Post: #1
Title: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: سيف اليزل برعي البدوي
Date: 10-17-2010, 09:20 PM
استاذ عبد الرحمن ود كتيرة رمز الطبشيرة
النبدا ...
المكان : احد بيوت الاشباح
الزمان : خلّوهو مفتوح كدا
- يا كمندان عبد الرحمن حقّو بعد دا نبدا التحقيق مع زولك دا ...
- لا لسع خلّيهو نلعب بي أعصابو شوية وما تدخّلوهو لي الا لمن يستوي خاااالص
- والقال ليك منو انو لسع ما استوي والله دا من أول امبارح مذهلل .. كف واحد ما استحملو
-قلت لي هو اسمو منو
- اسمو ماهر ... ماهر عز الدين
- ماهر عزالدين ... ماهر عزالدين ... اوع بس يكون زولي بتاع مدرسة الساحة المتوسطة ...
اسمع انت الزول دا مبغبغ كدا وليو كضيمات ؟
- والله كتلتو تب ... أهو داك قاعد يتخجّ زي سعن الروب ..انت الزول دا بتعرفو ؟
- والله كان بقي زولي بتاع الساحة امانة ماااا وقع راجل ... راجل ؟ أريتو يبقي راجل
خلااااص خلّي الكدي والكدي وبقي لي معارض ؟ دخّلوهو لي ود اللذين وزول يكون معانا مافي
والله كان ما ورّيتو شغل زمان ما اكون استاذ عبد الرحمن
|
Post: #2
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: سيف اليزل برعي البدوي
Date: 10-17-2010, 09:22 PM
Parent: #1
يدخل ماهر عز الدين غرفة التحقيق اثر لزّة قوية من مفتول الساعدين كانت كفيلة بأن تكفيه علي وجهه وتبرط نخرته وجزءا عزيزا من جبهته ..
- لا يا جماعة حرام عليكم تسوّو كدا ... عليكم الله جبهة زي دي تتزلّط ؟ يلا يا عسكري اقفل الباب دا وانصراف ..
- تمام سعادتو ود الرايق
وهنا يحاول ماهر عزالدين ان يرفع رأسه قليلا عشان يشوف سعادتو ود الرايق دا .. ولكن كانت هناك جزمة ثقيلة فوق رأسه تحول دون ذلك ... وكان قلبه بين الخوف الرجاء .. اذ كان صوت سعادتو ود الرايق مألوفا لديه رغم مرور السنوات ... ومن تحت البوت أخذت الأفكار في رأسه تدور وتدور ... يا ربي يكون هو ؟ وللا ما هو ؟ لو كان ما هو ووووب .. ولو كان هو ووبييييييين ..
- شرّفتنا يا سيادة المعارض ... ان شاء الله ناسنا ديل ما يكونو اتلوّمو معاك ...
ماهر ووجهه ما زال مدفوسا في الارض : دي طريقة أصلو ما انسانية ودا انتهاك صريح لكل المواثيق الدولية وحقوق الانسـ ..
وقبل ما يتم كلامو يلبس البوت الذي فوق رأسه جوّة خشمو
|
Post: #3
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: سيف اليزل برعي البدوي
Date: 10-17-2010, 09:23 PM
Parent: #2
نواصل ...
- قلت لي حقوق شنو ؟ سمح الوطن دا نحميهو كيفن من الزي عينتكم دي ؟
ويدنقر سيادتو ود الرايق نحوه ويخمش قبضة معتبرة من سبايب شعرو ويجرّها بقوة حتي كادت رقبة الجني أن تتفهق .. وما ان تقابلت عيناهما حتي تصنّع سيادتو ود الرايق الدهشة
- ماااا معقول !!! بالله دا انت ؟ وانا اقول اسم ماهر عز الدين دا ماغريب علي ... لااا حولاااا
بالله رامي نفسك جنس الرمية دي مالك ؟ معارضة شنو وكشا مشا شنو الانت ساكّي دربها دي ؟ والله ناسك ديل اصلو ما عندهم موضوع ... كدي هسع قوم اتنفّض خلينا نفضفض مع بعض شوية ونشوف مشكلتك الغتستا فيها لي اضنينك دي
ماهر - باستغراب - : استاذ عبدالرحمن ؟ ما معقول !! سمح ودالرايق دي شنو ؟
- ما تاخد في بالك دا اسم حركي ساي .... وطول قعادك معانا هنا اسم استاذ عبدالرحمن دا اصلو ما تجيبو في خشمك ... واصلك ما تعمل فيها انك بتعرفني ... مفهوم ؟
- حاضر حاضر يا سيادتك ... بس عليك الله شوف لي طريقة مخارجة من هنا ... والله ناسكم ديل كعبين جنس كعوبية ... تتخيّل الزول القاعد يكفّت فيني من اول امبارح دا منو ؟ والله كان قلت ليك ما حتصدّقني ... دا شيخ مبارك امام جامع البر والتقوي الجنب مدرسة الساحة حقّت زمان ...
- يا زول هوي اي حاجة بتشوفها هنا أنصحك انّك ما تذكرها حتي لو بينك وبين نفسك .. دا لو افترضنا جدلا انك مرقت ...
|
Post: #4
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: سيف اليزل برعي البدوي
Date: 10-17-2010, 09:24 PM
Parent: #3
ورغم الكدمات التي ورّمت وش ماهر الا انه نطّط عيونو ومرقهن من راسو وحاول ان يجمّع قليلا من الريق حتي يبلعه فما وجد غير السراب ...
- عليك الله عليييييك الله شوف لي طريقة يا استاذ ..... - واستدرك - قصدي يا سيادتو .. والله انا من ما جبتوني هنا عيني دي ما شافت النوم واهلي ما عارفينّي وين والله العظيم هسع تلقي امّي دي حالا حال ...
- والله انت لو عايز تتخارج بتتخارج ... دا بتوقّف علي درجة تعاونك معانا ولكن كان عصلجتا امّك زااااااتا حنجيبها هنا .... انتو قايلين البلد دي فوضي ؟ دايرين تجوطو وتعملو لينا قلاقل ؟ وهو نحن قالو ليك اتمكّنا كدا بالساهل ؟ دايرين تضيّعو لينا مجاهدات اخوانّا دي سااااي سلفقة ؟ دي يا دووووبا زهزهت ونعنشت ... عشان كدا أصلو مافي رحمة ... والله والله لو أبوي قام من قبرو وداير يعمل لي ضبّان ضكر لو ما رجّعتو قبرو تاني اكون ود حرام ... ما تشوف ونستي معاك دي وتأمّل ... دا أمن بلد وأمن تنظيم ونظام ... وقسما بالله وانت ما طالبني حليفة لو قمت اتلولوتا معاي حأورّيك اللولوة العمرك ما شفتها ... ما تقول دا استاذي وحيرحمني ... وانا ما رحمتك وانت شافع ارحمك هسّع وشنبك يربط التور ؟
|
Post: #7
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: أبو ساندرا
Date: 10-18-2010, 07:52 AM
Parent: #6
متابعين
يا ابوالسيوف ، ماتنخ
|
Post: #8
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: محمد ميرغني خليفة
Date: 10-18-2010, 07:54 AM
Parent: #1
سلام يا سيف ....
ياخي القصة دي لسع ما اكتملت .. وان شاء الله حأتمها بي جاي زي ما وعدتك
|
Post: #9
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: محمد ميرغني خليفة
Date: 10-18-2010, 08:01 AM
Parent: #8
ياهو دا الجزء التالي من القصة.
- قلت لي امّك بتكون شفقانة عليك ؟ يااااا حليل امّك وايام امك ... والله انا زمان زمن المدرسة كنت كلّما روحي دي تتشحتف للكبرتة والخمرة اقول ليك نادي ولي أمرك ... وانا عااارف انّو ابوك مغترب بالسنين بجيكم كل 5 سنين وولي أمرك البجي بتكون امّك ... عليك الله ابوك دا زول عاقل ؟ ما سمع حمد الريح ؟ - واخذ يترنّم - ياخي دي حلوة أرجع ليها لمّن تمشي وتتقسّم ... والله امّك دي كانت لمن تدخل علي المعمل وريحتها دي تطق لا بشم ليك كبريتات ولا نترات ... وريحة الكبرتة دي تقعد في المعمل تلااااااتة يوم .... وفي الايام التلاتة دي مدير المدرسة بسكن معاي في المعمل سكنة .... يشمشم سااااي ... جرقاس يا بعيد ....
والله اسع تلقي امّك رغم السنين دي لسّع محافظة ... دي مااااا بتحرق بالساهل ....
- يا سيادتو عليك الله ما تتكلّم علي امي كدا
- خلاص انسانا من سيرة امك دي .... وخلّينا نسترجع الذكريات ... ذكريات مدرسة الساحة المتوسّطة .... انا الليلة فاااااضي ما عندي شغلة .... انت اغنية استاذي العزيز دي القطعها فيني منو ؟
- والله ما عارف ... لكن يخيّل لي دي قطع جماعي ... ناس الكنبة الورا كانو بكاوو بيها مهنّد
- يا سلاااااام علي مهنّد والله دا كان ولد فلتة .... شطارة وعز وحلا وحمار ... يلا قوم دق في الطربيزة دي وغنّي لي اغنية استاذي العزيز ....
- يا سعادتو الفترة طالت وانا نسيتا ...
- ودي حاجة بتتنسي يااااا ولدنا ؟ خلّينا ننقرش بيها مع بعض يلا ابدا ..
وهنا أحسّ ماهر بأن الامور في طريقها للانفراج فبدأ يدندن ...
استااااذي العزيز في الساحة
أدّاني كف برّاحة
كف كف ككف ... برّاحة
ككف ككف كف كف ... برّاحة
شدّ عضلو جلدني
حسّيت معاو بي راحة
معاو معاو ... بي راحة
مع مع معاو .... بي راحة
|
Post: #10
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: محمد ميرغني خليفة
Date: 10-18-2010, 08:06 AM
Parent: #1
والله يا جماعة انا كتبت لحدي هنا ووقّفت .... كان الله مدّ فيني العمر بتمها ...
--------------------------------------------------------------------------------
- يا زول خلاص ... بعد كدا نبدا الجد ... أها قلت لي انت انضمّيت للتنظيم الهدّام دا متين ؟
تنظيم شنو يا استاذ .. قصدي يا سيادتك ... والله انا ما عندي اي علاقة بي أي تنظيمات ...
- يعني نحن باهتنّك ساي ؟ والله البلد دي نحن عارفين أي حاجة بتحصل فيها ... و أي مواطن مصنّفنّو كان معانا كان ضدّنا ... دحين ما تنكر ... و كون متأكّد انّو أي سؤال أسألك ليو انا عارف اجابتو ... بس سمح الغنا في خشم سيدو .. علاقتك شنو بي ابراهيم فضل المولي ؟
- ابراهيم دا في الحسبة ببقي لي ود عمّي ..
- وسمح تقول ما عندك علاقة بأي تنظيمات ؟ طبعا هو الجنّدك وخلاك تسوّي في اللغاويس دي
وأهو نحن خمشناك وانت مشارك معاهم في اجتماعاتهم ...
- لا والله ... هو بس كان ساقني معاو عرس واحد صاحبو وأثناء الحفلة مشيت معاو لي صالون الجيران كانو عاملين هناك قعدة ظريفة ...وقعدت معاهم بس هو دا الحصل ..
- طبعا القعدة دي كان عرقيها مدوّوّوّر ... والقرارات الأخدّتوها شنو مع قعقعة الكؤوس ؟
- هم الكانو بتكلّمو في السياسة وانا ما عندي أي دخل في الموضوع ...
- اها كانو بقولو شنوووووو ؟
-والله ما عارف ... ما كنت ماخد بالي ...
- ياهو دا الكلام الأعوج ... والله كان ما قلت لي حاستخدم معاك اسلوب أعفن من الجزارة يوم العطلة ... وعندي الف طريقة وطريقة عشان أصحّي ليك ذاكرتك دي ... فدحين أحسن ليك تتكلم وجلدك بارد ...
اتكلّم أقول شنو ؟ والله ما عندي شي أقولو ...
- خلاص علي كيفك ... وبعد دا ما تلوم الا نفسك ... وانت في النهاية حتقول حتقول ...
ومشي فتح الباب ونادي احد العساكر ... يا ود أرباب أمشي المخزن جيب لي يد فندك جعلية بس تكون غليدة شوية ... - والتفت اليه - والله راسك الكبير دا كان ما كسّرتو ليك .. اصبر لي بس ...
|
Post: #11
Title: Re: أستاذ عبد الرحمن ود كتيرة رمز الطبشيرة ...(بيوت الأشباح)..محمد ميرغني خليفة...
Author: سيف اليزل برعي البدوي
Date: 10-18-2010, 01:30 PM
Parent: #10
مبرووووك العضوية
يا محمد
والله فرحنا ليك شديد
بلا شك ستعطر المنبر بحكاويك الرائعة المستقاة من واقعنا
واصل فكلنا عيون متابعة
لك خالص مودتي
سيف
|
|