المشكلة شكر الله قال (العمل دا) من كلمات وألحان هيثم عباس!!
خذلتني يا بو الها!!
Post: #5 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-19-2010, 00:00 AM Parent: #4
يا هيثم الـ(عمل) دا لو ما تبعك بسرعة أنفي ولو تبعك كمان يبقى في حاسد عمل ليك (عمل)
Post: #6 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-19-2010, 00:11 AM Parent: #5
شكر الله أبداً ما خذلني لأنها ياها المحرية فيهو فقد سبق قبل كدا غنى: غنية الطبنجة "لو مصدق الحدثك لو مصدق كلام الناس : أضربني بي مسدسك أملاني أنا رصاص"
غايتو لو طلعت دي برضو تبع هيثم أضربني أنا ذاتي بمسدسك يا حسام وتاني ما عندي معاك كلام
Post: #7 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-19-2010, 00:12 AM Parent: #6
لعن الله "ساحات الفداء"
Post: #8 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-19-2010, 00:16 AM Parent: #7
"برنامج ساحات الفداء وأثره في تخريب وجدان الشباب" بحث جاهز لماجستير يا ناس علم نفس عايزين نماذج أنا جاهز
Post: #9 Title: Re: "أولاد قَلِبا، لو قمنا هسة بِنْقَلِّبا" Author: عثمان نواي Date: 10-19-2010, 05:32 AM Parent: #8
ضحكتنا معاك يا اشرف اديني مسدسك بملاك رصاص
عثمان نواي
Post: #10 Title: Re: "أولاد قَلِبا، لو قمنا هسة بِنْقَلِّبا" Author: khaleel Date: 10-19-2010, 05:39 AM Parent: #9
شفت البقت علينا يا هندسة؟! ما ممكن، فترنا ياخ! نمرق من "روح إن شاء الله في ستين" نقع في "الطبنجة" قبل نمرق منها نقع في "لو قمنا بنقلبا" دي!! غايتو بي إيقاع المارش دا وكلماتا النفسا قايم دي ما تنفع غير جلالة جيش الغريبة الشباب بيطربو للغنا دا وحافظنو!! الله لا كسبك يا "التوجه الضاري"*!!
غايتو بعد الغمة دي تزح الشعب دا عشان يستعدل محتاج قصاد كل مسجد وزاوية مصحة نفسية!
كستها ما لقيتا، شكلك سجلتها للمقارنة يا فردة! لأنو أضان اتربت على "الوكر المهجور" و"الطير المهاجر" وأجراس المعبد"..إلخ.. أكيد "أولاد قلبا" دي بتضرسا!
ــــــــــ * حقوق نجر المصطلح "التوجه الضاري" تعود لأستاذنا د. بشرى الفاضل
Post: #13 Title: Re: "أولاد قَلِبا، لو قمنا هسة بِنْقَلِّبا" Author: الصادق اسماعيل Date: 10-20-2010, 00:34 AM Parent: #12
الحلبي وأشياعه
كيف فاتت عليكم الرمزية العميقة الكامنة وراء كلمات هذه الأغنية الثورية، أي نعم ثورية وممعنة في الثورية، وفيها الكثير من الإشارات التى لم أتوقع أن تفوت على فطنتكم، فالشاعر (هيثم) الذي ألمحت لنعومة إسمه ناسياً أو متناسياً أن (الهيثم هو الأسد)، يحاول (تثوير) الشعب من خلال (هكذا) أغني ممعنة في الثورية.
وسيذكر التاريخ أن المغنى شكر الله ومن خلفه (الهزبر) هيثم هم أول من ألمح للإنقلاب القادم بسبب تداعيات الإستفتاء وتفريط المؤتمر الوطني في وحدة السودان. وعندما ذكر الإذاعة والتلفزيون فهو يريد أن يقارن بين الذين يعتمدون على الكلام فقط (وهي إشارة ذكية لإنقلاب الجبهة)، وأعقب ذلك بذكره لكسوة الكعبة، والآن السؤال هو من أين كانت تأتي كسوة الكعبة، هي كانت من (دارفور) وهو هنا يهيئ الشعب لتقبل التغيير القادم من دار فور. وأعتقد أن الفنان ينتمى (للعدل والمساواة) وهو هنا يساهم في الثورة بأضعف (الغناء)، لتهيئة الشعب للثورة القادمة.
لقد خذلتني أيها الحلبي عندما فاتت عليك كل هذه الشحنة الثورية، وأتوقع منك أن تبلع هذا البوست بعد أن يقوم هذا الإنقلاب وتُفرض عليك هذه الأغنية يومياً مثلها مثل سيئة الذكر (أنا ماشي نيالا هو هو).
Post: #14 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-20-2010, 01:40 AM Parent: #13
لووووول يا بو الصا قلت لي الأغنية طلعت بت أعمها لـ"الساقية" والحلبي وأشياعو طلعوا فارات ساي!! ذكرتني القلع عندو غنية بتقول "ما بتمنعني الشارع إنت، بس كفاية عليا أشوف شارعكم بي عينيا" واحد من الفرد قال تجي انتفاضة أسي يطلعوها ليك غنية ثورية!!
صراحة يا صادق هيثم رغم إنو "ود قلبا" لكن ما سمعت بيهو إلا لما الحوت غنى ليهو ود قلبا شهرتو جات من بحري!! "حد يصحي" أماني اللمين هيثم عباس زول مجتهد وعندو لحد الآن حوالي 300 غنية (تولتمية ما تلتين قول ما شاء الله) (كلماتو وتلحينو) يعني ضارب عدادين في واحد وتحت تحت سمعنا إنو بدا يغني بنفسه، كمان لو شاف ليهو اورغ وعزف براهو يبقى العداد هندرد بير سنت في جيبو الراجل قلنا يساهم في إخراجنا من الاجترار طلع أخير منو الاجترار
Post: #15 Title: Re: "أولاد قَلِبا، لو قمنا هسة بِنْقَلِّبا" Author: Tabaldina Date: 10-20-2010, 07:37 AM Parent: #14
.. .
Quote: الفوق دا ما كلام وجهو مقبقِب أمدرماني بموقف الشهدا أو بسوق الساتة لمقبقَب من بحري أو الخرطوم أو خلافه، ادي اللزمة الأساسية في غينة لشكر الله
والله يا اشرف امبارح قريت البوست دا .. افتكرت الموضوع على التعابير البتكتب فى الهايسات والركشات .. قلت ياخى نمر عليه تانى .. وانا متاكد لو ما جملتك الفوق دى يكون كتااار زى كدا .. قلت لى دى اغنية لشكر الله .. لكن شكرالله ما بالغ
---------------
قلت لى قافل على هيثم فى اخراجك من الإجترار :) قرقر قرقر قرقر
"أنا أستاهل" أكتر من القر قر يا تبلدينا والله اللاعب مثار الشكوى (هيثم، ما شكر الله) عندو شغل تاني تمام التمام ياخي الراجل يكتب الغنية ويلحنا، يعني يسلمك ليها على المفتاح! لكن ما فات شي، خصوصاً بعد حسام حسم حكاية إنو هو الكتب "روح إن شاء الله في ستين" يبقى بعد كدا أنا أقيف عن المنافحة عنو حتى يستعدل المزعلني إنو رهاني مع حسام كان عشرين جنيه لعشرين جنيه (والله حقو الواحد يمشي يدفعا لهيثم!) "ما دام إنتا جبتو براك (يا هيثم بن عباس) العامرة بن خرِّبا" ويا مان لو إنتا ود قلبا احنا أولاد قلب قلبا!
Post: #17 Title: Re: "أولاد قَلِبا، لو قمنا هسة بِنْقَلِّبا" Author: رانيه محمد الشيخ Date: 10-20-2010, 10:04 PM Parent: #16
حسى يا اشرف الخلاك تحضر ساحة الفداء شنو من الاساس لمن ذاتك ادمرت
Quote: حسى يا اشرف الخلاك تحضر ساحة الفداء شنو من الاساس لمن ذاتك ادمرت
ساحات الفدا يا رانية معروفة، والبيحضرا ذاتو بيكون عارف ومهيئ نفسو حا يشوف شنو: لغم دانة قنبلة طبنجة دم عامرة مخربة لكن لما أهيئ نفسي لمسع غنا وأجي ألقاهو كلو محشي قنابل وطبنجات ودموم دا يبقى غش
يا ستي العتب ما على الشباب ديل، لأنو دي البيئة الهم عايشين فيها، العتب على الخلق البيئة دي يعني هيثم عباس دا لو ودوهو مكان نضيف حا يكتب شعر زي بتاع علي بن الجهم بعد رحلوه من البادية لشاطئ دجلة
Post: #19 Title: أولاد قَلِبا، لو قمنا هسة بِنْقَلِّبا Author: Amany Elamin Date: 10-22-2010, 04:07 PM Parent: #18
Quote: صراحة يا صادق هيثم رغم إنو "ود قلبا" لكن ما سمعت بيهو إلا لما الحوت غنى ليهو ود قلبا شهرتو جات من بحري!! "حد يصحي" أماني اللمين
السلام عليكم ورحمة الله تعالي وبركاته,,
Post: #21 Title: Re: أولاد قَلِبا، لو قمنا هسة بِنْقَلِّبا Author: Ashraf el-Halabi Date: 10-23-2010, 11:06 PM Parent: #19
وعليكم السلام سعادة الكمندان أماني الأمين قائد منطقة بحري خالي ضواحيها أم در ما عندها كلام مع الحوت قبل فترة سعادتك ماشي شمبات لقيت الكوبري مقفول قلت أماني تكون نفذت المخطط!! لكن الحمد لله طلع أيه كدا ما عارف
Post: #20 Title: Re: "أولاد قَلِبا، لو قمنا هسة بِنْقَلِّبا" Author: رانيه محمد الشيخ Date: 10-22-2010, 04:32 PM Parent: #18
فى دى معاك حق حتى الحب استخدموا فيه اسلحه مدمره يعنى العاطفه بقيت متفجرات زى اغنيه قنبله لطه سليمان بتحس بروحك فى ساحة معركه وشايل ورده :)))))))))))))))))) ولا حقت الخلعه حقت جزار والصادق قال شوفتك يا حبيبى وقربت روحى تطلع عشان بتخلع تقول شاف عفريت :)))))))))))))))))
أول مرة أسمع غنية "قنبلة" دي يا رانيا أخدت ساتر نوع أغاني كدا ما ممكن تتسمع إلا من خلف ساتر!! بتاعت ناس جزار دي ما عندي معاها أي مشكلة حاجب، عيون، قامة سيسبان، خدود نديانة،ابتسامة، شامة، شعر، جيد، رموش.. إلخ.. أي نعم موضوع مكرر لكن ياخ دي خلعة مقدور عليها. خلعة الجمال تجوز لكن المشكلة خلعة الجبخانة دي! بعدين خشي بوست خدر بتاع الأغاني الهابطة وشوفي سامي عز الدين في غنية "خبر السواد" ولا تحسبي تمايله مع الغنية رقصاً لأنو لا يمكن الزول يتمايل طرباً في غنية تراجيدي واسمها "خبر السواد"!!!، لكن حسب مسرحة النص ممكن يتلوى ألماً
معظم الأغاني دي شكلها كانت منولوج ووقعت في يد مطرب بدل تقع في يد منولوجست!
Post: #24 Title: Re: "أولاد قَلِبا، لو قمنا هسة بِنْقَلِّبا" Author: محمد الامين احمد Date: 10-24-2010, 00:59 AM Parent: #23
تحية طيبة
لمن يقول (بنقلبا) كـ انو بيقولها غلط ، يعنى مفروض تكون على وزن ( المرتبة بنقلبها ) لكن هو بيقولها على وزن ( البطاطس فى النار بنقلبا )
على العموم شكر الله ده ما طلع فى اغانى اغانى
شوف طه سليمان بيقول شنو ، و لو زول عندو الاغنية يا جماعة يلحقنا بيها
Quote: كاتبني وين وعند ياتو شيخ خلاني اجري وراك كدا انا ضقت طعم الريد كتير ما لقيت غرام بالشكل دا سقيتني مويه الريده وين وكشحتا لي كشح الهوا مرضتا بيك وانتا الدواء بتعب كتير لمن تغيب برتاح لمن نكون سوا شيخك خطير السوا ليك عرق المحبه واكدا لي مده انا ما شديد يا معاك يا عايز اجيك من اي زول انا مصطفيك مافيك شي بخليك هواي وريني ايه عاجبني فيك ده كلام كتابه ومافي كلام كاتبني روحك اسعدا كاتبني وين و وين جربتا انواع البخور جابو لي المسبع واللبان ما لقيتا لحظات الامان لا قادر اتاقلم زي زمان كتابه اكتب ما مهم زيد الكتابه و جودا شيخك صعب بالجد صعب خلاني اامشي وليك اميل واشوفك انته براك جميل عايز اهني واعرفو كيف وخلاني لي ريدك اشيل كيفن قدر ريتي المعاي عشان اريدك يبعدا كاتبني وين وعند ياتو شيخ
*كلمات الاغنية وصلتنى هى و الاغنية بالايميل
Post: #25 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-24-2010, 01:36 AM Parent: #24
سلامات محمد الأمين (بِن) قَلِّبا أي نجيب عاليها واطيها وما ليها علاقة بقلب الحكومة إنتا صدقت حكاية أغنية مقاومة القالا الصادق دي يا مان؟ غنية طه الممطوطة زي حكوة الزول البراي دي كنت بقرا فيها وماشي كويس لحد ما عترت لي الحتة الدراماتيك على تراجيك على عنف دي
Quote: مافيك شي بخليك هواي وريني ايه عاجبني فيك
هسة تقدر تقول لي حبيبتك الغنية دي عاجـبـاني؟! ياخ في دراما زي دي غير في المنولوج؟ الشباب ديل منولوجستس واحنا فهمناهم غلط!
Post: #26 Title: Re: "أولاد قَلِبا، لو قمنا هسة بِنْقَلِّبا" Author: الصادق اسماعيل Date: 10-24-2010, 02:12 AM Parent: #25
Quote: (بِن) قَلِّبا أي نجيب عاليها واطيها وما ليها علاقة بقلب الحكومة إنتا صدقت حكاية أغنية مقاومة القالا الصادق دي يا مان؟
أراك تستهون بالنظرية النقدية الثورية
Post: #27 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-24-2010, 02:20 AM Parent: #26
Quote: أراك تستهون بالنظرية النقدية الثورية
سعادتك شرفت منطقة العمليات؟ ياخ أنا قلت كمندان أبو الصا مافيش نتفسح شوية! يا سعادتك كدي أسال واحد من الكهن البغنوا ديل وقول ليه بتعرف شنو عن أغاني المقاومة؟ حا يقول ليك دي ما أدونا ليها، هي في مقرر سنة كم؟
Post: #28 Title: Re: "أولاد قَلِبا، لو قمنا هسة بِنْقَلِّبا" Author: احمد محمد احمد عتيق Date: 10-24-2010, 09:05 AM Parent: #27
ههههههههههههههههه والله اتخليت الموضوع ونسة ..اتاريهو بالجد ..
المنولوج دا أول ما رجعت السودان سمعته إتكيفت منو جداً حاجة Fumy ودمها خفيف لأنو فعلاً لا مجال للرومانتك في سخانة السودان دي بعد فترة في عرس أسمع ليك الفنان يكورك "بتبقي عيااااااااناا ودايرة ليك ديكتور!" !! قلت للمعاي بقوا يغنو المنولوجات في الأعراس؟! نظر لي شزراً وقال لي بطل فلسفة ياخ، غنية قرقوري دي الأولى في التوب تن اليومين دي! وطفق يردد بحماس مع المغني نهاية كل مقطع "بتبقي عياااااااانة ودايرة ليك ديكتوور" فبُهِت الذي تفلسف!!
ـــــــــــ لاحظوا في عنوان المنولوج "..... قرقوري أغنيته الرااايعة ...."
Quote: المنولوج دا أول ما رجعت السودان سمعته إتكيفت منو جداً حاجة Fumy ودمها خفيف لأنو فعلاً لا مجال للرومانتك في سخانة السودان دي بعد فترة في عرس أسمع ليك الفنان يكورك "بتبقي عيااااااااناا ودايرة ليك ديكتور!" !! قلت للمعاي بقوا يغنو المنولوجات في الأعراس؟!
ينطبق على الحلبي هنا المثل القائل (الماعارف يقول عدس)، ومشكلة الغناء الحديث هو أمثال هذا الحلبي، والذي يعيش بعقلية القرن العشرين، ونراه يرفض السلفية في السياسة ويطالب بها في الغناء (فتأمل الملاسية).
حسب النظرية التقدمية في الغناء، يجب على المغني إستلهام مفردات العصر، مع إنفتاح على الثقافات العالمية، وهو ما أطلق عليهالناقد المجدد (حاتم حنك) إسم العولمة في الغناء. وفي أغنية المبدع قرقوري (ريتدنا زي مهند ونور) ، نري أن الشاعر يمارس إنتقاداً لاسعاً على (العولمة الغنائية)، وهو يحذر من إستلهام العولمة دون الوضع في الإعتبار الثقافة المحلية، وهذا الجيل الجديد من (التقدمية الغنائية) لا يستنكر العولمة بل هو يأخذ منها المفيد فقط، لذلك هو يتكلم عن مهند ونور بإعتبارهما(أيقونتين) للعولمة، ولكنه يوظفهما بمحلية كبيرة في الغناء وهذا لعمري يعتبر نقلة نوعية للغناء السوداني، بل إن شئت الدقة قل تجديداً في وجه السلفيين الجدد أمثال الحلبي والذين يعتقدون أن الغناء توقف عند الحقيبة ومحمد الامين والحوت.
إن تنامي النزعة (الحلبية السلفية) هو المهدد الأساسي لتجديد الأغنية السودانية، فبعد أن تمت هزيمة هذا النوع من النقاد وإعلاء كعب ما يسمونه (بالغناء الهابط)، وإنتصاره خارجياً (الشريف ونيجيريا) ومساهمته في حل أزمات الإقتصاد السوداني (دولارات الشريف وأثرها في إستقرار سعر الصرف)، تواري على خجل مصطلح الغناء الهابط، ليأتي الحلبي وأشياعه ويسمونه (المنلوج) في محاولة للتقليل من من هذا التجديد الغنائي.
ستظل معركة الحديث والقديم قائمة ولكن كما حُورب رواد التجديد في كل عصر فقد أثبت التأريخ أنهم ينتصرون دوماً.
التحية لقرقوري ولشكر الله وإن شاء الله سينبسط منكم الشريف وهو المطلوب هذه الأيام ولا نامت عينٌ للحلبي وأشياعه
Quote: بعد فترة في عرس أسمع ليك الفنان يكورك "بتبقي عيااااااااناا ودايرة ليك ديكتور!" !!
لجوء الحلبي لإستعمال ألفاظ من شاكلة (يكورك) تدل على ولوغه في حملة (إغتيال الشخصية) الغنائية لقرقوري (المجدد)، وفقط نُذكر الحلبي أن هناك من إستقبل عبد الحليم حافظ عندما غنى لأول مرة (بالبيض والطماطم). ونرجو من الحلبي أن يكون موضوعياً في نقده وأن يتناول الظواهر بطريقة علمية لا بطريقة (سلفية).
Post: #33 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-26-2010, 05:13 AM Parent: #32
لول يا صادق يعني بنقدك الحداثي دا شغلتي دي كلها طلعتها صراع أجيال!! هو بالله احنا عجزنا لدرجة بقينا نصارع الأجيال الورانا!! الحاج يا الصادق كل ما يلقاني بسمع في الحوت عندو فرمالة ثابتة: "أنا عايز أعرف: غنا زي دا بتسمعوهو كيف؟َ!" قلت لي يا حاج جرب أسمعه مرة بس قال لي لو دخل غنى جوة أضاني ما حأسمعو!
"تنامي النزعة الحلبية السلفية" و"السلفية الغنائية" دي لذيذة على كدا ناس د. أحمد القرشي والموج ومولانا مرتضى يطلعوا أهل الكهف عديل!
يا مان سمعت "خبر السواد"؟ ما تتخلع دي غنية ما بعد حداثية
أبو الصا: شرِّف شرِّف تكرم عينك: http://Re: ده كلام ده يا عادل عبدالعاطي ؟ او قُل ( صوت لوم) عديييل بعد ما تمتع نفسك بالدهشة أدي نظرة تفكيكية للغنية (والا البتاعة) رقم تلاتة في اللنك، وقارنها بكلام مولانا خدر في نفس المداخلة. بتلقى فكرتو بتاعت "المناطق الثقافية للغنا" دي في السلك يعني مثلاً: "الفي ريدو فرط دقس" دي بالذات، وبسبب من انعتاقها من الأطر الفنية الصارمة للنصوص المغناة، وكذلك بسبب طابع الكوميديا في موضوعها وبساطة فكرتها وحيوية كلماتها واستصحابها للمفردات الطازجة من لغة الشارع، لن تخرج عن المنطقة الثقافية للمنولوج أو غناء بنات هامش العاصمة،
إعلان هام: صاحب البوست من عشاق فن المنولوج وغنا البنات بمفردات هامش العاصمة
ــــــــــــــ البالأخدر دا جزء من دراسة نقدية سترى النور قريباً؟
Post: #36 Title: Re: "أولاد قَلِبا، لو قمنا هسة بِنْقَلِّبا" Author: الصادق اسماعيل Date: 10-27-2010, 04:06 AM Parent: #35
Quote: بتلقى فكرتو بتاعت "المناطق الثقافية للغنا" دي في السلك يعني مثلاً: "الفي ريدو فرط دقس" دي بالذات، وبسبب من انعتاقها من الأطر الفنية الصارمة للنصوص المغناة، وكذلك بسبب طابع الكوميديا في موضوعها وبساطة فكرتها وحيوية كلماتها واستصحابها للمفردات الطازجة من لغة الشارع، لن تخرج عن المنطقة الثقافية للمنولوج أو غناء بنات هامش العاصمة،
لا غضاضة في تحليل الأخ خدر، ولكن المشكلة في الإستعمال (الابستملوجي) لمصطلح المناطق الثقافية، حيث أن الأمر الذي لم تنتبهوا إليه كليكما هو أن المناطق الثقافية تلك قد إمتدت لتشمل الوطن كله. والمقصود بالمناطق الثقافية بالطبع (كما لا يخفي على القارئ الفطن) هو المناطق الهامشية، وكما أشرنا في دراسة نقدية سابقة (لرائعة هيثم أولاد قلبا)، أن هذا النوع من الغناء يؤسس للثورة القادمة (ثورة الهامش)، حيث أن الثورات تعكس في شعارتها وفنها تطلعات وأشواق الطبقات التى تقود تلك الثورات. فإذا قارنا غناء أكتوبر وأبريل نجد أنه يعكس (ودعني هنا أستلف المصطلح الخدري) ثقافة المنطقة الثقافية المدينية، أو بعبارة بشاشية يعكس الثقافة الجلابية.
والفي ريدو فرط دقس تحمل شحنة رمزية عالية، والمقصود هو (صراع الإسلاميين) وتفريطهم في حب (شيخهم حسن).
وكلمة أخيرة يا حلبي
أقعد إستهتر بالثورة القادمة لحدي ما تقوم، وبعدين تقعد تقول يا ريت سمعت كلام أبو الصا
Post: #37 Title: Re: "أولاد قَلِبا، لو قمنا هسة بِنْقَلِّبا" Author: الصادق اسماعيل Date: 10-27-2010, 04:06 AM Parent: #35
مكرر
Post: #38 Title: Re: "أولاد قَلِبا، لو قمنا هسة بِنْقَلِّبا" Author: الصادق اسماعيل Date: 10-27-2010, 04:07 AM Parent: #35
مكرر
Post: #39 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-27-2010, 04:23 AM Parent: #38
Post: #40 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-27-2010, 04:27 AM Parent: #39
Quote: والفي ريدو فرط دقس تحمل شحنة رمزية عالية، والمقصود هو (صراع الإسلاميين) وتفريطهم في حب (شيخهم حسن).
ههههههه ههههههه كان واحد في اللتنين: يا يفرطوا في السلطة يا في الزول القطع السلطة، قامو فرطوا في بتاع الخدار ذاتو لووول
Post: #41 Title: Re: "أولاد قَلِبا، لو قمنا هسة بِنْقَلِّبا" Author: Ashraf el-Halabi Date: 10-27-2010, 04:35 AM Parent: #40
Quote: أقعد إستهتر بالثورة القادمة لحدي ما تقوم، وبعدين تقعد تقول يا ريت سمعت كلام أبو الصا
يا مان الثورة قامت زمان!! نوع الغنا دا عندو جمهور عريض خصوصاً بين طلبة الجامعات والتينيجرز. يعني خمسة سنة والغنا كله حيبقى من النوع دا. وحا تلاقي الواحد فينا يستغرب ويكورك مع كل غنية " ما عارف غنا زي دا بتسمعوهوا كيف؟!"
Post: #42 Title: Re: "أولاد قَلِبا، لو قمنا هسة بِنْقَلِّبا" Author: الصادق اسماعيل Date: 10-27-2010, 04:58 AM Parent: #41
Quote: يعني خمسة سنة والغنا كله حيبقى من النوع دا. وحا تلاقي الواحد فينا يستغرب ويكورك مع كل غنية " ما عارف غنا زي دا بتسمعوهوا كيف؟!"
العكس حيكون الصحيح يا حلبي، لمن الجماعة يشوفوك بتسمع في الحوت هم الحيقولو ليك "ما عارف غنا زي دا بتسمعوهوا كيف؟"
Post: #43 Title: Re: "أولاد قَلِبا، لو قمنا هسة بِنْقَلِّبا" Author: الصادق اسماعيل Date: 10-27-2010, 05:08 AM Parent: #42
عارف يا أشرف
في سودانيزاونلاين بتاعت سنة 2020 حتلقي بوست مفتوح عن الغنا الهابط بعنوان "حبيبة عمري تفشى الخبر"، وحتلقى الجماعة المتداخلين يقول ليك يا خي دي لغة شنو الهابطة دي وشنو تفشى الخبر، يعنى كيف هو داير يجكس وما داير زول يعرف "زولك دا بيكون ضاربو إيدز عشان كدة ما داير زولتو تعرف.
Post: #44 Title: Re: "أولاد قَلِبا، لو قمنا هسة بِنْقَلِّبا" Author: وليد عبد اللطيف Date: 10-27-2010, 08:27 AM Parent: #43
اشرف الحلبي + الصادق اسماعيل ..... سلامات شايفكم شغالين ون تو جميل في البوست دا
Quote: صراحة يا صادق هيثم رغم إنو "ود قلبا" لكن ما سمعت بيهو إلا لما الحوت غنى ليهو ود قلبا شهرتو جات من بحري!! "حد يصحي" أماني اللمين
ههههههههه تعرفوا في يوم بغني جنب الوالده ومتكيف جدا
والدتي يديها العافية بلهجة دنقلاوية قالت لي : سو الزين الوداهو شنو بحري خليهم يدقو ولو انه العنف ليس من شيمتنا في بحري لان طبيعتنا مخضرة وخلابة وطقس مليان محبه وهواء نقي تجعل الشخص متوازن نفسيا لزلك عندنا في بحري اكبر مصحى بكوبر لعلاج مرضى الامراض النفسية وسجن كوبر لتقويم سلوك كل من يخرج عن القانون ويتخز العنف افضل تعبير له المهم على قول تبارك شيخ الدين يا الصادق اسماعيل واشرف الحبي ياخي سمعنا اغاني الحقيبة كلها حتى وصلنا الى وردي وعثمان حسين ونحن من تسبب على تدمير الاجيال لزلك دعوهم يعبروا عن نفسهم عندي احساس انهم بقولوا نحن لم نورثهم او نسلمهم الامانه بالطريقه المثلى لانهم حاسين نفسهم محاربين في كل شيء وهم ليس لهم زنب في تربيتهم الشباب اصبح يبحث عن هويته المفقودة و ربنا يحفظهم بس والان يمرون بمنعطف خطير في حياتهم . . بعدين غناء النابل والطبنجات دا نحن غنيناهو زمان هل حرام عليهم وحلال علينا شوفو مثلا : انا مابسيبوا حنين لو عبو لي مكسيم والفنان الكحلاوي يقول ( قنابل النهدي) . . المكسيم : نوع من السلاح تم به حصد جيش المهدي سابقا . . ماتزعلوني اصلي زعلان فناني المفضل (شكر الله وقرقوري و زبيدة الانقا ز وسمية ######شات ) نحن عشاق الغناء الهابط اين ما كان ( هابط يعني شنو )
Quote: الفوق دا ما كلام وجهو مقبقِب أمدرماني بموقف الشهدا أو بسوق الساتة لمقبقَب من بحري أو الخرطوم أو خلافه،
اولاد قلبا قلبوها زي ما عايزين بس ماتعدو كبري بحري لان لغة العنف عندنا معدومة ولو جيتونا سوف نستقبلكم بالورود
-------------------------- عندي مشكلة في حرف الزال
Quote: ولو انه العنف ليس من شيمتنا في بحري لان طبيعتنا مخضرة وخلابة وطقس مليان محبه وهواء نقي تجعل الشخص متوازن نفسيا لزلك عندنا في بحري اكبر مصحى بكوبر لعلاج مرضى الامراض النفسية وسجن كوبر لتقويم سلوك كل من يخرج عن القانون ويتخز العنف افضل تعبير له
ههههه حلوة يا وليد قلت لي بحري علاج نفسي وتهذيبون وإصلاح! غايتو بتفق معاك في حكاية بحري مسالمة دي وبتفق معاك كمان في حكاية إنو المشكلة ما في الشباب ديل، المشكلة في البيئة النشأوا فيها لكن يا مان احنا ما السبب احنا ضحايا زيهم، الله يجازي اللي كان السبب لكن ما بتفق معاك في تشبيه قنابل النهدي والمكسيم بقنبلة طه في ديك جات صور عابرة كدا لكن عند طه الغنية من أولها لأخرها بارود!
أسمعني:
Quote: وسمية ######شات
الحروف المشخبتة دي شنو؟
Post: #45 Title: Re: "أولاد قَلِبا، لو قمنا هسة بِنْقَلِّبا" Author: هشام الطيب Date: 10-27-2010, 08:32 AM
أبو الشوش .. سلامات ياصاحبي شكر الله دا مالو فرحان بالغنيّة دي كدا ينطط في الكرسي زي القاعد ليهو في ياي ! ياخ دي اغنيّة تعمل وجع البطن
Quote: في سودانيزاونلاين بتاعت سنة 2020 حتلقي بوست مفتوح عن الغنا الهابط بعنوان "حبيبة عمري تفشى الخبر"، وحتلقى الجماعة المتداخلين يقول ليك يا خي دي لغة شنو الهابطة دي وشنو تفشى الخبر، يعنى كيف هو داير يجكس وما داير زول يعرف "زولك دا بيكون ضاربو إيدز عشان كدة ما داير زولتو تعرف.
كلامك دا يا صادق رغم السخرية الفيهو حتشوفو قريب قبل العشر سنوات دي طال ما المفردات بقت "دقس"، "مقص"، "خالط"، "بنطربقا".. إلخ.. يبقى "تفشى الخبر" بتبقى نشاز وهابطة دا كله هين، "دقس" وأخواتها مقدور عليهن، بس ما تجيب ليها شتايم وألفاظ مشخبتة، والغنية كلها تظهر "حبيبي لاقيتو في الـ بلييب، أداني بلييب" وهكذا
Quote: كلامك دا يا صادق رغم السخرية الفيهو حتشوفو قريب قبل العشر سنوات دي طال ما المفردات بقت "دقس"، "مقص"، "خالط"، "بنطربقا".. إلخ.. يبقى "تفشى الخبر" بتبقى نشاز وهابطة دا كله هين، "دقس" وأخواتها مقدور عليهن، بس ما تجيب ليها شتايم وألفاظ مشخبتة، والغنية كلها تظهر "حبيبي لاقيتو في الـ بلييب، أداني بلييب" وهكذا
عارف يا اشرف واحد من الأسباب صاحبك الحووووت، آي الحووت زات نفسو، يعنى المقدرة الخرافية للحووت والقبول الهائل بتاعو كان ممكن يبقى قدوة عالية للشباب ديلن لكن محمود كسلان والمشكلة ما في فنانين في مستواهو عشان كدة القصة بقت سايبة، وطبعاً للحقيقة أنا ما عندى مشكلة مع غنا الشباب ديل، لكن مشكلتى أن يكون هذا النوع هو النوع السائد وهو (الإستاندرد).
وأنا بكتب في الكلام دا إتذكرت في بداية التسعينات كان في معرض في الخرطوم للثقافات الشعبية، أها كان في واحد عارض ليهو لوحة فيها حروف هيروغلوفية وجنبها ترجمة عربية وقال دي اللغة المروية، كنا أنا وحمد جلا هاشم وصديق آخر وقفنا معاهو، فمحمد جلال قال ليهو ياخ اللغة المروية لحدي اللآن ما فكو شفرتها، فزولنا قال ليهو يا خي أنا الحروف دي جبتها من دكتور محمد جلال هاشم من جامعة الخرطوم وهو الفك رموز اللغة المروية، طبعاً كلنا إنفقعنا من الضحك، ومحمد جلال قال ليهو يا خي أنا محمد جلال وأنا ما فكيت أي شفرة، أها زولك طلع راجل ظريف فقام قال لمحمد جلال (إنت السبب هسه لو كنت شفت شغلك ما كان دخلتني في الموقف البايخ دا)ن أها الحوت لو كان شاف شغلوا ما كنا دخلنا في الكلام البايخ دا
Quote: أنا ما عندى مشكلة مع غنا الشباب ديل، لكن مشكلتى أن يكون هذا النوع هو النوع السائد وهو (الإستاندرد).
والله يا صادق نوع الغنا دا كاسح كالسيل. واحنا قاعدين في بورد بكري دا نكتب ونعدل ونلصق في الوشوش الخدرا حيبقى هو الاستاندرد. التصحير القثافي القاموا بيو ناس "هي هي هي لله" ديل من دفع المبدعين بكل عنف للابتعاد عن سكة المساهمة الإبداعية -على علاتها- الكانت حاصلة في البلد زائد تقليص ميزانية الانتاج الإبداعي وتجييرها لصالح خدمة أجندة (إعادة صياغة المجتمع) وما صاحب دا من برامج آيدلوجية التنظيم من شاكلة "في ساحات الفداء" وغيرو، كل دا يعمل إفقار ثقافي أكبر من كدا.إذاً قصاد آلات الهدم الجبارة دي يبقى مشروع التطوير أكبر من إمكانيات فرد واحد مهما كانت قدراته وكاريزمتو (حتى لو كان حوت سيدنا يونس نفسو!). لذلك أرجع تاني وأقول العيب ما من الشباب ديل، العيب من د. جلال هاشم واللتنين الكانو معاو في المعرض
يعني كيف ما ينطط والغنية حماسية! بالعكس يا هشام شكر الله عمل المفروض يتعمل في التفاعل الحركي مع النص الحماسي دا أنا لو مكانو -إمعاناً في التفاعل- بقلع الجاكيت وأفك الزراير وأفك في كوباني شلوت
