل في العدد القادم" دي ما تجهجهنا بيها ..

يا جنابو :
Quote: انت قايل ما رجعتها ليهو ..... قلت ليها ياخي الزول يبقن عليهو اتين ميته وخراب دياره ...

أصيل يا سعادتك !!!
والله قاعد بضحك لما غالبني السكات .... لكن مبااااالغة يا سعادتك ،،،

Post: #21
Title: Re: من المسؤول عن هذه الجريمة يا هويدا شرف الدين ؟
Author: نصر الدين عثمان
Date: 10-24-2010, 09:05 AM
Parent: #17

Quote: لكن يانصرالدين جريمة محمد فعلاً (خايبة) ولسيت (مستحيلة)

ليه : لانو الجريمة الخايبة أو الناقصة اكتملت فيها كل اركان الجريمة ولم تتحقق النتيجة لسبب خارج عن ارادة الجاني (جاء زول دفق الموية)

أما الجريمة المستحيلة فهي جريمة لم تتحقق فيها النتيجة رغم اكتمال اركان الجريمة لاستحالة حدوث النتيجة مثلاً

سعادتو عمر .. سلام،

شكراً للتصويب، فكلامك صحيح فقد أخطأت أنا حين أردت التصحيح ..
وأن كان هناك تداخل بين الجريمتين فهما يتفقان في:
اكتمال أركان الجريمة (النشاط الإجرامي)
تخلف النتيجة لأسباب لا دخل لإرادة الجاني بها
فإذا كان ذلك كذلك فلا مناص من قيامي بالتعديل مرة ثانية:
محمد = شروع في القتل (جريمة خائبة)

وأظن أن الفارق الأساسي بينهما يكمن في:
الجريمة المستحيلة : عندما لا تتحقق النتيجة أياً كانت الظروف اللاحقة المحيطة بها (إطلاق النار على شخص ميت)
الجريمة الخائبة: عندما لا تتحقق النتيجة بسبب تداخل عامل عارض (محتمل) لاحق لا دخل لإرادة الجاني به
والله أعلم..
تقبل مودتي وتقديري

Post: #23
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 09:28 AM
Parent: #21

سلام الله عليكم كلكم بي هويدا المسنوحة

قالت امات طه

طه اليملأ خشمك طين

Post: #25
Title: Re: من المسؤول عن هذه الجريمة يا هويدا شرف الدين ؟
Author: جمال الباقر
Date: 10-24-2010, 09:38 AM
Parent: #23

Quote: قبضنا زول في حالة شروع جوه أوضة ....... وشروع بالجد جد مش اى كلام ...

شروع في شنو يا جنابو ؟؟؟؟؟؟

الترجمة ياخوانا

بالنسبة لجريمة الطيب دي فيمكنه الاستعانة بتختخ وبالعدم لوزة
تحياتي

Post: #26
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 09:45 AM
Parent: #25

يا ود الباقر اخوي

كدى اجتهد وقول لينا

في انتظارك

Post: #27
Title: Re: من المسؤول عن هذه الجريمة يا هويدا شرف الدين ؟
Author: طارق جبريل
Date: 10-24-2010, 09:48 AM
Parent: #26

حتى أسئلتك سنيحة زيك

Post: #28
Title: Re: من المسؤول عن هذه الجريمة يا هويدا شرف الدين ؟
Author: جمال الباقر
Date: 10-24-2010, 09:52 AM
Parent: #26

كدي قبل مانجتهد يا الطيب

من الذي اخبر كاتب السؤال بما حدث ؟؟؟؟ خاصة وانو محمد اتلحس من العطش

بمعنى اخر اتذكرت لغز زمان كدة بقول ليك واحد حلم انو فلان ده حيجي يقتلو فتح عينو لقاهو قدامو وفعلا قتلو وكان السؤال ما هو تفسيرك ؟؟ وكانت الاجابة انو شنو العرف الزول القال السؤال انو المرحوم حلم بالقاتل ؟؟
دحين يا خوي ده ماقريب من سؤالك ده ؟؟؟؟

Post: #29
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 10:24 AM
Parent: #28

ولد جبريل

Quote: حتى أسئلتك سنيحة زيك

خليت الحبشيات جيت تجوعر بهنا

Post: #30
Title: Re: من المسؤول عن هذه الجريمة يا هويدا شرف الدين ؟
Author: هويدا شرف الدين
Date: 10-24-2010, 10:33 AM
Parent: #29

محمد هو المسؤول

Post: #32
Title: Re: من المسؤول عن هذه الجريمة يا هويدا شرف الدين ؟
Author: هويدا شرف الدين
Date: 10-24-2010, 10:46 AM
Parent: #30

ترسلو منو يجيب لينا الحطب ولا واحد فيكم يتبرع

Post: #31
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 10:45 AM
Parent: #28

اخي جمال

Quote: من الذي اخبر كاتب السؤال بما حدث ؟؟؟؟ خاصة وانو محمد اتلحس من العطش

الكيس افتراضي في الفقه الانجلو سكسوني

ومع ذلك وارد الحدوث

فلو حدث فكيف التعامل مع المتهمين قضائيا؟ هذا هو السؤال

Post: #33
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 10:55 AM
Parent: #31

هويدا

محمد مسؤول كيف ؟

محمد صب السم في الموية لكن المرحوم ما شرب موية مسممة مات عطشا لان الموية بسمها دلقت في الارض

Post: #35
Title: Re: من المسؤول عن هذه الجريمة يا هويدا شرف الدين ؟
Author: Mahjob Abdalla
Date: 10-24-2010, 12:15 PM
Parent: #31

Quote: الكيس افتراضي في الفقه الانجلو سكسوني

ومع ذلك وارد الحدوث

فلو حدث فكيف التعامل مع المتهمين قضائيا؟ هذا هو السؤال

السلام عليكم و رحمة الله يا شيخ العرب...
طبعا انا واحد من المداومين علي قراءه كتاباتك خاصة المسنوحات ديلك و مع ذلك دي اول مداخلة كتابية معك...
بس الافتراضية بتاعتك دي ما افتراضية ساكت...
يبدو انتو ناس المحاكم من محامين و قضاة و مدعين قررتو تستخدمو الانترنت لحل بعض القضايا المعقدة عندكم في المحاكم
و بعد شوية نسمع انو المحامي شيخ اول من استخدم الانترنت لحل اعقد قضية تمر علي المحاكم العمانية في القرن العشرين
و اصبح رائدا في هذا المجال

Post: #46
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-25-2010, 04:35 AM
Parent: #4

لمزيد من المشاركات

Post: #34
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 11:50 AM
Parent: #1

up

Post: #36
Title: Re: من المسؤول عن هذه الجريمة يا هويدا شرف الدين ؟
Author: نصر الدين عثمان
Date: 10-24-2010, 12:16 PM
Parent: #34

Quote: مرة في كشة ايام الشغال في القسم الشرقي ..........

قبضنا زول في حالة شروع جوه أوضة ....... وشروع بالجد جد مش اى كلام ...

المهم لمن قبضناهو ....... كان همو حاجة واحدة بس

نرجع ليهو قروشو من البت الكانت معاهو ..

انت قايل ما رجعتها ليهو ..... قلت ليها ياخي الزول يبقن عليهو اتين ميته وخراب دياره ...

سعادتو عمر .. سلام،

والله كان تصادروها منو وتخلوها معروضات عشان ياخد إسنافيك

..............
الظاهر أنا حاشتغيل تحوير طوالي ..
كدي شوف قصتكم بتاعت الكشة دي بعد هذه التعديلات (باللون الأحمر ) .. ما لون مريخكم التعبان ده:
(مرة في كشة ايام الشغال في القسم الشرقي ..........

قبضنا زول في حالة شروع جوه أوضة ....... وشروع بالجد جد مش اى كلام ...

المهم لمن قبضناهو وأحضرناه إلى القسم
هو والبت المعاهو ..
فوجئ هذا التعس بأن البت طلعت زوجته!؟)
أها في الحالة دي الإجراءات حتكون ككيف!؟

Post: #37
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 12:24 PM
Parent: #36

الاخ محجوب المسنوح

سلامي وعميق امتناني

طبعا انا واحد من المداومين علي قراءه كتاباتك خاصة المسنوحات ديلك و مع ذلك دي اول مداخلة كتابية معك...
بس الافتراضية بتاعتك دي ما افتراضية ساكت...

هههههههههههههههها لا والله ساااااااااااااااااكت

يبدو انتو ناس المحاكم من محامين و قضاة و مدعين قررتو تستخدمو الانترنت لحل بعض القضايا المعقدة عندكم في المحاكم
و بعد شوية نسمع انو المحامي شيخ اول من استخدم الانترنت لحل اعقد قضية تمر علي المحاكم العمانية في القرن العشرين
و اصبح رائدا في هذا المجا

يا رييييييييييييييييييت يا العشاء

جنابو نصر

الاجراءات هي الافراج عنه فورا

لو فالح بقبل عليكم وبشب ليكم في حلقومكم يشهيكم العافية

Post: #38
Title: Re: من المسؤول عن هذه الجريمة يا هويدا شرف الدين ؟
Author: نصر الدين عثمان
Date: 10-24-2010, 12:32 PM
Parent: #37

Quote: الاجراءات هي الافراج عنه فورا

لو فالح بقبل عليكم وبشب ليكم في حلقومكم يشهيكم العافية

أستاذي ود شيقوق

في ذمتك ما كان أخير ليه الإدانة - المشرفة - حتى لو بالمؤبد
من هذه البراءة- المشينة - باقي ليك لو فالح ما كان يبلغ الموس وحده
ويتنازل عن هذا الدفع المخزي

Post: #39
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 01:11 PM
Parent: #38

في ذمتك ما كان أخير ليه الإدانة - المشرفة - حتى لو بالمؤبد
من هذه البراءة- المشينة - باقي ليك لو فالح ما كان يبلغ الموس وحده
ويتنازل عن هذا الدفع المخزي

الزول دا ني عديييييييييييل يا سعادتك

ههههههههههههههههههههههههههها

غايتو بسطتك لجنابو عمر يحيي دي براها بكفر ليك ذنوبك كلها

عمر متابع؟

Post: #40
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 01:39 PM
Parent: #39

والله يا اخوانا فاقدين جنابو الخال عمر على حسن

Post: #41
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 03:27 PM
Parent: #1

waiting more suggestions

Post: #42
Title: Re: من المسؤول عن هذه الجريمة يا هويدا شرف الدين ؟
Author: عبدالرحمن الحلاوي
Date: 10-24-2010, 04:25 PM
Parent: #41

الطيب ابن عمي
سلام
مجرد إمساك القلم وكتابة الاسم ورقم الجلوس ...يعتبر شروع في الامتحان ... أركان الجريمة : المادي والمعنوي شرطان أساسيان لإكتمال مسمى جريمة ..ولنا عودة

Post: #43
Title: Re: من المسؤول عن هذه الجريمة يا هويدا شرف الدين ؟
Author: Yousif A Abusinina
Date: 10-24-2010, 04:38 PM
Parent: #42

سلام الله عليكم كلكم بي هويدا المسنوحة

قالت امات طه

طه اليملأ خشمك طين

غايتو جنس سناحة عليك يالمسنوح

المسنوحة سببها شنو كان ماتو او حيوووووووا

يااخوى ماتمشى على اهلك ناس الصعيد تساعدهم فى لم العيش والدق

عمووو فيصل عمو كمال الموضوع فكة على الاخرررررررر الحقوا صاحبكم قبل ما يجيبها كبيرة

Post: #44
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 07:02 PM
Parent: #43

الحلاوي اخوي

مجرد إمساك القلم وكتابة الاسم ورقم الجلوس ...يعتبر شروع في الامتحان ... أركان الجريمة : المادي والمعنوي شرطان أساسيان لإكتمال مسمى جريمة ..ولنا عودة

مالك ؟ بديت كويس وفي المسار الصحيح

طيب ورينا الركن المادي هنا وين؟

Post: #45
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-24-2010, 07:13 PM
Parent: #44

غايتو جنس سناحة عليك يالمسنوح

المسنوحة سببها شنو كان ماتو او حيوووووووا

يااخوى ماتمشى على اهلك ناس الصعيد تساعدهم فى لم العيش والدق

عمووو فيصل عمو كمال الموضوع فكة على الاخرررررررر الحقوا صاحبكم قبل ما يجيبها كبيرة

جيت يا المسنوووووووح تخرب البوست ؟

هويدا المسنوحة دي عاملنها طعمة للبوست بتجيب الحوت المكان

Post: #47
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-25-2010, 06:57 AM
Parent: #1

لآرائكم

Post: #48
Title: Re: من المسؤول عن هذه الجريمة يا هويدا شرف الدين ؟
Author: عمر علي حسن
Date: 10-25-2010, 11:46 AM
Parent: #47

Quote: والله يا اخوانا فاقدين جنابو الخال عمر على حسن

انا مستغرب في الزول كمال الدفق المويه ده .. ليه دفقها ؟.. ما كان يشربها هو ذاتو بدل مايمشي .. دا راجل
متعب وبتاع مشاكل وانا اعتبره منتحر وجزاؤه نار جهنم خالدا مخلدا فيها ابدا .. لانه الافتراض الاساسي في
القضية انه قارورة المويه ستكفي لاعادة صاحبها الي اهله حيا .. فكيف يعود كمال الي اهله حيا وليس معه
قارورة ماء .. لازم يشرب منها حبة ولازم يموت ..

كمان محمد جاب السم من وين .. ووضعه في القارورة كيف هل كان لابس جونتي .. واذا ما لابس جونتي هو
ذاته ما تسمم ليه.

بعدين سعيد دة عمل ليهم شنو كلهم عايزين يقتلوه ؟ لازم نعرف الدوافع والباعث !

واخيرا انت ذاتك الكلمك منو ؟

هل كلمتك هويدا شرف الدين لانها هي المدبر الاساسي لقتل سعيد .. لا شك ان كيدهن عظيم

بالطريقه بتاعتي دي اتنين ماتوا وما باقي الا سعيد وهويدا .. سعيد متهم بالشروع في الانتحار لانه كان يعلم علم
اليقين انه القارورة لو اختفت اواتدفقت لاي سبب فان موته سيكون نتيجة حتمية لفعله او اهماله .. وبالرغم من ذلك
خلاها تحت الشجرة .
اما هويدا فسنتركها لشيقوق وانا متأكد انه حيرص ليها لائحة اتهامات ما يقدر يطلعها منها المحجوب ولا زروق
ولا عابدين اسماعيل ..

عمر علي حسن

Post: #49
Title: Re: من المسؤول عن هذه الجريمة يا هويدا شرف الدين ؟
Author: رانيه محمد الشيخ
Date: 10-25-2010, 12:01 PM
Parent: #48

حاسه انى ما استوعبت الموضوع
يعنى الانسان ما بيموت من العطش الا بعد حوالى كم يوم مش
اها زولك دا لمن لقى القاروره فاضيه ما كان يرجع دربه لبيته الملا منه القاروره اصلا زى ما الجماعه التانيه جات ورجعت
وهى مزرعه كيفين مافيها مويه
الزرع دا بيسقوا شنو
هو شكل الموضوع لا سعيد لا محمد لا الما متذكره اسمه الفكره فى القاروره ولا شنو
:)))))))))

المحيرنى اكتر هويدا
دى منو والجابها فى النص شنو

Post: #50
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-25-2010, 12:38 PM
Parent: #49

خالي عمر

الف الف حمد الله على عودتك

هذه الجريمة يا هويدا شرف الدين ؟ (Re: الطيب شيقوق)

Quote: والله يا اخوانا فاقدين جنابو الخال عمر على حسن

انا مستغرب في الزول كمال الدفق المويه ده .. ليه دفقها ؟.. ما كان يشربها هو ذاتو بدل مايمشي .. دا راجل
متعب وبتاع مشاكل وانا اعتبره منتحر وجزاؤه نار جهنم خالدا مخلدا فيها ابدا .. لانه الافتراض الاساسي في
القضية انه قارورة المويه ستكفي لاعادة صاحبها الي اهله حيا .. فكيف يعود كمال الي اهله حيا وليس معه
قارورة ماء .. لازم يشرب منها حبة ولازم يموت ..

كمان محمد جاب السم من وين .. ووضعه في القارورة كيف هل كان لابس جونتي .. واذا ما لابس جونتي هو
ذاته ما تسمم ليه.

بعدين سعيد دة عمل ليهم شنو كلهم عايزين يقتلوه ؟ لازم نعرف الدوافع والباعث !

واخيرا انت ذاتك الكلمك منو ؟

هل كلمتك هويدا شرف الدين لانها هي المدبر الاساسي لقتل سعيد .. لا شك ان كيدهن عظيم

بالطريقه بتاعتي دي اتنين ماتوا وما باقي الا سعيد وهويدا .. سعيد متهم بالشروع في الانتحار لانه كان يعلم علم
اليقين انه القارورة لو اختفت اواتدفقت لاي سبب فان موته سيكون نتيجة حتمية لفعله او اهماله .. وبالرغم من ذلك
خلاها تحت الشجرة .
اما هويدا فسنتركها لشيقوق وانا متأكد انه حيرص ليها لائحة اتهامات ما يقدر يطلعها منها المحجوب ولا زروق
ولا عابدين اسماعيل ..

على بالايمين طلعتني جييييييييييييييت

بس هويدا دي ذنببها شنو يا خال ؟ - نحن خاتنها في عنوان البوست زى الصارقيل

لقيتني كيف؟

Post: #51
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-25-2010, 12:45 PM
Parent: #50

رانية

ازيك وشكرا على مرورك

حاسه انى ما استوعبت الموضوع
يعنى الانسان ما بيموت من العطش الا بعد حوالى كم يوم مش

لا يا رانية هو كيس افتراضي ويفترض فيهو الموت فورا بدون اى اجتهادات تانية - بعدين المزرعة ممكن تكون مطرية

اها زولك دا لمن لقى القاروره فاضيه ما كان يرجع دربه لبيته الملا منه القاروره اصلا زى ما الجماعه التانيه جات ورجعت

هههههههههههههههههههههههها لالالالالالالالا الافتراض هنا موت طوالي

وهى مزرعه كيفين مافيها مويه
الزرع دا بيسقوا شنو

مطرية بقول ليك

المحيرنى اكتر هويدا
دى منو والجابها فى النص شنو

هويدا دي ريحانة المنبر يا رانية وفعلا اقحمناها في البوست بلا سبب المسكينة

Post: #52
Title: Re: من المسؤول عن هذه الجريمة يا هويدا شرف الدين ؟
Author: رانيه محمد الشيخ
Date: 10-25-2010, 12:50 PM
Parent: #51

مطريه ؟؟؟؟؟؟؟؟؟؟؟؟
يعنى شنو
معليش تعبناك بالشرح
لكن الجريمه دى فى حد ذاتها جريمه على الجرائم
اخير ليهم كمان يفلقوا بشوال بصل ونرتاح

Post: #53
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-25-2010, 01:26 PM
Parent: #51

مطريه ؟؟؟؟؟؟؟؟؟؟؟؟
يعنى شنو

يعني يا رانية بتي الاحفاد دي بدرسو فيها انجليزي بس يعني المنهج ما فيهو لغة عربية

اكيد بتعرفي المطر صالح ؟ اها مطرية لغة منسوبة الى المطر - يعني بالواضح كدا في السودان في ثلاثة انواع من الزراعة

اول بالتبادي - المطرية دي
تاني التبادي - المروية يعني الري الصناعي عندكم بقولوا ليها ال artificial irrigation

واخيرا الزراعة البحرية ودي عادة بتكون على قيف البحر ( القيف هو الشاطي عند ناس المدينة)

معليش تعبناك بالشرح

لالالالالالالالالالالا بس خايف تقولي لي موبايلك النغائم الفيهو شنو ؟

اخير ليهم كمان يفلقوا بشوال بصل ونرتاح

هههههههههههههههههههها يجازي محنك انت

Post: #54
Title: Re: من المسؤول عن هذه الجريمة يا هويدا شرف الدين ؟
Author: عمر علي حسن
Date: 10-25-2010, 05:05 PM
Parent: #53

Quote: بس هويدا دي ذنببها شنو يا خال ؟ - نحن خاتنها في عنوان البوست زى الصارقيل

شيقوق العزيز

في قضية وفاة المتهم ...... في حراسة الشرطة بعد قيامه بشنق نفسه بعد ان علق عمامته في
حمالة مروحة السقف لم اجد بدا من اتهام زميله الوحيد بالحراسة بمساعدته علي الوصول برقبته
الي العمامة وذلك بحمله علي ظهره ثم الانسحاب من تحته ليسقط جسده بثقله فتنكسر رقبته ..

انكر المتهم اية علاقة بمساعدة زميله علي الانتحار .. وزعم محاميه (المحجوب) ان الشرطة مسئولة
عن موته باهمالها في حراسته وتركها اياه يدخل الحراسة بعمامته .. واطنب في مرافعته مطالبا بابراز
دليل مادي علي هذه المساعدة المزعومة وبالطبع فان ذلك لايكون الابشاهد راي بعينه .. وما بيدي لا
يخرج عن اطار بينة ظرفيه تقوم علي ارتفاع السقف وعدم قدرة المنتحر علي القفز منه الا بمساعدة
وان المساعدة غير متاحة الا بواسطة الشخص الوحيد الموجود بالحراسة مع المنتحر ..

قال القاضي انه لا يستطيع تقرير الادانة علي اساس بينة ظنية مفردة مهما بلغت منطقيتها وقرر شطب البلاغ
لعدم كفلية الادلة ..

خرجت من المحكمة وخشمي ملح ملح .. وذهبت في مساء ذلك اليوم للمحجوب في مكتبه اساله عن العدالة
فقال لي الا يدان برئ ولو ضاعت القضية .. وقال لي انه القي في روع المحكمة امكانية وجود متهم آخر هو
الشرطة ليوسع اخدود الشك الذي احدثه غياب الدليل المباشر وانه كان يعلم ان ليس هناك ما يمنع دخول
المتهم للحراسة وعلي رأسه عمامة

لذلك فانني وفي غياب الدليل المادي وعدم البحث في مسرح الجريمة عن القارورة الفارغة وما عليها من
بصمات واثر الماء المسمم بالارض والربط بينهما لاثبات وجود طرف ثالث يهمه موت سعد واتهامه بالشروع
في القتل (رغم ان الموت لم يتم بفعله) ورغم ان هذا يدخل عمله في تصنيف للجريمة غير المكتملة لانه لا يد
له في عدم اكتمالها .. وتوجيه تهمة تسبيب الموت باهمال لكمال حتي ولو اعترف بافراغ الزجاجة وبنيته
قتل سعد عطشا فالموت لا يكون نتيجة حتمية للعطش اذ يمكن للقتيل تفاديه باي طريقة حتي ولو كانت ان يتبول
ليشرب ما يخرج منه .. وكل ذلك مرهون بوجود بصمة كمال ومحمد علي القارورة ووجود اثار السم في
ايدي احدهما بعد فحصه بالحمض النووي ..

اما (الصارقيل) او (ابو الحرقص) كما يسميه البعض فذنبها ان نظريتي في اتهام زميل المنتحر في الحراسة
تقوم علي عدم وجود شخص غيره وان خشمي ما زال ملح ملح لحدي دلوقتي .. وخليها تجيب المحجوب يطلعها من دي

Quote: لقيتني كيف

امانة ما عصرتنا عصره

عمر علي حسن

Post: #55
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-25-2010, 05:36 PM
Parent: #54

خالي السكر

شيقوق العزيز

في قضية وفاة المتهم ...... في حراسة الشرطة بعد قيامه بشنق نفسه بعد ان علق عمامته في
حمالة مروحة السقف لم اجد بدا من اتهام زميله الوحيد بالحراسة بمساعدته علي الوصول برقبته
الي العمامة وذلك بحمله علي ظهره ثم الانسحاب من تحته ليسقط جسده بثقله فتنكسر رقبته ..

انكر المتهم اية علاقة بمساعدة زميله علي الانتحار .. وزعم محاميه (المحجوب) ان الشرطة مسئولة
عن موته باهمالها في حراسته وتركها اياه يدخل الحراسة بعمامته .. واطنب في مرافعته مطالبا بابراز
دليل مادي علي هذه المساعدة المزعومة وبالطبع فان ذلك لايكون الابشاهد راي بعينه .. وما بيدي لا
يخرج عن اطار بينة ظرفيه تقوم علي ارتفاع السقف وعدم قدرة المنتحر علي القفز منه الا بمساعدة
وان المساعدة غير متاحة الا بواسطة الشخص الوحيد الموجود بالحراسة مع المنتحر ..

قال القاضي انه لا يستطيع تقرير الادانة علي اساس بينة ظنية مفردة مهما بلغت منطقيتها وقرر شطب البلاغ
لعدم كفلية الادلة ..

بالحيل كلام قاضينا صاح

خرجت من المحكمة وخشمي ملح ملح .. وذهبت في مساء ذلك اليوم للمحجوب في مكتبه اساله عن العدالة
فقال لي الا يدان برئ ولو ضاعت القضية .. وقال لي انه القي في روع المحكمة امكانية وجود متهم آخر هو
الشرطة ليوسع اخدود الشك الذي احدثه غياب الدليل المباشر وانه كان يعلم ان ليس هناك ما يمنع دخول
المتهم للحراسة وعلي رأسه عمامة

صدق الحجوب

لذلك فانني وفي غياب الدليل المادي وعدم البحث في مسرح الجريمة عن القارورة الفارغة وما عليها من
بصمات واثر الماء المسمم بالارض والربط بينهما لاثبات وجود طرف ثالث يهمه موت سعد واتهامه بالشروع
في القتل (رغم ان الموت لم يتم بفعله) ورغم ان هذا يدخل عمله في تصنيف للجريمة غير المكتملة لانه لا يد
له في عدم اكتمالها .. وتوجيه تهمة تسبيب الموت باهمال لكمال حتي ولو اعترف بافراغ الزجاجة وبنيته
قتل سعد عطشا فالموت لا يكون نتيجة حتمية للعطش اذ يمكن للقتيل تفاديه باي طريقة حتي ولو كانت ان يتبول
ليشرب ما يخرج منه .. وكل ذلك مرهون بوجود بصمة كمال ومحمد علي القارورة ووجود اثار السم في
ايدي احدهما بعد فحصه بالحمض النووي ..

هذه القضية هابوستكال كيس من الفقه الانجلوسكسوني يا بابا والمعطيات كما هي لا تقبل اى افتراضات ثانية - شخصان قاصدان اغتيال شخص معين بدون توافق او اشتراك - ولكل منهما وسيلته في القتل - تحققت النتيجة - ولا ينكر اي منهما نيته في قتل المجنى عليه ولكن لكل منهما دفاعه ممثلا في انعدام عنصر السببيه بين النتيجة والفعل .

خالي لقيتني كيف ؟

اما (الصارقيل) او (ابو الحرقص) كما يسميه البعض فذنبها ان نظريتي في اتهام زميل المنتحر في الحراسة
تقوم علي عدم وجود شخص غيره وان خشمي ما زال ملح ملح لحدي دلوقتي .. وخليها تجيب المحجوب يطلعها من دي

ههههههههههههههههههههههههههها

معذرة لعدم الاقتباس لاسباب فنية

Post: #56
Title: Re: من المسؤول عن هذه الجريمة يا هويدا شرف الدين ؟
Author: عمر علي حسن
Date: 10-25-2010, 06:04 PM
Parent: #55

Quote: هذه القضية هابوستكال كيس من الفقه الانجلوسكسوني يا بابا والمعطيات كما هي لا تقبل اى افتراضات ثانية

هايبوثيتكال .. وكمان معترفين .. والراجل مات ..
تجيبهم لينا في كمبو كديس نوريك فيهم .. وخلي هويدا بره الموضوع .

مش قلت لك .....

عمر علي حسن

Post: #57
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-25-2010, 07:13 PM
Parent: #56

هايبوثيتكال .. وكمان معترفين .. والراجل مات ..
تجيبهم لينا في كمبو كديس نوريك فيهم .. وخلي هويدا بره الموضوع .

يا سيدي الناس ديل معترفون فقط بالنية ولكنهم ينكرون ان الموت بسبب اي عمل اي منهم

انتوا شغلكم دا اخنق فطس ؟

لا تحكوا عن سببية ولا فعل جنائي ؟

والله حكم ود نواي ذااااااااااااااااااااااااااااتو

Post: #58
Title: Re: من المسؤول عن هذه الجريمة يا هويدا شرف الدين ؟
Author: رانيه محمد الشيخ
Date: 10-25-2010, 11:26 PM
Parent: #53

لكن حسى المطريه كان ما مطرية يبقى عليه العوض ومنو العوض فى الزرع وسعيد

:))))))))))))))))))))))))))))))))

Post: #59
Title: Re: من المسؤول عن هذه الجريمة يا هويدا شرف الدين ؟
Author: رغيم عثمان رغيم الحسن
Date: 10-25-2010, 11:55 PM
Parent: #58

محمد وكمال ديل رجعوا وين والحتة الرجعوا ليها دى سعيد ما بقدر يرجع ليها من غير ما يموت بالعطش ليه؟

Post: #60
Title: Re: من المسؤول عن هذه الجريمة يا هويدا شرف الدين ؟
Author: عمر علي حسن
Date: 10-26-2010, 08:52 PM
Parent: #59

Quote: والله حكم ود نواي ذااااااااااااااااااااااااااااتو

تصور يالطيب من زمن الدراسة كلما ادخل امتحان مهم اجي بالليل احلم اني راكب قطر وحسب الدرجه
اللي بكون راكب فيها النتيجه بتكون .. يعني لو راكب اولي A وثانية B وتالثة C
البارح حلمان راكب درجة رابعة وفي السلم .. وصحيت منزعج وما قدرت اتذكر الامتحان الا لما رجعت
للبوست ..

قلت لي الجماعة ديل معترفين بالنية ؟
والله تفكني عليهم اقطّع ليك روسينهم .. خليني انا الخشمي ملح ملح .. وديهم لعثمان رغيم يحاكمهم ليك بالعدالة
الناجزة ..

قال هايبوثيتكال قال

المصيبة لو كمان الليلة ركبنا قطر بضاعة !!!!

عمر علي حسن

Post: #61
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-26-2010, 09:11 PM
Parent: #60

رانية

الف سلامة المنبر عاد اليه رشده بعد ان ضن علينا بمساحا ت الرد منذ صباح اليوم

لكن حسى المطريه كان ما مطرية يبقى عليه العوض ومنو العوض فى الزرع وسعيد

انا ذاتي ما عارف يا رونو

Post: #62
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-26-2010, 09:14 PM
Parent: #61

رغم

سلامي

محمد وكمال ديل رجعوا وين والحتة الرجعوا ليها دى سعيد ما بقدر يرجع ليها من غير ما يموت بالعطش ليه؟

لا يا رغيم اخوى المسالة ما فيها اى افتراضات تانية

خذ الكيس كما هو ولا تجهد نفسك للبحث عما يمكن ان ان يكون

دا كيس موت موت موت

Post: #63
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-26-2010, 09:16 PM
Parent: #62

خالي ابو امير ما نتمت؟

تصور يالطيب من زمن الدراسة كلما ادخل امتحان مهم اجي بالليل احلم اني راكب قطر وحسب الدرجه
اللي بكون راكب فيها النتيجه بتكون .. يعني لو راكب اولي A وثانية B وتالثة C
البارح حلمان راكب درجة رابعة وفي السلم .. وصحيت منزعج وما قدرت اتذكر الامتحان الا لما رجعت
للبوست ..

قلت لي الجماعة ديل معترفين بالنية ؟
والله تفكني عليهم اقطّع ليك روسينهم .. خليني انا الخشمي ملح ملح .. وديهم لعثمان رغيم يحاكمهم ليك بالعدالة
الناجزة ..

قال هايبوثيتكال قال

المصيبة لو كمان الليلة ركبنا قطر بضاعة !!!!

جايييييييييييييييييييييييك يا زعيم

Post: #64
Title: Re: من المسؤول عن هذه الجريمة يا هويدا شرف الدين ؟
Author: عمر علي حسن
Date: 10-26-2010, 09:51 PM
Parent: #63

Quote: خالي ابو امير ما نتمت؟

انوم وين يا بوي .. انت عاوزني القي نفسي مشعبط في قطر بضاعة؟؟

زمان استاذنا عبد العظيم التجاني ابو قصيصة قال لي الليله احسن ما تنوم لانه ورقتك
دي ما بتركبك حتي لوري تراب ..

عمر علي حسن

Post: #65
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-27-2010, 04:35 AM
Parent: #64

Quote: انوم وين يا بوي .. انت عاوزني القي نفسي مشعبط في قطر بضاعة؟؟

هههههههههههها حاشاك حاشاك

Quote: زمان استاذنا عبد العظيم التجاني ابو قصيصة قال لي الليله احسن ما تنوم لانه ورقتك
دي ما بتركبك حتي لوري تراب ..

رحم الله الراحل المقيم مربي الاجيال الاستاذ عبد العظيم التجاني ابو قصيصة

Post: #66
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-27-2010, 06:21 PM
Parent: #65

وين يا اخوانا خالي ابو امير

بالحيل فاقدنو

اوع يكون نام ؟

Post: #67
Title: Re: من المسؤول عن هذه الجريمة يا هويدا شرف الدين ؟
Author: هويدا شرف الدين
Date: 10-28-2010, 08:05 AM
Parent: #66

الساده المرور الكرام
السلام عليكم ورحمة الله
الأخ عمر السلام عليكم ورحمة الله مشكور علي الدفاع

Post: #68
Title: Re: من المسؤول عن هذه الجريمة يا هويدا شرف الدين ؟
Author: هويدا شرف الدين
Date: 10-28-2010, 09:02 AM
Parent: #67

أبو سنينه مشتاقين يا خ وين الحي بيكم ، لا حس لا خبر وينك كبيت الزوغه ، شفت المسنوح دا لقاكم مافي بقي يسرح ويمرح

Post: #69
Title: Re: من المسؤول عن هذه الجريمة يا هويدا شرف الدين ؟
Author: عفاف الصادق بابكر
Date: 10-28-2010, 12:23 PM
Parent: #68

Quote: بس هويدا دي ذنببها شنو يا خال ؟ - نحن خاتنها في عنوان البوست زى الصارقيل

لقيتني كيف؟

ههههههههه والله يا ود شيقوق دي باااالغته فيها ...

ياخ قول خاتنها ذي العسل وبتلم النحل ..

Post: #70
Title: Re: من المسؤول عن هذه الجريمة يا هويدا شرف الدين ؟
Author: عمر علي حسن
Date: 10-28-2010, 04:56 PM
Parent: #69

Quote: وين يا اخوانا خالي ابو امير

يازعيم

خالك رافع الراية البيضاء .. وقررت اشوف لي لوري تراب اساومه علي المقعد
الامامي .. دبي كلها مافيها لوري تراب واحد .. يعني لوري التراب ذانه بقي هايبوثيتيكال !

توكلت علي الله ورجعت لكتبي القديمه لقيت عمك راتنلال في طبعة 1954 لا يعترف في
القتل بانواعه بشيء مثل البينة المباشرة .. قلت ليه (هايبوثيتيكال) يا مهراحا .. قال لي (نهي
هايبوثيتيكال) .. لفيت علي سيدنا عمر فوجدته اشد تمسكا .. قلت ليه ياسيدي يا امير المؤمنين
(هايبوثيتيكال) .. قال لي ادرأوا الحدود بالشبهات .. وطالما ان الموت حدث والرجلان لم يعترفا
بارتكابه وانما بنية ارتكابه فقط فلا مناص من اخذ الدية منهما لسد باب الذرائع ودرء الحدود بالشبهات ..
ويبدو انه لايريد ان يدخل نفسه في (زنقة) "اتقتلون رجلا ان يقول ربي الله"

لذلك لجأت للملك قراقوش وقلت له هايبوثيتكال يا سعادتك .. فقال لي .. اقطع راسهم وهايبوثيتكال
ذاته لو قال سيك ميك اقطع راسه .. ثم نظر الي شزرا وبرم شاربه برمة ذات مغزي وقال .. انتو
عايزين تودوا البلد في داهية ؟

طبعا لم اجيب ليه سيرتك ولا سيرة هويدا .. وقمت صوف من قدامه ..

والان .. نهي هايبوثيتيكال .. وكما قال استاذنا عمر ماث .. This is contradicting to all hypothesis

وتقول سيك ميك اروح لقراقوش اكلمه ..

عمر علي حسن

Post: #71
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-28-2010, 06:02 PM
Parent: #70

هويدا المسنوحة

لاالليلة الجابك شنووووووووووووووو؟

عفاف الصادق

ياخ قول خاتنها ذي العسل وبتلم النحل ..

ههههههههههههههههههههههههها هي المسنوحة دي ما بتستاهل الا تكون صارقيل بس عسل شنو كمان

Post: #72
Title: Re: من المسؤول عن هذه الجريمة يا هويدا شرف الدين ؟
Author: الطيب شيقوق
Date: 10-28-2010, 06:04 PM
Parent: #70

خالي

خالك رافع الراية البيضاء .. وقررت اشوف لي لوري تراب اساومه علي المقعد
الامامي .. دبي كلها مافيها لوري تراب واحد .. يعني لوري التراب ذانه بقي هايبوثيتيكال !

توكلت علي الله ورجعت لكتبي القديمه لقيت عمك راتنلال في طبعة 1954 لا يعترف في
القتل بانواعه بشيء مثل البينة المباشرة .. قلت ليه (هايبوثيتيكال) يا مهراحا .. قال لي (نهي
هايبوثيتيكال) .. لفيت علي سيدنا عمر فوجدته اشد تمسكا .. قلت ليه ياسيدي يا امير المؤمنين
(هايبوثيتيكال) .. قال لي ادرأوا الحدود بالشبهات .. وطالما ان الموت حدث والرجلان لم يعترفا
بارتكابه وانما بنية ارتكابه فقط فلا مناص من اخذ الدية منهما لسد باب الذرائع ودرء الحدود بالشبهات ..
ويبدو انه لايريد ان يدخل نفسه في (زنقة) "اتقتلون رجلا ان يقول ربي الله"

لذلك لجأت للملك قراقوش وقلت له هايبوثيتكال يا سعادتك .. فقال لي .. اقطع راسهم وهايبوثيتكال
ذاته لو قال سيك ميك اقطع راسه .. ثم نظر الي شزرا وبرم شاربه برمة ذات مغزي وقال .. انتو
عايزين تودوا البلد في داهية ؟

طبعا لم اجيب ليه سيرتك ولا سيرة هويدا .. وقمت صوف من قدامه ..

والان .. نهي هايبوثيتيكال .. وكما قال استاذنا عمر ماث .. This is contradicting to all hypothesis

جايييييييييييييييييك بالمهلة لتفنيد تلك الدفوع