الراية البنفســــــــجية

من الناس الذين أحببتهم في سودانيزأونلاين ولدنا صلاح شتات ..
الزول ده طيب وودناس ومحترم جدا..
مثقف ومرهف وواعي وحساس جدا..
يكتب الشعر والنثر تماما بطريقة انسياب الماء من الأعالي ...
صلاح شتات هو حامل الراية البنفسجيةبلا منازع ، وهي راية ألوانها الحب والعشق والهيام والكتابة العذبةوالحكي الطاعم..
صلاح شتات مثل الزين ( في عرس الزين ) .. ينبش لآلئ الجمال وكنوزه ، يرسم لوحاته ، لكن سرعان ما يصطادها غيره ..
وكثيرا ما تحسّ الحسرة في أحاديث صلاح وهو يحدثك عن ليلة عرس كان حضورا فيها :
والله يا خال أنا ما كنت قايلها سمحة قدر دا ..
شنو يا صلاح ما نحن نبهناك ولفتنا نظرك .
والله يا خال انت مرّات بتكون مضرّ وغتيت خلاص ..
بالله يا خال شفت كذا وكذا وكذا ..
ثم ينطلق صلاح في وصف دقيق يبهرني أكثر مما يبهرني به نظري ..
ثم يعود صلاح مترددا :
بس يا خال قالوا صعبة شوية..
يا صلاح هي ما صعبة بس شخصيتها قوية ، ودي أحسن من المرة الشخصيتها ضعيفة..
والله يا خال انت فقري جدا.. بالله بتتذكر لما انت كلمتني عنّها ، يمكن قبل سنتين .. بس يا خال ما قلت لي سمحة قدر دا ..
يا صلاح ما أصلها البت يوم زفافها بتكون حلوة ..
يا خال دي موش حلوة وبس ، دي الحلا ذاتها ..

صلاح شخص هادئ وعادي جدا .
لا يعرف المكر ولا الخداع .
وهو شفاف لآخر حد ..
ظللت اذكر له الأسماء ، أرشّح له العرائس ..
لكنه رجل يحبّ التمحيص ..
ولا يكتفي بمجرد نظرة أو ابتسامة ..
يحب الدخول إلى دواخل البشر إلى قاع عقولهم ، إلى منتهى ذاكرتهم ..
يبحث عن امرأة طاعمة ..
ذكية ..
لمّاحة ..
ذاكرتها رطبة ..
وفوق كل هذا وافرة الجمال ..

صلاح شتات يبتسم كالأطفال
لا يزعجك
لا يجرحك
يدخل إليك لطيفا
يحذيك من طيبه
فيمنحك جرعة من السعادة



ابحثوا معي عن صلاح
وابحثوا معي لصلاح
أريد لصلاح عدد واحد بوردابية تنتمي إلى القمة
وأثق في أن صلاح سيسعدها
يكتب لها الشعر
ويغزل لها خيوط الحب

يا عمكـ .. كل سنة وإنت طيب
القابلة تتحقق الأماني إن شاء الله





شتات دا زولا سمح شديد!
يستاهل القلتوا وزيادة كمان!!