Post: #1
Title: سمية الحسن..أبو حريرة..المحرب..الليلة لاقيتو..محزّمآ وقفت أمام أبي الخليفة أبي المهابة و الجمال
Author: الطيب بشير
Date: 09-27-2010, 11:37 AM
.
بمصادفة محضة و أنا أعزّي كرام البطاحين في عزاء بالمغاربة، جوار حلة كوكو، و كان دليلي السياحي الصديق إبراهيم البكري الشيخ السائح الشيخ طه البطحاني، و النسب متصل و غير متسلسل، و كلما (شلنا) الفاتحة مع أحد الوجهاء ساءلت إبراهيمآ عن ضالتي، حتى أتيناه، و البحر يؤتى، و أسعدني جدآ لقاء رجل متواضع و هو من أحق الناس بالتعالي و أقدرهم عليه..
شملني بلطف بالغ..فقمت إتكـيـّـفت..
و برغم ظرف العزاء و الهواتف و مقاطعة الناس لنا، لكننا إختلسنا أحاديث
و تبادلنا الأرقام
و إن شاء الله سنلتقي..
أها..موش بختي؟
.
|
Post: #2
Title: Re: سمية الحسن..أبو حريرة..المحرب..الليلة لاقيتو..محزّمآ وقفت أمام أبي الخليفة أبي المهابة و ال
Author: محمد عبدالرحمن
Date: 09-27-2010, 11:45 AM
Parent: #1
بختك (ساكت) ياودبشير ..بختك شديد والله ..
وانت تقف بساحل خالد محمد صديق طلحه ..
قاليك ..بطحانى سائق عربيتو صدم ليهو
زول وقتلو ..وقوموا ياالبطاحين امشوا
استلموا العزاء بتاع الميت ..من صيوان واكرام
ضيوق ..واستقبال معزين ..اهل الميت بقوا يتفرجوا
فى الناس البجروا حفايا ديل ..اها صادف انو الناظر
محمد صديق طلحه جا داخل يعزى ..عزى ورجع ..
والجماعة بعرفو فى ابو المرحوم ..قالوا ليهو
دا الناظر محمد صديق طلحة ..قال ليهم هووى يا
ناس ..الناس الشفتهم ديل كلهم نظار ..مافيهم
زول ناقصه منها حاجة ..
تحياتى ياخ ...
|
Post: #3
Title: Re: سمية الحسن..أبو حريرة..المحرب..الليلة لاقيتو..محزّمآ وقفت أمام أبي الخليفة أبي المهابة و ال
Author: الطيب بشير
Date: 09-27-2010, 01:07 PM
Parent: #2
.
أهلين حبيبنا محمد عبدالرحمن
أي نعم ..
كان لقاء الرجل الفاضل أبو الخليفة واحدآ من الأمنيات تأخـّـرت بيد أنها تحقـقـت
و بإذن الله ستتكرر..
و لو ربنا مدّ في العمر ح نزور ود ساقـُـرتا و (نفهم) حاجة..
Quote: اهل الميت بقوا يتفرجوا
فى الناس البجروا حفايا ديل .. |
و الله أنا متعتي في الدنيا لما أشوف البطاحين مهتمين بضيوفهم، في الشيخ الكباشي الناقة بتتعقر زيها زي أي عمبلوك وزنو تلاتة كيلو، و في عزاء دفعتنا الراحل الشهيد المقدم شرطة عثمان البطحاني و الذي توفي صباح العيد القبل الفات، كانت نحو ثلاثين عربة مدججة بالضباط تنهب الطريق لأبي دليق و قلت لنفسي أهاااا..الليلة البطاحين جاهم إمتحان..و حياتي منك اللحمة كانوا بيجيبوها لينا بالجرادل..و أظن اللحمة ذاتها كانت مستغربة، ذلك أن الجردل أصلآ لتوزيع الويكا..و اللحمة تأتي مقطـًـعة دقاق و تأتي معزّزة مسروسة..و نحن نكون خمسة ضيوف قاعدين أرضآ و بناكل يجي الولد شايل الجردل ..أقوم أنا بشلاقة أقول ليهو:
ما يحتاج ياخي ما تخت لحمة
يقوم عـمـّــك بلهجة من إعتاد الأمر و النهي يقول لي:
ما تقول ليو ما يكب، و إنت ياااا أب رويس ما تشاور الضيف..كــُـب بس..
غايتو (الفضلة) كانت تكفي لإقامة مناسبة خرطومية مااااهلة!!
يرحم الله دفعتنا عثمان البطحاني...و ربنا يزيد البطاحين رفعة..
.
|
Post: #4
Title: Re: سمية الحسن..أبو حريرة..المحرب..الليلة لاقيتو..محزّمآ وقفت أمام أبي الخليفة أبي المهابة و ال
Author: خالد المحرب
Date: 09-27-2010, 09:36 PM
Parent: #3
الاخ الطيب بشير لك التحيه اخى الكريم
طبعا ابو الخليفه هو الزبير الحسن طلحه
اذا كنت الان فى الخرطوم بلغه التحيه وعندما تذهب الى
ود ساقرتا بلغ السلام الى والدته حاجه هالة الشيخ الزبير
فانت مننا وفينا
|
Post: #5
Title: Re: سمية الحسن..أبو حريرة..المحرب..الليلة لاقيتو..محزّمآ وقفت أمام أبي الخليفة أبي المهابة و ال
Author: حذيفه ابراهيم الكباشي
Date: 09-27-2010, 09:52 PM
Parent: #4
اولاد بطحان تعيشو ويزيد مراحكم ناير
وناركم في سراة الوادي تهدي الحائر
للضيفان تهوشو وتصدو غارة الغايــر
ماهيلكم تزحو ان كان يزح الدراير
حباب اشرف واكرم واشجع اهل السودان حباب ابناء العمومة
..
|
Post: #6
Title: Re: سمية الحسن..أبو حريرة..المحرب..الليلة لاقيتو..محزّمآ وقفت أمام أبي الخليفة أبي المهابة و ال
Author: الطيب بشير
Date: 09-28-2010, 01:24 PM
Parent: #4
أهلين عزيزي خالد المحرب
شكرآ لك و تقدير كبير
هاتفني اليوم الرائع ابو الخليفه
و ذبحنا خراف سيرتكم الشهية
| Quote: وعندما تذهب الى ود ساقرتا بلغ السلام الى والدته حاجه هالة الشيخ الزبير |
جدآ..لك علي إن شاء الله..
و أشكرك كثيرآ
.
|
Post: #7
Title: Re: سمية الحسن..أبو حريرة..المحرب..الليلة لاقيتو..محزّمآ وقفت أمام أبي الخليفة أبي المهابة و ال
Author: خالد المحرب
Date: 09-28-2010, 07:50 PM
Parent: #6
Quote: هلين عزيزي خالد المحرب
شكرآ لك و تقدير كبير
هاتفني اليوم الرائع ابو الخليفه
و ذبحنا خراف سيرتكم الشهية |
الاخ الطيب السلام عليكم اخى الكريم اعجبنى جدا فيما قلتو فى اخى ابو الخليفه
ولعلمى بمشاغله الكتيره واكيد ما يضطلع على ما كتبته فحبيت ان اخبره بما كتبته
فيه فاتصلت به نعم صباح اليوم
وحتى ازيد المحبه بينكم شكرا ولك التحيه
|
|