اعلان الخرطوم رديف ام ضد لاعلان القاهرة؟ وماذا سيقول عن العاصمة

الاعلان الذي بموجبه ستتحد قوى يسارية وسيصدر فيما قرأنا الاسبوع القادم
يقول بعض الذين وراءه ان اعلان القاهرة يعبر عن تحالف يميني داعم للنظام بطريقة او بأخرى
والقوى التي ستتحد هي قوى علمانية صريحة
فماذا سيكون وضع الخرطوم في اعلان الخرطوم
؟؟؟؟؟؟؟؟
وماذا سيحصل للنظام من جرائه ؟؟

ان شاء الله يا بركة الشيخ الجعلي يطلع السودان دا سيدو بايعو......ونقعد كلنا في الشارع..... زهجنا يا اخي....... اعلان اسمرا..... اعلان مشاكوس.... اعلان القاهرة .... اعلان الخرطوم....... اعلان الكوكا كولا...... الله ينتقم منهم فردا فردا...... الجوا والبرا

هاهاهاههاهها
ضحكتني يا سجيمان
وانا والله لما شفتك انتا جاي علي اترهبتا
ياربي دا داير يقول شنو
بظرافتك
وصورتك الملائكية دي
لكن حلوة حكاية يكون سيدو بايعوا دي : انشا الله ما تكون زعلان مني انا كمان ، انا قاعد أاشر علي الغبار ، ما قاعد أسويهو؟؟؟
وزعلتك دي في حد ذاتها ، قون ، هدف ، انا احرزت هدف في هذا البوست من الشوتة الأولى
والبحصل خير طالما نحن ما عندنا الرغبة نظل متفرجين أكتر من كدا

نكتة:
سنة 88 الأمطار أسقطت جدر وعروش وووو في منزل كنا نسكنه
قالت طفلة صغيرة لأبيها والمطر ينزل بشدة : أبوي أبوي الواطة دايرة تقع !!!

ما نكتة :
سنة 93 -94 كنت أجادل أحد الاصدقاء الاقتصاديين القدامى في ان (هؤلاء)يستهلكون الموارد ويهدرونها وسوف يأتي من بعدهم فلا يجدون شيئا
فأجابني بمحاضرة مفادها ان الموارد ستظل موجودة وضرب لي بذلك عدة أمثلة منها ان الـ52 كرتا تظل موجودة وبلعب كل قيمه فيها ويمضي .
؟؟؟؟
يديك العافية
يا سمح

والله يا فتحي اكتر حاجة عجبتني نقعد في الشارع يعني دي تجي كيف شارع افريقيا ولا شنو

خالد
هو انتا ولا
انا
ولا هو
ماقايلين روحنا قاعدين من الوطن
في الشارع هسا ؟؟؟
سواء كنا داخل سجنه
او في منفاه
نحن على هامش هامش الفعل
وهامش هامش هامش حسابات كثيرين ممن يتكلم باسمنا
لكن
شكرا ليك المتاوقة
ومدة اللسان
ويديك العافية

يا فتحي..... انت قايلني ما بعرف انضم في السياسة؟ ..... وحات الرسول نضام نضما.... يصوطها فوق تحت....... كدي لم لي عشرة تنفار وخليني انضم فوقهم....لو ما قلبو الحكومة...... والله بس انت مولني......وخليني احوم فوق ناس السودان واقول لهم سيدو عاوز يبيعو.......ويقعدكم في الشارع اكان ما البلد دي كلها تقلبت فوق تحت...... انت مخلي بالك يا خالد؟

العفو
انا قت كدا؟؟؟

يطرشني ما سمعت منك حاجة زي دي يا فتحي

ينصر دينك يا استاذ خالد
يمكن يكون فهم كدا من كوني قلتا اني اترهبتا من جيتو
اصلي ما متعود سجيمان يزورني
وصراحة بكش من صورته دي
وتعجبني تعليقاته الممعنة في الاضحاك والادهاش
وخيرا تعلق شرا تتفهم

خالد تكون سمعتها بنتك البتتلبد دي

عليك الله يا قشيران بتي دي سالتك واقفه راجياني مالك وماله

حالتي انا شاريها وواقف مع واحدة وهي بتاوق لي

انتو عارفين
انا حاضطر استعير جملة قاعد اقولا لي تلاميذي
بعد كل حالة مرح هرج أو هرج مرح تعتري الفصل فجأة :ـ
نحن ما عندنا مانع ياشباب اننا نضحك معاكم لي بكرة
لكن يفترض تعرفوا وتحسوا انكم انتو الخسرانين ما أنا
لان الوكت البناخدوا معاكم دا مفروض انكم تستفيدوا منه بشكل جاد

ومنكما لله
خستكتوا لي بالبوست

فتحى المفهوم من اعلان الخرطوم انو اعلان القاهرة لقوة يمينية اذا لماذا اعترضت عليه الحكومة
ماهى اقوال الناس فى الشارع والهمس بعد الندوات هل تعد اعلان القاهرة لقوة يمينية وهو محاولة تقرب للحكومة
ماهى اقوال افراد اليسار
ماهو راى الحزب الشيوعى فى اعلان الخرطوم
لماذا تاجل اصدار اعلان الخرطوم.....
هل اعلان الخرطوم عدم اعتراف بكل جهود التجمع ام فقط باعلان القاهرة
ماراى الناس بانه لم تكن هنالك مقدمات لاعلان القاهرة

تطلق إعلان الخرطوم خلال أيام

حق والناصريون وقوى أخرى تندمج باسم الحركة الديمقراطية

الخرطوم ـ درة قمبو

تتهيأ قوى اليسار السوداني لإطلاق مشروع اندماج واسع تتخلى بموجبه التنظيمات المشاركة عن اسمائها المعروفة والخروج للساحة السياسية باسم الحركة الديمقراطية الإجتماعية.

ويضم الكيان المرتقب حركة القوى الجديدة «حق» بزعامة الحاج وراق والحزب الإشتراكي العربي الناصري بقيادة مصطفى محمود والحزب الوحدوي الناصري برئاسة ساطع احمد الحاج بجانب حزب البعث العربي الإشتراكي «القطر السوداني» وحزب المؤتمر الوطني المعارض والتحالف الوطني الديمقراطي وشخصيات مهمة ابرزها د. حيدر ابراهيم علي ود. فاروق احمد آدم وعبد الله آدم خاطر

وعلمت «الأضواء» أن القوى المعنية تعكف حالياً على دراسة الصيغة الأولية للمنطلقات النظرية والعقد السياسي الإجتماعي ، والترتيبات الانتقالية التي حددها الاتفاق بعامين تسبق تحلل أطراف الشراكة الجديدة من هياكلها ومسمياتها الحالية وأبلغت «الأضواء» مصادر وثيقة الصلة بالأحداث أن خطوات التفاهم والاتفاق تمضي حثيثاً للوصول لنهاية الحوار المشترك الذي بدأ منذ أكثر من عام ونصف.

وفيما تترقب أروقة السياسة السودانية خلال اقل من اسبوع ميلاد إعلان الخرطوم الذي يباشر به الحلف الجديد خطواته العملية للاندماج اكدت ذات المصادر أن الوثيقة المرتقبة من شأنها إثارة جدل كثيف باعتبارها مستوعبة لرؤى القوى التي تطلقها ومتجاوزة لنصوص إعلان القاهرة الذي تصنفه ذات القوى بأنه تكريس لسيطرة اليمين الداعم بصورة أو أخرى للحكومة.

وفي ذات السياق ابلغ «الأضواء» الامين العام لحق الحاج وراق أن المنطلقات الفكرية والنظرية للكيان الجديد تستوعب تماماً اطروحات حركة القوى الجديدة وتقنعها بالتخلي عن اسمها الذي تنازعها فيه جهات أخرى فيما أكد امين عام الحزب الإشتراكي العربي الناصري مصطفى محمود أن خلافهم مع الجناح الآخر للحزب لا يمنع إندغامهم في منظومة جديدة بالنظر لحقيقة أن الخلاف ظل تنظيمياً لا يرقى للمفاصلة الفكرية بجانب أن التيار الآخر يظل الأقرب لمجموعته فكرياً ، ومضى مصطفى محمود لتأكيد حتمية استعداد القوى الجديدة لمتغيرات ما بعد السلام عقب تجلي تكتل قوى اليمين في إعلان القاهرة.

Aladdwaa.com
Monday 6-16-03
First Page

شكرا زمراوي
على الأسئلة
وعلى إيراد الخبر كاملا
هو كان مصدري
وحده حتى الان
وعلمي علمك
إلى حين اشعار اخر