الصحفي عادل سيد أحمد خليفة. أمس في هارموني. مبـــــــــالغة

بالأمس أتيحت لي الفرصة لكي أشاهد الحلقة التي بث في قناة هارموني حول الجدل الدائر حول سفر فنانات وفنانين الى نيجيريا.
أستضاف مقدم البرامج الناقد المسرحي وعضو البورد الاستاذ السر السيد والصحفي وصاحب صحيفة الوطن عادل سيد أحمد خليفة. حديث الاستاذ السر السيد كان متزن جدا وكان منصف في حق الفنانين والفنانات ولكن الاستاذ عادل سيد أحمد خليفة كان مبالــــــــــــــغة. لقد كال عادل خليفة أتهامات تارة مبطنة وتارة صريحة حول رحلتهم الى نيجريا وحول سلوكهم هناك، وكأنه كان معهم. ولقد أعتمد في نقاشه مع السر السيد على بعض الاشاعات والقيل والقال. لقد كانت الطريقة التي يناقش بها عادل سيد أحمد خليفة لا ترتقي الى أي مستوى حواري مفيد وكشف عن جهل غريب، وصار يستدل في نقاشه في ما قاله الفنان عبد القادر سالم.(لم أستمع الى ما قاله عبد القادر سالم) وصار ينظر في الفن السوداني الذي أثبت بنفسه أنه لا يفقه فيه شئ. من الاشياء التي يرددها بعض السودانين حول مشاركة الفنانين في المحافل الدولية أنهم يعتقدون بأن على العالم يجب أن يستمع الى الفنانين الذين يعتبرونهم هم كسودانين فنانين ممتازين، وهذا حديث لا يعقل أبدا. لا يمكن للسودانين أن يفرضون على الاخرين الكابلي ومحمد الامين مثلا. إذا كان هنالك من هو يعشق فن حنان بلوبلو أو ندى القلعة فذلك من حقهم ويجب أحترام أزواق الاخرين(الغير سودانين) في الفن السوداني. أما الاستاذ السر السيد فلقد كان عادل جدا مع ما حدث، ولقد تعامل مع هولاء الفنانات بحسن نية شديدة. وقال أن هولاء الفنانات معترف بهن في السودان ويظهرون في الفضائيات السودانية المختلفة ويشاركون في الحفلات المحلية وفي الافراح والمناسبات، فما المانع في سفرهن خارج السودان والمشاركة في أحتفال دولة أخرى. أضاف الاستاذ السر السيد وقال أن نفس الفنانات يسافرن بصورة منتظمة الى دول عربية وفيهن من يقيم في دول عربية ولكنهن لم يواجهون مثل هذا النقد لماذا؟

الاخ دينق,
سلامات.

خارج الموضوع:
انت ما مصدق انا شوفت منو فى الفضائية العراقية قبل ايام?????
هههههههه.
صاحبك و زميلنا فى المنبر محمد حامد جمعة.
عيييييك!!!!!!
و الله لو الكوشى بشيشى لو شاف الحلقة لذهب به الى مستشفى عمليات القلب.
زميلنا ود جمعة استضافته الفضائية للحديث عن القمة العربية الافريقية التى انعقدت فى ليبيا الاسبوع الفائت.
المهم, و للامانة, فقد كان حديثة متزن شئيا و لسسببا ما, فقد ردد مقدم البرنامج كلمة القارة السمراء بكثرة و كلما زكر العراقى القارة السمراء, كان ود جمعة يدنقر راسو تحت بشكل لا إرادى.....
ععييييك.

Quote: و الله لو الكوشى بشيشى لو شاف الحلقة لذهب به الى مستشفى عمليات القلب.

الكوشي بشيشي ؟؟؟؟؟؟؟

نسال الله الثبات........

عزيزي دينق
عادل حتى في كتابتو مشاتر
الله يرحم والده لم يتعلم منه ابدا
ولو بلدنا فيها قانون كثيرين كان دخلوا السجن بسبب هترشاتهم حول هذا الموضوع
فالحين بس في المسكينات ديل و البلد فيها مافيها ولا حد يقول بغم

الاخ دينق
المشكلة انو قبيلة الفنانيين مقسمة ومبعثرة وزى ديل بزيدوا الطين بلة. الحسد والغل واهمه التدخل السياسى الكبير فى العملية الفنية هو اسباب هذا الوهن. ياريت لو قامت نقابة الفنانيين او اتحاد اصحاب المهن الموسيقية بالازم وسعت لحماية اعضائها قانونيا واعلاميا على الاقل
عاطر التحية والشكر

مرييييييييييييييييييييييييييض

عديم تربية

الأخ زكريا


أخونا ما تسمع كلام الجماعة ديل عن موضوع العروبة ده. عروبة ناس محمد حامد جمعة دي غير معترف بها حتى وسط أهل الوسط الشمالي.

وأخونا محمد حامد جمعة كان يعاني عناء شديد مع كتيبة أولاد شندي الخاصة داخل جهاز الامن.

Quote: الكوشي بشيشي ؟؟؟؟؟؟؟ نسال الله الثبات........

ود الباوقة.

نعم أميرنا الكوشي بشاشا. أنت عندك مانع؟

كل ما تنبأ به بشاشا في هذا البورد قد تحقق تماما.

أتمنى عودته للكتابة قريبا.

Quote: عزيزي دينق عادل حتى في كتابتو مشاتر الله يرحم والده لم يتعلم منه ابدا ولو بلدنا فيها قانون كثيرين كان دخلوا السجن بسبب هترشاتهم حول هذا الموضوع فالحين بس في المسكينات ديل و البلد فيها مافيها ولا حد يقول بغم

الأخ حيدر حسم ميرغني.

سلامات.

فعلا إذا كان هنالك دولة قانون في السودان لكان الصحفي عادل سيد أحمد خليفة حوكم على أي كلمة قالها في حق الفنانات.
والعجب لغة الوصاية التي كان يتحدث بها، وكأنه تم تعينه لكي يراقب سلوك الفنانات. الشئ المضحك هنا هو أن هذا الصحفي لا يتجراء أن يكتب على الفساد الجد جد. وهو فساد الحكومة.

دينق سلام
فعلاً كان شي مخجل ان يكون مستوى رئيس تحرير صحيفة وحتى لو صحفي (ساكت) هو بمستوى هذا الـ "عادل سيد احمد"،
والله شي محزن أن يكون أمثال عادل ده هم من يغذون رؤوس القراء في السودان كل صباح بسموم جهلهم وشتارتهم ولغتهم الركيكة وغير المسئولة.
معقول يكون مستوى زي ده صحفي جدير ببطاقة تعريفه وبقيد صحفي؟
والله فعلاً بلد ما ليها وجيع..
وليها الحق صحافتنا تكون غرقانة وحاتلة وما لاقية اليستر جثتها.
،
والغريبة يا دينق،
بعد ما الراجل ده في نهاية الحلقة سخر من الفنانة (مين كده الملازمين) ووصفها بالنكرة وقال فيها ما فيها بجرأة والله انا زاتي حسدتو عليها، جرأة من يعرف بساطة أهلنا وغياب القانون الرادع للمشاترين والمتجرئين على الخلق،
وبعد نهاية البرنامج مباشرة، قدمت القناة أغنية مصورة لذات الفنانة، تجولت فيها بين السهل والجبل، وبين الفيافي والأنهار.. ولا ليها..
كيتاً علي الصحفي "المعروف" والما نكرة "عادل سيد احمد،
وياما في القنوات من مهازل..
،
،

Quote: المشكلة انو قبيلة الفنانيين مقسمة ومبعثرة وزى ديل بزيدوا الطين بلة. الحسد والغل واهمه التدخل السياسى الكبير فى العملية الفنية هو اسباب هذا الوهن. ياريت لو قامت نقابة الفنانيين او اتحاد اصحاب المهن الموسيقية بالازم وسعت لحماية اعضائها قانونيا واعلاميا على الاقل عاطر التحية والشكر

الأخ إبراهيم عبد الحليم.

سلام.

نعم أتفق معك. وواضح جدا أن هنالك فوضى عارمة في عالم الفنانين وفي عالم الصحفاة والاعلام. حيث يسمح للصحفين المقربين للسلطة بحرية الكتابة، في كل شئ ومعاقبة الذين يعارضون السلطة. الطيب مصطفى والان عادل سيد أحمد خليفة مثال حي لذلك. وواضح جدا أن هنالك غيرة عارمة بين الفنانين المختلفين في السودان.

الاخ دينق
ده صحفى اعلانات
الله يرحم الوالد
النار تلد الرماد

فوووق

الاخ دينق

والله كلامك القلتو ده كلو صاح وانا براى كنت بتفرج وبقول يا ربى ده

رئيس تحرير طيب الجداد بيكون شكلهم كيف ؟

والله ده فراش فى جريده ما اشغلو خلى رئيس تحرير

لا يمتلك مقومات الصحفى ولا مقومات اللباقه ولا التقله بتاعت المنصب

المهم هو جاى يجرم ويعلم انه لن يلاحق ..هكذا تكون صلافه المعتدى

ان تعلم انك لن تحاسب مهما قلت ..ولو كان فى اى دوله متحضره كان فلس

بالرغم من انو استشهد باستراليا كثيرا ..ولا ادرى ان كان قد اقام بها ام لا

لكن يقينى انه لم يستفيد من استراليا الا اسمها ومشيتها ..

حقيقى كنت محتار ..معقول ده رئيس تحرير ..وده منصب كبير ما بجى الا بعد عراك

مع الصحافه سنين وخبره حقيقيه وملكه ....

غايتو هو شكلو يا غبيان او ما عارف بيقول فى ششنو او انو عارف ما حا يحاسب

واستشهادو بى عبد القادر سالم ما فى محلو لانو عبد القادر سالم ..تكلم بصوره عامه

وبعدين خلى نفسو حجه فى انو هو ما بيعرف الفنانه دى ..ده زى وردى لمن سالو عن

خوجلى ولا من كده ما عارف وقال ما بيعرفو وما سمع بيهو ...ما فارق المقارنه

والنصيحه ليك انا اصلا ما سمعت بيهو وما شفتو الا اليوم داك ..لكن انا لست حجه

حتى اقول انو الما سمعت بيهو معناتو ما كويس ..لكن غايتو معاينتى للحلقه ورتنى من هو

فقد تكلم ..وقال عمر بن الخطاب لرجل تكلم حتى اعرفك ..فتكلم هذا الاسمو ما بشبه صفتو

فعرفنا من هو ......

غايتو الانقاذ بعد تمشى الا يغربلو السودان ده ويعملو ليهو فورمات من اول وجديد

لان المصطلحات تغيرت 360 درجه فاصبح الحرامى مفتح وشبه الامى وزير

وما عارف ايه رئيس ...وما عارف ايه رئيس تحرير

غايتو انا اصلا شلاقتى خاتنى افتح التلفزيون لقناه سودانيه

القنوات الامريكيه والاوربيه على قفا من يشيل ومفيده وما بتجيب لا ضغط لا سكرى

لكن قالو (ششقى الحال تعتر ليهو قناه سودانيه ) ...

شكرا لملاحظتك الدقيقه وحقيقى حاجه عايزه وقفه وعيدين ....

UP