صـديـق الـمـوج، قـال حـا يِـتـلـحِـس ... اشـعـار ود الـمـديـر مـع شـقـشـقـة الـزرآزيّـر ...

Quote: شوف يازول انا المره الجايه بفرع ليكم الموت وبعدين بعد بكرى ينزل البوست بتاع الوفاة حا يجو ناس ود الصائم وهو يضحك يقول ليك وقد كان الفقيد ملء السمع والبصر وكان احسننا وكان دسم الاخلاق او دمث لايهم المهم بجو يشكرونى كتير كده وانا خايف اقوم اقول ليهم خلو الكذب يا ناس حمزاوى ودينق وشول اشوانق ووالعوض المسلمى ده ماانا وارجع تانى الى رقدتى الابديه. انتو مادام انا كده ماتقولوها لى وانا حى خلونى ادلع شويه واتغرغر ابقى مغرور يعنى. وبعدين الجكس يجى يقول ليك فايت مروح وين ما بدرى يامنقه شنو ياود الموج بالغت وقطعت قلبنا وكلمتنى هنايه السماعه وقعت من يدى لما ناس البيت اتخلعوا وقربوا يلحقو المرحوم. اها بصراحه الحاجه دى بترضى غرورى وانا ميت، رغم علمى بكذب البعض من الجنس اللطيف ناس طلعت بفستانى حق البيت الشارع وهى تكون اتمكيجت لايمانها من ما سمعت ببكاى ،وناس دايره اركب بص الكلاكله ركبت مواصلات سنار ولما رفعت راسى لقيت روحى فى ام بده السبيل ديل... لكن كترن منها،بتدى الحبكة بعد درامى وكان لقت ليها موسيقى تصويريه تبقى حاجه ما تخلص. وبعدين تجى قصص ناس الرياض تلقى الواحد خمسه شهور ماسمع صوتى يقول ليك تصدق امبارح كان بتكلم معاى وصوتو ماعجبنى سالته قال لى عادى كنت نايم وصاحى هسه والبقول ليك لاقيته فى سوق البطحاء وشايل ليه كيس قلت ليه دى الشيله يا ابو الموج قال لى قول كفن ياخى، تصدق لما خفت والبجى يقول ليك ليه زمن بهاتى بالسفر،والبقول ليك كلم امه من تلفونى ده والله كان بتكلم كان قال ليكم وودعه وداع مفارق وقال ليها اعفى منى.. ودالباوقه وغريبه يقول ليكم لكن مافاحت منه روائح مسك لكنه كان طيبا.لوووول وخدوم، واحدين ولا بعرفهم يقول ليك والله سفر لى اولادى وماكان فى حجز ولاشال منى قرش مع انه لو قال لى جيب الفين ريال لظروف البنت فى الجامعه كان دفعت ليه الله يرحمه ياخى،مع انو اكون شحدته حق علبة سجاير شحده وقال لى انت عارف الظروف والتذاكر غاليه وقسط الجامعه للبنت لميناه بى الله ويامين. اها وفى نوع كده خيالى يبداها ليك بى والله مازول حياة..ودالموج ابدا مازول حياة يا حليلو والله كان بضحكنا مع انو بكون قال لاصحابه وقتها الزول السغيل ده ما يحترم نفسه عامل نفسه دمه خفيف بالله دى مداخله يكتبها.. اها ديل ماعافى ليهم مفروض يكلمونى وانا حى كان اتثاقلت لان المؤمن مراة اخيه.. الرجاء الاخير يابكرى اخوى انا عافى ليك ماتسود المنبر يوم اموت املاه زهور وبوكيهات ورد وبالونات ملونه وكده.. احبكم مووووووووووووت،،،،

هو برآهو قال. ما قلت انا
ما يجوني ناس العكننة
ما يجوني ناس الفلسفة
ما يجوني ناس الشفتنة
انا أصلي حالتي مبشّتنة
لا عندي مصدر، لا دليل
هو برآهو قال زولاً سغيل
ما تجوني تحموني المقيل
انا زول نحيف ما فيني حيّل
وما عندي حيّل للجهجهة
ولكآك، وكآآآآآك
ولغاغ وغآآآآآآآآغ
والبهدلة...
لو جيتو بس انا بستغيّل
واحرد واشتت من هنا
هو برآهو قال ما قلت انا...

قال ماهو حوض الموت،
بيفرعوا لينا تب
واوآت ينزل بكري طرف البوست
تشوفوهولعجب!!!
يبداهو ود الصايم المطموس
يقرقر ومنتشي
ويقعد يشكِر فيني ما يخليلي شي
يا حليلو، كان اخلآقو دسمة
وزول عديل
امانا ما كان ود بلد
راسي واصيل
يردم يشيل فوق الدبَر
يردم يشيل
فوق الضهر
يردم يشيل
فوق الكتف
يردم يشيل
حا شاهو ما انهدالوا حيّل
وحمزاوي يستلم الشُكُر
حرّم صدق
حاشاهو، ما كان زول فقُر
وطول عمرو ما عرف الخنا
ابكيهو يا بت الهنا
الزول دا زولنا ومننا
هو برآهوقال، ما قلت انا
ما يجوني ناس العكننة...

وأخونا دينق عينيهو
وِرمن بالبِكا
قال الفقيد كان زول
شِفِت ومقدِدا
ولمان تجوّط بيسدِدا
وشول بهناك يبكي وينف
وجنبوالمسلمي دار يسِف،
والسفة بس باقيالوا شيّنة
مع الأسف
وآقف متوّز،
ووشو منفوخ بالورم
ورمان من الآم الفُرآق
والقريفة ووجع الخرم،
ومرحومنا قال:
الناس دي ما كنت تشكِر
من زماااان!!!
خلاس إتلحسنا!!!
وظهروا فاقدين الحنان ؟؟؟
والله غايتو جِنِس مِحن!!!
يا الدنيا تب ماليك امآن
فتناكِ يا دار العنا.
هو برآهو قال، ما قلت انا
ما يجوني ناس الزهجنة...

والجِكس يكوّن في الهدوم
ويوصِفن:
يا حليلوصديق ابجِضوّم
يا حليلو صديق ابكُضوم
كان دِيّمة في المنبر يحوّم
الليلة عآد كيفِن ننوم؟؟؟
يا حليلو شيال الهِموم
الليلة ووووب قلبي انقطع
ما قايلة جمل الشيل بقع!!!
احيييييا مُصراني انفقع
وناس سلمى بت الشيخ
يجن متحزِمآت
واميرة بِت الشيخ
تكتِح في الرمآد
وشغآلة تش:
الليلة ووووووووووب
وبِت العجب جات طايرة
شايلآها الهبوب،
وفادية بِت اليمني جآت
ما مصدقة ومِتجنِنة
معقولة بس!!!؟؟؟
صدوقي يا ناس إتلحس؟؟!
وين ناس حبيبا وناس سحس؟؟؟
احيييييييييي انا،
يا ناس خلآس
هجر الكنار زاهي الغصون
سآب الغُنا؟!
آآآآآآآآآآآآآآه يا انا...
نار الهوى الوقادة
والشوق والعنا
حا يخلني اصبح مجننة
آآآآآآآآآآآآآآآآآآآآآه يا انا !!
سنة يا جنا
هو برآهوقال ما قلت انا
ما يجوني ناس الضهبنة...

هارون ديآب بالخُلعة
وآقع كركرب!!!
معقولة بس!!!
الزول دا دقا لي قريب!!!
ما عرفتو، صوتو اكان غريب؟
قُت ليهو: محتاج لي كشف؟
قال لي: من النوم صِحيّت
ما حاجة تحتاج لطبيب،
وكوستاوي قال: لاقيتو في
السوق الصباح شايلو كِيّس
قُت ليهو، يا موج البحر،
كِيّس الخدار؟
قال ليَ، يا زول قول كفن!
بالله لمآن إتهجم! وبِغِم كضم!!!
طارق ولد جبرين، حزين
يبكي ويوصِف:
امانِي ما كان زول حنيّن
وامانِي ما كان زول طرب،
وزول دندنة!
الليلِي عاد الزايلِي
لفحتو مِننا!!!
هو برآهو قال، ما قلت انا...

غريبة قال، الزول دا
ريحتو فسيخ، فسيخ!!!؟
الباوقة قال، زول المعارضة.
لا بُدَّ إنو يموت فطيس
غريبة قال،
لا كِنو كان زولاً عديل!
الباوقة قال،
يا اخ قول سغيل
لو كان معانا، كان عِطرو
هسا مِسِك يفوح
والحُوّر عليو يطاقشن
ولجنّة الفردوس يروح.
ابصلعة إتمحّن وكضم
قال المِرِق إنقصّا
والبيت إنهدم،
وحمد لبد حصد الندم.
وود المحرب يرثي قال:
رحل اللكان شيال تقيل
البيتو كان مفتوح سبيل
للدآجي عِز الهجعة ليل
وللطاشي حار بيهو الدليل.
ومرحومنا قال:
يا بكري، ختيني السوآد
انا زول محنّة، وزول غُنى
انا زول موسيقى ودندنة
ود المدير، كاتلني مالك يا جنى؟؟؟!!!
تتجازى شاحد ربنا
انا جِدو في عِز الشباب
وافراحي زي السوسنة.
يا زول برآك جِبتَ الكلآم
علي الحرآم ما قُلتو انا
الزول دا هُو الجاب الكلآم
والله يا ناس ما أنا...
.
.
.




ود المدير...

Quote: اها وفى نوع كده خيالى يبداها ليك بى والله مازول حياة..ودالموج ابدا مازول حياة يا حليلو والله كان بضحكنا مع انو بكون قال لاصحابه وقتها الزول السغيل ده ما يحترم نفسه عامل نفسه دمه خفيف بالله دى مداخله يكتبها.. اها ديل ماعافى ليهم مفروض يكلمونى وانا حى كان اتثاقلت لان المؤمن مراة اخيه..

(أميرة الشيخ).. النبي سلفيني حبة (الليلة ووووووب)..

النمنح بيها فوق (ود الموج) السغيل ده..

لوووووووووول..

ياخي طول العمر ليك..

وأصلو السغيلين بيعمروا..

أستاذ معاوية سلام.. وكل سنة وإنت بخير..

بالله من باب الاحتياط خلي ليا المداخلة دي هنا

الدنيا ما معروفة حدثني واحد ممرض في عيادة

البيطري قال لا فض فوه ان عملية البواسير ممكن

في اي لحظة تنتكس و تعمل جلطة ... و لا حول و لا قوة الا بالله

و لا نملك له غير الدعاء فلنكثر منه

Quote: اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار . اللـهـم عامله بما انت اهله ولا تعامله بما هو اهله . اللـهـم اجزه عن الاحسان إحسانا وعن الأساءة عفواً وغفراناً. اللـهـم إن كان محسناً فزد من حسناته , وإن كان مسيئاً فتجاوز عن سيئاته . اللـهـم ادخله الجنة من غير مناقشة حساب ولا سابقة عذاب . اللـهـم اّنسه في وحدته وفي وحشته وفي غربته. اللـهـم انزله منزلاً مباركا وانت خير المنزلين . اللـهـم انزله منازل الصديقين والشهداء والصالحين وحسن اولئك رفيقا . اللـهـم اجعل قبره روضة من رياض الجنة ,ولا تجعله حفرة من حفر النار . اللـهـم افسح له في قبره مد بصره وافرش قبره من فراش الجنة . اللـهـم اعذه من عذاب القبر ,وجاف ِالارض عن جنبيها . اللـهـم املأ قبره بالرضا والنور والفسحة والسرور. اللـهـم إنه فى ذمتك وحبل جوارك فقه فتنة الفبر وعذاب النار , وانت أهل الوفاء والحق فاغفر له وارحمه انك انت الغفور الرحيم. اللـهـم انه عبدك وابن عبدك خرج من الدنيا وسعته ومحبوبيه وأحبائه إلي ظلمة القبر وماهو لاقته . اللـهـم انه كان يشهد أنك لا إله الا انت وأن محمداً عبدك ورسولك وانت اعلم به. اللهم ثبته عند السؤال اللهم انا نتوسل بك اليك ونقسم بك عليك ان ترحمه ولا تعذبه اللـهـم انه نَزَل بك وأنت خير منزول به واصبح فقير الي رحمتك وأنت غني عن عذابه . اللـهـم اّته برحمتك ورضاك وقه فتنه القبر وعذابه و أّته برحمتك الامن من عذابك حتي تبعثه إلي جنتك يا أرحم الراحمين . اللـهـم انقله من مواطن الدود وضيق اللحود إلي جنات الخلود . اللـهـم إحمه تحت الارض واستره يوم العرض ولا تخزه يوم يبعثون "يوم لا ينفع مال ولا بنون إالا من أتي الله بقلب سليم" اللـهـم يمن كتابه ويسر حسابه وثقل بالحسنات ميزانه وثبت علي الصراط اقدامه واسكنه في اعلي الجنات بجوار حبيبك ومصطفاك (صلي الله عليه وسلم) . اللـهـم اّمنه من فزع يوم القيامة ومن هول يوم القيامة وأجعل نفسه أّمنة مطمئنة ولقنه حجته . اللـهـم اجعله في بطن القبر مطمئن وعند قيام الاشهاد أمن وبجود رضوانك واثق وإلي أعلي درجاتك سابق . اللـهـم اجعل عن يمينه نوراً حتي تبعثه اّمنً مطمئن في نور من نورك . اللـهـم انظر اليه نظرة رضا فإن من تنظر إليه نظرة رضا لا تعذبه ابداً اللـهـم أسكنه فسيح الجنان واغفر له يارحمن وارحم يارحيم وتجاوز عما تعلم ياعليم . اللـهـم اعفو عنه فإنك القائل "ويعفو عن كثير" اللـهـم انه جاء ببابك وأناخ بجنابك فَجْد عليه بعفوك وإكرامك وجود إحسانك . اللـهـم إن رحمتك وسعت كل شيء فارحمه رحمة تطمئن بها نفسه وتقر به عينه . اللـهـم احشره مع المتقين إلي الرحمن وفداً . اللـهـم احشره مع اصحاب اليمين واجعل تحيته سلام لك من أصحاب اليمين . اللـهـم بشره بقولك "كلوا واشربوا هنئياً بما أسلفتم في الايام الخالية" . اللـهـم اجعله من الذين سعدوا في الجنة خالدين فيها مادامت السموات والارض . اللـهـم لا نزكيه عليك ولكنا نحسبه انه اّمن وعمل صالحاً فاجعل له جنتين ذواتي أفنان بحق قولك: "ولمن خاف مقام ربه جنتان" اللـهـم شفع فيه نبينا ومصطفاك واحشره تحت لوائه واسقه من يده الشريفة شربة هنيئة لا يظمأ بعدها ابداُُ . اللـهـم اجعله في جنة الخلد التي وعد المتقون كانت جزاءً ومصيراُ لهم ما يشاءون وكان علي ربك وعداُ ومسئولاً . اللـهـم إنه صبر علي البلاء فلم يجزع فامنحه درجة الصابرين الذين يوفون اجورهم بغير حساب فإنك القائل " إنما يوفي الصابرون أجرهم بغير حساب " اللـهـم انه كان مصلي لك ,فثبنه علي الصراط يوم تزل الاقدام . اللـهـم انه كان صائم لك , فأدخله الجنة من باب الريان. اللـهـم انه كان لكتابك تالي وسامع فشفع فيه القراّن وارحمه من النيران ,واجعله يارحمن يرتقي في الجنة إلي اّخر اّية قرأها أو سمعها وأخر حرف تلاه اللـهـم ارزقه بكل حرف في القراّن حلاوة , وبكل كلمة كرامة وبكل اّية سعادة وبكل سورة سلامة وبكل جْزءٍ جَزاءً . اللـهـم ارحمه فانه كان مسلم واغفر له فانه كان مؤمنً. وادخله الجنه فانه كان بنبيك مصدقً وسامحه فانه كان لكتابك مرتل. اللـهـم اغفر لحينا وميتنا وشاهدنا وغائبنا وصغيرنا وكبيرنا وذَكّرنَا وأنثانا . اللـهـم من أحييته منا فأحيه علي الاسلام ومن توفيته منا فتوفه علي الايمان . اللـهـم لا تحرمنا أجره ولا تضللنا بعده . اللـهـم ارحمنا اذا اتانا اليقين ,وعرق منا الجبين ,كشر الانين والحنين اللـهـم ارحمنا اذا يئس منا الطبيب ,وبكي علينا الحبيب وتخلي عنا القريب والغريب وارتفع النشيج والنحيب . اللـهـم ارحمنا اذا اشتدت الكربات وتوالت الحسرات واطبقت الروعات وفاضت العبرات , وتكشفت العورات وتعطلت القوي والقدرات .اللـهـم ارحمنا اذا بلغت التراقي وقيل من راق وتأكدت فجيعة الفراق للأهل والفراق وقد حَمً القضاء فليس من واق اللـهـم ارحمنا اذا حملنا علي الاعناق ألي ربك يومئذ المساق وداعا ابديا للدور الاسواق والاقلام والاوراق الي من تذل له الجباه والاعناق . اللـهـم ارحمنا اذا ورينا التراب وغلقت القبور والابواب وانقض الاهل والاحباب فإذا الوحشة والوحدة وهول الحساب . اللـهـم ارحمنا اذا فارقنا النعيم وانقطع النسيم وقيل ماغرك بربك الكريم اللـهـم ارحمنا اذا أقمنا للسؤال وخاننا المقال ولم ينفع جاه ولامال ولا عيال وقد حال الحال وليس الا فضل الكبير المتعال . اللـهـم ارحمنا اذا نَسي اسمنا ودَرس رسمنا وأحاط بنا قسمنا ووسعنا . اللـهـم ارحما اذا اَهملنا فلم يزرنا زائر ولم يذكرنا ذاكر ومالنا من قوة ولا ناصر فلا امل الا في القاهر القادر الغافر يامن اذا وعد وفي , واذا توعد عفا , وشفع يارب فينا حبيبنا المصطفي واجعلنا ممن صفا ووفا وبالله إكتفي يا ارحم الراحمين ياحي يا قيوم يا بديع السموات والارض ياذا الجلال والاكرام . اللـهـم انه عبدك و ابن عبدك و ابن امتك مات و هو يشهد لك بالوحدانية و لرسولك بالشهادة فأغفر له إنك انت الغفار. اللـهـم لا تحرمنا اجره ولا تفتنا بعده و اغفر لنا و له و اجمعنا معه في جنات النعيم يا رب العالمين . اللـهـم انزل علي اهله الصبر والسلوان و ارضهم بقضائك. اللـهـم ثبتهم علي القول الثابت في الحياه الدنيا وفي الاخره ويوم يقوم الاشهاد. اللـهـم صلي وسلم وبارك علي سيدنا محمد وعلي اّله وصحبه وسلم إلي يوم الدين ..

تُـرى، مـن مِـنـّآ سـيـُوشـّح الـمِـنـبـر بـالـسـوآد فـ...مـرّة الـقـآدمـة ...

معاوية المدير حبابك عشرة ياحبيب

بركة الموتى السواك شاعر كبير

جاييك بالمهله بس ادينى ساعة زمان,,,

صديق الموج من مرقده الابدى،،،

شــــــرح المـــــفردات:
مقطع رقم 1 ،

ناس العكننة، والشفتنة، والفلسفة،.... إلخ : معروفين في البورض، وما دايرلهن رفع ضو.

كااااااااااك : مصطلح احمر إخترعه المفكر الشديد ولضيض هارون دياب للإغاظة، والمكاواة.

غاااااااغ : كلمة فلتت من كمال شداد، ونقلتها بت الشيخ للبورض لتصبح مرادفة لكلمة كاااااك.

احرد : من الحرداب، وهوالزعل الشديد. قال تعالى: ( وغدو علي حردٍ قادرين).




يتبع...

Quote: طارق ولد جبرين، حزين يبكي ويوصِف: امانِي ما كان زول حنيّن وامانِي ما كان زول طرب، وزول دندنة! الليلِي عاد الزايلِي لفحتو مِننا!!!

يمين ماك نصيح

Quote: أميرة الشيخ).. النبي سلفيني حبة (الليلة ووووووب).. النمنح بيها فوق (ود الموج) السغيل ده.. لوووووووووول.. ياخي طول العمر ليك.. وأصلو السغيلين بيعمروا.. أستاذ معاوية سلام.. وكل سنة وإنت بخير..

اميرة فاروق كيفك

صحى الموت سلام ما يغشاك شر

انت عارف يا معاوية نوع الملقوفات زى اميرة واميرة

البجن البكى اول واحدات ديل بجن عشان يشوفن المرحوم

خلى شنو؟يعملن بضايرن فى البيت ويلمن فى الملايات ويدخلن

فى الملايات المطرزات ومعليش فرشو ملايات عاديات والعيون زى

كدايس المطاعم عين فى الزبون وعين فى الماعون.

الناس ماشين عليكم وهن عشان يشوفن الدواليب وتياب مرة المرحوم...

والعدة المدسدسه وعادة بكونن شنافات خلاص لوووووووووول.

اميرة فاروق ان شاء الله ما يبكو عليك،

ماقلتى لى المرة بتحضنيها،،،

شــــــرح الـــــمــفــردات:
مقطع رقم 2 ،
يفرع : كلمة تستعمل في الزراعة. قال المزارع: الحوض ده مفروع،
يعني في زول إشتراهو وفرعو، اي بمعنى حشّ منو قبضة...

اوآت : بمجرد ان...

ود الصايم : احد مخضرمي البورض الضحكونجية...

اخلآقو دسمة: كلمة لآتينية مُعرّبة...

الدبَر : جمع دبرة، وهي العُوآرة تكون في ضهر الحُمار.
كناية عن الصبر وتحمل المشاق.

حمزاوي : ما دايرلوا رفع ضو، وهو احد اصدقاء الملحوس...

الخنا : راجع لسان العرب ومختار الصحاح، بتمعن...

بت الهنا : إحدى البورضابيات المخضرمات في ارض
المهجر . كندا، محافظة اونتاريو...

Quote: العيون زى كدايس المطاعم عين فى الزبون وعين فى الماعون .

Quote: (أميرة الشيخ).. النبي سلفيني حبة (الليلة ووووووب).. النمنح بيها فوق (ود الموج) السغيل ده.. لوووووووووول.. ياخي طول العمر ليك.. وأصلو السغيلين بيعمروا.. أستاذ معاوية سلام.. وكل سنة وإنت بخير..

الاميرة بت فاروق،
لعيد يتبارك عليكِ.
خليها كمان التسلفك معاها توب دمورية عشان تتحزمي
للردحي، الحكاية فيها دق قرع، نعمنو الفقيد مُو زولاً
ساهل، لآزم تحررن البكا...

ياصديق الموج العمر الطويل ليك والمداخلة حقيقي تعكس روحك المرحة

يامعاوية المدير حروفك جميلة وحقيقى تمتعت بهذه المساحة

يديكم العافية

Quote: بالله من باب الاحتياط خلي ليا المداخلة دي هنا الدنيا ما معروفة حدثني واحد ممرض في عيادة البيطري قال لا فض فوه ان عملية البواسير ممكن في اي لحظة تنتكس و تعمل جلطة ... و لا حول و لا قوة الا بالله و لا نملك له غير الدعاء فلنكثر منه

عثمان رغيم، ســــلآم، والتحايا عبرك للقرضابي،
وعبركما للأخ بشير حسن يوسف.
قمت بالإضطلآع علي بعض مراجع البياطرة القدامي،
وثبت لي صحة كلآم الممرض اعلآه. ولم يصل إلي علمي
انّ المرحوم قام بإجراء هذا النوع من العمليات، فيبدو إنه
عمل بمبداء الشينة منكورة، عموماً مداخلتك في الحفظ
والصون، وجُزيت خيراً علي الدعاء...

Quote: جاييك بالمهله بس ادينى ساعة زمان,,, صديق الموج من مرقده الابدى،،،

علي رآحتك يا مرحوم.
الدار الآخرة دي سمحة فيها المهلة...

يبرى ويستبرا ود الموج الراجل البركه ربنا يخلي لي شبابو يا عملات حبوبتي الهزار المسيخ ده لزومو شنو

Quote: يبرى ويستبرا ود الموج الراجل البركه ربنا يخلي لي شبابو يا عملات حبوبتي الهزار المسيخ ده لزومو شنو

آمين يا عفراء، والسلآم يغشاك محل تقبلي.
صديق الموج حبيبنا ونتمنى له كل خير، وهذا الضرب من الدّعابة
يُسمى ( الإخوانيات ) الغرض منه الخروج بالبورض من الجو
المكهرب الذي يغطيه هذه لأيام. ما تبقي حساسة شديد كده. علماً
إنني فيني لحمة رُباطاب، لذلك احياناً اكون أمسخ من الورر.
نتمنى معاك للمرحوم عمر مديد هادي وسعيد.


تحياتي...

شــرح الــمــفــردآت :
مقطع رقم 3،

دينق: معروف في البورض بمناكفاته الطويلة وعريضة.
شِفت: من الشفتنة، يعني تفتيحة وكده.
شول: احد سكان مدينة بحري.
المسلمي: ناس المسلمي كتيرين في البورض، والمقصود هو شيخ بورضاب
الخرتوم العوض ود المسلمي.
متوّز: التوزة رقصة مشهورة، والدلوكة التي يدقونها في التوزة تسمى التوزة
ايضاً، وتكون مشدودة شديد، عشان كده الزول البيكون زعلآن شديد يقولوا
عليهو فلآن واقف توزة.
القريفة: حالة تعتري ناس الصعوط والسجائر، والجبنة، والشاي، وباقي المكيفات...

Quote: يمين ماك نصيح

اوووووووه، اخونا النصيح ود جبرين!!!
يعلم الله مشتهيك، إنت ما بتظهر إلآ في
الصدقات؟ ...

ودالمدير والله جد زولاً خطير

الموج أخوى يادوب صغيــــر

من كلامو قلبى نطٌٌ وداير يطير

يتمناهو ليه؟ وحفيدو راجيو بالسرير!!

شايل حمل وشايل هموم وطنو الكبير

وكتين يجى فى حلتنا يسولو النفير

زولاً ضكر زولاً كريم ومو شريـــــر

ينثر كلام يبدع شعر يفوق جريـــــر

ود المدير إن شاء الله بوستك يتلحس ونلقاهو فى خور جنبو بير


ودالبدوى ابوفاطمة( أحدالمعجبين بأشعارك )

أخى ودالمدير بارك الله فى عمرك ومزيداً من الاخوانيات ( أفراح فقط )

Quote: بالله من باب الاحتياط خلي ليا المداخلة دي هنا الدنيا ما معروفة حدثني واحد ممرض في عيادة البيطري قال لا فض فوه ان عملية البواسير ممكن في اي لحظة تنتكس و تعمل جلطة ... و لا حول و لا قوة الا بالله و لا نملك له غير الدعاء فلنكثر منه

عثمان رغيم صاحبى العديل

انت يايابا انشاء الله يوم شكرك يجى

ونردها ليك فى سمحك..

ماقصرت والله ،هسع كاتب ده كلو عشان جلابيه امش شيلها.

غايتو جنس طفاسه هى،،،

Quote: انت عارف يا معاوية نوع الملقوفات زى اميرة واميرة البجن البكى اول واحدات ديل بجن عشان يشوفن المرحوم خلى شنو؟يعملن بضايرن فى البيت ويلمن فى الملايات ويدخلن فى الملايات المطرزات ومعليش فرشو ملايات عاديات والعيون زى كدايس المطاعم عين فى الزبون وعين فى الماعون. الناس ماشين عليكم وهن عشان يشوفن الدواليب وتياب مرة المرحوم... والعدة المدسدسه وعادة بكونن شنافات خلاص لوووووووووول.

والله يا صديق الموج في حالة وجود نوعية زي دي لآزمك تزعج
نفسك وتتنفض بسرعة من رقدتك الأبدية دي، وجري علي
البيت تلحق أُم العيال توصيها تعمل حسابها وتضاير الحاجات،
وإلا وحات الخُوّة بعدك يخلو البيت صعيداً زلقا.

ود المدير سلامات

زي ما قال اخونا ود جبرين (انت زول مسخوط )

معاوية الحبيب
يازول ما بقدر على البكا الكتير
ياحبيب شوف ليك زول تانى
غير صحبى دا
يعنى الزول اصلو ما يصادق ليهو زول فى الدنيا دى ؟
خلينى بت الشيخ دى
عمار صاحبى اخو صديق دا يمش وين يعنى .
صديق ياخ ما تهظر هظار بايخ زى دا

القنديل سراج البيت
ودالموج اخوي ..بلاهو سودة
ودالمدير زارزيرك ..دي خليها تشقشق
بعيد بعيد
كل الود لك ولود الموج
تقبل مروري ياروعة

شــرح الــمــفــردات:
مقطع رقم 4 ،

الجِكس: معناها الجِكس العديييييل ده.
ابكضوم: الزول البيكوضم، يعني يلوغد.
سلمى الشيخ: بوردابية عتيقة، وزولة روعة الكتابة عنها تطول،
والبيقول ما بعرفها ما ني عافي منو.
اميرة الشيخ: هي البورضابية التي لفحت غااااغ شداد وجابتها البورض.
اماني العجب: عاصرت فترة نضوج البورض، والآن تعاصر جاهليته.
فادية اليمني: احدى المكسرات في ود الموج، وهو كذلك.
حبيبا: المقصود حبيب نورة بتاع مصر الكتآب داك.
سحس: إسم الدلع للمخضرم ملآسي.

Quote: ياصديق الموج العمر الطويل ليك والمداخلة حقيقي تعكس روحك المرحة يامعاوية المدير حروفك جميلة وحقيقى تمتعت بهذه المساحة يديكم العافية

شاعرتنا الرقيقة المُرهفة، هند محمد، اخبارك واحوالك؟
يتقبل منكِ رب العالمين، في شأن اخونا صديق زول
الهوايل، وشكراً ليك وإن شاء الله ربنا يمتعك بالصحة
والعافية.
طلتك فرحتنا كتير...

Quote: ماقصرت والله ،هسع كاتب ده كلو عشان جلابيه امش شيلها. غايتو جنس طفاسه هى،،،

وانا أقول عثمان رغيم دا بيضرع في البوست كده مالو؟؟؟
هو اتاريهو ماسكلو عليك شي!!!

Quote: ود المدير سلامات زي ما قال اخونا ود جبرين (انت زول مسخوط )

اهلين، بدر السماء في صفاك.
إنت قايل ود جبرين نصيح، وحات عبد المعروف مُو نصيح.
إلا تعال إنت يا الزين، بتجي إيد ورا، إيد قدآم مالك؟
يا كافي البلا، مُلآح قرع وكِسرتاً بايتة تسويهن في عمود
وتجيبن معاك ما في!!!

Quote: احبكم مووووووووووووت،،،،

رحم الله موتانا
بس انت كدي موت يا ودالموج
وشوف انا اعمل فيك شنو

Quote: يبرى ويستبرا ود الموج الراجل البركه ربنا يخلي لي شبابو يا عملات حبوبتي الهزار المسيخ ده لزومو شنو

يا بتي يا عرفة يا بت ام عرفة
أها نجي للحكي الانت كاتباه
يبري ... ايش لون يبرى غايتو لو عايزاه يبرى أعمل ليه صيدلية في غرفة نومو
يستبرأ ... الأنا عارفو هو ما قاعد يستبرأ حتى لو قعدت جنبو بتشم الريحة
الراجل البركة ... غايتو دي نفوتها
ربنا يخلي لي شبابو ... سجمي سجمي

يا صديق الموج
عمرك يطول ان شا الله
لكن الموت حق... كان مت:
___________
يا صديق الموج
يبكنك بنوتا ...ساواتن للروج
طالعاتن فى اللوج ..
يبكوك الاخوان ...فوجن يدفر فوج

ويجيك الملكان:

: سعيك كيف يازول ..ورينا الحسنات

وتجاوب محروج:

-"انا؟؟ أنا بكتب فى البور..ج"

(من شدة ما خايف: أنا بكتب فى البورج)
_والبورج ده شنو كمان؟؟

-البورد البورد...*

وتواصل "محروج"
ده حوش كده فى السايبر ..تدخلو ما فى خروج
كان عندك باسويرد ..تطلع فيه بروج
وتنبذ وتشكر ..تتضامن وتأيد ...
مرات تبقى أسد وأحيانا فروج..
فيه أشعار وحكاوى ،
وفيه هشام هبانى ، وفيه ولد مكاوى
وناس تانيين بتكاوى
وناس بتغيظ و تلاوى ..
مرات يحلى ويصفى
مرات ريح الهوج
ركك بس أن تنقر وتكتب up أو " فوق"


ا_ادينا العنوان ..

-: دبليو دبليو دبليو...


والملك يزعل جدا
ده عمارك يا زول؟؟ دبليو دبليو دبليو؟؟

يا ميكا..ميخا ...يا قابى يا هابى ...

هوى ...يا عالم

تعالو تجيكم طاوية حبالها تعالو ...

شيلو... معاى... الجتة

وهو شايل وبيقنت:

حنوديك للتوج ..

الملك اعصابو تبوظ:..
"قال دبليو دبليودبليو " هاااااا.... حنوديك التوج ....

وهم شا يلنك وماشين للتوج

*بقلبك بتقول "عدل ...لخطأ مطبعى"

شــرح الــمـفــردات:
مقطع رقم، 5،

هارون دياب: مريخابي ومخترع مصطلح كااااااك.
كركرب: صوت الإنبراشة في الوآطة.
دقا لي: ضرب لي تلفون.
كوستاوي: احد دينصورات البورض.
بِغِم كضم: سكت وحر جواباً.
طارق جبرين: احد مطاميس البورض.
الزايلِي: الدِنيِ...

Quote: معاوية الحبيب يازول ما بقدر على البكا الكتير ياحبيب شوف ليك زول تانى غير صحبى دا

هو برآهو قال، ما قلت انا
ما يجوني ناس العكننة.

سلمى بت الشيخ، والله مشتاقين بالحيل.
ما عِندك خفسة لكالقري؟؟؟

Quote: القنديل سراج البيت ودالموج اخوي ..بلاهو سودة ودالمدير زارزيرك ..دي خليها تشقشق بعيد بعيد كل الود لك ولود الموج تقبل مروري ياروعة

باسط المكي يا حبيب، الله يبسطك في الدارين.
القنديل سراج البيت اتى محبيه من كل صوب
وحدب بعد ان شقشقت زرازيري فوق دوحته
الوارفة، ربنا ما يحرمنا ضُلها.
مرورك بسطنا تب يا باسط...

غايتو ح ندفنو ليكم دفنة كااااربة!!

Quote: يمين ماك نصيح

طارق جبريل ياوغد

ده موجبك مع الرجال
والله الواحدكان داير يناسبكم لكن بالطريقه
دى حا اغير راى نهااااااااااااااائى،،،

Quote: طارق جبريل ياوغد ده موجبك مع الرجال والله الواحدكان داير يناسبكم لكن بالطريقه دى حا اغير راى نهااااااااااااااائى،، ،

ود الموج،
ذكرتني حبوبتاً لي عندها صاحباتا قالت تعمل ليهن (تست)
عملت فيها ماتت، ورسلت زول البلد كلمهن. اها قامن رسلن
مع الزول جواب تعزية.
قالت: اليصبرن ساااااااااااكت، أكِنهن بيبكني بجوآب!!!؟

شـــــرح الــمـفــردات:
مقطع رقم 6 ،

غريبة: هو المتحدث الرسمي بإسم حبوبتو في البورض.
ود الباوقة: احد معجبي ومريدي شيخ عمر البشير.
ابصلعة: احد صعاليك العرب. عاصر الشنفرى، وكان اجرى منو،
وله حائية مشهورة كما للشنفرى لآمية. نزل للمعاش برتبة،
دكتور أمين محمد سليمان : مفكر و أديب و صحفي أمريكي من أصل سوداني.
وحمد لبد حصد الندم: اتى بها الشاعر لزوم وزن القافية.
وود المحرب: زول قنيص من بطانة ابسن.
مرحومنا: صديق الموج كما قال هو ولم اقل انا...

Quote: ودالبدوى ابوفاطمة( أحدالمعجبين بأشعارك ) أخى ودالمدير بارك الله فى عمرك ومزيداً من الاخوانيات ( أفراح فقط

ود البدوي ابو فاطنة،
يديك العافية.
ورد في مدونةشاعر الزرازير:

ابو فاطنة يا الزول الأمير
الموج اخوك موجاً غزير
ما هو الهوّين والحقير
الدنيا ما بتدي الحريف
مفروض يكون ماسك وزير
ضارب الكنادش والنسيم
ولآبس المزركش والحرير
مش طاشي وسط الزمهرير
يضرب كوارع ومويتو زير
لا عندو حارس لا غفير
لا عندو مرتبة لا سرير
وإن شاء الله الكان السبب
نلقاهو في خور جنبو بير...


تأخير الرد لمحاولة المجارآة.
قطعت نفسنا يا ابو فاطنة يا اخ...

ياود الموج
كان تعمل موتة تيست وتشوف البحصل شنو بي وراك






ليك العمر الطويل ان شاء الله

Quote: طارق جبريل ياوغد ده موجبك مع الرجال والله الواحدكان داير يناسبكم لكن بالطريقه دى حا اغير راى نهااااااااااااااائى،،،

في مثل شعبي بقول:

خميله ولقت الحد حيله..

بتكلم مع طارق، (المرحوم) مايتلحني..

Quote: ... ايش لون يبرى غايتو لو عايزاه يبرى أعمل ليه صيدلية في غرفة نومو يستبرأ ... الأنا عارفو هو ما قاعد يستبرأ حتى لو قعدت جنبو بتشم الريحة الراجل البركة ... غايتو دي نفوتها

حمزاوي يا شِديّد، لكن لقيتك رآصد تحركات
المرحوم عن جُنب...

ســـــــلآم Tumadir، عاملة فيها حريفة يعني؟!
داخلة كده بالراااااحة من غير تسلمي علي صاحب
البورض عشان ماسك الكشف.
شوفي يا زولة حاتدفعي، يعني حاتدفعي، وإلا رسلنالك
المرحوم في شكل بعاتي...

المبدع ودالمدير سلام


والله كأنك تتوقع الاحداث .. يوم الجمعة 24/9 إحتمال البورد كاد أن يتوشح سواداً..

الحمد لله ربنا قدٌر ولطف.. حادث فى 495 والحمد لله سلامة فى الروح والعربية مشت

القمامة .


وكان تكون حرشفة قبل الأرشفة.. وكان أخوانا واولاد حلتنا ناس ودالموج(المرحوم)

وكوستاوى,, وودبكرى بهاء _ وعماد عبدالله .. وإبن أختى عادل التجانى .. وصديقنابكرى

يكون فاتح حوشو للعزاء ..وكل السودانيز يبكونى حزاين ..

Quote: .وكل السودانيز يبكونى حزاين ..

تسلم أخي ازهري من كل شر وبلاء.
ربنا سبحانه وتعالى قدّر ولطف، والف حمداً لله
علي سلآمتك.
إن شاء الله تعمّر، وتحضر جديد احفادك...

Quote: غايتو ح ندفنو ليكم دفنة كااااربة!!

يا ود الصايم، ما تكلفت الراجل، وتمشي تعملها جغيّم شاي في الفراش،
وبخبخة شيشة، وونسة في البورض وهلآل مريخ.
يا اخوي في كشف، واحسن تنستر قبل ما المرحوم يقوم ينخلع فيك
زي ما عمل لطارق جبرين...

Quote: ياود الموج كان تعمل موتة تيست وتشوف البحصل شنو بي وراك ليك العمر الطويل ان شاء الله

ســــــــلآم شبكة،
خليهو يعملها عشان الجوابات
تتخابت من كل صوب وحدب...

Quote: في مثل شعبي بقول: خميله ولقت الحد حيله.. بتكلم مع طارق، (المرحوم) مايتلحني..

يا اميرة عينك في الفول، اقصد الفيل،
وتطعني في ضُلُو؟؟؟!!!

Quote: ياصديق الموج العمر الطويل ليك والمداخلة حقيقي تعكس روحك المرحة يامعاوية المدير حروفك جميلة وحقيقى تمتعت بهذه المساحة يديكم العافية

هند محمد تسلمى

لكن ما بتجى البكاء مالك،،،

Quote: طارق جبريل ياوغد ده موجبك مع الرجال والله الواحدكان داير يناسبكم لكن بالطريقه دى حا اغير راى نهااااااااااااااائى،،،

اها يا ود جبرين،
مرحوم ومرقتوهو من إيدكم.
خُم، و صُر.
هسع اكان جيت بالرااااحة غمتلو شي
تحت المخدة ما كان دا حصل...

Quote: هند محمد تسلمى لكن ما بتجى البكاء مالك،،،

يا ود الموج هند دي خلي بالك
من النوع البيبكو بالجوابات...