Post: #1
Title: بعد مجهود مضني لمينا في سعادة السفير في سدني
Author: بدرالدين كاجوري
Date: 10-02-2010, 02:58 PM
ياخ تعبنا تعب عشان نلم في السفير ..قايتو جنس مراوغة وارغو مايراوغة
مرة يقولوا لينا معذوم باربكيو ومرة يقولوا لينا في فندق موفامبيك ومرة يقولوا وين ماعارف انتوا في ده واللة الزميل خالد العبيد زاطو ضللنا قال ايه . المدرسة الاسلامية في لاكمبا تستقبل السفير
ياود العبيد بالمناسبة تم اجتماع داخل دار لاكمبا محل المدرسة الاسلامية ولكن اعضاء الجمعية وقفوا الف احمر قالوا لايجينا السفير ولا حاجة. قالوا نحنا جمعية اجتماعية بحتة ولن نحشر جمعيتنا في امور سياسية وياود العبيد الجماعة ديل زعلانين منك زعل شديد وانا اخوي نقلتك الحصل والدار دحين الناس ديل اخير تعتذر ليهم لافي مدرسة استقبلت السفير ولا حاجة
بحاول بقدر الامكان انقل مادار في لقاء سدني بالسيد السفير لانوا الجماعة منعوا التصوير والتسجيل وقالوا لاخونا ابراهيم برسي . كان صورتة فرد صورة بنطلب ليك البوليس . اها ابراهيم لملم كميراتة وقعد . عشان كدة حقوا الناس الحاضرين يساعدونا لان الواحد ممكن انسي تفاصيل مهمة . المهم سوف نحاول ونجتهد ما استطعنا نقل مادار
|
Post: #2
Title: Re: بعد مجهود مضني لمينا في سعادة السفير في سدني
Author: بدرالدين كاجوري
Date: 10-02-2010, 03:32 PM
Parent: #1
انا حقيقتا وصلت متاخر شوية وجدت الحضور يمثل اقل من واحد في المية من عدد السودانيين الموجودون في سدني
كان المتحدث الاستاذ محمد من ابناء دارفور تحدث بشكل مرتب حقيقة عن المعاناه في دارفوروفي ختام كلمتة رحب باعضاء السفارة وقال لهم نحنا معاكم فدوت القاعة بالتصفيق. بصفقوا علي شنو ماعارف
) تحدث بعدة الاستاذ عمار (اوبن) وسال عن الاقامة في السودان وكيفية تجديدها
اخذت فرصة وتحدثت عن بعض النقاط
بدات حديثي عن السمعة السيئة للبعثات للدبلوماسية السودانية بالخارج
وانها قائمة علي ارهاق المهاجرين والمغتربين بفرض الضرائب الباهظة وخلافة وضربت امثال مزبحة مصطفي محمود في القاهرة وضرب السودانيين في لبنان ومنع عجمان دخول السيدات السودانيات للامارة.
كماتحدثت عن عدم حوجتنا لخدماته لانه ببساطة اذا افتتحت قنصلية هنا سوف تقوم بفرض رسوم باهظة مقابل اي خدمة تقدمها ومن الافضل لنا ان نرسل السودان لان التكاليف سوف تكون اقل.
وزكرت لة ان السبب الرئيسي من تواجدنا هنا هو النظام القمعي الذي يمثلة لذلك نحن لانريد منة شيئا.
|
Post: #3
Title: Re: بعد مجهود مضني لمينا في سعادة السفير في سدني
Author: بشرى محمد حامد الفكي
Date: 10-02-2010, 04:34 PM
Parent: #2
بدرالدين سلامات
بالله الناس الصفقوا منو
عشان الناس تعرف
وواصل في المداخلات
وبجيك تاني
|
Post: #4
Title: Re: بعد مجهود مضني لمينا في سعادة السفير في سدني
Author: خالد العبيد
Date: 10-03-2010, 02:13 AM
Parent: #3
سلام يا كاجوري
وتحياتي
امس كنت في حديث جميل مع احد قيادات المدرسة الرافضة واتفقنا على ان :
المدرسة الاسلامية اللبنانية بلاكمبا
لا علاقة لها بـ المدرسة الاسترالية السودانية الاسلامية في نفس الشارع
والتي رفضت قاعدتها بالاجماع مجرد اقامة اللقاء داخل دارها.
اما بقية الاحداث فستنشر في وقتها
فلكل مقال مقام
|
Post: #5
Title: Re: بعد مجهود مضني لمينا في سعادة السفير في سدني
Author: بدرالدين كاجوري
Date: 10-03-2010, 02:36 AM
Parent: #4
حبيبنا بشري
الاحوال والاحاويل وكيف السودان علي حسك
يابشري خلي البصفق البلد كلها بقت تطبل للمؤتمر اللاوطني واللة حاجة تحير
تجينا بالسلامة
|
Post: #6
Title: Re: بعد مجهود مضني لمينا في سعادة السفير في سدني
Author: بدرالدين كاجوري
Date: 10-03-2010, 03:10 AM
Parent: #5
الاستاذ خالد سلامات
للاسف الشديد واللة ياخالد الجمعية السودانية بلاكمبا كثير من الناس لايعرف عنها شيئا . هذه الجمعية قائمة علي مجهود اصدقائنا واهلنا في كل سدني وليس لاكمبا. هذه الجمعية من اقدم وانجح الجمعيات في استراليا, جمعية اجتماعية ليس لها اي نشاطات سياسية فيها كل الوان الطيف السياسي ولكن كل واحد محتفظ بتوجهاته في داخلة .
كثير من الناس بتحدثوا عن دعم السفارة السعودية والاسلاميين اللبنانيين لها وللاسف هذا الكلام باطل وليس صحيح
وكونوا رئيسها الشيخ ثابت رجل متدين هذا لايعيبها في شئ لان الشيخ ثابت معروف عنة الاخلاق الفاضلة والامانة والنزاها والالتزام ومعروف عنه النشاط و الهمة في خدمة الجالية اذا كان من خلال الجمعية او جمعية دفن الموتي
وهنالك شباب كثر قد اسهموا في دفع عجلة الجمعية
ليست هناك مدرسة اسلامية سودانية والكلام ده فيهو ايحاءت ماجميلة . هناك فصلان كل يوم سبت فقط لتعليم الراغبيين من ابناء السودانيين الاعضاء بالجمعية والغير اعضاء اللغة العربية والتربية الاسلامية وهناك مجهودات من الاخوة الاساتذة المتطوعيين لغرز الثقافة السودانية وعاداتنا الجميلة .
وللجمعية نشاطات كثيرة جدا ولكنها اجتماعية بحته
اخي خالد عاب عليك كثير من الاعضاء في الجمعية حديثك عن المدرسة الاسلامية لذلك انا حاولت تنبيهك لذلك وانا اعرف اخلاقك جيدا
اجتمعوا وقرروا عدم استقبال السفير لان الجمعية اجتماعية فقط .
ولك الود حبيبنا وبجيك لكلام حلولي
|
Post: #7
Title: Re: بعد مجهود مضني لمينا في سعادة السفير في سدني
Author: خالد العبيد
Date: 10-03-2010, 03:31 AM
Parent: #6
سلام
كلامك صحيح واتفق معك يا بدر
رئاسة وتدين الشيخ ثابت للجمعية يجب ان يحترمها الجميع
الجمعيات هنا يمولها الاعضاء وتتلقى الدعم والتشجيع من الحكومة الاسترالية
ولا تتلقى دعم من اي سفارة وكاذب من يروج لهذه الاكاذيب
احمد حلولي زميل مصادم يهابه من يعرفه كثيرون تمنوا عدم حضوره
لكنه جاء وهو يملك عضوية هنا وسيكتب ما قاله
احترامي
|
Post: #8
Title: Re: بعد مجهود مضني لمينا في سعادة السفير في سدني
Author: قاسم المهداوى
Date: 10-03-2010, 03:34 AM
Parent: #6
| Quote: ابراهيم برسي . كان صورتة فرد صورة بنطلب ليك البوليس . اها ابراهيم لملم كميراتة وقعد |
يا كاجورى
صدقنى انت وبرسى ما عندكم شغله
خلاص شفتو سماحة جمل الطين
ناقصكم شوف ناس ساكت
الموضوع شنو ؟؟؟
قاسم
|
Post: #9
Title: Re: بعد مجهود مضني لمينا في سعادة السفير في سدني
Author: محمد البشرى الخضر
Date: 10-03-2010, 05:35 AM
Parent: #8
سلامات بدر الدين
| Quote: ومنع عجمان دخول السيدات السودانيات للامارة. |
ياخوي دا كلام شنو؟
|
Post: #10
Title: Re: بعد مجهود مضني لمينا في سعادة السفير في سدني
Author: بدرالدين كاجوري
Date: 10-03-2010, 02:10 PM
Parent: #9
ياقاسم سلامات
الموضوع توثيق لااكثر ولا اقل
|
Post: #11
Title: Re: بعد مجهود مضني لمينا في سعادة السفير في سدني
Author: بدرالدين كاجوري
Date: 10-03-2010, 02:16 PM
Parent: #10
ياابوالنسب سلامات[
B]واللة خبر منع السيدات السودانيات من دخول الامارة بدون محرم ده انا قريتو في اكثر من موقع وممكن تورونا حقيقته انتم القريبيين
|
|