لا شئ يجبرني أن أصافحك أيها الدكتور القذر.....

لا شئ يجبرني أن أصافحك أيها الدكتور القذر.....


10-03-2010, 05:30 PM


  » http://sudaneseonline.com/cgi-bin/sdb/2bb.cgi?seq=msg&board=310&msg=1286123422&rn=9


Post: #1
Title: لا شئ يجبرني أن أصافحك أيها الدكتور القذر.....
Author: صالح عبده
Date: 10-03-2010, 05:30 PM
Parent: #0

كنت على موعد مع مدير إحدى المستشفيات بالخرطوم , وبعد التنسيق مع السكرتيرة
وصلت ذاك المستشفى وصعدت إلي مكتب المدير العام حيث وصفت لي سكرتيرته .
وهناك رأيتها تنتظرني وبجانبها رجل , اقتربت قليلا فإذا بي أرى ذلك الشخص يحشر
أصبعه الأيمن في فتحتي انفه منهمكا في تنظيفهما تارة يرمي تلك الفضلات الجافة يمينا
ويسارا بصورة مقززة غير مبال بتلك المجموعة التي كانت تعبر من أمامه.
تسمرت في مكاني وانأ أحدق بهذا الدكتور ... ماذا افعل؟؟؟ لا لا لن ألوث يدي .. حتى
ولو فشلت تلك المحاضرات التي طلبتها مني إدارة المستشفى. سوف الغي ارتباطي بهذا
المستشفى أو أغير عنوان محاضرتي إلى (صحة البيئة) بدلا من تكنولوجيا طب الطوارئ .
تلك السكرتيرة الأنيقة مدت إلي يدها فصافحتها وامتنعت عن مصافحة ذلك الكائن القذر
لم اكترث لنظراته الحارقة , وتعابيره الساذجة والحانقة تجاهي وهو يغادر المكان فليقل
متكبر... مفترى ... مغرور ...... ولكني لن أصافحه مهما كان.
أتفضل الدير منتظرك جوه , قلت لها : وطيب الكان واقف جنبك دا منو؟؟
دا دكتور شغال معانا هنا !!!!!!!!
إن الثقافة والمدنية والحضارة لا تحتاج إلي مدرسة وإنما هي وعي تلقائي نكتسبه حسب
رغبتنا واستعدادنا للبحث عن الأفضل. وان الإنسان يتطبع بما يمتصه من محيطه الدراسي
من ثقافات مختلفة تؤهله للدخول إلى عالم الثقافة والمثقفين .
انك أيها الطبيب محسوب علينا و على أبناء هذا الوطن من ألا طباء.. و ما فائدة شهادة الدكتوراه
إذا لم يكن لها تأثير ايجابي على حياتك الاجتماعية ؟
يبدو انك تظن أن درجة الدكتوراه ميدالية يفوز بها المتسابق ويبدو انك تظن انك وصلت إلي نهاية
السباق ووصلت مكانة اجتماعية مشرفة ولا تدرى انك تعيش كالخنازير.
أيها الطبيب الغبي انك تعيش التناقض في كل المعايير والرؤى وان التوازن معدوم تماما في حياتك
الرجعية . وتصرفاتك العبيطة تدل على أن أبوابك ونوافذك موصدة بحيث لا تسمح بدخول أي ضوء إلي
عالمك الذي سوف يظل مغلقا إلي أن تقوم الساعة.
لن..... لن...... لن........ أصافحك

Post: #2
Title: Re: لا شئ يجبرني أن أصافحك أيها الدكتور القذر.....
Author: Moneim Malik
Date: 10-03-2010, 11:02 PM
Parent: #1

Quote: يحشر
أصبعه الأيمن في فتحتي انفه منهمكا في تنظيفهما تارة يرمي تلك الفضلات الجافة يمينا
ويسارا بصورة مقززة غير مبال بتلك المجموعة التي كانت تعبر من أمامه.


لا شئ يجبرني أن أصافحك أيها الدكتور القذر
.........


وانا كمان



مع تحياتى

Post: #3
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-04-2010, 08:04 AM
Parent: #2

اخي منعم مالك
الكثير من السودانيين يمارسون هذه العادة
حتى امام اجهزة الاعلام المرئية.
وهي للبعض اصبحت جزء من حياته اليومية
ناهيك عن العاملين في المطاعم والمخابز

Post: #4
Title: Re: لا شئ يجبرني أن أصافحك أيها الدكتور القذر.....
Author: مُحَمَّدٍ عِوَضٌ احْمَدُ
Date: 10-04-2010, 08:08 AM
Parent: #3

ياخ كويس
اللقيت ايدو فى نخرتو
مكان معقول..فى حتت تانية الله لاوراكـ ليها

Post: #6
Title: Re: لا شئ يجبرني أن أصافحك أيها الدكتور القذر.....
Author: ود الباوقة
Date: 10-04-2010, 08:18 AM
Parent: #4

اخي صالح

ظاهرة اللعب بالايدي في المناخير هي ظاهرة غير حضارية

ويتخيل نحن في الترتيب الثاني بعد البنغالة باللعب في النخرين


وكمان في ظاهرة تاني جديدة تلقا الواحد يحك في رقبتو ويقبض

في ال###### الفيها ويرمي فوق هدوموا

سبحان الله

كل شعب عندو هواية

Post: #7
Title: Re: لا شئ يجبرني أن أصافحك أيها الدكتور القذر.....
Author: ود الباوقة
Date: 10-04-2010, 08:21 AM
Parent: #6

الكلمة المحذوفة

هي ا ل و س خ

Post: #9
Title: Re: لا شئ يجبرني أن أصافحك أيها الدكتور القذر.....
Author: مُحَمَّدٍ عِوَضٌ احْمَدُ
Date: 10-04-2010, 08:23 AM
Parent: #7

ود الباوقة
يازول اتا متأكد؟

Post: #13
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-04-2010, 08:53 AM
Parent: #6

ود الباوقة
التمخط ليس اثناء الاكل فقط
بل التمخط اثناء طهي الطعام
ومسح الباقي في الملابس
وكمان اخراج السفة بالاصبع
استمر في نشر الوعي من خلال
هذا البوست ياود الباوقة
الظاهر حنرشحك وزير صحة
تحياتي

Post: #11
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-04-2010, 08:47 AM
Parent: #4

اخي/ مُحَمَّدٍ عِوَضٌ احْمَدُ

كمان من عاداتنا السيئة لعق الاصابع
مع كل لقمة ويمتلئ الصحن باللعاب

Post: #5
Title: Re: لا شئ يجبرني أن أصافحك أيها الدكتور القذر.....
Author: محمد زكريا
Date: 10-04-2010, 08:14 AM
Parent: #3

سلام عليك ايها الرجل الذى ساهم فى دفعى الى البحث عن شريكه حياتى فتكللت المساعى بالنجاح.....شكراً مره اخرى


موضوع البوست مهم جداً...لقد اقشعر بدنى لوصف سلوك ذلك الذى يدعى طبيب
سلوك الفرد وصحه البيئه والمجتمع مربوطتان ببعض الى حد ما وتبداء من اللذين لديهم حظوه من العلم والوعى او يعملون فى مجال له علاقه بالصحه والبيئه
ليتك تعطينا القليل من مضمون محاضراتك القيمه هذه حتى يعم الوعى ويستفيد الناس من خلال هذا المنبر


====
تحياتى الخاصه

Post: #8
Title: Re: لا شئ يجبرني أن أصافحك أيها الدكتور القذر.....
Author: طارق أحمد عثمان
Date: 10-04-2010, 08:23 AM
Parent: #5

فليكن هذا البوست بداية لنقد الكثير من سلوكياتنا الغريبة وغير المتحضرة


شكرا اخ صالح

Post: #22
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-05-2010, 07:43 AM
Parent: #8

Quote: فليكن هذا البوست بداية لنقد الكثير من سلوكياتنا الغريبة وغير المتحضرة


اخي/ طارق أحمد عثمان


لدينا الكثير من السلوكيات الغير حضارية لذا يجب
ان نطرحها بكل شفافية وهذا سوف يخلصنا او يقلل من
وجودها .

Post: #10
Title: Re: لا شئ يجبرني أن أصافحك أيها الدكتور القذر.....
Author: ود الباوقة
Date: 10-04-2010, 08:30 AM
Parent: #5

اخي صالح

اليك بعض من الظواهر السالبة المقززة التي اقترنت بنا نحن السودانيين

طبعا اللعب في النخرين وهو موضوع البوست


دلك الرقبة باستمرار واستخراج ا ل و س خ ورميه على الملابس

والحالة دي لما تكون في ونسة مع مجموعة

البصق من الشباك في الحافلة او الباص واندياح البصاق على بقية

الركاب ممن يجلسون في المقاعد الخلفية ( وديل غالبا ناس الصعوط )

التمخت اثناء الاكل دون مراعاة لشعور من يقاسمونك الطعام

برجع ليك

Post: #12
Title: Re: لا شئ يجبرني أن أصافحك أيها الدكتور القذر.....
Author: ود الباوقة
Date: 10-04-2010, 08:50 AM
Parent: #10

Quote: كمان من عاداتنا السيئة لعق الاصابع
مع كل لقمة ويمتلئ الصحن باللعاب


واكثر ازاعاجا هو

( اللغف ) في اكل الفطير بي لبن

Post: #14
Title: Re: لا شئ يجبرني أن أصافحك أيها الدكتور القذر.....
Author: ود الباوقة
Date: 10-04-2010, 08:56 AM
Parent: #12

Quote: بل التمخط اثناء طهي الطعام
ومسح الباقي في الملابس


دا اكثر شيء يا صالح بكون اثتاء ( العواسة )

Post: #15
Title: Re: لا شئ يجبرني أن أصافحك أيها الدكتور القذر.....
Author: ود الباوقة
Date: 10-04-2010, 08:58 AM
Parent: #14

عدم جر السايفون بعد قضاء الحاجة

يعني الواحد يقوم زيو وزي ال خ ر و ف

Post: #16
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-04-2010, 03:29 PM
Parent: #5

محمد زكريا
عريس الموسم
كم انا فرح بحياتك الجديدة والجميلة وفقك الله وملأ عالمك بالسعادة

بالنسبة لمحاضراتي كانت عن الطوارئ وكيفية التعامل مع المصابين
قبل وصولهم للمستشفى والحمدلله كانت كلها ناجحة ولكن لضيق الوقت
لم اكمل برنامجي ولي عودة مرة اخري
وقد بدات في برنامج توعوي صحي من خلال هذا البوست
ولكني لم انسى موقف ذلك الدكتور معي
تحياتي وتحيات خاصة للعروس

Post: #17
Title: Re: لا شئ يجبرني أن أصافحك أيها الدكتور القذر.....
Author: Abdlaziz Eisa
Date: 10-04-2010, 03:46 PM
Parent: #16

سلام



وبعد ده كله وما سيأتي...

فهنا الكثيرون ممن يقول: أننا الشعب المعلم الخلوق, المهذب............

Post: #18
Title: Re: لا شئ يجبرني أن أصافحك أيها الدكتور القذر.....
Author: أسامة البلال
Date: 10-04-2010, 04:06 PM
Parent: #17

ياخي لوفتحت باب زي دا بصراحة مافي زول في السودان حيقدر يأكل أو يشرب في المطاعم أو الأسواق أو حتي أكل عملوا زول غيرو ولو زوجته لأنو تقريبا ثقافة النظافة والهايجين زيرو في السودان.

ياخي خلوها مستورة

Post: #20
Title: Re: لا شئ يجبرني أن أصافحك أيها الدكتور القذر.....
Author: مُحَمَّدٍ عِوَضٌ احْمَدُ
Date: 10-04-2010, 04:48 PM
Parent: #18

Quote: ياخي خلوها مستورة



Post: #27
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-05-2010, 02:53 PM
Parent: #18

Quote: ياخي لوفتحت باب زي دا بصراحة مافي زول في السودان حيقدر يأكل أو يشرب في المطاعم
أو الأسواق أو حتي أكل عملوا زول غيرو ولو زوجته


اخي/ اسامة البلال
نساء السودان يغسلن براز اطفالهن وبعد ذلك تتوجه للمطبخ
مباشرة لتقطيع السلطة دون غسل اليد بالصابون
والبطون دي ياما دخلت فيها بلاوي

Post: #19
Title: Re: لا شئ يجبرني أن أصافحك أيها الدكتور القذر.....
Author: عزيز عيسى
Date: 10-04-2010, 04:41 PM
Parent: #17

أخي صالح عبده،

تحياتي،

موضوع هام وجدير بالمناقشة..
تعجبني دائما مواضيعك المميزة التي تهتم بحل قضايا مجتمعنا السوداني.
ولكن لي ملاحظة أن هذا البوست لو خلا من الشتائم والإساءات الموجهة لوصلت
الرسالة على أكمل وجه وبالشكل المطلوب ولتقبلها ذلك الطبيب المقصود
بروح طيبة..

الشعب السوداني يحتاج الى الكثير من التوعية والتثقيف في كثير من الأمور
فيما يتعلق بالعادات السيئة وغير الحضارية كالتقاليد والنواحي الصحية
التي لها تأثير سلبي على حياة المواطنين.. واللوم يقع على المسؤولين
ووسائل الإعلام في السودان لأنهم مقصرين الى حد كبير ولا يعطون أي إهتمام
لتوعية المواطنين مقارنة بوسائل الإعلام الخارجي.

Post: #21
Title: Re: لا شئ يجبرني أن أصافحك أيها الدكتور القذر.....
Author: كمال عكود
Date: 10-04-2010, 04:57 PM
Parent: #19

والله لما أكون واقف في إشارة وأشوف واحد جواري ومدخل ايدو في نخرته بخجل خجلة شديدة خالص

العجب لو بقى سوداني

طبعا بس تقع عينو فيه ساكت لانه كمان المعاينة في الإشارة للسيارة الجنبك دي برضو عادة تزهج عند بعض الناس ومنهم نحن

طبعا يا جماعة الحكاية دي ما محصورة في السودانيين

وعلى كل حال هي كريهة

Post: #23
Title: Re: لا شئ يجبرني أن أصافحك أيها الدكتور القذر.....
Author: قلقو
Date: 10-05-2010, 07:57 AM
Parent: #21

الأخ صالح عبده
كتب الأخ ودالباوقة

Quote: البصق من الشباك في الحافلة او الباص واندياح البصاق على بقية

الركاب ممن يجلسون في المقاعد الخلفية ( وديل غالبا ناس الصعوط )

ياود الباوقة ما ناس الصعوط براهم(دفاع عن النفس), كدى تعال لينا فى رمضان ختى ترى العجب العجاب , والله الوحد بدون ادنى ذوق او ادب يبصق ومايكون شايف هو فكاها وين , ومحل ماتقع تقع .
Quote: واندياح

دى حلوة منك ياود الباقة . جبتها من وين ؟

Post: #24
Title: Re: لا شئ يجبرني أن أصافحك أيها الدكتور القذر.....
Author: مُحَمَّدٍ عِوَضٌ احْمَدُ
Date: 10-05-2010, 09:06 AM
Parent: #23

يا اخونا فى حاجة ما تنسوها
الناس البتحككـ فى اعضائها التناسلية!! بدون وعى وقدام كل الناس عادى
حركة تخلى الزول يموت من الحرج والغيظ

Post: #25
Title: Re: لا شئ يجبرني أن أصافحك أيها الدكتور القذر.....
Author: معاذ الهادي
Date: 10-05-2010, 09:57 AM
Parent: #24

Quote: ويبدو انك تظن انك وصلت إلي نهاية
السباق ووصلت مكانة اجتماعية مشرفة ولا تدرى انك تعيش كالخنازير.
أيها الطبيب الغبي انك تعيش التناقض في كل المعايير والرؤى وان التوازن معدوم تماما في حياتك
الرجعية
.


سلام صالح عبده

اسلوبك اداني احساس انو مشكلتك مع الشخص
اكتر منها مع السلوك الذي قام به.
اتمنى اني اكون غلطان

تصرف مقزز من دونك شك(حتى وان كان لااراديا) لكنه لايستحق ان تصفه بالخنزير.

في بعض الحالات الطبية الطارئة(وشكلك سيد العارفين) مثل

fecal impaction

يدخل الطبيب يده داخل الفتحة الشرجية للمريض لاخراج وتفتيت البراز المتحجر واخراجه دون تقزز .

في التخدير اذا لم يبصق المريض في يد الطبيب حتى يتاكد الطبيب انه فاق من البنج ومجاري التنفس لديه مفتوحة لن يغادر العملية.


ولايكنك تخيل احساس الطبيب وفرحته عندما يملاء البول المندفع من المريض ملابس الطبيب بعد ان اخرج تلك الحصوة التي كانت تغلق قضيب المريض وتزيد عليه الامه.



ماعنيته انه رغم فكرة الموضوع الاجتماعية باعتباره نقدا لسلوك مقزز.

الا ان اسلوب الطرح والعنوان يوحيان بان هناك شئ بين السطور.

على الاقل هذا ما احسسته ولا ادري كيف احس بقية القراء.



بالتوفيق .....

Post: #45
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-07-2010, 07:17 AM
Parent: #25

Quote: يدخل الطبيب يده داخل الفتحة الشرجية للمريض لاخراج وتفتيت البراز المتحجر واخراجه دون تقزز .

في التخدير اذا لم يبصق المريض في يد الطبيب حتى يتاكد الطبيب انه فاق من البنج ومجاري التنفس لديه مفتوحة لن يغادر العملية.


ولايكنك تخيل احساس الطبيب وفرحته عندما يملاء البول المندفع من المريض ملابس الطبيب بعد ان اخرج تلك الحصوة التي كانت تغلق قضيب المريض وتزيد عليه الامه.




اخي/معاذ الهادي

للمعلومية انا لا اعرف هذا الشخص ولم اتعامل معه من قبل
اما مسألة ان الدكتور يدخل اصبعه في شرج المريض والمريض
يتبول على ملابس الدكتوربعد نزع الحصوة فهذا ليس له علاقة
بموضوعنا هذا وليس مبررا لما فعله هذا الشخص امام الملأ
وكمان انت عايز ترجعنا لي زمن الدكتور دخل يدو!!
فهذا عصر FLEET ENEMA
SUCTION
CT.
MRI
ULTRASOUND
URINECATH.
هذا غير تفتيت حصوة الكلى والمثانة والمرارة دون ان يتبول المريض
على الدكتور... واذا كان دكتورنا اساسا يده بها عدوة ولا مخاتة كان
الله في عون المريض المسكين
تحياتي

Post: #40
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-06-2010, 08:30 AM
Parent: #23

Quote: ياود الباوقة ما ناس الصعوط براهم(دفاع عن النفس), كدى تعال لينا
فى رمضان ختى ترى العجب العجاب , والله الوحد بدون ادنى ذوق او ادب يبصق
ومايكون شايف هو فكاها وين , ومحل ماتقع تقع .


قلقو
ممكن الواحد يكون بيتكلم معاك ومواجهك ويبصق
ويواصل كلامه كأنه مافي حاجة حصلت.

Post: #35
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-05-2010, 08:09 PM
Parent: #21

Quote:
والله لما أكون واقف في إشارة وأشوف واحد جواري ومدخل ايدو في نخرته بخجل خجلة شديدة خالص

اخي
كمال عكود
دا غير ان يعطس في ايده ويدعك يدينه في بعض
و.... كمل انت الباقى

Post: #34
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-05-2010, 05:38 PM
Parent: #19

اخي/ عزيز عيسى

المعذرة اولا.
ولكن ذلك المنظر استفزني كثيرا
خاصة انه من قبل طبيب وداخل مرفق
صحى.
اما عن المسؤولين والاعلام الكثير
منهم يفرك انفه امام شاشات التلفزيون
وهم انفسهم يحتاجوا الي وعي صحي

Post: #26
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-05-2010, 02:41 PM
Parent: #17

اخي/ عبد العزيز عيسى
الشعب محتاج كثير من التوجيه
ومع انه فيه صفات جميلة كثيرة
ولكن جانب النظافة معدوم تماما
تحياتي

Post: #28
Title: Re: لا شئ يجبرني أن أصافحك أيها الدكتور القذر.....
Author: Dia
Date: 10-05-2010, 04:45 PM
Parent: #26

شى مهم عدم اهتمام الكثيرين بتقصيف اظافرهم وتطول وتكون مليانة اوساخ

Post: #29
Title: Re: لا شئ يجبرني أن أصافحك أيها الدكتور القذر.....
Author: Tragie Mustafa
Date: 10-05-2010, 04:57 PM
Parent: #28

في ميزان حسناتك يا صالح وكل المتدخلين.
فعلا عندنا عادات عجب.

ويا ود الباوقه زي السايفون القتل ما بيجرهوا

مذلك من يبصق التمباك بمغسله ولا يهتم ان يجعل الماء
يجري ليغسل هذه المحن!!


آخر مه تمر طردنا كجاليه سودانيه من مبنى كنا نأجره كل يوم احد

لانه الجماعه تبوع الصعود ادهشوا الخواجات بما يتركونه فوق المغلسه!!

وطبعا الكندين ما كانوا عارفين لا مؤاخذه ده(براز) ولا شنو؟؟!!


حاجه عجيبه وغريبه!!

Post: #30
Title: Re: لا شئ يجبرني أن أصافحك أيها الدكتور القذر.....
Author: Tragie Mustafa
Date: 10-05-2010, 05:00 PM
Parent: #29

بس دي بالغت فيها يا صالح

بهذا التعميم

Quote:
اخي/ اسامة البلال
نساء السودان يغسلن براز اطفالهن وبعد ذلك تتوجه للمطبخ
مباشرة لتقطيع السلطة دون غسل اليد بالصابون
والبطون دي ياما دخلت فيها بلاوي


لما تقول نساء السودان فلغويا انت عنيت

كل نساء السودان

وطبعا انت مخطيء!!

كان يمكن ان تقول اغلب نساء الريف السوداني مثلا!!

ولكن لا يمكن ان تقول نساء السودان هكذا!!

Post: #31
Title: Re: لا شئ يجبرني أن أصافحك أيها الدكتور القذر.....
Author: مُحَمَّدٍ عِوَضٌ احْمَدُ
Date: 10-05-2010, 05:22 PM
Parent: #30

Quote: كان يمكن ان تقول اغلب نساء الريف السوداني مثلا

غايتو اكان اخير كلام زولنا الاول اهو قال نساء السودان
هسه جابت ليها نسوان ريف؟
والله اكتر واغلب نسوان الخرتوم خرق الواحدة تغسل وشيها الف مرة فى اليوم
لكن ايدها الله اعلم..

Post: #33
Title: Re: لا شئ يجبرني أن أصافحك أيها الدكتور القذر.....
Author: طارق ميرغني
Date: 10-05-2010, 05:38 PM
Parent: #31

انت عارف اخي صالح

شاهدت من قبل من يدخل اصبعه في مناخيره

وبعد الانتهاء يعمر سفه من نوع ابو كديس

ومن ثم يجي الاكل يتف السفه ويواصل مع الجماعه الاكل

كان شيئا لم يكن !!!!!!

زي ده تقول عليهو شنو ؟؟

والوضع حرج قربت احرد الاكل

لكن انا ضيف ماذا اقول او اعمل؟؟؟

Post: #47
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-09-2010, 07:50 AM
Parent: #33

اخي طارق ميرغني

في بيوت العزابة ماتشوف واحد طلع من الحمام واتجه للصابون
من الحمام راسا الي كباية الموية والصبارة او كمان دخل المطبخ
والعجب الي عمل ليهو قراصة ولا عصيدة طعم الدقيق حيكون كيف بعد
العجن باليدين؟؟؟؟
تحياتي

Post: #46
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-07-2010, 03:47 PM
Parent: #31

اخي طارق مصطفى
اذا كانت النظافة معدومة لدى الرجال
هل تتوقعها موجودة لدى النساء؟؟
قالوا في المثل
لاخيرا في الضبعة ولاجناها
تحياتي

Post: #32
Title: Re: لا شئ يجبرني أن أصافحك أيها الدكتور القذر.....
Author: عبدالمجيد المقابل
Date: 10-05-2010, 05:33 PM
Parent: #30

Quote: وكمان اخراج السفة بالاصبع


يا خي دي حركة مقرفة جدا" , و المقرف أكثر تناول الماء و السفة داخل الفم !!!!

بوست مهم جدا" لتشريح عاداتنا السالبة, منشدين التغير للأفضل ...

Post: #36
Title: Re: لا شئ يجبرني أن أصافحك أيها الدكتور القذر.....
Author: ALZOLZATOO
Date: 10-05-2010, 10:44 PM
Parent: #32

الاخ صالح عبده

ياخي دي احسن حركة قرات قبل كده ان الشخص الذي يفرك انفه يدل على ذكائه

ايام غزو العراق ونهاية صدام كنت بتغدا في مطعم سوداني اها طلبت واحد قراصة بي دمعة

اثناء الاكل وجدت ظفر آدمي داخل القراصة ناديت الزول الجاب لي الاكل قلت ليهو ده شنو ؟ قال لي يكون الزول العجن العجين وبطلت الاكل وغسلت يديني وقعدت اشرب شاي وبسمع في الاخبار بتاعة الصحاف

اها جاني زولي ذاتوووو تتخيل قال لي شنو ؟ الاجابة اسفل المداخلة










قال لي الشاي مالقيت فوقو هاهاهاهاهاهاي والله ماعرفت اضحك ولا ابكي

تحياتي

زاتوووو

Post: #48
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-09-2010, 03:28 PM
Parent: #36

Quote:

يا خي دي حركة مقرفة جدا" , و المقرف أكثر تناول الماء و السفة داخل الفم !!!!

بوست مهم جدا" لتشريح عاداتنا السالبة, منشدين التغير للأفضل


اخي/ عبد المجيد المقابل
في واحد فتح الضهرية طلع كيس الصعوط في اللحظة ديك جاء مجنون ######ان جدا
ومد يده للراجل فاعطاه الكيس
فادخل المجنون يده داخل الكيس ودردم سفة ورجع الكيس
تخيل بعد داك الراجل دخل يده في نفس الكيس وسفه وخت الكيس في جيبه

Post: #54
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-18-2010, 07:53 AM
Parent: #36

Quote:
اثناء الاكل وجدت ظفر آدمي داخل القراصة ناديت الزول الجاب لي الاكل قلت ليهو ده شنو ؟ قال لي يكون الزول العجن العجين وبطلت الاكل وغسلت يديني وقعدت اشرب شاي وبسمع في الاخبار بتاعة الصحاف


ALZOLZATOO
في المطاعم السودانية يجيب ليك العيش في ايده
بعد ماقشى بيها عرق وجهه
واللي يديك الكسرة اول حاجة يبل اصبعه بالبزاغ
عشان يحرك البلاستيك من فوق الصينية ويفرد الطرقة
من التانية.
هم كلهم عرقانين الطباخين والجرسونات

Post: #37
Title: Re: لا شئ يجبرني أن أصافحك أيها الدكتور القذر.....
Author: امير عوض الجمري
Date: 10-05-2010, 10:47 PM
Parent: #32

لكن يا صالح كمان مرات الكدوبة بتكون مكنكشة جوة النخرة ولو ما بعبصوها ما بتفك !!!

انا جاي من السودان قبل اسبوعين .. مافيهو ولا سلوك واحد صاح ...
وزي ما قال واحد من الشباب : خلووووها مستووووووووووووووورة.

Post: #38
Title: Re: لا شئ يجبرني أن أصافحك أيها الدكتور القذر.....
Author: احمد محمد بشير
Date: 10-05-2010, 11:10 PM
Parent: #37

يا ساتر!!
هو بالله لسع في ناس بالـ............دي

المهم أنصح الزول البيعمل الحاجات دي و أكيد حيتقبل النصيحة.
ممكن تنصحوا بي طريقة غير مباشرة, إذا كان بيتحسس.
تحكي ليهو مثلا إنو كان في زول بيدخل يده في أنفه وفي النهاية مرض وجابوا ليهو الإسعاف.

بعد ما تحكي ليهو مصائب الناس ال######انيين, حتلقاهو منطط عينوهو.
وبعدها أكيد حيعمل حسابوا.

شكراً صالح/ لي الؤغم من إنك شخصنت الموضوع في مداخلتك الأولي في البوست.

Post: #39
Title: Re: لا شئ يجبرني أن أصافحك أيها الدكتور القذر.....
Author: ولياب
Date: 10-06-2010, 06:42 AM
Parent: #38

قبل فترة قصيرة وصلتني (وصلة توتيوب) من موقع يابدو الإلكترونية حاملة عنوان ( الرئيس بوش يلعب بخشمو)

أثارني العنوان لأن الخشم لدينا الفم وعند العرب (الأنف) وما أن تم التحميل رأيت جورج دبليو بوش يشاهد مباراة كرة قدم امريكية وهو منهمك بإدخال أصبعه في أنفه وكان يقوم بعمل النظافة اللازمةللأنف كما يحدث للذين تعودوا بأعمال حفريات الأنف ونظافته أمام الناس .( هي عادة غير طيبة يمكن أن يمارسها الرئيس ، الطبيب ، الجاهل ، المثقف ..... الخ)

بالطبع هذا سلوك غير صحي ولا حضاري ولا سيما أمام الناس ، وهناك عادات قبيحة غير صحية يمارسها كثير من الناس ، ويجب أن هناك حملات توعية للإهتمام بالنظافة الشخصية .

أخي صالح ، بالرغم من كل ما بدر من الطبيب إلا أنه لا داعي أن تصفه ( أيها الطبيب القذر والخنزير وإلى ما شابه ذلك من كلمات ، كان فضلاً لك أن تنصحه بطريقة مباشرة أو غير مباشرة .

والله من وراء القصد

Post: #41
Title: Re: لا شئ يجبرني أن أصافحك أيها الدكتور القذر.....
Author: طارق ميرغني
Date: 10-06-2010, 09:19 AM
Parent: #39

اها يا صالح


Post: #42
Title: Re: لا شئ يجبرني أن أصافحك أيها الدكتور القذر.....
Author: dardiri satti
Date: 10-06-2010, 09:35 AM
Parent: #39

Quote: لا شئ يجبرني أن أصافحك أيها الدكتور القذر
.........


وانا كمان



مع تحياتى







لا شئ يجبرني أن أصافحك أيها الدكتور القذر
.........


ولا انا


تحياتى

Post: #43
Title: Re: لا شئ يجبرني أن أصافحك أيها الدكتور القذر.....
Author: dardiri satti
Date: 10-06-2010, 09:39 AM
Parent: #42

GEORGE BUSH PICKING HIS NOSE


الأخ طارق ميرغني



القذارة لا وطن لها .


تحياتي

Post: #44
Title: Re: لا شئ يجبرني أن أصافحك أيها الدكتور القذر.....
Author: dardiri satti
Date: 10-06-2010, 09:39 AM
Parent: #42

GEORGE BUSH PICKING HIS NOSE


الأخ طارق ميرغني



القذارة لا وطن لها .


تحياتي

Post: #53
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-17-2010, 12:00 PM
Parent: #42

dardiri satti
Quote: وانا كمان

Post: #51
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-16-2010, 07:10 AM
Parent: #39

Quote: كان فضلاً لك أن تنصحه بطريقة مباشرة أو غير مباشرة .


ولياب اخوي
هل تعتقد اننا وصلنا المرحلة المتقدمة دي من الوعي والادراك؟؟؟؟
يا أخي نحن حتى التلميح بجيب لينا مشاكل
وبعدين اذا كان بوش ######ان نحن نبقى ######انين؟

Post: #49
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-13-2010, 07:47 AM
Parent: #37

Quote: لكن يا صالح كمان مرات الكدوبة بتكون مكنكشة جوة النخرة ولو ما بعبصوها ما بتفك !!!

انا جاي من السودان قبل اسبوعين .. مافيهو ولا سلوك واحد صاح




اخوى / امير عوض الجمري

حمد لله على السلامة اولا
والكدوبة المعصلجة دي ما يجيب ليهو اجنة
ويقعد علي جنبة ويفكها بدل ما مشغل الورشة
قدام خلق الله.

Post: #50
Title: Re: لا شئ يجبرني أن أصافحك أيها الدكتور القذر.....
Author: امير عوض الجمري
Date: 10-13-2010, 11:16 AM
Parent: #49

Quote: اخوى / امير عوض الجمري

حمد لله على السلامة اولا

الله يسلمك يا صالح



Quote: والكدوبة المعصلجة دي ما يجيب ليهو اجنة
ويقعد علي جنبة ويفكها بدل ما مشغل الورشة
قدام خلق الله.


دي صدقت فيها .. لكن كمان مرات هي تتعمل لا شعورياً خاصة اذا كان واقف جنب (السكرتيرة) يكون يبعبص من غير ما يحس .. ههههههها

Post: #52
Title: Re: لا شئ يجبرني أن أصافحك أيها الدكتور القذر.....
Author: ولياب
Date: 10-16-2010, 07:47 AM
Parent: #50

Quote: هل تعتقد اننا وصلنا المرحلة المتقدمة دي من الوعي والادراك؟؟؟؟
يا أخي نحن حتى التلميح بجيب لينا مشاكل


برضو وجهة نظر


Quote: وبعدين اذا كان بوش ######ان نحن نبقى ######انين؟


ونحن نقول إذا كان بوش بالنخرة لاعب فشيمة أهل الأرض ....................

Post: #55
Title: Re: لا شئ يجبرني أن أصافحك أيها الدكتور القذر.....
Author: khalid abuahmed
Date: 10-18-2010, 03:43 PM
Parent: #52

اخي صالح عبده..
تحياتي ..
البوست جميل..
فقط هذه الجملة لم تعجبني..لأنها لا علاقة لها والموضوع وما الذي أدخل النساء في هذا الموضوع الشخصي جداً..
Quote: اذا كانت النظافة معدومة لدى الرجال
هل تتوقعها موجودة لدى النساء؟؟
.
بس لازم نقوم ننقص من النساء بسبب وبدون سبب..!!.

Post: #56
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-19-2010, 09:56 AM
Parent: #55

Quote: بس لازم نقوم ننقص من النساء بسبب وبدون سبب..!!.



اخي/ khalid abuahmed

هذا الدكتور امه النظيفة لم تربيه على النظافة لذا كبر وكبرت معه اوساخه
وذا كان الكلام عن السودانية .. ياخي واحدة بتعمل طبق اليوم في التلفزيون
وبتدخل اصبعها في الحلة عشان تضوق الملح .. اما اللي في البيت الكلام يطول
دا غير اللي اتعلمت الصعوط عشان وجع الضرس وتخيل انت الباقي...

Post: #57
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-23-2010, 07:44 AM
Parent: #50

Quote: دي صدقت فيها .. لكن كمان مرات هي تتعمل لا شعورياً



اخي/ امير عوض الجمري

شعوريا اوغيره دي حاجة كثير من الناس بشوفوها عادية
وممكن الواحد يستغرب لو قلت له ان يكف عنها لانه
(بينضف في نخرينه)

Post: #58
Title: Re: لا شئ يجبرني أن أصافحك أيها الدكتور القذر.....
Author: abdulhalim altilib
Date: 10-23-2010, 08:54 AM
Parent: #57

أخي العزيز / صالح عبده
تحياتي ،


Quote: يبدو انك تظن أن درجة الدكتوراه ميدالية يفوز بها المتسابق ويبدو انك تظن انك وصلت إلي نهاية
السباق ووصلت مكانة اجتماعية مشرفة ولا تدرى انك تعيش كالخنازير.
أيها الطبيب الغبي انك تعيش التناقض في كل المعايير والرؤى وان التوازن معدوم تماما في حياتك
الرجعية . وتصرفاتك العبيطة تدل على أن أبوابك ونوافذك موصدة بحيث لا تسمح بدخول أي ضوء إلي
عالمك الذي سوف يظل مغلقا إلي أن تقوم الساعة.
لن..... لن...... لن........ أصافحك


فعلاً هذا بوست مهم لأنه يناقش عادات سيئة ومحزنة في نفس الوقت ، وصرنا من كثرة تكرارها أمامنا
لا نلقي لها بالا ، ومؤكد أن مجتمعنا السوداني الذي نعيش فيه سواء داخل الوطن أو خارجه يحتاج
لعدة عمليات إصلاح وترميم لبعض تلك العادات ، مثلما تفضلت وذكرت عينة شائعة منها . وهي فعلا من
كثرتهاأصبحت بالنسبة لنا أمراً عادياً، رغم أن الكثيرين منا يتضايقون منها ، مثلما فعلت أنت
و (حردت) أن تمضي قدماً لتقدم محاضرتك .

ولكني أعتب عليك في استخدامك بعض الألفاظ في حق ذاك الطبيب مثل نعته بالخنزير أو الغبي ،
رغم سوء تصرفه ، وهي الفاظ لم أعهدها فيك مطلقاً، لا بل كنت أول المحاربين لها دوماً، وأنت التربوي
الهمام الذي عهدناه وعايشناه سنينا عددا وهو يقود مسيرة واحدة من أكبر جمعيات منظمات المجتمع
المدني بالرياض ، والتي تعنى بالتراث والعادات والتقاليد . و .. معليش .. مؤكد الغضب أعماك ؟!

ولتكن هذه الغضبة المضرية منك لتلك العادة السيئة من ذاك الطبيب ، ضربة البداية لتسليط الضوء على كثيرٍ
من عاداتنا السيئة ومحاولة إزالتها إو إصلاح المعوج منها (إن وجد) ، حتى نعيش في مجتمع سليم معافى من
كل آفات العادات السيئة والتي يزخر بها مجتمعنا السوداني .

مودتي ،


( ليمو )


Post: #59
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-25-2010, 07:12 AM
Parent: #58

Quote:
ولكني أعتب عليك في استخدامك بعض الألفاظ في حق ذاك الطبيب مثل نعته بالخنزير أو الغبي ،
رغم سوء تصرفه ، وهي الفاظ لم أعهدها فيك مطلقاً، لا بل كنت أول المحاربين لها دوماً، وأنت التربوي
الهمام الذي عهدناه وعايشناه سنينا عددا وهو يقود مسيرة واحدة من أكبر جمعيات منظمات المجتمع
المدني بالرياض ، والتي تعنى بالتراث والعادات والتقاليد . و .. معليش .. مؤكد الغضب أعماك ؟!

ولتكن هذه الغضبة المضرية منك لتلك العادة السيئة من ذاك الطبيب ، ضربة البداية لتسليط الضوء على كثيرٍ
من عاداتنا السيئة ومحاولة إزالتها إو إصلاح المعوج منها (إن وجد) ، حتى نعيش في مجتمع سليم معافى من
كل آفات العادات السيئة والتي يزخر بها مجتمعنا السوداني .




ود التلب
المشكلة انك تدخل مرفق صحي وتصطدم بي منظر زي دا وكمان من طبيب
في مقررات كلية الطب ما في فقرة بتدل على النظافة الشخصية؟؟
والبنشوفه في الخليج من مناظر جد تخجل .
تحتار دا دكتور ولا مهرج
تحياتي

Post: #60
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 10-28-2010, 08:59 AM
Parent: #59

شكر خاص للاخ الدكتور التوم من مدينة الملك
عبد العزيز الطبية للحوار البناء الذي قدمه
من اجل موضوع هذا البوست


تحياتي

Post: #61
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-03-2010, 08:16 AM
Parent: #60

ما هو كمان ما ممكن خمسة اشخاص ياكلوا
في صحن واحد بالمعالق

Post: #62
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-06-2010, 08:00 AM
Parent: #61

اليد ماشة وجاية في النخرة حتى امام
شاشات التلفزيون ومن مسؤولين كبار.

Post: #63
Title: Re: لا شئ يجبرني أن أصافحك أيها الدكتور القذر.....
Author: معتصم الطاهر
Date: 11-06-2010, 08:33 AM
Parent: #62



أسوأ من الطبيب .. هو صمتك عليه و أن لا تحدثه بخطئه..كتبت عنه هنا.

وخاصة أنك جئت تحاضرهم ..

،، هل سيتم استدعاءك لمحاضرة قادمة اذاإطلعت إدارة المستشفى على ما كتبت و خاصة بهذا الاسلوب " الدكتور القذر"

Post: #64
Title: Re: لا شئ يجبرني أن أصافحك أيها الدكتور القذر.....
Author: البحيراوي
Date: 11-06-2010, 06:03 PM
Parent: #63


الأخ صالح عبده

تحياتي هذا السلوك من الطبيب غير لائق البته وبالذات من طبيب نسميه إجمالاً ملائكةالرحمة التي تتمدد وتشمل حاجات كتيرة بالطبع لا تصل لدرجةالكمال لكن أن يأتي من طبيب فكيف للشخص العادي أن يُحاكم ويُقيم .
بما أن الإنسان إبن بيئته فإنني لا أُبرئ مجتمع السودان العريض من بعض السلوكيات الشاذة أو غير المحببة لكن كلما تعمقنا في حياتنا وتعلمنا وتداخلنا مع الآخرين فإن ذلك مدعاة لتسحين سلوكنا نحو الأفضل .
وفي حالة السودان فإن المساحة شاسعة في حالة تتبع سلوكياتنا الشاذة من واقع حياتنا اليومية وما أكثرها وقد ذكر بعَض المتداخلين جزء منها ولعل تناقض سلوكنا في اي مستوى هو أقرب لهذه الحالة وندلل علي ذلك في مجتمعات الموظفين في بدايتهم العملية فالعيش عبر تجمعات عزابة تكثر فيها السلوكيات الشاذة حتى لو كانوا يؤدون أعمالاً ذات طبيعة أخلاقية عالية في مكاتبهم لكن في الميز الحياة تختلف تمامأً.
وحكاية التمباك دي بالطبع قد تمس كثيرين في هذاالبورد وأعنى هنا كيفية التعامل معه من قبل الكييف وكلنا ندري كيف يتعامل بعض الكيفيين مع الكيس وما بعد السفة. ولننظر لحالة الوطن الكبير وتحديدأً في المدن الكبيرة فنلاحظ دوماً كشك العماري الجيد ووارد شقرة بالقرب من المكتبة الثقافية .

أما هنا في خارج السودان فنماذج كثيرة من السلوكيات النسبية التي نعايشها تجعلك تحس ما إستفز الأخ صالح بصورة متفشية كثيراً ودونكم محلات الفول والأكل السوداني فكيف للمعلم يدردم السفة أمامك ويحت يده فقط ثم يخمش من الطعمية والبيض والشمار والملح ويخلطها بالكامشة ثم يكب ليك الفول المصلح.
وكمان أمشي السفارة لملء إستمارة جوازات مثلاً تجد عدد كبير من أصحاب الهواتف الجميلة والنغمات المميزة يطلب منك أن تملأ له الإستمارة . وأحيانأً لا يوجد لدية قلم غذا ما كان يجيد الكتابة ثم يأخذ قلمك ويخليك دون إعتذار .
ذات مرة واحد عزم أصدقاء من جنسية عربية علي مطعم سوداني بالسعودية وتعددت الصحون وعندما بدأوا الجماعة الأكل لاحظ صاحبنا حشرة صغيرة في إحدى الصحانة فنادى علي الجرسون همساً وقال له يا أخي بالله شيل الصحن داك فية حشرة وغير لينا الفية دا فما كان من الجرسون إلا صاح بأعلى صوتة يا أخي ما تسيب الفلهمه دي الأصغر منك دوسو !!!!!!!!!

بحيراوي

Post: #66
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-10-2010, 07:37 AM
Parent: #64

Quote:
الأخ صالح عبده

تحياتي هذا السلوك من الطبيب غير لائق البته وبالذات من طبيب نسميه إجمالاً ملائكةالرحمة التي تتمدد وتشمل حاجات كتيرة بالطبع لا تصل لدرجةالكمال لكن أن يأتي من طبيب فكيف للشخص العادي أن يُحاكم ويُقيم .
بما أن الإنسان إبن بيئته فإنني لا أُبرئ مجتمع السودان العريض من بعض السلوكيات الشاذة أو غير المحببة لكن كلما تعمقنا في حياتنا وتعلمنا وتداخلنا مع الآخرين فإن ذلك مدعاة لتسحين سلوكنا نحو الأفضل .
وفي حالة السودان فإن المساحة شاسعة في حالة تتبع سلوكياتنا الشاذة من واقع حياتنا اليومية وما أكثرها وقد ذكر بعَض المتداخلين جزء منها ولعل تناقض سلوكنا في اي مستوى هو أقرب لهذه الحالة وندلل علي ذلك في مجتمعات الموظفين في بدايتهم العملية فالعيش عبر تجمعات عزابة تكثر فيها السلوكيات الشاذة حتى لو كانوا يؤدون أعمالاً ذات طبيعة أخلاقية عالية في مكاتبهم لكن في الميز الحياة تختلف تمامأً.
وحكاية التمباك دي بالطبع قد تمس كثيرين في هذاالبورد وأعنى هنا كيفية التعامل معه من قبل الكييف وكلنا ندري كيف يتعامل بعض الكيفيين مع الكيس وما بعد السفة. ولننظر لحالة الوطن الكبير وتحديدأً في المدن الكبيرة فنلاحظ دوماً كشك العماري الجيد ووارد شقرة بالقرب من المكتبة الثقافية .

أما هنا في خارج السودان فنماذج كثيرة من السلوكيات النسبية التي نعايشها تجعلك تحس ما إستفز الأخ صالح بصورة متفشية كثيراً ودونكم محلات الفول والأكل السوداني فكيف للمعلم يدردم السفة أمامك ويحت يده فقط ثم يخمش من الطعمية والبيض والشمار والملح ويخلطها بالكامشة ثم يكب ليك الفول المصلح.
وكمان أمشي السفارة لملء إستمارة جوازات مثلاً تجد عدد كبير من أصحاب الهواتف الجميلة والنغمات المميزة يطلب منك أن تملأ له الإستمارة . وأحيانأً لا يوجد لدية قلم غذا ما كان يجيد الكتابة ثم يأخذ قلمك ويخليك دون إعتذار .
ذات مرة واحد عزم أصدقاء من جنسية عربية علي مطعم سوداني بالسعودية وتعددت الصحون وعندما بدأوا الجماعة الأكل لاحظ صاحبنا حشرة صغيرة في إحدى الصحانة فنادى علي الجرسون همساً وقال له يا أخي بالله شيل الصحن داك فية حشرة وغير لينا الفية دا فما كان من الجرسون إلا صاح بأعلى صوتة يا أخي ما تسيب الفلهمه دي الأصغر منك دوسو !!!!!!!!!

بحيراوي



بحيراوي
ما خليت شئ بارك الله فيك

Post: #65
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-07-2010, 07:43 AM
Parent: #63

Quote: ،، هل سيتم استدعاءك لمحاضرة قادمة اذاإطلعت إدارة المستشفى على ما كتبت و خاصة بهذا الاسلوب " الدكتور القذر


معتصم الطاهر

اذاإطلعت إدارة المستشفى على ما كتبت فسوف يكرمونني ويقدموا لي الشكر الكثير
انصحك ان تقرأ مداخلة الاخ البحيراوي ربما تستفيد منها الكثير.

Post: #67
Title: Re: لا شئ يجبرني أن أصافحك أيها الدكتور القذر.....
Author: othman mohmmadien
Date: 11-10-2010, 12:16 PM
Parent: #65


الأخ/ صالح عبده
تحية طيبة...
غضبك لا مبرر له نتاج فعل صدر من شخص قد يقصد ذلك أو لا يقصده أو قد يكون في حالة من الشرود الذهني ولم يلتفت لفعلته هذه ... كان من الأولي الحديث معه مباشرة بدلاً عن هذه اللغة العنيفة ... والالفاظ ... غير الحميدة وغير المستحبة ... سب (والمؤمن ليس بسباب ولا لعان) ...
نعم للانتقاد والحديث عن عاداتنا الضارة والسيئة ولا للشتم والسب والتجريح .... أنت تشتم وتسب في إنسان وليس أمامه ... بل وراء ظهره وهذا ليس بفعل جيد أن تسب أصلاً ...
أفرض أن إدارة هذا المكان المعني إطلعت على بوستك هذا بطريقة ما ... حيث أنك أشرت للموقع الذي أقمت فيه محاضرتك هذه وأن هذه الإدارة رأت أن هذا الدكتور قد أساء لمؤسستها بهذا التصرف وقامت بفصله ... ما الذي أستفدته أنت .... غير تسبيب الأذى بطريقة غير مباشرة حيال هذا الشخص ...
نعم للنقد البناء ...
وهنالك المواقف المفاجئة مثل ما حدث معك والتي تتطلب تدخل سريع مثل ما حدث معك والتي علينا أن نضع في الحسبان المساس بكرامة الشخص المعني وإن كنت لم تفعل شيئ حياله لأنك غير قادر على تحديد كيفية قبول الطرف الآخر للنقد، ثم تأتي لتقع في نفس الخطأ المفروض والمساس بكرامة الشخص - يا خنزير ويا قذر ويا يا يا ....... أفرض أنه قرأ كلامك هذا ما الأثر الذي يترتب عنه وأعتقد أن منظر المخاط الذي أثار قرفك أهون من تلقي كل هذه الشتائم .... وهذه الآلية تخرج عملية الاصلاح من اسسها ومفاهيمها ... يبدو أننا في حاجة لنقد ذواتنا متعلمنا على جاهلنا ...
هذاوالله من وراء القصد والهداية ...
والسلام عليكم أجمعين

Post: #68
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-23-2010, 07:48 AM
Parent: #67

اخي othman mohmmadien

لماذا تفصلهادارة المستشفى وفي نظر الكثيرين
انه لم يأت بشى غير مألوف؟؟؟
هذه ثقافاتنا اخي عثمان ثقافة العيش في الوحل
الي مالا نهاية
تحياتي

Post: #69
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-24-2010, 08:13 AM
Parent: #68

هل تزول عادة ادخال الاصبع وازالة ماتراكم
فوق اللثة من بقايا البسكويت وبلعه مرة اخرى؟؟؟؟

Post: #70
Title: Re: لا شئ يجبرني أن أصافحك أيها الدكتور القذر.....
Author: othman mohmmadien
Date: 11-24-2010, 03:15 PM
Parent: #69


تشكر أخي صالح عبده على هذا الرد وأكرر
غضبك لا مبرر له نتاج فعل صدر من شخص قد يقصد ذلك أو لا يقصده أو قد يكون في حالة من الشرود الذهني ولم يلتفت لفعلته هذه ... كان من الأولي الحديث معه مباشرة بدلاً عن هذه اللغة العنيفة ... والالفاظ ... غير الحميدة وغير المستحبة ... سب (والمؤمن ليس بسباب ولا لعان) ...
نعم للانتقاد والحديث عن عاداتنا الضارة والسيئة ولا للشتم والسب والتجريح .... أنت تشتم وتسب في إنسان وليس أمامه ... بل وراء ظهره وهذا ليس بفعل جيد أن تسب أصلاً ...

Post: #71
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-27-2010, 08:51 AM
Parent: #70

Quote: أو قد يكون في حالة من الشرود الذهني ولم يلتفت لفعلته هذه ... كان من الأولي الحديث معه مباشرة بدلاً عن هذه اللغة العنيفة


othman mohmmadien
ياراجل خاف الله شرود زهني شنو البتتكلم عنو؟
العادات السيئة تصاحبك فى نومك اوصحوك
والشرود بخليك تقيف قدام العالم وتنشر
قاذوراتك ؟؟؟ وكمان في مستشفى؟؟؟
وهل تعتقد انسان زي دا وصل درجة من الوعي
بحيث انك تواجهه بعيوبه؟؟؟

Post: #72
Title: Re: لا شئ يجبرني أن أصافحك أيها الدكتور القذر.....
Author: نيازي عبدالله مرحوم احمد
Date: 11-27-2010, 11:42 AM
Parent: #71

تحياتي يا عزيزي
قطع شك دي سلوك غير مهذب اطلاقا ويدل علي تخلف صاحبه مهما كانت درجته العلميه

خلاف لذلك توجد سلوكيات وعادات اخري منفره للغايه

Post: #73
Title: Re: لا شئ يجبرني أن أصافحك أيها الدكتور القذر.....
Author: Kamal Karrar
Date: 11-27-2010, 01:48 PM
Parent: #72

شكرا الأخ صالح...

فعلا الموضوع إجتماعي من الدرجة الأولى

الممارسات الخاصة بالنظافة الشخصية كثيرة..

وعجيبة...

منها بعض العازفين لآلات الموسيقى...لما الكاميرا تقرب منهم (زووم)..

تلقى الواحد أضافرو طويلة ومليانة ######.. حاجة مقرفة ومؤسفة..

وتشعر بإنو اللحن (سايفوني)... من سايفون مش من سيمفونية...

أغرب حاجة هناك إعلان عن محل بصريات في أحد القنوات التلفزونية السودانية

تقوم فيه ممرضة أو معاونة طبية أو طبيبة لست أدري.. بحشر عدسة لاصقة في

عين طفلة بأصبعها بينما صبغة الحنة وبوخ الدخان يغطي أصبعها...ناهيك أن ظفرها

ليس مقصوصا.. أما كان الأجدر بها أن تلبس قفازا طبيا؟؟؟ ولا لازم نشوف الحنة والبوخة؟؟؟

حاجة مقززة وغير مهنية.. والله يكون في العون...

Post: #74
Title: Re: لا شئ يجبرني أن أصافحك أيها الدكتور القذر.....
Author: شرفى عبدالقادر
Date: 11-28-2010, 02:19 PM
Parent: #73

Quote: تشكر أخي صالح عبده على هذا الرد وأكرر
غضبك لا مبرر له نتاج فعل صدر من شخص قد يقصد ذلك أو لا يقصده أو قد يكون في حالة من الشرود الذهني ولم يلتفت لفعلته هذه ... كان من الأولي الحديث معه مباشرة بدلاً عن هذه اللغة العنيفة ... والالفاظ ... غير الحميدة وغير المستحبة ... سب (والمؤمن ليس بسباب ولا لعان) ...
نعم للانتقاد والحديث عن عاداتنا الضارة والسيئة ولا للشتم والسب والتجريح .... أنت تشتم وتسب في إنسان وليس أمامه ... بل وراء ظهره وهذا ليس بفعل جيد أن تسب أصلاً ... ...

********
(من ستر مسلما ستره الله يوم القيامة)
****
(سباب المسلم .....وقتاله كفر)
او كما قال رسول الله صلى الله عليه وسلم.
****

Post: #77
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 12-05-2010, 08:30 AM
Parent: #74

Quote: (من ستر مسلما ستره الله يوم القيامة


اخي شرفى عبدالقادر

السترة ياتا المقصودة هنا؟؟؟

Post: #76
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-30-2010, 07:35 AM
Parent: #73

Quote:
أغرب حاجة هناك إعلان عن محل بصريات في أحد القنوات التلفزونية السودانية

تقوم فيه ممرضة أو معاونة طبية أو طبيبة لست أدري.. بحشر عدسة لاصقة في

عين طفلة بأصبعها بينما صبغة الحنة وبوخ الدخان يغطي أصبعها...ناهيك أن ظفرها

ليس مقصوصا.. أما كان الأجدر بها أن تلبس قفازا طبيا؟؟؟ ولا لازم نشوف الحنة والبوخة؟؟؟

حاجة مقززة وغير مهنية.. والله يكون في العون


اخي/ Kamal Karrar
فعلا اوقفني هدا الاعلان كثيرا فاجهزة الاعلام تنشر
بدون اسس اوقوانين او دراسة

Post: #75
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 11-29-2010, 07:58 AM
Parent: #72

Quote: قطع شك دي سلوك غير مهذب اطلاقا ويدل علي تخلف صاحبه مهما كانت درجته العلميه

خلاف لذلك توجد سلوكيات وعادات اخري منفره للغايه


اخوى/ نيازي عبدالله مرحوم احمد
في اشياء لصيقة بينا يجب ان نتخلى عنها
مانخليها جزء من عاداتنا وتقاليدنا
تحياتي

Post: #78
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 12-06-2010, 06:48 AM
Parent: #75

اكره ان اشارك البعض في اكل الارز(الكبسة)
لأن بعد كل لقمة الباقي في اليد بنفضوه في
الصحن او يقش يده في الصينية.

Post: #79
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 12-07-2010, 08:14 AM
Parent: #78

لما ذا يصر بعضنا على جعل الاسنان
اداة للمسك والقطع والحمل وحتى النحت؟؟؟

Post: #80
Title: Re: لا شئ يجبرني أن أصافحك أيها الدكتور القذر.....
Author: صالح عبده
Date: 12-16-2010, 09:12 AM
Parent: #79

رمي المناديل والعلب اثناء سير
السيارة منظر غير لائق