يوم في الباص لقيتو ...سوري لي إنت ياخي..!!

Post: #1
Title: يوم في الباص لقيتو ...سوري لي إنت ياخي..!!
Author: Dr.Elsadig Abdalla
Date: 10-16-2010, 10:01 AM
Parent: #0

ده مقطع لاغنيه شهيره أيام كنت في جوبا اواخر السبعينات وبداية الثمانينات ... وكنا نسمعها بشكل شبه يومي من إذاعة جوبا ..

--يوم في الباص لقيتو...سوري لي إنت ياخي ...

--حباني حبيتو ......سوري ليإنت ياخي ..

--سألتهم قالوا..في ملكيه بيتو...

--سوري لي إنت ياخي ..كفاره لي أنا...

من يتذكر بقية الأغنيه ..أو من لديه تسجيل لهذه الأغنيه ؟

عبدالكريم كيكي إذا شاف الكلام ده ممكن يتذكر الأغنيه كامله

Post: #2
Title: Re: يوم في الباص لقيتو ...سوري لي إنت ياخي..!!
Author: Dr.Elsadig Abdalla
Date: 10-16-2010, 11:11 AM
Parent: #1

مافي زول من جوبا في المنبر ده الله شنو ؟

Post: #3
Title: Re: يوم في الباص لقيتو ...سوري لي إنت ياخي..!!
Author: Dr.Elsadig Abdalla
Date: 10-17-2010, 09:38 AM
Parent: #2

فوق حتي حضور جنوبي الجنوب أو شمالي او الجنوب

Post: #4
Title: Re: يوم في الباص لقيتو ...سوري لي إنت ياخي..!!
Author: عبد الدائم سيد أحمد
Date: 10-17-2010, 11:37 AM
Parent: #3

...سوري لي إنت ياخي

باص سفرى
ولا باص اركويت

اول مرة اسمع كلام زى ده

Post: #5
Title: Re: يوم في الباص لقيتو ...سوري لي إنت ياخي..!!
Author: سلمى الشيخ سلامة
Date: 10-17-2010, 11:50 AM
Parent: #4

سورى لانت ياخى كفارة لانا
دى اغنية الفنان يوسف فتاكى
وهى من اغنيات الستينات وليس السبعينات كما تفضلت اخى الكريم
ويوسف فتاكى احد الفنانين المغنين باللغة المحلية والعربية كما فى هذه الاغنية

يوم فى البص لقيتو
حبانى حبيتو
لما سالت عنه
فى الملكية بيتو

وهى الملكية جوبا
الاغنية طويلة وكتبها احد شعراء الاغنية الحديثة المعروفين لكن نسيت اسمه
لكن ذكر فى مرة "فى تسجيل اذاعى انه كان منقول لجوبا وكتب الاغنية دى هناك فى جوبا"

تطوع احد "صبيان الحكومة الكان شغال فى اذاعة جوبا"احتفظ باسمه لشرط الزمالة فقط"
بمسح معظم اغنيات الفنان يوسف فتاكى
لانه ما لقى اشرطة فمسح معظم تاريخ هذا الفنان دون ان يطرف له جفن والكلام دا فى التسعينات بالمناسبة "

Post: #6
Title: Re: يوم في الباص لقيتو ...سوري لي إنت ياخي..!!
Author: Dr.Elsadig Abdalla
Date: 10-17-2010, 12:02 PM
Parent: #5

Quote: ده مقطع لاغنيه شهيره أيام كنت في جوبا اواخر السبعينات وبداية الثمانينات

شكرا الأخت سلمى على الافاده..بس أنا قلت أيام أنا كنت في جوبا نهاية السبيعنات وبداية الثمانينات ..لانو لحدي الوقت داك كنا بنسمع هذه الغنيه في راديو جوبا ....

الله يسامح من مسح هذه الأغنيات ...

شكرا سلمي ...

عبدالدايم ...إنت شن عرفك بالحاجات دي..من الصحافه..للزقازيق ولي جده وبالعكس ...

تحياتي للعيال وامهم

Post: #7
Title: Re: يوم في الباص لقيتو ...سوري لي إنت ياخي..!!
Author: عبد الدائم سيد أحمد
Date: 10-17-2010, 12:03 PM
Parent: #5

سلامة يا سلامة

سورى لانت ياخى كفارة لانا

استطعت الان ان اتذكر المقطع ده

يا سلوم الظاهر كان فى مكافأت لكل شخص يمســـح اكبر كمية من التاريخ

احييك ياخى

Post: #8
Title: Re: يوم في الباص لقيتو ...سوري لي إنت ياخي..!!
Author: طارق جبريل
Date: 10-17-2010, 01:17 PM
Parent: #7

على سبيل التحية

Post: #9
Title: Re: يوم في الباص لقيتو ...سوري لي إنت ياخي..!!
Author: Dr.Elsadig Abdalla
Date: 10-17-2010, 01:25 PM
Parent: #8

سلامات ياجبريل

إنت كمان مامرت عليك الغنيه دي....

يوم في الباص لقيتو...سوري لي إنت ياخي ..

حباني حبيتو ...سري لي إنت ياخ ..

شكل منقه ذاتو..في ملكيه بيتو ..

ويا سلام لو سمعتها ملحنه

Post: #10
Title: Re: يوم في الباص لقيتو ...سوري لي إنت ياخي..!!
Author: جمال السنوسي
Date: 10-17-2010, 04:52 PM
Parent: #9

Quote: وهى الملكية جوبا
الاغنية طويلة وكتبها احد شعراء الاغنية الحديثة المعروفين لكن نسيت اسمه
لكن ذكر فى مرة "فى تسجيل اذاعى انه كان منقول لجوبا وكتب الاغنية دى هناك فى جوبا"

دكتور الصادق

وسلمى

وبقية المتداخلين

الاغنية كتبها صديقنا وعمنا الشاعر / شمس الدين حسن خليفة وهو الذي كتب مرحبتين بلدنا حبابها

وهو شقيق الشاعر مبارك حسن خليفة

الاغنية كتبت في الستينات في الجنوب

وقصتها كما يلي : ( من خشم الشاعر الذي تربطني به علاقة صداقة متينة منذ سنين وربنا يديهو الصحة والعافية )

انهم أثناء سكنهم كعزاب في ميز للموظفين في الجنوب

ذكر احدهم انه زار اليوم زميلهم الجنوبي المريض في المستشفى وقد دار معه الحوار التالي :

الزائر : كفارة ياخ

المريض غاضباً : ليه تقولي لي كافر .. كافر إنت

الزائر: خلاص ما تزعل .. سوري ليك إنت .. كفارة لي أنا

وعندما حكى الزميل هذا الحوار

جادت قريحة الشاعر شمس الدين بهذه القصيدة التي كانو يتغنون بها في ميز السكن

ومنها انطلقت الاغنية لكل بقاع السودان

تسلل :

دكتور الصادق

سيدا كيف ؟

Post: #11
Title: Re: يوم في الباص لقيتو ...سوري لي إنت ياخي..!!
Author: طارق الكوتش
Date: 10-17-2010, 05:27 PM
Parent: #10

ياسنوسى بالمناسبه ده >>

توب الكرب الساده الجابوه النقاده مناسبتها شنو

Post: #12
Title: Re: يوم في الباص لقيتو ...سوري لي إنت ياخي..!!
Author: Dr.Elsadig Abdalla
Date: 10-17-2010, 05:48 PM

سلامات ياكوتش والسنوسي وشكرا للزياره ..

والله يا السنوسي طلعت مؤرخ جيد كمان ...أما سيدا ده براك عارف...وخايف عليكم من خمسة مازمبي..نفس الملامح والشبه ..الله يكضب الشينه..(طبعا الشينه هنا معناها فوزكم بالبطوله )..

تحياتي لكم جميعا

Post: #13
Title: Re: يوم في الباص لقيتو ...سوري لي إنت ياخي..!!
Author: سيف النصر محي الدين محمد أحمد
Date: 10-17-2010, 06:05 PM
Parent: #12

سلامات يا الصادق
قبل فترة كان في برنامج في التلفزيون استضاف الاستاذ شمس الدين
حسن خليفة و فنان من الجنوب ، كانت حلقة جميلة جدا حكى فيها الاستاذ
عن ذكرياتو في الجنوب و ردد بعض قصايدو و قدمت اغاني من ضمنها هذه
الاغنية التي ذكرتها.
اسمع ما تحكي لينا قصتك مع الزول الاشتكاك في المحكمة داك

Post: #15
Title: Re: يوم في الباص لقيتو ...سوري لي إنت ياخي..!!
Author: جمال السنوسي
Date: 10-17-2010, 09:40 PM
Parent: #12

Quote: والله يا السنوسي طلعت مؤرخ جيد كمان ...أما سيدا ده براك عارف...وخايف عليكم من خمسة مازمبي..نفس الملامح والشبه ..الله يكضب الشينه..(طبعا الشينه هنا معناها فوزكم بالبطوله )

الصادق دكتورنا

غايتو

لو التحكيم الافريقي الذي رايناه اليوم في تونس مع الترجي موحود

اضمن ليك الشينة ما بتحصل

Post: #14
Title: Re: يوم في الباص لقيتو ...سوري لي إنت ياخي..!!
Author: جمال السنوسي
Date: 10-17-2010, 09:36 PM

Quote: ياسنوسى بالمناسبه ده >>

توب الكرب الساده الجابوه النقاده مناسبتها شنو

طارق الكوتش

قالوا ليك انا ود متين

انات ذاتي نما بعرف توب الكرب ده

بعرف رسالة لندن بس

Post: #16
Title: Re: يوم في الباص لقيتو ...سوري لي إنت ياخي..!!
Author: جمال السنوسي
Date: 10-17-2010, 09:46 PM
Parent: #14

من حوار صحفي مع الشاعر شمس الدين الخليفة
الرابط
http://www.alsahafa.sd/details.php?articleid=12441

Quote: نرجع لحكاية الاغنية؟
- ضحك ثم بدا وكأنه يتذكر وقال: نحنا لم كنا شغالين في الجنوب طلبنا من احد الزملاء انجاز مهمة، وعندما عدت لاسأله عنها رد بلغة عربي جوبا سوري لانت يعني ما عملت حاجة، وتركته وذهبت للمستشفى حيث كان احد ابناء الجنوب متوعكاً وجاءه صديقه الشمالي لمعاودته قائلاً «كفارة ليك» فانفجر غضباً ظناً منه ان الامر يحمل جانباً دينيا يتعلق بالمسيحية التي يعتنقها، فما كان من صديقه الا ان يقول سوري لانت كفارة لانا فضحك المريض واحتضن صديقه وتبلورت الفكرة في رأسي وكان ميلاد القصيدة.
٭ اتولدت ملحّنة؟
- ايوه أنا كتبتها ولحنتها طوالي، الكلام ده كان في عام 0791م، وصادفت العيد الاول لثورة مايو وغناها فنان من جبال النوبة في الاحتفال، ووجدت قبولا منقطع النظير، والجماهير طالبت باعادتها مرة اخرى في نهاية الحفلة، واشتهرت انا بسببها، فقد اصبحت اعرف بشاعر أغنية «سوري لانت كفارة لانا» عند الاخوة الجنوبيين.

Post: #17
Title: Re: يوم في الباص لقيتو ...سوري لي إنت ياخي..!!
Author: نيازي مصطفى
Date: 10-17-2010, 10:08 PM
Parent: #16

شوفها هنا
تحياتي
http://youtube.watanialsudan.com/watch844.html

Post: #18
Title: Re: يوم في الباص لقيتو ...سوري لي إنت ياخي..!!
Author: Dr.Elsadig Abdalla
Date: 10-18-2010, 09:21 AM
Parent: #17

سلامات للجميع

هاكم الأغنيه...شكرا نيازي ...وسيف...والسنوسي وجميع المتداخلين ....

سيف أنا طالع الشغل ...بجي أحكي ليكم القصه كامله..والله ضحكتني جنس ضحك ...

http://www.youtube.com/watch?v=avhRFEeHvB8

---------------------------------

الأغنيه وصلتني عبر الايميل ...عن طريق شخص لا أعرفه ..له الشكر ...

Post: #19
Title: Re: يوم في الباص لقيتو ...سوري لي إنت ياخي..!!
Author: جمال السنوسي
Date: 10-18-2010, 09:54 AM
Parent: #18

وهاكم ليها هنا