رسالة إلى كَسَّـــار التَّلِج ...

كسَّار التَّلِج

شاذلى جعفر شقَّاق


لمَّا تكسِّر تلْج الزُّلفَى

تطعِّم خشمك ..

يفتل قولك حبل العِرْفه

شويه شويه ..تلين الصفحة؛

صفحة سيدك .. مالك أمرك

بأىِّ طريقة تلتِّق إلفة

تلتِّق إلفة بأىِّ طريقة

عشان ما تنشِل من أعماقَك

ضحكة غريقة

يطفِّح كضبك

- فوق الترعة الراكدة - حقيقة

تحمِّس طبلك وتنسج نضمك

وتحمد وتثنى

تطرِّز مدحك بالألقاب

الهشَّه و نَيَّة :

يا رُبَّانا ..

ومرَّة سعادتك

ويا ريَّسنا

يا بحر القوم يا صافى النِيَّة

عشان تتسلَّق قوم اتملَّق

وبارى الحيطه واكتُل ضُلَّك

واسلَخ جلدك مية مرَّة

أدبغو ..لوِّنو زى ما عاوز

إن لا قيت فى موكب سيدك

مية ضرَّة

أو حوَّلتَ ولاك لى غيرو

خضَّر زرعك وضرعك درَّ

يا حِرْباية الزمن الطمسه

ويا تِرْباية السِّر والهمسه

بَدَل ما تفلح أرضك انتَ

تسرِّح غنمك زرعََ الغير

بَدَل ما تحلِّق بى جنحيك

تقصقص فى جنحات الطير

أب قوتاً حبَّه ومويةً جرعة

وعشاً قشَّه

النشوان الـ غنى غُُنانا

ما تتسلَّط الاَّ عليهو ؟

يقع دستورك فى جنحيهو !

تحشوها مساند ..بيها تجالس

عرش السادة بطانه بطانه

هابَّه هبوبك

وانتَ تضرِّى

والورتاب كاسيك مهانهكسِّر تلجَك وامسح جوخك

وامدح سيدك

ده الـ ختَّاك فى أسوأ مكانه ...

وكسر تلجك في حرّاية

تتور نفسك..

زين اتشابا وكتر ملقك..

عكر فينا مزاج

اتخاجج..

في ميزان من نفس الكفة..

ولما تذوب

في موية وشك آخر

تلجة..

باري سحاب الخفة

الشايل ..

وقايط بيهو كرامة

زول..




ـــــــــــــــــــــــ
بكرة بشوفه في "الحنك"

أهليييييييييين منعم

أشكرك يا جميل على

امدادك للنص (التلجى)

رغم أنف الصيف بالمزيد

من نشارة (الصبُر ) فى هذا

الزمن الهلوع ..

ياخوى الناس دى جنَّت عديييييييل

بطَّلو الطريقة التقليدية فى (كسّير) التلِج

وهجرو (بدَّال ) العجلة الزمان داك وبقوا يسحنو التلج

ناعم ويقدموهو فى شكل أقراص هندسية ..وعينك يا تاجر

والمساكين يروحو فيها !!

وقاك الله يا حبيب شر كسَّارين التلج ..

_______________

والله ناس الحنك ما عندهم أى ضمان

خوفونا عدييييييل من الكتابه ..

هسى استفزونى الناس الـ بكسرو فى التلج ديل

فى نهاراً يقلى الحبَّه ..