Post: #1
Title: ال ليك ليك .. و ال ما ليك مَلَكْلَك ( مسدار أول )
Author: ابو جهينة
Date: 10-03-2010, 10:08 AM
ال ليك .. ليك
و ال ما ليك مَلَكْلَك
ال ليك ... يركزلك .. وكت الخُلُوق بتقوم عليك
و الما ليك ..يقابلك يِتْبسّم .. و في الضلمة يحدرليك
بالرخيص بيبيعك في سوق أول شريك
ال ليك .. وسط الناس بيقيف معاك في الخندق ديدبان
و بينو و بينك .. بيكيل ليك من اللوم و النُصُح كيمان
و الما ليك .. بين الناس يبقالك جفير سكين و سيد وجعة
و بينو و بين الناس .. بيردم فيك كلام يجيب السِبة و الخلعة
***
حاشية : ال مَلَكْلَك .. أسوأ من المجهجه
حاشية ثانية : ال ليك لا يشترط فيه صلة قربى أو حمية قبيلة
|
|