تعالوا نغنى لى بلدنا تعالوا

اغنِّيلِك
شاذلى جعفر شقَّاق

اغنِّيلِك
واشدَّ الليل
على الدُّغُش النسيمو عليل
وترقص لَىْ نجيماتاً
بِعَرفِن قبلتِك بِلحيل
واشهِّل بى هواك مسدار
واجيكِ عديل
يعربد بًىْ جواد القافية
زى دفْق المطر والسيل
واغنيلِك
اغنيلِك تغنى معاىْ
وبالباباى-اطعِّم شعرى-والقُنديل
اغنيلك سلام اخضر
متكَّن فوق ضفاف النيل
متيرب من جبل مرَّة
ومبرَّك بى عيون توتيل
من البركل شِرِب تاريخ
من الرجَّاف أبَى التكبيل
واغنيلِك
اغنيلِك مع القمرا
الورِثنا غناها جيل فى جيل
وادوبيلِك مع السادرات
مَسَكْ ديداب هواكِ دليل
واقوقيلِك مع القمرية
اشيل من الحمامة هديل
وابشِّر موكب الاطفال
واقول يا ناس لقيناشليل
واغنيلِك
اغنّيلِك سلام شفناهو
فى القرآن وفى التوراة وفى الانجيل
سلام سودانى بالأحضان
يهِز الليد يشد الحيل
قلوب تريانة بالطيبة
ومولَّعة فى دُجاك قِنديل
احبِّك انتِ يا بلدى
واخُتِّك فى الجبين اكليل
واغنيلِك
واغنيلِك