Post: #13 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: عصام عيسى رجب Date: 10-22-2010, 03:19 PM Parent: #12
قلتَ لي عيد الميلاد بِحرِرُوا أهلو وكدا ...... قلت أحسن تغني لي رويحتك براااك ..... حِلوة الفكرة أساساً .... تعرف ليه، لأنو الإنسان الما بعرف يحتفي بي نفسو، ما بتكون عندو القُدرة إنو يحتفي بالآخرين، واللهُ أعلَم
ويتخيّل لي الفرح دا زي الزاد، لو ما كفّى ناس البيت (شخصك الجميل)، بِحْرَمْ على الجيران
(بدري من عمرك) أغنية مِن طِراز خاص، والدليل هو عدد الجميلين الغنوها
الحلنقي كان فيها أرقّ مِن رقيق، قال شنو: يا فرايحي اللون يا أبو عيون أحباب .... بالله شوف جِنس الوصِف دا ......!!!!!! والتاج مكي كأنو كان قاعد مع الحلنقي لحظة بلحظة وهو بكتب في كلامو السَّمِح دا ..... لحن كدا براهو مِن بين ألحان التاج مكي
أنا بهديك في عيد ميلادك "طوق النُّجوم": كُلَّ السّنة ..... تلقاكَ خاتياك الهُموم أفتكر القصيدة عندك
وياخ عقبال مليون فرح ومليونين أغاني وتلاته ألحان وأربعة أصحاب وأحباب و .....
Quote: محمود العربي بجدة يهديها للأخ الشاعر الرقيق فاروق أبوحوه بمناسبة عيد ميلاده برضو ..
حاجة عجيبة فعلاً..
حاجه غريبه يا محمود فعلاً .. ياخي أخوك في (صمة إيميلو) يلقي (خردمية) إيميل .. كل فحواها إنو عيد ميلادك هو 21/10 وكل سنه وإنت طيب.وووو وحاتك يا محمود دا شيتاً ما عندنا بيه عرفه..غايتو عشنا وشفنا..
التاريخ دا أنا شاك في الناس البكتبوا شهادات الميلاد دي الله يقطع محنهم لو قاعدين يجبروا الأيام المهم يا صديقي كل سنه وإنت طيب وربنا يحقق أمانيك كلها يارب. هذا في شأن عيد ميلادنا وميلادكم وبلا شك زكري ثورة أكتوبر المجيده.. أما في شأن الأغنيه يا حبيب أخوك يومين بفتح البوست وبسرح مع الأغنيه في نفسي أقول : يا عمك كدي نستمتع وبعدين العربي دا بنجيهو للكتابه الملحوقه. (امانةً في عمري) إستمتعت بيها جدا يا مسنوح. في (ظمتي) داعيتك وقلت الجنا دا غير (يبحت) في الحاجات (البتوِّك) الروح دي ما عندو شغله تب؟ ياخي جننت الغنا بيك يا عربي ، ممكن أهدي؟أهدي الأغنيه لكل الذين يحتفلون بأكتوبرالمجيد ولكل الوطن فيك.
بالمناسبه أنا مرات مرات عندي جن بقوم عليّ خصوصاً عندما (يحمِّر) الحرف عينو الشمال في أختها اليمين. . (الإتجاهات هنا ليس لها علاقه بالسياسه) أوعك تمشي بعيد يا مسخوت.. ذات مساء قال الحرف:
العمر .. ما هو السنين والدنيا ما ياها الأيام العمر إحساس نعيشوا لما نفرح ببقي تاااااام والسنين البينا مرّت مهما تطوَل تبقي (عام). -------------- شفت أخوك لما يحس بدبيب الأيام في الروح يدندن بالأبيات أعلاه تجاسراً علي العمر (إبن الذين) هذا. غايتو لو (بتعافره) بنرسله ليك في الخاص. (شوته) يا عمك خلينا نحس بأننا (لسه نحن شباب يا أبو عود هوّاب)
Post: #16 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-22-2010, 05:22 PM Parent: #14
Quote: العمر .. ما هو السنين والدنيا ما ياها الأيام العمر إحساس نعيشوا لما نفرح ببقي تاااااام والسنين البينا مرّت مهما تطوَل تبقي (عام).
صح لسانك يا عربي..
كل سنة وإنت طيب..(والله بقول فيها وخجلان منها يعلم الله).. الله يقطع أبو الفيسبوك ياخ..
لوووووووووووووول....
المهم.. بالنسبة للمعافرة وكدا..
إنت أديني ليها في الإيميل ولا في الوريد ولا شتتها لي في الأكسجين دا..
أقول ليك حاجة؟؟ أربطها في غيمة خليها تغشانا بي جاي وتصب فوق رويساتنا ديل..
فحرفك يجري فينا مجرى الموية في أرض تعبر عن شكرها بريحة الدعاش..
العمر ما هو السنين والدنيا ما ياها الأيام العمر إحساس نعيشو لما نفرح ببقي تـام و السنين البينا مرت مهما طالت تبقي عام *** *** الفرح جوانا عايش إلا نحن كيف نحِّسو ؟ والحزن لو يبقي طايش بيني بينك ليه ندِسو ؟ *** *** المراكب مهما يإسو في النهايه لازم يرسو و الحبايب ممكن يقسو بس وحاتك ما بينسو *** *** العمر لحظات تجلِّي بين بشاشه وإبتسامه لما تفرح فيك يعلِّي عافية الروح والوسامه *** *** الحزن كتّال تملِّي للنهارات السلامه ليك يودِّر وفيك يخلِّي نكسة الروح وانهزامه
Post: #18 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-23-2010, 06:50 AM Parent: #17
Quote: أنا يا فاروق كنت طول عمري قايل إنه (الوِلِفْ) كتال براهو..
أتاري الحزن برضو كتال كتلا؟؟
شكراً يا حبيب.. تم القبض على الحزن..
وخليك قريب..
الحزن دا ود ما عندو (أدب) التعاطي المتزن.. (جيد ليك يا بت كرموش وليدك بقي يعرف الفلسفه وينضم زي ناس البندر) يا محمود هو الحزن براهو البكتل ؟ هسه جنس عمايلك دي ما بتودي (الزون) في 60 ألف (جيهه) دي ما بتكتل؟
يا عمك أتوكل تب وتأكد إنو: أنا أقرب إليك من كل النشيد
قول يالطيف
Post: #23 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-23-2010, 05:34 PM Parent: #22
Quote: يا محمود هو الحزن براهو البكتل ؟ هسه جنس عمايلك دي ما بتودي (الزون) في 60 ألف (جيهه) دي ما بتكتل؟
أها قمت على هبشيك؟؟
غايتو الله يهديك بس..
Quote: قول يالطيف
أها يا لطيف... النشوف آخرتها..
Post: #15 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-22-2010, 05:09 PM
الحبيب عصام..
Quote: أنا بهديك في عيد ميلادك "طوق النُّجوم": كُلَّ السّنة ..... تلقاكَ خاتياك الهُموم أفتكر القصيدة عندك
مقبولة الهدية وبالحيل عندي..
من زمان غايتو ما احتفلنا بعيد ميلاد..وحسب الشفناهو وما توفر لنا من ثقافات جديدة..
شفنا إنو الناس بيهدوهم حاجات كدا..ساعة..موبايل..لابتوب...إلخ..
وكم شمعة كدا..وكيكة وكم أمنية جميلة ..
لكن زول يهدوا ليهو طوق نجوم حتة واحدة ... دي شوية صعبة..ما عندنا ليهو رقبة عديل يا الحبيب..
والله عاد ما قصرت يا صاحبي... نجيك في السمح إن شاء الله..
Post: #19 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-23-2010, 12:53 PM Parent: #15
فوق إلى ... عماد عبد الله والطيب بشير وآخرون..
تم الرفع بمعرفتي في تمام الساعة 02:40 من بعد ظهر اليوم السبت 23 أكتوبر
Post: #20 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: عصام عيسى رجب Date: 10-23-2010, 01:19 PM Parent: #19
أما عن أدائك لـ: بدري من عمرك ..... حااااااجة كِدا!!!!!
مُش بتحِس برعشة شجَن رهيييفة كِدا لما تسمع بعض الأغاني والمزازيق ....؟! تحٍس إنو ما فيها حاجة لو دمعة صغيرونة كِدا إدحرجت من عينك، غصب عنك أو غصب عنك ..... ولو دمعة خفيّة تنزل بس جواك وما عندها شغلة بعيونك
أها شي زي دا حسيتو وأنا بسمعك وإنتَ بتغنّي: شاقي روحك ليه ,,,,,, إيه الزعل ما بجدي
ما بجدي مُش .....؟!
Post: #21 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-23-2010, 02:01 PM Parent: #20
Quote: مُش بتحِس برعشة شجَن رهيييفة كِدا لما تسمع بعض الأغاني والمزازيق ....؟! تحٍس إنو ما فيها حاجة لو دمعة صغيرونة كِدا إدحرجت من عينك، غصب عنك أو غصب عنك ..... ولو دمعة خفيّة تنزل بس جواك وما عندها شغلة بعيونك
طيب نقول عملنا الكوتيشن دا...
أها
الواحد يقعد يتلفت..يمين ..شمال..يصنقع..يدنقر.. عييييييييييك.. ما في حاجة..
(ملفك)...(عدِّلْ)...(رد)..بس كدا؟؟ هذا كل ما هنالك؟؟
طيب أجيب من وين تعليقاً يليق؟؟
غايتو الإحساس حسيتو..والدمعة بالحيل بعرفها..
وأكثر منهما..أعرف قدر شنو عصام عيسى زول جميل..
معرفة بلغت ربع قرن من الزمان بالتمام والكمال..
أدامها الله .. وأبقاك جمالاً لا يفنى..
Post: #24 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-24-2010, 06:55 AM Parent: #21
24 أكتوبر .. سنة تانية حلوة يا متاب يا صغيرتي الجميلة..
سنتين يا متاب؟؟
الله كريم علينا غايتو...
Post: #25 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-24-2010, 01:14 PM Parent: #24
متاب محمود مصطفى...
العمر : سنتان
الجنسية : (السودان القديم) لكن من مواليد جدة..
هسي جيل ناس متاب ديل وضعهم حا يكون شنو؟؟
Post: #26 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-25-2010, 06:50 AM Parent: #25
المحتفى بها .. الآنسة متاب.. وأثناء ما قاعدين يشتروا ليها في هدية عيد الميلاد..
عاملة فيها البت فرحانة ورشيقة وكدا... وتنطط ها وتقابض هنا... بس في جريها داك...انزلقت ليك..
زييييييييييييط... من هنا لهنااااااااااااااااااك...
قولة دق دي ،،، السيراميك على جبيهتا وخشيماونخيرتا..
غايتو ... الله يخلف علينا..
الصور جاية.. والله جنس طراريم.. دا عيد شنو دا يا بتي؟؟
الله يستر بس..
Post: #27 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-25-2010, 12:43 PM Parent: #26
سلامة البنية يا فنان بدري من عمرك ما عندي ليها تسجيل بصوت طارق ياخ ثم نحن والله مستمتعين و متابعين معاك انت معاك ع.ع. رجب ياخ تسوي بيهو شنو رائينا نحن
Post: #30 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: عمران حسن صالح Date: 10-25-2010, 08:40 PM Parent: #29
يا فنان مرات الإختيار بيعبر بالزول بي غادي طوالي انا عدو التطرف إلا في الغنا والسمع النضيف " أسأل صديق رحمة معاكـ بجدة " لدرجة إنو الأغنية دي خلتني أقول نادر خضر فنان بعد ما كنت ( شاميهو ) ، نظام (إمبرشن ) أهلنا الساي داكـ ، أها يالحبيب سويت سواة خدر وفاتح لي كم نفاج وبقرأ ، إلا الأضان معاكـ بي جاي وكمان أديناكـ الأوكي ( نظام فاكنها في نفسنا شديد وسِميعة خالص خالص ) . مرات في غنا يشبكـ معاكـ دون مناسبة ، وتلقى نفسكـ تدندن بيهو ومتعة الدنيا فوق وشيشكـ إبتسامة كبيرة ، ياخي فرح ساي كده . بس فرح صادق وده ياهو التعبير البيشبه إختياركـ الجميل ده . فرتكتنا فرتيكـ ياخي
Post: #31 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-26-2010, 01:01 AM Parent: #30
يا جماعة عن إذنكم أرد لعمران دا ياخ.. بعدين الطيب بشير وطارق ديل أصحابي وملحوقين..
أقول ليك حاجة؟؟ كمان اليومين ديل معانا هنا في جدة.. وحا يكون إضافة ضخمة لمجتمع جدة في القريب العاجل.. يعني عصام معانا .. حرفاً ولحناً وشحماً ولحما.. عصام معانا ما تغشانا.. ياخ أغشانا يا طارق.. والله كان رايكم بسوي بيهو شنو ما عارف.. عان دا عليكم الله..!!!!
Quote: بدري من عمرك ما عندي ليها تسجيل بصوت طارق ياخ
خلاص (جنا الوزين)..الله لا كسب شيطانك..يا فنان يا مجنون.. دي فكرت فيها كيف زاتو؟؟
أرح..أصلو ما عندك طريقة..
Post: #32 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: Mahmoud Mustafa Mahmoud Date: 10-26-2010, 07:40 AM Parent: #28
عاينو الفن دا...
Quote: بالأمس
دخلت فرحة و.. أخذت نغمة و خرجت
بشيء من الـ(ربشة)
جاءت اليوم..
قالت: يا فرايحي اللون..
قال: بدري من عمرك
قالت: إنت لسـّـة شباب..
فقلنا: هل من مزيد؟
الطيب أخوي..
عاد المِتلَكْ إتَّ..بكوس (للحديس)؟؟
ماك فنان وشاعر..
أنا قالولك ناغمتك لجنس (حديسك) دا؟؟
أنا دايرك تقلب معاي شجونك حول الزمن داك ياخ..
زمن التريفيرا والكاروهات والخنفس والخلال الأنيق..
يا حليلنا يا الطيب ياخ.. لكن طبعاً (إنت لسه شباب بدري)..
محبتي..شيلها كلها وما تكلم زول..
Post: #33 Title: Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ Author: عبد الدائم سيد أحمد Date: 10-26-2010, 07:58 AM Parent: #32