____دنقر للتراب...وصنقع..للسما..

فتاح يا عليم
رزاق يا كريم

هم هم هممه وهوزز سبحته
ودنقر للتراب
هم فوق هما...
صنقع للسما..
وكانت في الجو في غيم..

وكم نجمات بعاد...
وكان الدنيا صيف
لا قالتلو كيف
كيف اصبحت كيف
لا لمسة.. حنان
لا لمسة وداد
لا رمشة طريف من قلب وفي
زي ايام زمان ايام الدفي

وكانت ماها في
كانت في المراح
شدّتلو الحمار
تحلب في الغنم
لي شاي الصباح
والطير ما نضم...
ما رسل..نغم...

وعم عبد الرحيم
اتوكل نزل
في المشرع لقا
زملان الشقا..
الجا من الجريف
والجا من الجبل
علا الناس بخير
صبّح هاظرم
نق نق ناقرم
غاظوه ونعل..
عم عبد الرحيم
ما بخبر زعل
كل الناس هنا
ما بتخبر زعل
تزعل من منو
وتزعل في شنو
كل الناس صحاب
كل الناس اهل
والمهم قراب
قربم العمل

الطاق اليطق
عشكابو الزمن
بالحال العليك
بالفال بالامل

عم عبد الرحيم
كان فلاح في يوم
في وقت الغيوم
علي كيفك تقوم
لا دفتر حضور
لا حصة فطور
تقرع بالقمر
تزرع بالنجوم
لكن الزمن
دوار لا بيدور...

عم عبد الرحيم
ماشي علي الشغل
في الباب القديم
اتعارض تكل
تتشايح جراح
يا..كيف الغسل
الدنياامصباح
تبدا من التكل
من حجة صباح
في حق الملاح
في اللبس الجديد
في القصد القديم
وبيناتم عشم

في الفرج البعيد

امّونه الصباح
قالتلو التعال
والطرح انهرن
ما قالتلو جيب
شيلن يا الحبيب
عشّهن النقلتي
والترزي القريب

بس يام الحسن
طقهن ما بفيد
انطقن زمن
وانطق الزمن
لازمك توب جديد
وبي ميه تمن
غصبا للظروف
والحال الحرن
شان يام الرحوم
ماتنكسفي يوم
كان جاراتنا جن
ماقات لي صفاح
او بيريك نجاح
دا الواجب اذن
وايه الدنيا غير
لمة ناس في خير
او ساعة حزن

عم عبد الرحيم يا ...حر
ماك...حر
يا ريت التمر..
يا ريت لو يشيل
كلي تلات اشر
ولا ايام زمان
كانت ما تمر..
كان ما جاك هوان
ما لاقاكي ضر
كان لا ضقتي ضيق
لاانغرغر صبر
لا شابيت غريق
لا طوّح فقر
كان ما كان
وكان
كان اكسيكي در