Post: #1
Title: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 06:51 PM
Parent: #0
جنكم مباركة .. الهينة والقاسية تباركوها ..حتى الخلافات الفكرية والسياسية
بتباركوها ..اها طالما المباركة مبذولة بالمستوى دا ..كان تباركوا لى
صورة البروفايل دى ..ع اج ب ا ن ى ياخ ..
|
Post: #2
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 06:58 PM
Parent: #1
لو البروفايل بشيل ..كان جبتها ليكم بنيلها وشجرها وسمائها
ومائها وقبابها ومآذنها ومدارسها ...وناسها الذى السكر ...
كما قال مصطفى سند :
يا صندل الليل المضاء..
افرد قميص الشوق حين تطل سيدة النساء
فالمجد جاء....
وتناثر الاحد الصبى يهز أعمدة الغناء
لو زندها احتمل الندى لكسوت زندك ما تشا
ثوبا من العشب الطرى..وإبرتين من العبير ..وخيط ماء
|
Post: #4
Title: Re: كان تباركوا لى صورة ا لبروفايل الجديدة ...
Author: عبدالكريم الامين احمد
Date: 10-22-2010, 07:04 PM
Parent: #2
اووووووه اربجي ويا حسن حوي كل المحاسن والقصيد
وبرفايل السرور وتكملو بدون كركبات او غاغات..
واهم شي بالله تبعدو من ود خالتك بدر الدين ده ما يجي يتنهد ليك فيهو يلحقو غنم زهرة..
----------
وبالله يخي ما تباصر لاخوك واحد كده اكتب لي فيهو ود هاشم
ح اختو اسبير لابو كدوس ده باقي مع الانفصال ده ممكن يتم اتهامي بالعمالة والارتزاق لدولة اجنية
والتبشير بثقافات دولة اخري
|
Post: #8
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 07:20 PM
Parent: #4
| Quote: واهم شي بالله تبعدو من ود خالتك بدر الدين ده ما يجي يتنهد ليك فيهو يلحقو غنم زهرة.. |
والله ياكيكى الخوف من تنهدات بدرالدين ..خاصة الايام دى متعلم
تحميل الصور جديد ..يجى يخت لى صورة لا اعرف ارد ولا اعرف
ابلع ..ودهاشم موضوعا هين المشكلة الناس البدققوا فى الحلة
الجنبهم ..ماظنيت فى يافطه ياكيكى .. يعمينى ...
|
Post: #3
Title: Re: كان تباركوا لى صورة ا لبروفايل الجديدة ...
Author: معاوية الزبير
Date: 10-22-2010, 07:03 PM
Parent: #1
مبروك يا محمد
منظر جميل والله
تعرف أنا قضيت يوم واحد في أربجي دي في منتصف الثمانينيات
جئت لأعزي زميلنا في الزقازبق الصديق الجميل عادل عبد الحليم علي طه بوفاة والده
عليه رحمة الله
ولا أزال أتوق لزيارتها مرة أخرى
أين د. عادل بالمناسبة ؟ عندك ليهو تلفون ؟
تحياتي لي ناس أربجي المميزين
|
Post: #5
Title: Re: كان تباركوا لى صورة ا لبروفايل الجديدة ...
Author: عمر عبد الله فضل المولى
Date: 10-22-2010, 07:09 PM
Parent: #3
اغلى حب عندي في قلب الجزيرة
|
Post: #6
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 07:11 PM
Parent: #3
يامعاوية الزبير تحياتى ..
انت جيت 1984 تاريخ وفاة الاستاذ عبدالحليم على طه عليه
الرحمه والمغفره ..تاريخ حزين وذكرى حزينة ذكرى رحيل واحد
من اعمدة التعليم فى البلاد قاطبة ..ولاربجى رحيل قائد و
عمدة ابن عمدة ..ركازة .. ومرق يحقب الرصاص.. وضو قبيلة ..
كأن احمد شوقى عناه حين قال :
.
أحقٌ أنّهم دفنوا عليّا
وحطواْ في الثرى المرء الزكيّا
فما تركواْ من الأخلاق سمحاً
على وجه التراب ولا رضيّا
مضواْ بالضاحك الماضي وألقواْ
إلى الحُفرِ الخفيف السمهريّا
فتىً عاف المشارب من دنايا
وصان عن القذى ماء المُحيّا
أبيُّ النفس في زمن إذا ما
عجمت الناس لم تجد الأبيّا
تعوّد أن يراه الناس رأساً
وليس يرونه الذنب الدنيّا
حياة معلِّمٍ طفئت وكانت
سراجاً يعجب الساري وضَيّا
سبقتُ القابسين إلى سناها
ورحت بنورها أحبو صبيّا
أخذت على أريبٍ ألمعيٍ
ومن لك بالمعلم ألمعيّا
إذا رشُدَ المعلم كان موسى
وإن هو ظلّ كان السامريّا
===
عادل عبدالحليم موجود ورقم تلفونو سوف يصلك فى اسرع فرصة ..
شكرا يامعاوية ..
|
Post: #7
Title: Re: كان تباركوا لى صورة ا لبروفايل الجديدة ...
Author: إبراهيم عبد الحليم
Date: 10-22-2010, 07:16 PM
Parent: #6
تهانئ ممتدة وفعلا صورة معبرة
|
Post: #9
Title: Re: كان تباركوا لى صورة ا لبروفايل الجديدة ...
Author: Tragie Mustafa
Date: 10-22-2010, 07:28 PM
Parent: #7
محمد عبد الرحمن
التحيه لاربجي ولناسها
الا انت وين دقتك اللغويه مالك؟؟؟
Quote: لو البروفايل بشيل ..كان جبتها ليكم بنيلها وشجرها وسمائها
ومائها وقبابها ومآذنها ومدارسها ...وناسهاالذى ...
كما قال مصطفى سند :
|
الزي السكر!
|
Post: #11
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 07:34 PM
Parent: #9
ياتراجى حبابك فى دارنا ..
كنت اعتقد انها بالذاء لولا مداخلتك هذه ..عموما
شكرا على التصويب ..ولقدام مابتكرر ..
شكرا ...
|
Post: #10
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 07:29 PM
Parent: #7
الحبيب عمر عبدالله
ابراهيم عبدالحليم ..
كتر خيركم والله ..ماقصرتو ...
|
Post: #12
Title: Re: كان تباركوا لى صورة ا لبروفايل الجديدة ...
Author: khaleel
Date: 10-22-2010, 07:52 PM
Parent: #10
صورة حلو ة يا صديقي
يا سلام علي الجزيرة واهل الجزيرة
حا انزل ليك اغنية
هدية شيل صبر بس
|
Post: #13
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 07:58 PM
Parent: #12
حباب خليل جالب الانغام ..هى بالله
لو مابتستاهل الغناء كان ابوآمنه حامد
قال فيها ..
لوزة القطن اليانعة السمحة و نضيرة
تتنى الحليوة في مشية أميرة
أجمل حب عندي في قلب الجزيرة
حبابك
|
Post: #15
Title: Re: كان تباركوا لى صورة ا لبروفايل الجديدة ...
Author: نيازي مصطفى
Date: 10-22-2010, 08:05 PM
Parent: #13
دي الجديدة
تراجي مصحح لغوي !!!
كويس يا محمد عملو ليكم لافتة ..بامانة اربجي من افضل المناطق في الجزيرة تخطيطا ..بس بدون
تنهدات قريبك صاحب الراحل الاستاذ مصطفى سيد احمد
|
Post: #16
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 08:58 PM
Parent: #15
يانيازى ياحبيب ..
ياخوى نحن لما عملوا لينا يافطه انتو الوضع عندكم كان
(عمك ابشر) براهو و(التكلة ) براها ..يعنى لسه مااتكونت
الحله .. هذا مايخص اليافطة ..
مايخص التخطيط صدقت وشكرا على الاشادة ..مايخص التنهدات والله دى ضمانتها عند الله
مابضمنا ليك ...لكن لاباس من تنهيدة تنهيدتين ..
شكرا ليك ...
|
Post: #14
Title: Re: كان تباركوا لى صورة ا لبروفايل الجديدة ...
Author: معاوية الزبير
Date: 10-22-2010, 08:00 PM
Parent: #10
أخي محمد عبد الرحمن
رحم الله المربي الفاضل العم عبد الحليم علي طه
الحديث عن هذه الأسرة لا ينتهي عند حد
رجال ونساء وضعوا الوطن في المقل
قدموا له العلم وعمل الخير بلا من ولا رجاء في مقابل
رحمهم الله إذ رحلوا قبل أن يروا ما حل بهذا البلد
أمد الله في أعمار من بقي منهم على قيد الحياة وبارك في ذريتهم
والدعاء موصول لك ولأسرتك الكريمة
|
Post: #18
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 09:22 PM
Parent: #17
ياسلام ياخليل ..
غبت وجبت ..(فاتن الجزيرة ) من غناء الفنان المظلوم الخير عثمان ..
واحدة من الاغنيات التى لم تجد حظها من الاهتمام مع جمالها وسحرها ..
والخير عثمان لمن لايعرفونه هو فنان اغنية (حنتوب الجميلة) ..كغيره
من مظاليم الفن فى بلادى انتهى به الحال الى سائق تاكسى بمدينة
مدنى ..مع احترامنا الشديد لسائقى التاكسى ولكل اصحاب المهن ..لكن
اغلب الناس يستطيعون ان ارادوا ان يصبحوا سائقى تاكسى ..لكن صعب
على اى احد من الناس ان يصير فنانا لو لم يهبه الله الموهبة ..
لذلك الدولة التى تهتم بالفن ترعى اصحاب المواهب وتوفر لهم جو
صحى يجعلهم يواصلون ابداعهم ..
شاعر الاغنية منو ياخليل ؟
|
Post: #19
Title: Re: كان تباركوا لى صورة ا لبروفايل الجديدة ...
Author: بدر الدين الأمير
Date: 10-22-2010, 09:59 PM
Parent: #17
محمدعبدالرحمن
اربجي علم على رأسه نار
Quote: تعرف أنا قضيت يوم واحد في أربجي دي في منتصف الثمانينيات
جئت لأعزي زميلنا في الزقازيق الصديق الجميل عادل عبد الحليم علي طه بوفاة والده
عليه رحمة الله
|
معاوية الزبير
انت زميل الصيدلانى عادل عبدالحليم
ما كنت فاكر عجوز لدرجة دى .....
وطالما جيت اربجى ما لازم نكرمك بصورة
الوالد محمد الامير مع الصادق المهدى في الدوحة
|
Post: #20
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 10:13 PM
Parent: #19
Quote: انت زميل الصيدلانى عادل عبدالحليم
ما كنت فاكر عجوز لدرجة دى .....
وطالما جيت اربجى ما لازم نكرمك بصورة |
اها جاااااكم ...
يامعاوية الزبير ..بدرالدين مايخوفك بدرالدين اكبر منك ومن عادل
بكم سنة كدا ..هذا من ناحية ..من الناحية التانية الزول العلم
بدرالدين رفع الصور شكيناهو لى الله ..بعدين احفظ لاصحاب الصورة
حقوقهم ..قول الصورة بعدسة منو على الاقل ..سرقة راسا عديل ....
|
Post: #21
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 10:15 PM
Parent: #20
يابدرالدين ..
اديناك الاذن فى وضع صورة ابوام سلمى مع ابو حافظ فى بروفايلك ..
قشة ماتعتر ليك ..الا كان تخاف من ناسك ..لكن نحن اديناك الاذن ..
|
Post: #22
Title: Re: كان تباركوا لى صورة ا لبروفايل الجديدة ...
Author: معاوية الزبير
Date: 10-22-2010, 10:24 PM
Parent: #20
والله يا بدر الدين الكبر ما بناباهو
الزمن أثبت لينا إنو كل ما عشنا بدري في السودان دا كان أحسن لينا
لكن نحن برالمة سنة 81 أفتكر عادل كان على وشك التخرج
إلا أنه احتوانا وعاملنا كأنداد بأخلاق أهله تلك التي تعرفها
سكنا جيران الشقة بالشقة ثم استضافني لوقت طويل في شقته في وقت لاحق
بل أشعرني أنني صاحب البيت وهو الضيف
بصراحة كدا أنا دفعة محمد الطيب علي طه ود حلتنا في حي النصر - كوستي
سقى الله ذكريات كوستي والزقازيق
لكن ما قلت لي رأيك في البروفايل الجديد لي قريبك محمد عبد الرحمن
أكيد حسدتو عليهو
|
Post: #23
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-22-2010, 10:29 PM
Parent: #22
| Quote: بصراحة كدا أنا دفعة محمد الطيب علي طه ود حلتنا في حي النصر - كوستي |
انا قلت ليك انت اصغير من بدرالدين كدا اتاكد تماما ..
يعنى يامعاوية قلت لى السودان تعيش بدرى وتتخارج ..
عادل عبدالحليم حبابو والله .راجل اصيل من اسرة اصيلة ..
زول واجب مافى كلام ..
|
Post: #24
Title: Re: كان تباركوا لى صورة ا لبروفايل الجديدة ...
Author: بدر الدين الأمير
Date: 10-22-2010, 11:19 PM
Parent: #23
Quote: لكن ما قلت لي رأيك في البروفايل الجديد لي قريبك محمد عبد الرحمن
|
معاوية
ود خالتى محمد عبدالرحمن دا زول متخلف
ولسا ماسمع بقوقل وصورة بروفايلو لاتعكس
شى عن اربجى ومنحنى النيل هناك والجانين
والقباب العتيقة والتاريخ المدنى لها وهى
اقدم من سنار بحوالى 38 سنة
|
Post: #25
Title: Re: كان تباركوا لى صورة ا لبروفايل الجديدة ...
Author: معاوية الزبير
Date: 10-22-2010, 11:31 PM
Parent: #24
كيف ما بتعكس يا البدر
شوف الامتداد الوراء اللافتة دي واتخيل التاريخ الطوييييل داك
بعدين شايفك زغت من الفرق بين محمد الطيب وعادل عبد الحليم
انت وين بين الاتنين ديل؟
أليس كذلك؟
|
Post: #26
Title: Re: كان تباركوا لى صورة ا لبروفايل الجديدة ...
Author: محمد عبد الماجد الصايم
Date: 10-23-2010, 07:48 AM
Parent: #25
غايتو بدر الدين دا الله يستر ما يكرهنا
أربجي زي ما كرهنا مصطفى سيد أحمد!!
_
ألف مبروكـ البروفايل ياخ!
|
Post: #27
Title: Re: كان تباركوا لى صورة ا لبروفايل الجديدة ...
Author: khaleel
Date: 10-23-2010, 07:51 AM
Parent: #26
|
Post: #28
Title: Re: كان تباركوا لى صورة ا لبروفايل الجديدة ...
Author: khaleel
Date: 10-23-2010, 07:55 AM
Parent: #27
حلوين الناس ديل يا محممد
بس عندهم حكاية (خرتو ليهو دهب )
ههههههههههههه
|
Post: #29
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-23-2010, 07:57 AM
Parent: #26
Quote: غايتو بدر الدين دا الله يستر ما يكرهنا
أربجي زي ما كرهنا مصطفى سيد أحمد!! |
ياودالصائم ..شكرا ليك ..
ماتخاف الزول ماعاصر عليها شديد..مرة مرة
بتذكرا ..وفى احتمال كبير ننفيه لودسلفاب
عشان يتفرغ لموضوع مصطفى سيد احمد باعتبارو
ودحلتو ...
|
Post: #30
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-23-2010, 08:02 AM
Quote: حلوين الناس ديل يا محممد
بس عندهم حكاية (خرتو ليهو دهب ) |
خرت الدهب دا ياخليل حاولينا وما علينا ..
غادى غادى ياخوى ..
|
Post: #31
Title: Re: كان تباركوا لى صورة ا لبروفايل الجديدة ...
Author: Abdlaziz Eisa
Date: 10-23-2010, 08:10 AM
Parent: #30
سلامات أخ محمد
نبارك لك
ونبارك لكل الأهل بأربجي وما جاورها..
ومبروووووووك البوست ده ذاتو...
تحياتي
ومبروك
|
Post: #32
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-23-2010, 01:05 PM
Parent: #31
عبدالعزيز عيسى ...اخبارك ..
كتر خيرك ياخ ..والله ماقصرت ...
شكرا
|
Post: #33
Title: Re: كان تباركوا لى صورة ا لبروفايل الجديدة ...
Author: محمد عبدالرحمن محمد
Date: 10-23-2010, 01:35 PM
Parent: #32
الماك كيكي
مبروك البروفايل ياخ!
ياخي والله أربجي من اجمل مناطق الجزيره
وبالذات أهلها الراقين..
زرتها كتير في بداية التمانينات كان يسكن فيها ود خالة لي
كان معلم ثانوي بالحصاحيصا..
__
محمد عبدالرحمن (المطرطش)!
|
Post: #34
Title: Re: كان تباركوا لى صورة ا لبروفايل الجديدة ...
Author: وليد عبد اللطيف
Date: 10-23-2010, 02:40 PM
Parent: #33
محمد عبد الرحمن ... سلامات
مبروك ياطيب بطيبة اهل اربجي
|
Post: #35
Title: Re: كان تباركوا لى صورة ا لبروفايل الجديدة ...
Author: Salah Abdulla
Date: 10-23-2010, 04:59 PM
Parent: #34
محمد، مبروك والله الصورة
شوقتنا لشوفتها والله ، منتظرين عزومتك إنت أوود خالتك ، نشوف أربجي دي للدنيا والزمان..
أنا حضرت برنامج عن أربجي..
جميلة ، قرية تشبه المدينة، ومدينة إلا من بعض الملامح
وعرفنا جزء من تاريخها وأسماء أعيانها
حق لك أن تفخر بها..
بالله حافظوا عليها كده ده ، والله يكفيكم شر (المدنية الحديثة)
الحتضّيّع ليكم أهم ملامحها وصفاتها..
---------------
صاحبي خليل ، شكراً على فاتن الجزيرة
أغنية (لمن يحس) تكـ ـّلب شعر الجلد
أهديها لأخونا عماد عبدالله في جولته الأوروبية
يتصبر بيها الى أن يعود الى فاتنات السودان.
|
Post: #38
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-23-2010, 08:35 PM
Parent: #35
Quote: محمد، مبروك والله الصورة
شوقتنا لشوفتها والله ، منتظرين عزومتك إنت أوود خالتك ، نشوف أربجي دي للدنيا والزمان..
أنا حضرت برنامج عن أربجي..
جميلة ، قرية تشبه المدينة، ومدينة إلا من بعض الملامح
وعرفنا جزء من تاريخها وأسماء أعيانها
حق لك أن تفخر بها..
بالله حافظوا عليها كده ده ، والله يكفيكم شر (المدنية الحديثة)
الحتضّيّع ليكم أهم ملامحها وصفاتها.. |
حبابك ياصلاح يافنان ..
معقول انت عايز ليك دعوة ..دعوتك مفتوحة لزيارة اربجى وتتشرف
بحضورك ..تشوف هوشة صاحبك بدرالدين مع الضيوف ..لهم (هوشة)
معروفة يختلط فيها حابلهم بنابلهم ..ولايهدا لهم بال حتى
اكرام الضيف ...واربجى بالضبط كما ذكرت اخذت من المدينة عمرانها
واحتفظت بالقيم القروية ..فكانت (خلاسية) تسر الناظرين ..
عماد عبدالله زبون دائم عندنا كلما جاء ذكر اربجى ..لكن مع
اوربا دى زول بطرا زول مافى ..بالسلامه ان شاء الله ...
|
Post: #36
Title: Re: كان تباركوا لى صورة ا لبروفايل الجديدة ...
Author: محمد عبدالرحمن
Date: 10-23-2010, 07:42 PM
Parent: #33
يامحمد عبدالرحمن حاشاك الطرطشة ياخ ..حبابك والله ..
تشرفت بزيارتك اربجى ...بس ماعرفنا ودخالتك الاستاذ..
على الاقل نعطيه حقه من التقدير الذى يستحقه بلاشك ..
بمراجعتى للبروفايل خاصتك وبوجود ا لقرير فى البروفايل
اعتقد ان ابن خالتك هو الاستاذ السر احمد ..او السر كيمياء
كما يسمى ..لاستاذ السر التحيه ولابن خالتك تحية اخرى ان
كان هو او شخص آخر ..فقد قدموا مايستحق الشكر والتقدير..
فليس هناك اسمى من ان تكون معلم ..وليس هناك عطاء يوازى
عطاء المعلم ..
شكرا يامحمد ...
|
Post: #37
Title: Re: كان تباركوا لى صورة ا لبروفايل الجديدة ...
Author: khaleel
Date: 10-23-2010, 08:26 PM
Parent: #36
يا سلام
علي ود اب زهانة
خير من يسووق اللوري في الطين
|
Post: #39
Title: Re: كان تباركوا لى صورة ا لبروفايل الجديدة ...
Author: انعام عبد الحفيظ
Date: 10-23-2010, 08:56 PM
Parent: #36
سلامات يا محمد عبد الرحمن
يا سلام على أربجي وناسها وصورة جميلة
وحلوة تستحق يباركوها ليك هههههههه
|
Post: #40
Title: Re: كان تباركوا لى صورة ا لبروفايل الجديدة ...
Author: عماد الشبلي
Date: 10-23-2010, 09:17 PM
Parent: #39
محمد سلام
مبروك صورة R . B . G
|
Post: #41
Title: Re: كان تباركوا لى صورة ا لبروفايل الجديدة ...
Author: محمد عبدالرحمن محمد
Date: 10-24-2010, 06:12 AM
Parent: #36
Quote: يامحمد عبدالرحمن حاشاك الطرطشة ياخ ..حبابك والله ..
تشرفت بزيارتك اربجى ...بس ماعرفنا ودخالتك الاستاذ..
على الاقل نعطيه حقه من التقدير الذى يستحقه بلاشك ..
بمراجعتى للبروفايل خاصتك وبوجود ا لقرير فى البروفايل
اعتقد ان ابن خالتك هو الاستاذ السر احمد ..او السر كيمياء
كما يسمى ..لاستاذ السر التحيه ولابن خالتك تحية اخرى ان
كان هو او شخص آخر ..فقد قدموا مايستحق الشكر والتقدير..
فليس هناك اسمى من ان تكون معلم ..وليس هناك عطاء يوازى
عطاء المعلم ..
شكرا يامحمد ...
|
شرف الله مقدارك يا (أنا)!
هو فعلاً تاج السر أحمد عثمان (السر كيميا) وقبله كان أخونا الشاعر
المرهف السر عثمان الطيب (انجليزي وفرنساوي).. ونفس الفتره أنا نفسي
درّست (كيميا) بثانويتي كورتي (بنين وبنات)..
وفعلاً ما أسماها مهنة..!
وسلمت يا محمد
|
|