من هو/ هي

بوست تقوم فكرته على طرح بعض النقاط للتعريف بعضو من أعضاء سودانيز أونلاين دون الإشارة الصريحة إلى إسمه ، وهي طريقة يمكن من خلالها تعريف الأعضاء الجدد على أعضاء سابقين لم يعد لهم نشاط كبير في الساحة وهي بصورة أو أخرى سؤال وتفقد لأحوال كل الغائبين والذي يسجلون غياباً عن المنتدي أتمنى أن تنال الفكرة إعجابكم. بالمناسبة ليست هناك أى جوائز يعني ملح سااااااااكت ، وإلى أول الفرسان في الحيشان:

أستاذ مسرحي وراجل يجبرك على الضحك في بيت البكا ، إلتحق بسودانيز أونلاين في العام 2002م "يعني قبل محرك البحث قوقل" ولديه العديد من الموضوعات والنصوص التي يغلب عليها الطابع الكوميدي حتى في الطرح الجاد ، إنسان بسيط فنان يحب الجميع ويحبه الجميع. يمتلك مكتبه ناصيه ذاخره بالموضوعات الجيدة – مارس الغربة حيناً من الدهر من موضوعاته في المنتدي
- هوي .. والله جنيهنا دا يوم يكتل ليهو زول
- كيف تملأ بوستك ركّاب ؟؟؟؟
- التمثيل والرزيلة
- هووووووووووووووووووي I am not tea boy
غاب ويتواصل غيابه عن المنتدي لأسباب يأتي في مقدمتها إنشغاله بعد عودته الطوعيه إلى الوطن ، متزوج وأب لثلاثة أطفال كان ما يكون زادهم شقي الحال.

يا مُلا .. سلامات
بلا شكـ بدر الدين سيد الشنا!!




التحية ليهو محل ما قاعد!!

شكراً يا ود الصايم يا جميل فعلاً ، هو الزول الشين شديد لمن حلو بدر الدين أبو أواب تصور الزول دا لو موجود في وجودك كان عملتو ثنائي خطير وكان الداخل إلى بوستاتكم والمتواق مجرد متواقه مفقود يا ولدي مفقود مفقود ، وقد قال فيه أهل العوض وهو أحد الأعضاء الذين ترجلوا من المنتدي وكشحوها عكس الهوا:
البدر البفج كُتل الضلام ويوايق
يلصف نورو من بين السحايب رايق
من الوحًدة والحزن الـبعيق ويضايق
ينجيك الكريم دام ، سعدك أرقد فايق
المسدار لأهل العوض