###### محتـــرم ..!

###### محترم .. !
عبد الله الشيخ
خط الاستواء
فى النهاية ، أيقنت ، بيان بالعمل،، أننى لا استطيع أن اتضرع، وآخد راحتى فى المشي إلا حين أكون فى نواحى اللاماب ، والجريفات، والكلاكلة ، وانت مشاى غادي ..!
عليك امان الله دي ما ها بلداً تنقعد ،، تمشى فوق النجيلة يقولوا ليك ( ان للنجيلة حق فى العيش الكريم ) ..! ويجرجروك فى المحاكم ..! أوعك تغلط ، النجيلة هنا .. لا تقطف ( زهورك بس تعاين ،، تعاين بى عيونك) ..! أذا اوصلوك المحاكم،، ، يدفعوك الغرامات ، أكان ما عندك قروش قول واطاتك اصبحت ، أكان بقيت مرشح دايرة العيلفون ما بيخلوك إلا يشغلوك، لحدي ما نفسك ينقطع ، الناس دي فى الشغل ما بترحم ،، أكان ما دفعت الغرامة ممكن يغسلوا بيك العدة حتى لو بقيت بى شنبك زي شيخ مشايخ الهواوير..1 ، العدة هنا ما ها صحن وصحنين ،، العدة هنا عدة بيت عرس، أو بيت بكا عديل..!العدة هنا عدة بوش ، بى راسو وقعرو..!
أول مرة اسمع بـ ( حق النجيلة فى العيش الكريم) ..أين حق سليمان سري ( فى اي حاجة)..؟ الكلاب فى البلد دي مدلعة جنس دلع ..! مدلعة اكتر من دلع كتائب المجاهدين فينا ..! أمس مرقت قلت اشوف البلد ،، من فوق الجسر الذي تدار تحته شئون العالم كنت مشدوداً الى ( البنتاغون) جات واحدة ،، (طاشرات) كده ،، جات شششيت ماشة زي التقول البلد ما فوقها راجل ،، زي التقول حماة الثغور ، وحماة العقيدة انكشحوا ، زي التقول اهل النظام العام إتفكفكوا ، أو طفروهم من البلد ديك..!
سألت،، دا شنو ..؟ يا ،، فتاح ياعليم ، ؟ البت دي ما عندها وِليان؟ ال###### مصنقر فوقها ، و مادي ضنبو كمان..!؟ وراكب قدام زي الكانو مسئول قطاع الشباب بمحلية ابوسعد..؟ ؟.. قيل لى ان للكلاب حقوقاً، ، و ان ال###### أبو ضنب ، ابن ال######، عندو اطباء نفسانيين حتى..!
منظر هذا ال###### ( المحترم) يدفعنى الى العودة ،زعلة ساكت من هذا النعيم الذي (هو ) فيه .. علي بالعودة ،و معافرة دولة الكيزان ،، الكيزان يعوسون عواستهم وقد يذهبوا ،، ( ما بعيد علي الله ) ،، لكن دي ما ها بلد .. فى البلد دي أكان قحيت يقولوا لك لازم تمشى الحكيم ، أكان نسيت رقم تبقى واقف فى الصقيعة لحدي ما ربنا يفرجا ،، ( الله خلقنى، ما شفت لى حوش عبارة عن نزلة وطلعة اسانسير..!)
والدفء هنا يضيع بين هوج الرياح .. ( وكتين تنوح ، وتسوي هو..) ما يقلقنى فى هذه البلاد أن كل كائن فيها مشغول بنفسه ،، تلك هي طريقتهم فى أن يجعلوك تعيش حراً..! كل زول مشغول بى حاجاتو ، و.. هناك فى بلدي ( الناس بتعاين للزول اللى بيعاين لى زول تانى..!) ،، .. قال لى (واي) ، وهو شاب لطيف من ولاية جونقلى التى ستنفصل حتماً عن سودان الكيزان فى يناير .. قال لى أن مفتاح هذا البلد أن تصحو فى الصباح لتفعل شيئاً.. !
دعنى اجرب حظي فى هذه الشوارع المتعرجة ..! المشى كداري فى حكم الحرام ..!اذا مررت بأي منهم قل له : (هاي) ، فقد يرد عليك ب(هاي) أخرى ..!، ولا تزيد ، لتقول لها ( الخبر شنو..؟) فقد يعتمدها البوليس نوعاً من التحرش..!
هؤلاء، لا يبنون بناية إلا بعد توسيع اسطبل السيارات .. مربط أفراسهم يمتد أمامى مثل أيام المشروع الحضاري ، والتى ما أن نقول انها تناقصت حتى يقوموا بتركيب شريحة جديدة فى الجهاز..! اين لى بحفظ ارقام واسماء الشوارع،، رقم الغرفة ، اسم البناية ..!؟ لماذ يتوجب علي أن اغشى بين الحين والآخر سلة المهملات القابعة عند كل مدخل .. هؤلاء القوم ، بنوا المدينة بما لا يحتاج الى إضافة.. فى كل حيز يزرعون ،، حين تزحف الخضرة يقصقصون أجنحتها ويكفكفون أطرافها كما تكفكف الرقابة القبلية فقرات خبر من أخبار معسكر كلمة ..! حدائق من كل حجم ولون ، مستديرة ، واسعة ، مستطيلة ، منعرجة ، منفرجة ، كأنهم جعلوها هكذا لكى يضهب الغريب.. (ملاعب جنة ،، لو سار فيها سليمان سري لسار بترجمان )..الشمس تختفى وراء سحاب لا يغادر السماء ، شمس ضنين ، تشع ، لكنها لا تعطى الدفء إلا بمقدار .. شمسهم مثل عجوز قوم أشِحاء، بخلاء ، اذا استبح الاضياف ######هم قالوا لسماءهم الراعفة ( .......) على النار ..!. .. و من يدعو سماء واشنطون لتفعل فعلتها هذه..؟ . انها باختيارها تمطر ، تشكشك ، كما تشاء ،، السماء هنا مثل أحاديث التجييش التى تطلقها أفرع ووحدات النادي الكاثوليكى المبثوثة فى كل مكان من ارض السودان..! هذه الناحية من امريكا ـ واشنطون ـ يبدو انها كانت المحطة الاولى لقوافل اهلي العبيد القادمين من افريقيا،، اشعر بالامان بين هؤلاء ، ابناء جلدتى الذين اصبحوا يلوون عنق الكلام كما يفعل اسياد الشغلة كلها..! .. و ،، لا استطيع ايها السادة أن احدثكم عن النساء ،، النساء هنا ( على كيفهن)..و ،، أي ( كيف) يطفئ غيظ الغربة ..؟ هذا وطن يتهيأ لزفرات النساء ، وتدلبل الاطفال، و تدليك الكلاب..! و،، لله فى خلقه شئون ..!