شوك المُتَاوقهْ في دَلْدَمَاي الروح

لو إستفتا
حقّك تعرف مين الأفتَا
ولو كَرفتّا
ياخ دا مَحَك
ومّفّك يربط صامولة وَعي الذات بالحاصل
أو حيفك حيرة دنياك،
ما بين جِتّه مهندمه جدّاً
مؤتمرات في الصالونات
جريده/ مكيده
وحردَانات
دانات دانات
أو صَحَن الفتّه
في الميلون ميل واحد ذات خَتّه،

***

فلا ينحتّ النيل من شَفة الروح
ولا بالسيل ينجرف البوح
تنساكَ كِدا
سوداني/ يَشرحَك الوتر
بَمْبَر تِحت قطيّه/ يَنشرِح الشَدَرْ
والذاد صدق
مدلّي مِن جيب جبّتَك ينختّ
***
ولو إستفتَا
قِرشِي وقِرشَك
أربَعَه خيل
أربَعَه ناس
وحَنَاسَه وفاس
وحُراب
الكُل في النَقَعَه الفَسَحَه
دْول خيل فازعات
ودْولَ حُراب كُوراكهِن قَال جَاهزات
وَلْد ام
في الدَلْدَمَاي
الجري جايز يومدَاك
لكن ننجو!!؟
الحَرِب إن قامَت ما بننجو،

***

قِرشِي وقِرشَك
العين رَمَّاشهَا بَدمِّع
المليون ميل واحد ذات ختَّه قِنِعْ
واجْوَادنَا طِمِعْ
قِرشِي وقِرشَك
فِكرة صندوق
الصَرفَهْ حتصرُخ بالمافيش
الصَرخَه حتصرُف
قَش ميّت/ بارود/ فحريق
فزَّاعة طير الحِنيَّه
الجَلِد الذات
فَليكُن الغُنَا حِكمَه
الجَلَد الروقَه/ الصبرِ علي ما فات
فالجَاي أحلي.

***

ولو إستفتَا
حَتبكِي التِفْتَهْ
القُفَّه بِرِشْ
سُكْسُك دُردُرْ
ومَهَابة مَتْن الوَاطَه
تَنوّع إثنِي
وكيف نَرضَابَا،
لكن ما نِتغابَا
الرَحَط النْوح
إنفَرَط العِقْد
العُري البَان في الرُوح
ووريدنَا بَلوِّح لعَذابَا،
يوم زول تَشكيلي
غَمَز اللون في صمت الصُورَه
بحاول يعرف
كيف الحَرفِ حَينضَح
يصدَح فيهو سؤال بيشر
لجواب في اللون مدسِّي
(لا وعي الحاجات الغادي)
حايمات سارحات
رغم الإيمان (وَعي الهَسِّي)
لا حولَ مِن الحَايمَات سَارحَات!!؟
لُغة الحريّه/ دِي محبوسَات
لُغة الوطنيّه/ الدِينْ/ ودِي محجوزات
المِحَن الوَقفت بين حرفين
جَلْ.......... غَابه/ دِي مرسومات في المدسِّي
فالغَابَه اتوهَطت الاسود
وبتقْرَا وِرِد الأيَّام
وتقول في السر ما بِرِد ما بِرِد
الدَمْ ما بِرِد الدَمْ ما بِرِد
والجَلابَه
قَالو في الاتر البِنَهَابَا
دْول وَشْمِ عَرَب
التَتغَابَي في العِير
والخير في نَفير غيرهُم
كتَّر نِعَم الأحزان فَضَحت طيرهَم
لا حَولا مِن الحَايمَات سَارحَات
مافي مشاكل مافي مشاكل
زِيفَه تَهمِّل فَزَع الجَايات،
أزرق أبيض
أخضر أحمر
أحلَي الايام بَمْبِي
وكتَر خيرو
علشان مَغْنَاك تَعرِف تَفتِي
فسّر إستِفتَا
بكُنه المعرِفَه بالحِتَه
أو كيف تَخفِي قُبح الأيام.

***

ولو إستِفتَا
الشوق أبيي
قُرْقَابا رَبَط
دَاكَ المَرحَال الأوسط
أولاد كامِل
ومَزَاغنَه
ودينكَا نْقوك،
ما بين الرِيح وصَعيد وَقفَن عودين
بَهَم السُلطَان رَقَصن عادِي
البَابُو فِهِم معنَي تَعادِي
إتفقو وخَتَو العَام في ضَمير الخَاص
أن نعبُر بين الأرضين
فالمُرحال الأوسط وَاحِد،
جايز تختلف الايام
نَقعد تاني
نَنضُم في العَام
والخَاص نقلَع شوكات من فوق رَاسَا.
لكن للسَاسَه خُرم سُوسَه
ضُرس الكيدَات هَدَّم سَاسَا
والفِينا المشهودَه بنَاسَا
نَعَدم حُرَّاسَا ونِبرَاسَا،
أولاد كامِل يَطلعوا برّه
(ديل قالو كِدا)
المِيس يَعدَم مَزغَنِي حَاسَّا
(ديل قالو كِدا)
والدينكَا عموم دْول لينَا عَدو
(ديل قالو كِدا)،
والكَتِل إنصَاب بالمَسْ
الحَرَس الفَرَس
التُكُل المُفرَاكَه عِنْدَهَا إنْدَسْ
لا عَصيده نَلوكَا ولا مويَا
(خِربَتْ خِربَتْ)
قَالو الفُرَّاس
الطائر حلَّق بالمَغْنَي
يا شُوم الحاصِل ليه نِحنَا
ما بمنَعنَا مَعني الايام أن نَحتجَّ
في كون عَاقِل والشَر مجنون،
بَهَم السُلطَان رَقَصن عادِي
البَابُو فِهِم معنَي تَعادِي
لكن نِحنَا لو إستفتَا
نَقعُد ونَرتِّب في المِحنَهْ
في كون عَاقِل
والشَر مجنون.


عاصم الحزين
الخرطوم
سبتمبر 2010

* الدَلدَمَاي هي الفسحه أو الميدان وكذلك النَقَعه.

لكن ما نِتغابَا
الرَحَط النْوح
إنفَرَط العِقْد
العُري البَان في الرُوح
ووريدنَا بَلوِّح لعَذابَا،
يوم زول تَشكيلي
غَمَز اللون في صمت الصُورَه
بحاول يعرف
كيف الحَرفِ حَينضَح
يصدَح فيهو سؤال بيشر
لجواب في اللون مدسِّي

____

شعر ثوري ومعبر

أوعي تظن حرفك فات ومافرقع وواصل





المشكلة سيدو زي بعض الناس

عدمان الشلة

واوعي تكوسها

الله على روحك يا اجمل زول بكتب اشعار
الله على شعرك كم بيرد الروح
الله على زولا كتب الغنوة العبرة الفرحة المنسية
يا نهر الكلمة المخفية اكتبنا كمان

عاصم الخزين سلام

وحاتك كلمه واحده ارد بيها عليك مالقيتا.

ماخليت صرة قديمه ، لامدخور ليوم اسود لا ابيض

لاسحارة منسية ،لا مكان عشمان فيه ،مافتشتوا...

لكن وحات الجمعنا صدفه هنا والكتب لينا

ملاقه فى الخرطوم انا اكثر الناس سعادة ان عدت

الى هذا الملتحد بكل احباطاته، ومعاك البت الاسمها

هند محمد دى وانا شلتكم من يوم عرفتكم بس مالاقى

فيكم كده...

تقبلوا تحيانى وتحيات معجبين كثر اعرفهم يكنون

لكم اكثر من مودتى اضعاف.

كونو بخير دايما،،،،

هند محمد
أهلاً
وأعضك في أنف حضورك الطاعم في فضاء هذا النص،
شكراً لك
و
الشلّه حيرانة دروب لي ناسا
ختي في ساسا حبّة شوق
لتنبت شدره
يمكن تنفك العوارض
والوطن
يكتب لها ف كرّاسا.

سلمي الشيخ سلامه
يا صاحبة الألف نشيد يشير بالروح لجهة إنسانها المشتهي
أهلاً
وأعضك في أنف ما تراكم من حنين لونسة كاربة حدا خور القبّة في عروس الرمال
شكراً لهذا العبور الهائل
وكم أصيب قلمي بهاء سكت بشري الفاضل.
وسلام حتي مطلع الأمر

صديق الموج
المشّاء في مفازات الجمال
أهلاً
وأعضك في أنف الشوق الناطح صخرة إنك مافي وفي
كيفك ياخ
والله الواحد خرمان للأيام ديك بشكل غير
وكت الونسه معرفه والمعرفة بتشير للأجمل دائماً
وسلام حتي مطلع الأمر

عاصم
سلم يراعك

عاصم من طينة المبدعين الذين يتوغلون في ذات المتلقي فيلقى اجابة لك ما يدور في عقله ( المتلقي ) ‘ شعر محكم رواية شعرية او شعر جميل الكلمات آخاذ يشده ترابطا اطار الحكوة او الحكي ... هذا هو عاصم منذ زمن مبدع ( يتقمصك وتتقمصك كلماته )

كم احب شعره وادبه الجم ...
صديقي مشتاقين


تقبل تحيات عزة وسولارا ونورة


اخوك
اسامة الباز

ولو إستِفتَا
الشوق أبيي
قُرْقَابا رَبَط
دَاكَ المَرحَال الأوسط
أولاد كامِل
ومَزَاغنَه
ودينكَا نْقوك،
ما بين الرِيح وصَعيد وَقفَن عودين
بَهَم السُلطَان رَقَصن عادِي
البَابُو فِهِم معنَي تَعادِي
إتفقو وخَتَو العَام في ضَمير الخَاص
أن نعبُر بين الأرضين
فالمُرحال الأوسط وَاحِد،
جايز تختلف الايام
نَقعد تاني
نَنضُم في العَام
والخَاص نقلَع شوكات من فوق رَاسَا.
لكن للسَاسَه خُرم سُوسَه
ضُرس الكيدَات هَدَّم سَاسَا
والفِينا المشهودَه بنَاسَا
نَعَدم حُرَّاسَا ونِبرَاسَا،
أولاد كامِل يَطلعوا برّه
(ديل قالو كِدا)
المِيس يَعدَم مَزغَنِي حَاسَّا
(ديل قالو كِدا)
والدينكَا عموم دْول لينَا عَدو
(ديل قالو كِدا)،
والكَتِل إنصَاب بالمَسْ
الحَرَس الفَرَس
التُكُل المُفرَاكَه عِنْدَهَا إنْدَسْ
لا عَصيده نَلوكَا ولا مويَا

تحياتي عاصم

شكراً لكم جميعاً
سأعود لأرد وأرحب بجميع المتداخلين هنا فرداً فرداً

Quote: علشان مَغْنَاك تَعرِف تَفتِي فسّر إستِفتَا بكُنه المعرِفَه بالحِتَه أو كيف تَخفِي قُبح الأيام

ياصاحب

واصل من هذا المداد...

أخفى عورة الأيام وقبح المساءات الكئيبه..

حرر يديك كما تجود بالأحـــرف معلناً هذا اللوح الوريق..

الأقلام والأحـرف وذاكرتك فى الكتابه وصداقتك وماركس ...

أدهشنا بالمزيد فالأنقياء قلائل...


تقدير تعلمه

أيمن