بصراحه كده ومن غير زعل : الشغل في مجموعة (دال) بالكفاءة؟ ولا بالواسطة؟ ولا بالـ..........؟

؟

عدد من الأصدقاء تخرجو من جامعات أمريكية عريقة وفي تخصصات مختلفة مع خبرة عملية مقدرة في كبريات الشركات الأمريكية ، قدمو السيرة الذاتية عبر موقع مجموعة دال....

وعلي الرغم من إنطباق كافة الشروط ، وإجادتهم التامة للغتين العربية والإنجليزية وبعضهم الإسبانية وموافقة خبراتهم وتدريبهم لل (جوب ديسكربشن) إلا أن الرد أتاهم فورأً أن طلباتهم رفضت عبر أيميلات معدة مسبقاً.

إيه (العوبارة) يا ناس دال؟

هل إنتو فعلاً عايزين تشغلو ناس ليهم خبارت وشهادات ولا القصة مجرد (شو) وخلاص؟

هل إدارة (الهيومن ريسورس) هي من يقدم التوصيات لي صاحب العمل؟ ولا صاحب العمل هو البيقدم المطلوب تعينهم وما علي (الهيومن ريسورس) إلا التنفيذ؟

سلام يا أخ محمد

إنت داير تقول شنو عشان نمشي معاك واحدة واحدة ..

بمعنى تاني إنت بتسأل ولا بتجاوب ؟

موّدتي ،

سلام يا محمد,,
أخوك والله ما شغال معاهم وإن كنت أجزم وأعتقد بأن الكفاءة هى القاسم المشترك الأعظم بمن أعرفه من مجموعات دال,,,
لكن دى بس ما عرفناها شنو

Quote: ولا بالـ..........؟

أفصح يا رجل أفصح!!!!النقط دى تحتمل الكثير هنا!!!

تحياتى,,

Quote: سلام يا محمد,, أخوك والله ما شغال معاهم وإن كنت أجزم وأعتقد بأن الكفاءة هى القاسم المشترك الأعظم بمن أعرفه من مجموعات دال,,, لكن دى بس ما عرفناها شنو

سلامات يا أيمن

إن شاء الله يكون كلامك صاح ، صراحة سبب فتح البوست ده إنو شباب ذوي كفاءات وشهادات وخبرات دخل معي في نقاش طويل حول سوق العمل في السودان ، وسيطرة الوساطات والمحسوبية والولاءات الحزبية والقبلية عليها ، ومدي صحة ذلك ، وكان أن تداخل البعض مسترشداً بهذه المجموعة ، فرأيت أن أطرح التساؤل علنا نجد منهم إجابة.
فعلاً أتمني كلامك يكون صحيح.

سلام وتحايا وإحترام.

Quote: أفصح يا رجل أفصح!!!!النقط دى تحتمل الكثير هنا!!! تحياتى,,

سلام تاني يا أيمن:

فعلاً النقط المقصود منها الإحتمالات الكثيرة التي تحملها وهي السبب المباشر لفتح البوست ، وأراك قد وصلت للمقصود ، أن شاء الله نسمع إجابة شافية.


تحياتي.

Quote: سلام يا أخ محمد إنت داير تقول شنو عشان نمشي معاك واحدة واحدة .. بمعنى تاني إنت بتسأل ولا بتجاوب ؟ موّدتي ،

بسال ، وفي نفس الوقت بسرد وقائع حدثت لشباب ليهم تجربة مع دال.

Quote: عشان نمشي معاك

هل تعمل في دال؟ أو تمثلها؟ أم تداخل فقط؟

حسن بكري
سلام وتحايا.
معليش نسينا نسلم عليك.

تحياتي.

Quote: بسال ، وفي نفس الوقت بسرد وقائع حدثت لشباب ليهم تجربة مع دال.

أول شئ يا أخ محمد السلام سنّة ، وردّو فرض!

السلام عليكم مرة تانية..

طيب ، أنا ما داير أتكلم بي لسان مجموعة دال لاكين علي حسب علمي إنو دال واحدة من المؤسسات البسيطة في البلد دي البيتم إختيار الموظفين فيها بناء على الكفاءة ، وملائمة متطلبات الوظيفة فقط.. وبدون أي واسطات أو محاباة.

والبيقوم بأختيار الأجدر هم قسم الموارد البشرية فقط ، ورئيس مجلس الادارة ما عندو اي دخل بي الموضوع ده.

والدليل علي كده إنو كل الوظائف بتتنشر في الموقع الرسمي لي الشركة.

الشباب الما حالفهم الحظ ديل يمكن مؤهلاتهم ما أوفت بي متطلبات الوظيفة ، أو كان في متقدمين غيرهم كانت مؤهلاتهم اعلى.

.

الأخ الكريم محمد عبدالمطلب

كيف حالك.

قبل الأرشفة بأيام قلائل دار حوار عن أهمية الإعلان في (دال) باللغة الإنكليزية، و كتبت للزملاء بسودانيز أون لاين شيئآ عن تجربتي في (دال) ربما ورد فيه ما يفيد بخصوص مهنية (دال) في مسال التعيين و عدالة الفرص و بعدها عن (ال......)!!، مع أمنياتي لأصحابك بفرص العمل في هذه المؤسسة العظيمة.

Re: على رأس المنبردال تؤكد تقديرها للكفأءات الوطنية وتط...الانجليزى**ماهوالمغز


.

..
.
بالكفاءة ..
ثم الواسطة
ثم الجمال .. وقيل الوجاهة للرجال .. :
الم ترى ملاسي وعماد وعمر عشارى .. ,وخالد كمال ,

-------------

واعتقد ان جميعها لا تنطبق عليك ..
فعش هنئ البال واواصل مسيرة الترحال
قرقر قرقر قرقر
نو هارد فيلنغ ايام جست جوكنغ ..

المقدر الطيب بشير

سلام وتحايا

Quote: الأخ الكريم محمد عبدالمطلب كيف حالك. قبل الأرشفة بأيام قلائل دار حوار عن أهمية الإعلان في (دال) باللغة الإنكليزية، و كتبت للزملاء بسودانيز أون لاين شيئآ عن تجربتي في (دال) ربما ورد فيه ما يفيد بخصوص مهنية (دال) في مسال التعيين و عدالة الفرص و بعدها عن (ال......)!!، مع أمنياتي لأصحابك بفرص العمل في هذه المؤسسة العظيمة.

هل لك أن تحدثنا عن كيفية التعيين؟ أعرف انه من الصعب جداً أن يقول إنسان أن تعيينه كان للمعرفة حتي ولو دور بسيط فيه ، لأن ذلك الدور البسيط هو الذي يفرق بين المتنافسين.

بالطبع لا أود التدخل في شئون المجموعة الداخلية ، ولكن من حق العامة طالما تم الإعلان عن وظائف في موقع عام أن يتعرفو ولو بصورة عامة عن الآلية التي يتم بها التعيين ، وكيفية تقييم السير الذاتية وأولوية التعيين وبعدها عن الـ..........

Quote: الم ترى ملاسي

إنا لله وإنا إليه راجعون.

بالله المذكور أعلاه شغال هناك؟

البعرفو إنو خريج معهد تجاري الإسكندرية ، والأنجليزي بتاعو ما بيفوت ((‎إزز ، وواظ)) قيد أنملة.

إشتغل كيف هناك؟

ياخي والله العظيم طممت بطني ، والشباب ديل يقنعو من خيراً فيها.

..
.

Quote: لبعرفو إنو خريج معهد تجاري الإسكندرية ،

لا كن كدا انت ما عارف حاجة
وما حتشتغل ولا الشباب بتاعينك
ملاسي حامل بكالوريوس إدارة اعمال وماجستير تسويق ..
معهدك دا سنة كم ؟؟


--------------

البطمم بطنك جد انه ملاسي دا الوساطة زاتها
اها لو كدا شوف ليك شغله ولا شركة تانية ..
حرقت ورقكـ

Quote: . بالكفاءة .. ثم الواسطة ثم الجمال .. وقيل الوجاهة للرجال .. :

أها الناس بتقدم دون صور فتوغرافية ، أها بعرفوهم وجهاء؟ ولا وشهم منقرط تربيزة لحام كيف؟

لو صح ما ذهبت إليه ، يبقي فعلاً الكفاءة ماليها دور في الشغلانة ، ولا كيف؟

Quote: لا كن كدا انت ما عارف حاجة وما حتشتغل ولا الشباب بتاعينك ملاسي حامل بكالوريوس إدارة اعمال وماجستير تسويق .. معهدك دا سنة كم ؟؟

أها والإنجليزي؟

Quote: البطمم بطنك جد انه ملاسي دا الوساطة زاتها اها لو كدا شوف ليك شغله ولا شركة تانية .. حرقت ورقكـ

وتيييييييييييب؟

يعني القصة واسطات.

علي كل حال مما قلت لي المذكور شغال هناك : أولاً إتخيلت الناس القاعدة معاهو في مكتب واحد وحجم المأساة الإنسانية اليومية المارين بيها ، بعدين حتة شغال فيها المذكور أعلاه لازم أكون علي بعد الآف الأميال حفاظاً علي المرارة والكبد والمصران الغليظ وغير الغليظ.
خبر الشوم.
غايتو الشباب ديل فيهم عضم شقاوة ، يعني في الدنيا دي ما يقدمو لي شغل غير الفيهو المذكور أعلاه؟
الله معاهم.

Quote: والبيقوم بأختيار الأجدر هم قسم الموارد البشرية فقط ، ورئيس مجلس الادارة ما عندو اي دخل بي الموضوع ده.

سلام يا حسن بكري

هل مسئولي قسم الموارد البشرية سودانيين؟

Quote: هل مسئولي قسم الموارد البشرية سودانيين؟

أغلبهم سودانيين .

..
.

Quote: أها الناس بتقدم دون صور فتوغرافية ، أها بعرفوهم وجهاء؟ ولا وشهم منقرط تربيزة لحام كيف؟

انتو بره ما عندكم مصطلح انتر فيو Interview ولا كيف ؟؟
بس من الورق بتعينو ؟؟
ياخى لا ..

Quote: أها والإنجليزي؟

ونزيدك من الشعر بيت ..
الماجستير حصل عليه من اقوى جامعة تدرس باللغة الانجليزية \فى الوقت الراهن ..

--------------

والله يا ملس بعد الدعاية دى احسن
تشوف لينا نقل وظيفة من هنا لهناكـ ..

Quote: انتو بره ما عندكم مصطلح انتر فيو Interview ولا كيف ؟؟ بس من الورق بتعينو ؟؟ ياخى لا .

زي ما ذكرت فوق إنو في إيميل معد مسبقاً بيرد علي مقدم الطلب علي الرغم من إنو مستوفي الشروط وخبرتو وشهاداتو تطابق شروط الوظيفة المعينة ، يعني الكمبيوتر هو البيرد ليك أتوماتيكياً ، يعني لسه ما بيكون شافو خلقة الزول وقالو ليهو باي باي.

تمام؟

Quote: ونزيدك من الشعر بيت .. الماجستير حصل عليه من اقوى جامعة تدرس باللغة الانجليزية \فى الوقت الراهن ..

صدقني دي حاجة متأكد منها ، (إز وواظ) بس.

Quote: أغلبهم سودانيين .

دي المشكلة هنا.

Quote: دي المشكلة هنا.

!!
المشكلة وين يا محمدفي إنهم سودانيين إذا كانو بالكفاءة والمهنية المطلوية ؟ وده بي الزبط الحاصل .
أنا بأكد ليك إنو زول ما مؤهل تمام ما بيشتغل في دال ، وإذا حصل وإنو إشتغل لي أي سبب من الأسباب صدقني ما بيستمر في شغلو ، لانو الشغل بيتم عبر سيستم متطور جدا وفيهو متابعة لصيقة جدا لي الموظفين عبر التقارير الدورية وغيرها من الوسائل.

Quote: المشكلة وين يا محمدفي إنهم سودانيين إذا كانو بالكفاءة والمهنية المطلوية ؟ وده بي الزبط الحاصل .

المشكلة يا حسن إنو السودانيين بطبعهم عندهم مشكلة المحسوبية ودي مسألة حقيقة وموجودة وصعب التخلص منها ، يعني السوداني لو عندو ولدو ولا ود اختو ولا قريبو ولا جارو ولا صاحبو وهو قاعد في وظيفة زي دي ، يستحيل ما يلعب دور في تعيين الشخص المذكور ، صحيح أنو النظرة دي عامة ولا يجوز تعميمها هكذا لكن واقع الحال هو الذي يفرض علي أن أقول ذلك ، وللأسف كفاءات كتيرة جداً ما قادرة تلقي شغل للسبب ده وبس ، يعني معقولة مسئول الموارد البشرية يكون عندو قريبو بيحمل مؤهل وما يشغلو هناك؟

بعدين كيف يتم تفسير أنو في بعض المتقدمين تم الرد عليهم بواسطة ايميلات معدة مسبقاً رغم استيفاء كل متطلبات الوظيفة ، صحيح أنو يمكن القول ان هناك غيرهم من هم أكثر كفاءة ، لكن كيف تم تحديد ذلك حتي دون مقابلته ومعاينته؟ المسألة فيها كثير من التساؤلات.

Quote: والله يا ملس بعد الدعاية دى احسن تشوف لينا نقل وظيفة من هنا لهناكـ .

أيوااااااااااا!!!!

القصة كده يعني؟

Quote: أنا بأكد ليك إنو زول ما مؤهل تمام ما بيشتغل في دال ، وإذا حصل وإنو إشتغل لي أي سبب من الأسباب صدقني ما بيستمر في شغلو ، لانو الشغل بيتم عبر سيستم متطور جدا وفيهو متابعة لصيقة جدا لي الموظفين عبر التقارير الدورية وغيرها من الوسائل.

أتفق معاك إنو الشغل ممكن متابعتو عبر تقنيات معروفة عالمياً وهي موجودة أكيد في الولايات المتحدة ومعروفة ، لكن دي ما المشكلة ، المشكلة في التعيين في البداية ، لأنو أي زول بيتعين بيخضع لي تدريب لحدي ما يعرف الشغل وبعد داك ما بيكون عندو مشكلة في إنو يأدي عملو علي الوجة المطلوب ، وأي واحد بيتدرب التدريب المناسب سهل جداً أنو يستمر ، فتبقي المشكلة في كيف الزول يدخل رجلو في الأول ، ده مربط الفرس هنا ، وهنا الواسطة تلعب الدور الأعظم.

المشكلة كيف تخش ، الباقي هين.

Quote: الماجستير حصل عليه من اقوى جامعة تدرس باللغة الانجليزية \فى الوقت الراهن ..

ما المشكلة هو متخرج من وين؟ او إتخرج من جامعة بتدرس باللغة الإنجليزية ، المشكلة هل فعلاً المذكور أعلاه يتحدثها ، لأنو أعرف إن إجادة اللغة الأنجليزية تحدثاً وكتابة من شروط التعيين الأساسية ، وكما ذكرت فالمذكور حد علمه لا يتجاوز (إزز ، وواظ) أو (بيرقر كمنجة أمبسلين سيجنال تو) أو كما قال!!!!

Quote: الماجستير حصل عليه من اقوى جامعة تدرس باللغة الانجليزية \فى الوقت الراهن ..

بعدين طريقة التدريس والإنجليزي البيدرسو بيهو في المدارس السودانية والجامعات لا يصلح للتخاطب والتعامل اليومي بتلك اللغة ، يعني هي لغة أكاديمية بحتة لا تقوي علي الصمود في الحياة العملية وفي تسيير دولاب العمل والتعامل مع عملاء أو مخاطبتهم عبر الهاتف أو المكاتبات الرسمية ، ودي واحدة من أكبر المشاكل البتواجه السودانيين ، يعني ممكن وعادي جداً يكون خريج آداب أو تربية لغة انجليزية من السودان وما يقدر يواكب لما يطلع برا ، ويلقي نفسو لازم يبدأ من الصفر عشان يقدر يستمر ، والخواجات بيندهشو جداً لما واحد يقول أنو خريج لغة انجليزية ، أما عن باقي التخصصات فحدث ولا حرج!!!!

Quote: وإذا حصل وإنو إشتغل لي أي سبب من الأسباب صدقني ما بيستمر في شغلو

Quote: الم ترى ملاسي

طالما المذكور أعلاه قدر يستمر , قطع شك مافي زول تاني ممكن يغلبو يستمر!! That's obvious, seriously

Quote: ملاسي حامل بكالوريوس إدارة اعمال وماجستير تسويق .. معهدك دا سنة كم ؟؟

يعني هسه لو قدم زول يحمل درجة الماجستير من جامعة أمريكية أو بريطانية في نفس التخصص مع خبرة في نفس المجال من الدول المذكورة مع أجادة تامة للغة الإنجليزية ، الأفضلية لسه حتكون للمذكور أعلاه واللي هو فعلاً شغال هسه هناك؟

شفييييييييييياراقيل!!إهههههههههههههي؟؟

الكلام ده قولو لي زول لابس قميص فراشات!!!!!

اخونا محمد إزيك
وبصراحة كدا ومن غير زعل برضو
مجموعة دال من الشركات المفخرة
دا بشكل عام وبشكل خاص وفيما يخص الموضوع اعرف عدد من شاغلى وظائف دال
الكفاءة وتميز كل فى تخصصه كانت بوابتهم لولوج عالم دال الفخيم

طلبات التوظيف مرات كدا الزول بكون شايف نفسو مستوفى تماماً
خصوصاًالناس البقدمو من برا البلد او الطولو كانو برا
ويجيك شرط صغيرونى كدا بتاع الخدمة الوطنية يخلى المسج الفورية بالرفض تصلو
قبال مايصل الطلب السودان زاتو
وطبعاً الزول بكون شايف نفسو مكمل الشروط والمواصفات وانجليزى يحير سام بذات نفسو

المهم يازول دال دى شركة محترمة وياريت يكون فى زيها كتيير

Quote: ويجيك شرط صغيرونى كدا بتاع الخدمة الوطنية يخلى المسج الفورية بالرفض تصلو قبال مايصل الطلب السودان زاتو

سلام يا أحمد

بصفة عامة: الشرط ده غير موجود في متطلبات أي وظيفة ، ده غير إنو معظم المتقدمين من خارج السودان بيحملو جوازات دول أجنبية ولا يخضعو لذلك الشرط.

أما بصفة خاصة : معظم الشباب الإشتكو من المشكلة دي لم تكن هناك أي شروط غير مستوفاه ، بل علي العكس كانت مؤهلاتهم موافقة بل مفصلة عليهم ، لكن كان الرد التلقائي بواسطة الكمبيوتر.

ثالثاً : في بعض الأسماء لما عرفت إنها تعمل هناك ، كانت مؤشر كافي لي إنو دال ليست إستثناء من ما يحدث في غيرها من المؤسسات.

شكراً.

Quote: دال

اسم يتردد وثقة تجدد

انا لله وانا اليه راجعون

Quote: !بعدين طريقة التدريس والإنجليزي البيدرسو بيهو في المدارس السودانية والجامعات لا يصلح للتخاطب والتعامل اليومي بتلك اللغة ، يعني هي لغة أكاديمية بحتة لا تقوي علي الصمود في الحياة العملية وفي تسيير دولاب العمل والتعامل مع عملاء أو مخاطبتهم عبر الهاتف أو المكاتبات الرسمية ، ودي واحدة من أكبر المشاكل البتواجه السودانيين ، يعني ممكن وعادي جداً يكون خريج آداب أو تربية لغة انجليزية من السودان وما يقدر يواكب لما يطلع برا ، ويلقي نفسو لازم يبدأ من الصفر عشان يقدر يستمر ، والخواجات بيندهشو جداً لما واحد يقول أنو خريج لغة انجليزية ، أما عن باقي التخصصات فحدث ولا حرج!!!!

جينا تانى للكلام الفارغ.
من الصفر عديل كده? كونك بديت من الصفر ما معناها اى زول طلع من السودان بدا من الصفر.
بعدين دال شركة خاصة....يعينوا ذى ما عاوزين. خلاص فى البورد ده بقى ما فى شغلة غير دال.
بعدين ما اى زول جاى من امريكا معناها مؤهل.
لو كانت دال تعيين بالواسطات بس....ما كانت نجحت كل النجاح ده. و لو كان التعيين بالواسطات بيعمل كل النجاح ده (ما شاء الله) احسن ليهم يواصلوا فى واسطاتهم دى

Quote: اسم يتردد وثقة تجدد انا لله وانا اليه راجعون

كلام والله ، مع إنو ما فهمنا أي حاجة!!

Quote: جينا تانى للكلام الفارغ. من الصفر عديل كده? كونك بديت من الصفر ما معناها اى زول طلع من السودان بدا من الصفر. بعدين دال شركة خاصة....يعينوا ذى ما عاوزين. خلاص فى البورد ده بقى ما فى شغلة غير دال. بعدين ما اى زول جاى من امريكا معناها مؤهل. لو كانت دال تعيين بالواسطات بس....ما كانت نجحت كل النجاح ده. و لو كان التعيين بالواسطات بيعمل كل النجاح ده (ما شاء الله) احسن ليهم يواصلوا فى واسطاتهم دى

ظكية الظكية ،،،،

كلامي المتواضع ده ما بيفهموهو ناس أظكياء زيك ، كلامي ده مكتوب بي لغة يفهمها الناس عاديي الذكاء ، فبالله الكلام الفارغ ده ما مفروض يشغل سعادتكم وجنابكم العالي ، كما لا ينبغي لعظيم سلطانكم أن ينزل من علياءه ليجادل البسطاء من عامة الشعب.

إنت عايشة عمرك ده كلو أصلو مالاقاكي سوداني خريج جامعات سودانية جا أمريكا وبدأ من الصفر؟ بعدين هل من العيب إنو الزول يبدأ من الصفر؟ وهل سعادتكم بيفترض إنو كل مخاليق الأرض من السودانيين أذكياء مثلك ومسمين أنفسهم ((إسمارت أنا أندر إسكور الفين وواحد))؟

بعدين يا ظكية الظكية : منو قال ليكي أنا بديت من الصفر؟ ومن قال ليك أني بديت من أساسو؟ ولا ده نوع جديد من العبقرية لسه اللي زي حالتنا ما حصلها؟

يا ظكية الظكية عايني:

يعني أفتح بوست يقوم يجيني المدعو حسين فلاسي ناطي يفك فينا الحنك العاضي بتاع "شفت أسم إسمارت إتشجعت ودخلت" ، تاني أقوم أفتح البوست ده يجي متداخل يجيب سيرة المدعو فلاسي طوالي تجي إنتي ناطه؟ ده شنو ده هو؟

قسس لكن!!

بالله البوست ده أكسري فيهو ركبة وما تطلعي منو كلو كلو ، بالله بالمرة كده أدي المدعو فلاسي لكزة كده عشان يجي ينطط هنا ويرمي الشويتين بتوعنو و تتم الناقصة ، سمح؟

هسه الكبكابات ، وعصابة حمادة وتوتو حيجو طايرين ويرمو الفيها النصيب ويمشو!!

إيه العالم دي؟
من أين أتي هؤلاء؟

Quote: بعدين دال شركة خاصة....يعينوا ذى ما عاوزين. .

وتييييييييييييييب؟

والله فعلاً ؛ ومن الذكاء ما قتل!!

Quote: . خلاص فى البورد ده بقى ما فى شغلة غير دال.

ياعزيزي القارئ بالله ممكن أسالك سؤال (طفاشي) كده؟

إنت ظكية الظكية دي بقت الناطق الرسمي بإسم دال ونحن ما عارفين ولا شنو؟



إيه العالم دي؟
من أين أتي هؤلاء؟

براحة....ما يطق ليك عرق و لا حاجه.
اهو انا مارقه من هنا و ما جايه تانى.

Quote: براحة....ما يطق ليك عرق و لا حاجه. اهو انا مارقه من هنا و ما جايه تانى.

ده كلام ساكت ، المره الفات قلتي طالعة وما جاية ، قمتي كسرتي ركبة في البوست بتاعي لمن حردتو.

والله لو عملتي كده ليك جايزة عبارة عن كلمات متقاطعة خاصة بصحيفة عالم الأذكياء!!

صفقو ليها يا أولاد قالت ما جاية تاني.

صفقة قوية لي ظكية الظكية :

بعد الصلاة على رسول الله


يبدو إن الشركة دي تعتبر من أفضل الشركات في السودان لكن المشكلة هي مشكلة بتاعت تواصل مع المتقدم

ودي ثقافة ما موجودة في عالمنا العربي ، الواحد بيعتبر نفسو أكثر من موهل لكن شغل بواسطة ما عايزه والله الغني

مسالة الخبرة د ما قدر أفهمها ، مع احترامنا الشديد لخريجي السودان ، لا توجد مقارنة مع الناس الدارسة في الخارج

لو ربنا قاسم لينا ، بجينة الشغل لحدي عندنا لانو والحمد لله الواحد حيقدم ليهم حاجات كتيرة

ما جانا ايميل الرفض ده ، ولا جان ايميل من أساسو، حاجة غريبة شوية

أنصحك يا زول ، كل على الله ، لكن مداهنة ، وتلفونات دي أنا ما زوله تب


في أمان الله

Quote: بعد الصلاة على رسول الله يبدو إن الشركة دي تعتبر من أفضل الشركات في السودان لكن المشكلة هي مشكلة بتاعت تواصل مع المتقدم ودي ثقافة ما موجودة في عالمنا العربي ، الواحد بيعتبر نفسو أكثر من موهل لكن شغل بواسطة ما عايزه والله الغني مسالة الخبرة د ما قدر أفهمها ، مع احترامنا الشديد لخريجي السودان ، لا توجد مقارنة مع الناس الدارسة في الخارج لو ربنا قاسم لينا ، بجينة الشغل لحدي عندنا لانو والحمد لله الواحد حيقدم ليهم حاجات كتيرة ما جانا ايميل الرفض ده ، ولا جان ايميل من أساسو، حاجة غريبة شوية أنصحك يا زول ، كل على الله ، لكن مداهنة ، وتلفونات دي أنا ما زوله تب في أمان الله

دي برضو واحدة من المشاكل اللي قصدت أتكلم عنها ، والحمد لله جا مثال حي عشان الناس تفهم إنو فعلاً البوست بيحاول يضع تساؤلات مشروعة.

يا ريت توري الناس مؤهلاتك ومن أي كلية؟ وأي جامعة؟ ونوع التخصص.

سلام.

اخوك ، أعوذ بالله من كلمة أنا
خريج بكالريوس هندسة كهربيه ، نورث كارولينا ، الولايات المتحدة
خبره حوالي 4 سنين في في مجال البترول مع شركة شل، تكساس

يعني عملنا يتركز في أدارة المشاريع والأشراف التقني
وتقديم الدعم الفني بالنسبه لمشاريع الجديدة خاصة في مجال أنابيب البترول ، تمديد ، توسعة الخطوط

Quote: خريج بكالريوس هندسة كهربيه ، نورث كارولينا ، الولايات المتحدة خبره حوالي 4 سنين في في مجال البترول مع شركة شل، تكساس

وجه سوداني مشرق يشرفنا كلنا ، يستحق ان يجد موضع قدم ، ليس هذا فحسب ، بل إنه سيترك كل الإمتيازات في أرض الأحلام ليقدم شيئاً لوطنه ، ولكن هل سيجد موضع قدم في عالم الوساطات؟

حاجة تفقع بجد!!

موفق بإذن واحد أحد ، وما التوفيق الإ من عند الله.

كل الأمنيات أن تجدك الفرصة التي تستحقها هي ، فأنت الذي تسعي الفرصه إليه.

سلام يا محمد,,

Quote: فتبقي المشكلة في كيف الزول يدخل رجلو في الأول ، ده مربط الفرس هنا ، وهنا الواسطة تلعب الدور الأعظم. المشكلة كيف تخش ، الباقي هين.

قاعدة يدخل رجلو دى بالمناسبة ما بتشتغل فى كل الأحوال!!! وإذا كنت أصلا غير مؤهل ولا تملك المقدرة الكافية على الصمود فى ظل وجود نظام عمل ضاغط وقوى ومتطور يحتاج إلى مقدرات ذاتية كافية زيادة على المقدرة على تطوير ما تملك من مقدرات خاصة ومؤهلات علمية ,, اللغة الإنجليزية عامل مهم ومساعد على كل ما سبق وعامل تميز أيضا والحقيقة أن عامل اللغة أصبح عامل أساسى لنيل بعض الوظائف نسبة لمحدودية إستعمال العربية فى المعاملات خاصة العالمية منها ولا تنسى إنهيار التعليم عندنا مؤخرا والضعف الأكاديمي لخريجي الجامعات السودانية فلا يعقل أن يتخرج أحدهم من قسم الترجمة وهو لا يجيد تركيب جمل إنجليزية بسيطة ولا يمكن أن نصدق بسهولة أن طالب خريج هندسة نفط تقول أوراقه أنه كان طالبا متميزا جدا وأوراقه وشهاداته تشهد ولكن للأسف هذا المتميز جدا يرتجف ولا يمكنه التواصل فى بيئة عمل بغير اللغة العربية وهو شئ أكيد مؤسف,,,
بعدين مافى جديد فى الموضوع الوساطات والولاءآت ,,, فقد أصبحت هى الأساس فى سوق العمل , نعم ليس فى كل المؤسسات خاصة القطاع الخاص وأخص هنا المتطور منه فحتى لو وجدت فيه الوساطات ولكنه لن يخسر بسببها والمتمكنين والموهوبين والمؤهلين أيضا لهم وزن وأفضلية,,,

بعد ما يساعدوك تدخل رجلك ويدك وراسك كان بقيت زولا نئ ولم تدرج وتساعد نفسك وتطور إمكانياتك ستنزل فى أقرب محطة ,,,إنت عايز تقول أنو دال بتوظف أبناء الأسرة والأهل والعشيرة والقبيلة ؟؟؟؟ رغم عدم صحة الكلام تماما ولكن نوعا ما لا أرى أى سوء أو عيب فى الموضوع لو كان صحيحا ويحدث فعلا ولكن العيب والخطأ أن يكون هذا هو ما يحدث تماما فى مؤسسات الدولة الحكومية التى يفترض أن تعامل كل أبناء الوطن على السواء فالولاء والجهوية هى المؤهل الكبير للعمل هناك والقاعدة هى الولاء قبل الأداء وقبل كل شئ,,,

تحياتى,,

Mohamed Abdelmotalib Hassan
سلام

Quote: المشكلة يا حسن إنو السودانيين بطبعهم عندهم مشكلة المحسوبية ودي مسألة حقيقة وموجودة وصعب التخلص منها ، يعني السوداني لو عندو ولدو ولا ود اختو ولا قريبو ولا جارو ولا صاحبو وهو قاعد في وظيفة زي دي...

المحسوبية دي مشكلة السودانيين براهم والا كل شعوب الارض بتعاني من الكلام ده و كل المنظمات الدولية من الامم المتحدة و انت نازل مليانة بمحسوبية تقول اخير منها بتاعتنا نحن السودانين

لماذا لانحاول ان نلقي كثير من الضوء علي الجوانب المشرقة في دال وغير دال من المؤسسات الناجحة ؟؟؟؟ في بلاد كالسودان حيث مؤسسات كدال قليلة لماذا لا نساهم باضعف الايمان وهو كثرة ترديد ما بها من جيد حتي تقتفي الاخريات الاثر ؟؟؟؟؟

مودتي

Quote: قاعدة يدخل رجلو دى بالمناسبة ما بتشتغل فى كل الأحوال!!! وإذا كنت أصلا غير مؤهل ولا تملك المقدرة الكافية على الصمود فى ظل وجود نظام عمل ضاغط وقوى ومتطور يحتاج إلى مقدرات ذاتية كافية زيادة على المقدرة على تطوير ما تملك من مقدرات خاصة ومؤهلات علمية

سلام يا أيمن

زي ما قلت إنو عملية الإستمرارية هي عملية ليست بالعسيرة ، خاصة لي زول عندو المؤهلات المطلوبة وبصفة أخص إذا ما كان العادي مجزي ، بطبيعة السودانيين ، متي ما وجد عمل مشجع فهو يتمسك به ويجتهد ويطور نفسه للأستمرار والمنافسة لذلك دائماً وأبداً المشكلة في كيفية الوصول ، وكما ذكرت أيضاً الفترة التدريبية في البداية لها دور كبير ويمكن لكل شخص أن يستمر بعدها ويطور نفسه بدون مشاكل ليظل السؤال دائماً وأبداً كيفية الدخول.

تحياتي.

Quote: بعدين مافى جديد فى الموضوع الوساطات والولاءآت ,,, فقد أصبحت هى الأساس فى سوق العمل , نعم ليس فى كل المؤسسات خاصة القطاع الخاص وأخص هنا المتطور منه فحتى لو وجدت فيه الوساطات ولكنه لن يخسر بسببها والمتمكنين والموهوبين والمؤهلين أيضا لهم وزن وأفضلية,,,

طبعاً الكلام ده إذا صح فهي الأجابة التي يبحث عنها بعض الشباب عن مجموعة دال ، وهو موضوع هذا البوست.

شكراً.

Quote: إنت عايز تقول أنو دال بتوظف أبناء الأسرة والأهل والعشيرة والقبيلة ؟؟؟؟ رغم عدم صحة الكلام تماما

ده كلام مهم جداً ، وفعلاً زي ما قلت فوق إنو دي المكشلة اللي حاول البعض نفيها ، وأحمد لك إنك وضعتها هكذا وبكل شجاعة فليس هناك أفضل من الإقرار بوجود مشكلة معينة فهي أولي الخطوات نحو الأتجاه الصحيح.


سلام.

سلام ياولدنا

انا اديك الثابتة

عندي تلاتة من اصحابي شديد شغاليين في دال

اتنين منهم مؤهلين بالجد

التالت ده شغل واسطة سااااااي لكن واسطتو ......انسى بس

حسب كلام واحد منهم

معظم الوظائف التاهيل شرط اساسي
لكن الواسطة تدخل عندما يتساوى المؤهلون...

في وظايف تانية زي السكرتارية ووظائف ادارية غير فنية هنا الواسطة ممكن تلعب دور وعادة الوظائف دي لايعلن عنها

اما بخصوص صالات العرض والشوو رووم

فدي اسمحلي بس ما بقدر اواصل اكتر من كده..

سلام

Quote: ده كلام مهم جداً ، وفعلاً زي ما قلت فوق إنو دي المكشلة اللي حاول البعض نفيها ، وأحمد لك إنك وضعتها هكذا وبكل شجاعة فليس هناك أفضل من الإقرار بوجود مشكلة معينة فهي أولي الخطوات نحو الأتجاه الصحيح.

انا من ذات اسرة ممتدة تجمعني باصحاب دال واؤكد ان العمل في دال ليس كذلك لاهل وعشيرة ..الخ .. فليتقدم واحد من الذين يعملون في دال ويكتبون هنا في هذا المنبر ويجيب علي هذا ؟؟ فمهما قلت وحيث بينت مالي من صلة ابقي متحيزا حتي ولو لم اكن (وهذا حقيقي ) ؟؟؟ في مجموعة شركات يعمل بها عدة الاف من كل اطراف السودان وخارجه اكييد يكون بينهم نوبيون فهم من شعوب السودان وما اصحاب دال الا من اسرة نوبية واحدة ...
لا عشيرة ولا قبيلة للنوبيين وانما اسر ممتدة متعددة فمن هو شيخ عشيرتنا وقبيلتنا ؟؟؟؟

Quote: سلام ياولدنا انا اديك الثابتة عندي تلاتة من اصحابي شديد شغاليين في دال اتنين منهم مؤهلين بالجد التالت ده شغل واسطة سااااااي لكن واسطتو ......انسى بس حسب كلام واحد منهم معظم الوظائف التاهيل شرط اساسي لكن الواسطة تدخل عندما يتساوى المؤهلون... في وظايف تانية زي السكرتارية ووظائف ادارية غير فنية هنا الواسطة ممكن تلعب دور وعادة الوظائف دي لايعلن عنها اما بخصوص صالات العرض والشوو رووم فدي اسمحلي بس ما بقدر اواصل اكتر من كده.. سلام

تسلم يا حبيب

ده كلام مهم جداً ، فعلاً فوق قلت إنو في بعض الأسماء اللي عرفت إنها تعمل هناك ، خلتني أقتنع أنو دال كغيرها ليست إستثناء من الوساطات والمحسوبية والـــ......... ، يا ريت ناس دال يجو يدلو بدلوهم لأنوالكلام دخل الحووووووووش!!
شكراً.
وتييييييييييب؟

Quote: لكن الواسطة تدخل عندما يتساوى المؤهلون...

ودي هي المعضلة الكبري ، لأنو بالتأكيد كل من يتقدم لوظيفة معينة ستكون مؤهلاتهو مطابقة لمتطلبات الوظيفة ، وبالتالي سنجد في النهاية مجموعة من المتنافسين في درجات متقاربة جداً وهنا يأتي دور الواسطة وهو ما تفضلت أنت به ، وهو رأي سديد ووجهة نظر صائبة.

شكر لإيراد هذه النقطة الجوهرية الحاسمة.

سلام.

Quote: فليتقدم واحد من الذين يعملون في دال ويكتبون هنا في هذا المنبر ويجيب علي هذا

لا أدري ما لسبب في تخوف البعض منهم في الإدلاء بإفادات في هذا الصدد ، اللهم الإ إذا هناك أمر يتخوفون منه ، أو أن ماذكر في هذا البوست هو الحقيقة ولا رغبة لهم في الدخول في متاهات كهذه ،
أو قد تكون هناك تفسيرات أخري!!

ننتظر ونري.

سلام تانى يا محمد,,

أعيد جزء مما كتب سابقا هنا وأرجو قراءته كاملا وليس منقوصا,,,

Quote: إنت عايز تقول أنو دال بتوظف أبناء الأسرة والأهل والعشيرة والقبيلة ؟؟؟؟ رغم عدم صحة الكلام تماما ولكن نوعا ما لا أرى أى سوء أو عيب فى الموضوع لو كان صحيحا ويحدث فعلا ولكن العيب والخطأ أن يكون هذا هو ما يحدث تماما فى مؤسسات الدولة الحكومية التى يفترض أن تعامل كل أبناء الوطن على السواء فالولاء والجهوية هى المؤهل الكبير للعمل هناك والقاعدة هى الولاء قبل الأداء وقبل كل شئ

,,,لا تنسى أن دال فى النهاية تبقى مؤسسة قطاع خاص ولكن لا أحد ينكر خيرها وفضلها على البلد وعلى قطاعات كبيرة من أبناءه وبيوت كثيرة مفتوحة من كل أنواع الوظائف والأعمال,, وكما قال لك ألباشمهنس أبوبكر اللغة الرسمة داخل دال ليست اللغة النوبية يا محمد!!!!فلنحاسب كل جهات العمل العامة وبعدها نشوف الخاص!!!

ما قدمه داؤود عبداللطيف للسودان لا ينكره أحد, فقد فضل كثر غيره إستثمار أموالهم فى العقارات وبعض الإستمارات الخجولة وغيرهم سرق ونهب المليارات وتوجه صوب المطارات و>هبوا يغسلونها فى عواصم الدنيا,,,

تحياتى,,,,,,

أخ محمد

انا عملت في دال مرتين .. الاولي لمدة سنة

والثانية لمدة اربعة سنوات وفي المرتين كانت

الكفاءة هي المعيار ..

Quote: ما قدمه داؤود عبداللطيف للسودان لا ينكره أحد, فقد فضل كثر غيره إستثمار أموالهم فى العقارات وبعض الإستمارات الخجولة وغيرهم سرق ونهب المليارات وتوجه صوب المطارات و>هبوا يغسلونها فى عواصم الدنيا,,,

أكيد كل من قدم للسودان يجد منا كل إمتنان وتقدير ، لكن لا يمنع هذا مناقشة ظاهرة سلبية حتي تعم الفائدة وإصلاح ما يمكن إصلاحه ، وفي نفس الوقت وجود تجاوزات في القطاع العام الحكومي ليس بسسب كافي لغض الطرف عنها إذا ما حدثت في دال.

علي كل أنا قرأت مداخلتك كاملة وفهمتها ، وأعيد مع التأكيد بوجود الكثير في المؤسسات الأخري فالمعني هذا البوست مجموعة دال.

سلام.

Quote: !فلنحاسب كل جهات العمل العامة وبعدها نشوف الخاص!!!

سلام يا أيمن

مع أكيد احترامي لوجهة نظرك لكني أختلف معها جملةً وتفصيلاً ، فالمشكلة ليست التفريق بين القطاعين الخاص والعام ولكن هي مشكلة تهم الشباب السوداني المؤهل الباحث عن الفرصة العادلة أينما وجدت.

Quote: لانو الشغل بيتم عبر سيستم متطور جدا وفيهو متابعة لصيقة جدا لي الموظفين عبر التقارير الدورية وغيرها من الوسائل.

كااااااااااك ياحسن بكري

!

Quote: أخ محمد انا عملت في دال مرتين .. الاولي لمدة سنة والثانية لمدة اربعة سنوات وفي المرتين كانت الكفاءة هي المعيار ..

أخ بخاري سلام وتحية

تصدق مما عرفت إنو المدعو مين كده فلاسي شغال هناك عرفت أنو الموضوع فيه "كوسة" لا تخفي علي عين ، فمعرفة المذكور باللغة الإنجليزية كعلمي بلغة الطير ونقيق الضفادع!

Quote: المحسوبية دي مشكلة السودانيين براهم والا كل شعوب الارض بتعاني من الكلام ده و كل المنظمات الدولية من الامم المتحدة و انت نازل مليانة بمحسوبية تقول اخير منها بتاعتنا نحن السودانين

مدثر صديق

سلام

قاتل الله المحسوبية أينما حلت!

Quote: كااااااااااك ياحسن بكري

الكاكاية الكبيرة دي ، وراها حاجايا كبيرة!!

Quote: لماذا لانحاول ان نلقي كثير من الضوء علي الجوانب المشرقة في دال وغير دال من المؤسسات الناجحة ؟؟؟؟ في بلاد كالسودان حيث مؤسسات كدال قليلة لماذا لا نساهم باضعف الايمان وهو كثرة ترديد ما بها من جيد حتي تقتفي الاخريات الاثر ؟؟؟؟؟ مودتي

لا يأس من فتح بوستات تتحدث عن الجوانب المشرقة في دال ‎- إن وجدت ‎- وفي ذات الوقت لا يمنع ذلك من إلقاء الضوء علي مسالة هامة وجوهرية تقف عائقاً أمام كثير من الكفاءات السودانية الواعدة والتي لا تملك إلا قدرات هائلة علي العطاء المصحوب بشهادات ومؤهلات عالية ، لكن في نفس الوقت لا يمكلون في هذه الدنيا واسطة تقيهم شر البطالة.

رغم ان دال هي لاسرة نوبية فانا لا علم لي بان اداراتهاواقسامها يراسها نوبيون فقط وانما الذي سمعت عنه ان معظمهم من شعوب السودان المختلفة فلذا تنتفي وصمة القبلية والجهوية والعشيرة النوبية في التعيين ....دال وصلت ما هي عليه باعتمادها علي الكفاءات وليس الوساطات....

]

Quote: رغم ان دال هي لاسرة نوبية فانا لا علم لي بان اداراتهاواقسامها يراسها نوبيون فقط وانما الذي سمعت عنه ان معظمهم من شعوب السودان المختلفة فلذا تنتفي وصمة القبلية والجهوية والعشيرة النوبية في التعيين ....دال وصلت ما هي عليه باعتمادها علي الكفاءات وليس الوساطات....

نتمني ذلك.

.

Quote: هل لك أن تحدثنا عن كيفية التعيين؟ أعرف انه من الصعب جداً أن يقول إنسان أن تعيينه كان للمعرفة حتي ولو دور بسيط فيه ، لأن ذلك الدور البسيط هو الذي يفرق بين المتنافسين.

سلام يا أخي الكريم محمد...كيفك
يبدو إنك ما قريت اللينك كلو..لأني تعرّضت لتعييني و أنه كان من الإعلان في الصحيفة للمعاينات للمكتب..بدون المرور بأي معرفة، و لو بسيطة، و أزيدك من الشعر بيت، أنا بدخل أي معاينة بإحساس إنو هذه المؤسسة محظوظة جدآ لتفكيري فيها، يشمل ذلك الخارجية الأمريكية و البيت الأبيض!! و قد تقدّمت لكليهما و أضاعا فرصة تعييني!
تعرف يا حبيب مافي شيء جابنا الأرض غير التواضع الصوفي الذي نرتكبه على الدوام..
أذكر أنني أجبت على السؤال التقليدي
Why shoul DAL hire you
بإجابة ضحك منها مستر إيهاب داؤود كثيرآ...و هي
DAL is the best in town and they should hire the best arround !!أها رايك شنو في ما تحته خط؟..دة يبقى أنا...

تفتكر زول بيفكر بالطريقة دي عاوز ليهو واسطة أو معرفة؟

.

الاخ محمد تحية
انطلقت في تسأولك من ان بعض من تعرفهم لم يتم استيعابهم في وظائف تعتقد انهم مؤهلين لها..ولكنك لم تضع في اعتبارك انهم ربما كانت لديهم مؤهلات اعلى من المطلوب للوظيفة المعنية..وحسب علمي فان الشركات المحترمة تحدد الراتب حسب مؤهلات الشخص والخبرة..
ثانيا بالنسبة للغة الانجليزية لا اعتقد ان كل الوظائف تتطلب الالمام الكامل بها..فمظم التعاملات داخل البلد تتم بالعربية (وهذه لاتستطيع انكارها على الاخ ملاسي)
لا اعرف دال كثيرا ولكني تعاملت مع بعض فروعها واشهد انها لم تكن اقل من المؤسسات الاوربية.
علي العموم سؤالك مشروع ونرجو ان تجد اجابته

بعيداً عن دال ..
حسين ملاسي يجيد الإنجليزية تحدثاً و كتابة .. و بطلاقة .

تحياتي .

سأعود للتعليق علي كل مداخلة لاحقاً، ولكن قبل ذلك أقول الآتي :

بعد كتابة هذا البوست بناء علي نقاش تم بيني وبعض الأصدقاء ، وكانت النقطة الجوهرية التي دار حولها البوست وهي أن هناك إيميلات معدة مسبقة ترد علي المتقدمين وغالباً في التو واللحظة ، ثم في مناقشة لاحقه عرفت إن المجموعة تداركت الأمر الذي برر بأن ما حدث كان مجرد مسألة تقنية بحته غير مقصودة حدثت مع عدد قليل من السير الذاتية وقد تم تدارك الأمر ، وهو ما أكده نفس الأصدقاء المذكورين.

شخصياً وجد هذا الرد وتلك الإستجابة مني كل الأحترام والتقدير.

حظاً أوفر وموفق للجميع ، والشكر أيضاً موصول للجميع.

Quote: سلام يا أخي الكريم محمد...كيفك يبدو إنك ما قريت اللينك كلو.. تعرف يا حبيب مافي شيء جابنا الأرض غير التواضع الصوفي الذي نرتكبه على الدوام.. أذكر أنني أجبت على السؤال التقليدي Why shoul DAL hire you بإجابة ضحك منها مستر إيهاب داؤود كثيرآ...و هي DAL is the best in town and they should hire the best arround !!أها رايك شنو في ما تحته خط؟..دة يبقى أنا... تفتكر زول بيفكر بالطريقة دي عاوز ليهو واسطة أو معرفة؟

الأخ الطيب سلام
فعلاً ما قريت اللنك ، شكراً علي المعلومات الضافية ، كل الأمنيات بالتوفيق دائماً.

سلام.

Quote: الاخ محمد تحية انطلقت في تسأولك من ان بعض من تعرفهم لم يتم استيعابهم في وظائف تعتقد انهم مؤهلين لها..ولكنك لم تضع في اعتبارك انهم ربما كانت لديهم مؤهلات اعلى من المطلوب للوظيفة المعنية..وحسب علمي فان الشركات المحترمة تحدد الراتب حسب مؤهلات الشخص والخبرة.. ثانيا بالنسبة للغة الانجليزية لا اعتقد ان كل الوظائف تتطلب الالمام الكامل بها..فمظم التعاملات داخل البلد تتم بالعربية (وهذه لاتستطيع انكارها على الاخ ملاسي) لا اعرف دال كثيرا ولكني تعاملت مع بعض فروعها واشهد انها لم تكن اقل من المؤسسات الاوربية. علي العموم سؤالك مشروع ونرجو ان تجد اجابته

الأخ أسامة

سلام وإحترام

محور البوست والتساؤل عن الإيميلات المعدة مسبقاً وقد تم توضيح اللبس وإتضحت المشكلة وتمت المعالجة وهو أمر إيجابي يحسب للمجموعة.

شكراً للمشاركة.

Quote: تحياتي

يا عماد ياخي إزيك.

Quote: DAL is the best in town and they should hire the best arround

.

ألف شكر للتحية يا حسن بكري نــُـقـٌــُــد

.

تحياتي أخونا الطيب ، التحية تستحقها بلا شك ، فقد أعجبتني عبارتك ايما إعجاب خاصة أننا من قوم لا يحسنون تقدير ذواتهم،ولا تقدير قدراتهم!.. بل وينتظرون التقدير دائما من الآخرين !.. وهذا في ظني هو ما يؤخرنا كثيرا عن اللحاق برصفائنا من الجنسيات الأخرى ، والذين يحسنون الإحتفاء بمواهبهم وقدراتهم ، والتعبير عنها .

في بلد مثل السودان ، عبارة مثل التي ذكرتها قد يصنفها الكثيرون- عن جهل - ضمن عبارات الغرور والتعالي !

Quote: كااااااااااك ياحسن بكري

ههههههههه ، بعيدا عن التراكمات يا م/صلاح نادر !